🍁സ്ത്രീധനം🍁 ഫുൾ പാർട്ട്

🍁സ്ത്രീധനം🍁 ഫുൾ പാർട്ട് 

നിരുപമയുടെവിവാഹം കഴിഞ്ഞപ്പോൾ വീടിൻ്റെ ആധാരം ബ്ളേഡ് തോമയുടെ കൈയ്യിലായി

മാസാമാസം കൊടുക്കാമെന്നേറ്റ പലിശ കിട്ടാതായപ്പോൾ തോമ വീട്ടിൽ കയറി വരാൻ തുടങ്ങി

തോമാ.. നീയെനിക്ക് കുറച്ച് സാവകാശം തരണം ,ഇപ്പോൾ എന്നെക്കൊണ്ട് യാതൊരു നിവൃത്തിയുമില്ല

നിരുപമയുടെ അച്ഛൻ തോമയോട് കെഞ്ചി

വിശ്വഭരേട്ടാ... നിങ്ങളുടെ മൂത്ത മകൻ ഒരു സർക്കാർ ജോലിക്കാരനായത് കൊണ്ട് ,നിങ്ങള് കൃത്യമായി പലിശ തരുമെന്ന ഉറപ്പിലാ ഞാൻ ഒന്നും നോക്കാതെ രണ്ട് മൂന്ന് ലക്ഷം രൂപയെടുത്ത് തന്നത്, എന്നിട്ടിപ്പോൾ മാസം മൂന്നാകുന്നു

നിങ്ങള് പറ എത്ര ദിവസത്തിനുള്ളിൽ എൻ്റെ മുതലും പലിശയും തിരിച്ച് തരാൻ പറ്റും

അതിപ്പോൾ ഒരു ആറ് മാസത്തെ സാവകാശം മതി ,അതിനുള്ളിൽ ഞാനെങ്ങനേലും തരാം

ശരി ,ഇപ്പോൾ ഞാൻ പോകുന്നു ഇനി ഞാൻ വരുമ്പോൾ എൻ്റെ സ്വഭാവം ഇതായിരിക്കില്ല

ഭീഷണി മുഴക്കി കൊണ്ട്, തോമ പടിയിറങ്ങി പോയപ്പോൾ ഭവാനിയമ്മ ഭർത്താവിൻ്റെയടുത്തേക്ക് വന്നു.

അല്ലാ ... നിങ്ങളയാളോട് എന്തുറപ്പിലാണ് ആറ് മാസത്തെ അവധി പറഞ്ഞത് ആ സമയത്ത് വല്ലോരും ലക്ഷങ്ങൾ കൊണ്ട് തരാമെന്ന് പറഞ്ഞോ ?

ആരും പറഞ്ഞിട്ടില്ല പക്ഷേ ഞാനൊരു വഴി കണ്ടിട്ടുണ്ട് നമ്മുടെ നീരജിനെ കൊണ്ട് ഒരു കല്യാണം കഴിപ്പിക്കാം ,അവന് സർക്കാർ ജോലിയുള്ളത് കൊണ്ട് നമുക്ക് ആവശ്യമുള്ള സ്ത്രീധനം ചോദിച്ച് വാങ്ങാല്ലോ?

ഉം അത് ഞാനും ആലോചിച്ചതാ

പക്ഷേ സ്ത്രീധനം വാങ്ങി കല്യാണം കഴിക്കാൻ അവൻ സമ്മതിക്കുമോ അക്കാര്യത്തിൽ പണ്ടേ എതിർപ്പുള്ളവനാണവൻ

അതൊക്കെ നിൻ്റെ മിടുക്ക് പോലെയിരിക്കും ,നീയവനോട് നമ്മുടെ ഇപ്പോഴത്തെ പരിതാപകരമായ അവസ്ഥയെ കുറിച്ച് ബോധിപ്പിച്ചാൽ മതി

ഉം ഞാൻ പറഞ്ഞ് നോക്കാം അവൻ സമ്മതിച്ചാൽ ആ തോമാടെ കയ്യീന്ന് ആധാരം തിരിച്ച് വാങ്ങാമായിരുന്നു, ആകെ സമ്പാദ്യമെന്ന് പറയുന്നത് ഈ വീടും പറമ്പുമാണ് ,അത് കണ്ട ബ്ളേഡുകാരൻ കൊണ്ട് പോയാൽ പിന്നെ ഇനി ഇളയവൾ അനുപമയുടെ കാര്യം വരുമ്പോൾ എന്ത് ചെയ്യുമെന്ന ആധിയായിരുന്നു എനിക്ക് 

വൈകിട്ട് ജോലി കഴിഞ്ഞ് വന്ന നീരജിന് ചായകൊണ്ട് കൊടുത്തിട്ട് ഭവാനിയമ്മ അവനോട് തോമ വന്ന് ബഹളം വെച്ചിട്ട് പോയകാര്യങ്ങളൊക്കെ പറഞ്ഞു.

ഞാനെന്ത് ചെയ്യാനാ അമ്മേ എന്നെ കൊണ്ട് ഇപ്പോൾ രണ്ട് മൂന്ന് ലക്ഷം രൂപയെടുക്കാൻ പറ്റുമോ ? സർവ്വീസിൽ കയറിയിട്ട് അധികനാളായിട്ടില്ലാത്തത് കൊണ്ട് ലോണൊന്നും ഉടനെ കിട്ടില്ല

അതിന് നിന്നോട് ലോണെടുക്കാൻ ആരെങ്കിലും പറഞ്ഞോ ? ഞാൻ പറഞ്ഞത് നീയൊരു കല്യാണം കഴിച്ചാൽ നമ്മുടെ ഇപ്പോഴത്തെ ബുദ്ധിമുട്ടുകളൊക്കെ മാറിക്കിട്ടും

അമ്മയെന്താ ഉദ്ദേശിക്കുന്നത് എനിക്ക് സ്ത്രീധനം വാങ്ങിച്ചിട്ട് കടം വീട്ടാമെന്നാണോ?

അല്ലാതെ വേറെ മാർഗ്ഗമില്ല മോനേ

നീയിവിടെ ആദർശവും പറഞ്ഞ് കൊണ്ടിരുന്നാൽ നമ്മുടെ കിടപ്പാടം കണ്ട പലിശക്കാരൻ കൊണ്ട് പോകും ,അത് കൊണ്ട് അമ്മ പറയുന്നത് മോനൊന്ന് സമാധാനത്തോടെ കേൾക്ക് സ്ത്രീധനം നമ്മൾ ചോദിക്കുന്നില്ല പക്ഷേ ഒരു സർക്കാർ ജോലിക്കാരന് വിവാഹ കമ്പോളത്തിൽ ഇപ്പോൾ എന്ത് ഡിമാൻറുണ്ടെന്ന് പെണ്ണിൻ്റെ വീട്ടുകാർക്കറിയാമല്ലോ അവരത് അറിഞ്ഞ് തന്നോളും, അത് നമ്മള് വേണ്ടെന്ന് വയ്ക്കേണ്ട കാര്യമില്ലല്ലോ

എന്നാലും അമ്മേ ...

ഒരെന്നാലുമില്ല ,ഞാനാ ബ്രോക്കറോട് നല്ല ആലോചനയുണ്ടെങ്കിൽ കൊണ്ട് വരാൻ പറഞ്ഞിട്ടുണ്ട് , നീ അടുത്ത ഞായറാഴ്ച്ച അയാളോടൊപ്പം, രണ്ട് മൂന്ന് സ്ഥലത്ത് പോയി പെണ്ണിനെ കാണ്, നിനക്കിഷ്ടപ്പെടുകയാണെങ്കിൽ ബാക്കി കാര്യങ്ങളൊക്കെ അച്ഛനും അമ്മയും കൂടി നോക്കിക്കൊള്ളാം

വീട്ടിലെ ബുദ്ധിമുട്ടോർത്തപ്പോൾ അമ്മയോട് മറിച്ചൊന്നും പറയാൻ കഴിയാതെ നീരജിന് മൗനം പാലിക്കേണ്ടി വന്നു.

പിറ്റേ ഞായറാഴ്ച കൂട്ടുകാരോടൊപ്പം നീരജ് പോയി രണ്ട് പെൺകുട്ടികളെ കണ്ടെങ്കിലും അയാൾക്ക് രണ്ട് പേരെയും ഇഷ്ടമായില്ല

ദിവസങ്ങൾ കടന്ന് പോയി മാസം ഒന്ന് കഴിഞ്ഞപ്പോൾ ഭവാനിയമ്മ വീണ്ടും നീരജിനെ സമീപിച്ചു

നീ ഇങ്ങനെ കാണുന്ന പെമ്പിള്ളേരെയൊന്നും ഇഷ്ടപ്പെടാതിരുന്നാൽ കാര്യം നടക്കുമോ ?അച്ഛൻ തോമായോട് പറഞ്ഞ ആറ് മാസത്തിൽ ഇനി അഞ്ച് മാസം കൂടിയെ ബാക്കിയുള്ളു അതിനുള്ളിൽ നിൻ്റെ കല്യാണം കഴിഞ്ഞ് അയാൾടെ കാശ് കൊടുക്കണം

ഇത്തവണ ഭവാനിയുടെ സ്വരത്തിന് പഴയ മയമില്ലായിരുന്നു.

അടുത്തയാഴ്ച കാണാൻ പോകുന്ന പെണ്ണ് നല്ല മിടുക്കിയാണെന്നാ ബ്രോക്കറ് പറഞ്ഞത്, ആ കുട്ടിയും വീട്ടുകാരും നിന്നെ നേരത്തെ കണ്ടിട്ടുള്ളതാണെന്നാ നിൻ്റെ ഫോട്ടോ കണ്ടപ്പോൾ ബ്രോക്കറോട് അവര് പറഞ്ഞത്, അത് കൊണ്ട് അവരുടെ ഭാഗത്ത് നിന്ന് എതിർപ്പൊന്നുമുണ്ടാകില്ല,

അതും നിനക്കിഷ്ടമായില്ലെന്ന് പറഞ്ഞ് ഇങ്ങോട്ട് വന്നേക്കരുത്

ഇല്ലമ്മേ... ഇനിയിപ്പോൾ ഞാൻ കാണാൻപോകുന്നില്ല ,അമ്മയും അച്ഛനും പോയി കണ്ടാൽ മതി, നിങ്ങൾക്കിഷ്ടപ്പെടുകയാണെങ്കിൽ ഉറപ്പിച്ചോളു, നിങ്ങൾ തിരിച്ച് വരുമ്പോൾ പെൺകുട്ടിയുടെ ഫോട്ടോ വാങ്ങി കൊണ്ട് വന്നാൽ മതി, എനിക്ക് നേരിട്ട് കാണണമെന്നില്ല 

ഇനിയിപ്പോൾ തൻ്റെ സങ്കല്പത്തിലെ പെണ്ണിന് വേണ്ടി കാത്തിരുന്നാൽ ചിലപ്പോൾ അമ്മ പറഞ്ഞത് പോലെ വീടും പറമ്പും തോമായുടെ കയ്യിലിരിക്കുമെന്ന് നീരജ് ആശങ്കപ്പെട്ടു.

നിരുപമയുടെ ഭർത്താവിൻ്റെ ബന്ധത്തിലുള്ള പെൺകുട്ടിയെയായിരുന്നു അച്ഛനും അമ്മയും കാണാൻ പോയത്

ഭവാനിയമ്മയും ,വിശ്വംഭരനും

ബ്രോക്കറോടൊപ്പം അവിടെ ചെന്ന് കയറുമ്പോൾ, നിരുപമയും ഭർത്താവും അവിടെയുണ്ടായിരുന്നു.

പെൺകുട്ടിയെ എല്ലാവർക്കും ഇഷ്ടമായി ,അവൾക്ക് കൊടുക്കുന്ന സ്ത്രീധനത്തെക്കുറിച്ച് കേട്ടപ്പോൾ ഭവാനിയമ്മയ്ക്ക് ഈ കല്യാണം എത്രയും പെട്ടെന്ന് നടത്തിയാൽ കൊള്ളാമെന്ന് തോന്നി

അങ്ങനെ രണ്ട് മാസത്തിനുള്ളിൽ വിവാഹം നടത്താമെന്ന തീരുമാനത്തിൽ അവർ ചായ കുടി കഴിഞ്ഞ് സ്വന്തം വീട്ടിലേക്ക് തിരിച്ചു .

അമ്മ കൊണ്ട് കൊടുത്ത പെണ്ണിൻ്റെ ഫോട്ടോയിൽ നീരജ് കണ്ണെടുക്കാതെ നോക്കിയിരുന്നു

നിരുപമയുടെ കല്യാണത്തിന് ഇങ്ങനെയൊരു സുന്ദരി ഉണ്ടായിട്ട് തൻ്റെ കണ്ണിൽ പെടാതെ പോയല്ലോയെന്ന് അയാൾ പരിതപിച്ചു.

ഫോട്ടോയ്ക്ക് പുറകിലെഴുതിയിരിക്കുന്ന ഫോൺ നമ്പർ ആ പെൺകുട്ടിയുടേതാണെന്ന് അടുക്കളയിൽ നിന്ന് അമ്മ വിളിച്ച് പറഞ്ഞത് കേട്ട് അയാൾ ചെറിയ വിറയലോടെ ആ നമ്പരിലേക്ക് ഡയൽ ചെയ്തു

ഹലോ ഇത് ഞാനാ നീരജ്

ങ്ഹാ ,ഏട്ടാ.. ഒരുമിനുട്ടേ.. ഞാൻ പുറത്തേയ്ക്കൊന്നിറങ്ങട്ടെ

അവളുടെ ഏട്ടാന്നുള്ള വിളിയിൽ നീരജിൻ്റെ നെഞ്ചിലൂടെ ഒരു കുളിര് പാഞ്ഞ് പോയി .

ങ്ഹാ പറയൂ ഏട്ടാ... എന്താ എന്നെ കാണാൻ വരാതിരുന്നത്

അത് പിന്നെ ,അച്ഛനും അമ്മയും ഒരു മോശം പെണ്ണിനെ എനിക്ക് സെലക്ട് ചെയ്യില്ലെന്നുറപ്പുണ്ടായിരുന്നു മാത്രമല്ല ഞാനിതിന് മുമ്പ് കുറെ പെൺകുട്ടികളെ പോയി കണ്ടെങ്കിലും ഒന്നും എൻ്റെ മനസ്സിലങ്ങോട്ട് പിടിച്ചില്ല

അതിൻ്റെയൊരു മടുപ്പ് കൂടിയുണ്ടായിരുന്നു

ഉം.. എന്നിട്ട് ഫോട്ടോ കണ്ടപ്പോൾ എന്ത് തോന്നി ,ഇതും ഇഷ്ടമായില്ലേ?

ഹേയ് ,ഒരിക്കലുമല്ല എനിക്ക് തന്നെ ഇഷ്ടമായത് കൊണ്ടല്ലേ ഞാനിപ്പോൾ അങ്ങോട്ട് വിളിച്ചത്

സത്യമാണോ

അതേ, എൻ്റമ്മയാണേ സത്യം

ഏട്ടന് അമ്മയെ ഭയങ്കര ഇഷ്ടമാണെന്ന് തോന്നുന്നു?

അത് പിന്നെ എല്ലാ മക്കൾക്കും അങ്ങനെയല്ലേ തനിക്കും തൻ്റെ അമ്മയെ ഒരുപാടിഷ്ടമല്ലേ?

അതേ അതെ ഹ ഹ ഹ

അവരുടെ ആ സംഭാഷണം ദീർഘനേരം നീണ്ടു

ദിവസങ്ങൾ പെട്ടന്ന് കൊഴിഞ്ഞ് വീണ് കൊണ്ടിരുന്നു

ഇരുവീട്ടുകാരും ചേർന്ന് തീരുമാനിച്ച ശുഭമുഹൂർത്തത്തിൽ

നീരജിൻ്റെയും രാധികയുടെയും വിവാഹം നടന്നു.

സർവ്വാഭരണ വിഭൂഷിതയായ രാധിക, അവളുടെ അച്ഛൻ നീരജിന് കൊടുത്ത പുത്തൻകാറിൽ വീട്ട് മുറ്റത്തെത്തുമ്പോൾ ഭവാനിയമ്മ നിലവിളക്കുമായി പടിവാതിലിൽ തന്നെ നില്പുണ്ടായിരുന്നു.

വലത് കാല് വച്ച് കയറി വാ മോളേ

സ്നേഹവായ്പോടെ മരുമകളെയും കൊണ്ട് ഭവാനിയമ്മ അകത്തേയ്ക്ക് കയറി.

ഭവാനി ചേച്ചീ ...വിശ്വംഭരേട്ടൻ അകത്തിരിപ്പുണ്ടോ?

പുറത്ത് നിന്ന് ആരുടെയോ വിളി കേട്ട ഭവാനിയമ്മ, തിരിഞ്ഞ് നോക്കി.

മീശ പിരിച്ച് കൊണ്ട് മുറ്റത്ത് നില്ക്കുന്നത് തോമയാണെന്നറിഞ്ഞ ഭവാനിയമ്മ വേഗം

മരുമകളെ, നിരുപമയുടെ കൂടെയിരുത്തിയിട്ട്,  വെളിയിലേക്ക് ഇറങ്ങി ചെന്നു.

