🍁നീ മാത്രം🍁ഫുൾ പാർട്ട്🍁

🔷നീ മാത്രം!🔷ഫുൾ പാർട്ട്🔷

"" നീയ് ഉറങ്ങാണോ ?? ""

ഏടത്തിയുടെ വിരലുകളെന്റെ മുടിയിഴകളെ തഴുകിയപ്പോഴാണ് ഞാൻ കണ്ണു തുറന്നത്...

""" ചെറുങ്ങനെയൊന്ന് മയങ്ങിപ്പോയി... ഏടത്തി ഇത്ര വേഗം പോന്നോ? """

""" താലികെട്ടു കഴിഞ്ഞതും ഞാനിങ്ങ് പോന്നു.... എന്തോ, അവടെ നിൽക്കാൻ തോന്നീല്ല്യ....

അമ്മേം കൂടെ പുറപ്പെട്ടതാ... അച്ഛന്റെ കൂടെ വന്നാ മതീന്ന് പറഞ്ഞ് ഞാനവടെ പിടിച്ചു നിർത്തി....  ആര്ക്കും അതിനൊരു നീരസം തോന്നണ്ടാന്നു കരുതി... ഏട്ടനുംകൂടി കൂടാത്തതല്ലേ """ അത് പറയുമ്പോ ഏടത്തീടെ മുഖത്തിന് ഒരു വിഷാദഛായയുണ്ടായിരുന്നു.....

""" എങ്ങനേണ്ട് ജയേട്ടന്റെ പെണ്ണ്.... സുന്ദരിയായിരിക്കും ല്ലേ ??""" ഞാൻ ചോദിച്ചു...

""" ഉവ്വ്, ഞാനൊരു നോട്ടേ കണ്ടുള്ളൂ.... പിന്നെ കാണാനൊന്നും നിന്നില്ല്യ..... ആ സ്ഥാനത്ത് നെന്നെ മാത്രം സങ്കല്പിച്ചു വച്ചോണ്ടാവും , വീണ്ടും അങ്ങട്ട് നോക്കാൻ തോന്നീല്ല്യ...""" ഏടത്തിയുടെ മനസ്സിന്റെ വിങ്ങല്, ആ കണ്ണുകളിൽ പ്രതിഫലിച്ചു.....

അവരെന്റെ അരികിലായി വന്നിരുന്നു....

""" ന്നാലും, ഓർമ്മവെച്ചനാള് മുതല് സ്നേഹിച്ചു തുടങ്ങീതല്ലേ നിങ്ങള് രണ്ടാളും... ഇത്ര പെട്ടന്ന് എങ്ങന്യാ ആളോള്ക്ക് മാറാൻ കഴിയണേ...??

മനസ്സ് നോക്കിയല്ലേ പരസ്പരം സ്നേഹിക്കണ്ടേ, അല്ലാതെ മുഖം നോക്കീട്ടല്ലല്ലോ....""" ഏടത്തിയുടെ പതം പറച്ചില് കേട്ട് ഞാനൊന്നു ചിരിച്ചു....

""" സ്നേഹം മനസ്സിലാണെന്ന് പറഞ്ഞ്,  മുഖത്ത്ക്ക് നോക്കാതിരിക്കാൻ പറ്റ്വോ ന്റെ ഏടത്തീ....

പരസ്പരം കണ്ണില് നോക്കി സംസാരിച്ചാ പ്രണയം വരുംന്നാ ജയേട്ടൻ പറയാറ്.... ന്റെ മുഖത്തിപ്പോ കണ്ണെവിട്യാ ഇരിക്കണേന്ന് നിക്കെന്നെ നിശ്ചയല്യ.....

മാത്രല്ല, ജയേട്ടന് ന്റെ മുഖത്ത് നോക്കുമ്പോ ഇപ്പോ  പ്രണയല്ല പേടിയാത്രേ തോന്നാറ്...""" ഞാൻ വീണ്ടും ചിരിച്ചു...... 

ഒരു വരണ്ട ചിരി!

""" നീയൊന്നും കഴിച്ചില്യാലോ.... വാ നമുക്ക് ഒരുമിച്ചിരിക്കാം... ഞാനീ വേഷൊന്ന് മാറീട്ടു വരാം """

ഏടത്തി മുറിവിട്ടതും, അതുവരെ പിടിച്ചു നിർത്തിയതെല്ലാം ഒരു തേങ്ങലോടെ പുറത്തു വന്നു.....

ചുക്കിച്ചുളിഞ്ഞ് വികൃതമായ എന്റെ കവിളിലൂടെ, കണ്ണുനീർ താഴേക്ക് കുതിച്ചു ചാടി.....

ബാല്യവും കൗമാരവും കടന്ന് ഇന്ന് ഈ യൗവ്വനം വരേയും എന്റേതെന്നു മാത്രം കരുതിയിരുന്നൊരാൾ..... 

എന്റെ പ്രാണൻ....

ഇന്ന് ,,, തന്റെ താലിച്ചരടുകൊണ്ട് മറ്റൊരുവളെ ചേർത്തു പിടിച്ചിരിക്കുന്നു!

ആ മുഖത്തെ പുഞ്ചിരിയും,, ചില നേരത്തെ അധികാരഭാവവും,, മറ്റു ചിലപ്പോഴുള്ള മുൻ ശുണ്ഠിയുമെല്ലാം കണ്ണിൽ നിന്നും മാറാതെ എന്നെ ആഴത്തിൽ നോവിച്ചുകൊണ്ടിരിക്കുന്നു......

ഈ വേദന, മരണത്തേക്കാൾ കഠിനമാണെന്ന് തോന്നിപ്പോകുന്നെനിക്ക്.....

""" ദ്രുപേ വന്നോളൂട്ടോ.... ഊണ് എടുത്തു വച്ചേക്കണു """ ഏടത്തി വിളിച്ചു..

കണ്ണുകൾ അമർത്തിത്തുടച്ച് , ദുപ്പട്ടകൊണ്ട് മുഖമൊന്ന് ഒപ്പിയെടുത്ത് ഹാളിലേക്ക് ചെന്നു.....

""" ന്നാലും, ഇത് വല്യേ കഷ്ടായീട്ടോ ഏടത്തീ..

നല്ലൊരു സദ്യ വേണ്ടാന്നു വച്ച് ,, ഈ തൈരും മെഴുക്കുപുരട്ടീം കൂട്ടി ചോറുണ്ണാൻ വേണ്ടി തിരിച്ചു വന്നേക്കണു.....

മ്മടെ ഫേവറേറ്റ് പാലടപോലും വെറുതെ കളഞ്ഞില്ലേ ബുദ്ദൂസ്...""" ചോറുരുള വായിലേക്ക് വച്ചു കൊണ്ട് ഞാൻ കളിയായി പറഞ്ഞു....

""" നിക്ക് അതില് യാതൊരു വെഷമൂല്യാട്ടോ കുട്ടീ.... അല്ലേലും, ഊണിന് നിൽക്കില്യാന്ന് തീരുമാനിച്ചന്നേണ് ഞാനിവടന്ന് ഇറങ്ങീത്....

ഏട്ടനെ പോലെ, കല്യാണത്തിന് കൂടണില്യാന്നെന്നേണ് ആദ്യം കരുതീത്....

പിന്നെ അന്യരല്ലല്ലോ, അച്ഛൻ പെങ്ങളല്ലേന്നു വിചാരിച്ചാ ഇഷ്ടല്യാഞ്ഞിട്ടും ഉടുത്തൊരുങ്ങി പോയത്...."""" ഏടത്തി അനിഷ്ടത്തോടെ തന്നെ  മറുപടി തന്നു...

""" ഞാനും കൂടി വരണ്ടതായിരുന്നു ല്ലേ ഏടത്തീ """

""" ഉവ്വുവ്വ്... എന്നാപ്പിന്നെ,,  ഏട്ടൻ കുട്ടീനെ ബാക്കി വച്ചൂന്ന് വരില്ല്യ....

ന്നാലും എല്ലാരും തെരക്കീട്ടോ നെന്നെ.... എന്തേ വരാഞ്ഞേന്നു വരെ ചോദിച്ചു ചെലര്..

അല്ലേലും, പഴുപ്പടിഞ്ഞ വ്രണത്തില് പിന്നേം പിന്നേം കുത്തി നോവിക്കല് ചെലോര്ക്കൊരു രസാ...."""" ഏടത്തീടെ മുഖം ദേഷ്യംകൊണ്ട് ചുവന്നു

ഞാനൊന്നും പറഞ്ഞില്ല....

എങ്കിലും, വെറുതെയൊന്ന് ചിരിക്കാൻ ശ്രമിച്ചു.....

""" നിക്ക് ചെലപ്പോ തോന്നും, ഒക്കെ കരുതിക്കൂട്ടീട്ടാന്ന്.....""" ഏടത്തി, പെട്ടന്നതു പറഞ്ഞപ്പോ ഞാനൊന്നു ഞെട്ടി! 

""" അ...അതെന്താ ഏടത്തി അങ്ങനെ പറഞ്ഞേ??"""

""" അല്ല, അത്ര വേഗത്തിലായിരുന്നൂലോ ജയന്തൻ, ദ്രുപേനെ ഒഴിവാക്കീതും ഈ കല്യാണത്തിന് സമ്മതം പറഞ്ഞതും...."""

""" അത് എനിക്ക് ഈ അപകടം പറ്റീതോണ്ടല്ലേ ഏടത്തീ.... എന്റെ അഭിപ്രായത്തില് ജയേട്ടന്റെ തീരുമാനം തന്നെയാ ശരി...""" ഞാൻ കഴിക്കല് നിർത്തി എഴുനേറ്റു.

""" മതിയാക്ക്യോ നീയ്.... ??

നീയൊന്നും കഴിക്കണില്ലാന്ന് ദേവേട്ടൻ പരാതി പറയണുണ്ട് ട്ടോ ദ്രുപേ..."""

""" മതി ഏടത്തീ... വിശപ്പില്ലാഞ്ഞിട്ടാ""" 

കൈ കഴുകി, വീണ്ടും അവിടെത്തന്നെ വന്നിരുന്നു....

""" ഉള്ളില് തട്ടിയ സ്നേഹണ്ടെങ്കി, തളർന്നു വീണാൽ പോലും ഇട്ടേച്ചു പോവില്ല....

അങ്ങനേം എത്രപേര് ജീവിക്കണു ഈ ലോകത്ത്....

എന്നിട്ടാണ്, മുഖം ഇത്തിരിയൊന്ന് പൊള്ളീന്നും പറഞ്ഞ്, ഒക്കെ മതിയാക്കി പോയത് """ കക്ഷി, വിടാൻ ഭാവമില്ലായിരുന്നു.

