🍁ടേക്ക് ഓഫ്🍁ഫുൾ പാർട്ട് 🍁

🍁ടേക്ക് ഓഫ് 🍁ഫുൾ പാർട്ട് 🍁

ശാലൂ.. നീയിത് വരെ റെഡിയായില്ലേ? കുട്ടികൾ എത്ര നേരമായി പുറത്ത് വെയിറ്റ് ചെയ്യുന്നു,

റിയാദ് എയർപോർട്ടിലേക്ക് പോകാനായി ഒരുങ്ങി ഇറങ്ങിയതായിരുന്നു സൗദിയിൽ ബ്യൂട്ടി പാർലർ നടത്തുന്ന സുരേഷും കുടുംബവും

കാൾ ടാക്സി വന്ന് ഏറെ നേരം കഴിഞ്ഞിട്ടും ഭാര്യയെ പുറത്തേയ്ക്ക് കാണാതിരുന്നത് കൊണ്ടാണ് അയാൾ ബെഡ് റൂമിലേക്ക് ചെന്നത്

അല്ലാ നീയെന്താ മാറിയിരിക്കുന്നത്, നിൻ്റെ മുഖമെന്താ വല്ലാതിരിക്കുന്നത്?

ബെഡ്ഡിന് മുകളിൽ വേദന തിങ്ങിയ മുഖവുമായിരിക്കുന്ന ശാലിനിയോടയാൾ ഉത്ക്കണ്ഠയോടെ ചോദിച്ചു

എനിക്ക് തീരെ വയ്യ സുരേഷേട്ടാ അടുത്തയാഴ്ചയായിരുന്നു ഡേറ്റ്, പക്ഷേ മുറ തെറ്റി നേരത്തെ വന്നു , അത് കൊണ്ട് സകല മൂഡും പോയി,

ഒഹ് ഷിറ്റ് ,നല്ലൊരു കാര്യത്തിനിറങ്ങുമ്പോഴാ, നേരോം കാലോം നോക്കാതെ ഓരോരോ ഇഷ്യൂസ്, ങ്ഹാ സാരമില്ല ,നീയൊരു കാര്യം ചെയ്യ്, തത്കാലം ഒരു 

ടാബ്ലറ്റെടുത്ത് കഴിച്ചിട്ട് വേഗിറങ്ങാൻ നോക്ക്, വല്യളിയൻ വിളിച്ചിരുന്നു, നമ്മളിറങ്ങിയോന്ന് ചോദിച്ച്, അവരെല്ലാം നമ്മളെയും കാത്തിരിക്കുവാണെന്ന്

ഫ്ളൈറ്റ് എത്ര മണിക്കാ ചേട്ടാ.. കുറച്ചൊന്ന് കിടക്കാൻ സമയം കിട്ടുമോ ?

ശാലിനി നിസ്സഹായതയോടെ ചോദിച്ചു.

ലെവൻതേർട്ടിക്കാണ് ടേക്ക് ഓഫ്, ഇനിയും മൂന്ന് മണിക്കൂറുണ്ട്, പക്ഷ ഇന്ന് ഫ്റൈഡെയല്ലേ? റോഡിൽ നല്ല ട്രാഫിക്കുണ്ടാവും ,

അത് കൊണ്ട് ഉടന്നെയിറങ്ങുന്നതാണ് നല്ലത്, നീയൊരു കാര്യം ചെയ്യ് ഞാനും കുട്ടികളും ഫ്രണ്ട് സീറ്റിലും മറ്റുമായി, അഡ്ജസ്റ്റ് ചെയ്തിരുന്നോളാം, നീ വേണമെങ്കിൽ, എയർപോർട്ട് വരെ ബാക് സീറ്റിൽ കിടന്നോളു,

ഉം ശരി ,എങ്കിൽ ഞാനീ ഡ്രസ്സൊന്ന് മാറ്റിയിട്ട് വരാം, സുരേഷേട്ടൻ കുട്ടികളുടെ അടുത്തേക്ക് ചെല്ല്,

ഭർത്താവ് പുറത്തിറങ്ങിയപ്പോൾ വാതിലടച്ചിട്ട്, കബോഡിൽ നിന്നും സാനിട്ടറി നാപ്കിനുമെടുത്ത് കൊണ്ട് ശാലിനി ബാത്റൂമിലേക്ക് കയറി.

നാട്ടിലുള്ള ശാലിനിയുടെ, മരിച്ച് പോയ ഇളയ സഹോദരൻ്റെ മകൾ നീതുവിൻ്റെ കല്യാണത്തിന് പോകുകയാണ് സുരേഷും കുടുംബവും.

സുരേഷാണ് വിവാഹത്തിൻ്റെ മുഴുവൻ ചിലവും വഹിക്കുന്നത്.

വിധവയായ ഇളയ നാത്തൂൻ ഗീതയ്ക്ക് അതിനുള്ള കഴിവില്ലെന്നറിയാവുന്നത് കൊണ്ട്, നമുക്ക് ആ ഉത്തരവാദിത്വം  ഏറ്റെടുക്കാമെന്ന് ശാലിനിയോട് സുരേഷ് പറയുകയായിരുന്നു.

അത് വരെ തൻ്റെ മക്കൾക്കായി കരുതിവച്ചതും താനുപയോഗിക്കുന്നതുമായ ആഭരണങ്ങളെല്ലാമെടുത്ത് വിറ്റിട്ടാണ്, നിശ്ചയ സമയത്ത് ചെറുക്കന് പോക്കറ്റ് മണിയായി കൊടുക്കാനുള്ള പത്ത് ലക്ഷം രൂപ അയച്ച് കൊടുത്തത്.

നമ്മുടെ കുട്ടികൾക്കിനി പത്ത് വർഷം കഴിഞ്ഞല്ലേ ആവശ്യം വരികയുള്ളു, ആ സമയത്ത് നമുക്ക് പുതിയത് വാങ്ങാമെന്ന് സുരേഷ്, ശാലിനിയെ സമാധാനിപ്പിക്കുകയും ചെയ്തു.

കല്യാണത്തിന് പെണ്ണിൻ്റെ ദേഹത്തണിയാൻ അൻപത് പവൻ്റെ ആഭരണമെങ്കിലും കൊടുക്കേണ്ടി വരുമെന്ന് പറഞ്ഞപ്പോൾ, അതിനും സുരേഷ് വഴി കണ്ടെത്തി.

കല്യാണത്തിനിനി മൂന്ന് മാസത്തെ സമയമില്ലേ? അത് നമുക്ക് എങ്ങനെയെങ്കിലും സംഘടിപ്പിക്കാം

ഇരുപത്തിയഞ്ച് ലക്ഷത്തിൻ്റെ പ്രവാസിചിട്ടിയായിരുന്നു, സുരേഷിൻ്റെ പ്രതീക്ഷ

പക്ഷേ, സമയത്ത് ചിട്ടി വീഴാതിരുന്നത് കൊണ്ട് കൂട്ടുകാരന് വന്ന ചിട്ടി, തൻ്റെ ചിട്ടി വീഴുമ്പോൾ അയാൾക്ക്കൊടുക്കാമെന്ന ധാരണയിൽ വാങ്ങിക്കുകയായിരുന്നു.

കല്യാണത്തിന് ഒരാഴ്ച മുമ്പേ ആഭരണം വാങ്ങാനുള്ള ഇരുപത് ലക്ഷം രൂപയും, കല്യാണ ചിലവിനുള്ള അഞ്ച് ലക്ഷവും ചേർത്ത്, വല്യളിയൻ്റെ പേരിലേക്കയച്ച് കൊടുത്തു.