ഇന്ന് ആറ് മാസം തികഞ്ഞ ദിവസമാ, വിശ്വംഭരേട്ടനോട് കാശ് റെഡിയായെങ്കിൽ എടുത്തോണ്ട് വരാൻ പറ , ഞാൻ ആധാരം കൊണ്ട് വന്നിട്ടുണ്ട്

അയ്യോ തോമാ ,പുള്ളിക്കാരൻ പുറകേ വരുന്നതേയുള്ളു ,ഇന്നൊരു നല്ല ദിവസമല്ലേ ഇവിടെ ബന്ധുക്കളും സ്വന്തക്കാരുമൊക്കെ നില്ക്കുമ്പോൾ അവരുടെ മുന്നിൽ വച്ച് എങ്ങനാ ഇടപാട് തീർക്കുന്നത് ,തോമാ ഒരു കാര്യം ചെയ്യ് അടുത്ത ഞായറാഴ്ച ഇങ്ങോട്ട് പോര് കാശ് റെഡിയാക്കി വച്ചേയ്ക്കാം

ഭവാനിയമ്മ മറ്റുള്ളവർ കേൾക്കാതെ അടക്കത്തിൽ അയാളോട് പറഞ്ഞു

മ്ഹും ശരി, ഇത് ലാസ്റ്റ് അവധിയാണ്, വിശ്വംഭരേട്ടൻ വരുമ്പോൾ പറഞ്ഞേക്ക്

ശരി ശരി തോമാ ധൈര്യമായിട്ട് പൊയ്ക്കോ

മറ്റുള്ളവർ ശ്രദ്ധിക്കുന്നത് കണ്ട് ഭവാനിയമ്മ വെപ്രാളത്തോടെ തോമയെ, അവിടുന്ന് പറഞ്ഞയച്ചു.

നേരമിരുട്ടി തുടങ്ങി

കൂട്ടുകാരെയൊക്കെ പറഞ്ഞയച്ചിട്ട് നീരജ് റൂമിലെത്തുമ്പോൾ രാധിക അയാളെ കാത്ത് അക്ഷയോടെ ഇരിക്കുകയായിരുന്നു

ഇരുന്ന് ബോറടിച്ച് കാണുല്ലേ?

ഉം ... ബോറടിയെക്കാൾ അസഹനീയം ഇവിടുത്തെ നശിച്ച ചൂടാണ് ,നിങ്ങൾക്ക് ഈ മുറിയിലെങ്കിലും ഒരു ഏസി ഫിറ്റ് ചെയ്തൂടായിരുന്നോ നീരജേട്ടാ...

അവളത് ചോദിച്ചപ്പോൾ നീരജിന് കുറച്ചില് തോന്നി

താൻ ഇന്നത്തേയ്ക്ക് ഒന്നഡ്ജസ്റ്റ് ചെയ്യ് ,നാളെ തന്നെ നമുക്ക് ഏസി ഒരെണ്ണം ഫിറ്റ് ചെയ്യാം

ഉം ശരി, എങ്കിൽ ,ഈ സാരി അഴിച്ചിടാൻ എന്നെയൊന്ന് സഹായിക്ക്

ഞാനോ ?

നീരജ് അമ്പരപ്പോടെ ചോദിച്ചു.

ങ്ഹാ .. അല്ലാതെ എനിക്കിത് ഒറ്റയ്ക്ക് അഴിച്ച് മടക്കിവയ്ക്കാൻ കഴിയില്ല ,അവിടെയും ഇവിടെയുമൊക്കെയായി കുറെ സേഫ്റ്റി പിന്നുകൾ കുത്തി വച്ചിട്ടുണ്ട് ,ഇരുപത്തി അയ്യായിരം രൂപയുടെ സാരിയാ, എവിടെയെങ്കിലും ഉടക്കി കീറിപ്പോയാലോ?

രാധിക പറഞ്ഞതനുസരിച്ച്, തോളിൽ മുന്താണി ഉറപ്പിച്ച് വച്ചിരുന്ന പിന്ന് ,വിറയ്ക്കുന്ന കൈകളോടെ നീരജ് ഊരിയെടുത്തു .

ഇനി താഴത്തെ ഞൊറിച്ചിലിൽ കുത്തിയ പിന്ന് അഴിക്ക് ചേട്ടാ..

അവസാനത്തെ സേഫ്റ്റി പിന്നും ഊരിയെടുത്ത് ,രാധികയുടെ അരക്കെട്ടിൽ നിന്നും സാരി അഴിച്ചെടുക്കുമ്പോൾ, അവളുടെ അടിവയറിലെ തുന്നിക്കെട്ടിയത് പോലൊരു പാട് കണ്ട്, നീരജ് അമ്പരന്നു.

ഇതെന്താടോ, സ്റ്റിച്ചിട്ടത് പോലെ ഒരു പാട് ,തന്നെ മുൻപ് ആരെങ്കിലും കുത്തിക്കൊല്ലാൻ ശ്രമിച്ചോ ?

അത് കേട്ട് രാധികയുടെ മുഖം മ്ളാനമായി .

അപ്പോൾ അമ്മയും നിരുപമയുമൊന്നും, എൻ്റെ പഴയ കഥകളൊന്നും പറഞ്ഞ് തന്നില്ലായിരുന്നോ?

രാധികയുടെ ചോദ്യം കേട്ട് നീരജ് നെറ്റി ചുളിച്ചു.

ഭാഗം -2

അപ്പോൾ എല്ലാവരും ചേർന്ന് എന്നെ വഞ്ചിക്കുകയായിരുന്നല്ലേ? നീയും അതിന് കൂട്ട് നിന്നു ,ഇത്രയും നാൾ നമ്മൾ സംസാരിച്ചിട്ട് ഞാൻ നിന്നോട് തുറന്ന് പറയാത്തതായി ഒന്നുമില്ല, പക്ഷേ, നിൻ്റെ ജീവിതത്തിലുണ്ടായ ഒരു പ്രധാനപ്പെട്ട സംഭവം മാത്രം, നീ എന്നോട് മറച്ചു, എന്തിനായിരുന്നു രാധികേ... എന്നോടീ ചതി ചെയ്തത്

ചതിയോ? നിങ്ങളെന്താ നീരജേട്ടാ ഈ പറയുന്നത്, ഇതൊക്കെ എല്ലാവർക്കുമുണ്ടാകുന്നൊരു അസുഖം മാത്രമല്ലേ? വന്ന് കഴിയുമ്പോഴാണ് പലരുമത് തിരിച്ചറിയുന്നത് ,എൻ്റെ അസുഖം തിരിച്ചറിഞ്ഞപ്പോൾ വളരെ വൈകി പോയിരുന്നു അത് കൊണ്ടാണ് ഓപ്പറേഷൻ വേണ്ടി വന്നത്

ങ്ഹേ! അസുഖമോ എന്തസുഖം?

നീരജ് ജിജ്ഞാസയോടെ ചോദിച്ചു.

ഏട്ടാ ... എനിക്ക് 

അപ്പൻ്റിസുണ്ടായിരുന്നു അതിൻ്റെ ഓപ്പറേഷൻ ചെയ്ത പാടാണിത്,

അന്ന് എന്നെ കാണാൻ നിരുപമയും വന്നിട്ടുണ്ടായിരുന്നു,

ആ കാര്യം, അവള് അമ്മയോടും പറഞ്ഞതാണ്, ഞാൻ കരുതി, അതൊക്കെ നീരജേട്ടനും അറിഞ്ഞ് കാണുമെന്ന്

ഹ ഹ ഹ അത്രേയുള്ളോ ?വെറുതെ മനുഷ്യനെ, കുറച്ച് നേരത്തേക്ക് തീ തീറ്റിച്ച് കളഞ്ഞു

അത് ശരി, അപ്പോൾ എട്ടനെന്താ വിചാരിച്ചത്?

ഹേയ് ഒന്നുമില്ല, ഞാൻ വെറുതെ..

ഉം ഉം, എനിക്ക് മനസ്സിലായി, വെറുതെ കിടന്നുരുളണ്ട

രസകരമായ ആ സംഭാഷണത്തിനൊടുവിൽ,

അവരുടെ ഇടയിലെ അകലം കുറഞ്ഞ് വന്നു.

നേരം വെളുക്കാൻ ഇനി അധിക സമയമില്ലെന്ന്, ചുവരിലെ ക്ളോക്ക് ,ഓരോ മണിക്കൂറിലും അവരെ ഓർമ്മിപ്പിച്ച് കൊണ്ടിരുന്നെങ്കിലും, നിദ്രയോടവർ പൊരുതിനിന്നു.

അവസാനം, ആറ് മണിയായപ്പോൾ ,നീരജിനോട് ഉറങ്ങിക്കോളാൻ പറഞ്ഞിട്ട്, രാധിക കട്ടിലിൽ നിന്നെഴുന്നേറ്റു.

വിടൂ ,നീരജേട്ടാ.. ഇനിയും താമസിച്ചാൽ, അടുക്കളയിലേക്ക് ചെല്ലുമ്പോൾ, ഇന്നലെ കണ്ട അമ്മയുടെ മുഖമായിരിക്കില്ല ,ഇന്ന്

തന്നെ വരിഞ്ഞ് കെട്ടിയ നീരജിൻ്റെ കൈകളെ അടർത്തിമാറ്റി, രാധിക ബാത്റൂമിലേക്ക് കയറി.

പ്രഭാത ഭക്ഷണം കഴിഞ്ഞ് രാധിക, പുറത്ത് തുണി വിരിക്കുന്ന, നിരുപമയെ സഹായിച്ച് കൊണ്ട് നില്ക്കുന്നത് കണ്ടാണ് ,നീരജ് അടുക്കളയിലേക്ക് വന്നത്.

അമ്മേ.. എനിക്കൊരു കാര്യം പറയാനുണ്ടായിരുന്നു

തിളച്ച് കൊണ്ടിരിക്കുന്ന കലത്തിൽ നിന്ന്, ചോറെടുത്ത് വേവ് നോക്കി കൊണ്ടിരുന്ന ഭവാനിയമ്മ, തിരിഞ്ഞ് മകൻ്റെ മുഖത്തേയ്ക്ക് നോക്കി

രാധിക, ഇന്നലെ ഇവിടുത്തെ ചൂട് സഹിക്കാനാവാതെ, വല്ലാതെ ബുദ്ധിമുട്ടുന്നുണ്ടായിരുന്നു, അവരുടെ വീട്ടിൽ രണ്ട് മൂന്ന് ഏസിയുള്ളതല്ലേ ? നമുക്കും ഒരെണ്ണം വാങ്ങണമമ്മേ ..

അതിനെന്താ, നിൻ്റെ കയ്യിൽ കാശിരിപ്പുണ്ടെങ്കിൽ പോയി ഒരെണ്ണം വാങ്ങി നിങ്ങളുടെ മുറിയിൽ പിടിപ്പിക്ക്, പിന്നെ കറണ്ട് ചാർജ്ജ് കൂടുമ്പോൾ, അതും നീ തന്നെയങ്ങ് അടച്ചോണം

അമ്മയ്ക്ക് താൻ പറഞ്ഞതത്ര ഇഷ്ടപ്പെട്ടില്ലെന്ന് നീരജിന് മനസ്സിലായി .

അല്ലമ്മേ .. എൻ്റെ കയ്യിലെവിടുന്നാ പൈസ ,രാധികയുടെ അച്ഛൻ തന്ന അഞ്ച് ലക്ഷം രൂപാ, അമ്മയുടെ കൈവശമല്ലേ സൂക്ഷിച്ചിരിക്കുന്നത്

ങ്ഹാ, അത് കൊള്ളാം, അപ്പോൾ ഈ കല്യാണത്തിന് ചിലവായതും, താലിമാല വാങ്ങിയതുമൊക്കെ പിന്നെ എവിടുന്നാ?

അതിന് അഞ്ച് ലക്ഷം രൂപ വേണോ? ബാക്കിയുണ്ടാവുമല്ലോ?

മ്ഹും ,നീയെന്തറിഞ്ഞിട്ടാ നീരജേ ഈ പറയുന്നത്, താലിമാലയും ഡ്രസ്സും, പിന്നെ കല്യാണത്തിന് ചിലവായതും കൂടി ചേർത്ത് മൂന്ന് ലക്ഷം രൂപയോളമാണ് തീർന്നത്

മൂന്ന് ലക്ഷം രൂപയോ ?അത് കുറച്ച് കടന്ന കൈയ്യായി പോയമ്മേ ... അല്ല ,അത് പിന്നെ എങ്ങനെ ചിലവാകാതിരിക്കും? ഡ്രസ്സ് എടുത്തപ്പോൾ ഇവിടെയുള്ളവർക്ക് മാത്രമല്ലല്ലോ എടുത്തത് ,അയൽക്കാർക്കും ,

നിരുപമയുടെ ബന്ധത്തിലുള്ളവർക്ക് പോലും എടുത്ത് കൊടുത്തില്ലേ? അത് മാത്രമോ ,ആവശ്യമില്ലാതെ കുറെ ടൂറിസ്റ്റ് ബസ്സുകളും വിളിച്ച് വരുത്തി ,ആകെ രണ്ട് ബസ്സിൽ കൊള്ളാവുന്ന ആളാണുണ്ടായിരുന്നത്, അതിനാണ് അഞ്ച് ബസ്സും പത്ത് കാറുമൊക്കെ, വാടകയ്ക്ക് വിളിച്ചത്

അത് പിന്നെ നമ്മള് രാധികയുടെ സ്റ്റാറ്റസിനൊപ്പം നില്ക്കണ്ടേ ? നമുക്ക് ഇപ്പോൾ കാശില്ലെന്നല്ലേയുള്ളു, പറഞ്ഞ് വരുമ്പോൾ, ഈ നാട്ടിലെ അറിയപ്പെടുന്ന തറവാട്ട്കാരാ നമ്മള്

ഉം ആയിക്കോട്ടെ എന്നാലും ,ബാക്കി രണ്ട് ലക്ഷം രൂപ കാണണ്ടേ? അതിൽ നിന്ന് ഒരു മുപ്പതിനായിരം രൂപയിങ്ങ് താ ,ഞാൻ രാവിലെ തന്നെ പോയി ഏസി വാങ്ങിച്ചിട്ട് വരാം

ങ്ഹാ, അത് ഞാൻ നിന്നോട് പറയാൻ മറന്നു ,നിരുപമയുടെ ഭർത്താവിന് അത്യാവശ്യമായി രണ്ട് ലക്ഷം രൂപ വേണമെന്ന് പറഞ്ഞു ,കടമായിട്ടാണ്, അവൻ്റെ ബിസിനസ്സ് ഒന്ന് പച്ച പിടിച്ചാൽ തിരിച്ച് തരും

എന്താ അമ്മേ.. ഈ പറയുന്നത്, അപ്പോൾ, കിട്ടിയ അഞ്ച് ലക്ഷവും പൊടിച്ച് കളഞ്ഞെന്ന് സാരം

എടാ ചെറുക്കാ..ഈ വീട്ടിലെ ആദ്യത്തെ മരുമകനാണവൻ,

ഒരത്യാവശ്യത്തിന് ചോദിക്കുമ്പോൾ ,നമ്മുടെ കയ്യിലുള്ളപ്പോഴല്ലേ സഹായിക്കാൻ പറ്റു, ഇനിയിപ്പോൾ തിരിച്ച് കിട്ടിയില്ലെങ്കിലും ചോദിക്കാൻ പറ്റില്ല, കാരണം നിരുപമയ്ക്ക് നമ്മൾ വലുതായിട്ടൊന്നും കൊടുത്തിട്ടില്ലല്ലോ?

എൻ്റമ്മേ ... ആ തോമായ്ക്കിനി പൈസ കൊടുക്കണ്ടേ? ആധാരം തിരിച്ചെടുക്കണ്ടേ? അതിനിനി എന്താ വഴിയെന്ന് അമ്മ ആലോചിച്ചിട്ടുണ്ടോ ?

നീയൊന്നടങ്ങ് നീരജേ.. നമുക്ക് രാധികയുടെ വീട്ടിൽ നിന്ന് അഞ്ച് ലക്ഷം രൂപ മാത്രമല്ലല്ലോ തന്നത്,

നൂറ് പവനും കൂടിയില്ലേ? തോമായ്ക്ക് കൊടുക്കാനുള്ള കാശിന് കുറച്ച് സ്വർണ്ണമെടുത്ത് പണയം വച്ചാൽ പോരെ?

എന്നിട്ടാ പണയം പിന്നെ എങ്ങിനെയെടുക്കും?

അത് ശരിയാണല്ലോ ? മാത്രമല്ല പലിശയും കൊടുക്കണം, എങ്കിൽ പിന്നെ, നമുക്ക്  കുറച്ച് സ്വർണ്ണമങ്ങ് വില്ക്കാം

അമ്മയെന്തൊക്കെയാ ഈ പറയുന്നത് ,കല്യാണം കഴിഞ്ഞ് പുതുമോടി മാറുന്നതിന് മുമ്പ്, പെണ്ണിന് അവളുടെ വീട്ടുകാർ കൊടുത്ത സ്വർണ്ണം വില്ക്കാൻ ചോദിക്കുന്നത് ,മര്യാദയാണോ?

എടാ പെണ്ണിന് വീട്ടുകാർ കൊടുക്കുന്ന സ്വർണ്ണം, അവളുടെ ഭർത്താവിന് അവകാശപ്പെട്ടതാണ്,

അത് വില്ക്കുന്നതിന്, പെണ്ണിൻ്റെ അനുവാദമൊന്നും വേണ്ട ,പിന്നെ നീ പറയുന്നത് പോലെ, പുതുമോടിയായത് കൊണ്ട്, അവളെ അറിയിക്കാതെ വേണം നമുക്കത് ചെയ്യേണ്ടത്

അതെങ്ങനെ ?

