🍁മഴവില്ല് ഫുൾ പാർട്ട്🍁

🍁മഴവില്ല് ഫുൾ പാർട്ട്🍁

ഈ പെണ്ണിനെ ഇങ്ങനെ നിർത്തിയാൽ മതിയോ? കെട്ടിച്ചയക്കണ്ടേ ഷൈലജേ..?

സുമതിയമ്മായി, അമ്മയോട് ചോദിക്കുന്നത് കേട്ടാണ്, പാർവ്വതി അടുക്കളയിലേക്ക് വരുന്നത്.

വേണം ചേച്ചീ...വയസ്സ് ഇരുപത് കഴിഞ്ഞെങ്കിലും ,അവളെ കണ്ടാൽ അത് പറയില്ലല്ലോ? അതെങ്ങനാ, ഒരു വക ആഹാരം അവള് കഴിക്കില്ല ,പാലും മുട്ടയും ഇറച്ചിയുമൊന്നും അവൾക്ക് വേണ്ട, ഞാൻ എന്തേലും പറഞ്ഞാൽ ഉടനെ പറയും, അമ്മേ എനിക്ക് സീറോ സൈസായിട്ടിരുന്നാൽ മതിയെന്ന്

ആങ്ഹാ... അത് കൊള്ളാമല്ലോ, നേരാണോടീ.. മോളെ അവള് പറയുന്നത്?

അതേ അമ്മായി, എനിക്ക് ദീപികാ പദുക്കോണിനെ പോലെയുള്ള ബോഡി മതി ,അല്ലാതെ അമ്മയെപ്പോലെ തടിച്ചിയാവണ്ട 

എൻ്റെ കൊച്ചേ.. അവരൊക്കെ സിനിമേലഭിനയിക്കാൻ വേണ്ടിയാണ് ,അങ്ങനൊക്കെ തടി കുറച്ച് നടക്കുന്നത്, അതവരുടെ ജോലിയുടെ ഭാഗമാണ് ,നീയങ്ങനാണോ ?നാളെയൊരു പുരുഷനോടൊപ്പം ജീവിച്ച്, അവൻ്റെ കൊച്ചുങ്ങളെ പ്രസവിക്കേണ്ടവളാ ,ഇപ്പോഴത്തെ ആണുങ്ങൾക്ക് ഇത്തിരി ശരീരപുഷ്ടിയൊക്കെയുള്ള പെമ്പിള്ളാരെയാണിഷ്ടം

അതും പറഞ്ഞ്, സുമതിയമ്മായി അവളുടെ ഒതുങ്ങിയ മാറിൽ ചെറുതായൊന്ന് നുള്ളി.

ഛെ ! ഒന്ന് ചുമ്മാതിരിക്കമ്മായി

അവളുടെ മുഖം ലജ്ജയിൽ മുങ്ങി .

എന്നാൽ പിന്നെ ഒരു കാര്യം ചെയ്യാം, ഇവൾക്കിപ്പോൾ കോളേജില്ലാത്ത സമയമല്ലേ?

ഞാൻ പോകുമ്പോൾ, ഇവളെ കൂടിയങ്ങ് കൊണ്ട് പോകാം,

കുറച്ച് ദിവസം അവളവിടെ നില്ക്കട്ടെ, എന്നിട്ട് ഞാനൊന്ന് നോക്കട്ടെ, ഇവളെയൊരു തടിച്ചിപാറു ആക്കാൻ പറ്റുമോന്ന്

ങ്ഹാ അതാ ചേച്ചി നല്ലത്, 

ചേച്ചി പറഞ്ഞാൽ, അവൾക്ക് അനുസരിക്കാതിരിക്കാൻ പറ്റില്ല

അമ്മായീടെ വീടെന്ന് കേട്ടപ്പോൾ, പാർവ്വതിക്കുമൊരു കൊതി തോന്നി.

പണ്ട്, വെക്കേഷന് പോയി ഒരു പാട് തവണ നിന്നിട്ടുള്ളതാണ്, പ്രായമായതിന് ശേഷം, പിന്നെ പോയിട്ടില്ല 

അമ്മായിക്ക് രണ്ടാൺ മക്കളാണ്, ഗിരിയേട്ടനും മനുവേട്ടനും ,

രണ്ടും തൻ്റെ മുറച്ചെറുക്കൻമാരായിരുന്നെങ്കിലും,തനിക്കവർ തൻ്റെ ആങ്ങളമാരെ പ്പോലെ തന്നെയായിരുന്നു.

വലിയ കുളവും, നിറയെ മരങ്ങളുമുള്ള വിശാലമായ തൊടിയോട് കൂടിയ, പഴയൊരു തറവാട് വീടായിരുന്നു അത് .

പിന്നീടത്, അമ്മായിടെ ആൺമക്കൾ വലുതായി ജോലി കിട്ടി ഉദ്യോഗസ്ഥരായി കഴിഞ്ഞപ്പോൾ, പഴകിയ തറവാട് പൊളിച്ച് മാറ്റി, പുതിയ കോൺക്രീറ്റ് സൗധം പണിതു.

അതിന് ശേഷം, ഏതാണ്ട് രണ്ട് വർഷം മുൻപാണ് ,മൂത്തവനായ ഗിരിയേട്ടൻ വിവാഹം കഴിക്കുന്നത്.

താനന്ന് സിഗ്രിക്ക് പഠിക്കുന്ന സമയമാണ് ,ഗിരിയേട്ടൻ താലികെട്ടി കൊണ്ട് വന്ന പെണ്ണിനെ കണ്ട് ,തനിക്കന്ന് ചെറിയൊരു കുശുമ്പ് തോന്നിയിരുന്നു.

എന്താ ഒരു നിറം ,മുടിയാണേൽ നിതംബത്തിന് താഴെ വരെ പനങ്കുല പോലെ പടർന്ന് പന്തലിച്ച് കിടക്കുന്നു, ചിരിക്കുമ്പോൾ നുണക്കുഴി തെളിയുന്ന ആ മുഖത്ത്, ഒരു കുരുപോലുമില്ലല്ലോ എന്ന്, തൻ്റെ മുഖത്തെ കുരുക്കൾ പൊട്ടിയ കറുത്ത പാടുകളെ തഴുകിക്കൊണ്ട് താനോർക്കുമായിരുന്നു. 

സത്യത്തിൽ, സ്ത്രീകൾക്ക് പോലും പ്രണയം തോന്നിപ്പോകുന്നൊരു സുന്ദരിയായിരുന്നു, സിതാരയെന്ന പേരുള്ള ഗിരിയേട്ടൻ്റെ ഭാര്യ.

പക്ഷേ, ആ ദാമ്പത്യം അധികനാൾ നീണ്ട് നിന്നില്ല ,കല്യാണം കഴിഞ്ഞ് ഒരു വർഷം തികയുന്നതിന് മുൻപ്, തെക്കേ തൊടിയിലെ വലിയ കുളത്തിൽ, സിതാരേച്ചി മുങ്ങി മരിച്ചെന്ന വാർത്ത കേട്ട്, താനുൾപ്പെടെയുള്ള എലാവരും ഞെട്ടിത്തരിച്ച് പോയി.

പലരും പലതും പറഞ്ഞു.

കാരണവന്മാർ പതിറ്റാണ്ടുകളായി പൂജ ചെയ്തിരുന്ന തെക്കിനിയുൾപ്പെടുന്ന, പഴയ തറവാടിൻ്റെ അടിക്കല്ലിളക്കി മാറ്റിയത് കൊണ്ടാണ്, ഒരു ദുർമരണമുണ്ടായതെന്നും,

അതല്ല, ഗിരിയേട്ടനുമായി പിണങ്ങിയിട്ട്, സിതാരേച്ചി ആത്മഹത്യ ചെയ്തതാണെന്നും നാട്ടുകാർ പറഞ്ഞ് പരത്തി.

പക്ഷേ, പോലീസ് അന്വേഷണത്തിൽ, നീന്തൽ തീരെ

വശമില്ലാതിരുന്ന സിതാരേച്ചി, കുളത്തിൽ കുളിക്കാനുള്ള ആഗ്രഹം മൂത്തപ്പോൾ, മറ്റുള്ളവരുണരുന്നതിന് മുമ്പ് ഒറ്റയ്ക്ക് കുളിക്കാനിറങ്ങിയതാണെന്നും,

വഴുക്കലുള്ള പടിയിൽ ചവിട്ടി കാല് തെന്നി ആഴമുള്ള കുളത്തിലേക്ക് വീണ് മുങ്ങി മരിച്ചതാണെന്നും കണ്ടെത്തുകയായിരുന്നു.

അതോടെ, കിംവദന്തികൾ പറഞ്ഞ് നടന്നവരൊക്കെ, വായടച്ചു.

നീയെന്താ മോളേ.. ആലോചിച്ചോണ്ട് നില്ക്കുന്നത്, വേഗം പോയി ഡ്രെസ്സ് മാറിയിട്ട് എന്തെങ്കിലുമൊക്കെ എടുക്കാനുണ്ടെങ്കിൽ, അതു മെടുത്തോണ്ട് ഇറങ്ങാൻ നോക്ക്

അമ്മായീടെ ശബ്ദം കേട്ടപ്പോഴാണ് ,പാർവ്വതി ഫ്ളാഷ് ബാക്കിൽ നിന്ന് തിരിച്ച് വന്നത്.

പൊന്നേഴത്ത് എന്ന പേര് ,സ്വർണ്ണലിപിയിൽ കൊത്തിവച്ച, വലിയ ഗേറ്റ് കടന്ന് കാറ് അകത്തേയ്ക്ക് കടന്നപ്പോൾ, പാർവതിയുടെ നോട്ടം, അറിയാതെ വീടിനോട് ചേർന്ന് നില്ക്കുന്ന തെക്കെ തൊടിയിലെ വലിയകുളത്തിലേക്ക് വീണു. 

ഇറങ്ങി വാ മോളേ ...

രണ്ട് നില മാളികയുടെ പോർച്ചിൽ കാറ് നിർത്തിയപ്പോൾ, ആദ്യമിറങ്ങിയ സുമതി പാർവ്വതിയെ അകത്തേക്ക് ക്ഷണിച്ചു.

ഏട്ടൻമാര് രണ്ട് പേരും' ജോലിക്ക് പോയതാണോ അമ്മായീ...

അതേ മോളെ, മനു ഇപ്പോൾ വരും, അവനെത്തുമ്പോൾ ,

എന്നെയിവിടെ കണ്ടില്ലെങ്കിൽ ബഹളം വയ്ക്കും, അതാ ഞാൻ മോളെയും കൂട്ടി വേഗം അവിടുന്നിറങ്ങിയത്

കൊത്ത് പണികളുള്ള മുൻവാതിലിൽ, താക്കോല് തിരുകി തുറക്കുന്നതിനിടയിൽ, അവർ പറഞ്ഞു.

ഒരുപാട് നാളായി, ഞാനിങ്ങോട്ട് വന്നിട്ട്, അന്ന് ഹൗസ് വാമിങ്ങിന് വന്നപ്പോൾ, എനിക്ക് രണ്ട് ദിവസം അമ്മായീടെ കൂടെ നില്ക്കണമെന്നുണ്ടായിരുന്നു,

പിന്നെ അമ്മ നിർബന്ധിച്ചത് കൊണ്ടാ ഞാനങ്ങ് പോയത്

അതിനെന്താ, മോൾക്കിനി

മടുക്കും വരെ ഇവിടെ നില്ക്കാമല്ലോ? നിനക്ക് പോകണമെന്ന് തോന്നുമ്പോൾ പറഞ്ഞാൽ മതി, അമ്മായി തിരിച്ച് കൊണ്ടാക്കിത്തരാം, അതിന് മുമ്പ് നിന്നെക്കൊണ്ട് നല്ലത് പോലെ ആഹാരം കഴിപ്പിച്ച്, ഒരു പത്ത് കിലോയെങ്കിലും തൂക്കം കൂട്ടിയാലെ ,നിൻ്റെ അമ്മയ്ക്ക് കൊടുത്ത വാക്കെനിക്ക് പാലിക്കാൻ പറ്റു

ഓഹ്, ഈ അമ്മായീടേ ഒരു കാര്യം' ഞാൻ കഴിച്ചോളാം അമ്മായീ.. അല്ലേലും, അമ്മായീടെ കൈപ്പുണ്യമറിഞ്ഞിട്ട് നാള് കുറെയായി

എങ്കിൽ മോള് പോയി, ഈ ഡ്രസ്സൊക്കെ ഒന്ന് മാറ് ,അപ്പോഴേക്കും അമ്മായി മോൾക്ക് കഴിക്കാൻ എന്തെങ്കിലും എടുത്ത് വയ്ക്കാം

ശരി അമ്മായി,

പാർവ്വതി മുറിയിലേക്കും, സുമതി അടുക്കളയിലേക്കും പോയി.

വൈകുന്നേരം, അഞ്ചര മണിയായപ്പോൾ മനു ,ജോലി കഴിഞ്ഞ് വന്നു.

എടീ.. പാറു നീയെപ്പോ എത്തി?

പാർവ്വതിയെ കണ്ട് മനു ആശ്ചര്യത്തോടെ ചോദിച്ചു.

ഞാൻ വന്നിട്ട് ഒരു മണിക്കൂറായി മനുവേട്ട ,അല്ല... ഗിരിയേട്ടനെ ഇത് വരെ കണ്ടില്ലല്ലോ?

ഓഹ് ,അയാള് വരുമ്പോൾ പാതിരാവാകും

അയ്യോ അതെന്താ?

