🍁ഉണ്ണിയുടെ കേസ് ഡയറി-മൂന്ന് പെണ്ണുങ്ങൾ ( ഫുൾ പാർട്ട് )🍁

 ഉണ്ണിയുടെ കേസ് ഡയറി- മൂന്ന് പെണ്ണുങ്ങൾ ( ഫുൾ പാർട്ട് )

*****************************

ഭാഗം 1

"നിനക്ക് വട്ടാണോ മായേ...? പീഡനം സഹിക്ക വയ്യാതെ ആത്മഹത്യ ചെയ്ത ഒരു പെണ്ണിന്റെ ജീവിതം നശിപ്പിച്ച ആളെത്തന്നെ ഭർത്താവായി സ്വീകരിക്കാൻ...?"

മായ ശരണ്യയെ ഒന്ന് നോക്കി

"എന്നോട് ഡോക്ടർ എല്ലാം പറഞ്ഞിട്ടുണ്ട്. അദ്ദേഹം നിരപരാധിയാണ്. എന്റെ വീട്ടുകാരെപ്പോലെ നീയും ഇങ്ങനെ കുറ്റപ്പെടുത്തല്ലേ എന്നെ... പ്ലീസ്"

ശരണ്യ മായയെ നോക്കി കണ്ണുരുട്ടി

"നിനക്ക് വട്ടാണ്. നീ സ്വയം കുഴി തോണ്ടിയാ ആ വൃത്തികെട്ടവന്റെ കൂടെ ജീവിക്കാൻ ഒരുങ്ങുന്നേ. അവൻ ഡോക്ടർ അല്ല... പിശാചാണ്"

ഒന്ന് നിറുത്തിയിട്ട് ശരണ്യ മായയെ നോക്കി

"ഡോക്ടർ മഹേഷ്‌ ആള് മിടുക്കനാ, അവൻ നിന്നെ പറഞ്ഞ് മയക്കി കയ്യിലെടുത്തു. മായേ നീയൊരു കാര്യം മനസ്സിലാക്കണം ഈ സിനിമയിൽ കാണുന്നപോലെ ഒന്നുമല്ല ജീവിതം. ഇങ്ങനത്തെ ക്രൂരന്മാരെയൊക്കെ സിനിമയിൽ കാണാൻ ഭയങ്കര രസാണ്, പക്ഷെ ജീവിതത്തിൽ..."

മായ ശരണ്യയെ നോക്കി

"എന്റെ ശരണ്യേ, മഹേഷിന്റെ ഭാര്യക്ക് മാനസികമായി ചില പ്രശ്നങ്ങൾ ഉണ്ടായിരുന്നു. അത് അവരുടെ കുടുംബത്തിൽ എല്ലാവർക്കും അറിയാം. നീ വെറുതേ മഞ്ഞ ഓൺലൈൻ മാധ്യമങ്ങളിൽ വരുന്ന വാർത്ത കണ്ടിട്ട് മഹേഷേട്ടനെ വിലയിരുത്തരുത്"

"ആഹാ എന്നിട്ടാണോ ഈ മഹേഷ്‌ ആത്മഹത്യാ പ്രേരണ കുറ്റത്തിന് മൂന്നാല് വർഷം ജയിലിൽ കിടന്ന് ഉണ്ട തിന്നത്"

"അതുപിന്നെ അവളുടെ ആത്മഹത്യാ കുറിപ്പ്..."

ശരണ്യ മായയെ നോക്കി

"അതുതന്നെയാ ഞാനും പറഞ്ഞേ... മഹേഷ്‌ അത്രക്ക് നല്ലവൻ ആയിരുന്നേൽ അവൾ അങ്ങനൊരു ആത്മഹത്യാ കുറിപ്പ് എഴുതുമായിരുന്നോ...?"

"നിന്നോട് തർക്കിക്കാൻ ഞാനില്ല. ഞാൻ ആദ്യമേ പറഞ്ഞു, ആ കുട്ടിക്ക് മാനസികമായി ചില പ്രശ്നങ്ങൾ ഉണ്ടായിരുന്നു എന്ന്. സ്വബോധം ഇല്ലാത്ത അവൾ എന്തെങ്കിലുമൊക്കെ എഴുതി വെച്ചെന്ന് കരുതി എനിക്ക് ഡോക്ടറെ അവിശ്വസിക്കാൻ കഴിയില്ല"

ശരണ്യ എന്തോ പറയാൻ ശ്രമിച്ചപ്പോൾ മായ അത് തടഞ്ഞു

"ഡോക്ടറെ പറ്റി കുറ്റം പറയാൻ ആണെങ്കിൽ ശരണ്യ ഇനി എന്നോട് സംസാരിക്കേണ്ട"

ഇതും പറഞ്ഞ് തന്റെ കയ്യിലിരിക്കുന്ന കല്യാണക്കുറി ശരണ്യക്ക് നേരെ നീട്ടി

"അടുത്ത ഞാറാഴ്ച്ച ഞങ്ങളുടെ വിവാഹമാണ്"

കല്യാണക്കുറിയും കയ്യിൽ കൊടുത്ത് മായ തന്റെ മുന്നിലൂടെ നടന്ന് നീങ്ങുന്നത് ശരണ്യ നോക്കി നിന്നു.

ദിവസങ്ങൾക്ക് ശേഷം മായയുടേയും ഡോക്ടർ മഹേഷിന്റെയും വിവാഹം ആഘോഷമായി കഴിഞ്ഞു. മായയുടെ വീട്ടുകാർ ആദ്യം ഈ വിവാഹ ബന്ധത്തിന് എതിർപ്പ് പ്രകടിപ്പിച്ചെങ്കിലും അവളുടെ പിടിവാശിയിൽ അവർക്ക് തീരുമാനം മാറ്റേണ്ടി വന്നു.

ആദ്യരാത്രി കയ്യിൽ പാലുമായി വന്ന മായയെ കയ്യിൽ പിടിച്ച് തന്റെ അടുത്തിരുത്തി മഹേഷ്‌ അവളെ നോക്കി

"വീട്ടിലും നാട്ടിലും ഭാര്യയെ കൊന്നവൻ എന്ന് പേരുള്ള എന്നെ എന്തിനാ നീ വാശിപിടിച്ച് സ്വന്തമാക്കിയേ...?"

മായ മഹേഷിനെ നോക്കി പുഞ്ചിരിച്ചു

"ഈ പാവത്തിന്റെ മനസ്സ് അറിയാൻ കഴിഞ്ഞോണ്ട്. സമൂഹം ക്രൂരനായും ഭാര്യയെ കൊന്നവനായും കണ്ട് നിങ്ങളെ മാറ്റി നിർത്തുമ്പോൾ അതല്ല ശരി എന്ന് വിളിച്ച് പറയാൻ ഈ ഡോക്ടറുടെ ജീവിതത്തിൽ ഒരു പെണ്ണ് വേണം"

ഒന്ന് നിറുത്തിയിട്ട് അവൾ മഹേഷിന്റെ കണ്ണിലേക്ക് നോക്കി

"ഈ ഡോക്ടർ സമൂഹം കരുതുന്നത് പോലെ ഒരു ക്രൂരനല്ല നല്ലൊരു മനസ്സിന് ഉടമയാണ് എന്ന് തിരിച്ചറിഞ്ഞ നിമിഷം ഞാൻ ഉറപ്പിച്ചു... ഡോക്ടറുടെ ജീവിതത്തിലെ ആ പെണ്ണ് ഞാനായിരിക്കണം എന്ന്"

ഡോക്ടർ മായയെ നോക്കി

"എന്നെ വീണ്ടും സ്വപ്‌നങ്ങൾ കാണാൻ പഠിപ്പിച്ചത് നീയാ"

മഹേഷ്‌ മായയെ തന്നിലേക്കടുപ്പിച്ചു. അവളുടെ ചെവിയിൽ മെല്ലെ ചുംബിച്ച് പിൻകഴുത്തിലൂടെ തന്റെ ചുണ്ടുകൾ കൊണ്ട് അവൻ കവിത രചിച്ചു.

കല്യാണം കഴിഞ്ഞ പിറ്റേദിവസം മുതൽ നാട്ടുകാർ അടക്കം പറയാൻ തുടങ്ങി

"ആ മഹേഷിന്റെ കൂടെയൊന്നും ഒരു പെണ്ണും ജീവിക്കൂലാന്നേ... ആദ്യത്തെ പെണ്ണ് എന്തൊരു നല്ലൊരു കുട്ടി ആയിരുന്നു. അതിനെ മാനസികമായി പീഡിപ്പിച്ച് കൊന്നില്ലേ അവൻ. ഈ പെണ്ണിനും അതുതന്നെയാകും വിധി... നോക്കിക്കോ"

ദിവസങ്ങളും ആഴ്ച്ചകളും കടന്നുപോയി. മായയുടേയും മഹേഷിന്റേയും സ്നേഹം കണ്ട് നാട്ടുകാരും കുടുംബക്കാരും മൂക്കത്ത് വിരൽ വെച്ചുപോയി. മഹേഷിനെ കുറിച്ചുള്ള ധാരണ ആളുകൾ തിരുത്താൻ തുടങ്ങി

"ഹേയ്, മ്മളെ മഹേഷ്‌ ഡോക്ടർ അത്ര കുഴപ്പക്കാരൻ ഒന്നുമല്ല ട്ടോ. ആണേൽ ഇപ്പൊ കല്യാണം കഴിച്ച പെണ്ണിനെ ഇങ്ങനെ പൊന്നുപോലെ കൊണ്ട് നടക്കോ. എന്തൊരു സ്നേഹാ അവർ തമ്മിൽ. ആദ്യത്തെ പെണ്ണിന് എന്തോ കുഴപ്പം ഉള്ളോണ്ട് തന്നെയാ അങ്ങനെയൊക്കെ സംഭവിച്ചിട്ടുണ്ടാവുക"

ആളുകളുടെ മനോഭാവം ഈ രീതിയിലേക്ക് മാറാൻ തുടങ്ങി. അതുവരെ നാലാള് കൂടുന്നിടത് തല ഉയർത്തി പിടിച്ച് നടക്കാൻ മടിയായിരുന്ന ഡോക്ടർ മെല്ലെമെല്ലെ തല ഉയർത്തി നടക്കാൻ ആരംഭിച്ചു. തന്റെ ജീവിതം മാറ്റിമറിച്ച മായയെ അയാൾ ജീവനുതുല്യം സ്നേഹിച്ചു.

"മായേ, നീയെന്റെ ജീവിതത്തിലേക്ക് വന്നില്ലായിരുന്നു എങ്കിൽ ഞനൊരു ഭ്രാന്തനായി മാറിയേനെ. നിന്നോടുള്ള എന്റെ കടപ്പാട് ഈ ജീവിതകാലം മുഴുവൻ ഉണ്ടായിരിക്കും"

"കടപ്പാടിന് വേണ്ടിയല്ല എന്റെ ഡോക്ടറെ ഞാൻ സ്നേഹിച്ചതും സ്വന്തമാക്കിയതും. അത്രക്ക് ഇഷ്ടാണ് എനിക്ക് നിങ്ങളെ"

മറ്റുള്ളവർക്ക് അസൂയ ഉണ്ടാക്കും വിധം അവർ പ്രണയിച്ചുകൊണ്ടിരുന്നു. ഒരുദിവസം ശരണ്യയെ ഒരു റെസ്റ്റോറന്റിൽ വെച്ച് മായയും മഹേഷും കണ്ടു. ശരണ്യ മായയെ സന്തോഷത്തോടെ നോക്കി

"എടീ, ഞാൻ കാര്യങ്ങൾ ഒക്കെ അറിയുന്നുണ്ട്. ഞാൻ നിന്റെ അമ്മയെ കണ്ടിരുന്നു. നിന്റെ തീരുമാനമാണ് ശരിയെന്ന് നീ പ്രൂവ് ചെയ്തു"

ഒന്ന് നിറുത്തിയിട്ട് അവൾ മായയുടെ കയ്യിൽ പിടിച്ചു

"അന്ന് ഞാൻ അങ്ങനൊക്കെ പറഞ്ഞത് നീ മനസ്സിൽ വെക്കരുത്. നിന്നോടുള്ള ഇഷ്ടം കൊണ്ടാ അങ്ങനൊക്കെ... എന്തായാലും നീ ഹാപ്പി ആണല്ലോ അതുമതി എനിക്ക്"

ഒന്നിച്ച് ഭക്ഷണം കഴിച്ച് അവർ സന്തോഷത്തോടെ പിരിഞ്ഞു. അന്ന് രാത്രി ശരണ്യ ഫേസ്ബുക്കിൽ വെറുതേ സമയം ചിലവഴിക്കുമ്പോഴാണ് മായയുടെ എഫ്ബി ലൈവ് കാണുന്നത്. കലങ്ങിയ കണ്ണോടെ മായ ക്യാമറയെ നോക്കി

"എനിക്ക് തെറ്റുപറ്റി, ഈ ജീവിതം ഞാൻ അവസാനിപ്പിക്കാൻ പോവാണ്. എന്റെ ഭർത്താവ് ഒരു മൃഗമാണ്. ഞാൻ ഇപ്പോൾ ആത്മഹത്യ ചെയ്തില്ലേൽ അയാളെന്നെ ഇഞ്ചിഞ്ചായി കൊല്ലും. അയാളെ വെറുതേ വിടരുത്. അയാളുടെ ആദ്യത്തെ ഭാര്യയും എന്നെപ്പോലെ നിസ്സഹായയായി ആത്മഹത്യ ചെയ്തതായിരിക്കാം. അല്ലേൽ അയാൾ പെട്രോളോഴിച്ച് കത്തിച്ചതായിരിക്കാം"

ഇതും പറഞ്ഞ് മായ തന്റെ അടുത്തിരിക്കുന്ന പെട്രോൾ കാൻ എടുത്ത് പെട്രോൾ തന്റെ ശരീരത്തിലൂടെ ഒഴിച്ചു. എന്നിട്ട് ലൈറ്റർ കത്തിച്ചു... ഭൂo!!!!!

ശരണ്യ ഫോണെടുത്ത് മായയെ വിളിച്ചു. കത്തിക്കരിഞ്ഞ ഫോണിലേക്ക് വിളിച്ചിട്ട് എന്ത് കാര്യം...

"ഇന്ന് രാവിലെ റെസ്റ്റോറന്റിൽ വെച്ച് കണ്ടപ്പോൾ മായ ഭയങ്കര ഹാപ്പി ആയിരുന്നു. പക്ഷേ പിന്നീട് ഈ ചെറിയ സമയത്തിനുള്ളിൽ അവളുടെ ജീവിതത്തിൽ എന്ത്‌ സംഭവിച്ചു...? ഈ പകലിനും രാത്രിക്കും ഇടയിൽ അവൾക്ക് എന്താണ് സംഭവിച്ചത്...?"

ഇങ്ങനെ ഒരുപാട് ചോദ്യങ്ങൾ ശരണ്യയുടെ മനസിലൂടെ മിന്നിമറഞ്ഞു...

ഇതേ സമയം മറ്റൊരിടത്ത്

"ടാ ഉണ്ണീ, നീ എപ്പോഴാ പോണേ...? നാളെയല്ലേ നീ പുതിയ സ്റ്റേഷനിൽ ജോയിൻ ചെയ്യുന്നേ...?"

ഒരുകുടം കള്ള് ഒറ്റവലിക്ക് കുടിച്ച് ഉണ്ണി തന്റെ കൂട്ടുകാരെ നോക്കി

"നിക്കടാ പുല്ലന്മാരേ, ഞാനെന്റെ നാട് ഇന്നുകൂടെ ഒന്ന് അസ്വദിച്ചോട്ടെ. നിനക്കൊക്കെ എന്താടാ ഇത്ര ധൃതി എന്നെ ഇവിടുന്ന് പറഞ്ഞയക്കാൻ"

ഉണ്ണി തന്റെ മുണ്ട് മടക്കിക്കുത്തി കള്ളിന്റെ ലഹരിയിൽ ഉറക്കെ പാടി

"കാറ്റു പറഞ്ഞതും കടലു പറഞ്ഞതും

കാലം പറഞ്ഞതും പൊള്ളാണേ

കാലം പറഞ്ഞതും പൊള്ളാണേ

പൊള്ളല്ല പൊന്നേ ഉള്ളകമാകെ

പൊള്ളുന്ന നോവാണേ

വിഴികളിയിരുന്തും കുരുടാണേ ഞാൻ

സരികളിരിത്തും സെവിടാണേ

എൻ ഉരുവൻ മുഴുമ്പും  പൊയ്യാണതേ

ഹാ കാണുവാനൊത്തിരി മോഹമുണ്ടെങ്കിലും

കാണില്ല കണ്ണേ കണ്ണാലെ 

ഓമലേ നിൻ മുഖം മായില്ല മനമിതിൽ 

വിഴികൾ ഇരുന്തും കുരുടാനേ നാൻ

സരികളിരിന്തും സെവിടാണേ

എൻ ഉരുവൻ മുഴുമ്പും  പൊയ്യാണതേ"

ഇനി ഉണ്ണിയുടെ വരവ്...