അതൊക്കെ ഞാൻ ചെയ്തോളാം, നീയതൊന്നുമോർത്ത് തല പുണ്ണാക്കണ്ട ,രണ്ട് ദിവസം കഴിഞ്ഞ്, നമുക്കാവശ്യമുള്ള സ്വർണ്ണം വില്ക്കാം, അക്കൂട്ടത്തിൽ

നിനക്ക് ഏസി വാങ്ങാനുള്ള മുപ്പതിനായിരം രൂപയും തരാം നീയിപ്പോൾ ചെല്ല്

അടുക്കളയിൽ നിന്നിറങ്ങി മുറിയിലേക്ക് പോകുമ്പോൾ നീരജിൻ്റെ മനസ്സ് കലുഷിതമായിരുന്നു.

അന്ന് വൈകുന്നേരം,രാധിക, പഴയ ബെഡ്ഷീറ്റ് മാറ്റി പുതിയത് വിരിച്ച് കൊണ്ടിരിക്കുമ്പോൾ ഭവാനിയമ്മ മുറിയിലേക്ക് കടന്ന് വന്നു.

എന്താ അമ്മേ...?

മോള് സ്വർണ്ണമൊക്കെ എവിടെയാ വച്ചിരിക്കുന്നത്

അത് ഈ അലമാരയ്ക്കകത്തുണ്ട്

ങ്ഹാ, അത് അവിടെ വയ്ക്കുന്നത് അത്ര സേഫ്റ്റിയല്ല നിങ്ങളിനി മിക്ക ദിവസങ്ങളിലും ഇവിടെയുണ്ടാവില്ലല്ലോ? 

വിരുന്ന് പോക്കും ടൂറ്പോക്കുമൊക്കെയായിട്ട് പുറത്തായിരിക്കില്ലേ? അത് കൊണ്ട് സ്വർണ്ണമെല്ലാം അമ്മ സൂക്ഷിച്ചോളാം, പിന്നെ മോൾക്ക് അത്യാവശ്യം ഇടാനുള്ള മാലയും വളയും മാത്രം ദേഹത്ത് ഇട്ടാൽ മതി

ഉം ശരിയമ്മേ ..

രാധിക, അലമാര തുറന്ന് സ്വർണ്ണ പെട്ടികളെടുത്ത് അമ്മയ്ക്ക് കൊടുത്തു .

ഭവാനിയമ്മ, താൻ പ്രയോഗിച്ച ബുദ്ധിയിൽ കാര്യം നടന്നതിൻ്റെ സന്തോഷത്തിൽ സ്വന്തം മുറിയിലേക്ക് പോയി.

രണ്ട് ദിവസത്തിന് ശേഷം നീരജിനെ വിളിച്ച് ഭവാനിയമ്മ മുപ്പതിനായിരം രൂപ ഏല്പിച്ചു.

എത്ര സ്വർണ്ണം കൊടുത്തമ്മേ ..

ഓഹ്, ഇപ്പോൾ വിലയുള്ളത് കൊണ്ട്, പത്ത് പവൻ കൊടുത്തപ്പോൾ തന്നെ തോമയ്ക്ക് കൊടുക്കാനുള്ള കാശും നിനക്ക് ഏ സി വാങ്ങാനുള്ള കാശും കിട്ടി

അത് കേട്ട് നീരജിന് കുറ്റബോധം തോന്നി.

എന്നാലുമമ്മേ നമ്മൾ വളരെ നിസ്സാരമായി വിറ്റ് തുലച്ച ആ പത്ത് പവൻ ഉണ്ടാക്കാൻ, രാധികയുടെ അച്ഛൻ എത്ര കഷ്ടപ്പെട്ടിട്ടുണ്ടാവും?

അത് പിന്നെ, അവളുടെ അച്ഛൻ മാത്രമല്ല, എല്ലാ അച്ഛൻമാരും കഷ്ടപ്പെട്ട് തന്നെയാ മക്കളെ കെട്ടിച്ച് വിടുന്നത്, നീ സമയം കളയാതെ പോകാൻ നോക്ക്

അമ്മയോട് തർക്കിച്ചിട്ട് കാര്യമില്ലെന്ന് മനസ്സിലായ നീരജ്, തിരിഞ്ഞ് നടന്നു.

റൂമിലെത്തിയപ്പോൾ, രാധിക ഷോപ്പിങ്ങിന് പോകാൻ ഒരുങ്ങി നില്ക്കുകയായിരുന്നു .

ങ്ഹാ നീരജേട്ടാ.. എൻ്റെ പാലയ്ക്കാ മാല,അമ്മയുടെ കൈയ്യിൽ ഏല്പിച്ച പെട്ടിയിലാണ്,

ഞാനതൊന്ന് വാങ്ങിയിട്ട് ഇപ്പോൾ വരാമേ ..

രാധിക, മാല വാങ്ങാൻ അമ്മയുടെ അരികിലേക്ക് പോയപ്പോൾ നീരജിന് നെഞ്ചിടിപ്പ് കൂടി

ഈശ്വരാ ... ഇനി ആ മാല എങ്ങാനും വില്ക്കാൻ കൊണ്ട് പോയ സ്വർണ്ണത്തിൻ്റെ കൂട്ടത്തിലുണ്ടായിരുന്നോ ?

ഭാഗം-3

ആശങ്കകൾ നിറഞ്ഞ നിമിഷങ്ങൾക്കൊടുവിൽ, നിറപുഞ്ചിരിയോടെ അമ്മയുടെ മുറിയിൽ നിന്നിറങ്ങി വരുന്ന, രാധികയെ കണ്ടപ്പോഴാണ് നീരജിന് ശ്വാസം നേരെ വീണത്.

ഏട്ടാ.. പോകാം

രാധികയുടെ കഴുത്തിൽ ചുവന്ന കല്ലുകൾ പതിച്ച മാല കിടക്കുന്നത് കണ്ട് ,  നീരജ് അവളോടൊപ്പം പുറത്തേയ്ക്കിറങ്ങി.

ഞാൻ ഡ്രൈവ് ചെയ്യട്ടെ എട്ടാ ...?

ങ് ഹേ, അതിന് തനിക്ക് ഡ്രൈവിങ്ങ് അറിയാമോ?

പിന്നേ ... ഞാൻ പതിനെട്ട് വയസ്സായപ്പോഴെ ലൈസൻസെടുത്തായിരുന്നു

എങ്കിൽ താൻ വണ്ടിയെടുത്തോ, ദാ താക്കോല്

അല്ലാ ...രാധിക കാറോടിച്ചിട്ട് നീ സൈഡിലിരിക്കുമ്പോൾ നാട്ടുകാരോർക്കും, നിനക്ക് ഡ്രൈവിങ്ങ് അറിയാത്തത് കൊണ്ടായിരിക്കുമെന്ന് ,വെറുതെ ആൾക്കാരെ കൊണ്ട് പറയിപ്പിക്കാതെ, നീ കേറിയിരുന്ന് ഓടിക്ക് ചെറുക്കാ

രാധിക ഡ്രൈവിങ്ങ് സീറ്റിൽ കയറിയിരുന്ന്, വണ്ടി സ്റ്റാർട്ട് ചെയ്തപ്പോഴേക്കും, തടസ്സം പറഞ്ഞ് കൊണ്ട് ഭവാനിയമ്മ പുറത്തേയ്ക്കിറങ്ങി വന്നു.

എന്നാൽ പിന്നെ, ഏട്ടൻ തന്നെ ഓടിച്ചോ

ഡോറ് തുറന്ന് പുറത്തിറങ്ങുമ്പോൾ, രാധികയുടെ മുഖത്തെ ചിരി മാഞ്ഞത് ,അമ്മ പറഞ്ഞത് ഇഷ്ടപ്പെടാത്തത് കൊണ്ടാണെന്ന്, നീരജിന് മനസ്സിലായി.

ങ്ഹാ പിന്നേ .. പോയിട്ട് വേഗമിങ്ങ് വരണം ,നിങ്ങൾ തിരിച്ച് വന്നിട്ട് വേണം നിരുപമയെ, മനോജിൻ്റെ വീട്ടിൽ കൊണ്ട് വിടാൻ

അതിന് മനോജിങ്ങോട്ട് വന്നാൽ പോരെ അമ്മേ ..?

ങ്ഹാ, വരാമെന്ന് അവൻ വിളിച്ച് പറഞ്ഞതാ, ഞാനാ പറഞ്ഞത് വേണ്ടെന്ന് ,ഇവിടെ നമുക്ക് സ്വന്തമായിട്ടൊരു കാറുള്ളപ്പോൾ ,മനോജ് അവളെയും കൊണ്ട് ബസ്സിൽ തൂങ്ങിപ്പിടിച്ച് പോകണ്ടല്ലോ? മാത്രമല്ല ,നമ്മുടെ ഇപ്പോഴത്തെ സ്റ്റാറ്റസ് മനോജിൻ്റെ വീട്ടുകാരുമൊന്നറിയട്ടെ

ഭവാനിയമ്മയുടെ സംസാരം, രാധികയ്ക്ക് തീരെ പിടിച്ചില്ല,

എങ്കിലും അവൾ മൗനം പാലിച്ചു.

ഉച്ചയൂണ് കഴിഞ്ഞ്, നിരുപമയെ കൊണ്ട് വിടാൻ, രാധികയും ഒരുങ്ങിയെങ്കിലും ,ഭവാനിയമ്മ സമ്മതിച്ചില്ല.

മോളിപ്പോൾ അങ്ങാട്ട് പോകണ്ട,

അവര് നിങ്ങളെ വിരുന്നിന് വിളിക്കും ,ആ സമയത്ത് പോയാൽ മതി

ആ പറഞ്ഞതിൽ ന്യായമുണ്ടെന്ന് തോന്നിയത് കൊണ്ട്, നീരസമൊന്നും കാട്ടാതെ രാധിക പിൻമാറിയത്, നീരജിനും ആശ്വാസമായി .

കാറിനകത്ത് നിരുപമയോടൊപ്പം ഡിക്കി നിറയെ പഴവും, പച്ചക്കറികളും ,പലവ്യഞ്ജനങ്ങളുമായിട്ടാണ് ഭവാനിയമ്മ മകളെ യാത്രയാക്കിയത്.

അടുത്തയാഴ്ചയിങ്ങ് പോന്നേക്കണേ ?നീയവിടെ ചെന്നാൽ, സമയത്ത് ഭക്ഷണമൊന്നും കഴിക്കില്ലെന്നെനിക്കറിയാം

എങ്ങനെയിരുന്ന പെണ്ണാണ്,

ഇപ്പോൾ കോലം കണ്ടില്ലേ?

അത് പിന്നെ, ഞാനിപ്പോൾ ഗർഭിണിയായത് കൊണ്ടല്ലേ അമ്മേ.. വായിലോട്ട് എന്തെങ്കിലും വച്ചാൽ, അപ്പോൾ ഓക്കാനം വരും

ഉം ,മോള് വിഷമിക്കേണ്ട, രണ്ട് മൂന്ന് മാസം കൂടി കഴിഞ്ഞാൽ, നിന്നെയിങ്ങോട്ട് വിളിച്ചോണ്ട് വരാനാകും ,അത് കഴിഞ്ഞാൽ പിന്നെ ,പ്രസവം കഴിഞ്ഞിട്ട് പതിയെ പോയാൽ മതിയല്ലോ ?

ഉം ശരിയമ്മേ...അച്ഛാ ..ഞാൻ പോയിട്ട് വരാം

രാധികയോടും , മറ്റുള്ളവരോടും കൈ വീശി കാണിച്ച്, നിരുപമ ഭർത്താവിൻ്റെ വീട്ടിലേക്ക് യാത്രയായി.

പിറ്റേന്ന് രാധിക, വെളിച്ചെണ്ണ തേച്ച് കട്ടപിടിച്ചിരിക്കുന്ന മുടി ഈരി കൊണ്ടിരിക്കുമ്പോൾ, അനുപമ വന്ന് അരികിലിരുന്നു .

ഏട്ടത്തിക്ക് എന്തോരം മുടിയാ, കണ്ടിട്ട് എനിക്ക് അസൂയ തോന്നുവാ

ആണോ ?ഇതെനിക്ക് പാരമ്പര്യമായി കിട്ടിയതാ ,അനുപമ ശ്രദ്ധിച്ചില്ലേ? എൻ്റെ അമ്മയ്ക്കും അമ്മൂമ്മയ്ക്കുമൊക്കെ ഇഷ്ടം പോലെ മുടിയുണ്ട്

ഉം..പക്ഷേ, ഇവിടെ ഞങ്ങൾക്കൊക്കെ അച്ഛൻ്റെ പാരമ്പര്യമാണെന്ന് തോന്നുന്നു

അതെന്താ അനുപമേ ?

അച്ഛൻ്റെ തലയിൽ പേരിന് പോലും ഒരു മുടിയില്ലല്ലോ ? ഭാവിയിൽ ഞങ്ങളും അങ്ങനെയാകുമോന്നാണ് എൻ്റെ പേടി

ഹേയ് ,നീ അങ്ങനെ പേടിക്കണ്ട, ഇതിനൊക്കെ ഇഷ്ടം പോലെ ട്രീറ്റ്മെൻറുകളും മരുന്നുകളുമൊക്കെയുണ്ടല്ലോ?

പിന്നെ ,എൻ്റെ അമ്മൂമ്മ ഒരു എണ്ണ കാച്ചുന്നുണ്ട്, മുടി വളരാൻ ബെസ്റ്റാണ് ,ഞാനിനി വീട്ടിൽ പോയി വരുമ്പോൾ, ഒരു കുപ്പി നിനക്ക് കൊണ്ട് തരാം

ഒഹ്, താങ്ക് യു ഏടത്തീ ..,

അനുപമ ,രാധികയുടെ കൈയ്യിൽ മുറുകെ പിടിച്ച് കൊണ്ട് സ്നേഹം പ്രകടിപ്പിച്ചു.

ഏട്ടത്തി ...ഈ മോതിരം എത്ര ഗ്രാമുണ്ട് ?

ഇത് നാല് ഗ്രാമോളമുണ്ട് ,നിനക്കിഷ്ടമായെങ്കിൽ എടുത്തോ

അയ്യോ! അത് ഏട്ടത്തി സ്ഥിരമായി ഇടുന്നതല്ലെ?

ഹേയ് അതിനെന്താ ,എനിക്ക് വേറെയും ഒരുപാട് മോതിരങ്ങളുണ്ട് ,ഇത് അനുപമയെടുത്തോളു

രാധിക ഉടൻ തന്നെ മോതിരമൂരി,അനുപമയുടെ വിരലിലിട്ട് കൊടുത്തു.

താങ്ക് യൂ സോ... മച്ച്

ഇത്തവണയവൾ നന്ദി പ്രകടിപ്പിച്ചത്, രാധികയുടെ ഇരു കവിളുകളിലും, സ്നേഹത്തോടെ നുള്ളിക്കൊണ്ടാണ്.

ദിവസങ്ങൾ കടന്ന് പോയി.

ഒരാഴ്ച കഴിഞ്ഞപ്പോൾ നിരുപമ കൃത്യമായി വീട്ടിൽ തിരിച്ചെത്തി.

ഇത്തവണ അമ്മയോട് പറയാൻ അവൾക്ക് വലിയൊരു വിശേഷമുണ്ടായിരുന്നു.

അമ്മ അറിഞ്ഞോ ?അവിടുത്തെ വീട് ഭാഗം വയ്ക്കാൻ പോകുവാ

മനേജേട്ടൻ്റെ പെങ്ങളുടെ വീതം നേരത്തെ കൊടുത്തിരുന്നു ,ഇനിയുള്ള വീടും പറമ്പും മനോeജട്ടനും, അനുജനും കൂടിയുള്ളതാണ് ,അവിടുത്തെ അമ്മ പറയുന്നത് മഹേഷ് ഇളയതായത് കൊണ്ട്, തറവാട് അവനുള്ളതാണെന്നാണ് ,

മനോജേട്ടൻ്റെ ഷെയറിന് പകരമായി പത്ത് ലക്ഷം രൂപ തരാമെന്ന്

അത് കൊള്ളാമല്ലോ? അതെങ്ങനെ ശരിയാവും ,ആ വീട് ,മനോജ് കഷ്ടപ്പെട്ടുണ്ടാക്കിയതല്ലേ ?അപ്പോൾ അവനും നീയുമല്ലേ അവിടെ താമസിക്കേണ്ടത്

അത് നമ്മള് പറയുന്ന ന്യായമല്ലേ അമ്മേ .. മനോജേട്ടന് സഹോദര സ്നേഹം കുറച്ച് കൂടുതലായത് കൊണ്ട് ഒന്നും എതിർത്ത് പറയില്ലെന്ന് അവർക്കറിയാം

അങ്ങനെ വിട്ടാൽ പറ്റില്ലല്ലോ ? നീ മനോജിനോട് പറ ,പത്ത് ലക്ഷം രൂപ അനുജന് കൊടുത്തിട്ട് വീട് നിൻ്റെ പേരിലേക്ക് വാങ്ങാൻ

അമ്മയെന്താ ഈ പറയുന്നത് ,മനോജേട്ടൻ്റെ കയ്യിലെവിടുന്നാ അത്രയും കാശ് ,ഉള്ള കച്ചവടം തന്നെ നഷ്ടത്തിലാണെന്ന് പറയുന്നത്, അമ്മ ,അന്ന് തന്ന മൂന്ന് ലക്ഷം രൂപ കൊണ്ടാണ്, ഇeപ്പാൾ തല്ക്കാലമൊന്ന് പിടിച്ച് നില്ക്കുന്നത്

അതൊക്കെ എനിക്കറിയാവുന്ന കാര്യമല്ലേ ?കാശിൻ്റെ കാര്യമോർത്ത് നീ ആധി പിടിക്കണ്ട, അതൊക്കെ അമ്മ സംഘടിപ്പിച്ച് തരാം

ങ്ഹേ, അമ്മയ്ക്ക് വല്ല ലോട്ടറിയുമടിച്ചോ ?