അപ്പോഴല്ലേ, ബാറടയ്ക്കു

ങ്ഹേ, ഗിരിയേട്ടൻ കുടിക്കുമോ?

ങ്ഹാ, ഇപ്പോൾ ഒരു മുഴുക്കുടിയനാണെന്ന് പറയാം ,ചിലപ്പോൾ കുടിച്ച് ബോധമില്ലാതെയാകുമ്പോൾ, എന്നെ വിളിക്കും, ഞാൻ പിന്നെ പോയി പൊക്കിയെടുത്ത് കാറിലിട്ടോണ്ട് വരും,

പിറ്റേന്ന് ബോധം വീഴുമ്പോൾ അമ്മ, അയാളുടെ അടുത്ത് ചെന്നിരുന്ന് കുറെ കരയുകയും, പറയുകയും ചെയ്യും,

അപ്പോൾ പറയും, ഇനി മേലാൽ കുടിക്കില്ലെന്ന്, കുറച്ച് ദിവസങ്ങൾ കഴിയുമ്പോൾ, വീണ്ടും പഴയത് പോലെയാകും

ഈ ഗിരിയേട്ടനിത് എന്ത് പറ്റീ? മുൻപ് ഇങ്ങനല്ലായിരുന്നല്ലോ?

ഉം ശരിയാ, ഏട്ടത്തിയുടെ മരണശേഷമാണ്, അയാള് ഇങ്ങനെ ആയത്

ഈശ്വരാ ... പാവം എൻ്റെ ഗിരിയേട്ടൻ, എന്തായാലും ആളിങ്ങ് വരട്ടെ, എത്ര താമസിച്ചാലും, കണ്ടിട്ടേ ഞാൻ കിടക്കുന്നുള്ളു

ങ്ഹാ, നല്ല കാര്യമായി, വരുമ്പോൾ നിന്നെ മനസ്സിലാകാനുള്ള ബോധമൊന്നും അങ്ങേർക്ക് കാണില്ല

എന്നാലും സാരമില്ല 

ഉം നിൻ്റെയിഷ്ടം, നീയിരിക്ക് ഞാനൊന്ന് ഫ്രഷാകട്ടെ

ശരി മനുവേട്ടാ ...

മനു, പോയി കഴിഞ്ഞപ്പോൾ, പാർവ്വതി, നേരെ ഗിരിയുടെ റൂമിലേക്ക് ചെന്നു.

അതിനകത്ത് കയറിയപ്പോൾ, അവൾ അമ്പരന്ന് പോയി.

ചുമരിൽ സിതാരയുടെ, പല വിധത്തിലുള്ള വലുതും ചെറുതുമായ നിരവധി ഫോട്ടോകൾ ഒട്ടിച്ച് വച്ചിരിക്കുന്നു.

ബെഡ് നന്നായി വിരിച്ചിട്ടിട്ടുണ്ട്, അതിൻ്റെ ഒരു വശത്തായി,സിതാരേച്ചിയുടെ കല്യാണ സാരിയും ബ്ളൗസും വച്ചിരിക്കുന്നു.

തുണികളിടുന്ന സ്റ്റാൻ്റിലെ ഹാംങ്ങറിൽ, പല നിറങ്ങളിലുള്ള നൈറ്റികൾ നിരയായി തൂക്കിയിട്ടിരിക്കുന്നു.

കട്ടിലിനോട് ചേർന്ന ടീപോയ്ക്ക് മുകളിലായി, ഗിരിയേട്ടൻ്റെയും സിതാരേച്ചിയുടെയും വിവാഹ ഫോട്ടോയിൽ, സോറി എന്നെഴുതി വച്ചിരിക്കുന്നത് കണ്ട്, അവളതെടുത്ത് സൂക്ഷിച്ച് നോക്കി.

അതെഴുതിയിരിക്കുന്നത്, മഷി കൊണ്ടല്ലെന്നും, ചോരയുണങ്ങിയ പാടാണതെന്നും, മനസ്സിലായ പാർവ്വതിയുടെ മനസ്സിലേക്ക് ,വല്ലാത്തൊരു ഭീതി കടന്ന് വന്നു .

🍁ഭാഗം-2

ഗിരിയുടെ മുറിയിൽ നിന്നിറങ്ങിയ പാർവ്വതി, നേരെ തെക്കെ തൊടിയിലെ കുളത്തിനരികിലേക്ക് നടന്നു.

സിതാരേച്ചിയുടെ മരണശേഷം, ആരും ആ കുളത്തിൽ കുളിക്കാനിറങ്ങിയിട്ടില്ല.

വേനലിൽ പോലും, വെള്ളം നിറഞ്ഞ് നില്ക്കുന്ന ആ കുളം, മുൻപ് എല്ലാ വർഷവും പായലും,ചെളിയുമൊക്കെ വാരിക്കളഞ്ഞ് വൃത്തിയാക്കുന്ന പതിവുണ്ടായിരുന്നു.

ഇപ്പോൾ ആരും തിരിഞ്ഞ് നോക്കാതെ, പോള നിറഞ്ഞ് വശങ്ങളിലെ മാടിയിടിഞ്ഞ്, ആകെ വൃത്തിഹീനമായിട്ടുണ്ട്.

മാസങ്ങളായി, കരിയിലകൾ വീണ് മൂടിക്കിടക്കുന്ന കല്പടവുകളിറങ്ങി, പാർവ്വതി ഏറ്റവും താഴത്തെ പടിയിൽ ചെന്നിരുന്നു.

തൻ്റെ കാലുകൾ നീട്ടി ,പോളകൾ വശങ്ങളിലേക്ക് നീക്കിയപ്പോൾ, വെള്ളത്തിൻ്റെ തണുപ്പ് കാൽവിരലുകളിലൂടെ ശരീരമാസകലം പടർന്നവളെ കുളിരണിയിച്ചു.

കുളത്തിലേക്ക് കുനിഞ്ഞ്, വെള്ളയും വയലറ്റും നിറമുള്ളൊരു പോളപ്പൂവ് പറിച്ചവൾ ,വെറുതെ മൂക്കിൽ വച്ചു നോക്കി.

എവിടുന്നോ വന്നൊരു പിശറൻ കാറ്റ് ,അവളെ കടന്ന് കുളത്തിൽ പൊങ്ങിക്കിടക്കുന്ന പോളപ്പൂക്കളെ തഴുകി നിന്നു.

ചലനമറ്റ് കിടന്നിരുന്ന, കുളത്തിലെ പോളകൈകൾ, കാറ്റടിച്ചപ്പോൾ മെല്ലെ ആടാൻ തുടങ്ങി ,അല്പം കഴിഞ്ഞപ്പോൾ, ചെറുകാറ്റ് ഒരു ചുഴലി പോലെ, കുളത്തിന് നടുവിലെ പോളകളെ ചുഴറ്റിയെടുത്ത്, അടിത്തട്ടിലേക്ക് വലിച്ച് കൊണ്ട് പോകുന്നത് കണ്ട്, പാർവ്വതി പകച്ചുപോയി.

ജലത്തിൽ മുക്കി വച്ച കാലുകൾ, പതിയെ ഉയർത്താൻ ശ്രമിച്ചെങ്കിലും, അത് ഒട്ടിപ്പിടിച്ചിരിക്കുന്നത് പോലെ പാർവ്വതിക്ക് തോന്നി.

അവളുടെ ഉളളിലൂടെ ഒരു കൊള്ളിയാൻ പാഞ്ഞ് പോയി, ആരെയൊ വിളിക്കാൻ നാവുയർത്തിയെങ്കിലും, ശബ്ദം പുറത്തേയ്ക്ക് വരാതെ തൊണ്ടയിൽ തന്നെ തങ്ങി നിന്നു.

പേടിച്ചരണ്ട കണ്ണുകളോടെ, അവൾ ചുറ്റിനും നോക്കി, എങ്ങും ഇരുട്ട് പരന്നിരിക്കുന്നു ,കാറ്റിന് ശക്തി കൂടുന്നതും, കുളത്തിലെ ജലം തിരകളായി പടിക്കെട്ടുകളിലേക്ക് കയറി വരുന്നതും കണ്ട്, ഭയന്ന് പോയ പാർവ്വതി, കണ്ണുകൾ ഇറുക്കിയടച്ചു.

ആങ്ഹാ, മോളിവിടെ വന്നിരിക്കുവാണോ?

അമ്മായിയുടെ ശബ്ദം കേട്ടവർ തിരിഞ്ഞ് നോക്കി .

പൊടുന്നനെ കാറ്റടങ്ങിയതും, കുളത്തിലെ ജലം നിശ്ചലമായതും അവളെ അത്ഭുതപ്പെടുത്തി.

അവൾ വേഗമെഴുന്നേറ്റ് പടിക്കെട്ടുകൾ കയറി മുകളിലെത്തി.

ഈ സന്ധ്യനേരത്തെന്തിനാ ഇവിടെ വന്നിരിക്കുന്നത്, വല്ല പിശാചുക്കളും ദേഹത്ത് കയറില്ലേ, മോള് അകത്ത് വന്നിരുന്ന് ടിവി കാണുകയോ മൊബൈല് കാണുകയോ ചെയ്യ്

ഒന്നും മിണ്ടാതെയവൾ സുമതിയോടൊപ്പം വീടിനകത്തേയ്ക്ക് കയറിപ്പോയി.

ടിവി കാണുമ്പോഴും, കുറച്ച് മുമ്പ് കുളക്കടവിൽ തനിക്കുണ്ടായ അനുഭവത്തെക്കുറിച്ചായിരുന്നു അവളുടെ ചിന്ത.

ചിലപ്പോൾ, അതൊക്കെ തൻ്റെ തോന്നലായിരുന്നിരിക്കാമെന്ന് അവൾ സ്വയമാശ്വസിച്ചു.

മനുവിൻ്റെയും സുമതിയുടെയുമൊപ്പം അത്താഴം കഴിച്ചിട്ടവൾ, ബാൽക്കണിയിൽ വന്ന് റോഡിലേക്ക് നോക്കി നിന്നു.

ഗിരിയേട്ടനിനിയും വന്നില്ലല്ലോയെന്ന് അവൾ മനസ്സിലോർത്തു?

പാവം ഗിരിയേട്ടൻ ,ആ മനസ്സിൽ സിതാരേച്ചിയോട് ഒത്തിരി സ്നേഹമുണ്ടായിരുന്നത് കൊണ്ടല്ലേ? ഇത്രയും നാളുകൾ കഴിഞ്ഞിട്ടും, ഭാര്യയുടെ വേദനിക്കുന്ന ഓർമ്മകളിൽ കിടന്ന് പിടയുന്നത് .

അതിൽ നിന്ന് മോചനം കിട്ടാനല്ലേ? മദ്യപിച്ച് സ്വബോധമില്ലാതെ നടക്കുന്നത്.

പണ്ട് മുതലേ തനിക്ക്, മനുവേട്ടനെക്കാളും അടുപ്പമുണ്ടായിരുന്നത് ഗിരിയേട്ടനോടായിരുന്നു.

താനെന്ത് ആവശ്യപ്പെട്ടാലും, ഏത് വിധേനയും ഗിരിയേട്ടനത് സാധിച്ച് തരുമായിരുന്നു, ശാന്ത സ്വഭാവമായിരുന്നു ഗിരിയേട്ടന്.

മനുവേട്ടൻ നേരെ തിരിച്ചായിരുന്നു, മഹാവികൃതിയായിരുന്നു, തന്നെ ചെറുപ്പത്തിൽ വല്ലാതെ നുള്ളി നോവിച്ചും, കളിയാക്കിയുമൊക്കെ വല്ലാതെ ഇറിറ്റേറ്റു ചെയ്യുമായിരുന്നു.

കിഴക്കേ മതിലിനരികിൽ ഉയർന്ന് നില്ക്കുന്ന ബോഗൺവില്ലകൾക്കിടയിലൂടെ,

ആകാശത്തുദിച്ച് നില്ക്കുന്ന പൗർണ്ണമി തിങ്കളെ, അവൾ കൗതുകത്തോടെ നോക്കി നിന്നു.

മോളേ ...കിടക്കണ്ടേ?

സുമതി ,താഴെ മുറ്റത്ത് നിന്ന് കൊണ്ട്, ബാൽക്കണിയിൽ നില്ക്കുന്ന പാർവ്വതിയോട് ചോദിച്ചു.

ഗിരിയേട്ടൻ ഇത് വരെയെത്തിയില്ലല്ലോ അമ്മായി?

ങ്ഹാ ,നീ അവനെ നോക്കി നില്ക്കുവാണോ? കുറച്ച് നാള് മുമ്പ് വരെ അമ്മായിയും, ഇത് പോലെ പാതിരാ വരെ കണ്ണിലെണ്ണയൊഴിച്ച് അവനെ കാത്തിരിക്കുമായിരുന്നു, പക്ഷേ പലപ്പോഴും അവൻ വരുന്നത്, പിറ്റേന്ന് നേരം വെളുത്തിട്ടായിരിക്കും, വെറുതെ കാത്ത് നിന്ന് നിൻ്റെ കണ്ണ് കഴക്കത്തേയുള്ളു ,താഴെ വന്ന് കിടക്കാൻ നോക്ക്, അവനെ നാളെയായാലും നിനക്ക് കാണാമല്ലോ

അമ്മായി പറഞ്ഞത് കേട്ട്, മനസ്സില്ലാ മനസ്സോടെയവൾ, താഴേക്കിറങ്ങി അമ്മായിയുടെ മുറിയിലേക്ക് പോയി.