അങ്ങനെ നാട്ടിൽ കാര്യങ്ങൾ യാതൊരു തടസ്സവുമില്ലാതെ നടന്ന് കൊണ്ടിരിക്കുകയാണ്, നാളെ കഴിഞ്ഞാണ് വിവാഹം.

അതിന് മുമ്പ് നാട്ടിലെത്താനുള്ള തിടുക്കത്തിലാണ്, കുട്ടികൾ ഉൾപ്പെടെ എല്ലാവരും.

മമ്മീ.. മമ്മീ..വേഗം വാതില് തുറക്ക്,

പുറത്ത് കുട്ടികളുടെ നിലവിളി കേട്ടാണ്, ഡ്രസ്സ് മാറി കൊണ്ടിരുന്ന ശാലിനി പെട്ടെന്ന് വാതില് തുറന്നത്.

എന്താ മക്കളേ എന്ത് പറ്റീ ?

മമ്മീ കുറച്ച് പോലീസുകാർ വന്ന് പപ്പയെ കൂട്ടികൊണ്ട് പോയി

ങ്ഹേ പോലീസുകാരോ ?എന്താ കാര്യം ?

കൃത്യമായി അറിയില്ല മമ്മീ ,പക്ഷേ ഏതോ ഒരു സ്ത്രീ കംപ്ളയിൻറ് ചെയ്തെന്നൊക്കെയാണ് അവരുടെ സംസാരത്തിൽ നിന്നും ഞങ്ങൾക്ക് മനസ്സിലായത്

കുട്ടികൾ ഭയചകിതരായിരുന്നു എന്ത് ചെയ്യണമെന്നറിയാതെ ശാലിനി വിറങ്ങലിച്ച് നിന്നു

മാം.. ചിന്തിച്ച് നില്ക്കാതെ പോയി അന്വേഷിക്കു, കുട്ടികളെ ഞാൻ നോക്കി കൊള്ളാം

അവരുടെ ഹൗസ് കീപ്പറായ സുമാത്ത എന്ന ബംഗാളി യുവതി ശാലിനിയെ ഉപദേശിച്ചു.

നാലഞ്ച് വർഷമായി സുമാത്ത ,അവരോടൊപ്പം

കൂടിയിട്ട്, അത് കൊണ്ട് തന്നെ മലയാളം നന്നായി സംസാരിക്കും

ഭയം വിട്ട് മറാത്ത കുട്ടികളെ സുമാത്തയെ ഏല്പിച്ചിട്ട് ,കാൾ ടാക്സിയിൽ ശാലിനി ,പോലീസ് ആസ്ഥാനത്തേയ്ക്ക് പോയി

അവിടെയെത്തിയ ശാലിനിക്ക് ഉദ്യോഗസ്ഥർ സുരേഷിനോട് സംസാരിക്കാനുള്ള അവസരം കൊടുത്തു.

എന്താ സുരേഷേട്ടാ എന്തിനാ നിങ്ങളെ ഇവിടെ കൊണ്ട് വന്നത് ?

ജിജ്ഞാസയോടെ ശാലിനി ചോദിച്ചു.

ചതിയായിരുന്നു ശാലിനി, മുമ്പ് നമ്മുടെ പാർലറിലുണ്ടായിരുന്ന രേവതിയില്ലേ? അവള് കള്ളക്കേസ് കൊടുത്തതാ,

ങ്ഹേ എന്തിന്?

രണ്ട് വർഷത്തോളമായി നമ്മളവൾക്ക് ശബ്ബളം കൊടുക്കാതെ ജോലി ചെയ്യിക്കുകയായിരുന്നെന്നും, ശബ്ബളം ചോദിച്ചതിന്, അവളെ ജോലിയിൽ നിന്നും പിരിച്ച് വിട്ടെന്നും പറഞ്ഞാണ്, കേസ് കൊടുത്തിരിക്കുന്നത്

പാർലറിലെ മെറ്റീരിയലുകൾ വാങ്ങിയതിൽ തിരിമറി കാണിച്ചതിനല്ലേ? നമ്മൾ അവളെ പുറത്താക്കിയത്, അത് വരെയുള്ള ശബ്ബളം എല്ലാമാസവും നമ്മൾ കൃത്യമായി കൊടുത്തിരുന്നതല്ലേ?

പക്ഷേ, ആ ശബ്ബളം, അവൾ നാട്ടിലേക്ക് അയച്ച് കൊടുത്തിരുന്നില്ല ,

ഇവിടെയുണ്ടായിരുന്ന അവളുടെ കാമുകനുമായത് അടിച്ച് പൊളിച്ച് തീർക്കുകയായിരുന്നു, 

എന്നിട്ട് നാട്ടിലുള്ള ഭർത്താവിനോടും, വീട്ടുകാരോടും തനിക്ക് ശബ്ബളം ലഭിക്കുന്നില്ലെന്നും, ദുരിതത്തിലാണെന്നുമൊക്കെ പറഞ്ഞ്, അവൾ വാട്സ്ആപ് മെസ്സേജുകൾ അയച്ച് കൊടുത്തിരുന്നു ,ആ വോയിസ് 

ക്ളിപ്പുകളാണ്, അവളിപ്പോൾ എനിക്കെതിരെ തെളിവുകളായി കൊടുത്തിരിക്കുന്നത് ,

അവൾക്ക് നമ്മൾ ശബ്ബളം കൊടുത്തു എന്നതിന്, നമ്മുടെ കൈയ്യിൽ തെളിവൊന്നുമില്ലെന്ന് അവൾക്ക് നന്നായറിയാം ,

അതാ അവളിങ്ങനെയൊരു നീക്കം നടത്തിയത്,

പക്ഷേ അതെന്തിന്?

ഒന്ന്, നമ്മളവളെ പുറത്താക്കിയതിൻ്റെ വൈരാഗ്യം, രണ്ട് നാട്ടിൽ നിന്നുമുള്ള നിരന്തരമായ സമ്മർദ്ദം, അതിനവൾ കണ്ടെത്തിയ എകവഴിയാണ് ഈ കള്ളക്കേസ്,

ഈശ്വരാ.. ഇനി നമ്മളെന്ത് ചെയ്യും,എങ്ങനെയാ ഇതിൽ നിന്നും ഒന്ന് രക്ഷപെടുന്നത്?

ഒരു കോടി രൂപാ നഷ്ട പരിഹാരം ആവശ്യപ്പെട്ടാണ്, കേസ് കൊടുത്തിരിക്കുന്നത് ,

തത്ക്കാലം ഒരു അൻപത് ലക്ഷമെങ്കിലും കെട്ടി വയ്ക്കുകയാണെങ്കിൽ, 

കേസ് സെറ്റിൽ ചെയ്യാമെന്നാണ് ഇൻസ്പെക്ടർ പറഞ്ഞത്,

അൻപത് ലക്ഷമോ? അത് നമ്മൾ എങ്ങിനെ ഒപ്പിക്കും?

ഇവിടെ നിന്നാൽ അത് സംഘടിപ്പിക്കാൻ കഴിയില്ല, നിനക്കറിയാമല്ലോ? കയ്യിലുണ്ടായിരുന്നതും കടം വാങ്ങിയതും ചേർത്താണ്, നാട്ടിലേക്കയച്ച് കൊടുത്തത് ,എൻ്റെ അഭിപ്രായത്തിൽ കുട്ടികളെയും കൂട്ടി, നീ നാട്ടിലേക്ക് ചെല്ല് ,തല്ക്കാലം ഇതാരോടും പറയണ്ട ,എനിക്ക് വരാൻ പറ്റിയില്ലെന്ന് മാത്രം പറഞ്ഞാൽ മതി ,വിവാഹം മംഗളമായി നടക്കട്ടെ, അതിന് ശേഷം വല്യളിയനോടും ഗീതയോടും നീ കാര്യങ്ങൾ വിശദമായി പറയണം, നീതു മോളുടെ കല്യാണാവശ്യപത്തിനായി, നമ്മൾ വാങ്ങി കൊടുത്ത അൻപത് പവൻ സ്വർണ്ണം, അവളുടെ ഭർത്താവിൻ്റെ വീട്ടുകാരോട് വിവരം പറഞ്ഞ്, രണ്ട് മാസത്തെ അവധിക്ക് വാങ്ങി പണയം വയ്ക്കാൻ പറയണം ,അതിനുള്ളിൽ നമ്മളത് തിരിച്ചെടുത്ത് കൊടുക്കാമെന്ന് പറ,

പക്ഷേ, അത് കൊണ്ട് ഒന്നുമാവില്ലല്ലോ? ബാക്കി പത്ത് മുപ്പത്തിയഞ്ച് ലക്ഷം രൂപ പിന്നെയും വേണ്ടേ ?