ഉം ,അങ്ങനെയും പറയാം ,ഒരു ഭാഗ്യദേവതയല്ലേ, എൻ്റെ 

നീരജ്മോൻ കല്യാണം കഴിച്ചോണ്ട് വന്നത്

ഭവാനിയമ്മ സന്തോഷത്തോടെ മകളോട് പറഞ്ഞു.

അന്ന് ഉച്ചകഴിഞ്ഞപ്പോൾ നിനച്ചിരിക്കാതെ, രാധികയുടെ അച്ഛനും അമ്മയും പെട്ടെന്ന് കയറി വന്നു.

ഇതെന്താ അമ്മേ... ഒന്ന് വിളിച്ച് പോലും പറയാതെ വന്നത്

രാധിക അതിശയത്തോടെ ചോദിച്ചു.

ഓഹ് ,ഞങ്ങടെ മോളെ കാണാൻ മുൻകൂട്ടി അനുവാദം വല്ലതും വാങ്ങേണ്ട കാര്യമുണ്ടോ? അല്ലേ ഭവാനിയമ്മേ..?

പിന്നല്ലാതെ ,നിങ്ങൾക്ക് എപ്പോൾ വേണമെങ്കിലും വരികയും പോകുകയും ചെയ്യാമല്ലോ?

അല്ലാ... വിശ്വംഭരൻ എവിടെ പോയി ?

രാധികയുടെ അച്ഛൻ ചോദിച്ചു .

ഉണ്ട്, ഊണ് കഴിഞ്ഞിട്ട് ഒന്ന് മയങ്ങാൻ കയറിയതാ, ഇരിക്ക്

ഞാൻ വിളിച്ചിട്ട് വരാം

നീരജിനി ജോലി കഴിഞ്ഞ് വൈകുന്നേരമായിരിക്കും വരുന്നത് അല്ലേ മോളേ.. ?

അതെ അമ്മേ .. ആറ് മണിയെങ്കിലുമാവും

നിനക്ക് സുഖം തന്നെയല്ലേ മോളേ .. മറ്റ് ബുദ്ധിമുട്ടുകളൊന്നുമില്ലല്ലോ അല്ലേ?

രാധികയുമായി, അവരുടെ മുറിയിലേക്ക് വന്ന രാജലക്ഷ്മി , മകളുടെ മുടിയിൽ തഴുകിക്കൊണ്ട് ചോദിച്ചു.

ഇല്ലമ്മേ ... സുഖം തന്നെയാ ,എനിക്ക് ചൂട് സഹിക്കാൻ വയ്യെന്ന് പറഞ്ഞപ്പോൾ , നീരജേട്ടൻ പിറ്റേന്ന് തന്നെ പോയിAC വാങ്ങി ഞങ്ങടെ റൂമിൽ ഫിറ്റ് ചെയ്തു ,എന്നോട് വല്യ കാര്യമാണമ്മേ.. ആളൊരു പാവമാണ്

ഉം , അമ്മയ്ക്ക് സമാധാനമായി മോളേ ... കുറെ ദിവസമായി വല്ലാത്ത ടെൻഷനായിരുന്നു, നിൻ്റെ കുറവിനെക്കുറിച്ചറിയുമ്പോൾ നീരജ് എങ്ങനെ പ്രതികരികരിക്കുമെന്നറിയില്ലല്ലോ?

ഇല്ലമ്മേ.. തത്ക്കാലം ഒന്നുമറിഞ്ഞിട്ടില്ല ,ഞാൻ സൂക്ഷിച്ചോളാം

ആങ്ങ്ഹാ , അമ്മയും മോളും ഇവിടിരിക്കുവായിരുന്നോ ,മോളേ അമ്മയേം വിളിച്ചോണ്ട് വാ ,

ചായ എടുത്ത് വച്ചിരിക്കുന്നു

ഭവാനിയമ്മ വന്ന് ക്ഷണിച്ചപ്പോൾ, രാധിക അമ്മയുമായി, ഡൈനിങ്ങ് റൂമിലേക്ക് ചെന്നു.

ആങ്ഹാ, നിരുപമ എപ്പോൾ വന്നു?

രാജലക്ഷ്മി കുശലം ചോദിച്ചു .

ഞാൻ രാവിലെ വന്നതാ, ഇനി രണ്ട് ദിവസം കഴിഞ്ഞേ പോകു

പിന്നെ, എന്തൊക്കെയുണ്ട് രാജാ...വിശേഷങ്ങള്, ബിസിനസ്സൊക്കെ എങ്ങനെ പോകുന്നു?

ങ്ഹാ, ഞങ്ങള് അതിനെ കുറിച്ച് കൂടി പറയാനാണ് ഇപ്പോൾ വന്നത്,

പിഡബ്ല്യുഡിയുടെ വർക്കുകളാണ് ഞാൻ ചെയ്യുന്നതെന്നറിയാമല്ലോ? റോഡിൻ്റെയും പാലത്തിൻ്റെയുമൊക്കെ പണികൾ പൂർത്തിയായെങ്കിലും, അതിൻ്റെ ബില്ല് പാസ്സായി കിട്ടാൻ കുറച്ച് താമസമുണ്ട് ,ഞാനാണെങ്കിൽ പുതിയ രണ്ട് വർക്കുകൾ തുടങ്ങി വയ്ക്കുകയും ചെയ്തു ,ഇപ്പോൾ കല്യാണം കഴിഞ്ഞപ്പോൾ, കീശ കാലിയായെന്ന് പറഞ്ഞാൽ മതിയല്ലോ ?അപ്പോൾ ഞാൻ പറഞ്ഞ് വന്നത് ,എനിക്ക് കുറച്ച് ദിവസത്തേക്ക്, രാധികയുടെ സ്വർണ്ണമൊന്ന് പണയം വയ്ക്കാൻ തരണം, ഒരു മാസത്തിനുള്ളിൽ തിരിച്ചെടുത്ത് തരാം, ചോദിക്കുന്നത് ശരിയല്ലെന്നറിയാം, പക്ഷേ, ഇപ്പോഴത്തെ എൻ്റെ സിറ്റുവേഷൻ ,അങ്ങനെയായി പോയി, അത് കൊണ്ടാണ്

അല്ല, രാധികയുടെ അച്ഛൻ അവസാനം പറഞ്ഞത് ശരിയാണ്, മോൾക്ക് സ്ത്രീധനമായി കൊടുത്ത സ്വർണ്ണം, രണ്ടാഴ്ച പോലുമാകുന്നതിന് മുൻപ്, തിരിച്ച് ചോദിക്കുന്നത് മര്യാദയല്ല,

മാത്രമല്ല, ഞങ്ങൾക്കും ഇവിടെ ഒരു പാട് ആവശ്യങ്ങളുണ്ടാവില്ലേ?

ഭവാനിയമ്മയുടെ എഴുത്തടിച്ചത് പോലെയുള്ള മറുപടി കേട്ട്, രാജൻ്റെ മാത്രമല്ല, രാധികയുടെയും ,അമ്മയുടെയും മുഖം ഒരു പോലെ വിളറി.

ഉം ,ഭവാനി പറഞ്ഞത് ശരിയാ, ഞാൻ ചോദിക്കാൻ പാടില്ലായിരുന്നു, 

സാരമില്ല വിട്ട് കള,

ഇനി വേറെ എന്തെങ്കിലും വഴിയുണ്ടോ എന്ന് നോക്കാം,

എന്നാൽ പിന്നെ താമസിക്കുന്നില്ല, ഞങ്ങളിറങ്ങട്ടെ വിശ്വംഭരാ ...

വൈക്ലബ്യത്തോടെ അച്ഛനും അമ്മയും, കാറിലേക്ക് കയറുമ്പോൾ, സങ്കടം കൊണ്ട് രാധികയുടെ കണ്ണുകൾ ഈറനായി.

ഒരു മാസത്തേക്കല്ലേ എൻ്റെ അച്ഛൻ, സ്വർണ്ണം കടമായി ചോദിച്ചത് ,അത്ര നിവൃത്തികേടായത് കൊണ്ടല്ലേ?

അമ്മയ്ക്കത് കൊടുക്കാമായിരുന്നു

കാറ് ഗേറ്റ് കടന്ന് പോയപ്പോൾ, രാധിക ഭവാനിയമ്മയോട് പറഞ്ഞു.

ദേ രാധികേ... എന്നെ ഉപദേശിക്കാൻ വരരുത് ,നീയിപ്പോൾ സുമംഗലിയായി കഴിയുന്നത്, ഞങ്ങളൊക്കെ കണ്ണടച്ചത് കൊണ്ടാണ്,

നിൻ്റെ അച്ഛൻ ഇത്രയും സ്വർണ്ണവും കാറും ലക്ഷങ്ങളുമൊക്കെ തന്നത് കൊണ്ട് മാത്രമാണ്, ഇനിയൊരിക്കലും നീ പ്രസവിക്കില്ലെന്നറിഞ്ഞിട്ടും, എൻ്റെ മോൻ്റെ തലയിൽ നിന്നെ കെട്ടിവച്ചത് ,അപ്പൻ്റിസിൻ്റെ ഓപ്പറേഷൻ കഴിഞ്ഞ പാടാണ് നിൻ്റെ വയറ്റിലുള്ളതെന്ന്, അവനോട് പറയാൻ, ഞാനല്ലേ നിനക്ക് ഐഡിയ പറഞ്ഞ് തന്നത്, അത് നീ സമാധാനത്തോടെ ജീവിച്ചോട്ടെ എന്ന് കരുതിയാ ,അതല്ലെന്ന് അവനറിയാതിരിക്കണമെങ്കിൽ, അച്ഛനോടും ,അമ്മയോടും ഇനി മേലാൽ ഇങ്ങനെയുള്ള ആവശ്യവുമായി വരരുതെന്ന് പറഞ്ഞേക്കണം

ഭവാനിയമ്മയുടെ അത് വരെ കാണാത്ത ഭാവം കണ്ട് രാധിക തരിച്ച് നിന്ന് പോയി.

ഭാഗം-4

രാധികേ .. നമ്മുടെ വിവാഹം കഴിഞ്ഞിട്ട് നീയിത് വരെ മെൻസസായില്ലല്ലോ? നമുക്കൊന്ന് ടെസ്റ്റ് ചെയ്താലോ ,

നമ്മൾ അച്ഛനും അമ്മയുമായോന്നറിയാലോ?

രാത്രിയിൽ ബെഡ് റൂമിൽ വച്ച് സംസാരത്തിനിടയിൽ വന്ന, നീരജിൻ്റെ ചോദ്യത്തിൽ രാധിക നടുങ്ങിപ്പോയി.

ഹേയ്, അങ്ങനെ ഞാൻ ഗർഭിണിയായെങ്കിൽ എനിക്കതിൻ്റെ ലക്ഷണങ്ങളും കണ്ടേനെ ,സിനിമയിലൊക്കെ കണ്ടിട്ടില്ലേ? തല ചുറ്റി വീഴുന്നതും ഭക്ഷണം കഴിച്ച് കൊണ്ടിരിക്കുമ്പോൾ ,ഓക്കാനം വരുന്നതുമൊക്കെ ,

ഇതിപ്പോൾ രണ്ട് മാസമല്ലേ ആയുള്ളുഏട്ടാ ..,സാധാരണ എനിക്കിങ്ങനാ, താമസിക്കാറുണ്ട്,

ചിലപ്പോൾ മാസങ്ങളോളം എനിക്ക്

പിരീഡ്സുണ്ടാവാറില്ല

ഉള്ളിലെ ഭീതി, മുഖത്ത് കാണിക്കാതെ, രാധിക ഒരു വിധം പറഞ്ഞൊപ്പിച്ചു .

ശ്ശൊ ! വെറുതെ ആശിച്ചു ,സാരമില്ല കുറച്ച്താമസിച്ചിട്ടാണെങ്കിലും നമുക്കൊരു വാവയെ കിട്ടുമല്ലോ ?

അതിരിക്കട്ടെ, നിനക്ക് ആണ് വാവയെ ആണോ ,പെണ്ണ് വാവയെ ആണോ ആദ്യം വേണ്ടത്

നീരജ്, വിടാൻ ഭാവമില്ലെന്ന് മനസ്സിലാക്കിയ രാധിക, പെട്ടെന്ന്  കട്ടിലിൽ കയറി കിടന്നു.

അതേ.. ആൺകുട്ടിയെ വേണോ പെൺകുട്ടിയെ വേണോ എന്ന് പുലരുവോളം ചർച്ച ചെയ്തോണ്ടിരുന്നാൽ ,വെറുതെ കറണ്ട് ചാർജ്ജ് കൂടത്തെയുള്ളു, ആ ലൈറ്റ് ഓഫ് ചെയ്തിട്ട് ഇവിടെ വന്ന് കിടക്കാൻ നോക്ക്

അത് നീ പറഞ്ഞത് ന്യായം

നീരജ് മുറിയിലെ ലൈറ്റ് ഓഫ് ചെയ്തിട്ട് അവളുടെയരികിലേക്ക് വന്നു .

ദിവസങ്ങൾ കടന്ന് പൊയ്ക്കൊണ്ടിരുന്നു

ഇതിനിടയിൽ നിരുപമയ്ക്ക് കൊടുക്കാമെന്നേറ്റ പത്ത് ലക്ഷം രൂപ ഭവാനിയമ്മ, രാധികയുടെ സ്വർണം വിറ്റ് കൊടുത്തു.

കാശ് വാങ്ങാൻ വന്ന മനോജിനോട്, വീടും പറമ്പും നിരുപമയുടെ പേരിൽ തന്നെ എഴുതണമെന്ന്, ഭവാനിയമ്മ തീർത്ത് പറഞ്ഞു

അമ്മായിയമ്മയുടെ സ്വഭാവമറിയാവുന്നത് കൊണ്ടും, അവർ ഔദാര്യമായി തരുന്ന പൈസയായത് കൊണ്ടും, മനോജ് അക്ഷരംപ്രതി അനുസരിച്ചു.

വീടും പറമ്പും സ്വന്തം പേരിലേക്കായപ്പോൾ, മനോജിൻ്റെ അനുജനോടൊപ്പം ,അയാളുടെ

അമ്മയെയും പറഞ്ഞ് വിട്ട നിരുപമ, വീട് വാടകയ്ക്ക് കൊടുത്തിട്ടാണ് പ്രസവത്തിനായി സ്വന്തം വീട്ടിലേക്ക് വന്നത് .

നിരുപമ കൂടി സ്ഥിരമായി നില്ക്കാൻ വന്നപ്പോൾ, രാധിക ആ വീട്ടിൽ തികച്ചും ഒറ്റപ്പെട്ടു.

മുൻപ്, അനുപമ ഇടയ്ക്ക് വിശേഷങ്ങളുമായി വന്നിരുന്നെങ്കിലും, നിരുപമ വന്നതോടെ ,ഭവാനിയമ്മയും പെൺമക്കളും ഒറ്റക്കെട്ടായി.

അനുപമ പഠിക്കാനും, നിരുപമ പൂർണ്ണ വിശ്രമത്തിലേക്കും മാറിക്കഴിഞ്ഞപ്പോൾ, വീട്ട് ജോലികൾ മുഴുവൻ ,രാധികയുടെ ഉത്തരവാദിത്വമായി മാറി.

നീ കുറച്ച് ദിവസം സ്വന്തം വീട്ടിൽ പോയി നില്ക്ക്, അല്ലാതെ 

ഇവിടെ നിന്നാൽ, അമ്മ 

നിനക്ക് റസ്റ്റൊന്നും തരില്ല

രാധിക ഒരിക്കൽ പരാതി പറഞ്ഞപ്പോൾ, നീരജ് ഒരു സലൂഷൻ പറഞ്ഞ് കൊടുത്തു.

പിറ്റേന്ന്, അടുക്കളയിൽ വച്ച് രാധിക ഭവാനിയമ്മയോട് അതിനെക്കുറിച്ച് സൂചിപ്പിച്ചു .

അതെന്തിനാ ഇപ്പോൾ അങ്ങോട്ട് ഓടിപ്പോകുന്നത്, കഴിഞ്ഞ മാസമല്ലേ നീ വീട്ടിൽ പോയിട്ട് വന്നത്

അതമ്മേ ... അന്ന് രാവിലെ പോയിട്ട് വൈകുന്നേരം ഞങ്ങൾ തിരിച്ച് വന്നില്ലേ? ഇത് ഞാൻ, കുറച്ച് ദിവസം അമ്മയോടൊപ്പം നില്ക്കാൻ വേണ്ടിയായിരുന്നു

ങ്ഹാ .. അത് കൊള്ളാമല്ലോ ? നീ പോയി കഴിഞ്ഞാൽ പിന്നെ, ഇവിടുത്തെ ജോലിയൊക്കെ ആര് ചെയ്യും, ഗർഭിണിയായിട്ട് വന്ന് നില്ക്കുന്ന നിരുപമയെ കൊണ്ട് ചെയ്യിക്കാൻ പറ്റുമോ ? പഠിക്കാൻ പോകുന്ന അനുപമയോട് പറയാൻ പറ്റുമോ ,എനിക്കീ പ്രായത്തിൽ കിടന്ന് കഷ്ടപ്പെടാനൊന്നും വയ്യ, എന്തായാലും നിരുപമയുടെ പ്രസവമൊന്ന് കഴിഞ്ഞോട്ടെ, അപ്പോൾ പോകാം 

ഇനിയവരോട് തർക്കിച്ചിട്ട് കാര്യമില്ലെന്ന് മനസ്സിലായ രാധികയ്ക്ക്, വല്ലാത്ത സങ്കടം തോന്നി ,അവരുടെ എതിർപ്പിനെ മറികടന്ന് തനിക്കിറങ്ങി പോകാനും കഴിയില്ലല്ലോ ? തൻ്റെയീ ജീവിതം അവർ 

തനിക്ക് തന്ന ഔദാര്യമല്ലേ?