വീട്ടിത്തടിയിൽ തീർത്ത വലിയ കട്ടിലിലെ ,പതുപതുത്ത ബെഡ്ഡിൽ അമ്മായിയോടൊപ്പം കിടന്ന പാർവ്വതി ,ഉറക്കം വരാതെ സ്പീഡിൽ കറങ്ങുന്ന ഫാനിലേക്ക് നോക്കി കിടന്നു.

മോൾക്ക് ആവശ്യമുണ്ടെങ്കിൽ Ac ഓൺ ചെയ്തോ? അമ്മായി പിന്നെ ഇതൊന്നും ഉപയോഗിക്കാറില്ല

വേണ്ടമ്മായി, ഈ മുറിയിൽ വലിയ ചൂടില്ല

എങ്കിൽ ലൈറ്റ് ഓഫ് ചെയ്തേക്കട്ടെ? വെളിച്ചമുണ്ടെങ്കിൽ അമ്മായിക്ക് ഉറക്കം വരില്ല

ശരി അമ്മായി

കൈയെത്തിച്ച് ബെഡ് സ്വിച്ച് ഓഫ് ചെയ്തിട്ട്, സുമതി പുതപ്പ് വലിച്ച് അരക്കെട്ട് വരെ പുതച്ച് കിടന്നു.

കുറച്ച് കഴിഞ്ഞപ്പോൾ, കോളിംഗ് ബെല്ലടിക്കുന്നത് കേട്ടു.

അമ്മായീ ഗിരിയേട്ടൻ വന്നെന്ന് തോന്നുന്നു

താൻ പറഞ്ഞതിന് പ്രതികരണമൊന്നുമില്ലാതിരുന്നപ്പോൾ, അമ്മായി ഉറക്കമായെന്ന് പാർവ്വതിക്ക് മനസ്സിലായി.

അവൾ വേഗമെഴുന്നേറ്റ് ,ലൈറ്റിട്ടിട്ട് ബെഡ് റൂമിൻ്റെ കതക് തുറന്ന് വെളിയിലിറങ്ങി, ഹാളിലേക്ക് നടന്നു.

വെളിയിലെ ലൈറ്റിട്ട് ,മുൻവാതിൽ

തുറന്നപ്പോൾ ഗിരി ,വീണ് പോകാതിരിക്കാൻ ചുമരിൽ പിടിച്ച് ആടിയാടി നില്ക്കുന്നതാണ് കണ്ടത്.

എന്ത് കോലമാണ് ഗിരിയേട്ടാ ഇത്?

താടിരോമങ്ങൾ വളർന്ന് ,എണ്ണ തേല്ക്കാതെ ,അലങ്കോലമായ തലമുടിയുമായി, ഒരു ഭ്രാന്തനെ പോലെ തൻ്റെ മുന്നിൽ നില്ക്കുന്ന, ഗിരിയോടവൾ വേദനയോടെ ചോദിച്ചു.

ഹല്ല ഇതാരാ പാറൂട്ടിയോ? നീയീ പാതിരാക്ക് എവിടുന്നാ പൊട്ടിവീണത്?

കുനിഞ്ഞ് കിടന്ന തല, കഷ്ടപ്പെട്ട് ഉയർത്തി നോക്കിയപ്പോൾ ,മുന്നിൽ പാർവ്വതി നില്ക്കുന്നത് കണ്ട് ,ജിജ്ഞാസയോടെ അയാൾ ചോദിച്ചു.

ഞാൻ ഉച്ചയ്ക്ക് അമ്മായിയോടൊപ്പം വന്നതാണ് , കുറച്ച് മുൻപ് വരെ ഗിരിയേട്ടനെയും കാത്ത് ഞാൻ, വഴിയിലേക്ക് കണ്ണും നട്ട്നില്ക്കുകയായിരുന്നു

ഹ ഹ ഹ ,എന്നെയും നോക്കി വഴിക്കണ്ണുമായി നില്ക്കാൻ, നിന്നോടാര് പറഞ്ഞെടീ..അതിനെൻ്റെ സിതാരയുണ്ട്, മരിച്ച് പോയെങ്കിലും, അവളുടെയാത്മാവ് ഈ പരിസരത്തൊക്കെ തന്നെയുണ്ട്

ഗിരിയുടെ വാക്കുകൾ അവളുടെ ഉള്ള് പൊള്ളിച്ചു.

ഓകെ ,അതൊക്കെ ഞാൻ സമ്മതിച്ചു ,പക്ഷേ എനിക്ക് ഗിരിയേട്ടനോട് കുറച്ച് സംസാരിക്കാനുണ്ട്, അതിനാണ് ഞാൻ കാത്ത് നിന്നത്

ഉപദേശിക്കാനായിരിക്കും ,ഒരു കാര്യോമില്ല ,പിന്നെ നിനക്ക് അത്ര നിർബന്ധമാണെങ്കിൽ, നമുക്ക് നാളെ സംസാരിക്കാം, ഇപ്പോൾ എനിക്കൊന്ന് കിടക്കണം

വെട്ടിമുറിച്ച് പറഞ്ഞിട്ട്, പാർവ്വതിയെ തള്ളിമാറ്റി ഗിരി അകത്തേക്ക് കയറി.

സ്റ്റെയർകെയ്സ് കയറുമ്പോൾ, അയാൾ വീണ് പോകുമെന്ന് ഭയന്ന് ,പാർവ്വതി റൂമിലെത്തുംവരെ അയാളെ അനുഗമിച്ചു.

മുറിയിൽ കയറിയ ഉടനെ, അയാൾ വാതിൽ കൊട്ടിയടച്ചു.

കുറച്ച് നേരം അവിടെ നിന്നിട്ട്, പാർവ്വതി തിരിച്ച് അമ്മായിയുടെ റൂമിലേക്ക് വന്നു ,സുമതി അപ്പോഴും നല്ല ഉറക്കത്തിലായിരുന്നു .

അവരുടെയൊപ്പം കയറി കിടന്ന പാർവ്വതിയും, എപ്പോഴോ നിദ്രയിലേക്കാണ്ട് പോയി .

പാതിരാ കഴിഞ്ഞപ്പോൾ, തിളങ്ങി നിന്നിരുന്ന തിങ്കൾ മേഘക്കീറിനുള്ളിലൊളിച്ചു.

ഭൂമിയിലാകെ അന്ധകാരം നിറഞ്ഞു, പച്ചപുതച്ച് നില്ക്കുന്ന നെല്പാടങ്ങളെയും, ആകാശം മുട്ടെ ഉയർന്ന് നില്ക്കുന്ന പനകളെയും പിടിച്ച് കുലുക്കിക്കൊണ്ട് ,കിഴക്കൻ കാറ്റ് ആഞ്ഞ് വീശി.

അന്തരീക്ഷത്തിൽ രൂപപ്പെട്ട് വന്ന ഒരു പുകച്ചുരുൾ ,പൊന്നേഴത്ത് മുറ്റത്ത് വന്ന് നിന്നു.

അല്പം കഴിഞ്ഞ്, ആ മണിമന്ദിരത്തിൻ്റെ മുൻവാതിൽ മലർക്കെ തുറന്ന് കൊണ്ട്, ആൾരൂപം പൂണ്ട വെളുത്തപുക, പാർവ്വതി കിടക്കുന്ന മുറിയെ ലക്ഷ്യമാക്കി അകത്തേക്ക് നടന്നു.

നേരത്തെ ,മുറിയിലേക്ക് കയറി വാതിലടച്ച ഗിരി, കട്ടിൽ കയറി കിടന്നിട്ട് ,തൻ്റെയരികിലിരുന്ന സിതാരയുടെ സാരിയും ബ്ളൗസും നെഞ്ചോട് ചേർത്ത് പിടിച്ചാണ് ,ഉറങ്ങാൻ കിടന്നത്.

രാവേറെയായിട്ടും, ഉറക്കം വരാതെ കണ്ണ് തുറന്ന് എതിരെയുള്ള സിതാരയുടെ ഫോട്ടോയിൽ തന്നെ നോക്കിക്കിടന്ന ഗിരിക്ക് ,തൻ്റെ ഇടത് വശത്ത് ആരോ വന്ന് നില്പുണ്ടെന്ന് തോന്നിയപ്പോൾ ,അയാൾ

തല തിരിച്ച് നോക്കി.

അവിടെ നില്ക്കുന്ന പാർവ്വതിയെ കണ്ടയാൾ ഞെട്ടി.

ങ്ഹേ,എടീ പാറു... നീയിതിനകത്തെങ്ങനെ കയറി? ഞാൻ കതക് ലോക്ക് ചെയ്തതാണല്ലോ ?

ഞാൻ പാർവ്വതിയല്ല, സിതാരയാണ് ,മരിച്ചതിന്ശേഷം ഞാനെന്നും ഇവിടെ വരാറുണ്ട്, പക്ഷേ ,എനിക്കൊരു രൂപമില്ലാത്തത് കൊണ്ട് ,ഗിരിക്ക് എന്നെ കാണാനോ, നമുക്ക് തമ്മിൽ സംസാരിക്കാനോ കഴിഞ്ഞില്ല, ഇപ്പോൾ പാർവ്വതിയുടെ ശരീരത്തിൽ കയറിയത് കൊണ്ട് മാത്രമാണ്, നിങ്ങൾക്കെന്നെ കാണാനും സംസാരിക്കാനും പറ്റുന്നത്

തൻ്റെ സിതാരയുടെ ആ മധുരശബ്ദം കേട്ട്, ഞെട്ടലോടെ ഗിരി ചാടിയെഴുന്നേറ്റു.

🍁ഭാഗം-3

എന്നെ വിടൂ...ഗിരീ ... നീയിപ്പോൾ പുണരുന്നത് എന്നെയല്ല, പാർവ്വതിയുടെ ശരീരത്തെയാണ് എൻ്റെ ആത്മാവ് മാത്രമാണ് നിന്നോട് സംസാരിക്കുന്നത്

അല്ലസിത്തൂ... എൻ്റെ സ്പർശനം നീയറിയുന്നുണ്ടല്ലോ? അപ്പോൾ  എൻ്റെ മുന്നിലിപ്പോൾ നില്ക്കുന്നത് നീ തന്നെയാണ്, എൻ്റെ കണ്ണുകൾ കാണുന്നത് എൻ്റെ പ്രിയതമയുടെ സുന്ദരമായ രൂപത്തെയാണ്, ഞാനാസ്വദിക്കുന്നത്, എൻ്റെ ഭാര്യയുടെ ശരീരം തന്നയാണ് സിത്തൂ...

ഓഹ് ഗിരിയേട്ടാ... എനിക്കിതൊക്കെ നിഷിദ്ധമാണ് ഭൂമിയിലെത്തി പ്രിയപ്പെട്ടവരെ കാണാൻ മാത്രമേ എനിക്കനുവാദമുള്ളു ,ഇന്നലെ വരെ അങ്ങനെ തന്നെയായിരുന്നു പക്ഷേ ഇന്ന് ഞാൻ ഇങ്ങനെയൊരു സാഹസം കാട്ടിയത് എനിക്ക് നിങ്ങളോട് ചിലതൊക്കെ തുറന്ന് പറയാനുള്ളത് കൊണ്ടാണ്

അതിനാണ് ഞാൻ പാർവ്വതിയുടെ ദേഹത്ത് പ്രവേശിച്ചതും നിങ്ങളുടെ അരികിലെത്തിയതും

എന്താ സിത്തു നിനക്ക് പറയാനുള്ളത്?അന്ന് രാത്രിയിൽ ഉറങ്ങാൻ കിടക്കുമ്പോൾ, നമ്മൾ തമ്മിൽ ചെറിയ കശപിശ ഉണ്ടായിരുന്നു, പക്ഷേ ,അത് സ്ഥിര മുള്ളതല്ലേ? അത് നീ സീരിയസ്സായിട്ടെടുക്കുമെന്നും എന്നെ തോല്പിക്കാൻ ആത്മഹത്യ ചെയ്യുമെന്നും ഞാൻ കരുതിയില്ല, പക്ഷേ, ഞാനൊഴിച്ച് നമ്മുടെ ബന്ധുക്കളും മറ്റുള്ളവരും നീ കാല് വഴുതി കുളത്തിൽ വീണതാണെന്ന് കരുതിയിരിക്കുവാണ് ,  എന്തിനാ സിത്തൂ... എന്നെ തനിച്ചാക്കി നീ ഒറ്റക്ക് പോയത്?

ഞാൻ ആത്മഹത്യ ചെയ്തതല്ല ഗിരീ .. എന്നെ കൊന്നതാണ്

ങ്ഹേ!

അത് കേട്ട് ഗിരി വിറങ്ങലിച്ച് നിന്ന് പോയി

ആരാ, ആരാണ് നിന്നെ ഇല്ലായ്മ ചെയ്തത് ,അതാരായാലും ,അയാളെ ഞാൻ, ഈ ഭൂമിയുടെ മുകളിൽ ജീവനോടെ വച്ചേക്കില്ല

അതെനിക്കറിയില്ല ഗിരീ ..