                                                   

ഭാഗം 2👇👇👇

"നിക്കടാ പുല്ലന്മാരേ, ഞാനെന്റെ നാട് ഇന്നുകൂടെ ഒന്ന് അസ്വദിച്ചോട്ടെ. നിനക്കൊക്കെ എന്താടാ ഇത്ര ധൃതി എന്നെ ഇവിടുന്ന് പറഞ്ഞയക്കാൻ"

ഉണ്ണി തന്റെ മുണ്ട് മടക്കിക്കുത്തി കള്ളിന്റെ ലഹരിയിൽ ഉറക്കെ പാടി

"കാറ്റു പറഞ്ഞതും കടലു പറഞ്ഞതും

കാലം പറഞ്ഞതും പൊള്ളാണേ

കാലം പറഞ്ഞതും പൊള്ളാണേ

പൊള്ളല്ല പൊന്നേ ഉള്ളകമാകെ

പൊള്ളുന്ന നോവാണേ"

പിറ്റേദിവസം..

ഉണ്ണി സിഐ ആയി ജോയിൻ ചെയ്തത് ഡോക്ടർ മഹേഷിന്റെ നാട്ടിലാണ്. അതുകൊണ്ട് തന്നെ മായ ആത്മഹത്യ ചെയ്ത വീട് സന്ദർശിച്ചായിരുന്നു ഉണ്ണി ജോലി ആരംഭിച്ചത്. കത്തിക്കരിഞ്ഞ നിലയിലായിരുന്നു മായയുടെ മൃതദേഹം. കുറച്ച് ചാരം മാത്രം...

മഹേഷിനെ കസ്റ്റഡിയിൽ എടുത്ത് കേസിനെ കുറിച്ച് വിശദമായി പഠിച്ച് ഉണ്ണി ചോദ്യം ചെയ്യൽ ആരംഭിച്ചു

"താൻ ഒരു സൈക്കോ ആണോ ഡോക്ടറേ...?"

ഉണ്ണിയുടെ ചോദ്യത്തിന് മൗനമായിരുന്നു ഡോക്ടറുടെ ഉത്തരം.

"ഇങ്ങനെ മിണ്ടാതിരുന്നാൽ താൻ കൂടുതൽ കുഴപ്പത്തിൽ ചാടുകയേ ഒള്ളൂ... അതോണ്ട് നല്ല കുട്ടിയായി അന്ന് വീട്ടിൽ നടന്നതൊക്കെ മണിമണിയായി പറ"

ഒന്ന് നിറുത്തിയിട്ട് ഉണ്ണി ഡോക്ടറെ നോക്കി

"വെറുതേ എന്റെ കൈക്ക് പണി ഉണ്ടാക്കരുത്"

ഡോക്ടർ മെല്ലെ കണ്ണ് തുറന്ന് ഉണ്ണിയെ നോക്കി

"എനിക്ക് ജീവനായിരുന്നു അവളെ... ഞാൻ ഒന്ന് നുള്ളിപോലും നോവിച്ചിട്ടില്ല എന്റെ മായയെ"

ഉണ്ണി ചാടി എഴുന്നേറ്റ് തന്റെ മുന്നിലുള്ള കസേര ചവിട്ടി മാറ്റി അലറി

"പിന്നെ നിന്റെ സ്നേഹം കൂടിയത് കൊണ്ടാണെടാ പന്ന പുലയനാർ മണിയാ അവൾ ഫേസ്ബുക്കിൽ ലൈവിട്ട് ഒരുപിടി ചാരമായി മാറിയത്"

ഉണ്ണി മഹേഷിന്റെ കോളറിൽ പിടിച്ച് അവന്റെ കണ്ണിലേക്ക് നോക്കി

"നിന്റെ അഭിനയമൊക്കെ കെട്ടികൊണ്ട് വന്ന് ചതിച്ച പാവം പെണ്ണുങ്ങളോട് മതി. മര്യാദക്ക് സത്യം പറഞ്ഞില്ലേൽ നിന്റെ കിടുക്കാമണി ഞാൻ പൊട്ടിക്കും... പറയടാ"

ഒരു കുട്ടിയെപ്പോലെ മഹേഷ്‌ പൊട്ടിക്കരഞ്ഞു

"എനിക്കറിയില്ല സാർ അവളെന്തിനാ ആത്മഹത്യ ചെയ്തതെന്ന്. എനിക്ക് ജീവനായിരുന്നു സാറേ എന്റെ മായയെ"

ഒന്ന് നിറുത്തിയിട്ട് തന്റെ കണ്ണിൽ നിന്നും ഒലിച്ചിറങ്ങുന്ന കണ്ണുനീർ തുടച്ചുമാറ്റി മഹേഷ്‌ ഉണ്ണിയെ നോക്കി

"ഫേസ്ബുക്കിൽ ലൈവ് ഇടുന്നതിന്റെ അഞ്ച് മിനിറ്റ് മുന്നേവരെ ഞങ്ങൾ ഫോണിൽ സംസാരിച്ചിരുന്നു. വളരേ സന്തോഷത്തോടെയാണ് അവൾ എന്നോട് സംസാരിച്ചത്. ആ അഞ്ച് മിനിറ്റിനുള്ളിൽ എന്താണ് സംഭവിച്ചതെന്ന് സത്യായിട്ടും എനിക്കറിയില്ല സാറേ"

ഉണ്ണി പോക്കറ്റിൽ നിന്നും ഒരു സിഗരറ്റ് എടുത്ത് കത്തിച്ച് എസ്ഐ സുബൈറിനെ നോക്കി

"മര്യാദക്ക് ചോദിച്ചാൽ ഇവൻ പറയില്ല. സുബൈറേ ഇനി നീ നോക്കിക്കോ"

സുബൈർ തന്റെ തൊപ്പി അഴിച്ചുവെച്ച് തന്റെ കൈകൾ കൂട്ടിയിടിച്ച് മഹേഷിന്റെ അടുത്തേക്ക് നടന്നു. കസേരയിൽ ഇരിക്കുന്ന മഹേഷിന്റെ നെഞ്ചത്ത് ആഞ്ഞു ചവിട്ടി സുബൈർ അലറി

"നീ കാരണം ഒന്നല്ല രണ്ട് പാവം സ്ത്രീകളാ ആത്മഹത്യ ചെയ്തത്. എന്നിട്ടും ഒന്നും അറിയില്ല എന്ന് പറഞ്ഞ് നിന്റെയീ കണ്ണീർ പൊഴിക്കൽ... പന്ന #@₹%%"

പിന്നെ അവിടെ നടന്നത് നല്ല ഉഗ്രൻ ലോക്കപ്പ് മർദ്ദനം ആയിരുന്നു. പക്ഷേ എത്ര മർദ്ദനമേറ്റിട്ടും മഹേഷിന് ഒന്നേ പറയാനുണ്ടായിരുന്നൊള്ളൂ

"ഞാൻ കാരണല്ല സാറേ എന്റെ മായ ആത്മഹത്യ ചെയ്തത്. എനിക്കവളെ ജീവനായിരുന്നു... അവൾക്ക് എന്നേയും. എന്നെ ഇവിടിട്ട് തല്ലി കൊന്നാലും എനിക്കിതേ പറയാനൊള്ളൂ സാറേ"

ഉണ്ണി സുബൈറിനെ നോക്കി

"ഇനിയും തല്ലിയാൽ അവൻ ചത്ത് പോകും. ഇവനൊക്കെ ലോക്കപ്പിൽ കിടന്ന് തീർന്നാൽ പിന്നെ അതുമതി മാധ്യമ മലരുകൾക്ക്. രണ്ട് പാവം സ്ത്രീകളുടെ മരണത്തിന് കാരണക്കാരനായ ഇവനെ പിന്നീട് മാധ്യമങ്ങൾ വാഴ്ത്തപ്പെട്ടവനാക്കി അന്തി ചർച്ച നടത്തും"

രണ്ട് ദിവസം മഹേഷിനെ തിരിച്ചും മറിച്ചും തല്ലിയിട്ടും അവന് മറിച്ചൊന്നും പറയാനില്ലായിരുന്നു. കോടതിയിൽ ഹാജരാക്കിയപ്പോഴും തനിക്ക് ഭാര്യയോടുള്ള സ്നേഹത്തെക്കുറിച്ച് മാത്രമാണ് അവൻ പറഞ്ഞത്. മഹേഷ്‌ ജാമ്യത്തിന് വേണ്ടി അപേക്ഷിച്ചില്ല. കോടതി അവനെ പതിനാല് ദിവസത്തേക്ക് റിമാൻഡ് ചെയ്തു.

പുതിയ സ്റ്റേഷനിലേക്ക് കാലെടുത്ത് വെച്ചപ്പോൾ തന്നെ വല്ലാത്തൊരു കേസിന്റെ പിറകേ ആയിപ്പോയല്ലോ ദൈവമേ എന്നോർത്ത് ഉണ്ണി നെടുവീർപ്പിട്ടു. ഉണ്ണി സുബൈറിനെ വിളിച്ചു

"എടോ ആത്മഹത്യ ചെയ്ത പെണ്ണിന്റെ പോസ്റ്റ്മോർട്ടം റിപ്പോർട്ട്‌ കിട്ടിയോ...?"

"എന്റെ പൊന്നുസാറേ എന്തെടുത്ത് പോസ്റ്റ്മോർട്ടം ചെയ്യാനാ...? ആകെ കിട്ടിയത് ഒരുപിടി ചാരമാണ്. അതുവെച്ച് ഓട്ടോസ്പി ചെയ്തിട്ടും വല്യ കാര്യമില്ല"

ഒന്ന് നിറുത്തിയിട്ട് സുബൈർ ഉണ്ണിയെ നോക്കി

"പെട്രോൾ ഒഴിച്ചല്ലേ കത്തിച്ചത്... ചാരം കിട്ടിയത് തന്നെ ഭാഗ്യം. ഡോക്ടറുടെ ആദ്യത്തെ ഭാര്യയും ഇതേപോലെയാ മരിച്ചേ"

ഉണ്ണി സുബൈറിനെ നോക്കി

"അല്ല സുബൈറേ എനിക്ക് ചെറിയൊരു സംശയം"

സുബൈർ ഉണ്ണിയെ നോക്കി

"എന്താണ് സാർ...?"

"അല്ല, സമാനമായ രീതിയിലുള്ള രണ്ട് ആത്മഹത്യകൾ. അതിൽ ഒരു ഇതില്ലേ...?"

"ഏത്"

"ആ അതന്നെടോ... നമ്മൾ വെറുതേ ആത്മഹത്യ എന്ന് ഉറപ്പിച്ച് ഇതിന്റെ പിറകിൽ പോയാൽ ഈ കേസ് എങ്ങും എത്തില്ല... എനിക്ക് ഉറപ്പാണ്"

സുബൈർ ഉണ്ണിയെ അത്ഭുതത്തോടെ നോക്കി

"സാർ എന്തൊക്കെയാണ് ഈ പറയുന്നത്....? ആദ്യത്തെ പെണ്ണ് ആത്മഹത്യാ കുറിപ്പ് സ്വന്തം കയ്യക്ഷരത്തിൽ എഴുതിവെച്ചാ മരിക്കുന്നത്. ഇപ്പോഴത്തേത് ഫേസ്ബുക്കിൽ ലൈവ് വന്നിട്ടും. പിന്നെങ്ങനെ സാർ ഇത് ആത്മഹത്യ അല്ലാതാകും...?"

ഉണ്ണി സുബൈറിന്റെ കണ്ണിലേക്ക് നോക്കി

"ന്റെ സുബൈറേ നീയൊന്ന് ചിന്തിച്ച് നോക്കിയേ... ആ ഡോക്ടർ ആളൊരു ക്രൂരനും മനുഷ്യത്വം ഇല്ലാത്തവനും ആണെന്ന് വെക്കുക. ആയാളുടെ പീഡനം സഹിക്ക വയ്യാതെയാണ് രണ്ടുപേരും ആത്മഹത്യ ചെയ്തതെന്നും വെക്കുക. പക്ഷേ...?"

സുബൈർ ഉണ്ണിയെ നോക്കി

"പക്ഷേ...?"

ഉണ്ണി സുബൈറിനെ നോക്കി തന്റെ മേശപ്പുറത്തിരിക്കുന്ന കേസ് ഡയറി എടുത്തു

"ഈ പക്ഷെയാണ് സുബൈറേ എന്നേയും മാറി ചിന്തിക്കാൻ പ്രേരിപ്പിക്കുന്നത്. ഈ കേസ് ഡയറി വിശദമായി പഠിച്ചപ്പോൾ തന്നെ എനിക്ക് ഈ സംശയം വന്നിരുന്നു. ആരെങ്കിലും ഒരേപോലെ ആത്മഹത്യ ചെയ്യോ...? ആദ്യത്തെ ഭാര്യ ആത്മഹത്യ ചെയ്ത അതേ രീതിയിലാണ് രണ്ടാമത്തെ ഭാര്യയും ആത്മഹത്യ ചെയ്തിട്ടുള്ളത്... ദാറ്റ്‌സ് ഇമ്പോസ്സിബിൾ"

ഒന്ന് നിറുത്തിയിട്ട് ഉണ്ണി തുടർന്നു

"ഞാൻ ആത്മഹത്യ ചെയ്ത മായയുടെ കൂട്ടുകാരി ശരണ്യയെ കണ്ടിരുന്നു. ആത്മഹത്യ ചെയ്യുന്നതിന്റെ അതേദിവസം രാവിലെ അവർ തമ്മിൽ കണ്ടിരുന്നു. മായ വളരേ സന്തോഷത്തോടെയാണ് അന്ന് അവിടെവെച്ച് പെരുമാറിയത് എന്നാണ് ശരണ്യ പറഞ്ഞത്. തന്റെ വീട്ടിലും ഇതുവരെ മായ ഡോക്ടറെ കുറിച്ച് മോശമായി ഒന്നും പറഞ്ഞിട്ടില്ല. അങ്ങനെയെങ്കിൽ എന്തായിരിക്കും മായക്ക് സംഭവിച്ചത്...?"

സുബൈർ ഉണ്ണിയെ നോക്കി

"സാർ ആകെമൊത്തം കൺഫ്യൂഷൻ ആക്കിയല്ലോ"

ഉണ്ണിയൊന്ന് പുഞ്ചിരിച്ചു

"സുബൈറേ ഒന്നെങ്കിൽ രണ്ടുപേരേയും കൊന്നത് ഡോക്ടറാണ്. ഡോക്ടറാണ് പ്രതി എങ്കിൽ നമുക്ക് ഈ കേസ് വേഗം ക്ലോസ് ചെയ്യാം. അല്ലെങ്കിൽ..."

"അല്ലെങ്കിൽ...?"

ഉണ്ണി സുബൈറിന്റെ കണ്ണിലേക്ക് നോക്കി

"അല്ലെങ്കിൽ, ഡോക്ടറെ മറയാക്കി ആരോ ഒരാൾ ഈ കൊലകൾക്ക് പിറകിൽ ഉണ്ട്... ആദ്യ ഭാര്യയെ പെട്രോൾ ഒഴിച്ച് കൊല്ലുന്നതിന് മുന്നേ സ്വന്തം കയ്യക്ഷരത്തിൽ ഡോക്ടർക്ക് എതിരേ ആത്മഹത്യാ കുറിപ്പ് എഴുതിച്ച... മായയെ കൊല്ലുന്നതിന് മുന്നേ ഫേസ്ബുക്കിൽ ലൈവ് ചെയ്യിപ്പിച്ച ഒരു മാസ്റ്റർ ബ്രെയിൻ ഈ കൊലകൾക്ക് പിറകിൽ ഉണ്ട്..."

ഒന്ന് നിറുത്തിയിട്ട് ഉണ്ണി തന്റെ പോക്കറ്റിൽ നിന്നും ഒരു സിഗരറ്റ് എടുത്ത് ചുണ്ടിൽ വെച്ച് കത്തിച്ച് സുബൈറിനെ നോക്കി

"അങ്ങനെ ഒരു കില്ലർ ഉണ്ടെങ്കിൽ... ഇനി നമ്മൾ പോവേണ്ടത് അവനെ തേടിയാണ്. അവന് എന്തോ പറയാനുണ്ട് ഈ സമൂഹത്തോട്"

ആരാണ്...? എന്തിന് വേണ്ടി...? ഇനിയെന്ത്...?

                                                     

ഭാഗം 3👇👇👇

"അല്ലെങ്കിൽ, ഡോക്ടറെ മറയാക്കി ആരോ ഒരാൾ ഈ കൊലകൾക്ക് പിറകിൽ ഉണ്ട്... ആദ്യ ഭാര്യയെ പെട്രോൾ ഒഴിച്ച് കൊല്ലുന്നതിന് മുന്നേ സ്വന്തം കയ്യക്ഷരത്തിൽ ഡോക്ടർക്ക് എതിരേ ആത്മഹത്യാ കുറിപ്പ് എഴുതിച്ച... മായയെ കൊല്ലുന്നതിന് മുന്നേ ഫേസ്ബുക്കിൽ ലൈവ് ചെയ്യിപ്പിച്ച ഒരു മാസ്റ്റർ ബ്രെയിൻ ഈ കൊലകൾക്ക് പിറകിൽ ഉണ്ട്..."