ഒന്നും വേണ്ടിയിരുന്നില്ല,

വിധി ക്യാൻസറിൻ്റെ രൂപത്തിൽ തൻ്റെ ഗർഭപാത്രത്തെ ഇല്ലാതാക്കിയപ്പോൾ, അതോടെ ജീവിതം തീർന്നെന്ന് കരുതി ആഗ്രഹങ്ങളെ വേദനയോടെ ഉള്ളിലൊതുക്കി ജീവിച്ചിരുന്ന താൻ, അച്ഛൻ്റെയും അമ്മയുടെയും നിർബന്ധത്തിന് വഴങ്ങിയാണ്, ഈയൊരു ബന്ധത്തിന് തയ്യാറായത്, തൻ്റെ കുറവിനെക്കുറിച്ച് വിവാഹം കഴിക്കാൻ പോകുന്ന പുരുഷനും അറിയണമെന്ന്, തന്നെ പോലെ അച്ഛനും അമ്മയ്ക്കും നിർബന്ധമായിരുന്നു, പക്ഷേ, അതറിഞ്ഞാൽ മകൻ സമ്മതിക്കില്ലെന്നുറപ്പുണ്ടായിരുന്ന ഭവാനിയമ്മ, കിട്ടാൻ പോകുന്ന ലക്ഷക്കണക്കിന് രൂപ നഷ്ടപ്പെടരുതെന്ന് കരുതി,

ആ രഹസ്യം നീരജിൽ നിന്ന് തങ്ങളറിയാതെ മനപ്പൂർവ്വം മറച്ച് വയ്ക്കുകയായിരുന്നു, ഒടുവിൽ വിവാഹം കഴിഞ്ഞ് നീരജിൻ്റെ വീട്ടിലെത്തിയ തന്നെ ,സ്നേഹം നടിച്ച് അകത്ത് കൊണ്ട് പോയിട്ടാണ് ,നീരജ് ഒന്നുമറിഞ്ഞിട്ടില്ലെന്നും, ഇനി വിവാഹം കഴിഞ്ഞ സ്ഥിതിക്ക് അവനോടൊന്നും പറയേണ്ടെന്നും പറഞ്ഞ് ,നീരജിനോട് പറയേണ്ട കളവ് ,ഭവാനിയമ്മ തൻ്റെ ചെവിയിൽ ഓതിതന്നത് ,ആ സമയത്ത് തനിക്കതിനെ എതിർക്കാൻ തോന്നിയില്ല, കാരണം, പ്രസവിക്കില്ലെങ്കിലും, ഒരു പുരുഷനോടൊത്തുള്ള വിവാഹ ജീവിതം, താനും 

ഒരുപാടാഗ്രഹിച്ചിരുന്നു

പാവം നീരജിനെ വഞ്ചിച്ചതിനുള്ള ശിക്ഷയാണ്, താനിപ്പോൾ അനുഭവിക്കുന്നതെന്ന് രാധികയ്ക്ക് തോന്നി.

കുറ്റബോധം അവളെ വല്ലാതെ വേട്ടയാടി .

ഇങ്ങനെ നീറി നീറി ജീവിക്കുന്നതിനെക്കാൾ,  നീരജിനോട് സത്യം തുറന്ന് പറഞ്ഞിട്ട്, എല്ലാം ഇട്ടെറിഞ്ഞ് അമ്മയുടെയും ,അച്ഛൻ്റെയുമൊപ്പം പോയി താമസിക്കുന്നതാണ് നല്ലതെന്ന് ,രാധികയ്ക്ക് തോന്നി.

വൈകുന്നേരം നീരജ് വരുമ്പോൾ, എല്ലാം തുറന്ന് പറയാൻ, തൻ്റെ മനസ്സിനെ പാകപ്പെടുത്തിയിട്ട്, രാധിക കാത്തിരുന്നു.

നിറഞ്ഞ ചിരിയുമായാണ് നീരജ് അന്ന് വീട്ടിലേക്ക് വന്നത്.

രാധികേ നീയറിഞ്ഞോ?

പറയാതെങ്ങനാ അറിയുക?

രാധിക നിസ്സംഗതയോടെ പറഞ്ഞു.

എടീ.. എനിക്ക് പ്രൊമോഷനായി, ഇനി ഫീൽഡിൽ വെയില് കൊണ്ട് അലഞ്ഞ് തിരിയണ്ടാ, ഒരു ഫാനിൻ്റെ അടിയിലിരുന്ന് ഓഫീസറേ പോലെ ഞാനും ജോലി ചെയ്താൽ മതി . 

ആണോ?

ഒരു സന്തോഷവാർത്ത കേട്ടിട്ടും നിൻ്റെ മുഖത്തെത്താ ഒരു തെളിച്ചമില്ലാത്തത്?

ഹേയ് ഒന്നുമില്ല, ഞാൻ പോയി ചായ എടുത്തിട്ട് വരാം

നീരജിൻ്റെ മുഖത്ത് നോക്കാൻ കെല്പില്ലാതെ രാധിക അടുക്കളയിലേക്ക് നടന്നു.

ഈശ്വരാ ... സന്തോഷം കൊണ്ട് മതിമറന്ന് നില്ക്കുന്ന ആ മനുഷ്യനോട്, ഇത്രയും നാള് താൻ വഞ്ചിക്കപ്പെട്ടുകൊണ്ടിരിക്കുകയാണെന്ന സത്യം, എങ്ങനെ മുഖത്തടിച്ച് പറയും

രാധികയുടെ മനസ്സ് ,ഒരു ഉറച്ച തീരുമാനത്തിലെത്താൻ കഴിയാതെ നീറിപ്പുകഞ്ഞു.

അല്ലാ, എനിക്ക് മനസ്സിലായി പ്രമോഷനായിട്ടും, നിനക്കൊന്നും വാങ്ങിച്ചോണ്ട് വരാത്തതിലുള്ള പിണക്കമല്ലേ, ഈ കാണിക്കുന്നത്, എങ്കിൽ നീയൊന്ന് കണ്ണടച്ചെ

രാധിക കൊണ്ട് വന്ന ചായ ഗ്ളാസ്സ് വാങ്ങി മേശപ്പുറത്ത് വച്ചിട്ട്, നീരജ് അവളോട് പറഞ്ഞു.

നീരജ് പറഞ്ഞത് കേട്ട് യാന്ത്രികമായവൾ കണ്ണടച്ച് നിന്നപ്പോൾ ,അവൻ്റെ കൈകൾ തന്നെ ചേർത്ത് പിടിക്കുന്നതും നെറ്റിയിൽ ചുടുചുംബനം നല്കുന്നതും അവളറിഞ്ഞു

പ്രമോഷനായ വിവരം ഓഫീസിൽ നിന്നിറങ്ങുമ്പോഴാ ഞാനറിഞ്ഞത്,

അതുടനെ തന്നെ നിന്നോട് നേരിട്ട് പറയണമെന്ന് തോന്നിയപ്പോൾ, മറ്റൊന്നും ചിന്തിക്കാതെ, വേഗമിങ്ങോട്ട് ഓടിയെത്താനാണ് മനസ്സ് കൊതിച്ചത്, സോറി ഡാ

നാളെ ഉറപ്പായിട്ടും നീ പറയുന്ന സമ്മാനം ഞാൻ വാങ്ങിക്കോണ്ട് തരാം, പറയ് എന്താണ് നിനക്ക് വേണ്ടത് ?

നീരജിൻ്റെ ആ ഏറ്റ് പറച്ചിൽ രാധികയ്ക്ക് താങ്ങാവുന്നതിലുമപ്പുറമായിരുന്നു

എന്തിനാ നിങ്ങളെന്നെയിങ്ങനെ സ്നേഹിക്കുന്നത് ,അതിന് മാത്രം എന്ത് പ്രയോജനമാണ് എന്നെ കൊണ്ട് നിങ്ങൾക്കുള്ളത്?

കുറ്റബോധത്താൽ വീർപ്പ് മുട്ടിയ രാധിക, ഒരു തേങ്ങലോടെ അവനോട് ചോദിച്ചു .

എന്താ രാധികേ.. നീയിങ്ങനെയൊക്കെ സംസാരിക്കുന്നത്? നീയെൻ്റെ ജീവിതത്തിലേക്ക് കടന്ന് വന്നപ്പോൾ, എനിക്ക് നന്മകൾ മാത്രമല്ലേ ഉണ്ടായിട്ടുള്ളു,

ഇപ്പോൾ ദേ എനിക്ക് പ്രമോഷനുമായി ,നീയെൻ്റെയൊപ്പം എന്നുമുണ്ടായിരുന്നാൽ 

മാത്രം മതി, അതിലും വലിയ സന്തോഷം എനിക്ക് വേറെ കിട്ടാനില്ല

പെട്ടെന്നൊരു ദിവസം ഞാൻ നിങ്ങളെ ഉപേക്ഷിച്ച് പോയാൽ, നിങ്ങളെന്ത് ചെയ്യും?

അതെനിക്ക് ചിന്തിക്കാൻ കൂടി വയ്യ രാധികേ .. മരണം കൊണ്ടല്ലാതെ, നിന്നിൽ നിന്നൊരു വേർപാട് ഞാനാഗ്രഹിക്കുന്നില്ല,

അതല്ലാതെ, നീയെന്നെ വിട്ട് പോയാൽ, പിന്നെ ഞാനുണ്ടാവില്ല, സത്യം!

അത് കേട്ട് ,രാധിക അയാളെ ഇറുകെ പുണർന്നു.

നീരജിൻ്റെ നിഷ്കളങ്ക സ്നേഹത്തിന് മുന്നിൽ, പറയാനുറച്ച നഗ്ന സത്യങ്ങൾ, തുറന്ന് പറയാനാവാതെ നിസ്സഹായതയോടെയവൾ നിന്നു. 

ഭാഗം-5

ദേ, ഇനി അനുപമയ്ക്കൊരു ചെറുക്കനെ കണ്ട് പിടിക്കണ്ടേ? അവൾക്ക് വയസ്സ് ഇരുപത്തിയൊന്ന് കഴിഞ്ഞു

വിശ്വംഭരൻ കഞ്ഞി കോരിക്കുടിക്കുമ്പോൾ അടുത്തിരുന്ന ഭവാനിയമ്മ ചോദിച്ചു.

ഉം ഞാനുമതാലോചിച്ചു, മൂന്നാനോട് പറയാം, നല്ല ആലോചന വല്ലതുമുണ്ടെങ്കിൽ കൊണ്ട് വരാൻ, കൂലിപ്പണിക്കാരനാനെങ്കിലും കുഴപ്പമില്ല ,കുടുംബം 

നോക്കുന്ന നല്ല ഉത്തരവാദിത്വമുള്ളവനായിരിക്കണമെന്ന് പ്രത്യേകം പറയണം, അല്ലാതെ, നിരുപമയുടെ ഭർത്താവ് മനോജിനെ പോലെ ,ലക്ഷങ്ങള് കൊണ്ട് തൊലയ്ക്കുന്ന ബിസിനസ്സ്കാരനെയൊന്നും നമുക്ക് വേണ്ട

അതിന് കൂലി പണിക്കാരനെ ആർക്ക് വേണം ,എൻ്റെ മോള് നല്ല വിദ്യാഭ്യാസമുള്ളവളാ ,എന്നെങ്കിലും അവൾക്കൊരു ഉദ്യോഗം കിട്ടും ,അത് കൊണ്ട് അവളെ ഒരു സർക്കാർ ജോലിക്കാരന് മാത്രമേ ഞാൻ കൊടുക്കു

എടീ ഭവാനീ... ഒരു സർക്കാർ ജോലിക്കാരനെ വേണമെങ്കിൽ അത് പോലെ സത്രീധനവും കൊടുക്കണം, അറിയാമോ?

അതൊക്കെ എനിക്കറിയാം,

എൻ്റെ മോൾക്ക് ഞാൻ അൻപത് പവൻ്റെ സ്വർണ്ണം കരുതിവച്ചിട്ടുണ്ട്, പിന്നെ, ഒരു അഞ്ച് ലക്ഷം രൂപ കൂടി വേണ്ടിവരും, അത് നമുക്ക് നീരജിനെ കൊണ്ട് ലോണെടുപ്പിക്കാം

അൻപത് പവൻ്റെ സ്വർണ്ണമോ ?ഞാനറിയാതെ അത്രയും സ്വർണ്ണം നീയെങ്ങനെ ഒപ്പിച്ചു ?

അത് പിന്നെ ,നീരജിന് സ്ത്രീധനം കിട്ടിയ സ്വർണ്ണമുണ്ടല്ലോ ? ഞാനതിൻ്റെ കാര്യമാ പറഞ്ഞത്

എടീ .. അത് രാധികയ്ക്ക് അവളുടെ അച്ഛൻ കൊടുത്തതല്ലേ? ഇപ്പോൾ തന്നെ നമ്മളതിൽ നിന്ന് കുറച്ചെടുത്തിട്ടുണ്ട് ,ഇനിയും അതീന്ന് കയ്യിട്ട് വാരുന്നത് ശരിയല്ല

നിങ്ങളൊന്ന് മിണ്ടാതിരിക്ക് മനുഷ്യാ .. അല്ലാതെ പിന്നെ, മോളെ കെട്ടിച്ച് വിടാൻ ,നിങ്ങള് വല്ലതും സമ്പാദിച്ച് വച്ചിട്ടുണ്ടോ? രണ്ട് പെൺമക്കളെ ജനിപ്പിച്ചു എന്നല്ലാതെ, അവരുടെ ഭാവി ഭദ്രമാക്കാൻ ഒരു രൂപ  പോലും നിങ്ങള് കരുതിവച്ചിട്ടില്ലല്ലോ?അപ്പോൾ പിന്നെ, അഭിപ്രായം പറയാതെ അവിടെയെങ്ങാനും അടങ്ങിയിരുന്നോണം, ഞാനെങ്ങെനെയെങ്കിലും അവളെ കെട്ടിച്ച് വിട്ടോളാം

ഭവാനിയമ്മ ആക്രോശിച്ചപ്പോൾ വിശ്വംഭരൻ മൗനം പാലിച്ചു.

ഇതിനിടയ്ക്ക് നിരുപമയുടെ പ്രസവം കൂടി കഴിഞ്ഞപ്പോൾ, രാധികയുടെ ജോലി ഭാരം കൂടി.

ഒരു ദിവസം ,നിരുപമയുടെ മുറിയിൽ നിന്നും, കഴുകാനുള്ള മുഷിഞ്ഞ തുണികളെടുക്കാനായി വരുമ്പോൾ, കട്ടിലിൽ കിടന്ന് കരയുന്ന കുഞ്ഞിനെ കണ്ട രാധിക, അവനെയെടുത്ത് മാറോട് ചേർത്ത് പിടിച്ച് താരാട്ട് പാടി കൊടുത്തു.

ഈ സമയത്ത്, കുളി കഴിഞ്ഞ് വന്ന നിരുപമ, രാധികയുടെ കൈയ്യിൽ നിന്നും കുഞ്ഞിനെ ബലമായി പിടിച്ച് വാങ്ങി.

നീയെന്തിനാ കുഞ്ഞിനെയെടുത്തത് ?

അത് നിരുപമേ.., ഞാൻ അഴുക്ക് തുണികളെടുക്കാൻ വന്നപ്പോൾ അവൻ നല്ല കരച്ചിലായിരുന്നു

അതിന്, അമ്മയെ വിളിച്ചാൽ പോരായിരുന്നോ?രാധിക എൻ്റെ കുഞ്ഞിനെ എടുക്കുന്നത് എനിക്കിഷ്ടമല്ല ,ഇനി ഇതാവർത്തിക്കരുത്

മുഖത്തടിച്ചത് പോലെ നിരുപമ അത് പറഞ്ഞിട്ട് ,കുഞ്ഞുമായി അടുക്കളയിലേക്ക് പോയപ്പോൾ,

രാധികയുടെ നെഞ്ച് പിടഞ്ഞു പോയി.

പ്രസവിക്കാത്ത തന്നെ ,ഇനി എല്ലാവരും ഒരു ശത്രുവിനെ പോലെ മാത്രമേ കാണുകയുള്ളു എന്ന ചിന്ത, രാധികയെ വല്ലാതെ തളർത്തിക്കളഞ്ഞു.

അന്ന് വൈകിട്ട് നീരജ് വീട്ടിലേക്ക് വന്നതും, അവളുടെ ആധി കൂട്ടുന്ന ഒരു വിഷയവുമായിട്ടായിരുന്നു.

രാധികേ.. ഇപ്പോൾ ഓഫീസിലുള്ളവരും ചോദിച്ച് തുടങ്ങി, കല്യാണം കഴിഞ്ഞിട്ട് ഒന്നാം വാർഷികമാകാൻ പോകുന്നല്ലോ ?ഭാര്യക്ക് വിശേഷമൊന്നുമില്ലേ എന്ന്?