അന്ന് ഞാൻ ഗിരിയുമായി പിണങ്ങിയിട്ട് ബാൽക്കണിയിൽ പോയി കുറെനേരം നിന്നില്ലേ? പുറത്ത് നല്ല നിലാവ് പരന്നൊഴുകുന്നത് കണ്ടപ്പോൾ

എനിക്ക്, കുളക്കടവിൽ പോയി കുറച്ച് നേരം തനിച്ചിരിക്കണമെന്ന് തോന്നി,

തിരിഞ്ഞ് നോക്കിയപ്പോൾ, ഗിരി കൂർക്കം വലിച്ച് നല്ല ഉറക്കത്തിലാണ്ട് കഴിഞ്ഞിരുന്നു, ആ തക്കത്തിന് ഞാൻ കുളക്കടവിലേക്ക് നടന്നു ,എന്നെ ആരോ പിന്തുടരുന്നുണ്ടെന്ന് പല പ്രാവശ്യം തോന്നിയെങ്കിലും, ഞാൻ തിരിഞ്ഞ് നോക്കിയിട്ട് ആരെയും കണ്ടിരുന്നില്ല ,കുളക്കടവിലെത്തിയ ഞാൻ, ഏറ്റവും താഴെയുള്ള പടിയിലാണ് ചെന്നിരുന്നത്, നിശ്ചലമായി കിടക്കുന്ന കുളത്തിലെ ജലത്തിൽ, തെളിഞ്ഞ് നിന്ന പൂർണ്ണചന്ദ്രൻ്റെ പ്രതിബിംബത്തെ, കൗതുകത്തോടെ നോക്കിയിരിക്കുകയായിരുന്ന എന്നെ, പെട്ടെന്നാണ്, ആരോ പിന്നിൽ നിന്ന് ശക്തമായി തൊഴിച്ചത് ,അപ്രതീക്ഷിതമായ ആഘാതത്തിൽ, ഞാൻ മുന്നിലെ ജലത്തിലേക്ക് തലകീഴായി മുങ്ങി പോവുകയായിരുന്നു, ആ നിലയില്ലാ കയത്തിൽ, ഒരിറ്റ് ജീവശ്വാസത്തിനായി , കൈകാലിട്ടടിച്ച് അലറി വിളിച്ചെങ്കിലും, എൻ്റെ നിലവിളി ,ആരും കേൾക്കാതെ, കുളത്തിൻ്റെ നാല് കരകളിൽ തട്ടി ഇല്ലാതാവുകയായിരുന്നു

ഓഹ് എന്തിനാ സിത്തു .. നീയൊറ്റയ്ക്ക് പാതിരാത്രിയിൽ അങ്ങോട്ട് പോയത് വേണ്ടിയിരുന്നില്ല ,ങ്ഹാ ഇനി പറഞ്ഞിട്ട് കാര്യമില്ല ,എങ്കിലും ആ കൊലപാതകിയെ എങ്ങിനെയെങ്കിലും കണ്ടു പിടിക്കണം

വേണം ഗിരീ... നമ്മളെ തമ്മിലകറ്റിയ, ആ ദുഷ്ട ജന്മത്തെ എനിക്കുമെന്ന് കാണണം, പക്ഷേ അതെങ്ങനെ?

പോലീസിൽ പരാതിപ്പെടാൻ കഴിയില്ലല്ലോ? നിന്നെ കൊന്നതാണെന്ന് നിൻ്റെ ആത്മാവ് വന്ന് പറഞ്ഞതാണെന്ന് പറഞ്ഞാൽ, എല്ലാവരും കൂടി എന്നെ ഭ്രാന്തനെന്ന് മുദ്രകുത്തും,

ഇപ്പോൾ തന്നെ മുഴുക്കുടിയനെന്ന ലേബലെനിക്കുണ്ട്

മ്ഹും ,അപ്പോൾ ഇനി മുതൽ ആ ലേബല് വേണ്ട ,ഞാൻ പോയത് കൊണ്ടല്ലേ ഗിരി, കുടി തുടങ്ങിയത്, ഇപ്പോൾ ഞാൻ ഗിരിയുടെയടുത്ത് മടങ്ങി വന്നില്ലേ? അത് കൊണ്ട് ഇനി കുടിക്കില്ലെന്ന് പ്രോമിസ് ചെയ്യ്

ഇല്ല സിത്തൂ .. ഇനിയെനിക്ക് സ്വബോധത്തോടെ നടക്കണം, എന്നിട്ട് എല്ലാവരെയും ഡീറ്റെയിൽഡായിട്ട് ഒബ്സർവ് ചെയ്യണം ,എങ്കിലേ നിൻ്റെ കൊലയാളിയെക്കുറിച്ച് എന്തെങ്കിലുമൊരു തുമ്പ് ലഭിക്കു

ഉം താങ്ക്യു ഗിരീ.. എനിക്ക് നിന്നോടൊപ്പം ജീവിച്ച് കൊതി തീർന്നിട്ടില്ലായിരുന്നു ,എന്ത് ചെയ്യാം ,ഇനി എല്ലാ രാത്രികളിലും, പാർവ്വതിയും മറ്റുള്ളവരും ഉറങ്ങാനായി കാത്തിരിക്കണം, എന്നാലേ നിൻ്റെയരികിൽ എനിക്കിത് പോലെ വന്നിരിക്കാൻ പറ്റുകയുള്ളു, അതും വളരെ കുറച്ച് സമയം മാത്രം ,ഇപ്പോഴെനിക്ക് പോകാൻ സമയമായി ,ഞാൻ പോകുന്നു ഗിരീ.. നമുക്കിനി നാളെ ഇതേ സമയത്ത് കണ്ട് മുട്ടാം

പോകല്ലേ സിത്തു... കുറച്ച് നേരം കൂടി എൻ്റെയടുത്തിരിക്കു, എനിക്ക് നിന്നെ കണ്ട് കൊതി തീർന്നിട്ടില്ല

ഇല്ല ഗിരീ .. എനിക്കിനി ഒരു നിമിഷം പോലും ഇവിടെ നില്ക്കാൻ കഴിയില്ല, എൻ്റെ സമയം കഴിഞ്ഞു

അത് പറഞ്ഞ്, സിതാര അയാളെ ശക്തമായി തള്ളി കട്ടിലിലേക്കിട്ടു

എന്നിട്ട് ഒരു കൊടുങ്കാറ്റ് പോലെ വാതിൽ തുറന്നവൾ വെളിയിലേക്ക് പോയി.

പിറ്റേന്ന് ഉറക്കമെഴുന്നേറ്റ് വായും മുഖവും കഴുകിയിട്ട് വാഷ് ബേസനിലെ കണ്ണാടിയിൽ നോക്കിയപ്പോഴാണ്, പാർവ്വതി തൻ്റെ ചുണ്ടുകൾ തടിച്ച് ചുവന്നിരിക്കുന്നത് കണ്ടത്, 

കീഴ് ചുണ്ട് നന്നായി മലർന്നിട്ടുണ്ട്,

എന്തോ ഒന്ന് കടിച്ചത് പോലെ ചുണ്ടിന് വല്ലാത്തൊരസ്വസ്ഥതയും ഫീല് ചെയ്യുന്നുണ്ട്.

എന്താ പാറു നിൻ്റെ ചുണ്ടിൽ കടന്നല് കുത്തിയോ ?ചുവന്ന് തുടുത്തിരിക്കുന്നല്ലോ?

അടുക്കളയിൽ ചെന്നപ്പോൾ സുമതി അവളോട് തിരക്കി

അറിയില്ലമ്മായീ... രാവിലെ കണ്ണാടിയിൽ നോക്കിയപ്പോഴാ ഞാനും ശ്രദ്ധിച്ചത്

മോള് കുറച്ച് വെളിച്ചെണ്ണയെടുത്ത് ചുണ്ടിൽ തൂത്ത് വയ്ക്ക് ,കുറച്ച് കഴിയുമ്പോൾ മാറിക്കൊള്ളും,

പിന്നെ മോളേ... ഈ ചായ നീയൊന്ന് ഗിരിയുടെ മുറിയിൽ കൊണ്ട് കൊടുക്ക് ,അവനിപ്പോൾ ഉണർന്ന് കാണും

ഉം ശരി അമ്മായി

ങ്ഹാ മോളേ ... നീയവനെയൊന്ന് നേരെയാക്കണം ,നിന്നെക്കൊണ്ടതിന് കഴിയും പണ്ട് മുതലേ അവന് നിന്നെയും നിനക്ക് അവനെയും ഒത്തിരി ഇഷ്ടമായിരുന്നല്ലോ ?അത് കൊണ്ട് നീ പറഞ്ഞാൽ അവൻ കേൾക്കുമെന്ന് അമ്മായിക്കറിയാം ,എങ്ങനെയെങ്കിലും അവൻ്റെ കുടിയൊന്ന് നിർത്തിച്ച് അവനെ പഴയ ഗിരിയാക്കിയെടുക്കണം ,അതിന് എന്ത് മാൾഗ്ഗവും മോൾക്ക് സ്വീകരിക്കാം

അമ്മായി പറയുന്നതിന് മുമ്പ് തന്നെ ,ഗിരിയേട്ടനോട് സംസാരിക്കാനും അദ്ദേഹത്തെ നേർവ്വഴിക്ക് കൊണ്ട് വരാനും ഒരു ശ്രമം നടത്തി നോക്കാൻ താനിന്നലെ തന്നെ മനസ്സിലുറപ്പിച്ചതായിരുന്നെന്ന് പാർവ്വതിയോർത്തു.

പക്ഷേ അതിന് എന്ത് മാർഗ്ഗവും മോൾക്ക് സ്വീകരിക്കാം എന്ന് അമ്മായി പറഞ്ഞത് എന്തർത്ഥത്തിലായിരിക്കുമെന്ന് അവൾ തല പുകഞ്ഞാലോചിച്ചു

തന്നെ ഗിരിയേട്ടന് വിവാഹം കഴിച്ച് കൊടുക്കുമോ എന്ന്, മുമ്പ് ഒരിക്കൽ അമ്മായി,അച്ഛനോട് ചോദിച്ചിരുന്നു

പക്ഷേ ബന്ധത്തിൽ നിന്നും മോൾക്കൊരു വരനെ കണ്ടെത്തുന്നതിൽ അച്ഛന് താല്പര്യമില്ലായിരുന്നു

അങ്ങനെയാണ് സിതാരേച്ചിയുമായി ഗിരിയേട്ടൻ്റെ വിവാഹം നടക്കുന്നത്

ഇങ്ങനൊരാലോചന നടന്നിരുന്നു എന്ന് ,കല്യാണത്തിന് ശേഷം അമ്മ പറയുമ്പോഴാണ്, താനറിയുന്നത്,

ഇനി അമ്മായിയുടെ മനസ്സിൽ വീണ്ടും പഴയ ആഗ്രഹം ഉടലെടുത്തതാണോ?

ഓരോന്നാലോചിച്ച് കൊണ്ട് ,ചായയുമായി അവൾ ഗിരിയുടെ മുറി വാതില്ക്കൽ എത്തി.

ആഹാ.. ഗിരിയേട്ടൻ രാവിലെ ഉണർന്നായിരുന്നോ? കതക് തുറന്ന് കിടക്കുന്നല്ലോ?

തലേ രാത്രിയിലെ സംഭവങ്ങളെ കുറിച്ചോർത്ത് കിടന്നിരുന്ന ഗിരി ,പാർവ്വതിയെക്കണ്ട് കട്ടിലിൽ എഴുന്നേറ്റിരുന്നു.

ദാ ഗിരിയേട്ടാ... ചായ കുടിക്ക്

അവളുടെ കൈയ്യിൽ നിന്നും ചായക്കപ്പ് വാങ്ങുമ്പോൾ അവളുടെ മുഖത്ത് നോക്കാൻ അയാൾക്ക് വൈക്ളബ്യം തോന്നി.

🍁ഭാഗം-4

ഗിരിയേട്ടാ.. ഇത് കണ്ടോ? ഇന്നലെ രാത്രിയിൽ ഏതോ ക്ഷുദ്രജീവി എൻ്റെ ചുണ്ട് കടിച്ച് ഈ പരുവമാക്കി

ചായ മൊത്തിക്കുടിക്കുന്ന ഗിരിയുടെ മുന്നിലിരുന്നിട്ട് പാർവ്വതി തൻ്റെ ചുണ്ട് മലർത്തി കാണിച്ചു.

മടിച്ച് മടിച്ചാണ്, ഗിരി അവളുടെ മുഖത്തേയ്ക്ക് നോക്കിയത്

അത് നീ വായും പിളർന്ന് കിടന്നപ്പോൾ, വല്ല വണ്ടും വന്ന് കടിച്ചതാതായിരിക്കും

അവളുടെ മുഖത്ത് നിന്ന് നോട്ടം പിൻവലിച്ചിട്ടയാൾ പറഞ്ഞു.

ഒന്ന് പോ ഗിരിയേട്ടാ... വണ്ടിന് കടിക്കാൻ, എൻ്റെ ചുണ്ടിലെന്താ തേൻ പുരട്ടി വച്ചിട്ടുണ്ടായിരുന്നോ?

അതെ പാറു, നിൻ്റെ ചുണ്ടുകൾ തേനറകളായിരുന്നെന്നും, ആ തേൻ നുകർന്ന വണ്ട്, ഞാനായിരുന്നെന്നും, അയാൾ മനസ്സിൽ പറഞ്ഞു .

പക്ഷേ, അവളോടത് പറയാനുള്ള ധൈര്യം ഗിരിക്കില്ലായിരുന്നു.

ഇന്നലെ എന്ത് പരുവത്തിലാണ് ഗിരിയേട്ടാ നിങ്ങള് വന്ന് കയറിയത്

നമ്മള് തമ്മിൽ സംസാരിച്ചത് വല്ലതും ഗിരിയേട്ടനോർമ്മയുണ്ടോ?

ങ് ഹേ എപ്പോൾ ?