ഉം വേണം ,

അതിന് ശേഷം നീ എൻ്റെ അനുജൻ ,സതീശൻ്റെയടുത്ത് പോകണം ,അവനോടും വിവരങ്ങൾ ധരിപ്പിച്ചിട്ട് ,വീടിൻ്റെ ആധാരം കൊണ്ട് പോയി 

കോ ഓപ്പറേറ്റീവ് ബാങ്കിൽ മുപ്പത്തിയഞ്ച് ലക്ഷം രൂപയ്ക്ക് പണയം വയ്ക്കാൻ പറയണം, എൻ്റെ കുടുംബ വിഹിതമായ മുപ്പത് സെൻ്റ് ,എനിക്ക് വേണ്ടെന്ന് പറഞ്ഞ് ഞാനവൻ്റെ പേരിലെഴുതി കൊടുത്തതല്ലേ? അത് കൊണ്ട് അവൻ തടസ്സമൊന്നും പറയില്ല,

പക്ഷേ, ആധാരം നമ്മൾ എങ്ങനെ തിരിച്ചെടുത്ത് കൊടുക്കും?

അതൊക്കെ കൊടുക്കാം ശാലൂ... ഒന്നുമില്ലേലും നമുക്കിവിടെ രണ്ട് ബ്യൂട്ടി പാർലറുകളില്ലേ? വേണ്ടിവന്നാൽ അതിലൊരെണ്ണം നമുക്ക് വില്ക്കാം ,ഇപ്പോൾ എടിപിടീന്ന് വില്ക്കാൻ കഴിയില്ലെന്നേയുള്ളു ,കുറച്ച് സാവകാശം വേണ്ടിവരും, അത് കൊണ്ടാണ് നീ നാട്ടിൽ ചെന്ന് കാര്യങ്ങൾ സെറ്റ് ചെയ്യാൻ ഞാൻ പറയുന്നത്,

പക്ഷേ നിങ്ങളിവിടെ ജയിലിൽ കഴിയുമ്പോൾ ഞാനെങ്ങനെ മനസമാധാനത്തോടെ നാട്ടിലേക്ക് പോകും

ഇപ്പോൾ ഞാനവരുടെ കസ്റ്റഡിയിലാണെന്നേയുയുള്ളു

അവരെന്നെ തുറുങ്കിലിടുകയൊന്നുമില്ല

നീ പോയിട്ട് എത്രയും പെട്ടെന്ന് കാര്യങ്ങൾ സെറ്റിലാക്കിയാൽ അത്രയും നേരത്തെ എനിക്ക് റിലീസാവാം ,സംസാരിച്ച് നിന്നാൽ സമയം പോകും ,പെട്ടെന്ന് തന്നെ കുട്ടികളുമായിഎയർപോർട്ടിലേക്ക് പുറപ്പെടാൻ നോക്ക്,

ഉം ശരി. ഞങ്ങൾ പോയി വരാം വിഷമിക്കരുത് എങ്ങനെയെങ്കിലും കെട്ടി വയ്ക്കാനുള്ള പണവുമായി ഞാൻ വേഗം മടങ്ങി വരാം,ടേക്ക് കെയർ,

നിറകണ്ണുകളോടെ ഭർത്താവിൻ്റെ കൈകൾ പിടിച്ച് ചുംബിച്ചിട്ട് ശാലിനി വീട്ടിലേക്ക് തിരിച്ചു

കുട്ടികളെ വിവരം ധരിപ്പിച്ച് സുമാത്തയോട് യാത്ര പറഞ്ഞ് എയർപോർട്ടിലേക്ക് പോകുമ്പോൾ ഒന്ന് പൊട്ടിക്കരയാൻ പോലും അശക്തയായിരുന്നവൾ

ഭാഗം 2

വല്യേട്ടൻ്റെ മകൻ മനു, എയർപോർട്ടിൽ ടാക്സിയുമായി വെയിറ്റ് ചെയ്യുന്നുണ്ടായിരുന്നു

ആൻ്റീ..സുരേഷ് അങ്കിളെന്താ വരാതിരുന്നേ?

മനുവിൻ്റെ ചോദ്യത്തിനുള്ള മറുപടി അവൾ കരുതി വച്ചിട്ടുണ്ടായിരുന്നു

രണ്ടാമത്തെ പാർലറിൻ്റെ ഇനാഗുറേഷന് ഇനി കുറച്ച് ദിവസമല്ലേയുള്ളു ,സുരേഷേട്ടൻ ഈ സമയത്ത് അവിടെ നിന്ന് മാറി നിന്നാൽ വർക്കുകളൊക്കെ പെൻറിങ്ങാകും,അത് കൊണ്ട് തിരക്കെല്ലാമൊഴിഞ്ഞിട്ട് പിന്നീട് ഒരു ദിവസം വരാമെന്ന് പറഞ്ഞു

എന്നാലും നാളത്തെ ചടങ്ങിലെ പ്രധാന അതിഥി,

സുരേഷങ്കിളായിരുന്നു, കൊച്ചച്ഛൻ്റെ സ്ഥാനത്ത് നിന്ന് നീതുവിനെ മണ്ഡപത്തിലേക്ക് കൈപിടിച്ച് കയറ്റേണ്ടത് സുരേഷങ്കിളാണെന്ന് ഗീത കുഞ്ഞമ്മ ഇന്നലെയും കൂടി പറഞ്ഞതേയുള്ളു, നീതുവിൻ്റെയും ആഗ്രഹം സുരേഷങ്കിള് അടുത്തുണ്ടാവണമെന്നായിരുന്നു

കാറിൻ്റെ പിൻസീറ്റിലിരുന്നത് കേൾക്കുമ്പോൾ ശാലിനിക്ക് മനസ്സ് നിറഞ്ഞു ,എല്ലാവർക്കും സുരേഷേട്ടനെ മിസ്സ് ചെയ്യുന്നുണ്ടെന്ന അറിവ് അവൾക്ക് പ്രതീക്ഷ നല്കി

നന്ദിയും സ്നേഹവുമുള്ളവരാണ് തൻ്റെ വീട്ടുകാർ ,സുരേഷേട്ടനൊരു പ്രശ്നത്തിൽ പെട്ടിരിക്കുകയാണെന്നറിയുമ്പോൾ അവരെല്ലാം തൻ്റെ കൂടെ നില്ക്കുമെന്നുറപ്പുണ്ട്, പക്ഷേ സതീശൻ്റെ കാര്യത്തിൽ തനിക്കാ ഉറപ്പില്ല ,അവൻ്റെ ഭാര്യ ജമന്തി അറുത്ത കൈക്ക്, ഉപ്പ് തേക്കാത്തവളാണ് ,സതീശൻ സഹായിക്കാൻ തയ്യാറായാലും ജമന്തി സമ്മതിക്കുമെന്ന് തോന്നുന്നില്ല.