ഒന്ന് നിറുത്തിയിട്ട് ഉണ്ണി തന്റെ പോക്കറ്റിൽ നിന്നും ഒരു സിഗരറ്റ് എടുത്ത് ചുണ്ടിൽ വെച്ച് കത്തിച്ച് സുബൈറിനെ നോക്കി

"അങ്ങനെ ഒരു കില്ലർ ഉണ്ടെങ്കിൽ... ഇനി നമ്മൾ പോവേണ്ടത് അവനെ തേടിയാണ്. അവന് എന്തോ പറയാനുണ്ട് ഈ സമൂഹത്തോട്"

സുബൈർ ഉണ്ണിയെ നോക്കി

"അങ്ങനെ ഒരു കില്ലർ ഉണ്ടെങ്കിൽ നമ്മൾ എങ്ങനെ അവനിലേക്ക് എത്തും സാർ...? വെറുതേ ഒരു ഊഹം മാത്രം വെച്ച് ഈ കേസുമായി മുന്നോട്ട് പോവാൻ നമുക്ക് പരിമിതികൾ ഇല്ലേ സാർ"

ഉണ്ണി കുറച്ച് സമയം ആലോചിച്ച് സുബൈറിനെ നോക്കി

"അങ്ങനെ ഒരു കില്ലർ ഈ കൊലക്ക് പിറകിൽ ഉണ്ടെങ്കിൽ അവൻ എത്ര ബുദ്ധിമാനായാലും തീർച്ചയായും അവനിലേക്ക് എത്താനുള്ള ഒരു കച്ചിത്തുരുമ്പ് നമുക്ക് മുന്നിൽ അവശേഷിപ്പിച്ചായിരിക്കും പോയിട്ടുണ്ടാവുക"

ഒന്ന് നിറുത്തിയിട്ട് ഉണ്ണി സുബൈറിന്റെ കണ്ണിലേക്ക് നോക്കി

"ആ കച്ചിത്തുരുമ്പിൽ പിടിച്ച് കയറി നമ്മൾ കില്ലറുടെ മുന്നിലെത്തും"

പിറ്റേദിവസം തന്നെ ഉണ്ണി ഫോറൻസിക് വഴി മായ ആത്മഹത്യ ചെയ്ത വീട്ടിൽ പോയി തെളിവെടുപ്പ് ആരംഭിച്ചു. അവൾ ആത്മഹത്യ ചെയ്ത മുറിയും വീടും വിശദമായി പരിശോധിച്ചു. ഫോറൻസിക്കിന്റെ റിപ്പോർട്ട്‌ വന്നിട്ട് കേസന്വേഷണത്തിന്റെ ഗതി മറ്റാൻ ഉണ്ണി മനസ്സിലുറപ്പിച്ചു.

പക്ഷേ ഉണ്ണിയുടെ ധാരണകൾ എല്ലാം തെറ്റിക്കുന്നതായിരുന്നു ഫോറൻസിക് റിപ്പോർട്ട്‌. മായ ആത്മഹത്യ ചെയ്ത അന്ന് ആ വീട്ടിൽ വേറെ ആരും വന്നിട്ടില്ല എന്ന് റിപ്പോർട്ട്‌ വന്നപ്പോൾ ഉണ്ണി ശരിക്കും ഞെട്ടി. റിപ്പോർട്ട്‌ കയ്യിൽ പിടിച്ച് സുബൈർ ഉണ്ണിയെ നോക്കി

"എന്റെ സാറേ ഇത് കൊലപാതകം ഒന്നുമല്ല.  സാറ് ഓരോന്ന് ചിന്തിച്ച് വെറുതേ..."

ഉണ്ണി ഒന്നും മിണ്ടിയില്ല. സുബൈർ ഉണ്ണിയെ നോക്കി

"ഇത് ആത്മഹത്യ തന്നെയാണ് സാറേ. ആ ഡോക്ടർ ഒരു സൈക്കോ ആണെന്നാ തോന്നുന്നേ. അയാളെ തല്ലിയാലൊന്നും സത്യം പറയാൻ പോണില്ല. പിന്നെ കൊല്ലണം, അതാണേൽ പിന്നെ നമ്മുടെ കാര്യത്തിൽ ഒരു തീരുമാനം ആവും. സാറ് വെറുതേ ഇതിന്റെ പിറകേ പോയി സമയം കളയേണ്ട"

ഉണ്ണി സുബൈറിനെ നോക്കി

"കൊലപാതകം ആണെന്ന് തെളിയിക്കാൻ തെളിവ് ഒന്നും കിട്ടാത്തോണ്ട് കുറച്ച് കാലം ഉള്ളിൽ കിടന്ന് ഡോക്ടർ പുല്ലുപോലെ പുറത്തിറങ്ങും. നീ പറഞ്ഞപോലെ ഇതിന്റെ പിറകേ പോയിട്ട് കാര്യമില്ല"

ഉണ്ണി ആ കേസ് ഫയൽ മടക്കിവെച്ച് സുബൈറിനെ നോക്കി

"ടോ നമുക്ക് കുറച്ച് സമയം എവിടേലും പോയിരുന്നാലോ...? മൈൻഡ് ഒന്ന് റിഫ്രഷ് ചെയ്യണം"

സുബൈർ ഉണ്ണിയെ നോക്കി പുഞ്ചിരിച്ചു

"കോട്ടക്കുന്ന് മലയുടെ മുകളിൽ പോയിരുന്ന് രണ്ടെണ്ണം അടിച്ചാ മൈൻഡല്ലാ എല്ലാം റിഫ്രഷ് ആവും... അങ്ങോട്ട് പോണോ സാറിന്"

ഉണ്ണിയുടെ മുഖത്ത് കള്ളച്ചിരി

"ഇങ്ങനെ പറഞ്ഞ് കൊതിപ്പിക്കാതെ സുബൈറേ വണ്ടിയെടുക്ക്"

ഉണ്ണിയും സുബൈറും ഇറങ്ങാൻ നേരമാണ് ഒരു പ്രതിയെ സ്റ്റേഷനിലേക്ക് കൊണ്ടുവരുന്നത് ശ്രദ്ധിച്ചത്. ഉണ്ണി കോൺസ്റ്റബിളിനെ നോക്കി

"എന്താടോ കേസ്...?"

കോൺസ്റ്റബിൾ ഉണ്ണിയെ നോക്കി

"ഫേസ്ബുക്കിൽ പെണ്ണുങ്ങൾക്ക് മെസ്സേജ് അയച്ചിട്ടാ സാറേ"

ഉണ്ണി പ്രതിയെ നോക്കി

"എന്താ നിന്റെ പേര്...?"

അയാൾ ഉണ്ണിയെ നോക്കി

"ഷാൻ... ഷാൻ കബീർ"

ഉണ്ണി ഷാനിനെ അടിമുടിയൊന്ന് നോക്കി

"എന്ത്‌ മെസ്സേജാടോ നീ സ്ത്രീകൾക്ക് അയച്ചേ...?"

ഷാൻ ദയനീയമായി ഉണ്ണിയെ നോക്കി

"ഞാൻ നല്ല മെസ്സേജാ സാറേ അയച്ചേ"

"എന്ത്‌ മെസ്സേജാ അയച്ചേ...?"

"രാത്രി പന്ത്രണ്ട് മണിക്ക് ശേഷം സ്ത്രീകളെ ഓൺലൈനിൽ കണ്ടാൽ ഞാൻ ഉപദേശിക്കും സാറേ... ഉപദേശം ഒരു ക്രിമിനൽ കുറ്റാണോ സാറേ"

ഷാൻ പറഞ്ഞ് തീർന്നതും കോൺസ്റ്റബിൾ അവന്റെ കരണം നോക്കി ഒരെണ്ണം കൊടുത്തതും ഒരുമിച്ചായിരുന്നു

"കള്ള കാട്ടുകോഴി, നട്ടപാതിരാക്ക് പെണ്ണുങ്ങളെ ഓൺലൈനിൽ കണ്ടാൽ പെങ്ങളേ അനക്ക് നന്നായിക്കൂടെ എന്ന് ചോദിച്ച് ചെന്ന് കഷ്ടകാലത്തിന് അവരെങ്ങാനും അതിന് മറുപടി തന്നാൽ പിന്നെ ആ പെൺകുട്ടിയുടെ അടിവസ്ത്രത്തിന്റെ കളറും സൈസും വരെ ചോദിച്ച് നന്മമരമായി നടക്കുന്ന നീയാണോടാ ഉപദേശിക്കുന്നേ"

അടി കിട്ടിയ കവിളിൽ കൈവെച്ച് ഷാൻ കബീർ പോലീസുകാരനെ തറപ്പിച്ച് നോക്കി

"ഫേസ്ബുക്കിലെ പ്രശസ്ത എഴുത്തുകാരനായ ഷാൻ കബീറിന്റെ മുഖത്താ സാറ് കൈ വെച്ചേ... ഇനി കണ്ടറിയണം സാറേ, സാറിനെന്താ സംഭവിക്കാൻ പോവുന്നതെന്ന്"

ഷാൻ പറഞ്ഞ് തീർന്നതും മറ്റേ കവിളിൽ ആഞ്ഞൊരു അടിയായിരുന്നു കോൺസ്റ്റബിൾ.

ദിവസങ്ങൾക്ക് ശേഷം...

ഡോക്ടർ മഹേഷ് ജാമ്യം കിട്ടി പുറത്തിറങ്ങി. മായ കാരണം തല ഉയർത്തി നടന്ന മഹേഷിന് വീണ്ടും തലതാഴ്ത്തേണ്ടി വന്നു. നാട്ടുകാർ മഹേഷിനെ വെറുപ്പോടെ നോക്കി

"മനസാക്ഷി തൊട്ട് തീണ്ടിയിട്ടില്ലാത്ത ക്രൂരൻ. രണ്ട് പെൺകുട്ടികളുടെ ജീവിതം ഇല്ലാണ്ടാക്കിയ മഹാപാപി"

"ഒരുത്തിയെ കൊന്നതറിഞ്ഞിട്ടും ഒരു ജീവിതം കൊടുക്കാൻ തയ്യാറായ പാവം പെണ്ണിനേയും ഈ ക്രൂരൻ കൊന്നു. പുഴുത്ത് ചാവും ഇവൻ"

"ഇവനെപ്പോലുള്ള നായകളെയൊക്കെ കല്ലെറിഞ്ഞ് കൊല്ലണം"

നാട്ടുകാരും കുടുംബക്കാരും മഹേഷിനെ ഒറ്റപ്പെടുത്തി. വീടിന്റെ പുറത്ത് പോലും ഇറങ്ങാൻ പറ്റാത്ത അവസ്ഥയായി അവന്. ചിലർ അവന്റെ മുഖത്ത് കാർക്കിച്ച് തുപ്പി.

ദിവസങ്ങളും മാസങ്ങളും കടന്നുപോയി...

ശരിക്കും ഒറ്റപ്പെട്ട മഹേഷ്‌ വിഷാദ രോഗത്തിലേക്ക് വഴുതിവീണു. ഒരുദിവസം ജീവിതം അവസാനിപ്പിക്കാനുള്ള തീരുമാനത്തിൽ മഹേഷ്‌ എത്തിച്ചേർന്നു. ഇനിയും ഇങ്ങനെ പരിഹാസ്യനായി ജീവിക്കാൻ അവന്റെ മനസ്സ് സമ്മതിച്ചില്ല. കയ്യിലെ ഞരമ്പ് മുറിച്ച് ആത്മഹത്യക്ക് ശ്രമിക്കാൻ നേരമാണ് തന്റെ മൊബൈൽ നിറുത്താതെ ശബ്‌ദിക്കുന്നത് മഹേഷ്‌ ശ്രദ്ധിച്ചത്. മൊബൈലിന്റെ റിങ് മഹേഷിന്റെ ശ്രദ്ധ തിരിച്ചു. ഫോണിലേക്ക് നോക്കിയപ്പോൾ സേവ് അല്ലാത്ത നമ്പറാണ്. അവൻ ഫോണെടുത്തു

"ആരാ...?"

ഫോണിന്റെ അങ്ങേ തലക്കൽ മനോഹരമായ ഒരു സ്ത്രീ ശബ്ദം

"ഇതെന്താ മാഷേ ഫോണെടുക്കാൻ ഇത്ര താമസം...? എത്ര നേരായി ഞാൻ വിളിക്കുന്നു. എവിടെ പോയി കിടക്കായിരുന്നു"

മഹേഷിന് ഒന്നും മനസിലായില്ല. അവൻ മൊബൈലിലെ നമ്പറിലേക്ക് വീണ്ടും നോക്കി

"ആരാ... എനി... എനിക്ക്... മനസിലായില്ല"

"ഞാൻ സിസ്റ്റർ ആനി ജോൺ"

"നിങ്ങക്ക് ന്റെ നമ്പർ... എവിടുന്ന് കിട്ടി...?"

ആനി പുഞ്ചിരിച്ചു

"ഇതെന്ത് ചോദ്യാ മാഷേ, ഇപ്പോൾ നിങ്ങൾ അനുഭവിച്ചുകൊണ്ടിരിക്കുന്ന പ്രശ്നങ്ങളൊക്കെ നിങ്ങളുടെ ഒരു അടുത്ത സുഹൃത്ത് പറഞ്ഞു. എന്റേൽ അത്യാവശ്യം മോട്ടിവേഷനും കൗൺസ്ലിങ്ങും ഒക്കെ ഉള്ളോണ്ട് ആവണം അദ്ദേഹം എന്നോട് നിങ്ങളെ കുറിച്ച് പറഞ്ഞത്"

"എനിക്ക് ആരോടും സംസാരിക്കാൻ താല്പര്യം ഇല്ല"

"ആഹാ, അതെന്താ സംസാരിച്ചാൽ...?"

"പ്ലീസ്... ഇനിയെന്നെ വിളിക്കരുത്"

"ഞാൻ ഇനീം വിളിക്കും... ഇങ്ങനെ സ്വയം ഇല്ലാതായിട്ട് എന്നാത്തിനാ... നിങ്ങളെ അടിക്കാൻ കയ്യൊങ്ങുന്നവരുടെ മുന്നിലൂടെ ജീവിച്ച് കാണിച്ച് കൊടുക്ക് മനുഷ്യാ..."

മഹേഷ്‌ ഒന്നും മിണ്ടിയില്ല

"ഇങ്ങനെ മിണ്ടാതെ ഇരിക്കല്ലേ... ഞാൻ ഇനീം വിളിക്കും... ആ പിന്നേ ഒരുകാര്യം... ഒരിക്കലും സ്വയം ഇല്ലാതാവാൻ ശ്രമിക്കരുത്. നിങ്ങളുടെ ദിവസം വരും... അന്ന് നിങ്ങൾ തല ഉയർത്തി നിൽക്കും... ഒന്നിൽ പിഴച്ചാൽ മൂന്ന് എന്നല്ലേ"

കയ്യിലെ ഞരമ്പ് മുറിക്കാനെടുത്ത ബ്ലൈഡ് മഹേഷിന്റെ കയ്യിൽ നിന്നും താഴെവീണു... മഹേഷും ആനിയും ഒരുപാട് നേരം സംസാരിച്ചു. അവളുടെ സംസാരം മഹേഷിന് വല്ലാത്തൊരു പോസറ്റീവ് മൈൻഡ് നൽകി... അന്നുരാത്രി മഹേഷ്‌ സുഖമായി കിടന്നുറങ്ങി. പക്ഷേ അന്നവൻ ഒരു സ്വപ്നം കണ്ടു. നേരം വെളുത്തപ്പോഴും ആ സ്വപ്നത്തിന്റെ വിഷൽസ് മഹേഷിന്റെ മനസ്സിൽ നിറഞ്ഞുനിന്നു...

ഇതായിരുന്നു മഹേഷ്‌ സ്വപനത്തിൽ കണ്ട വിഷൽസ്👇👇👇

പത്ത് വയസ്സിനോട് അടുത്ത് പ്രായമുള്ള ഒരു പെൺകുട്ടി നഗ്നയായി ഒരു ഹാളിലൂടെ ഓടുന്നു... അവളുടെ തലയിൽ എന്തോ ശക്തിയായി വന്ന് പതിക്കുന്നു. അവൾ തറയിലേക്ക് തെറിച്ച് വീഴുന്നു. ചോരയിൽ കിടന്ന് പിടയുന്ന ആ പിഞ്ചു പൈതലിനെ ഒരാൾ കാലിൽ പിടിച്ച് വലിച്ചിഴച്ച് മൂളിപ്പാട്ടും പാടി കൊണ്ടുപോകുന്നു... കുറച്ച് സമയത്തിന് ശേഷം ആ ബിൽഡിംഗിൽ നിന്നും പുറത്തിറങ്ങിയ അയാൾക്ക് ചുറ്റും മൂന്ന് മാടപ്രാവുകൾ വട്ടമിട്ട് പറക്കുന്നു...

ചില കഥകൾ മറക്കാതിരിക്കാൻ നെഞ്ചത്ത് പച്ച കുത്താറുണ്ട് ചിലർ... കഥയല്ല... അടങ്ങാത്ത പകയാണ്...

ഭാഗം 4👇👇👇

പത്ത് വയസ്സിനോട് അടുത്ത് പ്രായമുള്ള ഒരു പെൺകുട്ടി നഗ്നയായി ഒരു ഹാളിലൂടെ ഓടുന്നു... അവളുടെ തലയിൽ എന്തോ ശക്തിയായി വന്ന് പതിക്കുന്നു. അവൾ തറയിലേക്ക് തെറിച്ച് വീഴുന്നു. ചോരയിൽ കിടന്ന് പിടയുന്ന ആ പിഞ്ചു പൈതലിനെ ഒരാൾ കാലിൽ പിടിച്ച് വലിച്ചിഴച്ച് മൂളിപ്പാട്ടും പാടി കൊണ്ടുപോകുന്നു... കുറച്ച് സമയത്തിന് ശേഷം ആ ബിൽഡിംഗിൽ നിന്നും പുറത്തിറങ്ങിയ അയാൾക്ക് ചുറ്റും മൂന്ന് മാടപ്രാവുകൾ വട്ടമിട്ട് പറക്കുന്നു...