അത് കേട്ട ഗിരി ,സ്തബ്ധനായി.

ഓഹ് ഞാനല്ലേ രാത്രിയിൽ ഗിരിയേട്ടൻ വന്ന് കോളിങ്ങ് ബെല്ലടിച്ചപ്പോൾ വാതില് തുറന്ന് തന്നത്, എന്നിട്ട് എനിക്ക് സംസാരിക്കാനുണ്ടെന്ന് പറഞ്ഞപ്പോൾ, രാവിലെയാകട്ടെയെന്ന് പറഞ്ഞ് മുറിയിൽ കയറി വാതില് കുറ്റിയിട്ടിട്ട് ,പിന്നെ ദേ, ഇപ്പാഴാണ് ആളെയൊന്ന് കാണാൻ പറ്റിയത്

അത് കേട്ടപ്പോൾ, ഗിരിക്ക് സമാധാനമായി, പാറൂന് കഴിഞ്ഞ രാത്രിയിലെ സംഭവങ്ങളെക്കുറിച്ചൊന്നുമറിയില്ലഭാഗ്യം .

ഗിരിയേട്ടാ.. സിതാരേച്ചി മരിച്ചിട്ട് വർഷം ഒന്നാകാൻ പോകുന്നു, അത് നമ്മുടെയാരുടെയും കുഴപ്പം കൊണ്ടല്ല ,ദൈവം ഒന്ന് നിശ്ചയിച്ച് അത് നടപ്പിലാക്കി ,സിതാരേച്ചിക്ക് അത്രയും ആയുസ്സേ ഉണ്ടായിരുന്നുള്ളു, എന്ന് കരുതി സമാധാനിക്കേണ്ടതിന് പകരം, ഇങ്ങനെ കുടിച്ച് ബോധമില്ലാതെ നടന്ന്, സ്വയം നശിക്കുകയാണോ വേണ്ടത്? ഗിരിയേട്ടനിങ്ങനെയായിപ്പോയതിൽ, അമ്മായിക്ക് എത്ര മാത്രം വിഷമമുണ്ടെന്നറിയുമോ ?എന്തിനാ, ആ പാവത്തിനെ ഈ വയസ്സ് കാലത്ത് ഇങ്ങനെയിട്ട് വിഷമിപ്പിക്കുന്നത് ,ഭർത്താവ് നേരത്തെ മരിച്ച് പോയിട്ടും,

നിങ്ങൾ രണ്ടാൺ മക്കളെ പാവം അമ്മായി, എത്ര കഷ്ടപ്പെട്ടാണ് വളർത്തി ഇവിടം വരെയെത്തിച്ചത്,

മക്കൾ വലുതായി പ്രാപ്തരാകുമ്പോഴെങ്കിലും, തൻ്റെ ദുരിതങ്ങൾക്ക് ഒരറുതി വരുമെന്ന് പ്രതീക്ഷിച്ചിരുന്ന അവർക്ക്, ഇനിയെങ്കിലും ,സന്തോഷവും സമാധാനവും കൊടുക്കേണ്ടതിന് പകരം, ഇങ്ങനെയിട്ട് കരയിപ്പിക്കണോ?

എനിക്കതറിയാം പാറൂ, 

പക്ഷേ, ചില നേരങ്ങളിൽ അവളെക്കുറിച്ചോർക്കുമ്പോൾ, എനിക്ക് എന്നെ തന്നെ നിയന്ത്രിക്കാൻ കഴിയില്ല

ആ പൊള്ളുന്ന ഓർമ്മകളിൽ നിന്നും, ഗിരിയേട്ടൻ മോചിതനാവണം, അതിനാദ്യം ഈ മുറിയിൽ നിന്നും സിതാരേച്ചിയുമായി ബന്ധപ്പെട്ട എല്ലാ വസ്തുവകകളും മാറ്റി, എവിടെയെങ്കിലും കൊണ്ട് പോയി നശിപ്പിച്ച് കളയുകയാണ് വേണ്ടത്

വേണ്ട പാറൂ, അത് വേണ്ട, അവളുടെ ഈ കാണുന്ന ചിത്രങ്ങളും, അവളുപയോഗിച്ച വസ്ത്രങ്ങളുമൊക്കെയാണ്, എന്നെയിപ്പോഴും ജീവിക്കാൻ പ്രേരിപ്പിക്കുന്നത്

ദേ കണ്ടോ ?അപ്പോൾ ഞാനിത് വരെ പറഞ്ഞതൊന്നും ഗിരിയേട്ടൻ്റെ തലയിൽ കയറിയില്ലേ?എൻ്റെ ഗിരിയേട്ടാ.. നിങ്ങളിപ്പോൾ ജീവിക്കുന്നത് ഏതോ മായാലോകത്താണ്, അവിടെ നിങ്ങൾ നിങ്ങളുടെ മനസ്സുഖം മാത്രമേ കാണുന്നുള്ളു,

നിങ്ങളുടെ ചുറ്റിനുമുള്ളവരെയൊ, അവരുടെ വികാരങ്ങളെയോ നിങ്ങൾ മാനിക്കുന്നില്ല ,ഇത്രയും സ്വാർത്ഥത പാടില്ല ഗിരിയേട്ടാ.. അതെങ്ങനാ, ഈ പറയുന്നതൊക്കെ തലയ്ക്കകത്തോട്ട് കയറണമെങ്കിൽ, ആദ്യം ഈ തലയൊന്ന് നന്നായി തണുപ്പിക്കണം, ഗിരിയേട്ടൻ എഴുന്നേറ്റെ, വേഗം പോയി, ഫ്രഷായിട്ട് ,ആ ഷവറിൻ്റെ താഴെ കുറച്ച് നേരം നില്ക്ക്, ശരീരമൊന്ന് നന്നായി തണുക്കട്ടെ, കുളി കഴിഞ്ഞ് തിരിച്ചിറങ്ങി വരുമ്പോൾ, ഞാനീ മുറിയൊക്കെ അടിച്ച് വാരി, ഗിരിയേട്ടൻ്റെ സ്വൈര്യം കെടുത്തുന്ന ഓർമ്മകളെയൊക്കെ വെയ്സ്റ്റ് ബോക്സിലാക്കിയിരിക്കും

അവൾ ഗിരിയെ നിർബന്ധപൂർവ്വം കുത്തിപ്പൊക്കി ബാത്റൂമിൽ കയറ്റി വാതിലടച്ചു.

പാറുവിൻ്റെ അംഗചലനങ്ങളിലും സംസാരത്തിലും, എന്തിന് ? അവളുടെ വിയർപ്പിൻ്റെ ഗന്ധത്തിന് പോലും സിതാരയുമായി സാമ്യമുണ്ടെന്ന് അയാൾക്ക് തോന്നി ,ഷവറിന് താഴെ നില്ക്കുമ്പോൾ, തലേ രാത്രിയിൽ പാറുവിനോടൊപ്പം ചിലവഴിച്ച നിമിഷങ്ങൾ അയാളിൽ കുളിര് കോരിച്ചു . 

അത് കൊണ്ട് തന്നെയാണ് അവളുടെ വാക്കുകളെ ധിക്കരിക്കാൻ അയാൾക്ക് കഴിയാതെ പോയത്

ആ ദിവസം ഗിരി പുറത്തേയ്ക്കൊന്നും പോയില്ല

അധിക സമയവും മുറിയിൽ തന്നെ ചിലവഴിച്ച ഗിരി ,ഓരോരോ കാരണങ്ങൾ കണ്ടെത്തി ,പാർവ്വതിയെ പല പ്രാവശ്യം തൻ്റെ മുറിയിലേക്ക് വിളിച്ച്, അവളുമായി കളിചിരികളിലേർപ്പെട്ടു

മാസങ്ങൾക്ക് ശേഷം, മുകളിലെ മുറിയിൽ നിന്നും ഗിരിയുടെ പൊട്ടിച്ചിരികേട്ട്, സുമതി താഴെ നിന്ന് ദീർഘനിശ്വാസമയച്ചു.

ഈശ്വരാ.. എൻ്റെ കുഞ്ഞിനെ നേർവഴിക്ക് നയിക്കണേ, അവന് നല്ല ബുദ്ധി തോന്നിക്കണേ

അവർ കണ്ണടച്ച് മുകളിലേക്ക് നോക്കി പ്രാർത്ഥിച്ചു.

രാത്രിയിൽ അത്താഴം കഴിഞ്ഞ് എല്ലാവരും അവരവരുടെ മുറിയിലേക്ക് കയറി വാതിലടച്ചു

പക്ഷേ ഗിരി മാത്രം, സിതാരയുടെ, അല്ല പാർവ്വതിയുടെ വരവും പ്രതീക്ഷിച്ച് വാതിൽ മലർക്കെ തുറന്നിട്ട് ഉറങ്ങാതെ കാത്തിരുന്നു.

ക്ളോക്കിൽ മണി പന്ത്രണ്ടടിച്ചപ്പോൾ, അയാൾ മുറിയിൽ നിന്നിറങ്ങി സ്‌റ്റെയർകെയ്സിനരികിൽ വന്ന് അമ്മയുടെ മുറിയിലേക്ക് നോക്കി വാതിലടഞ്ഞ് തന്നെ കിടക്കുകയാണെന്ന് മനസ്സിലായ അയാൾ നിരാശയോടെ തിരിച്ച് മുറിയിലേക്ക് വന്ന് കിടന്നു.

അവളെന്താ വരാനിത്രയും വൈകുന്നത് ,സമയം വൈകുന്തോറും അയാളുടെ ആകാംക്ഷ വർദ്ധിച്ച് കൊണ്ടിരുന്നു

പിന്നെയും ഏറെ നേരം സിതാരയെ പ്രതീക്ഷിച്ചിരുന്ന അയാളെ നിദ്ര വന്ന് കൂട്ടികൊണ്ട് പോയി.

അടുത്ത രണ്ട് ദിവസങ്ങളിലും അത് തന്നെയായിരുന്നു സ്ഥിതി നാലാം ദിവസം നിരാശ മൂത്ത ഗിരി ആരോടും മിണ്ടാതെ പുറത്ത് പോയി നന്നായി മദ്യപിച്ചിട്ടാണ് വീട്ടിലെത്തിയത് ,പക്ഷേ പാർവ്വതി അറിയാതിരിക്കാൻ അയാൾ പ്രത്യേകം ശ്രദ്ധിച്ചു.

മുറിയിൽ കയറി വാതിലടച്ച ഗിരിയെ അത്താഴം കഴിക്കാൻ അമ്മ വന്ന് വിളിച്ചെങ്കിലും അയാളത് നിരസിക്കുകയായിരുന്നു.

മദ്യത്തിൻ്റെ ലഹരി, സിരകളെ മത്ത് പിടിപ്പിച്ച് തുടങ്ങിയ നേരത്താണ്, വാതിലിൽ ആരോ മുട്ടുന്നത് അയാൾ കേട്ടത് 

ഈ അമ്മയുടെ ഒരു കാര്യം, അത്താഴം വേണ്ടെന്ന് പറഞ്ഞാലും മനസ്സിലാകില്ലേ?

അമ്മയെ കുറ്റപ്പെടുത്തിക്കൊണ്ടയാൾ പാതി തുറന്ന കണ്ണുകളുമായി എഴുന്നേറ്റ് ചെന്ന് വാതിൽ തുറന്നു.

മുന്നിൽ പാർവ്വതി നില്ക്കുന്നത് കണ്ട്, അയാളുടെ കണ്ണുകൾ വിടർന്നു.

ങ്ഹാ സിത്തൂ... നീയെവിടെയായിരുന്നു ഇത് വരെ, കഴിഞ്ഞ മൂന്ന് ദിവസങ്ങളിലും നീ വരുമെന്ന് പ്രതീക്ഷിച്ച്, ഉറക്കമിളച്ച് ഞാൻ നിന്നെയും കാത്തിരുന്നു

അയാൾ അവളെ പിടിച്ച് മുറിക്കകത്തേക്ക് കയറ്റി വാതിൽ കുറ്റിയിട്ടു.

എന്താ ഗിരിയേട്ടാ... ഇത്? 

ഞാൻ പറഞ്ഞതൊക്കെ മറന്നിട്ട്, വീണ്ടും കുടിച്ച് ബോധമില്ലാതെ വന്നിരിക്കുവാണല്ലേ ? ഞാൻ സിതാരേച്ചിയല്ല, പാറുവാണ് ,

അത്താഴം വിളമ്പി വച്ചിട്ട്, അമ്മായി ഗിരിയേട്ടനെയും കാത്തിരുന്ന്, ഒടുവിൽ ,ടേബിളിൻ്റെ മുകളിൽ തലവച്ച് പാവം ഉറക്കമായി, എനിക്ക് കണ്ട് കഷ്ടം തോന്നിയിട്ട്, ഞാൻ അമ്മായിയെ കൊണ്ട് മുറിയിൽ കിടത്തിയുറക്കിയിട്ടാണ് ഇങ്ങോട്ട് വന്നത്, ഒന്നങ്ങോട്ട് വന്നേ, വന്ന് എന്തെങ്കിലും കഴിച്ചിട്ട് കിടക്ക് ,അത്താഴപട്ടിണി കിടക്കരുതെന്നാ പഴമക്കാര് പറയുന്നത്

നീയെന്താ സിത്തൂ... പാറൂനെ പോലെ സംസാരിച്ചാൽ ,എനിക്ക് നിന്നെ മനസ്സിലാകില്ലെന്ന് കരുതിയോ? നീയിങ്ങോട്ട് വന്ന് ഈ കട്ടിലിൽ ഇരിക്ക്, രണ്ട് മൂന്ന് ദിവസത്തെ കടം ബാക്കി കിടക്കുവാ, നിനക്കറിയാമോ? കഴിഞ്ഞ ദിവസങ്ങളിൽ നിന്നെക്കാണാതെ എനിക്ക് നന്നായൊന്ന് ഉറങ്ങാൻ കഴിഞ്ഞിരുന്നില്ല, ഇന്ന് നമുക്കൊരുമിച്ചിവിടെ കിടന്നുറങ്ങാം 

അയാൾ പാർവ്വതിയെ വലിച്ച് തൻ്റെ നെഞ്ചിലേക്കിട്ടു

ഗിരിയേട്ടാ... എന്താ ഈ കാണിക്കുന്നത് ,എന്നെ വിട് ഗിരിയേട്ടാ... അമ്മായിയെങ്ങാനും ഉണർന്ന് വന്നാൽ എന്താ വിചാരിക്കാ, ഞാൻ പൊയ്ക്കോട്ടെ ഗിരിയേട്ടാ.. പ്ളീസ് ...