""" അതിന്, എല്ലാരും ന്റെ ഏട്ടനെ പോലെ വിശാലമനസ്കരവാണ്ടേ ഗൗരിക്കുട്ട്യേ....""" ഞാൻ കുസൃതിയോടെ ഏടത്തിയുടെ ഇടംകയ്യിൽ തൊട്ടു..

""" വിശാലമനസ്സന്ന്യാ കുട്ടീടെ ഏട്ടന്....

അല്ലാച്ചാല്, ആരോരുല്യാത്ത വിവരോം വിദ്യാഭ്യാസോം ഇല്ലാത്ത നിക്കൊരു ജീവിതം തരാൻ വേറാരാ തയ്യാറാവാ...?

ഒരു  ജന്മം മുഴുവനും ആ കാൽചോട്ടില് കെടന്നാലും തീര്വോ നിക്ക് ആ മനുഷ്യനോടുള്ള കടപ്പാട്...."""

ഒരു തമാശ മാത്രം ഉദ്ധേശിച്ചാണ് ഞാനത് പറഞ്ഞതെങ്കിലും,,, ഏടത്തിയുടെ കണ്ണുകൾ നിറഞ്ഞൊഴുകിയിരുന്നു....

ഞാനേഴുനേറ്റ് അരികിലേക്കു ചെന്നു....

""" ഒരു തമാശ പറഞ്ഞതല്ലേ ന്റെ ഏടത്തിക്കുട്ട്യേ... അപ്പഴേക്കും കണ്ണു നിറച്ചാലോ....""" ഞാനാ കണ്ണുനീർ തുടച്ചെടുത്തു....

""" പഠിപ്പില്ലെങ്കിലെന്താ, ഏടത്തി ന്റെ ഏട്ടന്റെ ഭാഗ്യല്ലേ... ഏട്ടന്റെ മാത്രല്ല, ഈ വീടിന്റെ തന്നെ മഹാലക്ഷ്മിയല്ലേ ന്റെ  ഗൗര്യേടത്തി...""" താടിത്തുമ്പ്, പതിയെ പിടിച്ച് ഉലച്ചപ്പോ ഏടത്തിയുടെ കണ്ണുനീരൊക്കെ എങ്ങോ അലിഞ്ഞു പോയി..... 

ആ ചുണ്ടുകളിൽ ഒരു കുഞ്ഞുപുഞ്ചിരി മൊട്ടിട്ടു.....

""" ഒക്കെ ദൈവത്തിന്റെ ഓരോ പരീക്ഷണങ്ങളല്ലേ ഏടത്തീ.... സ്നേഹം, എത്ര ആത്മാർത്ഥമാണെന്നു പറഞ്ഞാലും,, ചെലപ്പോഴൊക്കെ നമ്മളും പാതിവഴിയിൽ വീണുപോകും....

നമ്മുടെ കൊതിയല്ലല്ലോ, അവന്റെ വിധിയല്ലേ പ്രധാനം! """"  ഏടത്തിയെ നോക്കിയൊന്ന് മന്ദഹസിച്ച്, ഞാൻ മുറിയിലേക്കു പോന്നു.....

മറ്റാരുടെ മുന്നിലും എന്റെ കണ്ണീരു വീഴാൻ പാടില്ലെന്ന വാശിയായിരുന്നു എനിക്ക്.....

       🔴🔴🔴🔴🔴🔴🔴🔴🔴🔴🔴🔴🔴

""" അത്ര വല്യേ സുന്ദരി എന്നൊന്നും പറയാനില്ല്യ, ഇത്തിരി നെറണ്ട് അതേ ഉള്ളൂ പറയാനായിട്ട്...""" കയറിവന്ന പാടേ അമ്മ പറഞ്ഞതും, എനിക്ക്  ചിരി വന്നു....

""" അതിലിത്തിരി കുശുമ്പ് ഇല്ലാതില്ലല്ലോ സുമത്യമ്മേ..."" ഞാൻ ചോദിച്ചു 

"" ഉള്ളതു പറഞ്ഞാ, കുശുമ്പാവണതെങ്ങനാ പെണ്ണേ....""

"" ഉവ്വുവ്വ്....

ഏടത്തി പറഞ്ഞൂലോ, നല്ല കുട്ട്യാന്ന്....""

""" അവളതിന്, ആരേലും പറ്റി കുറ്റം പറയണത് നീയ് കേട്ടിട്ടുണ്ടോ...."" അമ്മ പറഞ്ഞ ആ സത്യത്തെ ഞാനും ശരിവച്ചു....

ശുദ്ധഗതിക്കാരിയായ ഗൗര്യേടത്തി ഇന്നുവരെ ഒരാളേയും പറ്റി, നല്ലതല്ലാത്തതൊന്നും പറഞ്ഞു കേട്ടിട്ടില്ല!

ജയേട്ടനെന്നെ വേണ്ടെന്നു വച്ചപ്പോ മാത്രാണ്, ഏടത്തി ഇത്തിരി നീരസം പ്രകടിപ്പിച്ചത്....

മറ്റാരേക്കാളും, ജയേട്ടന്റെ പിൻമാറ്റം ഏടത്തിയെ വല്ലാതെ വേദനിപ്പിച്ചിരുന്നു.....

ഇപ്പോഴും എന്നെയോർത്ത്  ആ മനസ്സ് നീറുന്നത് ഞാനറിയുന്നുണ്ട്....

""" ഗൗര്യേ, അച്ഛനിത്തിരി വെള്ളങ്ങട്ട് എടുത്തോളൂ """  അച്ഛന്റെ ശബ്ദം കേട്ടപ്പോ ഞാൻ പൂമുഖത്തേക്കു ചെന്നു 

"""കല്യാണത്തിന് പോയിട്ട് അച്ഛനും, സദ്യ ബഹിഷ്കരിച്ചോ ?? "" ഞാൻ ചിരിച്ചു.

""" ഇല്ല കുട്ട്യേ, അച്ഛൻ കഴിച്ചു...

വെഷമണ്ടെന്ന് വച്ച് വിരോധം കാണിക്കാൻ പറ്റ്വോ,  ന്റെ ഒടപ്പിറന്നോളായിപ്പോയില്ലേ..""

അച്ഛൻ, കസേരയിലേക്ക് ചാഞ്ഞിരുന്നു...

"""എന്തിനാപ്പോ വിരോധം കാണിക്കണേ?

ഓരോരുത്തരുടെ ജീവിതം, അവരടെ അവകാശല്ലേ.....

നമ്മളെ ക്ഷണിച്ചാ നമ്മള് പോണം... സന്തോഷത്തോടെ പങ്കെടുക്കണം.... ഒരു ബന്ധം മുറിഞ്ഞു പോയതിന്, എല്ലാ ബന്ധങ്ങളും അറുത്തു കളയാൻ പാടുണ്ടോ""

ഞാൻ പറഞ്ഞു..

""" ദേവേട്ടൻ വന്നാ, എന്ത് പുകിലൊക്കെയാണാവോ ഉണ്ടാക്കാ... അതാ ന്റെ പേടി...

ആരും, ചെങ്ങോത്തേക്ക് പോകാൻ പാടില്ലാന്നായിരുന്നല്ലോ ഏട്ടന്റെ കല്പന! """ ഏടത്തി അച്ഛന് വെള്ളം നീട്ടിക്കൊണ്ട് പറഞ്ഞു..

അച്ഛനൊന്നും പറയാതെ,  വെള്ളം വാങ്ങിക്കുടിച്ച് ചാരിക്കിടന്നു.....

കൈകൾ നെഞ്ചിനെ ഉഴിയുന്നുണ്ടായിരുന്നു...

""" എന്തിനാ ഇങ്ങനെ വേദനിക്കണേ...

എന്നെ ഓർത്തിട്ടാണെങ്കി, അത് വേണ്ടാട്ടോ...

നിക്കൊരു വിഷമൂല്യ.... ദാ കണ്ടില്ലേ ഞാൻ ഹാപ്പിയാണ്.....""" എന്റെ കൈകൾ അച്ഛന്റെ കഴുത്തിനെ ചുറ്റിപ്പിടിച്ചു.

""" അച്ഛൻ കണ്ടുവോ ആ കുട്ടീനെ?? """

""" ഉം..."""

""നല്ല ചേർച്ചയായിരിക്കും ല്ലേ അവര് തമ്മില്?? ""

""" ദൈവം ചേർത്തു വച്ചതിനെ കുറിച്ച് നമ്മളെന്തു പറയാനാ മോളേ... ഒക്കെ അവന്റെ തീരുമാനങ്ങളല്ലേ.....""

വരാനിരിക്കുന്ന ചോദ്യങ്ങളെയെല്ലാം, ആ ഒരൊറ്റ ഉത്തരം കൊണ്ട് അച്ഛൻ തളച്ചിടുകയായിരുന്നു!

അച്ഛൻ അങ്ങനെയാണ്....

എല്ലാം ദൈവഹിതമാണെന്ന് മാത്രം വിശ്വസിക്കാനാണ് അച്ഛനിഷ്ടം....

     🔴🔴🔴🔴🔴🔴🔴🔴🔴🔴🔴🔴🔴

ഒരുപാട് നാളുകൾക്ക് ശേഷമാണ്,  ഞാനെന്നെ തന്നെ നേരിൽ കാണുന്നത്....

വിരൂപമായ എന്റെ മുഖത്തിന്റെ വലതുവശം

ഞാൻ കൈകൊണ്ട് തടവി നോക്കി.....

ഇപ്പോഴും നേരിയൊരു വേദനയുണ്ട്.....

വലതുകണ്ണിന്റെ കാഴ്ച എനിക്കിന്ന് അന്യമാണ്....

ഈ ക്രൂരത ഏറ്റുവാങ്ങാൻ മാത്രം,  ഞാൻ ചെയ്ത പാപത്തിന്റെ വ്യാപ്തിയെനിക്ക് എത്രയാലോചിച്ചിട്ടും മനസ്സിലായില്ല! 

""" എന്നാലും, ആസിഡ് മുഖത്തൊഴിക്കാൻ മാത്രം, നിന്നോട് ആർക്കാ ദ്രൗപതീ ഇത്ര വിദ്വേഷം?? """

പലയാവർത്തി പലരിൽ നിന്നുമായി കേൾക്കേണ്ടി വന്ന ചോദ്യം....

ഞാൻ മൗനം കൊണ്ട് മറുപടി നൽകി...

മുഖം മറച്ച ആ അജ്ഞാതൻ, എന്റെ ഉത്തരത്തേയും മറച്ചുപിടിച്ചിരുന്നു....