എന്നാലും ചോദിക്കേണ്ടത് തൻ്റെ ആവശ്യമാണല്ലോ? എന്തായാലും നാളത്തെ ചടങ്ങ് കഴിയട്ടെ, ആദ്യം സതീശൻ്റെ വീട്ടിൽ ചെന്നിട്ട് വിവരങ്ങൾ പറയാം ,ഗീതയോട് രണ്ട് ദിവസം കൂടി കഴിഞ്ഞിട്ട് കാര്യങ്ങൾ പറയുന്നതാണ് ഉചിതം ,നീതുവിൻ്റെ ഭർതൃവീട്ടുകാരോട് കല്യാണ പിറ്റേന്ന് തന്നെ സ്വർണ്ണം കടമായി ചോദിക്കുന്നതെങ്ങനാ

ആൻ്റീ .. എന്തേലും കഴിക്കണ്ടെ പോകുന്ന വഴിയിൽ ഫാസ്റ്റ്ഫുഡ് കടകളുണ്ടാവും ,കുട്ടികൾക്ക് വിശക്കുന്നുണ്ടാവില്ലേ?

മനു ,പുറകിലേക്ക് തിരിഞ്ഞ് ചോദിച്ചു

കുട്ടികൾക്ക് നല്ല വിശപ്പുണ്ടാവും തൻ്റെ വിശപ്പും ദാഹവുമൊക്കെ എങ്ങോ പോയിരുന്നു ,എങ്ങനെയെങ്കിലും സുരേഷേട്ടനെ ഈ കുരുക്കിൽ നിന്ന് മോചിപ്പിക്കുന്നത് വരെ തനിക്ക് ഊണും ഉറക്കവുമൊന്നുമുണ്ടാവില്ല

എനിക്ക്. വിശപ്പില്ല മനു, കുട്ടികൾക്ക് എന്തേലും വാങ്ങി കൊടുക്കാം, നീ നല്ല കടയുണ്ടെങ്കിൽ നിർത്തിക്കോ

ഞങ്ങർക്കും വിശപ്പില്ല മമ്മീ ... നമുക്ക് ഗീതാൻ്റിയുടെ വീട്ടിലേക്ക് പോകാം

മക്കളുടെ മനസ്സിലും അച്ഛനുണ്ടായ അനുഭവങ്ങൾ വലിയ ആഘാതം സൃഷ്ടിച്ചിട്ടുണ്ടെന്ന് ശാലിനിക്ക് മനസ്സിലായി.

എങ്കിൽ പോട്ടെ മനു ,കഴിക്കലൊക്കെ

ഇനി വീട്ടിൽ ചെന്നിട്ടാവാം

ബൈപ്പാസ് റോഡിലേക്ക് കയറിയപ്പോൾ, ഡ്രൈവർ കാറ് പറത്തി വിട്ടു.

രാത്രി ഒൻപത് മണിയോട് കൂടി എല്ലാവരും കല്യാണ വീട്ടിലെത്തി

തറവാട്ട് മുറ്റത്ത് ഓലയും മുളയും കൊണ്ട് തീർത്ത വലിയ പന്തലിനുള്ളിലേക്ക് കടക്കുമ്പോൾ അകത്ത് നിന്ന ഗീത ഓടി വന്നു

എന്നാലും നാത്തൂനെ വലിയ ചതിയായി പോയിത് എല്ലാത്തിനും കാർന്നോരെ പോലെ മുന്നിൽ നില്ക്കേണ്ട സുരേഷേട്ടൻ വരില്ലെന്നറിഞ്ഞപ്പോൾ ഇതൊരു മരണവീട് പോലെയായി ,നീതുവിന് ഇത് പോലൊരു സങ്കടമില്ല ,

സുരേഷങ്കിളില്ലാതെ നാളെയവൾ മണ്ഡപത്തിൽ കയറില്ലെന്നാ പറയുന്നത്,

ഗീത പരിഭവത്തിൻ്റെ കെട്ടഴിച്ചു.

ആഹാ അത് കൊള്ളാമല്ലോ? അപ്പോൾ ഞാനും കുട്ടികളുമൊന്നും അവൾക്ക് വലുതല്ലേ ? ഞാനവളെയൊന്ന് കാണട്ടെ,

ശാലിനി അകത്തെ മുറിയിലേക്ക് കയറി ചെന്നു.

അവളെ കണ്ടതും നീതു,

മുഖം കുനിച്ചിരുന്നു

ഓഹ് കല്യാണപ്പെണ്ണിൻ്റെയൊരു ഗമ കണ്ടില്ലേ?,എടീ നീതു.. നിൻ്റെ കല്യാണം കൂടാനല്ലേ നോക്കെത്താ ദൂരത്ത് നിന്ന് ഞങ്ങള് ഓടിപ്പാഞ്ഞ് വന്നത്?

എന്നാലും ആൻ്റീ... നിങ്ങള് വന്നില്ലേലും എനിക്കിത്രയും സങ്കടമില്ലായിരുന്നു ,എൻ്റെ സുരേഷങ്കിളില്ലായിരുന്നെങ്കിൽ എനിക്കിത്രയും നല്ലൊരു വിവാഹ ജീവിതം ഒരിക്കലും കിട്ടില്ലായിരുന്നു, എൻ്റെ അമ്മയും വല്യച്ഛനും എത്ര ശ്രമിച്ചാലും ഒരു കൂലിപ്പണിക്കാരൻ്റെയപ്പുറത്തേക്ക് അവർക്ക് ചിന്തിക്കാനാവില്ല അച്ഛനില്ലാത്ത എന്നോട് ഒരു അച്ഛൻ്റെ സ്നേഹവും കരുതലുമുള്ളത് കൊണ്ടല്ലേ നല്ലൊരു തറവാട്ടിലെ ജോലിയുള്ള ചെക്കനെ കൊണ്ട് തന്നെ എന്നെ കല്യാണം കഴിപ്പിക്കണമെന്ന് അദ്ദേഹം നിർബന്ധം പിടിച്ചത്, അതിന് വേണ്ടി കണക്ക് നോക്കാതെ ഇഷ്ടം പോലെ പണം ചിലവഴിച്ചു ,സുരേഷങ്കിളിനെ പോലെ മനസ്സിൽ നന്മയുള്ളവർക്കേ ഇങ്ങനെയൊക്കെ ചെയ്യാൻ കഴിയു,

അത് കേട്ട ശാലിനിയുടെ ഉള്ള് തേങ്ങി

ഇത്രയും നന്മയുള്ള ആ പാവം മനുഷ്യനെയാണ് കളളക്കേസിൽ കുടുക്കി പോലീസ് കസ്റ്റഡിയിൽ വച്ചിരിക്കുന്നത്

പുറത്തേയ്ക്ക് ചാടാൻ വെമ്പി നിന്ന കണ്ണീർക്കണങ്ങളെ കർച്ചീഫ് കൊണ്ട്, ആരും കാണാതെ ,ശാലിനി മെല്ലെ തുടച്ചെടുത്തു.

മോള് സങ്കടപ്പെടണ്ട, അങ്കിളിന് അവിടുന്ന് തീരെ ഒഴിഞ്ഞ് നില്ക്കാൻ പറ്റാത്തത് കൊണ്ടല്ലേ ഞങ്ങളുടെയൊപ്പം വരാതിരുന്നത് ,മോള് നോക്കിക്കോ ? നമ്മളെയെല്ലാം ഞെട്ടിച്ച് കൊണ്ട് അടുത്ത് തന്നെ ഒരു ദിവസം അങ്കിളിവിടെ ലാൻ്റ് ചെയ്യും അത് കൊണ്ട് ഇപ്പോൾ സന്തോഷത്തോടെയിരിക്ക്

ശാലിനി നീതുവിൻ്റെ മൂർദ്ധാവിൽ ചുംബിച്ചിട്ട് അവളുടെ മുടിയിഴകളിൽ തഴുകി സമാധാനിപ്പിച്ചു.