പക്ഷേ അവളുടെ എതിർപ്പുകളൊക്കെ അയാളുടെ വികാരപ്രകടനത്തിൽ നിഷ്പ്രഭമായി പോയി.

ആദ്യമായൊരു പുരുഷൻ്റെ ബലിഷ്ഠകരങ്ങളിലകപ്പെട്ടു പോയ പാർവ്വതിക്ക്, തൻ്റെ ശരീരത്തിൻ്റെ നിയന്ത്രണം നഷ്ടപ്പെടുന്നതായും, ഒഴുക്കിൽ പെട്ട പൊങ്ങ് തടി പോലെ ,താൻ അഗാധതയിലേക്ക് ആണ്ട് പോകുന്നതായും അവൾക്ക് തോന്നി.

🍁ഭാഗം-5

വളർത്ത് നായയുടെ കുര കേട്ട് പാർവ്വതി ആലസ്യത്തിൽ നിന്നുണർന്നു.

തന്നിലമർന്ന് കിടക്കുന്ന ഗിരിയുടെ ദേഹത്ത് നിന്നും, സ്വന്തം ശരീരത്തെ മോചിപ്പിക്കുമ്പോൾ, കുറച്ച് മുമ്പ് അയാൾ തന്നിലേല്പിച്ച ശാരീരിക ക്ഷതങ്ങളെക്കാൾ അവളെ വേദനിപ്പിച്ചത്, മനസ്സിലുണ്ടായ നീറ്റലായിരുന്നു.

ഗിരിയേട്ടനിൽ നിന്നും ഇങ്ങനെയൊരു പ്രവൃത്തിയുണ്ടാകുമെന്നവൾ

സ്വപ്നത്തിൽ പോലും വിചാരിച്ചിരുന്നില്ല, ഗിരിയേട്ടനെ പണ്ടേ ഇഷ്ടമായിരുന്നു, അദ്ദേഹത്തിൻ്റെ ആലോചനയുമായി പണ്ട് അമ്മായി വീട്ടിൽ വരുമ്പോൾ, അദ്ദേഹവുമൊത്തുള്ള ജീവിതം സ്വപ്നം കണ്ടതുമാണ് ,

പക്ഷേ, തൻ്റെ അച്ഛന് താല്പര്യമില്ലെന്നറിഞ്ഞപ്പോൾ, നിരാശയോടെയാണെങ്കിലും, അച്ഛൻ്റെ തീരുമാനത്തോട് താൻ ഇഴുകിച്ചേരുകയായിരുന്നു.

പിന്നീട്, അങ്ങനെയൊരു ചിന്ത ഉണ്ടാകുന്നത് ,ഇപ്പോഴിവിടെ വച്ച് ,ഗിരിയേട്ടൻ്റെ കാര്യത്തിൽ അമ്മായി തന്നെ ഏല്പിച്ച ദൗത്യം നിറവേറ്റുന്നതിനായി, അവർ തനിക്ക് തന്ന സർവ്വ സ്വാതന്ത്ര്യമൊന്ന് കൊണ്ട് മാത്രയിരുന്നു.

അത് കൊണ്ട് തന്നെ, ഗിരിയേട്ടനോടിടപഴകുമ്പോൾ, താൻ പണ്ട് കാണിക്കാറുണ്ടായിരുന്ന, നിശ്ചിത അകലം പോലുമില്ലാതെയായിരുന്നു, അദ്ദേഹത്തിനോടൊപ്പം പല സമയങ്ങളും ചിലവഴിച്ചിരുന്നത്.

ഒരു പക്ഷേ, അത് തന്നെയാവാം തന്നെ കീഴ്‌പ്പെടുത്താൻ അദ്ദേഹത്തിന് ആത്മവിശ്വാസമുണ്ടായതും.

ചുമരിൽ പതിച്ചിരുന്ന വലിയ കണ്ണാടിക്ക് മുന്നിൽ നിന്ന് കൊണ്ട്, പാർവ്വതി അഴിഞ്ഞ് പോയ തൻ്റെ വസ്ത്രങ്ങൾ നേരെയാക്കി , കവിളിലൂടെ ഒലിച്ചിറങ്ങിയിട്ട് ഉണങ്ങി പിടിച്ച കണ്ണീരുപ്പ്, ഇരു കൈകളും കൊണ്ടവൾ അമർത്തിത്തുടച്ചു.അലസമായി കിടന്ന കാർകൂന്തൽ വാരിക്കെട്ടി വച്ച് കൊണ്ട് ,തിരിഞ്ഞ് നിന്ന് കൂർക്കം വലിച്ചുറങ്ങുന്ന ഗിരിയെ, ഒരിക്കൽ കൂടി നോക്കിയിട്ട്, പാർവ്വതി മുറിക്ക് പുറത്തിറങ്ങി.

അസമയത്ത് പാർവ്വതി ,ഗിരിയുടെ മുറിയിലേക്ക് പോകുന്നതും, മണിക്കൂറുകൾ കഴിഞ്ഞ് തിരിച്ചിറങ്ങുന്നതും, ഉറക്കമിളച്ചിരുന്ന രണ്ട് കണ്ണുകൾ സാകൂതം വീക്ഷിക്കുന്നുണ്ടായിരുന്നു.

പിറ്റേന്ന് രാവിലെ അടുക്കളയിലേക്ക് വരാതിരുന്ന പാർവ്വതിയെ അന്വേഷിച്ച് സുമതി ,മുറിയിലേക്ക് വന്നു.

എന്താ പാറു.. നീയിത് വരെ എഴുന്നേറ്റില്ലേ? എന്ത് പറ്റി?വയ്യായ്ക വല്ലതുമുണ്ടോ?

ഒന്നുമില്ലമ്മായി, ചെറിയൊരു ശരീരം വേദന, ഞാൻ കുറച്ച് നേരം കൂടി കഴിഞ്ഞിട്ട് എഴുന്നേല്ക്കാം

അത് സാരമില്ല, മോള് കിടന്നോളു

അമ്മായി ചോദിച്ചെന്നേയുള്ളു ,അല്ല മോളേ... നിനക്ക് മാസക്കുളി ഉണ്ടായിട്ട് മൂന്നാല് ദിവസം കഴിഞ്ഞില്ലേ? എന്നിട്ട് ഇപ്പോഴും ശരീരത്തിന് ബുദ്ധിമുട്ടുകളുണ്ടോ?

അതൊക്കെ രണ്ട് മൂന്ന് ദിവസം കൊണ്ട് മാറിയായിരുന്നമ്മായി

അത് കേട്ടവൾ ഞെട്ടിത്തെറിച്ചു

എങ്കിലും, അമ്മായിയുടെ മുന്നിലത് പ്രകടിപ്പിച്ചില്ല

ഈശ്വരാ... ഏത് നേരത്താണോ ഗിരിയേട്ടൻ്റെ മുറിയിലേക്ക് ചെല്ലാൻ തനിക്ക് തോന്നിയത്, ഇനി അടുത്ത മാസം 

പിരീഡ്സാകുന്നത്  വരെ, എരിയുന്ന നെഞ്ചുമായി കഴിയണം ,ഒന്നും വേണ്ടിയിരുന്നില്ല, തൻ്റെ വീട്ടിൽ തന്നെ നിന്നാൽ മതിയായിരുന്നു, അമ്മായി വിളിച്ചപ്പോൾ ,ചാടിപ്പുറപ്പെട്ടത് കൊണ്ടല്ലേ? തനിക്കീ ഗതി വന്നത് ,അല്ല, താനെന്തിനാ അതൊക്കെ ചിന്തിക്കുന്നത് ,തനിക്ക് തെറ്റ് സംഭവിച്ചത് ഇന്നലെ രാത്രിയിലല്ലേ? ഗിരിയേട്ടൻ കടന്ന് പിടിച്ചപ്പോൾ ,താനെന്തേ കുതറി മാറിയില്ല ,അതിന് കഴിഞ്ഞില്ലെങ്കിൽ ,എന്ത് കൊണ്ട് ഒച്ച വച്ചില്ല, ഒരു പക്ഷേ തൻ്റെ നിലവിളി കേൾക്കുമ്പോഴെങ്കിലും അദ്ദേഹം പേടിച്ച് പിൻമാറില്ലായിരുന്നോ ?അപ്പോൾ തെറ്റ് തൻ്റെ ഭാഗത്തുമുണ്ട്, ഒരു പുരുഷനൊന്ന് ചേർത്ത് പിടിച്ചപ്പോൾ, അലിഞ്ഞില്ലാതാവാനും മാത്രം നിർമ്മലമായിരുന്നോ? തൻ്റെ വികാരങ്ങൾ

കുറ്റബോധം അവളുടെ മനസ്സിനെ നീരാളിയെ പോലെ ചുറ്റിപ്പിടിച്ചു .

സൂര്യപ്രകാശം, ജനൽ പാളിയിലൂടെ മുഖത്തടിച്ചപ്പോഴാണ് ഗിരി കണ്ണ് തുറന്നത് .

കണ്ണ് തിരുമ്മി എഴുന്നേറ്റ് കട്ടിലിലിരുന്നപ്പോൾ, അയാളുടെ മനസ്സിലേക്ക് രാത്രിയിലുണ്ടായ സംഭവങ്ങൾ തികട്ടി വന്നു.

മാസങ്ങൾക്ക് ശേഷം സിതാരയോടൊത്തുള്ള ഒത്ത് ചേരൽ ,അയാളുടെ മനസ്സിനും ശരീരത്തിനും പുതിയൊരുണർവ്വ് നല്കിയിരുന്നു.

ഇന്നലെ താൻ ചിലവഴിച്ച 

ഉന്മാദനിമിഷങ്ങൾ, സിതാരയോടപ്പം തന്നെയായിരുന്നെന്നാണ് , ഇപ്പോഴുമയാൾ ഉറച്ച് വിശ്വസിക്കുന്നത്.

അമ്മേ.. ചായ കിട്ടിയില്ല

അയാൾ ഉറക്കെ വിളിച്ച് പറഞ്ഞു.

കുറച്ച് കഴിഞ്ഞപ്പോൾ, സുമതി ചായയുമായി മുകളിലേക്ക് വന്നു.

നിനക്കൊന്ന് താഴേക്ക് വന്നാലെന്താ ഗിരീ.. എന്നെയീ വയസ്സ് കാലത്ത് പടി ചവിട്ടിക്കണോ?

അതിന് അമ്മയെന്തിനാ വന്നത്,

പാറുവെന്തേ?

അവൾക്ക് നല്ല സുഖമില്ല കിടക്കുവാ

ങ്ഹേ! അവൾക്കെന്ത് പറ്റി ?പനി വല്ലതുമുണ്ടോ?

ഹേയ് അതൊന്നുമല്ലെടാ ..

വെള്ളം മാറി കുളിച്ചതിൻ്റെയായിക്കും, തലനീരിറങ്ങിയതാ

ഉം എങ്കിൽ കിടന്നോട്ടെ, അമ്മ വിളിക്കാൻ നിക്കണ്ട 

ഓഹ് ഉത്തരവ്, അല്ല നിനക്ക് ഓഫീസിൽ പോകണ്ടേ?

ഞാൻ ദേ പോകുവാ ,അമ്മ ബ്രേക്ക് ഫാസ്റ്റ് തയ്യാറാക്കിക്കോ

ഗിരിയുടെ കൈയ്യിൽ നിന്നും കാലിഗ്ളാസ്സ് വാങ്ങിയിട്ട്, സുമതി താഴേക്ക് പോയി.

മക്കൾ രണ്ട് പേരും, ഓഫീസിൽ പോയി കഴിഞ്ഞപ്പോൾ, സുമതി അലക്കാനുള്ള തുണികൾ വാഷിങ്ങ് മെഷീനിലേക്കിടുമ്പോഴാണ്, കോളിങ്ങ് ബെല്ലടിക്കുന്നത് കേട്ടത്.

നനഞ്ഞ കൈ ,സാരിത്തുമ്പിൽ തുടച്ചിട്ട് ,മുൻവശത്ത് വന്ന് വാതിൽ തുറന്ന് നോക്കിയപ്പോൾ,

കൈയ്യിലൊരു തുണി സഞ്ചിയുമായി, മുന്നിൽ നില്ക്കുന്ന മുക്കുത്തിയിട്ട ഇരുനിറമുള്ള യുവതിയെ കണ്ട്, സുമതി നെറ്റി ചുളിച്ചു.