""" എനിക്കിനി അവളെ വിവാഹം കഴിക്കാൻ ബുദ്ധിമുട്ടുണ്ട് അമ്മാവാ.....

എന്നോടൊന്നും തോന്നരുത്.... എങ്ങനെയാ ഞാനവളെ മറ്റുള്ളവരുടെ മുന്നിലിനി കൊണ്ടു നടക്കാ..... """ ജയേട്ടന്റെ വാക്കുകളായിരുന്നു എന്റെ ഹൃദയത്തെകൂടി പൊള്ളിച്ചു കളഞ്ഞത്.....

""" തളരുന്ന സമയത്ത് താങ്ങാവേണ്ട നീ,  എന്റെ കുട്ടിയെ ഉപേക്ഷിച്ചു പോവാണോടാ ജയന്താ.....

ഇതിനായിരുന്നോടാ ഈ കണ്ട കാലമത്രയും നീയവൾക്ക് ആശ കൊടുത്തത് ?? """ ഏട്ടന്റെ വെറുങ്ങലിച്ച ശബ്ദം ഞാൻ, മുറിയിലിരുന്ന് കേട്ടു...

"" സ്നേഹിച്ചിരുന്നെന്നു പറഞ്ഞ്, അതൊരു ബാധ്യതയായി കൊണ്ടുനടക്കാൻ പറ്റില്ലല്ലോ ദേവേട്ടാ.... 

എനിക്ക്... എനിക്കിനി ദ്രുപേനെ വേണ്ട...

ആര് മനസ്സിലാക്കിയില്ലേലും അവൾക്കെന്നെ മനസ്സിലാവും...."""

കൂടുതലൊന്നും പറയാതെ, പടികടന്നു പോകുന്ന ജയേട്ടനെ ഞാൻ, ജനലഴികൾക്കിടയിലൂടെ നോക്കിക്കണ്ടു.....

ചുട്ടുപൊള്ളുന്ന കവിൾത്തടത്തിലൂടെ, എന്റെ കണ്ണുനീരിനെ ഒഴുക്കിക്കളയാൻ പോലും പേടിച്ചിരുന്നു ഞാനപ്പോൾ...

'പ്രണയം' എത്രപെട്ടന്നാണ് 'ബാധ്യത' എന്ന മറ്റൊരു വാക്കിലേക്ക് പരിവർത്തനം ചെയ്യപ്പെട്ടതെന്ന് ഞാനോർത്തുപോയി....

" ഇരു ശരീരങ്ങളുടെ ഒത്തുചേരലല്ല ദ്രുപേ പ്രണയം... 

പ്രണയം,, പൂത്തുലയുന്ന രണ്ടു മനസ്സുകളുടെ ഒന്നുചേരലാണ്..... 

ആ ഒത്തുചേരലിലൂടെ സാധ്യമാകുന്ന നല്ലൊരു ജീവിതമാണ്.....

നമ്മൾ സ്വപ്നം കാണുന്ന അതേ സുന്ദരമായൊരു ജീവിതം..."

ജയേട്ടൻ, എപ്പഴോ എന്റെ കാതിൽ മൊഴിഞ്ഞ വാക്കുകൾ അന്നെന്നെ കുളിരണിയിപ്പിച്ചിരുന്നെങ്കിൽ,,, ഇന്നതെന്റെ ഹൃദയത്തെ കുത്തി മുറിവേൽപ്പിക്കുന്നു....

     🔴🔴🔴🔴🔴🔴🔴🔴🔴🔴🔴🔴🔴

""" ഇവടന്നാരും ചെങ്ങോത്തേക്ക് പോകരുതെന്ന് പറഞ്ഞതല്ലേ ഞാൻ.... പിന്നെന്തിനാ,  ഇവളെ ഇവടെ തനിച്ചാക്കി എല്ലാരും കൂടി പോയത് ??

നമ്മടെ കുട്ടീടെ കണ്ണീരു വീഴ്ത്തിട്ടാ അവിടെയിന്ന് കല്യാണപ്പന്തല് പൊങ്ങീത്....

മറന്നോ എല്ലാരും ?? """ വന്നയുടനെ ഏട്ടൻ വിചാരണ തുടങ്ങിയിരുന്നു...

"" ഇനിക്കൊരു താൽപര്യോം ണ്ടായിട്ടല്ല, നെന്റെ അച്ഛൻ നിർബന്ധിച്ചോണ്ട് മാത്രാ ഒന്നു പോയി തലകാണിച്ചത്..""അമ്മ പറഞ്ഞു

""" ജയന്തൻ കാണിച്ച നെറികേടിന്, മറ്റുള്ളോര് എന്തു പിഴച്ചു ദേവാ....

നെന്റെ അമ്മായി, അവളടെ സങ്കടം ഞാനല്ലാണ്ട് വേറാരാ കാണാൻ.... ഇന്നുംകൂടി കൊറേ കരഞ്ഞു പാവം..!"" അച്ഛൻ പറഞ്ഞപ്പോ ഏട്ടൻ പിന്നൊന്നും മിണ്ടിയില്ല...

അല്ലേലും അച്ഛനെ എതിർത്ത് ശീലല്യല്ലോ ഏട്ടന്...

""" കഴിഞ്ഞോ വിസ്താരൊക്കെ ??

ന്റെ ഏട്ടാ,, ഇങ്ങനെ ദേഷ്യപ്പെടാൻ മാത്രം എന്താ ണ്ടായേ... ഞാനും കൂടി നിർബന്ധിച്ചിട്ടാ എല്ലാരും പോയേ....

വയ്യായ്ക തോന്നി, അല്ലേൽ ഞാനും  പോയേനെ കല്യാണത്തിന്.."" 

ഞാനതു പറഞ്ഞതും ഏട്ടനെന്നെ നോക്കി കണ്ണുരുട്ടി...

പിന്നെ, എന്നോട് ചേർന്നിരുന്ന് എന്റെ നെറുകിൽ പതിയെ തലോടി..... ഞാൻ ഏട്ടന്റെ മാറിലേക്ക് ചാഞ്ഞു കിടന്നു....

""നമ്മളെ വേണ്ടാത്തോരെ നമുക്കും വേണ്ട...

എന്റെ മോൾക്ക്, ഏട്ടൻ കണ്ടുപിടിച്ചു തരും നല്ലൊരു ചെക്കനെ....

ഈ നാട്, ഇതുവരെ കാണാത്ത രീതിയിൽ ഏട്ടൻ നിങ്ങടെ കല്യാണം നടത്തും....

എന്റെ കുട്ടി വിഷമിക്കരുത് ട്ടോ...""

അത് പറയുമ്പോ ഏട്ടന്റെ ഉള്ള് പിടയ്ക്കുന്നത് ഞാനറിയുന്നുണ്ടായിരുന്നു....

ഞാൻ ആ മുഖത്തേക്ക് നോക്കിയില്ല....

നോക്കിയാൽ ചിലപ്പോ,, അടക്കി വച്ചതെല്ലാം ഒരുനിമിഷം കൊണ്ട് ചിതറിത്തെറിക്കും....

ന്റെ ഏട്ടന്റെ കണ്ണീരെനിക്ക് കാണേണ്ടി വരും.....

അതു വയ്യ.....

മറ്റെന്തിനേക്കാളും വേദനയാണെനിക്കത്....

എനിക്കു വേണ്ടി, ഒരായുസ്സിന്റെ സൂര്യതാപം മുഴുവനും ,, കുറഞ്ഞ ദിവസങ്ങൾ കൊണ്ട് നെഞ്ചിലേറ്റിയിട്ടുണ്ട് എന്റെ ഏട്ടൻ.....

"" എനിക്കൊരു സങ്കടൂല്യ....

എന്നെ കുറിച്ചോർത്ത് മറ്റാരും സങ്കടപ്പെടുത്താതിരുന്നാ മതി.... 

ഞാൻ.... ഞാനിവിടെ ഇങ്ങനൊക്കെ കഴിഞ്ഞോളാം ദേവേട്ടാ.... ""

നിയന്ത്രണം വിട്ടുപോയി....

ഞാൻ, പൊട്ടിക്കരഞ്ഞു പോയി.....

ഏട്ടൻ, ഏത് രാജകുമാരനെ കൊണ്ടു വന്നാലും എനിക്കിനി ഈ ജന്മം കൂടെ ജീവിക്കാൻ കഴിയില്ലെന്ന് ഞാനെങ്ങന്യാ ന്റെ ഏട്ടനോട് പറയാ....

കുഞ്ഞുനാള് മുതല് എന്റെ മനസ്സില് പ്രതിഷ്ഠിച്ച ആ മനുഷ്യനെ, ഇനിയുമെനിക്ക് മറക്കാനായിട്ടില്ലെന്ന് എനിക്ക് പറയാൻ കഴിയോ??

ആരെങ്കിലും ആ സത്യത്തെ അംഗീകരിച്ചു തരോ??

ദ്രൗപതീടേ മനസ്സിന്റെ മണ്ണില് മുളപൊട്ടിയ, ജയന്തനെന്ന പ്രണയപുഷ്പം, ഈ കൊടിയ വേനലിലും വാടാതെ നിലകൊള്ളുന്നത്,,,

എന്റെ സ്നേഹത്തിന്റെ നീരൊഴുക്കിനാൽ മാത്രമാണെന്ന് അവർക്കറിയില്ലല്ലോ....!

2

നീ മാത്രം!

""" കമ്പനീല് പുതിയ സ്റ്റാഫ് വന്നിട്ടുണ്ട്, അനസൂയ!

ആണുങ്ങളെല്ലാം ഇപ്പോ അവളുടെ പിറകേയാ..""" 

കഴിഞ്ഞ പ്രാവശ്യം സ്റ്റഡി ലീവിനു വന്നപ്പോ ജയേട്ടൻ പറഞ്ഞ പുതിയ വിശേഷം അവളെ കുറിച്ചായിരുന്നു...

""" എല്ലാ ആണുങ്ങളും എന്ന് പറയുമ്പോ ജയേട്ടനും പെട്വോ അതില്?? ""

""" പിന്നല്ലാതെ...

ഞാനും ഒരാണല്ലേ... സുന്ദരിയായൊരു പെണ്ണ് മുന്നിലിങ്ങനെ നിറഞ്ഞു നിൽക്കുമ്പോ എങ്ങനെയാ നോക്കാതിരിക്ക്യാ..""" തമാശയായിട്ടു പറഞ്ഞതാണെന്ന് അറിയാമെങ്കിലും,, ജയേട്ടൻ മറ്റൊരു പെണ്ണിനെ കുറിച്ച് പറയുന്നതു പോലും എനിക്ക് ദഹിക്കില്ലായിരുന്നു....