ആ സ്വപ്നം മഹേഷിനെ വല്ലാതെ അസ്വസ്ഥനാക്കി. നടക്കുമ്പോഴും ഇരിക്കുമ്പോഴും കിടക്കുമ്പോഴുമെല്ലാം ആ മാടപ്രാവുകൾ കണ്ണിന്റെ മുന്നിൽ നിൽക്കുന്നത് പോലെ തോന്നി അവന്. പക്ഷേ, ഈ അവസ്ഥയിൽ നിന്നും മഹേഷിന് മോചനം കിട്ടിയത് സിസ്റ്റർ ആനിയുടെ കോളിലൂടെ ആയിരുന്നു.

ആനിയുടെ പോസിറ്റീവ് ആയുള്ള സംസാരത്തിലൂടെ മഹേഷ്‌ തന്റെ ഒറ്റപ്പെടൽ മറക്കാൻ തുടങ്ങി. അവളുടെ ഓരോ വാക്കുകളും മഹേഷിനെ ജീവിക്കാൻ പ്രേരിപ്പിച്ചു. അവൻ പതിയെ പതിയെ ജീവിതത്തിലേക്ക് തിരിച്ച് വരാൻ തുടങ്ങി.

ദിവസങ്ങൾ കടന്നുപോയി...

പരസ്പരം കാണാതെ അവർ ഫോണിലൂടെ സംസാരിച്ച് നല്ല കൂട്ടായി. ഒരുദിവസം ആനി മഹേഷിനോട് ഒരുകാര്യം ആവശ്യപ്പെട്ടു

"എനിക്ക് മാഷിനെ ഒന്ന് നേരിൽ കാണാൻ ആഗ്രഹം ഉണ്ട്"

മഹേഷും ഒരുപാട് ആഗ്രഹിച്ചതായിരുന്നു ആനിയെ ഒന്ന് നേരിൽ കാണാൻ. അവൻ ആ കാര്യം അവളോട് പറഞ്ഞു

"ആനിയേക്കാൾ ആഗ്രഹം എനിക്കാണ്. സത്യായിട്ടും നല്ല താല്പര്യം ഉണ്ടെനിക്ക് നേരിൽ കാണാൻ"

ആനിയൊന്ന് പുഞ്ചിരിച്ചു

"എവിടെവെച്ച് കാണും...?"

"ആനി പറയുന്ന സ്ഥലം. അവിടെ ഞാൻ വരാം"

"ഹേയ് അങ്ങനെയൊന്നുമില്ല മാഷേ... നമുക്ക് മാഷിന്റെ വീട്ടിൽ വെച്ച് കാണാം. അതല്ലേ നല്ലത്"

"ആനിക്ക് ഓക്കേ ആണേൽ എനിക്ക് ഡബിൾ ഓക്കേ"

അന്ന് കുറേനേരം സംസാരിച്ചിട്ട് അടുത്ത തിങ്കളാഴ്ച്ച നേരിൽ കാണാം എന്ന് പറഞ്ഞ് അവർ കോൾ അവസാനിപ്പിച്ചു.

ഇതേസമയം ഉണ്ണിയുടെ പോലിസ് സ്റ്റേഷൻ...

"സുബൈറേ, എനിക്കെന്തോ ആ ഡോക്ടറുടെ കേസിൽ വല്ലാത്തൊരു സംശയങ്ങൾ"

സുബൈർ ഉണ്ണിയെ അടിമുടിയൊന്ന് നോക്കി

"ആഹാ, അപ്പൊ സാറ് ഇതുവരെ ആ കേസ് വിട്ടില്ലേ...?"

ഉണ്ണി സുബൈറിനെ നോക്കി

"എനിക്കങ്ങനെ വിടാൻ തോന്നുന്നില്ലടോ ആ കേസ്..."

ഒന്ന് നിറുത്തിയിട്ട് തന്റെ പോക്കറ്റിൽ നിന്നും ഒരു സിഗരറ്റെടുത്ത് ചുണ്ടിൽ വെച്ച് കത്തിച്ച് ഉണ്ണി സുബൈറിനെ നോക്കി

"എനിക്ക് പല സംശയങ്ങളും ഉണ്ട്. പക്ഷേ, എവിടെ തുടങ്ങണം എന്നറിയില്ല. ചിലപ്പോൾ എന്റെ സംശയങ്ങൾ വെറുതേയാവാം... എന്നാലും ഈ കേസിൽ എന്തോ ഒളിഞ്ഞ് കിടക്കുന്നുണ്ട് എന്നൊരു തോന്നൽ"

സുബൈർ ഉണ്ണിയെ തോന്നി

"സാർ എന്താണ് ഉദ്ദേശിക്കുന്നത്...?"

ഉണ്ണി സുബൈറിന്റെ കണ്ണിലേക്ക് നോക്കി

"ഏതോ അതിബുദ്ധിമാൻ ഈ കേസിന് പിറകിലുണ്ടോ എന്നൊരു തോന്നൽ. ഒരിക്കലും നിയമത്തിന്റെയോ പോലീസിന്റെയോ മുന്നിൽ വരാൻ മടിക്കുന്ന ഒരു ഹൈഡ് ആൻഡ് സീക്ക് കളിപോലെ ആരോ ഈ കേസിന് പിന്നിൽ കളിക്കുന്നുണ്ട്"

ഒന്ന് നിറുത്തിയിട്ട് ഉണ്ണി തുടർന്നു

"അന്ന് പറഞ്ഞത് തന്നെ ഞാൻ വീണ്ടും പറയുന്നു. ഒരിക്കലും ഡോക്ടറിന്റെ രണ്ട് ഭാര്യമാരും ഒരേപോലെ ആത്മഹത്യ ചെയ്യില്ല. അതൊരു ആത്മഹത്യയല്ല. വളരേ പ്ലാൻഡ് ആയിട്ടുള്ള ബ്രില്ല്യന്റ് കൊലപാതകങ്ങൾ ആണ് രണ്ടും"

അടുത്ത തിങ്കളാഴ്ച്ച...

ഡോക്ടറും ആനിയും ഇന്നാണ് നേരിൽ കാണാൻ തീരുമാനിച്ച ദിവസം.

രാവിലെ നിറുത്താതെയുള്ള ഫോണിന്റെ റിങ് കേട്ടാണ് മനസ്സില്ലാമനസ്സോടെ ഡോക്ടർ ഉറക്കം എഴുന്നേൽക്കുന്നത്. മഹേഷ്‌ ഫോണെടുത്തുനോക്കി. ആനിയുടെ എട്ട് മിസ്കോൾ. വേഗം അവൻ ആനിയുടെ നമ്പറിലേക്ക് തിരിച്ച് വിളിച്ചു

"ഹലോ..."

അപ്പുറത്ത് മൗനം

"ഹലോ... ആനി വിളിച്ചിരുന്നോ. ഞാൻ നല്ല ഉറക്കായിരുന്നു"

"ഇന്ന് നേരിൽ കാണാം എന്ന് പറഞ്ഞിട്ട് മാഷ് പോത്തുപോലെ കിടന്നുറങ്ങാ ലേ"

"അയ്യോ, അതിന് നേരം വെളുക്കുന്നല്ലേ ഒള്ളൂ. ഞാൻ കരുതി ആനി ആഫ്റ്റർ നൂൺ ആയിരിക്കും വരാ എന്ന്"

"അതെന്താ ഇപ്പൊ വരാൻ പാടില്ലേ...?"

"അയ്യോ, ഞാൻ വേണ്ടാന്ന് പറഞ്ഞോ... ആനിക്ക് എപ്പൊ വേണേലും വരാം"

"എന്റെ മാഷേ ഇപ്പൊ സമയം എത്രയായി എന്നറിയോ...?"

ഡോക്ടർ തന്റെ വാച്ചെടുത്ത് സമയം നോക്കി

"അയ്യോ 11 മണി ആയോ"

"ആ ആയി... ഞാൻ ഇവിടെ റെയിൽവേ സ്റ്റേഷനിൽ വൈറ്റാൻ തുടങ്ങീട്ട് ഒരു മണിക്കൂറായി. മാഷിന് ബുദ്ധിമുട്ട് ആവില്ലേൽ പ്ലീസ് എന്നെ വന്ന് ഒന്ന് പിക്ക് ചെയ്യോ"

ഡോക്ടർ ബെഡിൽ നിന്നും ചാടി എഴുന്നേറ്റ് ബാത്‌റൂമിലേക്കോടി. ടൂത് ബ്രഷിൽ പേസ്റ്റ് തേച്ച് ഫോൺ ചെവിയിൽ വെച്ചു

"ദാ ഒരു പത്ത് മിനിറ്റ് ഞാൻ അവിടെയെത്തി"

ഒന്ന് പുഞ്ചിരിച്ചുകൊണ്ട് ആനി ഫോൺ കട്ട് ചെയ്തു. വേഗം പല്ല് തേച്ച് കുളിച്ച് മാറ്റി ഡോക്ടർ കാറും എടുത്തോണ്ട് റെയിൽവേ സ്റ്റേഷനിലേക്ക് കുതിച്ചു. ട്രാഫിക്കിൽ പെട്ട് കുറച്ച് സമയം വൈകിയെങ്കിലും ഒരുവിധത്തിൽ അവൻ റെയിൽവേ സ്റ്റേഷനിലെത്തി, വെറും അമ്പത് മിനിറ്റ് കൊണ്ട്.

മഹേഷ്‌ വേഗം കാർ പാർക്ക് ചെയ്ത് ഓടിച്ചെന്ന് ആനിയെ തിരഞ്ഞു. അപ്പോഴാണ് തന്നെ നോക്കി പുഞ്ചിരിക്കുന്ന ഒരു സുന്ദരിയെ അവൻ കണ്ടത്. അവളുടെ പാറിപറക്കുന്ന മുടിയും ചിരിക്കുമ്പോൾ നുണക്കുഴി കാണുന്ന കവിളിലും അറിയാതെ അവന്റെ കണ്ണുപോയി. പെട്ടന്ന് അവളിൽ നിന്ന് കണ്ണെടുത്തിട്ട് ഫോണെടുത്ത് ആനിയെ വിളിച്ചു. ഫോണെടുത്തത് ആ സുന്ദരി ആയിരുന്നു. മഹേഷ്‌ അന്തംവിട്ട് അവളെ നോക്കി

"അല്ല സിസ്റ്റർ ആനി എന്നൊക്കെ പറഞ്ഞിട്ട്...?"

ആനി മഹേഷിനെ നോക്കി പുഞ്ചിരിച്ചു

"അതെന്താ എന്നെ കണ്ടാൽ സിസ്റ്റർ ആണെന്ന് പറയില്ലേ...?"

"അങ്ങനല്ല... സിസ്റ്റർമാരുടെ വസ്ത്രം ഇങ്ങനെ അല്ലല്ലോ... അതാ ചോദിച്ചേ"

ആനി പൊട്ടിച്ചിരിച്ചു

"ന്റെ മാഷേ, ഞാൻ കുറച്ച് കാലായി ആ വസ്ത്രം ഉപേക്ഷിച്ചിട്ട്. ഇപ്പൊ ഇങ്ങനാണ്. എന്തേ എന്നോട് കൂട്ടുകൂടാൻ ഞാൻ സിസ്റ്റർ ആവണം എന്ന് നിർബന്ധം ഉണ്ടോ...?"

ഉണ്ണിയൊന്ന് പുഞ്ചിരിച്ചു എന്നിട്ട് അവളുടെ കണ്ണിലേക്ക് നോക്കി

"ഹേയ്, ഞാൻ കൂട്ടായത് ആനിയുടെ രൂപത്തിനോടോ വസ്ത്രത്തിനോടോ അല്ലല്ലോ, ഈ കേരക്റ്ററിനോട് അല്ലേ"

ആനി ഒന്ന് പുഞ്ചിരിച്ച് മഹേഷിനൊപ്പം പോയി കാറിൽ കയറി. അവർ വീട്ടിലേക്കുള്ള യാത്ര ആരംഭിച്ചു

"ഞാൻ കുറച്ചുകാലം മഠത്തിൽ ഉണ്ടായിരുന്നു. പിന്നെ അത് ഉപേക്ഷിച്ച് സാമൂഹ്യ പ്രവർത്തനങ്ങൾ തുടങ്ങി. ഇപ്പൊ ഞങ്ങളുടെ കൂട്ടായ്മയിൽ മൂന്ന് ട്രസ്റ്റ് ഉണ്ട്. ആരോരുമില്ലാത്തവർക്ക് ഒരു കൈത്താങ്"

മഹേഷ്‌ ആനിയെ നോക്കി

"ആനി എങ്ങനെയാ എന്നിലേക്ക് എത്തിയേ...?"

ആനി മഹേഷിനെ നോക്കി പുഞ്ചിരിച്ചു

"എന്താ പേടിയുണ്ടോ വല്ല പണിയും ആണോ എന്നോർത്ത്"

മഹേഷ്‌ ഒന്ന് ചിരിച്ചു

"ഹേയ് ഒരിക്കലുമില്ല"

"എന്റെ മാഷേ, നിങ്ങളുടെ കേസിനെ കുറിച്ച് ഞാൻ വിശദമായി പഠിച്ചു. നിങ്ങൾ നിരപരാധിയാണെന്ന് എന്റെ മനസ്സ് പറഞ്ഞു. അത് ഈ സമൂഹത്തിന് മുന്നിൽ തെളിയിക്കാൻ മാഷിനെ സഹായിക്കണം എന്ന് തോന്നി അത്രേ ഒള്ളൂ. പക്ഷേ..."

മഹേഷ്‌ ആനിയെ നോക്കി

"പക്ഷേ...?"

ആനി മഹേഷിന്റെ കണ്ണിലേക്ക് നോക്കി

"നിങ്ങൾക്ക് പിറകേ ആരോ ഉണ്ട്"

മഹേഷ്‌ പെട്ടന്ന് ബ്രെക്കിട്ട് ആനിയെ നോക്കി

"ആ... ര്.... ആരുണ്ടെന്ന്...?

ആനി പുഞ്ചിരിച്ചു

"ചിലപ്പോൾ അത് എന്റെ തോന്നലാവാം. അതൊക്കെ പോട്ടെ. ഒരു സെൽഫി എടുക്കട്ടെ"

മഹേഷ്‌ പുഞ്ചിരിച്ചു. ആനി ഒരു സെൽഫിയെടുത്ത് അത് ഫേസ്ബുക്കിലും ഇൻസ്റ്റയിലും പോസ്റ്റ്‌ ചെയ്തു. വിത്ത്‌ സമൂഹം ഒറ്റപ്പെടുത്തുന്ന ഒരു ഇരക്കൊപ്പം എന്ന ക്യാപ്ഷനും കൊടുത്തു. ആ പോസ്റ്റിന് താഴെ ആനിക്ക് ഒരുപാട് വിമർശനങ്ങളും തെറിവിളികളും വന്നു. അതൊക്കെ കണ്ടപ്പോൾ ആ ഫോട്ടോ ഡിലീറ്റ് ചെയ്യാൻ മഹേഷ്‌ ആവശ്യപ്പെട്ടു. ആനി അവനെ നോക്കി പുഞ്ചിരിച്ചു

"ഈ കല്ലെറിയുന്ന സമൂഹം തന്നെ നിങ്ങളെ വാഴ്ത്തപ്പെട്ടവനാക്കും നോക്കിക്കോ"

ആനി ഈ പറഞ്ഞ അതേ വാക്ക് ക്യാപ്ഷൻ ആയിട്ട് മറ്റൊരു ഫോട്ടോ കൂടി സോഷ്യൽ മീഡിയയിൽ അപ്‌ലോഡ് ചെയ്തു. അതിന്റെ താഴെ പച്ചത്തെറികൾ നിറഞ്ഞു.

മഹേഷ്‌ വീട്ടിലെ കാർ പോർച്ചിലേക്ക് കാർ കയറ്റി. രണ്ടുപേരും കാറിൽ നിന്നും ഇറങ്ങി വീട്ടിലേക്ക് കയറി. ആനി മഹേഷിനെ നോക്കി

"ആദ്യം എനിക്കൊന്ന് കുളിക്കണം. പിന്നെ ഏതെങ്കിലും ഹോട്ടലിൽ പോയി നന്നായി ഫുഡ്‌ അടിക്കണം. പിന്നെ ഒന്ന് രണ്ട് പർച്ചേസ്. ഇതൊക്കെ തീരുമ്പോഴേക്കും എനിക്ക് തിരിച്ച് പോവാനുള്ള ട്രെയിനിന്റെ സമയം ആകും"

മഹേഷ്‌ എല്ലാത്തിനും ഡബിൾ ഓക്കേ പറഞ്ഞു.

ഇതേസമയം ഉണ്ണിയുടെ സ്റ്റേഷൻ...

മൊബൈൽ കാണിച്ച് സുബൈർ ഉണ്ണിയെ നോക്കി

"ഇത് കണ്ടോ സാറേ, ആ ഡോക്ടറിന്റെ കൂടെ ഏതോ ഒരു പെണ്ണ് നിക്കുന്ന ഫോട്ടോക്ക് താഴെ പൊങ്കാലയാണ് നടക്കുന്നത്. ഈ ഡോക്ടർക്ക് ഇതിന് മാത്രം പെണ്ണുങ്ങളെ എവിടുന്ന് കിട്ടുന്നോ ആവോ"

ഉണ്ണി ആ മൊബൈൽ വാങ്ങി ആനിയുടെ ഫേസ്ബുക്ക് പ്രൊഫൈൽ നോക്കി. ആനിയുടെ പോസ്റ്റുകൾ നോക്കുന്നതിനിടയിലാണ് പെട്ടന്ന് അവൾ ലൈവിൽ വന്നത്. ഫോൺ എവിടെയോ മറച്ച് വെച്ചിരിക്കാണ്. പൊട്ടിക്കരഞ്ഞ് കൈകൾ കൂപ്പി അവൾ ആരോടോ തന്റെ ജീവന് വേണ്ടി കെഞ്ചുന്നുണ്ടായിരുന്നു

"എന്നെ ഒന്നും ചെയ്യരുത്... നിങ്ങളെ കാല് ഞാൻ പിടിക്കാം... എന്നെ.... പ്ലീസ് ഡോക്..."