ആരാ എന്ത് വേണം?

അമ്മാ ..നാൻ വന്ത് മുത്ത് ലച്ച്മി,

ഇങ്കെ വേലൈ പാക്കർത്ക്ക് ഒരു പൊണ്ണ് വേണോന്ന് ചാമിയണ്ണൻ വന്ത് സൊള്ളിയാച്ച്

തമിഴും മലയാളവും ഇടകലർത്തിയവൾ സുമതിയോട് പറഞ്ഞു.

ങ്ഹാ നേരാ.. ഞാനത് പറഞ്ഞിട്ട് കുറേ നാളായി, എന്തായാലും നീയിന്ന് തന്നെ വന്നത് നന്നായി,

ഇന്നൊരുപാട് ജോലിയുണ്ടിവിടെ, നീ പുറകിലോട്ട് വാ

മുത്ത് ലക്ഷ്മിയെ പിൻ വശത്തേക്ക് പറഞ്ഞയച്ചിട്ട്, സുമതി മുൻ വാതിലടച്ച് കുറ്റിയിട്ടു.

രാത്രി പതിവ് പോലെ ഗിരി, സിതാരയ്ക്ക് വേണ്ടി , ഉറക്കമിളച്ച് കാത്തിരിപ്പ് തുടങ്ങി.

ദൂരെ ഇടവഴിയിൽ നിന്നും നായ്ക്കൂട്ടങ്ങളുടെ ഓരിയിടൽ കേട്ടു ,പുറത്ത്, നിലാവസ്തമിക്കുകയും , ഇരുട്ടിന് കനം കൂടി വരികയും ചെയ്തു.

ക്ളോക്കിൽ മണി പന്ത്രണ്ടടിച്ചപ്പോൾ, ഗിരി ബാല്ക്കണിയിലേക്കിറങ്ങി നിന്ന്, മുറ്റത്തെ ഉദ്യാനത്തിലേക്ക് നോക്കി.

ഇളം കാറ്റടിച്ച് പൂത്ത് നില്ക്കുന്ന പിച്ചിയും ,ജമന്തിയും, ചെമ്പകവുമൊക്കെ സുഗന്ധം പരത്തുന്നു.

കുറച്ച് കഴിഞ്ഞപ്പോൾ, സ്റ്റെയർകെയ്സിലെ പടികളിൽ, പാദങ്ങൾ അമരുന്ന ശബ്ദം കേട്ടു. 

അതിനോടൊപ്പം ചെണ്ട് മല്ലിയുടെ ,മത്ത് പിടിപ്പിക്കുന്ന ഗന്ധവും, അടുത്തടുത്ത് വരുന്നതായി ഗിരിക്ക് തോന്നി.

അയാൾ വേഗം മുറിയിൽ കയറി കട്ടിലിൽ മലർന്ന് കിടന്നു.

വാതില്ക്കൽ നിഴലനക്കം കണ്ട് അങ്ങോട്ട് നോക്കിയ ഗിരി,

മുത്ത് ലക്ഷ്മിയെ കണ്ട് അമ്പരന്ന് പോയി.

നീയെന്താ ഈ സമയത്ത് ഇവിടെ ?

ഹ ഹ ഹ ,

മുത്ത് ലക്ഷ്മിയുടെ അട്ടഹാസം കേട്ട് ഗിരി നടുങ്ങി.

ഞാൻ മുത്ത് ലക്ഷ്മിയല്ല ഗിരി.., സിത്താരയാണ്

ങ്ഹേ, നീയെന്താ ഈ വേലക്കാരിയുടെ ദേഹത്ത് കയറി വന്നത് ,ഇന്നലെ വന്നത് പോലെ പാർവ്വതിയുടെ രൂപത്തിൽ വന്നാൽ പോരായിരുന്നോ?

എന്താ ഗിരീ.. നിനക്ക് വട്ടായോ ?അതിന് ഞാൻ മൂന്നാല് ദിവസങ്ങൾക്ക് ശേഷം, ഇപ്പോഴല്ലേ ഇങ്ങോട്ട് വരുന്നത് ,ഇത് വരെ ഞാനെന്താ വരാതിരുന്നതെന്ന് ചോദിക്ക്?

സിതാര പറഞ്ഞത് കേട്ട്, ഗിരി അസ്ത്ര പ്രജ്ഞനായി നിന്ന് പോയി.

അപ്പോൾ ഇന്നലെ താനുമായി കിടക്ക പങ്കിട്ടത്, സിത്തുവല്ലായിരുന്നോ ? ഈശ്വരാ ... അപ്പോൾ പാറുവിനെയാണോ, മദ്യലഹരിയിൽ താനിന്നലെ ....ശ്ശെ !

അസ്വസ്ഥതയോടെ അയാൾ തല കുടഞ്ഞു.

എന്താ ഗിരീ... എന്താ ആലോചിക്കുന്നത്?

താൻ ആലോചിക്കുന്നതെന്താണെന്ന് സിത്തുവെങ്ങാനും അറിഞ്ഞാൽ.. വേണ്ട ,തല്ക്കാലം അവളൊന്നുമറിയണ്ട

ഓഹ് സോറി സിത്തു ,നീയന്ന് വന്ന് പോയതിനെക്കുറിച്ചാണ് ഞാനുദ്ദേശിച്ചത്, അല്ലാ.. ഇത്രയും ദിവസം നീയെന്താ വരാതിരുന്നത്?

ങ്ഹാ, അങ്ങനെ ചോദിക്ക് ,ഞാൻ അന്ന് വന്നത് പോലെ, പിറ്റേന്നും വന്നതാണ് ,അപ്പോഴാണറിയുന്നത് പാറുവിന് അശുദ്ധിയായെന്ന് ,അത് കൊണ്ട് അവൾ ശുദ്ധിയാകുന്ന ഏഴ് ദിവസങ്ങൾ കഴിയുന്നത് വരെ കാത്തിരിക്കാമെന്ന് കരുതി, നിരാശയോടെ ഞാൻ മടങ്ങിപ്പോയതാണ്, പക്ഷേ ,ഇന്നെനിക്കൊരു ഉൾവിളിയുണ്ടായി, കന്യകയായൊരു അന്യദേശക്കാരി ഇവിടെ എത്തിയിട്ടുണ്ടന്ന് ,അങ്ങനെ വീണ്ടും വന്നപ്പോഴാണ്, അടുക്കളയോട് ചേർന്ന മുറിയിൽ കിടന്നുറങ്ങുന്ന, മുത്ത് ലക്ഷ്മിയെ കാണുന്നത് ,പിന്നെ ,അന്ന് കാണിച്ചത് പോലെ, ആക്രാന്തമൊന്നും കാണിക്കരുത് കെട്ടോ, എന്നെ സ്പർശിക്കാൻ ശ്രമിക്കരുത് ,അത് ചിലപ്പോൾ എനിക്ക് വരമായി കിട്ടിയ ഈ വരുത്ത് പോക്കിനെ, എന്നെന്നേക്കുമായി ഇല്ലാതാക്കിയെന്ന് വരും 

ഒരു വാണിങ് പോലെ പറഞ്ഞിട്ട് , അവൻ്റെയടുത്തേക്ക് ചെല്ലാതെ , മേശയ്ക്കരികിൽ കിടന്ന കസേര വലിച്ചിട്ട് ,സിതാര അതിലിരിപ്പുറപ്പിച്ചു .

🍁ഭാഗം-6

കഥയവസാനിക്കുന്നില്ല ,തുടരുന്നു .

അല്ല ഗിരീ.. ഇവിടെയുണ്ടായിരുന്ന എൻ്റെ ചിത്രങ്ങളൊക്കെ എവിടെ?

അപ്രതീക്ഷിതമായ സിതാരയുടെ ചോദ്യത്തിൽ ഗിരിക്ക് ഉത്തരം മുട്ടി

അത് പിന്നെ, 

നിൻ്റെ വേർപാട് എനിക്ക് ഫീല് ചെയ്യാതിരിക്കാനായിരുന്നു, ഈ മുറി നിറയെ, നിൻ്റെ ചിത്രങ്ങൾ ഞാൻ നിറച്ച് വച്ചത് ,പക്ഷേ ഇപ്പോൾ നീ തിരിച്ച് വന്നില്ലേ? അപ്പോൾ പിന്നെന്തിനാ, നിൻ്റെ ചിത്രങ്ങളെന്നോർത്ത്, ഞാനതല്ലാമെടുത്ത് ഫയലാക്കി വച്ചു 

ഒരു വിധത്തിലാണ്, ഗിരി തൻ്റെ ഭാഗം സേഫാക്കിയത്.

ഉം മിടുക്കൻ ,അപ്പോൾ എൻ്റെ പേരും പറഞ്ഞ് തുടങ്ങിയ കള്ള്കുടിയും നിർത്തുമല്ലോ അല്ലേ?

അതെപ്പോഴെ നിർത്തി,

താങ്ക്സ് ഗിരി..., സത്യത്തിൽ എനിക്ക് ഗിരിയോടിപ്പോൾ 

ഒരുപാടിഷ്ടവും, ബഹുമാനവുമൊക്കെ തോന്നുന്നു, അത് മറ്റൊന്നുമല്ല, ഞാൻ മരിച്ചിട്ടും, ഗിരിയിത് വരെ മറ്റൊരു വിവാഹത്തെക്കുറിച്ച്, ചിന്തിക്കുക പോലും ചെയ്യാതെ, എൻ്റെ ഓർമ്മകളുമായി ഇത്രയും നാൾ തനിച്ച് ജീവിച്ചില്ലേ?അപ്പോൾ തനിക്കെന്നോട് ആത്മാർത്ഥമായ സ്നേഹമുണ്ടായിരുന്നല്ലേ? എന്നിട്ടെനിക്കെന്താ, അത് മനസ്സിലാവാതെ പോയത്,

ജീവിച്ചിരുന്നപ്പോൾ ,തൊട്ടതിനും പിടിച്ചതിനുമൊക്കെ ഞാൻ ഗിരിയുമായി കലഹിച്ചു, ഉള്ളിൽ സ്നേഹമുണ്ടായിരുന്നിട്ടും, എന്ത് കൊണ്ടോ ഞാൻ ഗിരിയോടത് പ്രകടിപ്പിച്ചുമില്ല ,എൻ്റെ അപകർഷതാബോധമായിരുന്നു അതിന് കാരണം, എനിക്ക് പ്രസവിക്കാൻ കഴിയില്ലെന്ന തിരിച്ചറിവിൽ നിന്നുണ്ടായ കടുത്ത നിരാശ ,അമ്മയുൾപ്പെടെ

മറ്റുള്ളവരിൽ നിന്നും ഏറ്റ് വാങ്ങേണ്ടി വന്ന അവഗണനയും, കുറ്റപ്പെടുത്തലുകളും , പരിഹാസവും എൻ്റെ മനസ്സിലുണ്ടാക്കിയ ആഴത്തിലുള്ളവ മുറിവ്, നീറ്റലുണ്ടാക്കുമ്പോഴായിരുന്നു, 

ആ ദേഷ്യവും, സങ്കടവും ഞാൻ ഗിരിയോട് വഴക്കടിച്ച് തീർത്തിരുന്നത്, നിൻ്റെ കൂടെ ജീവിച്ചെനിക്ക് കൊതി തീർന്നില്ലെടാ .. പക്ഷേ, എനിക്കിനി അതിന് കഴിയില്ലല്ലോ? ഇപ്പോൾ ഇങ്ങനെയെങ്കിലും നിൻ്റെയരികിലെത്താനും, നിന്നോട് സംസാരിച്ചിരിക്കാനും കഴിയുന്നുണ്ട്, പക്ഷേ, അത് എത്ര നാൾ, ഇനിയെത്ര നാളിങ്ങനെ മറ്റൊരാളുടെ ദേഹത്തെ ആശ്രയിച്ച് എനിക്ക് നിൻ്റെയടുത്തെത്താനാവും, 

മുത്ത് ലക്ഷ്മി എപ്പോൾ വേണമെങ്കിലും തിരിച്ച് പോകാം, പിന്നെയുള്ളത്, പാർവ്വതിയാണ്, അവളും, കോളേജ് തുറക്കുമ്പോൾ അവളുടെ വീട്ടിലേക്ക് തിരിച്ച് പോവില്ലേ? അത് കൊണ്ട് ഞാനൊരു കാര്യം പറഞ്ഞാൽ ഗിരി അനുസരിക്കുമോ?

എന്താ സിത്തൂ... എന്താണെങ്കിലും പറയു ...?

വർദ്ധിച്ച ജിജ്ഞാസയോടെ ഗിരി അവളോട് ചോദിച്ചു.

ഗിരി, നീയൊന്ന് കൂടി വിവാഹം കഴിക്കണം

ങ്ഹേ, നീയെന്താ സിത്തൂ ഈ പറയുന്നത് ?

സിതാരയിൽ നിന്ന് അങ്ങനെയൊരു ആവശ്യമുണ്ടാവുമെന്ന് ഗിരി ഒരിക്കലും പ്രതീക്ഷിച്ചില്ല.