ഞാൻ മുഖം വീർപ്പിച്ചു....

""" എന്റെ പെണ്ണേ, ഞാനൊരു തമാശ പറഞ്ഞതല്ലേ... നിന്നെയല്ലാതെ വേറൊരു പെണ്ണിനെ കുറിച്ച് ചിന്തിക്കാൻ പോലും നിന്റെ ജയേട്ടന് കഴിയുംന്ന് നിനക്ക് തോന്നുന്നുണ്ടോ ?? """

"" അങ്ങനെ വല്ലതും സംഭവിച്ചാ,, കാവിലെ ഭഗവതിയാണേ, ഒരു മുഴം കയറിൽ ന്റെ  ജീവിതം അവസാനിപ്പിച്ചിരിക്കും ഈ ദ്രുപ!""  

എന്റെ കണ്ണു നിറഞ്ഞു കണ്ടപ്പോ ജയേട്ടനെന്നേട് ചേർന്നിരുന്നു... ആ കണ്ണുകൾ എന്റെ കണ്ണുകളുമായി കോർത്തു വലിച്ചു...

""" അങ്ങനെ കൈവിട്ടു കളയോ ഞാൻ, എന്റെ ദ്രുപേനെ...

നിന്നെ വെടിഞ്ഞിട്ട് ജയേട്ടന് വേറൊരു  ജീവിതം ണ്ടാവോ മോളേ..."""

പതിയെ, ആ അധരങ്ങളെന്റെ നെറുകിൽ മുത്തം ചാർത്തിയപ്പോൾ,, നാണത്താൽ കൂമ്പിയടഞ്ഞിരുന്നു എന്റെ മിഴികൾ.....

""" ഒന്നു പോയേ ജയേട്ടാ, ആരേലും കാണൂട്ടോ.."""

ജയേട്ടനെ തള്ളിമാറ്റി, കൊലുസിന്റെ താളത്താൽ ഞാനോടിയകന്നപ്പോൾ ,,, പ്രണയാതുരനായി ഏട്ടനെന്നെതന്നെ നോക്കി നിൽപ്പുണ്ടായിരുന്നു.....

 """ ദ്രുപേ..."""

ഏടത്തിയുടെ വിളിയാണെന്നെ ചിന്തകളിൽ നിന്നുണർത്തിയത്.....

""" അവടെ പൂമുഖത്ത് ചിലരൊക്കെ വന്നിട്ടുണ്ട് """ ഏടത്തി പറഞ്ഞു 

"""ആരാ ഏടത്തീ?? ""

""" അമ്മാവനും അമ്മായീം പിന്നെ.... ജയന്തന്റെ ഭാര്യേം ണ്ട് """

"""ഉവ്വോ...അവരൊക്കെ വന്നിട്ട് ഒരുപാട് നേരായോ... ഞാനൊന്നും അറിഞ്ഞില്യ """

""" കണ്ണടച്ചു കെടക്കണ കണ്ടപ്പോ ഉറങ്ങാന്നു കരുതി... പിന്നെ, ഓടിപ്പിടിച്ച് ചെല്ലേണ്ട കാര്യൊന്നൂല്ലാന്നു തോന്നി  അതാ വിളിക്കാഞ്ഞേ "" ഏടത്തിയുടെ പരിഭവം മാഞ്ഞു പോയിരുന്നില്ല! 

"" ജയനോട് മോളേം കൂട്ടി വരാൻ പറഞ്ഞപ്പോ അവനൊരു മടി പോലെ... അതോണ്ടാ ഞങ്ങളു തന്നെ ഇറങ്ങീത് "" അമ്മായി, അമ്മയോട് പറയുന്നത് കേട്ടു... അമ്മ പക്ഷേ, മറുപടിയൊന്നും പറഞ്ഞു കേട്ടില്ല! 

എനിക്ക് ജയേട്ടന്റെ പെണ്ണിനെ കാണാൻ തിടുക്കം തോന്നിയെങ്കിലും,, നീ അങ്ങോട്ടു പോയി കാണേണ്ട ആവശ്യമില്ലെന്ന് പറഞ്ഞ് ഏടത്തിയെന്നെ തടഞ്ഞു....

""" നെന്നെ കാണണം എന്നുള്ളോര് ഇങ്ങട്ട് വരും... നീയ് കെടക്കാണെന്ന് ഞാൻ പറഞ്ഞേക്കണു """ എന്ന് പറഞ്ഞ് ഏടത്തി പോയി..

മുറിയിൽ തനിച്ചായപ്പോ, ഞാൻ വീണ്ടും ചിന്തകളിലേക്ക് ഊളിയിട്ടു....

""" എന്റെ ദ്രുപേ, നീ കോളേജിലൊക്കെ പോകുന്നുണ്ടെന്ന് പറഞ്ഞിട്ട് എന്താ കാര്യം.. നിനക്ക് കുറച്ചു മോഡേണായിട്ടൊക്കെ നടന്നൂടെ ?? 

ജീൻസും ടോപ്പൊക്കെയല്ലേ ഇപ്പോഴത്തെ ട്രെന്‍ഡ് ""

പറഞ്ഞത് ജയേട്ടനായതു കൊണ്ട് ഞാൻ ആശ്ചര്യപ്പെടാതിരുന്നില്ല!

'പെണ്ണ്, പെണ്ണായി തന്നെ  നടക്കണം' എന്ന് വായ്ക്കു വായ്ക്കു പറയുന്ന ആളാണ് ഇപ്പോ മോഡേൺവേഷത്തെ കുറിച്ച് സംസാരിക്കുന്നത്....

""" ജയേട്ടനിത് എന്താ പറ്റ്യേ? 

ങും... കാണണുണ്ട് ഞാൻ, കുറച്ചീസായിട്ടുള്ള ഈ മാറ്റം....

ഞാൻ, അടുത്തില്ലാന്നു കരുതി ഒന്നും അതറിയുന്നില്ലെന്നു കരുതണ്ടാട്ടോ...""" 

ഞാൻ പറഞ്ഞതും, അന്നാദ്യമായി ജയേട്ടനിൽ പുതിയ ഭാവ ഭേദങ്ങൾ ഞാൻ കണ്ടു...

""" നോക്ക് ദ്രുപേ,  എന്നും ഒരാള്‍ക്ക് ഒരുപോലെ ജീവിക്കാൻ കഴിഞ്ഞൂന്ന് വരില്ല! കാലം മാറുന്തോറും മനുഷ്യരിലും മാറ്റം വരും, വരണം...! അല്ലാതെ, എന്നും നിന്നെ പോലെ പഴഞ്ചനായി ജീവിക്കാനൊക്കില്ലല്ലോ "" ആ സ്വരമൊന്ന് മാറുന്നത്, എനിക്കെന്നും നൊമ്പരമാണല്ലോ....

എന്റെ കണ്ണുകൾ നിറഞ്ഞു തുടങ്ങി....

"" ദാ, ഇതാണെനിക്ക് തീരെ പിടിക്കാത്തത്... എന്തു പറഞ്ഞാലും, ഉടനെയുള്ള ഈ കണ്ണീര്... ഇങ്ങനെ കരയാൻ, നീയെന്താ  നഴ്സറി കുട്ടിയാണെന്നാ വിചാരം??

പെണ്ണായാൽ കുറച്ചൊക്കെ ബോൾഡാവണം

അല്ലാതെ...""" എന്നെ ആശ്വസിപ്പിക്കുന്നതിനു പകരം കൂടുതൽ വേദനിപ്പിച്ചു കൊണ്ട്, ദേഷ്യത്തോടെ ജയേട്ടനെന്നെ കടന്നു പോയി....

ഞാനാകെ തകർകന്നു പോയിരുന്നു! 

അനസൂയ!

അവൾ, ജയേട്ടന്റെ ഹൃദയത്തിൽ സ്വാധീനം ചെലുത്തിത്തുടങ്ങിയെന്ന് എനിക്ക് വിശ്വസിക്കാൻ കഴിയുമായിരുന്നില്ല....

വർഷങ്ങളായി എന്റെ പ്രണയത്തെ മാത്രം മനസ്സിൽ സൂക്ഷിച്ച ജയേട്ടന്, കുറച്ചു നാളുകൾ മാത്രം പരിചയമുള്ള മറ്റൊരുവളെ മനസ്സിൽ പ്രതിഷ്ഠിക്കാൻ കഴിയില്ലെന്ന് ഞാൻ അന്ധമായി വിശ്വസിച്ചിരുന്നു....!

""" ഉറക്കം കഴിഞ്ഞോ ദ്രൗപതീടെ? "" 

അപരിചിതമായൊരു ശബ്ദം, വീണ്ടുമെന്റെ ചിന്തകൾക്ക് ഭംഗം വരുത്തിയപ്പോൾ,, ഞാൻ എഴുനേറ്റിരുന്നു....

"" മനസ്സിലായോ എന്നെ?? """ അവർ ചോദിച്ചു 

""" അനസൂയ, ജയേട്ടന്റെ...."" 

""" വാട്ട് എ സർപ്രൈസ്!

ഒരിക്കൽ പോലും കാണാതെ, ഇതെങ്ങനെ ഇത്ര കൃത്യമായി..??  """

""" കണ്ടിട്ടില്ലെങ്കിലും, പറഞ്ഞു കേട്ടിട്ടുണ്ടല്ലോ ഒരുപാട്.... 

പറഞ്ഞതു പോലെതന്നെ! ഒരു മാറ്റവും ഇല്ല...

വളരെ കൃത്യമായ വർണ്ണന""" ഞാൻ, പുഞ്ചിരിയോടെ മറുപടി കൊടുത്തു.

കൂടെ, അവരും ചിരിച്ചു....

""" എനി വേ, കൺഗ്രാജുലേഷൻസ്....

വിവാഹ ദിവസം തരേണ്ടതായിരുന്നു അതിന് കഴിഞ്ഞില്ല..."" ഞാനവരുടെ വലം കയ്യിൽ പിടിച്ചു....

അവരുടെ ഉള്ളം കയ്യിന്, വല്ലാത്തൊരു ചൂടുണ്ടെന്ന്  തോന്നിപ്പോയെനിക്ക്....

""" ദ്രൗപതിയെ കുറിച്ച്,  ജയന്തനും പറഞ്ഞിട്ടുണ്ട് ഒരുപാടൊക്കെ.... പറഞ്ഞു കേട്ടതിനേക്കാൾ ബ്യൂട്ടിഫുളാണു താൻ.....""