അവൾ പറഞ്ഞ് അവസാനിപ്പിക്കും മുന്നേ അവിടെ തീ ആളിക്കത്തി... ആ തീയിൽ അവൾ ഒരുപിടി ചാരമായി മാറി.

ചില പകകൾ ബുദ്ധിക്ക് വിട്ട് കൊടുക്കുക...

                                                  

ഭാഗം 5👇👇👇

ഉണ്ണി ആ മൊബൈൽ വാങ്ങി ആനിയുടെ ഫേസ്ബുക്ക് പ്രൊഫൈൽ നോക്കി. ആനിയുടെ പോസ്റ്റുകൾ നോക്കുന്നതിനിടയിലാണ് പെട്ടന്ന് അവൾ ലൈവിൽ വന്നത്. ഫോൺ എവിടെയോ മറച്ച് വെച്ചിരിക്കാണ്. പൊട്ടിക്കരഞ്ഞ് കൈകൾ കൂപ്പി അവൾ ആരോടോ തന്റെ ജീവന് വേണ്ടി കെഞ്ചുന്നുണ്ടായിരുന്നു

"എന്നെ ഒന്നും ചെയ്യരുത്... നിങ്ങളെ കാല് ഞാൻ പിടിക്കാം... എന്നെ.... പ്ലീസ് ഡോക്..."

അവൾ പറഞ്ഞ് അവസാനിപ്പിക്കും മുന്നേ അവിടെ തീ ആളിക്കത്തി... ആ തീയിൽ അവൾ ഒരുപിടി ചാരമായി മാറി.

ഉണ്ണി കസേരയിൽ നിന്നും ചാടി എഴുന്നേറ്റ് സുബൈറിനെ നോക്കി

"സുബൈറേ വണ്ടിയെടുക്ക്"

സുബൈർ മഹേഷിന്റെ വീടിനെ ലക്ഷ്യമാക്കി  ജീപ്പ് പായിച്ചു. ഉണ്ണി എത്തിയപ്പോഴേക്കും ആളുകൾ അവിടെ തടിച്ച് കൂടിയിരുന്നു. ഉണ്ണി ആളുകൾക്കിടയിലൂടെ ഒരുവിധം വീടിന്റെ അകത്തേക്ക് കയറി. ഉണ്ണി അവിടെ കണ്ട കാഴ്ച്ച നാട്ടുകാർ വട്ടംകൂടി മഹേഷിനെ പൊതിരേ തല്ലുന്നതാണ്

"ഈ %₹#@ മോൻ കാരണം ഇനിയും ഒരുപാട് പെൺകുട്ടികൾ കൊല്ലപ്പെടും. തല്ലിക്കൊല്ലടാ ഈ പേ പിടിച്ച പട്ടിയെ"

ആളുകൾ മഹേഷിനെ നോക്കി അലറി. തടയാൻ ശ്രമിച്ച ഉണ്ണിക്ക് നേരെയും നാട്ടുകാർ തിരിഞ്ഞു

"ഈ പട്ടിയെ രക്ഷിക്കാൻ ഒരു പോലീസും ഇങ്ങോട്ട് വരേണ്ട. കൊലപാതകം തടയാൻ പോലും ത്രാണിയില്ലാത്ത പോലീസിനെക്കൊണ്ട് ജനങ്ങൾക്കെന്ത് ഉപകാരം...? നാളെ ഇവൻ ഞങ്ങളുടെ വീട്ടിലെ പെൺകുട്ടികളേയും കൊല്ലും"

വളരേ കഷ്ടപ്പെട്ട് നിയന്ത്രണം വിട്ട് നിൽക്കുന്ന നാട്ടുകാർക്കിടയിൽ നിന്നും മഹേഷിനെ രക്ഷപ്പെടുത്തി ഉണ്ണി ജീപ്പിൽ കയറ്റി. അപ്പോഴേക്കും മാധ്യമ പ്രവർത്തകർ അവിടെ എത്തിയിരുന്നു. അവർ ഉണ്ണിക്ക് നേരെ മൈക്കുകൾ നീട്ടി ചോദ്യങ്ങൾ ചോദിച്ചുകൊണ്ടിരുന്നു

"പട്ടാപകൽ ഇങ്ങനൊരു കൊലപാതകം നടക്കാൻ പോവുന്ന കാര്യം ഫേസ്ബുക്ക് ലൈവിലൂടെ പറഞ്ഞിട്ടും പോലീസ് എന്തുകൊണ്ട് അത് തടയാനുള്ള നടപടി സ്വീകരിച്ചില്ല...?"

"ഇനി അടുത്ത കൊലപാതകം എപ്പോഴാണ് സാറേ...? അതും ഫേസ്ബുക്ക് ലൈവിൽ വന്നാലേ പോലീസ് അറിയൊള്ളോ...?"

മാധ്യമ പ്രവർത്തകരുടെ പരിഹാസത്തോടെയുള്ള ചോദ്യങ്ങളിൽ നിന്നും ഒഴിഞ്ഞുമാറി മുഴുവൻ പോലീസ് ഫോഴ്സിനേയും ഉണ്ണി സ്പോട്ടിലേക്ക് വിളിപ്പിച്ചു.

പോലീസ് ഫോഴ്‌സ് എത്തിയതും മഹേഷിനേയും കൊണ്ട് ഉണ്ണി സ്റ്റേഷനിലേക്ക് പോവാൻ ഒരുങ്ങി. അപ്പോൾ ആൾക്കൂട്ടത്തിൽ നിന്നും ചിലർ ഉറക്കെ വിളിച്ചു പറഞ്ഞു

"ഞങ്ങളുടെ കയ്യിൽ നിന്നും രക്ഷപ്പെടുത്തി കൊണ്ടോയ്ക്കോ സാറേ ആ നായയെ. എന്നിട്ട് ജയിലിൽ വെച്ച് നല്ല ചിക്കൻ ബിരിയാണിയും മട്ടൻ ബിരിയാണിയും തിന്നാൻ കൊടുത്ത് അവനെ നന്നായി കൊഴുപ്പിക്ക്. എന്നാലല്ലേ അടുത്ത പെൺകുട്ടിയെ കൊല്ലാനുള്ള ആരോഗ്യം അവനുണ്ടാവൂ. നാണമില്ലല്ലോ പോലീസേ"

ഉണ്ണി വേഗം ജീപ്പെടുത്ത് സ്റ്റേഷനിലേക്ക് കുതിച്ചു. സ്റ്റേഷനിൽ എത്തിയതും മഹേഷിന് കുടിക്കാൻ വെള്ളം കൊടുത്ത് ഉണ്ണി അവനെ നോക്കി

"എന്താടോ തന്റെ ജീവിതത്തിൽ നടക്കുന്നത്...?"

മഹേഷിന്റെ കണ്ണുകൾ നിറഞ്ഞൊഴുകുന്നത് ഉണ്ണി ശ്രദ്ധിച്ചു

"തന്റെ ഇപ്പോഴത്തെ അവസ്ഥ എനിക്ക് മനസ്സിലാകും"

ഒന്ന് നിറുത്തിയിട്ട് ഉണ്ണി അവനെ നോക്കി

"ഇപ്പോൾ തനിക്ക് ചുറ്റിലും നടന്നോണ്ടിരിക്കുന്നതിനെ പറ്റി എന്തെങ്കിലും അറിയുമെങ്കിൽ എന്നോട് തുറന്ന് പറ. ഞാൻ സഹായിക്കാം നിന്നെ"

"സത്യായിട്ടും സാറേ എനിക്കൊന്നും മനസ്സിലാകുന്നില്ല. ആനി കുളിക്കാൻ വേണ്ടി മുറിയിൽ കയറിയതാ. ഞാൻ ആ സമയം അടുക്കളയിലെ വാതിലിന്റെ കുറ്റി ഇളകിയത് ശരിയാക്കായിരുന്നു"

ഉണ്ണി മഹേഷിനെ നോക്കി

"വാതിലിന്റെ കുറ്റിക്ക് എന്തുപറ്റി...?"

"അറിയില്ല സാറേ, താമസം തനിച്ചായത് കൊണ്ട് കുക്കിംഗ്‌ ഉണ്ടാവാറില്ല. ഭക്ഷണം പുറത്ത് നിന്നാ കഴിക്കാറ്. അതോണ്ട് തന്നെ അടുക്കളയിൽ വല്ലപ്പോഴുമേ പോവാറൊള്ളു. പക്ഷേ..."

ഉണ്ണി മഹേഷിനെ നോക്കി

"പക്ഷേ..."

"ഇന്നലെ ഉച്ചക്ക് ഞാൻ അടുക്കളയിൽ കയറിയിരുന്നു. കുറച്ച് വെള്ളം ചൂടാക്കാൻ പക്ഷേ ആ സമയത്ത് വാതിലിന്റെ കുറ്റിക്ക് കുഴപ്പമൊന്നും ഇല്ലായിരുന്നു. ഇന്ന് ആനി വന്നപ്പോൾ ഒരു ചായ ഇടാൻ കയറിയപ്പോഴാ ഞാൻ കുറ്റി ഇളകി കിടക്കുന്നത് കണ്ടേ"

ഉണ്ണി എന്തോ ആലോചിച്ചു

"ഇന്നലെ രാത്രി മഹേഷ്‌ ഇവിടെ ഉണ്ടായിരുന്നില്ലേ...?"

"ഉണ്ടായിരുന്നു സാർ... പക്ഷേ നല്ലോണം മദ്യപിച്ചിരുന്നു ഞാൻ. ഒന്നും ചിന്തിക്കാതെ ബോധമില്ലാതെ ഉറങ്ങാൻ ഞാൻ കണ്ടെത്തിയ മരുന്നാണ് മദ്യം"

ഉണ്ണി മഹേഷിനെ നോക്കി

"താൻ ഇനീം ജയിലിൽ കിടക്കും... തന്റെ ജീവിതം എന്താടോ ഇങ്ങനെ...?"

മഹേഷ്‌ ദയനീയമായി ഉണ്ണിയെ നോക്കി

"ആനി എന്റെ ജീവിതത്തിലേക്ക് വന്നില്ലായിരുന്നു എങ്കിൽ... ഞാൻ ഒരിക്കലും ഇന്ന് ജീവനോടെ ഉണ്ടാവുമായിരുന്നില്ല സാർ"

അപ്പോഴാണ് ഉണ്ണിയുടെ മൊബൈൽ ശബ്ദിച്ചത്. ഐജി സാറാണ്

"താനൊക്കെ എന്തിനാടോ തലയിൽ തൊപ്പിയും വെച്ച് നടക്കുന്നെ...? ഈ പണിക്ക് പറ്റൂലേൽ തൊപ്പി ഊരിവെച്ച് വേറെ വല്ല പണിക്കും പോടോ"

സാർ നല്ല ചൂടിൽ ആയിരുന്നു. ഉണ്ണിയെകൊണ്ട് ഒന്നും പറയാൻ സാർ സമ്മതിച്ചില്ല

"താൻ ഒരു കോപ്പും പറയേണ്ട. തന്റെ സ്റ്റേഷൻ പരിധിയിലാ ഇതൊക്കെ നടക്കുന്നെ... താൻ വല്ലതും അറിയുന്നുണ്ടോടോ...? എന്റെ മേളിൽ ഇരിക്കുന്ന ഉദ്യോഗസ്ഥരുടേയും മാധ്യമപ്രവർത്തകരുടേയും ചോദ്യങ്ങൾ കേട്ട് ഞാൻ മടുത്തു. തനിക്ക് ഞാൻ രണ്ട് ദിവസം സമയം തരും അതിനുള്ളിൽ ഈ കേസിന് ഒരു തുമ്പ് ഉണ്ടാക്കിയില്ലേൽ താനെന്റെ തനിസ്വഭാവം അറിയും"

ഇതും പറഞ്ഞ് ഐജി ഒറ്റ വെപ്പായിരുന്നു കോൾ. ഉണ്ണി മഹേഷിനെ നോക്കി

"താൻ ഇപ്പൊ ലോക്കപ്പിൽ കിടക്ക്. മറ്റെന്നാൾ കോടതിയിൽ ഹാജരാക്കാം"

മഹേഷ്‌ എഴുന്നേറ്റ് ലോക്കപ്പിലേക്ക് നടന്നു. ഉണ്ണി അവനെ നോക്കി

"ഒരുകാര്യം ചോദിച്ചാൽ നന്നായി ആലോചിച്ച് ഉത്തരം പറയണം"

മഹേഷിനെ ലോക്കപ്പിലാക്കി ചാവികൊണ്ട് പൂട്ടി ഇരുമ്പഴിയിൽ പിടിച്ച് ഉണ്ണി അവന്റെ കണ്ണിലേക്ക് നോക്കി

"നീ പറയുന്ന ഉത്തരത്തിൽ ഒരുപക്ഷേ നിനക്ക് രക്ഷപ്പെടാനുള്ള വഴിയും എനിക്ക് പിടിച്ച് കയറാനുള്ള കച്ചിത്തുരുമ്പും ഉണ്ടായേക്കാം"

"ചോദിക്ക് സാറേ... ഞാൻ പറയാം"

"ഇതിന് മുന്നേ ആത്മഹത്യ ചെയ്യപ്പെട്ട നിങ്ങളുടെ രണ്ട് ഭാര്യമാരും മരിക്കുന്നതിന് തൊട്ട് മുന്നേ എന്തെങ്കിലും അസ്വാഭാവികമായി നിങ്ങൾ കണ്ടിരുന്നോ...? അതായത് ഇപ്പോൾ നിങ്ങളുടെ വീടിന്റെ അടുക്കളയിലെ വാതിലിന്റെ കുറ്റി ഇളകിയത് പോലെയോ മറ്റോ...?"

മഹേഷ്‌ ഒന്ന് ആലോചിച്ചു

"ഹേയ്, ഒന്നുമില്ല സാർ"

"നന്നായി ഒന്ന് ആലോചിച്ച് നോക്കിയേ...? എന്തെങ്കിലും...?"

മഹേഷ്‌ അതേ ഉത്തരം ആവർത്തിച്ചു

"ഇല്ല സാർ എനിക്കുറപ്പാണ്"

ഉണ്ണിക്ക് തല പെരുക്കുന്ന പോലെ തോന്നി. പോക്കറ്റിൽ നിന്നും ഒരു സിഗരറ്റ് എടുത്ത് കത്തിച്ച് അവൻ അങ്ങോട്ടും ഇങ്ങോട്ടും നടന്നു. അപ്പോഴാണ് സുബൈർ അങ്ങോട്ട് വരുന്നത്

"എന്റെ സാറേ ഒരു പ്രധാനപ്പെട്ട കാര്യം പറയാനുണ്ട്"

ഉണ്ണി സുബൈറിനെ നോക്കി

"ഈ കേസുമായി ബന്ധപ്പെട്ട കാര്യാണോ...?"

സുബൈർ ഉണ്ണിയെ നോക്കി

"അല്ല..."

"ഇപ്പൊ എനിക്ക് പ്രധാനപ്പെട്ട കാര്യം ഈ കേസുമായി ബന്ധപ്പെട്ട കാര്യങ്ങൾ മാത്രാണ്. നിന്റെ പ്രധാനപ്പെട്ട കാര്യം നമുക്ക് പിന്നെ സംസാരിക്കാം"

ഒന്ന് നിറുത്തിയിട്ട് ഉണ്ണി സുബൈറിനെ നോക്കി

"അല്ല സ്പോട്ടിൽ ആരാ ഉള്ളേ...?"

"എസ്ഐ രമേശൻ സാറും എഎസ്ഐ ജോണി സാറും ഉണ്ട്"

ഉണ്ണിയൊന്ന് മൂളി എന്നിട്ട് സുബൈറിനെ നോക്കി

"നീ വാ നമുക്ക് അങ്ങോട്ട് പോവാം. ഇനി ഇവിടെ വന്ന് നിക്കണത് വലിയൊരു പ്രശ്നം ആവേണ്ട"

ഉണ്ണി സ്റ്റേഷനിൽ നിന്നും ഇറങ്ങാൻ നേരം മഹേഷ്‌ പിറകിൽ നിന്നും വിളിച്ചു

"സാർ..."

ഒന്ന് നിന്നിട്ട് ഉണ്ണി തിരിഞ്ഞു നോക്കി

"എന്തേ"

"സാർ ചോദിച്ചില്ലേ അവർ മരിക്കുന്നതിന് മുന്നേ അസ്വാഭാവികമായി എന്തെങ്കിലും കണ്ടിരുന്നോ എന്ന്..."

"അതേ... പറ... എന്താണ്...?"

"അന്നെനിക്ക് അതിൽ ഒരു അസ്വാഭാവികതയും തോന്നിയില്ലായിരുന്നു. പക്ഷേ... ഇപ്പൊ ഓർക്കുമ്പോൾ"

ഉണ്ണിയുടെ മുഖത്ത് ആകാംഷ

"എന്താണ് സംഭവിച്ചത്...? പറ..."