നിങ്ങളൊന്നും കഴിച്ചിട്ടുണ്ടാവില്ലല്ലോ ?

കൈ കഴുകിയിട്ട് വാ ,ഞാൻ പോയി വെജിറ്റബിൾ ബിരിയാണി ഇങ്ങോട്ട് എടുത്തോണ്ട്  വരാം,

അത് വേണ്ട നാത്തൂനെ ഞങ്ങള് പന്തലിലോട്ട് വരാം അവിടിരുന്ന് കഴിക്കുമ്പോൾ എല്ലാവരെയുമൊന്ന് കാണുകയും സംസാരിക്കുകയും ചെയ്യാമല്ലോ?

നീറിപ്പുകയുന്ന മനസ്സിന് ഒരാശ്വാസമാകാൻ പരമാവധി എൻഗേജ്ഡ് ആവാനായിരുന്നു ശാലിനി ശ്രമിച്ചത്.

നീയെന്താ ഒന്നും കഴിക്കാതെ വെറുതെ കുഴച്ച് കൊണ്ടിരിക്കുന്നത് ?ചോറ് ഇഷ്ടപ്പെട്ടില്ലെങ്കിൽ നല്ല ഇഡ്ഡലിയും സാമ്പാറുമുണ്ട് എടുക്കട്ടെ

വല്യേട്ടൻ്റെ ചോദ്യം കേട്ടവൾ തല ഉയർത്തി നോക്കി

അയ്യോ വേണ്ട എട്ടാ ... എനിക്ക് വലിയ വിശപ്പില്ല, ഞാൻ  മക്കൾക്ക് കമ്പനി കൊടുക്കാൻ, കൂടെ ഇരുന്നു എന്നേയുള്ളു

പെട്ടെന്ന് വായിൽ വന്നൊരു കളവ് ,വല്യേട്ടന് മറുപടിയായി കൊടുത്തു.

എന്നാൽ മക്കള് വയറ് നിറച്ച് കഴിക്ക്,

ദേവുവിൻ്റെയും, നന്ദുവിൻ്റെയും തോളിൽ തട്ടി വാത്സല്യത്തോടെ പറഞ്ഞിട്ട്, വല്യേട്ടൻ അടുത്ത ടേബിളിലേക്ക് പോയപ്പോൾ ദൂരെ ഒരാൾ തൻ്റെ നേരെ നോക്കി മണ്ഡപത്തിൻ്റെ തൂണിൽ ചാരിനില്ക്കുന്നത് ശാലിനി കണ്ടു.

നരേന്ദ്രനല്ലേ അത്?

അവളുടെ ഉള്ളിലിരുന്നാരോ ചോദിച്ചു

താടിയും മുടിയും വളർന്നിട്ട് ആളെ കണ്ടാൽ പെട്ടെന്ന് മനസ്സിലാവില്ല

തൻെറ വല്യമ്മാവൻ്റെ മകനാണ്, താനുമായി മൂന്ന് വയസ്സിൻ്റെ മൂപ്പേയുള്ളു കക്ഷിക്ക് ,പക്ഷേ ഇപ്പോൾ കണ്ടാൽ തൻ്റെ വല്യേട്ടനെക്കാൾ പ്രായം പറയും

അതങ്ങനാ കുടിച്ച് കുടിച്ച് സ്വയം ആരോഗ്യം നശിപ്പിച്ച് കളഞ്ഞതല്ലേ?കഴിഞ്ഞ പ്രാവശ്യം നാട്ടിൽ വന്നപ്പോൾ അമ്മ പറഞ്ഞിരുന്നു നരൻ്റെ കുടി സഹിക്കാൻ വയ്യാഞ്ഞിട്ട് അവൻ്റെ ഭാര്യ ഇട്ടേച്ച് പോയിരിക്കുവാന്ന്

ഒരിക്കൽ അടുത്ത് കിട്ടിയപ്പോൾ സ്വകാര്യമായി താൻ ചോദിച്ചായിരുന്നു എന്തിനാ ഇങ്ങനെ കുടിച്ച് നശിക്കുന്നതെന്ന്

താനാഗ്രഹിച്ചതൊന്നും തനിക്ക് കിട്ടിയിട്ടില്ലന്നും അതിൻ്റെ നിരാശകൊണ്ടാണ് കുടിക്കുന്നതെന്നുമാണ് അന്ന് പറഞ്ഞത്

അതെന്താ നരേട്ടൻ ആഗ്രഹിച്ചതെന്ന തൻ്റെ ചോദ്യത്തിന്, പുച്ഛത്തോടെ ഒന്ന് ചിറി കോട്ടുകയായിരുന്നു ആദ്യം ചെയ്തത്

പശുവും ചത്തു ,മോരിലെ പുളിയും പോയി ഇനി അതൊന്നും പറഞ്ഞിട്ട് ഒരു കാര്യവുമില്ലെന്ന് പറഞ്ഞ് ആടിയാടി അന്ന് തൻ്റെ മുന്നിൽ നിന്ന് പോവുകയായിരുന്നു.

നിങ്ങള് കഴിക്ക് ,മമ്മി ദേ ഇപ്പോൾ വരാം

ശാലിനി എഴുന്നേറ്റ് കൈ കഴുകിയിട്ട് നരേന്ദ്രൻ്റെയടുത്തേക്ക് ചെന്നു

എന്താ നരേട്ടാ... ഇത്, എന്ത് കോലമാണ്? ഇതൊരു കല്യാണ വീടല്ലേ ?ഈ താടിയും മുടിയുമൊക്കെ വെട്ടിച്ച് വൃത്തിയായിട്ടൊന്ന് വന്ന് കൂടെ?

ആദ്യം ഒരു പൊട്ടിച്ചിരിയായിരുന്നു

അതിന് മറുപടിയായി വന്നത്.

ഞാൻ വൃത്തിയും വെടിപ്പുമായി നടന്ന ഒരു കാലമുണ്ടായിരുന്നു, ആരെയും കൊണ്ട് മോശമെന്ന് പറയിപ്പിക്കാതെ, സദ്ഗുണ സമ്പന്നനായി നടന്ന ഒരു കാലം, അന്ന് എന്നെ ശ്രദ്ധിക്കാനോ, ഒരു നല്ല അഭിപ്രായം പറയാനോ ആരുമുണ്ടായിരുന്നില്ല, എന്തിന്? എന്നെ അങ്ങനെ നടക്കാൻ പ്രേരിപ്പിച്ച നീ പോലും എന്നെ മൈൻഡ് ചെയ്തില്ല ,തുറന്ന് പറയാൻ മടിയായിരുന്നത് കൊണ്ട്, എൻ്റെ പെരുമാറ്റങ്ങൾ കൊണ്ടെങ്കിലും എനിക്ക് നിന്നോടുള്ള, ഇഷ്ടം നീ മനസ്സിലാക്കുമെന്ന് കരുതി കാത്തിരുന്ന എന്നെ ഒരു വിഡ്ഡിയാക്കി, പെട്ടെന്നൊരു ദിവസം നീയൊരു ഗൾഫുകാരൻ്റെ ഭാര്യയായി പോയപ്പോഴാണ്, ഞാനാദ്യമായി നിരാശയുടെ പടുകുഴിയിലേക്ക് വീണത്, അതിൽ നിന്നൊരു മോചനം കിട്ടി തുടങ്ങിയത്, മറ്റൊരു പെൺകുട്ടി എൻ്റെ ജീവിതത്തിലേക്ക് കടന്ന് വന്നതോടെയാണ്, പക്ഷേ വിധി അവിടെയും എൻ്റെ സന്തോഷം തല്ലിക്കെടുത്തി, വിവാഹം കഴിഞ്ഞ് അഞ്ചാറ് കൊല്ലമായിട്ടും കുട്ടികളുണ്ടാകാത്തത്, 

എന്നെ കൊണ്ട് കൊള്ളാഞ്ഞിട്ടാണെന്ന് പറഞ്ഞ്, ഒടുവിൽ ഭാര്യയും ഇട്ടേച്ച് പോയപ്പോൾ,നാട്ട്കാര് പറഞ്ഞു, എൻ്റെ കുടി, മൂത്തിട്ടാണെന്ന്‌ ,

ഇനി നീ പറ ,ഞാൻ പിന്നെ എന്തിന് വേണ്ടിയാണ് വൃത്തിയായിട്ട് നടക്കേണ്ടത് ? 