വേദിയിൽ ഗംഭീര പ്രകടനം കാഴ്ചവെച്ചിട്ടും, സമ്മാനം ലഭിക്കാതെ പോകുന്നൊരു കുട്ടിക്ക് വിഷമം മാറ്റാൻ വേണ്ടി മാത്രം നൽകുന്ന ചെറിയൊരു പ്രോത്സാഹന സമ്മാനം!

അതേ അനുഭവമായിരുന്നു, അനസൂയയുടെ പ്രശംസ എനിക്കും നേടിത്തന്നത്...

ഞാനൊന്നു ചിരിച്ചു...

മനസ്സറിയാത്ത ഈ ചിരി, ഇന്നെന്റെ ജീവിതത്തിൽ പലപ്പോഴായി കടന്നു വരാറുണ്ട്!

ഞാൻ, വെറുതെ പുറത്തേക്കൊന്നു നോക്കി..

മുറ്റത്ത് ജയേട്ടന്റെ കാറ് കിടപ്പുണ്ട്...

""" ജയേട്ടനും വന്നിട്ടുണ്ടോ??""" ഞാൻ സംശയത്തോടെ ചോദിച്ചു 

""" ഇല്ല...ജയന്തന് , തന്നെ ഫേസ് ചെയ്യാൻ ഭയങ്കര മടി.... """

"" കാറ്... കാറ് കണ്ടപ്പോ ചോദിച്ചു എന്നേള്ളൂ"" 

""" ഓഹ്, അതിന്റെ ഡ്രൈവർ ഞാനാ..

അങ്കിളിന് ചെറിയൊരു ബുദ്ധിമുട്ട് ഉണ്ടായിരുന്നു എന്റെ കൂടെ കാറിൽ വരാൻ.. ബട്ട് ആന്റിക്ക് നല്ല ഇൻട്രസ്റ്റായിരുന്നു കേട്ടോ"" അവർ, ഇത്തിരി ഉറക്കെ തന്നെ ചിരിച്ചു....

""" പരിചയപ്പെട്ടു കഴിഞ്ഞെങ്കി, നമുക്ക് ഇറങ്ങ്യാലോ മോളേ....

അധികം വൈകിക്കാൻ നിക്കണ്ട, നിങ്ങക്ക് ഇനീം കൊറേ സ്ഥലം പോകാന്ള്ളതല്ലേ""" അമ്മായി, മുറിയിലേക്കു വന്നുകൊണ്ട് പറഞ്ഞു.

എന്റെ മുന്നീന്ന്, എത്രയും വേഗം ഓടി രക്ഷപ്പെടാനൊരു വ്യഗ്രത കാട്ടും പോലെയാണ് എനിക്കു തോന്നിയത്.....

"""മോള്ക്ക് സുഖല്ലേ? """ വെറുതെയൊരു ചോദ്യം!

""" മ്ഹ്.."" ഞാൻ തലയനക്കി...

അമ്മാവനെ കാണണം എന്നുണ്ടായിരുന്നു... എന്നാലും പോയില്ല! 

എന്നെ കാണാനുള്ള മനപ്രയാസം കാണും.. അതാ മുറിയിലേക്കു വരാതിരിക്കുന്നത്....

""" ഞങ്ങളിറങ്ങട്ടെ..""" പുറത്തെ യാത്ര പറച്ചിലിന് ഞാൻ കാതോർത്തു....

അവരിറങ്ങാൻ നേരത്താണ്, ഏട്ടനും വന്നത്..

""" അമ്മാവനെപ്പോ വന്നു? """ താല്പര്യമേതുമില്ലാത്ത ഏട്ടന്റെ ചോദ്യത്തിന്,  "കുറച്ചു നേരായി" എന്ന് അമ്മാവനും മറുപടി  പറഞ്ഞു...

അമ്മായിയെ ഒന്നു നോക്കി അകത്തേക്കു കയറിയ ഏട്ടൻ, അനസൂയയെ ഗൗനിച്ചതേയില്ല!

"" ഒന്നു നോക്കേലും ചെയ്യാർന്നില്ലേ ആ കുട്ടീനെ?

ആദ്യായിട്ട് വന്നിട്ട്, അതിനെന്താ തോന്നാ.."" ഏടത്തി, ഏട്ടനോട് അടക്കം പറഞ്ഞതും,, ഏട്ടൻ തറപ്പിച്ചൊന്ന് നോക്കുന്നതു കണ്ടു..

""" ഞാൻ നോക്കിയില്ലെങ്കിലെന്താ, നിങ്ങളൊക്കെ നന്നായി സൽക്കരിച്ചു കാണൂലോ ല്ലേ"" ഏട്ടൻ പറഞ്ഞത് ഉച്ചത്തിലായതുകൊണ്ട്, വന്നവർ കേട്ടു കാണുമോ എന്ന ആശങ്ക ഏടത്തിയുടെ മുഖത്തുണ്ടായിരുന്നു....

""" എന്തിനാ ദേവേട്ടാ ഇത്രയ്ക്കൊക്കെ ദേഷ്യം ?

നിക്ക് തോന്നണത്, ഈ ബന്ധം ഒഴിഞ്ഞു പോയത് ദ്രുപേടെ ഭാഗ്യാന്നാ....

അല്ലെങ്കി പിന്നെ ആരോടും ഇതുവരെ ഒരു തെറ്റും ചെയ്യാത്ത നമ്മടെ കുട്ടിക്ക് ഇങ്ങനൊരു പരീക്ഷണം ദൈവം കൊടുക്കുമായിരുന്നോ.....

അതിനു മാത്രം ക്രൂരതയൊന്നും ദൈവം ദ്രുപോട് കാട്ടില്യ.....

അവനെന്തോ ഒന്ന് നിശ്ചയിച്ചിട്ട്ണ്ട്.....

കുട്ടീടെ നന്മ മാത്രം നിശ്ചയിച്ചിട്ടുള്ള എന്തോ ഒന്ന് ""

""" ഗൗരിമോള് പറഞ്ഞതാ അതിന്റെ ശരി!

ഒന്നും കാണാതെ, ആരേയും ശിക്ഷിക്കുന്നവനല്ലല്ലോ ഭഗവാൻ.... 

എല്ലാത്തിനുമുള്ള ഉത്തരം, അവൻ കുറിച്ചു വച്ചിട്ടുണ്ടാവും..""" ഏടത്തിയുടെ അഭിപ്രായത്തെ ശരിവക്കുന്നതായിരുന്നു അച്ഛന്റെ വാക്കുകൾ.....

"" എന്നാലും, അമ്മായീടെ മുഖത്ത് ഇത്തിരി പോലും, മനപ്രയാസം ഉള്ളതായി തോന്നണില്ലാട്ടോ.... 

മരുമോളെ, അമ്മായിക്ക് നല്ലോണം ബോധിച്ച മട്ടുണ്ട്.."" ഏടത്തി പറഞ്ഞു.

""" പറഞ്ഞാ നിങ്ങടെ അച്ഛന് ഇഷ്ടാവില്യ.. ന്നാലും പറയാ, ന്റെ നാത്തൂന് അല്ലേലും പുളിങ്കൊമ്പ് കണ്ടാ ഇത്തിരി ഭ്രമം തന്ന്യാ....

ഇതിപ്പോ എല്ലാം തെകഞ്ഞിട്ടല്ലേ കിട്ടിയേക്കണേ....

കാറല്ല, വേണെങ്കി ബസെന്നെ ഓടിക്കുംന്നാ നാത്തൂൻ പറഞ്ഞത് മരുമോളെ പറ്റി..""" അമ്മ ചുണ്ടു കോട്ടിക്കൊണ്ട് പറയുന്നുണ്ടായിരുന്നു....

എല്ലാം കേട്ടു നിൽക്കുമ്പോഴും, എന്റെ മനസ്സ് ഒരിക്കൽപോലും ഞാൻ കാണാനാഗ്രഹിക്കാത്ത,, ആ കാഴ്ചയിൽ തന്നെ ഉടക്കി നിൽക്കുകയായിരുന്നു!

       ⭐⭐⭐⭐⭐⭐⭐⭐⭐⭐⭐⭐

പരീക്ഷയായിരുന്നിട്ടുകൂടി, ഒന്നിലും ശ്രദ്ധിക്കാൻ പറ്റാത്ത അവസ്ഥയിലായിരുന്നു ഞാൻ....

ജയേട്ടൻ വിളിച്ചിട്ട് രണ്ടു ദിവസമായി! 

അങ്ങോട്ടു വിളിക്കാനാണേൽ, ഫോൺ സ്വിച്ച് ഓഫും....

വീട്ടിലേക്കു വന്നിട്ട് കുറച്ചു ദിവസായീന്ന്, ഇന്നലെ വിളിച്ചപ്പോ ഏടത്തി പറഞ്ഞിരുന്നു....

എത്ര ജോലിത്തിരക്ക് ഉണ്ടെന്നു പറഞ്ഞാലും, ഒരു നേരമെങ്കിലും എന്നെ വിളിക്കാതിരുന്നിട്ടില്ല ഇതുവരെ....

പരീക്ഷ കഴിയാൻ കാത്തിരിക്കുകയായിരുന്നു ഞാൻ....

ആരോടും, ശരിക്കൊന്ന് യാത്ര പറയാൻ പോലും നിൽക്കാതെ തിരിച്ചു പോരുകയായിരുന്നു!

നേരെ ചെന്നത് ചെങ്ങോത്തേക്കാണ്....

ജയേട്ടനെ തിരക്കിയപ്പോ അറിയാൻ കഴിഞ്ഞത്, ആള് നാല് ദിവസായിട്ട് നാട്ടിലില്ല എന്നാണ്....

"" കമ്പനിക്കാര്യത്തിന് വേണ്ടി പോയിരിക്ക്യാ..

സ്ഥലപ്പേരൊന്നും നിക്കത്ര നിശ്ചല്യ...""" അമ്മായി പറഞ്ഞു.

'എങ്ങോട്ടാണേലും ഒന്നു പറഞ്ഞിട്ട് പൊയ്ക്കൂടാരുന്നോ.... എന്നെ ഇങ്ങനെ വേദനിപ്പിച്ച് രസിക്കണോ..?' ഞാൻ, സ്വയം പിറുപിറുത്തു...

"" ജയന്തൻ വന്നിട്ടു വേണം അവരടെ കാര്യത്തിലൊരു തീരുമാനമെടുക്കാൻ..... പഠിപ്പ് കഴിഞ്ഞ സ്ഥിതിക്ക് ഇനി രണ്ടിനേം ഇങ്ങനെ വിട്ടാൽ പറ്റില്ല, എത്രേം വേഗം നല്ലൊരു മുഹൂർത്തം നോക്കി ആ ചടങ്ങങ്ങ് നടത്തണം...""" ഏട്ടൻ, അമ്മാവനുമായി ചർച്ച ചെയ്തു... 