"സാർ രണ്ടുപേരും മരിക്കുന്നതിന് തൊട്ട് മുമ്പ് വീട്ടിലേക്ക് ഒരു പാർസൽ ബോക്സ്‌ വന്നിരുന്നു. ഞാൻ അതിനെ കുറിച്ച് ചോദിച്ചപ്പോൾ രണ്ടുപേരും പറഞ്ഞത് അതൊരു സർപ്രൈസ് ആണ് എന്നാണ്"

ഉണ്ണി മഹേഷിനെ നോക്കി

"എന്തായിരുന്നു ആ പാർസൽ ബോക്സ്‌...?"

മഹേഷ്‌ ഉണ്ണിയെ നോക്കി

"അറിയില്ല സാർ. അവരുടെ മരണത്തിന് ശേഷം ആ പാർസൽ അവിടെ കണ്ടിട്ടില്ല... വീട് വൃത്തിയാക്കാൻ വന്ന ആരേലും അത് കൊണ്ടുപോയി കാണും എന്നാണ് കരുതിയത്. ഞാൻ അത് അത്ര കാര്യമായി എടുത്തിട്ടില്ലായിരുന്നു. പക്ഷേ ഇപ്പൊ സാറ് പറഞ്ഞപ്പോൾ..."

ഉണ്ണി മഹേഷിനെ നോക്കി

"എത്ര വലിപ്പം ഉണ്ടായിരുന്നു ആ പാർസൽ ബോക്സിന്...?"

"അത്യാവശ്യം വലിയ ബോക്സ്‌ ആയിരുന്നു സാർ"

ഒന്ന് ആലോചിച്ചിട്ട് ഉണ്ണി സുബൈറിനെ നോക്കി

"നീയെന്താ പറയാനുണ്ട് പറഞ്ഞേ"

സുബൈർ ഉണ്ണിയെ നോക്കി

"അതൊരു പേഴ്‌സണൽ കാര്യാ സാറേ..."

"എന്താടോ പറ"

"സാറേ എന്റെ സുഹൃത്ത് മനോജിന് മോർച്ചറിയിലാ ജോലി. അവൻ സങ്കടപ്പെട്ട് വിളിച്ചിരുന്നു കുറച്ച് മുന്നേ..."

ഉണ്ണി സുബൈറിനെ നോക്കി

"എന്താ കാര്യം"

സുബൈർ തലചൊറിഞ്ഞ് ഉണ്ണിയെ നോക്കി

"ഈ കേസിന്റെ പിറകേ സാർ ഇങ്ങനെ ടെൻഷൻ അടിച്ച് നിക്കുമ്പോൾ ഞാൻ എങ്ങനാ പറയാ"

"താൻ പറയടോ"

"അത് സാറേ പുറത്തറിഞ്ഞാൽ അവന്റെ ജോലി പോണ കേസാ. ഒരു രഹസ്യ അന്വേഷണം നടത്തി അവനെ രക്ഷിക്കാൻ പറ്റോ ചോദിക്കാനാ"

ഉണ്ണിക്ക് ദേഷ്യം വന്നു

"താൻ കാര്യം പറയടോ..."

സുബൈർ ഉണ്ണിയെ നോക്കി

"അത് വേറൊന്നും അല്ല സാറേ മോർച്ചറിയിൽ നിന്നും മൂന്ന് ഡെഡ്ബോഡി മിസായിട്ടുണ്ട്"

ഒരു ഞെട്ടലോടെ ഉണ്ണി സുബൈറിനെ നോക്കി

"വാട്ട്‌...?"

                                                     

ഭാഗം 6👇👇👇

"അത് വേറൊന്നും അല്ല സാറേ മോർച്ചറിയിൽ നിന്നും മൂന്ന് ഡെഡ്ബോഡി മിസായിട്ടുണ്ട്"

ഒരു ഞെട്ടലോടെ ഉണ്ണി സുബൈറിനെ നോക്കി

"വാട്ട്‌...?"

"എന്തുപറ്റി സാർ...?"

ഉണ്ണി സുബൈറിനെ നോക്കി

"എന്നിട്ട് ഇപ്പോഴാണോ പറയുന്നേ... ന്റെ സുബൈറേ നീ കോപ്പിയടിച്ചാണോ പോലീസായേ...?"

സുബൈർ പല്ലിളിച്ച് കൊണ്ട് ഉണ്ണിയെ നോക്കി

"സാറല്ലേ പറഞ്ഞേ ഈ കേസുമായി ബന്ധമുള്ള കാര്യം ആണേൽ മാത്രം പറഞ്ഞാൽ മതി എന്ന്. അതല്ലേ ഞാൻ പറയാഞ്ഞേ"

"എടാ മണ്ടാ, നമ്മുടെ കേസിന്റെ ഗതി മാറ്റുന്ന ഏറ്റവും വലിയൊരു കാര്യാ നീയിപ്പോ പറഞ്ഞേ"

ഒന്നും മനസ്സിലാവാതെ സുബൈർ ഉണ്ണിയെ നോക്കി

"എനിക്ക് മനസ്സിലായില്ല സാർ"

ഉണ്ണി സുബൈറിനെ പുച്ഛത്തോടെ അടിമുടിയൊന്ന് നോക്കി

"ആ നിനക്ക് മനസ്സിലാകില്ല. അതിന് കുറച്ച് ബുദ്ധി വേണം. നീയിപ്പോ പറഞ്ഞ കാര്യം വെറുമൊരു കച്ചിത്തുരുമ്പല്ല ഡയറക്റ്റ് പ്രതിയിലേക്കുള്ള പാലമാണ്"

ഒന്ന് നിറുത്തിയിട്ട് ഉണ്ണി തുടർന്നു

"എന്റെ ഊഹങ്ങൾ എല്ലാം ശരിയായി വരുന്നുണ്ട്. സുബൈറേ എന്റെ ഊഹം ശരിയാണേൽ ഡോക്ടർ മഹേഷിന്റെ വീട്ടിൽ കത്തിക്കരിഞ്ഞ മൂന്ന് ശരീരവും മോർച്ചറിയിൽ നിന്നും മിസ്സായ മൃതദേഹങ്ങളാണ്"

ഞെട്ടലോടെ സുബൈർ ഉണ്ണിയെ നോക്കി

"അപ്പൊ ഡോക്ടറുടെ രണ്ട് ഭാര്യമാരും ഇന്ന് കൊല്ലപ്പെട്ട ആനിയും എവിടെ...? സാറ് എന്തൊക്കെയാ ഈ പറയുന്നേ...?"

ഉണ്ണി സുബൈറിനെ നോക്കി തന്റെ മൊബൈൽ എടുത്ത് ആനിയുടെ ലൈവ് വീഡിയോ പ്ലേ ചെയ്തു

"ഈ വീഡിയോ നോക്ക്... ഇതിൽ ഭയത്തോടെ സംസാരിക്കുന്ന ആനിയെ കാണാം. പക്ഷേ..."

സുബൈർ ഉണ്ണിയെ നോക്കി

"പക്ഷേ...?"

"ക്യാമറ ആനി എവിടെയോ ഒളിപ്പിച്ച് വെച്ചിരിക്കുന്നതായിട്ടാണ് നമുക്ക് മനസിലാക്കാൻ സാധിക്കുന്നത്. പക്ഷേ, ഭയന്ന മുഖത്തോടെ ഈ സമൂഹത്തോട് എല്ലാം പറഞ്ഞു കഴിഞ്ഞ് ആനി ക്യാമറയിൽ നിന്നും പതിയെ പതിയെ സൂം ഔട്ട്‌ ആവാൻ തുടങ്ങി. തീ കത്താൻ നേരം പെട്ടന്ന് ക്യാമറ നിലത്തേക്ക് വീണു... വൈ...?"

"അറിയില്ല സാർ"

"മൊബൈൽ താനേ വീണതല്ല. അവൾ ഡോക്ടറുടെ പേര് പറയാതെ പറഞ്ഞ് സമൂഹത്തിന്റെ മുന്നിലേക്ക് ഇട്ട് കൊടുത്ത് ക്യാമറയിൽ നിന്നും മാറി തന്റെ തൊട്ടടുത്തുള്ള ഡെഡ്ബോഡി കത്തിച്ചു"

ഒന്ന് നിറുത്തിയിട്ട് ഉണ്ണി സുബൈറിന്റെ കണ്ണിലേക്ക് നോക്കി

"നമ്മളാരും ആനി കത്തിയെരിയുന്നത് കണ്ടിട്ടില്ല. കണ്ടത് എന്നോ മരിച്ച ആരുടെയോ മൃതദേഹമാണ്"

"അപ്പൊ ആ മരിച്ചെന്ന് നമ്മളും സമൂഹവും കരുതിയ ആ മൂന്ന് പെണ്ണുങ്ങൾ ആരാ സാർ...? എന്തിനാ അവർ ഇതൊക്കെ ചെയ്തേ...? എന്തായിരിക്കും അവരുടെ ഉദ്ദേശം...?"

ഉണ്ണി സുബൈറിനെ നോക്കി

"ആ മൂന്ന് പെണ്ണുങ്ങളും എന്തോ അടങ്ങാത്ത പകയും കൊണ്ട് ഡോക്ടറിനെ തേടി വന്നതാണ്... പക്ഷേ അവർ വിചാരിച്ചിരുന്നെങ്കിൽ എന്നേ അവർക്ക് ഡോക്ടറെ കൊല്ലാമായിരുന്നു... പക്ഷേ അവർ ഡോക്ടറെ ഒന്ന് ഉപദ്രവിക്കുക പോലും ചെയ്തിട്ടില്ല"

"എന്റെ സാറേ, നമ്മള് എങ്ങനെ ആ മൂന്ന് പെണ്ണുങ്ങളിലേക്ക് എത്തും...?"

"ആദ്യം നമുക്കറിയേണ്ടത് ഈ മൂന്ന് പെണ്ണുങ്ങളും തമ്മിൽ എന്തെങ്കിലും ബന്ധമുണ്ടോ എന്നാണ്. അതറിഞ്ഞാൽ പിന്നെ കാര്യങ്ങൾ എളുപ്പമാണ്"

ഒന്ന് നിറുത്തിയിട്ട് ഉണ്ണി സുബൈറിനെ നോക്കി

"ഉടൻ നമുക്കൊരു ടീം ഉണ്ടാക്കണം. ആ മൂന്ന് പെണ്ണുങ്ങളുടേയും മുഴുവൻ ഡീറ്റെയിൽസും എത്രയും പെട്ടന്ന് കളക്ട് ചെയ്യണം. അവരുടെ ജനനം മുതൽ മരണം വരെയുള്ള മുഴുവൻ ഡീറ്റെയിൽസും വേണം"

ഉണ്ണി ഒരു ടീം ഉണ്ടാക്കി അവരോട് മൂന്ന് പെണ്ണുങ്ങളുടേയും മുഴുവൻ വിവരങ്ങളും ശേഖരിക്കാൻ ആവശ്യപ്പെട്ടു.

രണ്ട് ദിവസങ്ങൾക്ക് ശേഷം...

ഉണ്ണിയുണ്ടാക്കിയ സ്പെഷ്യൽ ഇൻവെസ്റ്റിഗേഷൻ ടീം അവർ ശേഖരിച്ച വിവരങ്ങളുടെ ഫയൽ ടേബിളിൽ വെച്ചു. ഉണ്ണി അത് തുറന്ന് വായിച്ച് തുടങ്ങി...

രേഷ്മ, മായ,ആനി... അനാഥാലയത്തിൽ ഒന്നിച്ച് കളിച്ച് പഠിച്ച് കുസൃതി കാണിച്ച് വളർന്നവർ. ആരോരുമില്ലാതെ അനാഥാലയത്തിന്റെ പടി കയറിയ മൂന്നുപേർക്കും അവർ പരസ്പരം താങ്ങും തണലുമായി. രക്ത ബന്ധത്തേക്കാൾ വലിയൊരു ബന്ധം അവരിൽ ഉടലെടുത്തു. ഈ ജന്മത്തിൽ ഒരിക്കലും പിരിയില്ല എന്നവർ ശപഥം ചെയ്തു.

പല ദമ്പതികളും അവരെ ദത്തെടുക്കാൻ തയ്യാറായപ്പോൾ മൂന്നുപേരും അതിൽ നിന്നും ഒഴിഞ്ഞുമാറി. അവർക്ക് പിരിയാൻ വയ്യായിരുന്നു. മൂന്നുപേരും വേറെവേറെ ആവുന്നത് ഓർക്കുമ്പോൾ തന്നെ പ്രാണൻ പോവുന്നത് പോലെ തോന്നി അവർക്ക്. പരസ്പരം അത്രക്കും സ്നേഹിച്ചിരുന്നു ആ പിഞ്ചു പൈതലുകൾ.

ഇതിനിടയിൽ അനാഥാലയത്തിന്റെ നടത്തിപ്പുകാരൻ ഫാദർ ജോസഫ് അന്തരിച്ചു. ഫാദർ മരിച്ചതോടെ അനാഥാലയത്തിന്റെ സാമ്പത്തിക അടിത്തറ ഇളകാൻ തുടങ്ങി. ഒരു നേരത്തെ ഭക്ഷണം തന്നെ അനാഥാലയത്തിലെ കുട്ടികൾക്ക് കിട്ടാൻ ബുദ്ധിമുട്ടായി. കുട്ടികളെ ദത്ത് കൊടുത്തും മറ്റൊരു അനാഥാലയത്തിലേക്ക് മാറ്റാനും തീരുമാനിച്ചു.

ആയിടക്കാണ് ഒരു കോടീശ്വര ദമ്പതികൾ രേഷ്മയെ ദത്തെടുക്കാൻ ഒരുങ്ങുന്നത്. അവർ അനാഥാലയത്തിലെ കുട്ടികൾക്ക് മൂന്ന് നേരവും ഭക്ഷണം കൊടുക്കാം എന്ന് പറഞ്ഞപ്പോൾ ആനിയും മായയും രേഷ്മയെകൊണ്ട് സമ്മതിപ്പിച്ചു.

മാസങ്ങൾക്ക് ശേഷം ആനിയേയും മായയേയും ഓരോ ദമ്പതികൾ ദത്തെടുത്തു. അങ്ങനെ ഒരിക്കലും പിരിയില്ല എന്ന് ശപഥം ചെയ്ത ജീവനുതുല്യം സ്നേഹിച്ചിരുന്ന അവർ മൂന്നുപേരും തങ്ങളുടെ അനാഥാലയത്തിന് വേണ്ടി മൂന്ന് വഴിക്കായി. പക്ഷേ ദത്തെടുത്തവർ അവരുടെ സ്നേഹം തിരിച്ചറിഞ്ഞപ്പോൾ മൂന്നുപേരേയും ഇടക്കിടെ ഒരുമിച്ചു കൂട്ടി. അവർ വീണ്ടും പരസ്പരം സ്നേഹിച്ച് വളർന്നു. ഒരേ ഹോസ്റ്റലിൽ താമസിച്ച് ഒരേ കോളേജിൽ പഠിച്ച്...

നാട്ടിൽ എത്തിയാൽ മൂന്നുപേരും ആദ്യം പോയിരുന്നത് തങ്ങൾ വളർന്ന അനാഥാലയത്തിലേക്കായിരുന്നു. അതായിരുന്നു അവരുടെ തറവാട്.

ഉണ്ണി ഫയൽ മടക്കിവെച്ച് സുബൈറിനെ നോക്കി

"ആ അനാഥലയത്തിൽ ഒന്ന് പോണം"

"സാർ, അത് മൂന്ന് വർഷം മുന്നേ സീൽ വെച്ചു"

"എന്തുപറ്റി...?"

"അവിടെ ഉണ്ടാക്കിയ ഫുഡിൽ ഭക്ഷ്യവിഷബാധ ഉണ്ടായി നാൽപതോളം പിഞ്ചു കുട്ടികൾ മരിച്ചു"

ഉണ്ണി ഒന്നും മിണ്ടാതെ കുറച്ച് സമയം എന്തോ ആലോചിച്ചു

"സുബൈറേ, ആ മൂന്ന് പെണ്ണുങ്ങൾ എവിടെയാണ് എന്ന് നമുക്ക് കണ്ടെത്തണം"

ഉണ്ണിയും സുബൈറും അന്വേഷണം ഊർജിതമാക്കി. പല വഴിക്കും അവർ അന്വേഷണം നടത്തി. മൂന്ന് പെണ്ണുങ്ങളുടേയും ഫോട്ടോ വെച്ച് അവർ ലുക്ക് ഔട്ട്‌ നോട്ടീസ് ഇറക്കി. മരിച്ചത് മൂന്ന് പെണ്ണുങ്ങൾ അല്ല മോർച്ചറിയിൽ നിന്നും മോഷണം പോയ ഡെഡ്ബോഡികളാണ് എന്ന വാർത്ത കാട്ട് തീ പോലെ പടർന്നു. മാധ്യമങ്ങളിൽ വൻ ചർച്ചയായി. മൂന്ന് പെണ്ണുങ്ങളേയും ഉടൻ അറസ്റ്റ് ചെയ്യാൻ ഉണ്ണിക്ക് മേലുദ്യോഗസ്ഥരിൽ നിന്നും വൻ സമ്മർദ്ദം ഉണ്ടായികൊണ്ടിരുന്നു.

ദിവസങ്ങൾ കടന്നുപോയി മൂന്നുപേരെ കുറിച്ച് ഒരു തുമ്പും പോലീസിന് കിട്ടിയില്ല. മാധ്യമങ്ങളും ജനങ്ങളും പോലീസിനെതിരെ പരിഹാസവുമായി രംഗത്തിറങ്ങി. എങ്ങനെയൊക്കെ നോക്കിയിട്ടും കേസ് മുന്നോട്ട് പോകുന്നില്ലല്ലോ എന്നോർത്ത് ഉണ്ണി തല പുകച്ചു.