ആർക്ക് വേണ്ടിയാണ് ഞാൻ നല്ലവനായി ജീവിക്കേണ്ടത് ?

അയാളുടെ ചോദ്യങ്ങൾ ശാലിനിയിൽ കുറ്റബോധമുണ്ടാക്കി.

നരൻ പറഞ്ഞത് ശരിയാണ്,

അയാളുടെ സ്നേഹം താൻ അറിയായ്കയല്ല ,

അറിഞ്ഞില്ലെന്ന് നടിച്ചതായിരുന്നു, അച്ഛനൊരിക്കലും നരനുമായുള്ള ബന്ധം അംഗീകരിക്കില്ലെന്നറിയാമായിരുന്നു, അത് കൊണ്ടായിരുന്നു, അന്ന് താൻ സുരേഷേട്ടൻ്റെ ഭാര്യയായി തീർന്നത്

ഒരു നിമിഷം ശാലിനിയുടെ ഓർമ്മകൾ പിന്നിലേക്ക് പോയി.

മമ്മീ ... ദേ സുമാത്തയുടെ കോൾ ...

കുട്ടികളുടെ വിളി കേട്ടപ്പോൾ, നരൻ്റെ മുന്നിൽ നിന്ന് രക്ഷപെടാൻ, ഒരു പഴുത് കിട്ടിയ ആശ്വാസമായിരുന്നു ശാലിനിക്ക്.

ശരി നരേട്ടാ.. ഞാൻ കോൾ അറ്റൻറ് ചെയ്യട്ടെ,

അവൻ്റെ മുന്നിൽ നിന്ന് തിരിച്ച് ചെന്ന് ശാലിനി ഫോൺ വാങ്ങി ചെവിയിൽ വച്ചു.

ങ്ഹാ പറയൂ സുമാത്താ ...

മാം.. എന്തായി പോയിട്ട് ,കാശിൻ്റെ കാര്യം വല്ലതും റെഡിയായോ?

ഇല്ല സുമാത്താ.. നാളെയല്ലേ കല്യാണം, അത് കഴിഞ്ഞേ എല്ലാവരോടും ഞാൻ വിവരം പറയു,സുരേഷേട്ടൻ്റെ വിവരം വല്ലതും അറിയാൻ കഴിഞ്ഞോ ?

ഞാൻ കുറച്ച് മുൻപ് പോയി ഭക്ഷണം കൊടുത്തു , കുഴപ്പമൊന്നുമില്ല ,മാം കാശുമായി വന്നാൽ സാറിന് ഉടൻ റിലീസാകാൻ പറ്റുമെന്ന് പറഞ്ഞു

ഓഹ്, നീയദ്ദേഹത്തിന് ഭക്ഷണം കൊണ്ട് കൊടുത്തല്ലേ ?ഞാൻ പറയാതെ തന്നെ നിനക്കത് തോന്നിയല്ലോ സുമാത്താ..

അദ്ദേഹം എൻ്റെ ഭായിയെ പോലെയല്ലേ മാം ,ഞാൻ ശ്രദ്ധിച്ചോളം ,സമാധാനമായിരുന്നോളു

സുമാത്തയുടെ വാക്കുകൾ ശാലിനിക്ക് നല്കിയ സമാധാനം തെല്ലൊന്നുമായിരുന്നില്ല .

ഭാഗം-3

ഗൾഫുകാരൊക്കെ നാട്ടിലെത്തീട്ടുണ്ടെന്ന് ഞങ്ങളറിഞ്ഞായിരുന്നു ,

എപ്പോഴാണാവോ ഈ പാവപ്പെട്ടവരുടെയൊക്കെ വീട്ടിലോട്ടൊന്ന് വരുന്നത്?

കല്യാണദിവസം, സതീശൻ്റെയൊപ്പം മുഹൂർത്ത സമയത്ത് എത്തിയ ജമന്തിയുടെ ചോദ്യം കേട്ട് ശാലിനിക്ക് അവളോട് ഈർഷ്യ തോന്നി.

പണ്ടേ അവളങ്ങനെ തന്നെയാ

ഒരുതരം മുന വച്ചുള്ള സംസാരം ,പക്ഷേ ഇപ്പോൾ അവളുടെ നിലവാരത്തിൽ പ്രതികരിക്കേണ്ട സാഹചര്യമല്ല,

സംയമനം പാലിച്ച് കൊണ്ട് ശാലിനി ,അവളെ നോക്കി ഒന്ന് മന്ദഹസിച്ചു.

ഇന്നലെ വന്നപ്പോൾ ഒരു പാട് രാത്രിയായി ജമന്തീ.. ഇന്ന് കല്യാണത്തിരക്കൊന്ന് കഴിഞ്ഞിട്ട് അങ്ങോട്ടേയ്ക്കിറങ്ങണമെന്ന് കരുതിയിരിക്കുവായിരുന്നു,

ചേട്ടന് വരാനൊത്തില്ല ,അല്ലേ ചേട്ടത്തി...

അടുത്ത് നിന്ന സതീശൻ ചോദിച്ചു.

ഇല്ല വന്നില്ല ,അവിടെ ചില ഇഷ്യൂസ് ഉണ്ട് ,ഒക്കെ ഞാൻ സതീശനോട് പറയാം, ഈ ചടങ്ങൊന്ന് കഴിയട്ടെ

ഓഹ് ചേട്ടൻ വന്നില്ലെങ്കിലെന്താ? കാര്യങ്ങളൊക്കെ മംഗളമായി നടന്നാൽ പോരെ ?അല്ലേ ചേടത്തീ ...?

വീണ്ടും ജമന്തിയുടെ വക കുത്ത് വാക്ക്.

ശാലിനി ചിരിച്ച് കൊണ്ട് തലയാട്ടി.

താലികെട്ട് കഴിഞ്ഞയുടനെ എല്ലാവരും സദ്യ കഴിക്കാനുള്ള തിക്കും തിരക്കുമായിരുന്നു.

സദ്യ കഴിച്ചയുടനെ തന്നെ സതീശനും ജമന്തിയും തിരക്കുണ്ടെന്നും പറഞ്ഞ് തിരിച്ച് പോയിരുന്നു

മൂന്ന് മണിക്ക് ശേഷമാണ് ചെറുക്കനും പെണ്ണും ഇറങ്ങിയത്

അത് വരെ ഉള്ളിലെ പിടച്ചിൽ പുറത്ത് കാണിക്കാതെ എല്ലാവരോടും ചിരിച്ച് കൊണ്ട് വിശേഷങ്ങൾ പങ്ക് വയ്ക്കാൻ ശാലിനി നന്നേ പാട് പെടുന്നുണ്ടായിരുന്നു

ഗീതേ.. കുട്ടികളിവിടെ നില്ക്കട്ടെ, ഞാൻ സതീശൻ്റവിടെവരെയൊന്ന് പോയിട്ട് വരാം

ബന്ധുക്കളും അയൽക്കാരുമൊക്കെ പിരിഞ്ഞ് പോയപ്പോൾ തിരക്ക് കുറഞ്ഞ നേരം നോക്കി ശാലിനി ഗീതയോട് പറഞ്ഞു ഇനിയും കാത്ത് നില്ക്കാൻ ശാലിനിക്ക് കഴിയില്ലായിരുന്നു എത്രയും വേഗം അൻപത് ലക്ഷം രൂപ സംഘടിപ്പിച്ച് ഗൾഫിലേക്ക് തിരിച്ച് പറക്കാനായി അവളുടെ മനസ്സ് വെമ്പുകയായിരുന്നു.