ഏട്ടന് പറയാമായിരുന്നില്ലേ? നമ്മൾ ഉടനെ കുട്ടികൾ വേണ്ടെന്ന് വച്ചിരിക്കുവാന്ന്

അത് പറഞ്ഞ് വേണമെങ്കിൽ, അവരുടെ വായടപ്പിക്കാം, പക്ഷേ സത്യമതല്ലല്ലോ? ഞാൻ പറയുന്നത് നമുക്കൊരു ഗൈനക്ഡോക്ടറെ കാണാമെന്നാണ്

നീരജ് പറഞ്ഞത് കേട്ട്, താൻ ഭൂമിക്കടിയിലേക്ക് ഒന്ന് താഴ്ന്ന് പോയിരുന്നെങ്കിൽ, എന്നവളാശിച്ച് പോയി .

കുറച്ച് നാള്കൂടി നോക്കാം നീരജേട്ടാ ..

എന്നിട്ട് നമുക്ക് ഡോക്ടറെ കാണുന്നതിനെ കുറിച്ചാലോചിക്കാം, പോയി ഫ്രഷായിട്ട് വാ, ഞാൻ പോയി ചായ എടുത്തിട്ട് വരാം

നീരജിൻ്റെ മുൻപിൽ നിന്ന് എങ്ങോട്ടെങ്കിലും ഓടിയൊളിക്കാൻ അവളാശിച്ച് പോയി.

പിറ്റേന്ന്, ഉച്ചയൂണും കഴിഞ്ഞ് മറ്റുള്ളവരൊക്കെ മയങ്ങാൻ കയറിയ തക്കം നോക്കി ,രാധിക അമ്മയെ ഫോണിൽ വിളിച്ചു.

ങ്ഹാ മോളേ... എത്ര ദിവസമായി വിളിച്ചിട്ട് ,പറയ് എന്താ വിശേഷം?

നീരജ് തന്നോട് ഡോക്ടറെ കാണാൻ പോകുന്ന കാര്യം പറഞ്ഞെന്നും, താനിനി എന്ത് ചെയ്യുമെന്നും വിതുമ്പി കൊണ്ട് രാധിക അമ്മയോട് ചോദിച്ചു.

മോള് വിഷമിക്കാതെ, എന്തായാലും ഇത്രയൊക്കെ ആയില്ലേ? കഴിയാവുന്നിടത്തോളം നമുക്ക് പിടിച്ച് നില്ക്കാം, ഞാൻ നിൻ്റെ ഷീജയാൻ്റിയെ ഒന്ന് വിളിച്ച് സംസാരിക്കാം, അവളും ഒരു ഗൈനക്കോളജിസ്റ്റാണല്ലോ? അവൾക്ക് നിൻ്റെ എല്ലാ കാര്യങ്ങളുമറിയാമല്ലോ ?അവള് വേണ്ടത് പോലെ ചെയ്തോളും ,നിങ്ങള് സൗകര്യം പോലെ, അവളുടെ ക്ളിനിക്കിൽ ചെന്നാൽ മാത്രം മതി

ഉം ശരിയമ്മേ .. അച്ഛനെ തിരക്കിയെന്ന് പറഞ്ഞേക്ക്

ശരി മോളേ ...

അമ്മയോട് സംസാരിച്ച് കഴിഞ്ഞപ്പോൾ, രാധികയ്ക്ക് തെല്ലാശ്വാസമായി.

നീരജ് വന്നപ്പോൾ, പിറ്റേന്ന് ഡോക്ടറെ കാണാൻ പോകാമെന്ന് അവൾ അവനോട് പറഞ്ഞു.

പിറ്റേന്ന് ഉച്ചകഴിഞ്ഞ് ,ലീവെടുത്തിട്ട് നീരജ് രാധികയുമായി ഷീജയാൻ്റിയുടെ ക്ളിനിക്കിൽ ചെന്നു.

നീരജിനെയും, രാധികയെയും ഡോക്ടർ നിറപുഞ്ചിരിയോടെ സ്വീകരിച്ചിരുത്തി .

പറയൂ രാധികേ... എന്തൊക്കെയുണ്ട് വിശേഷങ്ങൾ?

വിശേഷങ്ങളൊന്നും ഇത് വരെ ആയിട്ടില്ല ആൻ്റീ ...അതാ ഞങ്ങളിങ്ങോട്ട് വന്നത്

ഓഹ് ഐസീ .. അതിന് നിങ്ങളുടെ കല്യാണം കഴിഞ്ഞിട്ടിപ്പോൾ പത്ത് മാസമായിട്ടുണ്ട് അല്ലേ?

അതേ ആൻറീ... ആൻറിക്ക് നല്ല ഓർമ്മശക്തിയാണല്ലോ?

അത് പിന്നെ, എനിക്ക് മറക്കാൻ പറ്റുമോ ?നമ്മുടെ കുടുംബക്കാരുടെ കൂട്ടത്തിൽ ഏറ്റവുമധികം ആർഭാടമായി നടത്തിയ ഒരു കല്യാണമല്ലായിരുന്നോ, നിങ്ങളുടെ

അത് കേട്ട് രാധികയുടെ മുഖത്ത് നിരാശ പടർന്നു.

ങ്ഹാ അതൊക്കെ പോട്ടെ ,ഈ പത്ത് മാസമെന്ന് പറയുന്നത് അത്ര വലിയ കാലയളവൊന്നുമല്ല, എങ്കിലും നിങ്ങള് വന്ന സ്ഥിതിക്ക് രണ്ട് പേരെയും മൊത്തത്തിലൊന്ന് ചെക്കപ്പ് ചെയ്ത് കളയാം ,അയ്യോ നീരജിന് ചെക്കപ്പില്ലാട്ടോ ,ചില ലാബ് ടെസ്റ്റുകളുണ്ട്, അതൊക്കെ ഇവിടെ തന്നെ ചെയ്യാം ,നീരജ് കുറച്ച് നേരം പുറത്തേക്കിരിക്കു ,രാധികയെ പരിശോധിച്ചിട്ട് ഞാൻ വിളിക്കാം

ഏതാണ്ട് അരമണിക്കൂറിന് ശേഷം, പുറത്ത് കാത്തിരുന്ന നീരജിനെ ഡോക്ടർ അകത്തേയ്ക്ക് വിളിച്ചു.

സീ.. നീരജ് ,സ്കാനിങ്ങിൽ രാധികയ്ക്ക് നഗറ്റീവായിട്ടൊന്നും കണ്ടെത്താൻ കഴിഞ്ഞിട്ടില്ല, ഇനി ഒന്ന് രണ്ട് ടെസ്റ്റുകളുടെ റിസൾട്ട് കൂടി വരാനുണ്ട് ,ഒരു കാര്യം ചെയ്യ് നീരജിൻ്റെ ടെസ്റ്റിനള്ള ചീട്ട് ഞാൻ തരാം, അതുമായി അങ്ങേയറ്റത്തുള്ള ലാബിൽ ചെന്നാൽ മതി 

ഡോക്ടർ കൊടുത്ത കുറിപ്പുമായി നീരജ് ലാബിലേക്ക് നടക്കുമ്പോൾ രാധിക വേദനയോടെ നോക്കി നിന്നു.

രണ്ട് ദിവസം കഴിഞ്ഞേ റിസൾട്ട് കിട്ടുകയുള്ളു എന്നറിഞ്ഞ അവർ, ആൻ്റിയോട് യാത്ര പറഞ്ഞ് വീട്ടിലേക്ക് മടങ്ങി.

ങ്ഹാ, രാധികേ.. ഞാനിന്ന് ഓഫീസിൽ നിന്ന് നേരത്തെ വരാം, നമുക്ക് ഡോക്ടറെ കാണാൻ പോകണ്ടേ?

രാവിലെ ഓഫീസിലേക്കിറങ്ങുമ്പോൾ നീരജ് പറഞ്ഞു.

ഓഹ് ഞാൻ വരുന്നില്ല ,എട്ടൻ വൈകുന്നേരം വരുമ്പോൾ ആൻറിയെ കണ്ട് വിവരങ്ങൾ അറിഞ്ഞിട്ട് വന്നാൽ മതി ,നമ്മളൊരുമിച്ച് പോയാലും റിസൾട്ട് ഒന്ന് തന്നെയായിരിക്കുമല്ലോ ?

രാധിക തമാശയെന്നോണം പറഞ്ഞു.

ഹ ഹ ഹ അത് നീ പറഞ്ഞത് ശരിയാ ,എങ്കിൽ ശരി ഞാനിറങ്ങുന്നു.

പതിവ് ചുംബനം നല്കി നീരജ് ഓഫീസിലേക്ക് പോകുന്നത് കണ്ട് രാധിക നെടുവീർപ്പിട്ടു.

രാധികേ ..നീയവിടെ എന്തെടുക്കുവാ ഇങ്ങോട്ട് വന്ന് നിരുപമയ്ക്ക് കുളിക്കാനുള്ള വെള്ളം ചൂടാക്ക്

ഭവാനിയമ്മയുടെ വിളി കേട്ട് രാധിക പെട്ടെന്ന് അടുക്കളയിലേക്ക് നടന്നു.

വൈകുന്നേരം നീരജ് കയറി വരുമ്പോൾ, അയാളുടെ മുഖത്ത് ശോകം നിറഞ്ഞിരുന്നു.

എന്ത് പറ്റി നീരജേട്ടാ.. എന്താ

മുഖം വല്ലാതിരിക്കുന്നത്?

രാധികേ ... ഞാനൊരു കാര്യം പറഞ്ഞാൽ നീയെന്നെ വെറുക്കരുത്

സങ്കടം കൊണ്ടയാളുടെ വാക്കുകൾ, തൊണ്ടയിൽ കുരുങ്ങിക്കിടന്നു. 

എന്തൊക്കെയാ നീരജേട്ടാ.. നിങ്ങള് പറയുന്നത്,എനിക്കൊന്നും മനസ്സിലാകുന്നില്ല?

ഞാൻ റിസൾട്ട് വാങ്ങാൻ ആൻറിയുടെ ക്ളിനിക്കിൽ ചെന്നിരുന്നു

ആണോ? എന്നിട്ട് എല്ലാം 

നോർമലല്ലേ?

നിൻ്റെ റിസൾട്ടിൽ കുഴപ്പമൊന്നുമില്ല, പക്ഷേ..

എന്താ ഒരു പക്ഷേ ?

എനിക്ക് ...എനിക്ക്, കുട്ടികളുണ്ടാകാൻ സാധ്യത കുറവാണെന്ന് ആൻ്റി പറഞ്ഞു

ങ്ഹേ, ആൻറി അങ്ങനെ പറഞ്ഞോ ?

ഷീജയാൻ്റിയും നീരജിനോട് കളവ് പറഞ്ഞെന്ന് രാധികയ്ക്ക് മനസ്സിലായി.

അതേ രാധികേ .. നിനക്ക് ഞാനിപ്പോൾ ഒരു ബാധ്യതയായി തോന്നുന്നുണ്ടല്ലേ ?എന്നെ വെറുക്കല്ലേ രാധികേ.. നീയില്ലാതെ എനിക്ക് പറ്റില്ല, പ്ളീസ്... നീയെന്നെ വിട്ട് പോകരുത്

എന്താ നീരജേട്ടാ... ഈ കാണിക്കുന്നത്, നിങ്ങള് കുടിച്ചിട്ടുണ്ടല്ലേ?

അതേ രാധികേ.. വിഷമം സഹിക്കാൻ കഴിയാതെ, കല്യാണത്തിന് ശേഷം ഞാനാദ്യമായിന്ന് കുടിച്ചു

വിഷമമോ, എന്തിന് ?എൻ്റെ 

നീരജേട്ടാ ... മക്കളില്ലാത്ത എത്രയോ ഭാര്യാഭർത്താക്കൻമാർ സന്താഷത്തോടെ പരസ്പരം സ്നേഹിച്ച്  ജീവിച്ചിക്കുന്നുണ്ടെന്നറിയാമോ?, നമ്മളും അത് പോലെ മരണം വരെ സന്തോഷത്തോടെ തന്നെ ജീവിക്കും ,

നിങ്ങളതൊന്നുമോർത്ത് വിഷമിക്കേണ്ട, നീരജ് എവിടെയുണ്ടോ ?അവിടെ രാധികയുമുണ്ടാവും ,ശിവനും പാർവ്വതിയും പോലെ ,സുഖവും, ദു:ഖവും നമ്മളൊരുമിച്ചനുഭവിക്കും,

അതെല്ലാം വിട്ടുകള, എന്നിട്ട് പോയി ഒന്ന് കുളിച്ചിട്ട് വാ 

ഉം ശരി ,നീയിവിടിരിക്ക് ഞാൻ കുളിച്ചിട്ട് വേഗം വരാം

നിഷ്കളങ്കനായ ഒരു കുട്ടിയെ പോലെ ,തോർത്ത്മെടുത്ത് കൊണ്ട്, നീരജ് ബാത്റൂമിൽ കയറി ഡോറടച്ചപ്പോൾ, അത് വരെ അടക്കിപ്പിടിച്ചിരുന്ന, രാധികയുടെ സങ്കടങ്ങൾ, ഒരു വലിയ നിലവിളിയായ് പുറത്തേയ്ക്ക് വന്നെങ്കിലും, നീരജറിയാതിരിക്കാനായ് 

അവൾ വായ പൊത്തി പിടിച്ചു.

ഭാഗം - 6

കുളിമുറിയിലെ ഷവറിൽ നിന്ന് വീഴുന്ന തണുത്ത വെള്ളത്തിനടിയിൽ നില്ക്കുമ്പോൾ നീരജിൻ്റെ മനസ്സിലേക്ക്, ഷീജയാൻ്റി പറഞ്ഞ കാര്യങ്ങൾ തികട്ടി വന്നു.

സീ നീരജ്... ഞാൻ പറയാൻ പോകുന്ന കാര്യങ്ങൾ, ഒരു പക്ഷേ നിങ്ങളൊരിക്കലും പ്രതീക്ഷിക്കാത്ത ഒന്നായിരിക്കും

അത് കൊണ്ട് ,കുറച്ച് പക്വതയോടെ വേണം നീരജ് കാര്യങ്ങളെ അഭിമുഖീകരിക്കേണ്ടത്,

എന്തും സഹിക്കാനുള്ള ഒരു ആത്മബലം നീരജിനുണ്ടാവുകയും വേണം

എന്താ ആൻ്റീ ...എന്താണെങ്കിലും പറഞ്ഞോളു, ഞാനത് കേൾക്കാൻ തയ്യാറാണ്,

നീരജും ,രാധികയും ഇവിടെ വരുന്നതിൻ്റെ തലേ ദിവസം രാജലക്ഷ്മി ചേച്ചി എന്നെ വിളിച്ചിരുന്നു, എന്നിട്ട് നീരജിനോട് യാഥാർത്ഥ്യങ്ങൾ മറച്ച് വയ്ക്കണമെന്ന് പറഞ്ഞപ്പോഴാണ് സത്യത്തിൽ ,നീരജ് ഇത് വരെ ഒന്നുമറിഞ്ഞിരുന്നില്ലെന്ന് ഞാനറിയുന്നത്

എന്താ ആൻറീ.. ഈ പറയുന്നത് ഞാനറിയാത്ത എന്ത് കാര്യങ്ങളാണുള്ളത് ?

പറയാം നീരജ്, അതിന് മുമ്പ് നീയെനിക്ക് ഒരു ഉറപ്പ് തരണം ഞാൻ പറയുന്നത് നിൻ്റെ മനസ്സിൽ നിന്ന് ഒരിക്കലും പുറത്ത് പോകില്ലെന്ന് ,എനിക്ക് വേണമെങ്കിൽ ,രാജലക്ഷ്മി ചേച്ചി പറഞ്ഞത് പോലെ നീരജിൽ നിന്നും എല്ലാം മറച്ച് വയ്ക്കാം പക്ഷേ ഞാൻ പഠിച്ച എത്തിക്സ് എന്നെ അതിന് സമ്മതിക്കുന്നില്ല

ഇല്ല ആൻ്റീ.. ഞാനൊരിക്കലും ആൻറിയെ ഒറ്റ് കൊടുക്കില്ല ധൈര്യമായിപ്പറഞ്ഞാളു 

രാധികയ്ക്ക് ഒരിക്കലും ഗർഭം ധരിക്കാൻ കഴിയില്ല ,കുറച്ച് നാളുകൾക്ക് മുമ്പ് അർബുദം ബാധിച്ച അവളുടെ യൂട്രസ്, അടിയന്തിരമായി റിമൂവ് ചെയ്യേണ്ടി വന്നു ,നീരജിൻ്റെ ആലോചന വന്ന സമയത്ത് അവൾക്കും വീട്ടുകാർക്കും നിങ്ങളെ ആ കാര്യങ്ങൾ അറിയിക്കണമെന് നിർബന്ധമുണ്ടായിരുന്നു,

നീരജിൻ്റെ അമ്മയും സഹോദരിയും അത് ഉറപ്പ് കൊടുത്തതുമാണ് ,പക്ഷേ വിവാഹം കഴിഞ്ഞ് നീരജിൻ്റെ വീട്ടിലെത്തുമ്പോഴാണ് ,നിങ്ങൾ അതറിഞ്ഞിട്ടില്ലെന്ന് രാധികയോട് ഭവാനിയമ്മ പറയുന്നത് ,ആകെ തകർന്ന് പോയ രാധിക, ആ നിമിഷം മുതൽ ഭവാനിയമ്മയുടെ കയ്യിലെ കളിപ്പാട്ടമായി മാറുകയായിരുന്നു,

കുറ്റബോധം കൊണ്ട് രാധിക ,പലപ്പോഴും, നീരജിനോട് സത്യം തുറന്ന് പറയാനൊരുങ്ങിയെങ്കിലും, നിങ്ങളെയവൾക്ക് നഷ്ടപ്പെട്ടു പോകുമെന്ന ഭീതിയിൽ, അവൾ പിന്മാറുകയായിരുന്നു ,

വേണമെങ്കിൽ ,നീരജിന് ഭാര്യ തന്നെ വഞ്ചിച്ചു എന്ന് പറഞ്ഞ്, രാധികയെ ഉപേക്ഷിക്കാം, പക്ഷെ നീരജ് ഒന്നോർക്കണം, രാധിക ശരിക്കും നിരപരാധിയാണ് ,നിങ്ങളിൽ നിന്നുള്ള വേർപാട് അവൾക്ക് സഹിക്കാവുന്നതിലപ്പുറമാണ്,

യൂട്രസ് നഷ്ടപ്പെട്ടതോടെ, എല്ലാം അവസാനിച്ചു എന്ന് കരുതിയിരുന്നിടത്ത് നിന്നാണ്, അവളൊരുപാട് സ്വപ്നം കണ്ട ഒരു ദാമ്പത്യ ജീവിതം നീരജിൽ നിന്ന് രാധികയ്ക്ക് ലഭിച്ചത് ,നിങ്ങളെ ചതിച്ചത് രാധികയല്ല ,നിങ്ങളുടെ അമ്മ തന്നെയാണ്,

ഇനി എന്ത് വേണമെന്ന് നീരജിന് തീരുമാനിക്കാം

ഡോക്ടർ പറഞ്ഞത് കേട്ട് സ്തബ്ധനായി നിന്ന നീരജിന്, സ്ഥലകാലബോധം വീണ്ടെടുക്കാൻ, കുറച്ച് സമയം വേണ്ടിവന്നു.