ഒരുദിവസം വീട്ടിൽ നിന്നും സ്റ്റേഷനിലേക്ക് ഇറങ്ങാൻ നേരം ഉണ്ണിയുടെ മൊബൈൽ ശബ്ദിച്ചു

"ഹലോ... ആ സുബൈറേ പറ"

"സാർ അറിഞ്ഞില്ലേ...?"

"എന്ത്‌...?"

"അന്ന് മോർച്ചറിയിൽ നിന്നും മിസ്സായ ഡെഡ്ബോഡികൾ തൊട്ടപ്പുറത്തുള്ള കുളത്തിൽ നിന്നും കിട്ടി"

സുബൈർ പറഞ്ഞ് തീർന്നതും ഞെട്ടലോടെ ഉണ്ണി താഴെയിരുന്നു 

"എന്ത്...? അപ്പൊ ഡോക്ടറുടെ വീട്ടിൽ കൊല്ലപ്പെട്ട മൂന്നുപേർ ആരാ...?"

ഭാഗം 7 👇👇👇

"അന്ന് മോർച്ചറിയിൽ നിന്നും മിസ്സായ ഡെഡ്ബോഡികൾ തൊട്ടപ്പുറത്തുള്ള കുളത്തിൽ നിന്നും കിട്ടി"

സുബൈർ പറഞ്ഞ് തീർന്നതും ഞെട്ടലോടെ ഉണ്ണി താഴെയിരുന്നു 

"എന്ത്...? അപ്പൊ ഡോക്ടറുടെ വീട്ടിൽ കൊല്ലപ്പെട്ട മൂന്നുപേർ ആരാ...?"

"അതാണ് സാറേ ഇപ്പൊ മീഡിയയിൽ മുഴുവൻ വാർത്ത"

"എവിടാക്കാടോ ഈ കഥ പോവുന്നേ...?"

മോർച്ചറിയിൽ നിന്നും നഷ്ടപ്പെട്ട ഡെഡ്ബോഡികൾ തിരിച്ച് കിട്ടിയത് വൻവാർത്തയായി. ഉണ്ണിയുടെ അന്വേഷണത്തെ മാധ്യമങ്ങൾ വിമർശിച്ചു. ഇല്ലാത്ത കഥയുണ്ടാക്കി കേസ് ആട്ടിമറിക്കാൻ ശ്രമിച്ചു എന്ന് ആരോപിച്ച് ഉണ്ണിയെ ആറ് മാസത്തേക്ക് സസ്പെൻഡ് ചെയ്തു.

മരിച്ചത് മൂന്ന് പെണ്ണുങ്ങൾ ആണെന്ന് കോടതി വിലയിരുത്തി. തന്റെ അടുത്ത സുഹൃത്തുക്കളുടെ ആത്മഹത്യക്ക് കാരണക്കാരനായ ഡോക്ടറെ അഴിക്കുള്ളിലാക്കാനാണ് സ്വയം ചാവേറായി ആനി വന്നതെന്ന് കോടതി കണ്ടെത്തി. ഡോക്ടറാണ് തന്നെ കൊന്നതെന്ന് വരുത്തി തീർക്കാനാണ് ഫേസ്ബുക്ക് ലൈവിൽ വന്ന് ആനി അങ്ങനെയൊക്കെ പറഞ്ഞ് ആത്മഹത്യ ചെയ്തത് എന്ന പ്രതിഭാഗത്തിന്റെ ഭാഗം കോടതി അംഗീകരിച്ചു. ഡോക്ടർ ജയിൽ മോചിതനായി.

ജയിൽ മോചിതനായ അന്നുതന്നെ ഡോക്ടർ ഉണ്ണിയെ പോയി കണ്ടു

"ജീവിതത്തിൽ ഒരിക്കലും മറക്കില്ല സാർ. നിരപരാധിയായ എന്നെ രക്ഷപ്പെടുത്താൻ നോക്കിയതിന്റെ പേരിൽ ഒടുവിൽ സസ്പെൻഷനും കിട്ടി അല്ലേ... ഞാൻ മാപ്പ് ചോദിക്കുന്നു"

ഉണ്ണിയൊന്ന് പുഞ്ചിരിച്ചു

"ഹേയ്, ഇതൊക്കെ സർവീസിൽ സർവ്വ സാധാരണമല്ലേ... എന്തായാലും നിങ്ങൾ നിരപരാധിത്വം തെളിയിച്ചല്ലോ... അതുമതി"

ഡോക്ടർ ഒന്ന് പുഞ്ചിരിച്ചു...

"സാറേ, ഞാൻ അടുത്ത ആഴ്ച്ച കാനഡയിൽ പോവും. ഇനിയുള്ള കാലം എന്റെ ജീവിതം അവിടെയാണ്. ഈ നാട് എനിക്ക് മടുത്തു സാറേ"

ഉണ്ണി ഡോക്ടറെ നോക്കി

"ഞാൻ അത് ചോദിക്കാൻ ഇരിക്കായിരുന്നു. ഈ നാട്ടിൽ ഇനി എങ്ങനാ ജീവിക്കാ എന്ന്. എന്തായാലും നല്ലൊരു തീരുമാനമാണ്. ഇനിയുള്ള ജീവിതം മനോഹരമാവട്ടെ എന്ന് ആശംസിക്കുന്നു"

ഉണ്ണിയോട് നന്ദി പറഞ്ഞ് ഡോക്ടർ അവിടെനിന്നും ഇറങ്ങി.

ഒരാഴ്ച്ചക്ക് ശേഷം...

ഒരു ഹോട്ടൽ മുറിയിരുന്ന് രണ്ടെണ്ണം അടിച്ചോണ്ട് ഇരിക്കുമ്പോഴാണ് ഉണ്ണിയെ കാണാൻ സുബൈർ വരുന്നത്

"ആഹാ, ആറ് മാസത്തെ സസ്പെൻഷൻ ഇവിടെ കള്ളും കുടിച്ച് ആഘോഷിക്കാണ് അല്ലേ"

ഉണ്ണിയൊന്ന് പുഞ്ചിരിച്ചു. സുബൈർ ഉണ്ണിയെ നോക്കി

"സത്യം പറ സാറേ, സാറിന് അറിയില്ലായിരുന്നോ ഈ കേസിലെ യഥാർത്ഥ പ്രതി ആരാണെന്ന്"

ഉണ്ണി ഒന്നും മിണ്ടാതെ തന്റെ കയ്യിലുള്ള ഗ്ലാസിലെ മദ്യം വായിലേക്ക് ഒഴിച്ചു.

"പറ സാറേ, സാറിന് അറിയില്ലായിരുന്നോ ഈ കേസിനെ കുറിച്ചുള്ള എല്ലാ വിവരങ്ങളും. ഞാൻ കുറേ കേട്ടിട്ടുണ്ട് സാറിന്റെ കേസന്വേഷണ രീതികളെ കുറിച്ച്. ഞാൻ കേട്ട കഥയിലെ ഹീറോ സാറാണെങ്കിൽ തീർച്ചയായും ഈ കേസിലെ യഥാർത്ഥ പ്രതിയേയും സാറിന് അറിയാം"

ഒന്ന് നിറുത്തിയിട്ട് സുബൈർ ഉണ്ണിയെ നോക്കി

"ഞാൻ അറിയുന്ന കേട്ടിട്ടുള്ള ഉണ്ണി എന്ന പോലീസുകാരൻ ഇങ്ങനെ തോറ്റ് കൊടുക്കുന്നവനല്ല. സിംഹത്തെപോലെ വേട്ടയാടി പിടിക്കുന്നവനാണ്"

ഉണ്ണി സുബൈറിനെ നോക്കി പുഞ്ചിരിച്ചു

"ചില തോൽവികൾ ജയതിനേക്കാൾ ആയിരം ഇരട്ടി ലഹരിയാടോ"

സുബൈറിന്റെ മുഖം സന്തോഷം കൊണ്ട് തുടിച്ചു

"മതി സാറേ, എനിക്കിത് കേട്ടാൽ മതി. വേറൊന്നും എനിക്കറിയേണ്ട. എന്റെ സാർ തോറ്റില്ലല്ലോ എനിക്കത് മതി"

സുബൈർ ഒരു പെഗെടുത്ത് അടിക്കാൻ നേരം ഉണ്ണി അത് തടഞ്ഞു

"നീ കഴിക്കല്ലേ, നമുക്ക് ഒരിടം വരെ പോവാനുണ്ട്. വണ്ടി എടുത്തിട്ട് നീ ഗെയ്റ്റിന്റെ അടുത്തേക്ക് വാ"

ഉണ്ണി എഴുന്നേറ്റ് മുഖം വൃത്തിയാക്കി വാതിൽ അടച്ച് പുറത്തേക്കിറങ്ങി. സുബൈർ കാറുമായി ഉണ്ണിയുടെ മുന്നിലെത്തി

"എവിടേക്കാ സാറേ...?"

"കുറച്ച് പോവാനുണ്ട്. ഒരു സെമിത്തേരിയിലേക്കാ"

സുബൈർ ഒന്ന് പുഞ്ചിരിച്ചു

"സാറ് പറഞ്ഞാ ഏത് പത്താളത്തിലേക്കും സുബൈർ വരും"

ഇതേ സമയം ഡോക്ടറിന്റെ വീട്ടിൽ

ഡോക്ടർ ഇന്നാണ് കാനഡയിലേക്ക് പോവുന്നത്. തന്റെ ഡ്രെസ്സൊക്കെ പാക്ക് ചെയ്ത് വീട് പൂട്ടി ഡോക്ടർ പുറത്തേക്കിറങ്ങി. കൃത്യ സമയത്ത് തന്നെ ടാക്സി വന്നു. ടാക്സിയിൽ കയറി എയർപോർട്ടിലേക്ക് പോവാൻ ആവശ്യപ്പെട്ടു. ഡ്രൈവർ തലയാട്ടി കാർ മുന്നോട്ടെടുത്തു. കുറച്ച് സമയം കഴിഞ്ഞപ്പോഴാണ് ഡോക്ടർ ആ കാര്യം ശ്രദ്ധിച്ചത്... ടാക്സി പോകുന്നത് എയർപോർട്ടിലേക്ക് പോകുന്ന വഴിയിലൂടെ അല്ല

"ഹേയ് മിസ്റ്റർ... നിങ്ങൾ എങ്ങോട്ടാണ് പോകുന്നത്...? ഇത് എയർപോർട്ടിലേക്കുള്ള വഴിയല്ല"

ഡ്രൈവർ ഡോക്ടറെ നോക്കി

"അതെനിക്കും അറിയാം ഡോക്ടറേ. എന്റെ സാറ് എന്നോട് പറഞ്ഞിരിക്കുന്നത് ഡോക്ടർ സംസാരിക്കുകയാണെങ്കിൽ ശവമായിട്ടും മിണ്ടാതെ നല്ലകുട്ടിയായിട്ട് ഇരിക്കേണെങ്കിൽ ജീവനോടേയും കൊണ്ടുവരാനാണ്"

ഡ്രൈവർ തന്റെ കയ്യിലുള്ള ഗൺ ഉയർത്തി കാണിച്ച് ഡോക്ടറെ നോക്കി

"ഞാൻ സംസാരിക്കണം എന്ന് ഡോക്ടർക്ക് നിർബന്ധം ആണേൽ സംസാരിക്കാം. പക്ഷേ പിന്നെ ഡോക്ടർ ജീവനോടെ ഉണ്ടാകില്ല"

പിന്നെ ഡോക്ടർ വായ തുറന്നില്ല. കുറച്ച് മണിക്കൂർ യാത്രക്ക് ശേഷം ആ ടാക്സി ഒരു ആളൊഴിഞ്ഞ സെമിത്തേരിയിയുടെ അടുത്ത് നിർത്തി. ഡോക്ടർ പുറത്തിറങ്ങി ചുറ്റിലും നോക്കി. ആരേയും കണ്ടില്ല. പെട്ടെന്നാണ് ഒരു കാർ ചീറിപ്പാഞ്ഞ് വന്ന് ഡോക്ടറുടെ അടുത്ത് നിന്നത്. ഡോക്ടർ കാറിന്റെ ഉള്ളിലേക്ക് നോക്കി. മുണ്ടും മടക്കികുത്തി ഉണ്ണി കാറിൽ നിന്നും ഇറങ്ങി ഡോക്ടറെ നോക്കി അലറി

"പന്ന പുലയനാർ മണിയാ. ഞങ്ങൾ കേരളാ പോലീസിനെ മൊത്തത്തിലങ്ങനെ മണ്ടന്മാരാക്കി നീ കാനഡയിൽ പോയി സുഖിക്കേണ്ട"

"വാട്ട്‌...?"

"വാട്ട്‌... നിന്റെ അമ്മേടെ %₹#@@ നിർത്തടാ മലരേ നിന്റെ ഓസ്കാർ അഭിനയം"

സുബൈർ ഉണ്ണിയെ നോക്കി കാറിൽ നിന്നും ഇറങ്ങി

"ആഹാ അപ്പൊ ഇവനാണോ സാറേ ഈ കഥയിലെ വില്ലൻ. എജ്ജാതി അഭിനയായിരുന്നു ഇവൻ"

"ഇവനാണ് വില്ലെനെന്ന് എനിക്ക് എന്നോ മനസിലായതാ.... അതായത് കൃത്യമായി പറഞ്ഞാൽ..."

ഒന്ന് നിറുത്തിയിട്ട് ഉണ്ണി ഡോക്ടറെ നോക്കി

"ഭാര്യമാർ ആത്മഹത്യ ചെയ്യുന്നതിന്റെ തൊട്ടുമുന്നേ ഒരു വലിയ പാർസൽ വന്നാൽ അത് നീ ശ്രദ്ധിക്കില്ല അല്ലേ നിഷ്ക്കൂ ഭർത്താവേ... ഒരു ഭാര്യക്ക് വന്നപ്പോൾ ശ്രദ്ധിച്ചില്ല എന്നുവെക്കാം പക്ഷേ രണ്ടാമത്തെ ഭാര്യക്കും അതേ വലിയ പാർസൽ വന്നപ്പോൾ നീ ശ്രദ്ധിച്ചില്ല എന്ന് വളരേ നിസാരമായി പറഞ്ഞ നുണയാണ് ഡോക്ടറേ ഇപ്പൊ നീ ഇവിടെ നിക്കാൻ കാരണം"

ഡോക്ടർ ഉണ്ണിയെ നോക്കി

"വാട്ട്‌...? ഇത്രേം നിസാരമായ ഊഹാപോഹങ്ങൾ വെച്ചിട്ടാണോ ഞാനാണ് ഇതിന്റെയൊക്കെ പിറകിൽ എന്ന് തീരുമാനിക്കുന്നേ...?"

ഉണ്ണി ഡോക്ടറുടെ കണ്ണിലേക്ക് നോക്കി

"മൂന്ന് പെണ്ണുങ്ങളുടെ ഡീറ്റെയിൽസ് അറിയാൻ വേണ്ടി ഞാൻ ഉണ്ടാക്കിയ ടീമിന്റെ കൂടെ മറ്റൊരു സീക്രെട് ടീമും കൂടി ഉണ്ടാക്കിയിരുന്നു. നിന്നെക്കുറിച്ച് അന്വേഷിക്കാൻ"

ഒന്ന് നിറുത്തിയിട്ട് ഉണ്ണി തുടർന്നു

"നീ ആരാണ് എന്താണ് എന്നൊക്കെ അറിഞ്ഞപ്പോൾ... നിന്റെ ആസ്തി അറിഞ്ഞപ്പോൾ... നീ ഞങ്ങളെയൊക്കെ പൊട്ടന്മാരാക്കി ഈ കളിയൊക്കെ ഇവിടെ കളിച്ചതറിഞ്ഞപ്പോൾ ശരിക്കും ഞെട്ടിപ്പോയി"

ഡോക്ടർ നന്നായി വിയർക്കുന്നത് ഉണ്ണി ശ്രദ്ധിച്ചു

"ടാ പുല്ലേ, നിന്നെ ഉള്ളിലാക്കാനുള്ള എല്ലാ തെളിവുകളും എന്റെ കയ്യിലുണ്ട്. അങ്ങനെ നിന്നെ അറസ്റ്റ് ചെയ്ത് മീഡിയക്ക് മുന്നിൽ കൊണ്ടുപോയി നിർത്തി രണ്ട് ഡയലോഗും പറഞ്ഞ് സ്ലോമോഷനിൽ നടന്നുപോവാൻ എനിക്ക് അറിയാഞ്ഞിട്ടല്ല. പക്ഷേ ഇത്രേം ബുദ്ധിയുള്ള സൈലന്റ് ക്രിമിനലായ നീ പുല്ലുപോലെ പുറത്തിറങ്ങും"

ഒന്ന് നിറുത്തിയിട്ട് ഉണ്ണി ഡോക്ടറുടെ കണ്ണിലേക്ക് നോക്കി

"ഈ സ്ഥലം അറിയോ നിനക്ക്...? നീയും നിന്റെ കൂട്ടുകാരും ചേർന്ന് പല മരുന്നുകളും കുത്തിവെച്ച് പരീക്ഷണ വസ്തുക്കളാക്കി മാറ്റിയ നാൽപതോളം ആരോരുമില്ലാത്ത പിഞ്ചു പൈതങ്ങൾ അന്തിയുറങ്ങുന്ന മണ്ണാ ഇത്. ഒന്നുറക്കെ കരയാൻ പോലും സമ്മതിക്കാതെ നീയൊക്കെ വേദനിപ്പിച്ച് വേദനിപ്പിച്ച് കൊന്ന പാവം മക്കളുടെ ഇടയിലാ നമ്മളിപ്പോ നിക്കുന്നേ..."