ഒരു ഓട്ടോറിക്ഷയിലാണ് സതീശൻ്റെ വീടിന് മുന്നിൽ ശാലിനി വന്നിറങ്ങിയത്

സുരേഷേട്ടൻ എഴുതി കൊടുത്ത മുപ്പത് സെൻ്റിന് ചുറ്റും സതീശൻ മുള്ള് വേലി കെട്ടി അതിര് തിരിച്ചിട്ടുണ്ട്

അല്ലാ ഇതാരാ വരുന്നത് കുട്ടികളെ കൊണ്ട് വന്നില്ലേ?

ഗേറ്റ് തുറക്കുന്ന ശബ്ദം കേട്ട് ജമന്തി അകത്ത് നിന്ന് ഇറങ്ങി വന്നു.

ഇല്ല അവരവിടെ വല്യേട്ടൻ്റെ കുട്ടികളുമായിരിക്കുന്നത് കൊണ്ട് ഞാൻ വിളിച്ചില്ല ,സതീശനോട് സീരിസ്സായിട്ട് ഒരു കാര്യം പറയാനുള്ളത് കൊണ്ടാണ് ഞാനിങ്ങോട്ട് വന്നത്

അത് കേട്ട് ജമന്തിയുടെ നെറ്റി ചുളിഞ്ഞു

സതീശേട്ടാ.. ദേ ചേട്ടത്തി വന്നിരിക്കുന്നു,

ആകാംക്ഷ അടക്കാനാവാതെ ജമന്തി അകത്തേയ്ക്ക് നോക്കി വിളിച്ച് പറഞ്ഞു.

ചേട്ടത്തി അകത്തേയ്ക്ക് കയറി വാ ,എന്തിനാ വരാന്തയിലിരിക്കുന്നത്

ഇല്ല സതീശാ .. എനിക്ക് ഇരുന്നാൽ ഇരിപ്പുറയ്ക്കില്ല, ഞങ്ങളൊരു വലിയ പ്രശ്നത്തിൽ പെട്ടിരിക്കുവാ,

എന്താ ചേട്ടത്തീ എന്താ കാര്യം?

ജിജ്ഞാസയോടെ സതീശൻ ചോദിച്ചു.

നിറകണ്ണുകളോടെ ശാലിനി നടന്നതെല്ലാം വിവരിച്ചു.

സുരേഷേട്ടൻ റിലീസായാൽ എത്രയും വേഗം സതീശൻ്റെ ആധാരം തിരിച്ചെടുത്ത് തരാൻ കഴിയും,

ശാലിനി ദൈന്യതയോടെ പറഞ്ഞു

അതിന് ആധാരം ഇവിടെയിരിപ്പില്ലല്ലോ? അല്ലേ സതീശേട്ടാ ...?

തൻ്റെ ഭർത്താവ്, വായ തുറക്കുന്നതിന് മുമ്പ്, ജമന്തി ചാടിക്കേറി മറുപടി പറഞ്ഞു

അത് ശരിയാ ചേട്ടത്തി ,

എൻ്റെ കടയൊന്ന്  വലുതാക്കുന്നതിനായി ഒരു അഞ്ച് ലക്ഷം രൂപ പെട്ടെന്ന് ആവശ്യം വന്നപ്പോൾ ഞാനത് കൊണ്ട് പോയി പണയം വച്ചിട്ടാ പേഴ്സണൽ ലോൺ എടുത്തത്

പെറുക്കി, പെറുക്കി സതീശൻ ,ഒരു വിധം പറഞ്ഞൊപ്പിച്ചു

ഭാര്യയെ സപ്പോർട്ട് ചെയ്യാനായി സതീശൻ കളവ് പറഞ്ഞതാണെന്ന് അവരുടെ രണ്ട് പേരുടെയും ശരീരഭാഷയിൽ നിന്ന് ജമന്തിക്ക് വ്യക്തമായിരുന്നു.

അല്ലെങ്കിൽ തന്നെ അഞ്ച് ലക്ഷം രൂപയ്ക്ക് വേണ്ടി അൻപത് ലക്ഷം മതിപ്പുള്ള വീടിൻ്റെ ആധാരം പണയം വയ്ക്കേണ്ട കാര്യമില്ലല്ലോ? അതിനുള്ള സ്വർണ്ണാഭരണങ്ങളൊക്കെ ജമന്തിയുടെ ദേഹത്ത് തന്നെയുണ്ട്

സതീശൻ്റെയും ജമന്തിയുടെയും മറുപടി കേട്ടപ്പോൾ ശാലിനിക്ക് തൻ്റെ ആത്മവിശ്വാസമെല്ലാം പോയിരുന്നു

ഈശ്വരാ.. ഇനി ആകെയുള്ള പ്രതീക്ഷ നീതുവിൻ്റെ സ്വർണ്ണമാണ്, 

അത് കിട്ടിയാലും ബാക്കി പത്ത് മുപ്പത് ലക്ഷം രൂപ ,എങ്ങനെ കണ്ടെത്തുമെന്ന ചിന്ത ,സതീശൻ്റെ വീട്ടിൽ നിന്ന് യാത്ര പറഞ്ഞിറങ്ങുമ്പോൾ ശാലിനിയെ അലട്ടികൊണ്ടിരുന്നു.

അന്ന് രാത്രി ,സുമാത്ത ഫോൺ ചെയ്തപ്പോൾ ഒരു പൊട്ടിക്കരച്ചിലോടെയാണ് ശാലിനി സതീശൻ്റെ വീട്ടിൽ പോയ കാര്യം പറഞ്ഞത്

സാരമില്ല മാം ,വിഷമിക്കേണ്ട എന്തെങ്കിലും വഴി ദൈവം കാണിച്ച് തരും

രണ്ട് ദിവസം കൂടി കഴിഞ്ഞാണ് നീതുവിൻ്റെ ഭർത്താവിൻ്റെ വീട്ടിലേക്ക് അടുക്കള കാണൽ ചടങ്ങിനായി എല്ലാവരും പോയത്

ആൻ്റീ... സുരേഷങ്കിൾ ഇത് വരെ വന്നില്ലാട്ടോ?

ശാലിനിയെ കണ്ടപ്പോൾ നീതു കൊഞ്ചലോടെ അവളെ ചുറ്റിപ്പിടിച്ചു.

വരും മോളേ... പക്ഷേ അതിന് മോളുടെയൊരു സഹായം ആൻ്റിക്ക് വേണമായിരുന്നു

എന്താ ആൻ്റി ... എന്താ കാര്യം?

ഗീതയോടൊപ്പം ശാലിനിയേയും കൂട്ടി നീതു, തൻ്റെ മുറിയിലേക്ക് പോയി.

മറ്റാരും കേൾക്കാതെ ശാലിനി വിവരങ്ങളെല്ലാം നീതുവിനോട് പറഞ്ഞു ,ഗീതയോടവൾ തലേ ദിവസം തന്നെ, എല്ലാം തുറന്ന് പറഞ്ഞിരുന്നു .