ഇല്ല ഡോക്ടർ ,എല്ലാം എനിക്ക് മനസ്സിലായി ,രാധിക എന്നെ ചതിക്കില്ലെന്നെനിക്കറിയാം ,

അവളുടെ നിസ്സഹായാവസ്ഥ എനിക്ക് മനസ്സിലാകും, അത് മാത്രമല്ല അവളെന്നെ സ്നേഹിക്കുന്നതിനെക്കാൾ എത്രയോ ഇരട്ടി ഞാനവളെ സ്നേഹിക്കുന്നുണ്ട് ,അത് കൊണ്ട് അവളുടെ കുറവുകൾ ഞാനറിഞ്ഞതായിട്ട് 

ഒരിക്കലുമവളറിയില്ല,

കുറവുകൾ എനിക്കാണെന്നേ ഞാൻ പറയു ,ഡോക്ടറാൻ്റി എന്നോടങ്ങനെയാണ് പറഞ്ഞിരിക്കുന്നതെന്ന് ഞാൻ രാധികയോട് പറഞ്ഞോളാം

ശരി ഡോക്ടർ ഞാനിറങ്ങുന്നു.

അല്ലാ .. നീരജിനോട് ഞാൻ ചോദിക്കുന്നത് കൊണ്ടൊന്നും തോന്നരുത് ?

എന്താ ആൻ്റീ .. ചോദിച്ചോളു

നൊന്ത്പെറ്റ ഒരമ്മയ്ക്ക്, സ്വന്തം മകനോട് ഇത്ര ക്രൂരമായി പെരുമാറാൻ കഴിയുമോ?

ഹ ഹ ഹ അതിന് ഭവാനിയമ്മയല്ലല്ലോ എന്നെ പ്രസവിച്ചത് ,വിവാഹം കഴിഞ്ഞ് ആറ് വർഷം കഴിഞ്ഞിട്ടും, മക്കളുണ്ടാകാതിരുന്നപ്പോൾ ഭവാനിയമ്മയും വിശ്വംഭരനും ചേർന്ന്, എന്നെ ദത്തെടുത്തതാണ് ,എന്നെ സ്വന്തം മകനെപ്പോലെ രണ്ട് പേരും മത്സരിച്ച് സ്നേഹിച്ച് കൊണ്ടിരിക്കുമ്പോഴാണ്, ഭവാനിയമ്മ ഗർഭിണിയാകുന്നത്,

അങ്ങനെയവർ, ആദ്യം നിരുപമയ്ക്കും, പിന്നീട് അനുപമയ്ക്കും ജന്മം നല്കി,

എങ്കിലും, അവരെന്നെ ഉപേക്ഷിച്ചില്ല ,സ്നേഹം ഇത്തിരി കുറഞ്ഞെങ്കിലും, വളർത്തി വലുതാക്കി പഠിപ്പിച്ച് എന്നെയൊരു ഉദ്യോഗസ്ഥനാക്കി ,

ഒരു പക്ഷേ, അതിൻ്റെ പ്രതിഫലമായിട്ടായിരിക്കും, എന്നെ ഒരു പണക്കാരന് വിറ്റ് മുതലാക്കാൻ ,അവർ ഇങ്ങനെയൊരു കളി കളിച്ചത്, പക്ഷേ, എനിക്കവരോട് തെല്ലും വൈരാഗ്യം തോന്നുന്നില്ല,

ചിലപ്പോൾ അന്ന് അവരെന്നെ ദത്തെടുത്തില്ലായിരുന്നെങ്കിൽ, ഞാനൊരിക്കലും ഇങ്ങനെയാവില്ലായിരുന്നു,

ഇപ്പോൾ എനിക്ക് അച്ഛനും അമ്മയുമുണ്ട് ,സഹോദരിമാരുണ്ട്,

ജീവന് തുല്യം സ്നേഹിക്കുന്ന ഭാര്യയും, അല്ലലില്ലാതെ ജീവിക്കാൻ നല്ലൊരു ഉദ്യോഗവുമുണ്ട്, എനിക്കത് മതി ,ആരോരുമില്ലാതെ അനാഥനായി ഏതെങ്കിലും തെരുവിൽ അലഞ്ഞ് നടക്കുന്നതിലും ഭേദമല്ലേ? ഇത്തിരി കുറവുണ്ടെങ്കിലും,

എല്ലാവരോടുമൊപ്പം സനാഥനായി സന്തോഷത്തോടെ കഴിയുന്നത്.

ഡോക്ടറാൻ്റിയോട് ,അത്രയും പറഞ്ഞ് ക്ളിനിക്കിൽ നിന്നിറങ്ങുമ്പോൾ, മനസ്സ് പിടിപിട്ട് പോകുന്നത് പോലെ തോന്നിയത് കൊണ്ടാണ്, ഒരു ധൈര്യത്തിന് വേണ്ടി, അടുത്ത ബാറിൽ കയറി ലേശം കുടിച്ചത്, ഇനി കുടിക്കില്ല, രാധികയോട് സംസാരിച്ച് കഴിഞ്ഞപ്പോൾ, കുറച്ചാശ്വാസമായി.

നീരജേട്ടാ.. കുളി കഴിഞ്ഞില്ലേ ?

ദേ ചായ ചൂടാറുന്നതിന് മുൻപ് വന്ന് കുടിക്ക് കെട്ടോ

പുറത്ത് നിന്ന് രാധികയുടെ വിളി കേട്ട് ,നീരജ് വേഗം തോർത്തെടുത്ത് തലതുവർത്തി .

മോനേ നീരജേ... നിന്നോടൊരു പ്രധാനപ്പെട്ട കാര്യം പറയാനാ അമ്മ വന്നത്

രാധിക കൊടുത്ത ചൂട് ചായ ,മൊത്തിക്കുടിച്ച് കൊണ്ടിരിക്കുമ്പോൾ, ഭവാനിയമ്മ അവരുടെ മുറിയുടെ വാതില്ക്കൽ വന്ന്, നീരജിനോട് പറഞ്ഞു.

എന്താ അമ്മേ ... പറയൂ...

അനുപമയ്ക്ക് കല്യാണപ്രായമായി, അവൾക്ക് നല്ലൊരു ചെറുക്കനെ നോക്കണ്ടേ ?

അതിനെന്താ അമ്മ ,നമ്മുടെ പഴയ ബ്രോക്കറോട് പറയാമായിരുന്നില്ലേ? നല്ല ആലോചന വല്ലതുമുണ്ടെങ്കിൽ കൊണ്ട് വരാൻ

ങ്ഹാ, ഞാനയാളോട് സൂചിപ്പിച്ചിരുന്നു ,ഒരു സർക്കാർ ജോലിക്കാരനെ നോക്കാൻ

സർക്കാർ ജോലിക്കാരനോ അതിന് നല്ല സ്ത്രീധനം വേണ്ടേ അമ്മേ .. ?

ങ്ഹാ, അത് വേണം, നമ്മുടെ കൈയ്യിലിപ്പോൾ, ആവശ്യത്തിന് സ്വർണ്ണമുണ്ടല്ലോ? പിന്നെ നാലഞ്ച് ലക്ഷം രൂപ കൂടി വേണം, അത് മോന് ലോൺ കിട്ടുമല്ലോ ?

രാധികയുടെ സ്വർണ്ണം കണ്ടിട്ടാണ് അമ്മയുടെ ഈ ചാട്ടമെന്ന് നീരജിന് മനസ്സിലായി.

അല്ലമ്മേ.. രാധികയ്ക്ക് കിട്ടിയ സ്വർണ്ണത്തിൻ്റെ കാര്യമാണോ അമ്മ പറയുന്നത് ,അതിലിനി എത്ര ബാക്കിയുണ്ടാവും, അതിൽ നിന്നെടുത്തല്ലേ? തോമായുടെ കടം വീട്ടിയതും, നിരുപമയെ സഹായിച്ചതും

അത് കുറച്ചല്ലേ എടുത്തുള്ളു ,എന്തായാലും അൻപത് പവനെങ്കിലും ബാക്കിയുണ്ടാവും

ഈശ്വരാ ..രാധികയുടെ ദേഹത്ത് കിടക്കുന്ന പത്ത് പവനും കഴിച്ച്, ഇനി അൻപത് പവനെന്ന് പറയുമ്പോൾ, ബാക്കി നാല്പത് പവനും വിറ്റ്തുലച്ചോ? പാവം രാധിക, അവളണിഞ്ഞ് നടക്കേണ്ട സ്വർണ്ണമാണ്, അമ്മയിങ്ങനെ ധൂർത്തടിക്കുന്നത് ,ഇനി അതവനുവദിച്ച് കൂടാ 

എങ്ങനെയെങ്കിലും, അമ്മയിൽ നിന്നും ആ സ്വർണ്ണം തിരിച്ച് വാങ്ങണമെന്ന്, നീരജ് മനസ്സിൽ കണക്ക് കൂട്ടി.

എൻ്റമ്മേ ..ഈ കാലത്ത് ഒരു സർക്കാർ ജോലിക്കാരനെ കിട്ടണമെങ്കിൽ കുറഞ്ഞത്, നൂറ് പവനും ,പത്ത് ലക്ഷം രൂപയുമെങ്കിലും കൊടുക്കണം,

അമ്മയ്ക്ക് സർക്കാർ ജോലിക്കാരനായ മരുമകനെ തന്നെ കിട്ടണമെന്നുണ്ടെങ്കിൽ, ഞാനൊരു വഴി പറയാം

എന്താ മോനേ നീ പറ?

അതായത് അമ്മേ.. ടൗണിൽ ഇപ്പോൾ പുതിയൊരു ഫിനാൻസ് കമ്പനി വന്നിട്ടുണ്ട്, അവിടെ നമ്മൾ എത്ര രൂപ ഡെപ്പോസിറ്റ് ചെയ്താലും, കൃത്യം ഒരു വർഷം കഴിയുമ്പോൾ, അതിൻ്റെ ഇരട്ടി തിരിച്ച് കിട്ടും

ങ്ഹേ നേരാണോ മോനേ?

അതെ അമ്മേ.. ഞാൻ പറയുന്നത്, അമ്മയുടെ കൈയ്യിലുള്ള അൻപത് പവൻ സ്വർണ്ണം ഇങ്ങെടുത്തോണ്ട് വാ, നാളെ ഞാനത് കൊണ്ട് കടയിൽ കൊടുത്തിട്ട്, വിറ്റ് കിട്ടുന്ന കാശ്  മുഴുവൻ ,ആ കമ്പനിയിൽ കൊണ്ട് പോയി ഡെപ്പോസിറ്റ് ചെയ്യാം,

അടുത്ത വർഷമാകുമ്പോൾ, നൂറ് പവൻ സ്വർണ്ണം വാങ്ങാനുള്ള കാശായി, അത് തിരിച്ച് നമുക്ക് കിട്ടില്ലേ?അപ്പോൾ അമ്മയുടെ ആഗ്രഹം പോലെ, അനുപമയെ നല്ല ഒന്നാന്തരം സർക്കാർ ജോലിക്കാരന് കെട്ടിച്ച് കൊടുക്കുകയും ചെയ്യാം

അത് കേട്ട് ഭവാനിയമ്മയുടെ കണ്ണുകൾ തിളങ്ങി.

അത് ശരിയാ മോനേ ...

അമ്മ ഇപ്പോൾ തന്നെ പോയി സ്വർണ്ണമെടുത്തോണ്ട് വരാം

നീരജേട്ടാ... അമ്മയോട്

പറഞ്ഞത് സത്യമാണോ?

അമ്മ സ്വർണ്ണമെടുക്കാനായി തിരിച്ച് പോയപ്പോൾ, രാധിക നീരജിനോട് ചോദിച്ചു.

ഒരിക്കലുമല്ല ,എങ്ങനെയെങ്കിലും അമ്മയുടെ കൈയ്യിൽ നിന്ന് ബാക്കി സ്വർണ്ണമെങ്കിലും തിരിച്ച് വാങ്ങിയില്ലെങ്കിൽ, 

അത് കൂടി നിനക്ക് നഷ്ടപ്പെടും ,അതുണ്ടാവാതിരിക്കാൻ ഞാനത് വാങ്ങി ബാങ്ക് ലോക്കറിൽ വയ്ക്കാൻ പോകുവാ,

ഇനി അതിനെക്കുറിച്ച് അമ്മ അടുത്ത വർഷമേ അന്വേഷിക്കുകയുള്ളു, ആ സമയത്ത്, നമുക്ക് എന്തെങ്കിലും കളവ് പറയാം, ഇപ്പോൾ തന്നെ പത്ത് നാല്പത് പവൻ സ്വർണ്ണവും നാലഞ്ച് ലക്ഷം രൂപയും അമ്മ, സ്വന്തം ഇഷ്ടപ്രകാരം ചിലവാക്കി തീർത്തു ,ഇനിയതാവർത്തിക്കാൻ പാടില്ല ,മരുമകളുടെ മുതല് കൊണ്ട്, പെൺമക്കളുടെ ഭാവി ഭദ്രമാക്കാൻ നോക്കുന്ന അമ്മയുടെ സ്വഭാവം, ഒരിക്കലും അംഗീകരിച്ച് കൊടുക്കാൻ കഴിയില്ല

രാധികയ്ക്ക് നീരജിനോട് ബഹുമാനം തോന്നി.

വൈകിയാണെങ്കിലും ,തൻ്റെ അച്ഛൻ കഷ്ടപ്പെട്ട് ഉണ്ടാക്കി തന്ന മുതല് ,ഇനിയെങ്കിലും സംരക്ഷിക്കണമെന്ന് അദ്ദേഹത്തിന് തോന്നിയല്ലോ?

പിറ്റേന്ന്, രാധികയ്ക്കൊരു സന്തോഷവാർത്തയുമായിട്ടാണ്

നീരജ് ഓഫീസിൽ നിന്ന് വന്നത്.

രാധികേ.. എനിക്ക് വയനാട്ടിലേക്ക് ട്രാൻസ്ഫറായി

അത് കേട്ട് രാധികയുടെ മുഖം വാടി.

അപ്പോൾ എന്നെ തനിച്ചാക്കി പോകുവാണോ?

ഹേയ്, എന്നാര് പറഞ്ഞു ,എൻ്റെയൊപ്പം നീയുമുണ്ടാവും ,ഇനി കുറച്ച് നാളത്തേയ്ക്ക് ഞാനും നീയും മാത്രമുള്ള ഒരു കുഞ്ഞ് ലോകത്തേയ്ക്കാണ് നമ്മൾ പോകുന്നത് ,അവിടെ നിന്നെ ശകാരിക്കാനും, കഷ്ടപ്പെടുത്താനും ആരും വരില്ല

അത് കേട്ട് സന്തോഷാതിരേകത്താൽ,

പരിസരം മറന്ന് രാധിക അവനെ കെട്ടിപ്പുണർന്നു.

ഭാഗം 7

നാല് മണി കഴിഞ്ഞപ്പോഴാണ്, വീട്ടിൽ നിന്ന് അമ്മ വിളിക്കുന്നത്

മോനേ...അനുപമ, കൂട്ടുകാരി ജലജയുടെ വീട്ടിൽ പോയിട്ട് വരാമെന്ന് പറഞ്ഞ്, രാവിലെ പോയതാ,

ഇത് വരെ തിരിച്ചെത്തിയിട്ടില്ല

അവളെ ചിലപ്പോൾ, ജലജ വിടാത്തത് കൊണ്ടാവുമമ്മേ ,ഞാൻ തിരിച്ച് വരുമ്പോൾ അവിടെ കയറി അവളെ കൂട്ടിക്കൊണ്ട് വരാം

അതല്ല മോനേ..ഇത്രയും താമസിച്ചപ്പോൾ, ഞാൻ ജലജയുടെ വീട്ടിലേക്ക് വിളിച്ച് ചോദിച്ചു, അനുപമ അവിടെ ചെന്നിട്ടില്ലെന്നാണ് ജലജ പറഞ്ഞത്

ങ്ഹേ! ചെന്നിട്ടില്ലെന്നോ? അവളവിടെ തന്നെ പോകുവെന്നാണോ അമ്മയോട് പറഞ്ഞത്?