പക്ഷേ,,,

എല്ലാ ചർച്ചകൾക്കും വിരാമമിട്ടുകൊണ്ടാണ്,

എനിക്കന്ന് ഇങ്ങനൊരു ദുരന്തം ഏറ്റുവാങ്ങേണ്ടി വന്നത്....!

"" ദ്രുപേ നീയറിഞ്ഞോ,  ആ കുട്ടിക്ക് വിശേഷണ്ടെന്ന്...""" ഏടത്തി, കിതച്ചുകൊണ്ടാണതു പറഞ്ഞത്.

""" ഏതു കുട്ടിക്ക്?? """

"" മ്മടെ ജയന്തന്റെ പെണ്ണിന്, ആ അസൂയക്ക്""

ഏടത്തി പറഞ്ഞതും ഞാൻ ചിരിച്ചു..

"" അസൂയ അല്ല ഏടത്തീ , അനസൂയ! ""

"" ആഹ്, അതെന്നെ..""

"" അതൊരു നല്ല വാർത്തയാണല്ലോ ഏടത്തീ...""

"" വിവാഹം കഴിഞ്ഞിട്ട്, രണ്ടാഴ്ച തികയും മുമ്പേ വിശേഷം ആവണത് അത്ര നല്ല വാർത്തയൊന്നും അല്ലാട്ടോ കുട്ട്യേ..""" ഏടത്തി എന്നോട് അടക്കം പറഞ്ഞു...

എനിക്കു പക്ഷേ,, അതിലത്ര അതിശയമൊന്നും തോന്നിയില്ല.... ഞാനിത് നേരത്തെ  പ്രതീക്ഷിച്ചിരുന്നതാണല്ലോ!

"" ഇനി ചെങ്ങോത്ത് പലതും നടക്കും...

വല്ലോന്റേം കുഞ്ഞിനെ  ഏറ്റെടുക്കാൻ ജയന്തൻ തയ്യാറാവില്യാന്നാ എല്ലാരും പറയണേ. .."" ഏടത്തി പറഞ്ഞതു കേട്ട് ഞാനൊന്നു ചിരിച്ചു...

"" നീയെന്തിനാ ദ്രുപേ ചിരിക്കണേ?? ""

"""സ്വന്തം കുഞ്ഞിനെ ഏറ്റെടുക്കാൻ, ജയേട്ടന് ആരുടേയും അനുവാദം വാങ്ങേണ്ട കാര്യല്ല്യല്ലോ എന്നോർത്ത് ചിരിച്ചു പോയതാ ന്റെ ഏടത്തീ..."""

എന്റെ മറുപടി കേട്ട് സ്തബ്ദയായി നിൽക്കുകയായിരുന്നു ഗൗര്യേടത്തി.....

ഞാൻ പറഞ്ഞതിന്റെ പൊരുളുകൾ തേടിയലയുന്ന ഏടത്തിയുടെ പിടിവിട്ട മനസ്സിനെ, ആ കണ്ണുകളിലൂടെ ദർശിക്കുകയായിരുന്നു ഞാനപ്പോൾ...!

3

നീ മാത്രം!

"" ദ്രുപയെന്താ ഉദ്ധേശിക്കണേ.... എന്തൊക്കെയോ ഉണ്ട് നിന്റെ ഉള്ളില്... നിക്കത് പലപ്പോഴും സംശയം തോന്നീണ്ട്.."" ഏടത്തി എന്നെതന്നെ നോക്കി നിൽക്കുകയായിരുന്നു....

""" അനസൂയ ഗർഭിണിയാണെങ്കി, അതിന് ഉത്തരവാദി അവരുടെ ഭർത്താവ് തന്നെയാണ്... ജയേട്ടൻ! """ ഞാൻ പറഞ്ഞു.

""അത്... അത് കുട്ടിക്കെങ്ങന്യാ അറിയാ??"""

മറുപടി പറയും മുൻപേ,  എന്തുകൊണ്ടോ എന്റെ മിഴികൾ തൂവിത്തുടങ്ങിയിരുന്നു....

""" എനിക്കറിയാം ഏടത്തീ, എല്ലാം എനിക്കറിയാം...."" ഞാൻ കണ്ണുകൾ തുടച്ച്, ഏടത്തിയെ നോക്കി....

അവരെന്നെ ഉദ്വോഗത്തോടെ നോക്കി നിൽക്കുകയാണ്....

""" അവൻ... അവൻ നിന്നെ ചതിക്കുകയായിരുന്നല്ലേ ദ്രുപേ?? """ 

"" ഇല്ല ഏടത്തീ... ജയേട്ടനെന്നെ ചതിച്ചിട്ടില്ല!

എന്നെ ചതിക്കാൻ ന്റെ ജയേട്ടന് കഴിയില്ല...

എല്ലാം...എല്ലാം ഞാനറിഞ്ഞോണ്ടാ...""" ഞാൻ പറഞ്ഞു.

""" എല്ലാം നീയ് അറിഞ്ഞോണ്ടാണെന്നോ??

നിക്ക്... നിക്കൊന്നും മനസ്സിലാവണില്ല കുട്ടീ...

നീയൊന്നു തെളിച്ചു പറ """ 

""" ജയേട്ടൻ, കമ്പനി ടൂറ് കഴിഞ്ഞിട്ടും ഇങ്ങോട്ടൊന്നും വരാതിരുന്നത് ഓർക്കണില്ലേ ഏടത്തി?

അന്ന് ജയേട്ടനെ തിരഞ്ഞ് ഞാൻ ചെങ്ങോത്തേക്ക് ചെന്നപ്പോ, അവടെ ജയേട്ടൻ തനിച്ചേ ഉണ്ടാർന്നുള്ളൂ....

ഒരുപാട് വിളിച്ചിട്ടും കേൾക്കാതിരുന്നപ്പോ ഞാനകത്തു കയറി...

ചെന്നപ്പോ കണ്ട കാഴ്ച! 

മുറിയിലെ ഫാനില് കയറുകെട്ടി, മരിക്കാൻ തയ്യാറായി നിൽക്കുവാരുന്നു ജയേട്ടൻ!

എന്റെ ശ്വാസം നിലച്ചുപോയി....

ഓടിച്ചെന്ന്, ജയേട്ടനെ പിടിച്ചു വലിച്ച് കട്ടിലിലേക്കിരുത്തി....

ആ രൂപം കണ്ടപ്പോ തന്നെ എന്റെ നെഞ്ച് കലങ്ങിപ്പോയി ഏടത്തീ....

എന്റെ പഴയ ജയേട്ടനേ അല്ല...

വല്ലാത്തൊരു കോലം!

"" എന്താ... എന്താ പറ്റ്യേ ജയേട്ടന്??

എന്തിനാ എന്നെ ഒറ്റയ്ക്കാക്കി മരിക്കാൻ നോക്കിയേ....

എത്ര ദിവസായി, ജയേട്ടനെന്നെ വിളിച്ചിട്ട് എന്ന് ഓർമ്മയുണ്ടോ..... ഈ ശബ്ദൊന്ന് കേൾക്കാതെ, ഞാനെത്രമാത്രം വേദനിക്കണുണ്ടെന്ന് അറിയോ ???

എന്തിനാ എന്നോടിങ്ങനെ അകൽച്ച കാട്ടണേ...??"" ഞാൻ കരഞ്ഞു പോയിരുന്നു..

ജയേട്ടൻ, കൈകൾ രണ്ടും തലയിൽ വച്ച്, കുമ്പിട്ട് ഇരിക്കുകയായിരുന്നു...

ഞാനാ മുടിയിഴകളിലൂടെ നേർമയിൽ തഴുകിയതും,, ഏട്ടനെന്റെ കൈകൾ കൂട്ടിപ്പിടിച്ച് നെഞ്ചിൽ ചേർത്തണച്ചു....

ആ കണ്ണുകൾ വല്ലാതെ കലങ്ങി മറിഞ്ഞിരുന്നു.....

"" ദ്രുപേ, നിനക്ക് എന്റെ കൂടെ മരിക്കാൻ പേടിയുണ്ടോ?? "" ഏട്ടൻ ചോദിച്ചു...

""" മരിക്കാനോ, എന്തിന്??""

"" ഒരുമിച്ച് ജീവിക്കാൻ വിധിയില്ലെങ്കിൽ, ഒരുമിച്ച് മരിച്ചൂടേ നമുക്ക്?? """

"" എനിക്കൊന്നും മനസ്സിലാവണില്ലല്ലോ ജയേട്ടാ... 

എന്താ ഏട്ടന് പറ്റ്യേ... എന്നോട് പറഞ്ഞൂടേ?"""

"" ഞാനിപ്പോ നിന്റെ ആ പഴയ ജയേട്ടനല്ല ദ്രുപേ... ഞാനിപ്പോ, ഒരു.. ഒരു കള്ളനാണ്! ""

"" കള്ളനോ? ""ഞാൻ,ഒന്നും മനസ്സിലാവാതെ ജയേട്ടനെ നോക്കി..

""" കമ്പനിയുടെ എക്കൗണ്ട്സിൽ നിന്നും, ലക്ഷങ്ങളുടെ തിരുമറി നടന്നിട്ടുണ്ട്....

ഞാനറിയാതെ ഒന്നും, എവിടേയും പോകില്ലെന്നാണ് ആരോപണം.....

പണം അടച്ച്, എക്കൗണ്ട് ക്ലോസ് ചെയ്തില്ലെങ്കിൽ, കമ്പനി എനിക്കെതിരെ കേസ് കൊടുക്കും...

ഞാൻ... ഞാനകത്തു പോകേണ്ടി വരും! 

ടൂറിനു പോയ സമയത്താണ് ഇക്കാര്യം ഞാനറിയുന്നത്....

അപ്പോ തന്നെ എനിക്കു ചിലരെ സംശയം തോന്നിയിരുന്നു...."""

"" ആരെ?""

"" അനസൂയ!

അവളാണ് ഇപ്പോ എന്നെ അസിസ്റ്റ് ചെയ്യുന്നത്.... അവളറിയാതെ ഒന്നും സംഭവിക്കില്ലെന്ന് എനിക്കുറപ്പുണ്ടായിരുന്നു...

ചോദ്യം ചെയ്തപ്പോ അവളത് സമ്മതിക്കുകയും ചെയ്തതാണ്....."""