അമ്മ വിളിച്ചപ്പോൾ ചില സൂചനകൾ തന്നിരുന്നു ,പക്ഷേ ആൻ്റീ .. ഏട്ടൻ്റെ അമ്മ കുറച്ച് പ്രശ്നക്കാരിയാണ് ,ഇന്നലെ തന്നെ എൻ്റെ കൈയ്യിലുള്ള സ്വർണ്ണം വാങ്ങി അവരുടെ അലമാരയിൽ ഭദ്രമായി പൂട്ടിവച്ചു, എൻ്റെ കൈയ്യിലിരുന്നാൽ ഏട്ടനതെടുത്ത് ധൂർത്തടിക്കുമെന്ന് പറഞ്ഞാണ് അങ്ങനെ ചെയ്തത്

ഗീത രാവിലെ വിളിച്ച് ,മകളെ പറഞ്ഞ്പഠിപ്പിച്ചതാണോ നീതു പറഞ്ഞ കളവെന്ന്, ശാലിനി വേദനയോടെ ഓർത്തു.

ആകെയുണ്ടായിരുന്ന പിടിവള്ളിയും നഷ്ടപ്പെട്ടപ്പോൾ ശാലിനിയുടെ മനസ്സ് ,നൂല് പൊട്ടിയ പട്ടം പോലെ ലക്ഷ്യമില്ലാതെ പാറി നടന്നു.

രാത്രിയിൽ സുമാത്തയെ വിളിച്ച് ശാലിനി പൊട്ടിക്കരഞ്ഞു.

മാം, ഇനിയവിടെ നില്ക്കേണ്ട, കുട്ടികളെയും കൂട്ടി എത്രയും വേഗം തിരിച്ച് വന്നാൽ മതി,

സുമാത്ത പറഞ്ഞതാണ് ശരിയെന്ന് ശാലിനിക്കും തോന്നി ,ഇനിയിവിടെ നിന്നിട്ട് ഒരു ഫലവുമില്ല ,തൻ്റെയും സുരേഷേട്ടൻ്റെയും ബന്ധുക്കൾ തങ്ങളെ സഹായിക്കില്ല

ഗീതയോടും വല്യേട്ടനോടും യാത്ര പറഞ്ഞ് ശാലിനി കുട്ടികളുമായി ഗൾഫിലേക്ക് തിരിച്ചു.

എയർപോർട്ടിൽ സുമാത്ത അവരെ കാത്ത് നില്ക്കുന്നുണ്ടായിരുന്നു.

സുമാത്താ ... നീയെന്താ ഇവിടെ?

ശാലിനിക്ക് ആശ്ചര്യം തോന്നി.

എൻ്റെ ഭായിയെ മോചിപ്പിനുള്ള പണം ., ശരിയായിട്ടുണ്ട് മാം ,

ആ സന്തോഷ വാർത്ത മാമിനെ എത്രയും വേഗം നേരിട്ടറിയിക്കാനാണ്, ഞാൻ ഇവിടെയെത്തിയത് 

ങ് ഹേ എന്താ നീ പറഞ്ഞത് ?

ശാലിനി ആകാംക്ഷയോടെ ചോദിച്ചു

അതേ മാം ,അന്ന് സാറിനെ പോലീസ് കൊണ്ട് പോയത് മുതലുള്ള എല്ലാ കാര്യങ്ങളും ഞാനെൻ്റെ ഹസ്ബൻ്റിനോട് പറയുന്നുണ്ടായിരുന്നു ,

സതീശൻ പൈസ തന്നില്ലന്ന് പറഞ്ഞപ്പോഴെ,എനിക്കറിയാമായിരുന്നു ,നാട്ടിൽ നിന്നും നിങ്ങൾക്ക് ഒന്നും കിട്ടില്ലെന്ന്,

അതും ഞാൻ എൻ്റെ ഹസ്ബൻ്റിനോട് പറഞ്ഞു,

ഞങ്ങൾക്ക് നാട്ടിൽ ,കുറേ കൃഷിയിടങ്ങളുണ്ടായിരുന്നു, അവിടെയൊരു വലിയ കമ്പനി വന്ന് ,അവർക്ക് ഫാക്ടറി നിർമ്മിക്കാൻ എല്ലാവരോടും സ്ഥലം ചോദ്ദിച്ച് കൊണ്ടിരിക്കുകയായിരുന്നു, കൃഷിസ്ഥലമായത് കൊണ്ട് ആരും കൊടുക്കാൻ തയ്യാറായില്ല ,ഞങ്ങളും കൊടുക്കില്ലെന്ന് പറഞ്ഞു,

അപ്പോഴാണ്, ഞാൻ സാറിൻ്റെ കാര്യങ്ങളും, മാം നാട്ടിൽ പോയ വിവരങ്ങളുമൊക്കെ ഹസ്ബൻ്റിനോട് പറഞ്ഞത്,

സത്യത്തിൽ എൻ്റെ മനസ്സിൽ തോന്നിയ കാര്യം ഹസ്ബൻ്റ്,എന്നോട് പറഞ്ഞപ്പോൾ, ഞാൻ ഞെട്ടിപ്പോയി, ഞങ്ങൾക്ക് ആകെയുണ്ടായിരുന്ന പത്തേക്കർ സ്ഥലം, അൻപത് ലക്ഷം രൂപയ്ക്ക് കമ്പനിക്ക് കച്ചവടമായെന്നും ,ആ പണം കിട്ടിയാലുടനെ, എത്രയും വേഗം അയക്കാമെന്നും പറഞ്ഞു ,

അത് കേട്ട് കുറച്ച് നേരത്തേയ്ക്ക്, ശാലിനി നിർവ്വികാരയായി നിന്നു പോയി.

പൊടുന്നനെ അവൾ സുമാത്തയെ വാരിപ്പുണർന്നു.

നീയെനിക്ക് വെറുമൊരു സഹായിയല്ല, എൻ്റെ അമ്മയുടെ വയറ്റിൽ പിറക്കാതെ പോയ കൂടെപ്പിറപ്പാണ്,

അത് വേണ്ട മാം,  കൂടെപ്പിറപ്പുകൾ സഹായിക്കില്ലെന്ന് മാമിന് മനസ്സിലായില്ലേ?

ശരിയാ സുമാത്താ... 

നീയെൻ്റെ കൂടെപ്പിറപ്പല്ല ,

അയൾക്കാരിയല്ല ,കൂട്ടുകാരിയല്ല ,എന്തിന് ?എൻ്റെ നാട്ടുകാരി പോലുമല്ല, എന്നിട്ടും നീയെന്നെ കഴിവിൻ്റെ പരമാവധി സഹായിച്ചു, ഇതിന് പകരമായി ഞാനെന്ത് തന്നാൽ മതിയാകും?

സന്തോഷം കൊണ്ട് ശാലിനിയുടെ ചുണ്ടുകൾ വിതുമ്പി.

നമ്മളൊരു സ്‌റ്റേറ്റുകാരല്ലെങ്കിലും നമ്മളെല്ലാം മനുഷ്യരല്ലേ ?

ശരിയാ സുമാത്താ... ആ മനുഷ്യത്വം ,എൻ്റെ വീട്ടുകാർക്ക് മാത്രം ഉണ്ടായില്ല

സാരമില്ല മാം, അതെല്ലാം മറന്നേക്കു, നമുക്ക് ഭായിയുടെ അടുത്തേയ്ക്ക് പോകാം, വരു..

ശാലിനിയെയും, കുട്ടികളെയും കൂട്ടി സുമാത്ത, കാറിലേക്ക് കയറി, സുരേഷിൻ്റെ അടുത്തേയ്ക്ക് യാത്രയായി.

📝സജി തൈപ്പറമ്പ്.