അതെ മോനേ ... എനിക്കാകെ പേടിയാകുന്നെടാ ,നീയൊന്ന് പോയി അന്വേഷിക്കെടാ

ഭവാനിയമ്മയുടെ വാക്കുകളിൽ നിറഞ്ഞ ആശങ്ക, നീരജിൻ്റെ മനസ്സിലേക്കും പടർന്നു.

അമ്മ വിഷമിക്കേണ്ട, ഞാനവളുടെ മറ്റു കൂട്ടുകാരികളാടൊക്കെ ഒന്നന്വേഷിക്കട്ടെ

അരുതാത്തതെത്തോ സംഭവിച്ചതായി ,നീരജിൻ്റെ മനസ്സ് പറയുന്നുണ്ടായിരുന്നു ,

എങ്കിലും അവൾ പോകാൻ സാധ്യതയുള്ളിടത്തെല്ലാം, 

അയാൾ അന്തിയോളം അന്വേഷിച്ചെങ്കിലും, യാതൊരു പ്രയോജനവുമുണ്ടാകാതിരുന്നത് കൊണ്ട്, മറ്റ് വഴിയില്ലാതെ നീരജ്, നേരെ പോലീസ് സ്റ്റേഷനിൽ ചെന്ന്, പരാതി കൊടുത്തിട്ട് വീട്ടിലേക്ക് പോയി.

നെഞ്ചിൽ തീയുമായി ഭവാനിയമ്മ നീരജിനെ കാത്ത്, വാതില്ക്കൽ തന്നെ നില്പുണ്ടായിരുന്നു.

അവളെവിടെ മോനെ ?

അനുപമയെ കണ്ടെത്താൻ കഴിഞ്ഞില്ലെന്ന്, നീരജ് പറഞ്ഞത് കേട്ട്, ഒരലർച്ചയോടെ ഭവാനിയമ്മ പുറകിലേക്ക് മറിഞ്ഞു.

ഒച്ചയും ബഹളവും കേട്ട്, അയൽവാസികളൊക്കെ വന്ന്, വിവരമറിഞ്ഞ് മൂക്കത്ത് വിരൽ വച്ചു.

അവളാരുടെയെങ്കിലും കൂടെ ഒളിച്ചോടിയതാവും ,അല്ലെങ്കിലും അവൾക്കിത്തിരി ഇളക്കം കൂടുതലായിരുന്നു

അയൽക്കാർ പരസ്പരം പിറുപിറുത്തു.

കുറച്ച് സമയം കൊണ്ട് അവിടം മരണവീട് പോലെയായി.

പാതിരാത്രിയോടടുത്ത സമയം, നീരജിൻ്റെ ഫോണിലേക്ക് പോലീസ് സ്റ്റേഷനിൽ നിന്നൊരു വിളി വന്നു.

നീരജും വിശ്വംഭരനും കൂടി സ്റ്റേഷനിലെത്തുമ്പോൾ, 

അനുപമയോടൊപ്പം, മറ്റൊരു ചെറുപ്പക്കാരനും നില്ക്കുന്നത് കണ്ട് അവരിരുവരും ഞെട്ടി.

റെയിൽവേ സ്‌റ്റേഷനിൽ നിന്നാണ് ഇവരെ കിട്ടിയത് ,ഒരു ഒളിച്ചോട്ടമായിരുന്നു രണ്ട് പേരുടെയും ഉദ്ദേശ്യം, അനുപമയ്ക്ക് അയാളോടൊപ്പം ജീവിക്കാനാണ് താല്പര്യമെന്നാണ് പറയുന്നത് ,ഇനി നിങ്ങളൊന്ന് സംസാരിച്ച് നോക്ക്

Si പറഞ്ഞത് കേട്ട് ,വിശ്വംഭരൻ മകളുടെയടുത്തേക്ക് ചെന്നു.

മോളേ ... നിനക്കിങ്ങനെയൊരു ഇഷ്ടമുണ്ടായിരുന്നെങ്കിൽ, ഞങ്ങളോട് പറഞ്ഞാൽ പോരായിരുന്നോ ?ഇനിയിപ്പോൾ നാട്ട്കാരുടെ മുന്നിൽ എങ്ങനെ തല ഉയർത്തി നടക്കും ?

പറഞ്ഞാൽ അമ്മ സമ്മതിക്കില്ലെന്ന് എനിക്കുറപ്പുണ്ട്,

കാരണം ,ഈ നില്ക്കുന്ന 

സുനിക്ക് ,സർക്കാർ ജോലിയൊന്നുമില്ല ,കൂലിപ്പണിക്കാരനാണ് ,ഇപ്പോൾ പെയിൻ്റിങ്ങ് പണിക്ക് പോകുവാ,മാത്രമല്ല ലക്ഷം വീട് കോളനിയിലാണ് സുനി താമസിക്കുന്നത്

ഉദ്യോഗമില്ലാത്തത് പോട്ടെ ,നിനക്ക് നമ്മുടെ ജാതിയിലുള്ള ഒരുത്തനെ സ്നേഹിക്കാമായിരുന്നില്ലേ ? ഞാനിനി ബന്ധുക്കളോടൊക്കെ എന്ത് സമാധാനം പറയും?

അതിന് അച്ഛൻ വിഷമിക്കേണ്ട,

ഞങ്ങളെ, ഞങ്ങടെ പാട്ടിന് വിട്ടേക്ക്, കുടുംബത്തിന് പേരുദോഷമുണ്ടാക്കിയ മകളെ അടിച്ച് പുറത്താക്കിയെന്ന് ബന്ധുക്കളോട് പറഞ്ഞാൽ മതി, നിങ്ങൾക്കൊരു ബാധ്യതയായി ഞങ്ങളൊരിക്കലും അങ്ങാട്ട് വരില്ല

എന്താ മോളേ.. ഈ പറയുന്നത്, അച്ഛൻ അദ്ദേഹത്തിൻ്റെ വിഷമങ്ങൾ പറഞ്ഞതല്ലേ?

നീയിപ്പോൾ ഞങ്ങളോടൊപ്പം വാ,

സുനി അയാളുടെ വീട്ടിലേക്കും പൊയ്ക്കോട്ടെ, നാളെ ഞങ്ങൾ സുനിയുടെ വീട്ടുകാരുമായി തമ്മിൽ സംസാരിച്ചിട്ട്, നമ്മുടെ അമ്പലത്തിൽ വച്ച് ,നിങ്ങളുടെ വിവാഹം നടത്തി തരാം, എന്താ അത് പോരെ?

നീരജ്, അവർക്ക് രണ്ട് പേർക്കും ഉറപ്പ് കൊടുത്തിട്ട് ,സ്റ്റേഷനിൽ നിന്നും അനുപമയെയും കൊണ്ട് വീട്ടിലേക്ക് പോയി.

ഭവാനിയമ്മ ആദ്യമൊക്കെ എതിർപ്പ് പ്രകടിപ്പിച്ചെങ്കിലും, മറ്റൊരാളുമായി ഒളിച്ചോടിപ്പോയ പെണ്ണിനെ വിവാഹം കഴിക്കാൻ, ഇനിയാരും തയ്യാറാവില്ലെന്ന് നീരജ് പറഞ്ഞതോടെ, അവർക്ക് മനസ്സിലാ മനസ്സോടെ സമ്മതിക്കേണ്ടി വന്നു.

ഭാഗ്യത്തിന്, സുനിയുടെ വീട്ടുകാർ സ്ത്രീധനമൊന്നും ചോദിച്ചില്ല.

നമ്മള് തറവാട്ട്കാരല്ലേ മോനേ.. അവരൊന്നും ചോദിച്ചില്ലെങ്കിലും, അവളുടെ ദേഹത്ത് കുറച്ച് സ്വർണ്ണമെങ്കിലുമിട്ട് കൊടുക്കണ്ടെ?

ഉള്ള സ്വർണ്ണമെടുത്ത് നമ്മള് വില്ക്കുകയും ചെയ്തല്ലോ ഇനിയെന്താ ഒരു വഴി ?

ഭവാനിയമ്മ നീരജിനോട് അഭിപ്രായമാരാഞ്ഞു.

അമ്മ പറഞ്ഞത് ശരിയാ, കുറഞ്ഞത് പത്ത് പവനെങ്കിലും വേണ്ടേ? ഒരു കാര്യം ചെയ്യാം, രാധികയുടെ ദേഹത്ത് കിടക്കുന്നതെല്ലാം കൂടി പത്ത് പവനുണ്ടാവും, തല്ക്കാലം അതെടുക്കാം ,അടുത്ത വർഷം നമുക്ക് ഡെപ്പോസിറ്റ് ചെയ്ത പൈസ തിരിച്ച് കിട്ടുമ്പോൾ, പത്തിന് പകരം ഇരുപത് പവൻ രാധികയ്ക്ക് കൊടുക്കാമെന്ന് പറയാം, അപ്പാൾ അവൾക്ക് സന്തോഷമാവും

ങ്ഹേ? പത്തിന് പകരം ഇരുപതോ? അങ്ങനെയാണെങ്കിൽ ഒരു കാര്യം ചെയ്യാം, നിരുപമയുടെ കൈവശം പത്തിരുപത്തിയഞ്ച് പവനോളം സ്വർണ്ണമിരുപ്പുണ്ട്, തല്ക്കാലം അത് നമുക്ക് എടുക്കാം ,അടുത്ത വർഷം അവൾക്ക് അൻപത്‌പവനായി തിരിച്ച് കൊടുത്താൽ മതിയല്ലോ? മാത്രമല്ല, ആകെയുള്ള പത്ത് പവനെടുത്താൽ ,രാധികയ്ക്ക് ദേഹത്ത് ഒന്നുമുണ്ടാവുകയുമില്ല,

അനുപമയ്ക്ക് കൊടുക്കുന്നത് ഒരു പാട് കുറഞ്ഞും പോകുകയും ചെയ്യും

അമ്മയുടെ സംസാരം കേട്ട് നീരജിന് ഉള്ളിൽ ചിരി പൊട്ടി,

കടിച്ച പാമ്പിനെ കൊണ്ട് തന്നെ വിഷമിറക്കുന്നത് ഇങ്ങനെയാണമ്മേ... എന്നയാൾ മനസ്സിൽ പറഞ്ഞു.

ആർഭാടങ്ങളൊന്നുമില്ലാതെ അമ്പലമുറ്റത്ത് വച്ച് അനുപമയുടെ കഴുത്തിൽ സുനി താലി കെട്ടി.

ഇളയവളായത് കൊണ്ട് ഒരു പാട് പുന്നാരിച്ചാണ് ഭവാനിയമ്മ അനുപമയെ വളർത്തിയത്

വിവാഹം കഴിഞ്ഞ് യാതൊരു വിഷമവുമില്ലാതെ ഭർത്താവിനൊപ്പം മകൾ കാറിൽ കയറി പോയപ്പോൾ ഭവാനിയുടെ അമ്മമനം തേങ്ങി.

നിരുപമയുടെ പ്രസവം കഴിഞ്ഞിട്ട് കുട്ടിക്ക് ഒരു വയസ്സാകാൻ പോകുന്നു

മോളേ നിരുപമേ .. മനോജിത് വരെ നിന്നെ കൂട്ടികൊണ്ട് പോകുന്നതിനെ കുറിച്ചൊന്നും പറഞ്ഞില്ലേ?

ഇല്ലമ്മേ... ഞാൻ ചോദിച്ചപ്പോൾ പറയുവാ, ഇവിടെ നിനക്കും കൊച്ചിനും അസൗകര്യങ്ങളൊന്നുമില്ലല്ലോ ?

ഉണ്ണാനും ഉടുക്കാനും കിട്ടുന്നുണ്ടല്ലോ? അങ്ങോട്ട് ചെന്നാൽ ചിലപ്പോൾ അതൊന്നും കിട്ടിയെന്ന് വരില്ലന്ന് ,മനോജേട്ടൻ കടത്തിൻ്റെ പുറത്ത് കടവുമായിട്ട് നില്ക്കുവാണമ്മേ ..., ഇനിയാ വീടും പറമ്പും ബാങ്ക് കാര് കൊണ്ട് പോകുമോന്നാ മനോജേട്ടൻ്റെ പേടി

എൻ്റെ ഭഗവതീ.. അവനെയൊന്ന് രക്ഷപെടുത്തിയെടുക്കാനല്ലേ ഞാൻ കണ്ട പെണ്ണിൻ്റെ മുതലൊക്കെയെടുത്ത് അവനെ സഹായിച്ചത്, എന്നിട്ടവൻ സകലതും നശിപ്പിച്ചല്ലോടി,

എന്തെല്ലാം പ്രതീക്ഷകളോടെ വളർത്തിയതാണ്, രണ്ട് പെൺമക്കളെ, എന്നിട്ട് നിൻ്റെ ജീവിതം, വെള്ളത്തിൽ വരച്ച വരപോലെയായി ,സർക്കാർ ജോലിക്കാരനെ കൊണ്ട് കെട്ടിക്കാനിരുന്ന  മറ്റവളാണെങ്കിൽ അവൾക്കിഷ്ടപ്പെട്ട ഒരുത്തൻ്റെ കൂടെ പോയി, ഇതിന് തക്ക എന്ത് തെറ്റാണീശ്വരാ  ... ഞാൻ ചെയ്തത്?

എല്ലാ പെൺമക്കളെയും, അവരുടെ മാതാപിതാക്കൾ, ഇത് പോലെ ഒരു പാട് പ്രതീക്ഷകളോടെ തന്നെയാണ് കെട്ടിച്ചയച്ചിരിക്കുന്നത്, എന്ന് നിങ്ങളോർത്തില്ല ഭവാനിയമ്മേ ..

ഭവാനിയമ്മയുടെ നിലവിളി അടുക്കളയിൽ നിന്ന് കേട്ട രാധിക, മനസ്സിൽ പറഞ്ഞു.

രാധികേ... റിലീവിങ്ങ് ഓർഡർ ഒപ്പിട്ട് കിട്ടി,നാളെ തന്നെ നമുക്ക് പുറപ്പെടണം കെട്ടോ ?

ഓഫീസിൽ നിന്ന് വന്ന നീരജ് ,രാധികയോട് പറഞ്ഞു.

അത് കേട്ടിട്ടും , രാധിക നിർവികാരതയോടെ നിന്നപ്പോൾ നീരജിന് ഉത്കണ്ഠയായി .

എന്ത് പറ്റി രാധികേ .. എന്താ നിനക്കൊരു സന്തോഷമില്ലാത്തത്?

അത് പിന്നെ,എനിക്ക് നീരജിനോട് ചില കാര്യങ്ങൾ പറയാനുണ്ട്, കുറച്ച് നാളായി ,എൻ്റെ മനസ്സിൽ കിടന്ന് വീർപ്പ് മുട്ടുന്ന ചില സത്യങ്ങൾ ,പല പ്രാവശ്യം ഞാൻ തുറന്ന് പറയാൻ ശ്രമിച്ചിട്ടും അതിനുള്ള ധൈര്യമില്ലാത്തത് കൊണ്ട് മാത്രം, വേദനയോടെ വീണ്ടും ഉള്ളിലൊതുക്കി നീരജിൻ്റെ മുന്നിൽ അഭിനയിക്കുകയായിരുന്നു ഞാൻ,അറിഞ്ഞ് കൊണ്ട് ഒരു തെറ്റും ചെയ്യാത്ത എനിക്ക് ,ഇനിയും ഒരു അപരാധിയെ പോലെ ഇങ്ങനെ നീറി നീറി ജീവിക്കാൻ വയ്യ, എനിക്കെല്ലാം നീരജിനോട്

തുറന്ന് പറയണം

വേണ്ട, നീയൊന്നും പറയേണ്ട, എല്ലാമെനിക്കറിയാം, നീ നിരപരാധിയാണെന്നും എല്ലാത്തിനും കാരണം എൻ്റെ അമ്മയാണെന്നും എനിക്കറിയാം കഴിഞ്ഞ കാര്യങ്ങളോർത്ത് എരിഞ്ഞ് തീർക്കാൻ ഇനി സമയമില്ല രാധികേ ...

നമുക്ക് ഒരു പാട് കാര്യങ്ങൾ ചെയ്യാനുണ്ട് ,വയനാട്ടിൽ ചെന്ന്

ജോയിൻ ചെയ്ത് അവിടെയൊന്ന് സെറ്റിലായിട്ട് ,നമുക്ക് വീണ്ടുമൊരു ഡോക്ടറെ കാണാൻ പോകണം,

നമുക്ക് താലോലിക്കാൻ നമ്മുടെ തന്നെ ഒരു കുഞ്ഞിനെ വേണ്ടേ?

ഒരു വഴിയടഞ്ഞാൽ മറ്റ് വഴികളുണ്ടെന്ന് ,അന്വഷണത്തിൽ എനിക്ക് മനസ്സിലായി ,ഇനി നമ്മൾ ഈ നാട്ടിലേക്ക് തിരിച്ച് വരുമ്പോൾ കൂടെ നമ്മുടെ കുഞ്ഞുമുണ്ടാവും

നീരജ്... ഞാനെത്ര ഭാഗ്യവതിയാണല്ലേ?

പ്രണയാതുരയായവൾ അവൻ്റെ നെഞ്ചിലേക്ക് വീണു.

അവസാനിച്ചു.

സജി തൈപ്പറമ്പ്.