ഡോക്ടർ ഉണ്ണിയോട് എന്തോ പറയാൻ ശ്രമിച്ചു പക്ഷേ ഉണ്ണിയത് തടഞ്ഞു

"മിണ്ടരുത് നീ... രക്ഷകനായി കയറിച്ചെന്ന് ആ മൂന്ന് പെണ്ണുങ്ങളേയും നാൽപതോളം കുട്ടികളേയും കൊന്നൊടുക്കിയ നീ പോവേണ്ടത് ജയിലിൽ സുഖവാസത്തിനല്ല"

ഉണ്ണി ഡോക്ടറെ നോക്കി

"ഹോ!!! എന്ത് മാസ്റ്റർ പ്ലാനിങ് ആണെടാ നിന്റേത്... ഹോ!!!"

                                               

അവസാനഭാഗം 👇👇👇

"മിണ്ടരുത് നീ... രക്ഷകനായി കയറിച്ചെന്ന് ആ മൂന്ന് പെണ്ണുങ്ങളേയും നാൽപതോളം കുട്ടികളേയും കൊന്നൊടുക്കിയ നീ പോവേണ്ടത് ജയിലിൽ സുഖവാസത്തിനല്ല"

ഉണ്ണി ഡോക്ടറെ നോക്കി

"ഹോ!!! എന്ത് മാസ്റ്റർ പ്ലാനിങ് ആണെടാ നിന്റേത്... ഹോ!!!"

ഉണ്ണി കാറിൽ നിന്നും ഒരു ഫയൽ എടുത്ത് ഡോക്ടറെ കാണിച്ചു

"നീ ചെയ്ത എല്ലാ ക്രൂരതകളും ആ ക്രൂരതകളിൽ നിന്നും രക്ഷപ്പെടാൻ കാണിച്ച  ക്രിമിനൽ മാസ്റ്റർ പ്ലാനും ഈ ഫയലിലുണ്ട്"

ഉണ്ണി ആ ഫയൽ നിലത്തേക്ക് വലിച്ചെറിഞ്ഞു. അപ്പോൾ ചെറിയ ഒരു കാറ്റടിച്ചു. ആ കാറ്റിൽ ഫയലിന്റെ ആദ്യ പേജ് മെല്ലെ തുറന്നു...

സൈലന്റ് ക്രിമിനൽ ഡോക്ടറുടെ മാസ്റ്റർ പ്ലാൻ... എന്നായിരുന്നു ആ ഫയലിന്റെ തലക്കെട്ട്. കാറ്റിൽ ഓരോ പേജും മെല്ലെ മാറിമാറി തുറന്നു...

ആരോടും കൂടുതൽ സംസാരിക്കാത്ത പ്രകൃതമുള്ള ഡോക്ടർ ഒരു വൻ മയക്കുമരുന്ന് മാഫിയയുടെ കണ്ണിയായിരുന്നു. തല നിറച്ചും ക്രിമിനൽ ബുദ്ധിയുള്ള ഡോക്ടർ സ്വന്തമായി മയക്കുമരുന്ന് ഉണ്ടാക്കാൻ പ്ലാൻ ചെയ്യുന്നു.  അവൻ ഒരു ഗ്രാമത്തിൽ പോയി ക്ലിനിക്ക് നടത്തുന്നു എന്ന വ്യാജേന മയക്ക് മരുന്ന് നിർമാണം ആരംഭിക്കുന്നു. തന്റെ ലാബിൽ ഉണ്ടാക്കുന്ന മയക്കുമരുന്നുകളുടെ പരീക്ഷണം ആദ്യം ഡോക്ടർ നടത്തിയിരുന്നത് ചില മൃഗങ്ങളിൽ ആയിരുന്നു. നിരന്തരമായി ലാബിന്റെ അടുത്തുള്ള പട്ടികളും കുരങ്ങന്മാരും പൂച്ചകളും ചത്ത് വീഴുന്നത് കണ്ടപ്പോൾ നാട്ടുകാർക്ക് സംശയം തോന്നി തുടങ്ങി എന്ന് മനസ്സിലാക്കിയപ്പോൾ അയാൾ മൃഗങ്ങളിലുള്ള പരീക്ഷണം ഉപേക്ഷിച്ചു.

ഉണ്ടാക്കുന്ന മയക്കുമരുന്ന് പരീക്ഷിക്കാൻ മൃഗങ്ങളെ കിട്ടാതായപ്പോൾ ഡോക്ടർ ഭ്രാന്തനെപ്പോലെ അലയുന്നു. കാരണം പല മയക്ക് മരുന്ന് മാഫിയകൾക്കും മരുന്ന് എത്തിക്കാം എന്നയാൾ ഉറപ്പ് കൊടുത്തിരുന്നു. ഒരു ഭ്രാന്തനെപ്പോലെ ഇനിയെന്ത് ചെയ്യും എന്ന് ആലോചിച്ച് തലപുകച്ച് ഇരിക്കുമ്പോഴാണ് ഫേസ്ബുക്ക് വഴി  ഒരു സാധാരണക്കാരനായ ഫാദർ നടത്തുന്ന അനാഥാലയത്തെ കുറിച്ച് അറിയാൻ ഇടയായത്. സാധാരണ രീതിയിൽ നടക്കുന്ന ആ അനാഥാലയത്തിന് വലിയ പിടിപാടുകളൊന്നും ഇല്ലെന്ന് മനസ്സിലാക്കിയ ഡോക്ടർ ഒരു രക്ഷകനായി ഫാദറിന്റെ മുന്നിൽ അവതരിച്ചു. തനിക്ക് കുട്ടികൾ എന്നുവെച്ചാൽ ജീവൻ ആണെന്നും അവരെ സംരക്ഷിക്കാൻ തന്നെകൊണ്ട് ആവുന്നതൊക്കെ ചെയ്യാം എന്നുംപറഞ്ഞ് ഡോക്ടർ അവിടെ കയറിപ്പറ്റി.

രേഷ്മയും ആനിയും മായയും ഇതേ അനാഥാലയത്തിലാണ് വളർന്നത്. തങ്ങൾക്ക് കിട്ടുന്ന ശമ്പളത്തിൽ നിന്നും അവർ ചിലവിനുള്ള കാശ് കൃത്യമായി ഫാദറിന് അയച്ച് കൊടുക്കാറുണ്ടായിരുന്നു. മൂന്നുപേരും സമയം കിട്ടുമ്പോഴൊക്കെ അവിടെ പോവാറുണ്ട്. പക്ഷേ ഡോക്ടർ എല്ലാ ആഴ്ച്ചയും കുട്ടികൾക്ക് കളിപ്പാട്ടങ്ങളും ചോക്ലേറ്റുമായി അവിടെ സന്ദർശിച്ചു. ചിരിച്ചുകൊണ്ട് സ്നേഹം നടിച്ച് ഡോക്ടർ തന്റെ പുതിയ മരുന്നിന്റെ തീവ്രത അളക്കാൻ ആ പിഞ്ചു പൈതങ്ങളുടെ മേൽ പരീക്ഷിച്ചു. ഡോക്ടർ അവിടെയുള്ള മുഴുവൻ കുട്ടികൾക്കും കുത്തിവെപ്പ് എന്നും പറഞ്ഞ് ഇടയ്ക്കിടെ ഓരോ മരുന്നിന്റെയും പരീക്ഷണങ്ങൾ നടത്തി. ചില കുട്ടികൾ ശ്വാസം കിട്ടാതെ രാത്രിയിൽ പിടയാൻ തുടങ്ങി. ചിലരുടെ ശരീരം പൊട്ടിപൊളിയാൻ ആരംഭിച്ചു. വേദനകൊണ്ട് പിഞ്ചു പൈതങ്ങൾ അലറികരഞ്ഞു. ഫാദറിന് ഡോക്ടറിന്റെ കുത്തിവെപ്പിൽ സംശയം തോന്നിയപ്പോൾ മായയോട് ഈകാര്യം സൂചിപ്പിച്ചു. മായ മറ്റ് രണ്ടുപേരോടും പറഞ്ഞു. അവർ രണ്ട് ദിവസത്തിനുള്ളിൽ അവിടേക്ക് വരാം എന്ന് പറഞ്ഞു. പക്ഷേ, അവർ അവിടെ എത്തുമ്പോഴേക്കും എല്ലാം തീർന്നിരുന്നു.

കാനഡയിലുള്ള ഒരു വൻ മയക്ക് മരുന്ന് ഡീലർമാരുമായി താൻ കണ്ടുപിടിച്ച ഹൈ ഡോസ് ഡ്രഗിന്റെ ഡീൽ ഉറപ്പിച്ചിരുന്നു ഡോക്ടർ അപ്പോഴേക്കും. കോടികളുടെ ബിസിനസ്...

താൻ കണ്ടുപിടിച്ച ആ ഹൈ ഡോസ് ഡ്രഗ് ഡോക്ടർ പരീക്ഷിച്ചത് അനാഥാലയത്തിലെ  പിഞ്ചു പൈതങ്ങളുടെ ശരീരത്തിലായിരുന്നു. നാൽപതോളം പിഞ്ചു പൈതങ്ങൾ വേദനകൊണ്ട് പിടഞ്ഞ് പിടഞ്ഞ് മരിച്ചു.

ആ കൊലപാതകം വെറുമൊരു ഫുഡ്‌ പോയ്സൺ ആക്കി മാറ്റാൻ ഡോക്ടർക്ക് കൂടുതൽ സമയം വേണ്ടിയിരുന്നില്ല. നിസ്സഹായരായ മൂന്നുപെണ്ണുങ്ങൾക്കും ഫാദറിനും ഒന്നും ചെയ്യാൻ കഴിഞ്ഞില്ല. നിയമത്തിന്റേയും പോലീസിന്റെയും വായ കാശുകൊണ്ട് ഡോക്ടർ മൂടിക്കെട്ടി.

ആരോരുമില്ലാത്ത അനാഥ കുട്ടികളെ കൊന്നത് ചോദിക്കാൻ ആരും വരില്ല എന്ന് കരുതിയിരിക്കുമ്പോഴാണ് രേഷ്മയും ആനിയും മായയും പ്രതികാരം ചെയ്യാൻ തന്റെ പിറകിലുണ്ട് എന്നകാര്യം ഡോക്ടർ മനസ്സിലാക്കുന്നത്. അപ്പോഴാണ് ഡോക്ടർ കളി മാറ്റി കളിക്കുന്നത്.

അവർ മൂന്നുപേരേയും എതിർത്ത് മാസ് കാണിച്ചാൽ തന്റെ എല്ലാ ക്രൂരതകളും സമൂഹം അറിയും എന്ന് മനസ്സിലാക്കിയ ഡോക്ടർ അങ്ങനെയുള്ള മണ്ടൻ കളിക്ക് നിന്നില്ല. ഡോക്ടർ ഒന്നും അറിയാത്ത പോലെ അവർ മൂന്ന് പെണ്ണുങ്ങൾക്കും മുന്നിലേക്ക് ചാടിക്കൊടുത്തു. ഡോക്ടറെ നിസ്സാരമായി കൊല്ലാം എന്ന് കരുതിയ മൂന്നുപേരും ഡോക്ടറുടെ കൈകൊണ്ട് കൊല്ലപ്പെട്ടു. എന്നിട്ട് അതൊക്കെ ആത്മഹത്യയാക്കി മാറ്റി സമൂഹത്തിന്റെ മുന്നിൽ ചോദ്യചിഹ്നമായി നിന്നു...

ആ ചോദ്യചിഹ്നമായിരുന്നു ഡോക്ടർക്ക് രക്ഷപ്പെടാനുള്ള വഴിയും. തന്റെ മയക്കുമരുന്ന് ബന്ധം ഒരിക്കലും പുറംലോകം അറിയാതിരിക്കാൻ ഡോക്ടർ ഭാര്യമാരുടെ ആത്മഹത്യക്ക് കാരണക്കാരനായവൻ എന്ന പേര് സമൂഹത്തിന് മുന്നിൽ ഉണ്ടാക്കി താൻ ചെയ്ത എല്ലാ പാപങ്ങളും ആ ചോദ്യചിഹ്നത്തിൽ കഴുകികളഞ്ഞു.

മൂന്ന് പെണ്ണുങ്ങളും കൊല്ലപ്പെടുമ്പോൾ അവിടേക്ക് ഒരു വലിയ പാർസൽ ബോക്സ്‌ വന്നിരുന്നു എന്ന് പറഞ്ഞതും മോർച്ചറിയിൽ നിന്നും മൂന്ന് ഡെഡ്ബോഡികൾ മാറ്റിവെച്ചതും മരിച്ചത് മൂന്ന് പെണ്ണുങ്ങളല്ല വേറെ ആരോ ആണ് എന്ന് ഉണ്ണി കരുതാനാണ്. അന്വേഷണം വഴിതെറ്റിക്കാൻ... വെറുമൊരു ആത്മഹത്യ പ്രേരണ കുറ്റത്തിന് സമൂഹം തന്നെ ഒറ്റപ്പെടുത്തുന്നത് ഡോക്ടർ ശരിക്കും ആസ്വദിക്കുകയായിരുന്നു... ഒരു ഭ്രാന്തനെപ്പോലെ...

ഫയലിന്റെ മുഴുവൻ പേജുകളും മറിഞ്ഞ് കഴിഞ്ഞു... ഉണ്ണി ഡോക്ടറുടെ കണ്ണിലേക്ക് നോക്കി

"ഇത്രയൊക്കെ ചെയ്ത് കൂട്ടിയിട്ട് നീയിപ്പോ എന്ത് നേടിയടാ നായേ"

പറഞ്ഞ് തീർന്നതും ഉണ്ണി അവന്റെ നെഞ്ച് നോക്കി ആഞ്ഞ് ചവിട്ടിയതും ഒരുമിച്ചായിരുന്നു. തെറിച്ച് വീണ ഡോക്ടർ മുട്ടിലിഴഞ്ഞ് വന്ന് ഉണ്ണിയുടെ കാലിൽ പിടിച്ച് കെഞ്ചി

"സാർ... സാർ.... എന്റെ... എന്റെ... സ്വപ്‌നങ്ങൾ ഇല്ലാതാക്കരുത്... കോടികൾ... കോടികൾ ഉണ്ട്... എന്റെ കയ്യിൽ... അതിൽ നിന്ന് എത്ര വേണേലും സാർ എടുത്തോ... പക്ഷേ... എന്റെ സ്വപ്‌നങ്ങൾ ഇല്ലാതാക്കരുത്"

കാലിൽ പിടിച്ച് കെഞ്ചുന്ന അവന്റെ തല നോക്കി തൊഴിച്ച് ഉണ്ണി അലറി

"പന്ന %₹#@മോനേ... എത്ര പിഞ്ചു മക്കളുടെ സ്വപ്‌നങ്ങളാണ്ടാ നീ ഇല്ലാണ്ടാക്കിയേ... പണം... അതിന് വേണ്ടിയല്ലേ നീ ഇതൊക്കെ ചെയ്ത് കൂട്ടിയേ... ആ പണം കൊണ്ട് നിനക്കൊരു ചായപോലും മേടിച്ച് കുടിക്കാനുള്ള യോഗമില്ല %%#@ മോനേ"

ഒന്ന് നിറുത്തിയിട്ട് ഉണ്ണി തന്റെ ചുറ്റിലുമുള്ള ശവക്കല്ലറയിലേക്ക് വിരൽ ചൂണ്ടി ഡോക്ടറിന്റെ കണ്ണിലേക്ക് നോക്കി

"ആരോരുമില്ലാത്ത ഈ കിടന്നുറങ്ങുന്ന പാവങ്ങൾക്ക് ചോദിക്കാനും പറയാനും ആരുമില്ലെന്ന് കരുതിയോടാ നീ... നിന്റെ പണത്തിന്റെ തുലാസിൽ തൂങ്ങാത്ത ആണുങ്ങളും ഈ നാട്ടിൽ ഉണ്ടെടാ %₹#@ മോനേ"

ഒന്ന് നിറുത്തിയിട്ട് ഉണ്ണി ഡോക്ടറെ നോക്കി

"ആ മൂന്ന് പെണ്ണുങ്ങൾ നിന്നെ ഇല്ലാതാക്കാൻ വരുന്നതിന് മുന്നേ എന്റെ അടുത്തേക്കാണ് വന്നിരുന്നതെങ്കിൽ നിന്റെ ശവക്കല്ലറയിൽ എന്നോ ആണി അടിച്ചേനേ ഞാൻ"

ഒരു മാസത്തിന് ശേഷം...

വാർത്താ ചാനലിൽ ചൂടുള്ള വാർത്ത

"മൂന്ന് പെണ്ണുങ്ങളുടെ ആത്മഹത്യകളിൽ പ്രതിയെന്ന് സംശയിച്ച് പോലീസ് അറസ്റ്റിൽ വെച്ച് ഒടുവിൽ നിരപരാധിയെന്ന് കണ്ട് കോടതി വെറുതേ വിട്ട ഡോക്ടറിനെ പുഴുവരിച്ച് മരിച്ച നിലയിൽ കണ്ടെത്തി"

 (അവസാനിച്ചു)

DOWNLOAD FOR PDF STORY CLICK HERE

📝 ഷാൻ കബീർ