"" എങ്കിൽ പിന്നെ അവളെ പോലീസിലേൽപ്പിച്ചാ പോരേ..?""

"" അങ്ങനെ ചെയ്യാമായിരുന്നു.. പക്ഷേ, ,, അവിടേയും അവളെന്നെ തളർത്തിക്കളഞ്ഞു....

സംഭവം അറിഞ്ഞ രാത്രി  ഞാൻ വല്ലാത്ത ടെൻഷനിലായിരുന്നു....

ടെൻഷൻ മാറ്റാൻ വേണ്ടിയാ, അവളും മാനേജർ സാറും കൂടി എന്നെ മദ്യപിക്കാൻ പ്രേരിപ്പിച്ചത്....

ഞാൻ കുടിച്ചു... ബോധം മറയുവോളം കുടിച്ചു....

പിന്നെ... പിന്നെ സംഭവിച്ചതൊന്നും എനിക്ക് ഓർമ്മയില്ല ദ്രുപേ....

അനസൂയയെ ചോദ്യം ചെയ്തപ്പോഴാണ്, കഴിഞ്ഞ രാത്രി ഞാൻ ചെയ്ത തെറ്റിനെ കുറിച്ച് അവളെന്നോട് പറഞ്ഞത്....

അതു വച്ചാണ്, അവളെന്നെ വീണ്ടും ബ്ലാക്ക് മെയിൽ ചെയ്തത്....""" 

""" എന്താത്?

എന്തു തെറ്റാ ജയേട്ടൻ ചെയ്തേ??""" എന്റെ നെഞ്ചടിപ്പ് വർധിച്ചുകൊണ്ടിരുന്നു....

"" ഞാനെങ്ങനെയാ നിന്നോടത് പറയാ ദ്രുപേ... നീയെന്നെ വെറുത്തു പോവില്ലേ...""

""ഏട്ടൻ പറഞ്ഞോളൂ "" 

"" ഞാൻ... ഞാനവളെ.... ഞാനവളെ ഇല്ലാതാക്കീത്രേ...

എങ്ങനെ സംഭവിച്ചൂന്ന് എനിക്കറിയില്ല ദ്രുപേ... എനിക്കൊന്നും ഓർമ്മയില്ല...

മദ്യം ഇത്ര ലഹരിയാണെന്ന് എനിക്കറിയില്ലായിരുന്നു..."" ജയേട്ടൻ , എന്റെ മുന്നിൽ ആദ്യമായി പൊട്ടിക്കരഞ്ഞു...

ഒന്നു ചലിക്കാൻ പോലും കഴിയാത്ത വിധം മരവിച്ചു പോയിരുന്നു എന്റെ മനസ്സും ശരീരവും!

സ്വന്തമാണെന്നറിഞ്ഞിട്ടും, ഒരിക്കൽ പോലും അതിരുകടന്നിട്ടില്ല ഞങ്ങൾക്കിടയിലുള്ള ബന്ധം....

അങ്ങനെയൊരു മനസ്സുമായി, ജയേട്ടനെന്നെ ഇതുവരെ സമീപിച്ചിട്ടില്ല....

ആ ജയേട്ടൻ....

ബോധത്തോടെയല്ലെങ്കിലും, മറ്റൊരുവളെ എല്ലാ അർത്ഥത്തിലും സ്വന്തമാക്കിയെന്നു പറഞ്ഞാൽ..,,, എനിക്കു വിശ്വസിക്കാൻ കഴിയുമായിരുന്നില്ല....

""ഇല്ല, ഞാനിതു വിശ്വസിക്കില്ല!

അവര്... അവര് പറഞ്ഞ് പറ്റിക്ക്യാ ജയേട്ടനെ

അല്ലാതെ ന്റെ ജയേട്ടനൊരിക്കലും....."" ഞാൻ വിങ്ങിപ്പൊട്ടി...

"" ഞാനും അങ്ങനെ വിശ്വസിക്കുമായിരുന്നു, അവളൊന്നും ഷൂട്ട് ചെയ്തിട്ടില്ലായിരുന്നെങ്കിൽ.....""

""ഛേ.."" ഞാൻ വെറുപ്പോടെ മുഖം തിരിച്ചു..

""" പക്ഷേ ഒന്നുണ്ട്....

ലഹരിയിൽ ബുദ്ധി മറഞ്ഞു പോയിരുന്നെങ്കിലും,, എന്റെ ചുണ്ടുകൾ മന്ത്രിച്ചിരുന്നത് നിന്റെ പേരായിരുന്നു ദ്രുപേ...

നീയാണ് എന്റെ അരികിൽ കിടക്കുന്നതെന്നാണു ഞാൻ....."""

ബാക്കി കേൾക്കാൻ നിൽക്കാതെ, ഞാനെന്റെ ഇരു ചെവിയും കൊട്ടിയടച്ചു....

കണ്ണുകൾ ഇറുക്കിയടച്ചു.....

ജയേട്ടന്റെ മുഖം കാണാനുള്ള ത്രാണിയില്ലാതെ ഞാൻ തിരിഞ്ഞു നിന്നു...

അവിടെനിന്നും എത്രയും വേഗം ഓടിപ്പോരാനാണെനിക്കു തോന്നിയത്....

പക്ഷേ,, അപ്പോഴും ജയേട്ടൻ വീണ്ടും അവിവേകം കാണിക്കുമോ എന്ന ഭയമെന്നെ തളർത്തിയിട്ടു.....

""" അവൾക്കെതിരെ ഞാനെന്തെങ്കിലും

ചെയ്താൽ, ആ നിമിഷം അവളെന്നെ മറ്റുള്ളവർക്കു മുന്നിൽ മോശക്കാരനായി ചിത്രീകരിക്കും....

വിവാഹ വാഗ്ദാനം നൽകി, രഹസ്യമായി പീഢിപ്പിച്ചെന്ന് പരാതി നൽകും.....

രണ്ടായാലും, എന്റെ ജീവിതം ജയിലിൽ തീരേണ്ടി വരും....

ഞാൻ കാരണം എന്നെ സ്നേഹിക്കുന്നവർ പോലും, തലകുനിച്ചു നടക്കേണ്ടി വരും....

അതിനേക്കാളേറെ നിന്നോട്....

നിനക്കു തന്ന വാക്കിനോട്.....

നമ്മള് കണ്ട സ്വപ്നങ്ങളോട്...

എല്ലാത്തിനും ഒരു മറുപടിയേ ഉള്ളൂ... എന്റെ മരണം! """

"" ജയേട്ടന്റെ മരണം കൊണ്ട് എല്ലാം അവസാനിക്കും എന്നാണോ കരുതിയേക്കണേ??

നിങ്ങള് പോയാലും, ഇവിടെ ബാക്കിയാവുന്ന ചിലരുണ്ട്... മറന്നു പോയോ അവരെ കുറിച്ച്??

അവരുടെ കണ്ണീരിന് ആരു സമാധാനം പറയും??

നിങ്ങള് ചെയ്ത തെറ്റിന്, ഇനിയുള്ള കാലം മുഴുവനും ആ പാവങ്ങളെ തീ തീറ്റിക്കണോ??"" എന്റെ ചോദ്യത്തിനൊന്നും ജയേട്ടന്റെ കയ്യിൽ മറുപടി ഉണ്ടായിരുന്നില്ല!

ഉള്ളിൽ, ഇളകിമറിയുന്ന നോവിന്റെ ആഴക്കടൽ.....

പുറത്ത് തിരിമുറിയാതെ പെയ്തുകൊണ്ടിരുന്ന കണ്ണീർ തുള്ളികൾ....

ആശ്വസിപ്പിക്കാനോ, സ്വയം ആശ്വസിക്കാനോ കഴിയാതെ ഞാൻ പടിയിറങ്ങി.....

ജയേട്ടനെ പറ്റി ഓർക്കുന്തോറും മനസ്സ് ഉരുകുകയായിരുന്നു.....

എനിക്ക് ചെയ്യാൻ കഴിയുന്നത് ഒന്നേ ഉള്ളൂ...

അനസൂയയെ നേരിട്ട് കാണുക!

അവരുടെ കാലു പിടിച്ചിട്ടാണെങ്കിലും, ജയേട്ടനെ രക്ഷിക്കണം എന്ന ചിന്തയും പേറിയാണ് ഞാൻ, അവർ താമസിക്കുന്ന ക്വാർട്ടേഴ്സിലെത്തിയത്.....

പക്ഷേ, ഞാൻ ചെല്ലുമ്പോ അവിടെ അവര് മാത്രല്ല, ജയേട്ടനും ഉണ്ടായിരുന്നു....

അവരു തമ്മിൽ നടന്ന വാക്കേറ്റത്തിന് അറിയാതെയാണെങ്കിലും, ഞാനും സാക്ഷിയായി!

""" നീയിനി ഒരക്ഷരം പറയരുത്!

നീയൊറ്റ ഒരുത്തിയാ എന്റെ ജീവിതം തുലച്ചത്.....

എന്റെ ദ്രുപ... അവൾ... അവളെല്ലാം അറിഞ്ഞു....

ഒന്നൊഴിച്ച്...!

ഞാൻ ചെയ്ത പാപത്തിന്റെ കർമ്മഫലം നിന്റെ വയറ്റിൽ കുരുത്ത വിവരം മാത്രം ഞാനവളോട് പറഞ്ഞിട്ടില്ല!

അതുകൂടി അറിഞ്ഞാൽ,, ആ നിമിഷം ചങ്ക് പൊട്ടി ചത്തുപോകും എന്റെ ദ്രുപ....

പക്ഷേ,, എനിക്കറിയാം ചാകേണ്ടത് അവളോ ഞാനോ അല്ല, നീയാണ്....

എന്റെ സ്വൈര്യവും സമാധാനവും തകർത്ത നീയിനി ഈ ഭൂമുഖത്ത് ഉണ്ടാവാൻ പാടില്ല! ""

"" ഞാൻ ചെയ്തത് തെറ്റാണ്....

എന്നോട് ക്ഷമിക്കണം... എല്ലാം, ആ മാനേജർ സാറിനു വേണ്ടിയാ ഞാൻ.....

അയാളു പറഞ്ഞിട്ടാ ഞാനന്നു രാത്രി തന്റെ കൂടെ കേറിക്കിടന്നത്.....

പക്ഷേ,, അതിനു ഞാൻ സമ്മതിച്ചത് എനിക്കു നിങ്ങളെ ഇഷ്ടമായതു കൊണ്ട് മാത്രമാണ്....

എല്ലാവരും എനിക്കു പിന്നാലെ ചുറ്റിത്തിയുമ്പോഴും, നിങ്ങളു മാത്രം ഒരു നോട്ടംകൊണ്ടു പോലും എന്നെ ആഗ്രഹിച്ചിരുന്നില്ലെന്ന് എനിക്കറിയാം....

അതുകൊണ്ടു തന്നെയാണ് എനിക്ക് നിങ്ങളോട് ഇഷ്ടവും ബഹുമാനവും തോന്നിയതും......

സത്യങ്ങളൊക്കെ ഞാൻ കമ്പനിഹെഡിനെ അറിയിച്ചോളാം....

എനിക്ക്... എനിക്ക് നിങ്ങളേയും നമ്മുടെ കുഞ്ഞിനേയും മാത്രം  മതി!

നിങ്ങളെന്നെ വിവാഹം കഴിച്ചാൽ മാത്രം മതി!""" അനസൂയ കരയുകയായിരുന്നു....

"" എനിക്ക് സാധ്യമല്ല! 

എനിക്ക് നിന്നെയോ നിന്റെ കുഞ്ഞിനേയോ ആവശ്യമില്ല....

അതിനേക്കാളൊക്കെ അന്തസ്, നിന്നെ കൊന്നിട്ട് ജയിലിൽ പോകുന്നത് തന്നെയാടീ... ദാ ഇതു കണ്ടോ ആസിഡ്.... ഇതൊഴിച്ച് നിന്നെ ഞാൻ പച്ചയ്ക്ക് കത്തിക്കാൻ പോവാടീ...എല്ലാം ഇതോടെ തീരട്ടെ!"""

എല്ലാം കേട്ട് തരിച്ച് നിൽക്കുകയായിരുന്നു ഞാൻ....

ജയേട്ടന്റെ കൈകൊണ്ട് അനസൂയയും അവളുടെ കുഞ്ഞും, ഇല്ലാതാവാൻ പോവാണെന്ന് കേട്ടപ്പോ എന്തുകൊണ്ടോ,, എനിക്കത് സഹിച്ചില്ല...

ഞാൻ, വാതിൽ തള്ളിത്തുറന്ന് അകത്തേക്കോടി.... ജയേട്ടൻ, എന്തെങ്കിലും ചെയ്യും മുമ്പ് അവർക്കിടയിലേക്ക് കയറി നിന്നു....

അവരെ രക്ഷിക്കണമെന്നേ കരുതിയുള്ളൂ.. പക്ഷേ,, അതിനു മുന്‍പ് ആ ആസിഡ് എന്റെ മുഖത്തേക്ക് വീണിരുന്നു! ""

     ♠️♠️♠️♠️♠️♠️♠️♠️♠️♠️♠️♠️♠️

തിരിഞ്ഞു നോക്കുമ്പോൾ,, ഏടത്തി നിശ്ശബ്ദയായി കരയുകയായിരുന്നു....

""ഏടത്തീ "" ഞാൻ വിളിച്ചു

ഏടത്തിക്കൊന്നും സംസാരിക്കാൻ കഴിയുമായിരുന്നില്ല.... അവർ, ബെഡിലേക്ക് തളർന്നിരുന്നു....

""" പിന്നെ... പിന്നെ നീയവനെ കണ്ടിട്ടില്ല്യാലേ?""" ഏടത്തി ചോദിച്ചു.

"" കണ്ടിരുന്നു... അന്ന് ഹോസ്പിറ്റലിൽ വച്ച്...

അന്ന് ആരും കാണാതെ ഒരുപാട് കരഞ്ഞു... എന്റെ കാലുപിടിച്ച് പൊട്ടിക്കരഞ്ഞു....

അനസൂയ തിരിച്ചു പോയെന്നും, നമുക്ക് പഴയതെല്ലാം മറന്ന് പുതിയൊരു ജീവിതം തുടങ്ങണമെന്നും എന്നോട് പറഞ്ഞു....

ഞാൻ സമ്മതിച്ചില്ല!

ജയേട്ടന് ഞാൻ മാപ്പ് കൊടുത്താലും, ആ കുഞ്ഞ്....

അതിനെ ഇല്ലാതാക്കാനോ, അനാഥനാക്കാനോ എന്റെ മനസ്സ് അനുവദിച്ചില്ല....

ജയേട്ടനോട് അനസൂയയെ വിവാഹം കഴിക്കാനും, എന്നെ വേണ്ടെന്ന് തീർത്തു പറയാനും ഉപദേശിച്ചത് ഞാനാണ്....

ജയേട്ടൻ ശക്തമായി എതിർത്തു. ...

എന്നെവിട്ട് എവിടേയും പോകില്ലെന്ന് വാശിപിടിച്ചു....

പക്ഷേ,, എന്റെ വാശിക്കു മുന്നിൽ ജയേട്ടന് തോൽവി സമ്മതിക്കേണ്ടി വന്നു....

ഒരു പെണ്ണിനെ ചതിച്ച് ഗർഭിണിയാക്കിയ ഒരാളെ എനിക്ക് ഭർത്താവായി വേണ്ടെന്ന് ഞാൻ തീർത്തു പറഞ്ഞു....

ഞാൻ പറയുന്നത് അനുസരിച്ചില്ലെങ്കിൽ,, പിന്നെ ഞാൻ ജീവനോടെ കാണില്ലെന്ന് ഭീഷണിപ്പെടുത്തി....

എനിക്ക്... എനിക്ക് അതായിരുന്നു ശരി!

ഒരു കുഞ്ഞിന് അച്ഛനില്ലാതാക്കീട്ട്, എനിക്കൊരു ഭാര്യാപദവി വേണ്ടെന്ന് തോന്നി ഏടത്തീ...

സ്വന്താക്കണതു മാത്രല്ലല്ലോ, വിട്ടു കൊടുക്കണതും സ്നേഹാണെന്നല്ലേ പറയാറ്.....

ഈ ജന്മത്തില് ഞാൻ വിട്ടു കൊടുത്താലും,, ഇനിയുള്ള ജന്മങ്ങളൊക്കെ എനിക്കെന്റെ ജയേട്ടനെ ഇരട്ടി സ്നേഹത്തോടെ ദൈവം എനിക്ക് തിരിച്ചു തരും....

അല്ലേ ഏടത്തീ..."""

ഞാൻ, ഏടത്തിയുടെ ചുമലിലേക്ക് വീണ് പൊട്ടിക്കരഞ്ഞു...

എന്നെ ആശ്വസിപ്പിക്കാനാവാതെ,

ഏടത്തിയും കരയുകയായിരുന്നു....

""ഇതൊന്നും ആരും അറിയരുതെന്നാ കരുതീത്....

അതുകൊണ്ടാ, അവരും അന്നെന്നെ അറിയാത്ത ഭാവം നടിച്ചത്.....

പക്ഷെ,, ആരോടെങ്കിലും പറഞ്ഞില്ലെങ്കി ഞാൻ ഹൃദയം പൊട്ടി മരിച്ചു പോകുമെന്ന് തോന്നി....

എല്ലാവരുടേയും ശാപം എന്റെ ജയേട്ടന്റെ തലയിൽ വീഴരുതെന്ന് തോന്നി....

അതോണ്ടാ....

പക്ഷേ ഏടത്തീ... 

ഇതൊരിക്കലും ഏട്ടൻ അറിയരുത്.... അറിഞ്ഞാൽ,, ന്റെ ഏട്ടനത് താങ്ങാൻ പറ്റില്ല!

എന്നെയോർത്ത് അത്ര വേദനിക്കണുണ്ട് ആ മനസ്സ്.."" പറഞ്ഞ് തീർന്നപ്പോഴാണ് കതകിനു മറവിലെ നിഴൽരൂപം ഞാൻ ശ്രദ്ധിച്ചത്..

ഏട്ടൻ!

"" ഏട്ടാ ഞാൻ..."" ഓടിച്ചെന്ന് ആ മാറിലേക്ക് വീണു....

"" ന്നോട് ക്ഷമിക്കണേ ഏട്ടാ.... ഏട്ടന്റെ ദ്രുപ, ഏട്ടനെ പറ്റിക്ക്യായിരുന്നൂന്ന് തോന്നരുത് ട്ടോ..."" ഞാൻ വിതുമ്പി..

"" എന്തിന്??

എന്റെ കുട്ടിയെ ഏട്ടൻ അറിഞ്ഞില്ലെങ്കി, ദൈവം ഏട്ടനോട് പൊറുക്ക്വോ...

വലിയ മനസ്സാ ന്റെ കുട്ടീടെ....

ഞങ്ങളൊക്കെ നിന്റെ മുന്നില് ഒരുപാട് ചെറുതിയി പോവാണല്ലോ മോളേ..."" ഏട്ടനെന്റെ നെറുകിൽ അമർത്തി ചുംബിച്ചു...

ഏട്ടന്റെ കണ്ണുനീർ, എന്റെ ശിരസ്സിലേക്ക് ഇറ്റുവീണു.....

എന്റെ ഏട്ടന്റെ കറകളഞ്ഞ സ്നേഹത്തിന്റെ പര്യായമായി, ഞാനാ കണ്ണുനീർ തുള്ളികൾ എന്റെ ഹൃദയത്തിലേക്ക് ഏറ്റുവാങ്ങി....

ദ്രുപയ്ക്കൊരിക്കലും ജയന്തനെ മറന്ന് മറ്റൊരാളെ സ്നേഹിക്കാൻ കഴിയില്ലായിരിക്കാം....

എങ്കിലും,, കാലം മായ്ക്കാത്ത മുറിവുകൾ ഇല്ലന്നല്ലേ പറയാറ്....

മാഞ്ഞു പോയേക്കാം.....

പുതിയൊരാള് ദ്രുപയുടെ ജീവിതത്തിലേക്ക് കടന്നു വന്നേക്കാം....

എല്ലാം ദൈവത്തിന്റെ തീരുമാനം...!

ദ്രൗപതി!

അവൾ, സ്നേഹത്തിന്റെ പര്യായമാണ്...

ആഗ്രഹിച്ചത് നേടിയെടുക്കാനായി എന്തും ചെയ്യാൻ മടിക്കാത്ത കാലത്ത്, അവളുടെ സ്നേഹമെന്നും മുഴച്ചു നിൽക്കും......

അവളുടെ നാമമെന്നും ജ്വലിച്ചു നിൽക്കും....

സ്നേഹത്തെ, സ്നേഹത്തെക്കൊണ്ട് തോൽപ്പിക്കുക....!

ദൈവം കൂടെത്തന്നെ ഉണ്ടായിരിക്കും...

തീർച്ച!

ശുഭം❤️❤️

DOWNLOAD FOR PDF STORY CLICK HERE

📝 സിയ യൂസഫ്