അതേ ഗിരീ ... ഞാൻ സീരിയസ്സായിട്ട് പറഞ്ഞതാ,

അതിന് രണ്ട് കാരണങ്ങളുണ്ട്, 

ഒന്ന്, എനിക്ക് ഗിരിയോടൊപ്പം ജീവിക്കാൻ സ്ഥിരമായിട്ടൊരു സത്രീശരീരം കിട്ടും ,മറ്റൊന്ന് ഇനി വിവാഹം കഴിക്കുന്നവൾക്ക്, ഗർഭം ധരിക്കാനും, ഗിരിയുടെ കുട്ടികളെ പ്രസവിക്കാനും കഴിഞ്ഞാൽ, അതോടെ നമ്മുടെ രണ്ട് പേരുടെയും ജീവിതത്തിൽ ,ഏറെ നാളായുണ്ടായിരുന്ന വലിയൊരു പ്രശ്നത്തിന് പരിഹാരവുമാകും

പക്ഷേ സിത്തൂ.. രണ്ടാം കെട്ട്കാരനായ എനിക്ക്, പെണ്ണ് കിട്ടുകാ എന്ന് പറയുന്നത്, അത്ര എളുപ്പമുളള കാര്യമല്ല

അതിന് നമ്മൾ ,പെണ്ണിനെ അന്വേഷിച്ച് എന്തിനാ നടക്കുന്നത്? നല്ലൊരു പെൺകുട്ടി ഇവിടെ തന്നെയുണ്ടല്ലോ?

നീ പാർവ്വതിയെ ആണോ ഉദ്ദേശിച്ചത്?

അതേ ഗിരീ.. അവളാണ് നിനക്ക് നന്നായി ചേരുന്നത് 

പക്ഷേ, അമ്മാവൻ നമ്മതിക്കുമെന്ന് തോന്നുന്നില്ല

അതിനൊക്കെ വഴിയുണ്ട്, പാർവ്വതിക്ക് നിന്നെ 

ഒരുപാടിഷ്ടമല്ലേ? അവളെ വിവാഹം കഴിക്കാൻ നിനക്ക് താല്പര്യമുണ്ടെന്ന് പറഞ്ഞാൽ, അവളെന്തായാലും എതിർക്കില്ല,

പിന്നെ അമ്മാവൻ്റെ കാര്യം ,അതിന് നീയും പാർവ്വതിയും ചേർന്ന്, അമ്മയുടെ മുന്നിൽ വലിയൊരു കെട്ട് കഥയുണ്ടാക്കി അവതരിപ്പിക്കണം

എന്ത് കെട്ട് കഥ? എന്തൊക്കെയാ നീ പറഞ്ഞ് വരുന്നത് ?എനിക്കൊന്നും മനസ്സിലാകുന്നില്ല

അതായത്, ചില സിനിമകളിലൊക്കെ നമ്മള് കാണാറില്ലേ? എതിർത്ത് നില്ക്കുന്ന മാതാപിതാക്കളെ കൊണ്ട് സമ്മതിപ്പിക്കാൻ, നായിക ഗർഭിണിയാണെന്ന് കളവ് പറയുന്നത്, അത്തരമൊരു സീൻ നിങ്ങൾ രണ്ട് പേരും കൂടി ക്രിയേറ്റ് ചെയ്യണം , പാർവ്വതി ഒരു ദിവസം ഭക്ഷണം കഴിച്ച് കൊണ്ടിരിക്കുമ്പോൾ, മനംപിരട്ടലുണ്ടാകുകയും, ഛർദിക്കാനായി വാഷ്ബേസനിലേക്ക് ഓടി പോകുകയും ചെയ്യുന്നു, കാര്യമെന്താണെന്നറിയാതെ പകച്ച് നില്ക്കുന്ന അമ്മയോട്, പാർവ്വതി തനിക്കൊരു തെറ്റ് പറ്റിയെന്ന് കുറ്റബോധത്തോടെ പറയുന്നു,

അപ്പോൾ അമ്മ ചോദിക്കുന്നു, 

ആരാ മോളെ ഇതിനുത്തരവാദി? ,

തൊട്ട് പുറകെയെത്തുന്ന നായകൻ ,അതായത്, ഗിരി അമ്മയോട് കുറ്റസമ്മതം നടത്തുന്നു, ഞാനാണമ്മേ.. 

ഒരു ദുർബല നിമിഷത്തിൽ, ഞങ്ങൾക്കൊരു അബദ്ധം പറ്റിയതാണമ്മേ ...ഇത്രയും ഭാഗം, നിങ്ങൾ രണ്ട് പേരും മനോഹരമായി അഭിനയിച്ചാൽ മാത്രം മതി ,പിന്നെ അമ്മാവനെ കൊണ്ട് സമ്മതിപ്പിക്കുന്ന കാര്യം, ഗിരിയുടെ അമ്മ നോക്കിക്കൊള്ളും

എൻ്റെ സിത്തൂ... നിന്നെ ഞാൻ സമ്മതിച്ചു , നിൻ്റെയുള്ളിൽ നല്ലൊരു കലാകാരി ഒളിഞ്ഞ് കിടപ്പുണ്ട് കെട്ടോ ,എന്തായാലും ഞാനാദ്യം പാറൂനോടൊന്ന് സംസാരിക്കട്ടെ ,അവളുടെ ഇഷ്ടമാണല്ലോ പ്രധാനം

ഉം ശരി, നാളെ തന്നെ നീ പാർവ്വതിയോട് കാര്യങ്ങൾ അവതരിപ്പിക്കണം ,നാളെ ഞാൻ വരുന്നത് , ഒരു ശുഭവാർത്ത കേൾക്കാനായിരിക്കും ,എന്നാൽ ശരി ,ഗിരീ ...എനിക്ക് പോകാൻ സമയമായി ,ഇനി നാളെ കാണാം

ഓകെ സിത്തൂ.. ഗുഡ് നൈറ്റ്

സിതാര ,യാത്ര പറഞ്ഞ് പോയപ്പോൾ, ഗിരിയുടെ മനസ്സിൽ സമ്മിശ്ര വികാരങ്ങളുടെ വേലിയേറ്റമുണ്ടായി .

പിറ്റേന്നയാൾ ജോലി കഴിഞ്ഞ് വന്നപ്പോൾ ,പാർവ്വതി ചെടികൾ നനച്ച് കൊണ്ടിരിക്കുകയായിരുന്നു.

ഗിരിയെ കണ്ടപ്പോൾ, അനിഷ്ടത്തോടെയവൾ 

മുഖം തിരിച്ചു.

ഈശ്വരാ ... കഴിഞ്ഞദിവസത്തെ സംഭവത്തിന് ശേഷം, ആദ്യമായാണ് അവളെ ഫെയ്സ് ചെയ്യുന്നത് ,തന്നോടവൾക്കിപ്പോൾ വെറുപ്പായിരിക്കും ,എന്ത് പറഞ്ഞാണ്, അവളെയൊന്ന് അനുനയിപ്പിക്കുന്നത്, മദ്യലഹരിയിൽ, ഒരബദ്ധം പറ്റിയതാണെന്നും, തന്നോട് ക്ഷമിക്കണമെന്നും പറഞ്ഞ്, കാല് പിടിക്കാം, പാവമാണവൾ ,തൻ്റെ സങ്കടം കണ്ടാൽ, പണ്ടേ അവൾക്ക് പെട്ടെന്ന് മനസ്സലിയും,

പാറൂ... എന്നോട് ദേഷ്യമായിരിക്കുമല്ലേ?

അവളുടെ പുറകിൽ ചെന്ന് നിന്ന്, ശബ്ദം താഴ്ത്തി, അയാൾ ചോദിച്ചുവെങ്കിലും, അവൾ മറുപടിയൊന്നും പറഞ്ഞില്ല.

എന്തെങ്കിലുമൊന്ന് പറയൂ പാറുക്കുട്ടി...തെറ്റ് എൻ്റേതാണ്, 

നീ കുടിക്കരുതെന്ന് പറഞ്ഞിട്ട്, ഞാൻ വീണ്ടും കുടിച്ചു, അത് കൊണ്ടല്ലേ? ബോധമില്ലാതെ ഞാൻ നിന്നോട് അങ്ങനെയൊക്കെ പെരുമാറിയത്, അതിന് ഞാൻ നിൻ്റെ കാല് പിടിച്ച് മാപ്പ് ചോദിക്കുന്നു ,എന്നോട് ക്ഷമിക്കൂ പാറൂ ...

ഗിരിയേട്ടാ ...സങ്കടം കൊണ്ട് ,പൊട്ടിയൊലിക്കാൻ വെമ്പി നില്ക്കുന്നൊരു അഗ്നിപർവ്വതമാണ് ഞാൻ,

എന്നെ കരയിപ്പിക്കല്ലേ ഗിരിയേട്ടാ ..

ഈറനായ അവളുടെ കണ്ണുകളിൽ നോക്കിയപ്പോൾ, അറിയാതെയാണെങ്കിലും

താൻ ചെയ്ത് പോയത്, വലിയൊരു അപരാധം തന്നെയാണെന്ന്, അയാൾക്ക് മനസ്സിലായി, അതിന് പ്രായച്ഛിത്തം ചെയ്താലേ, തനിക്കിനി മനസ്സമാധാനത്തോടെ ജീവിക്കാൻ പറ്റു എന്നയാൾക്കറിയാമായിരുന്നു ,

അത് കൊണ്ട് തന്നെയാണ്, സിതാര പറഞ്ഞ ആലോചനയ്ക്ക് ,അയാൾ മുൻകൈയ്യെടുത്തത്.

🍁ഭാഗം-7

അമ്മേ...അമ്മയോട് എനിക്കൊരു കാര്യം പറയാനുണ്ട്

അടുക്കളയിൽ മെഴുക്കിനുള്ള പയറ് നുറുക്കുകയായിരുന്ന സുമതി, ഗിരിയുടെ ശബ്ദം കേട്ട് തിരിഞ്ഞ് നോക്കി.

എന്താ മോനേ പറയ്?

അതമ്മേ... എനിക്ക് പറയാനുള്ളത് പാറൂൻ്റെ കാര്യമാണ്

ങ്ഹാ, അവളുടെ കല്യാണക്കാര്യമല്ലേ? 

അതേ അമ്മേ.. അമ്മയ്ക്കെങ്ങനെ മനസ്സിലായി?

അതിന്നലെ,  മനു  

എന്നോട് വന്ന് പറഞ്ഞായിരുന്നു, എൻ്റെ സമ്മതം കിട്ടിയപ്പോൾ, നിന്നോടും കൂടി പറയണമെന്ന് പറഞ്ഞാണ്, ഇന്നലെ എൻ്റെയടുത്തുന്ന് അവൻ പോയത്, പക്ഷേ നിൻ്റെ അമ്മാവനെ കൊണ്ട് സമ്മതിപ്പിക്കുന്നതാണ് പ്രയാസം, പണ്ട് നിനക്ക് വേണ്ടി ആലോചി ച്ചപ്പോൾ, അവനെതിര് പറഞ്ഞത് കൊണ്ടാണ്, അന്നത് നടക്കാതെ പോയത് ,

അമ്മയെന്തൊക്കെയാണ് ഈ പറയുന്നത് ,എനിക്കൊന്നും മനസ്സിലാകുന്നില്ല

ശ്ശെടാ ... മനുവിൻ്റെയും പാറുൻ്റെയും വിവാഹ കാര്യമല്ലേ 

നീ പറഞ്ഞത് ,അത് തന്നെയാ ഞാനും പറഞ്ഞോണ്ടിരിക്കുന്നത്, അവന് പാറുനെ കല്യാണം കഴിക്കണമെന്നുണ്ട്, അതിന് ഞാൻ തന്നെ നിങ്ങടെ അമ്മാവനെ കൊണ്ട് സമ്മതിപ്പിക്കണമെന്നാണ് അവനിന്നലെ എന്നോടാവശ്യപ്പെട്ടത്

അമ്മ പറഞ്ഞത് കേട്ട് ,ഗിരി സ്തബ്ധനായി പോയി, അതോടെ താൻ പറയാൻ വന്ന കാര്യം ഗിരി മനസ്സിലൊതുക്കി.

അല്ലമ്മേ ... അതിന് പാറുവിൻ്റെ ഇഷ്ടംകൂടി ,നമ്മൾ ചോദിച്ചറിയണ്ടേ?

ഓഹ്, എന്നാത്തിനാ ,അവൾക്ക് നൂറ് വെട്ടം സമ്മതമായിരിക്കും

എങ്കിലും, അവളോടൊന്ന് ചോദിക്കുന്നതായിരുന്നു, 

അതിൻ്റെ മര്യാദ

എൻ്റെ ഗിരീ..അതിന് അവൾ നമ്മുടെ കുട്ടിയല്ലേ? അന്യയൊന്നുമല്ലല്ലോ ?ആദ്യം അവളുടെ അച്ഛനെക്കൊണ്ടൊന്ന് സമ്മതിപ്പിക്കാൻ പറ്റുമോന്ന്, ഞാനൊന്ന് നോക്കട്ടെ

തൻ്റെ ആൺമക്കളിൽ ആരെങ്കിലും ഒരാൾ ,പാർവ്വതിയെ വിവാഹം കഴിക്കണമെന്നേ അവർക്കാഗ്രഹമുണ്ടായിരുന്നുള്ളു,

അത് മറ്റൊന്നുമല്ല, പിഡബ്ല്യു കോൺട്രാക്ടറായ സുധാകരന്, പാർവ്വതി എന്ന ഒറ്റ മകളേയുള്ളു,

സുധാകരൻ്റെ കണക്കില്ലാത്ത സ്വത്തിൻ്റെ ഏക അവകാശിയാണവൾ, 

ആ സ്വത്തുക്കൾ പുറത്ത് അന്യാനായ മറ്റൊരുത്തൻ കൊണ്ട് പോകാതെ, തൻ്റെ കുടുംബത്തിലേക്ക് വന്ന് ചേരണമെന്നായിരുന്നു, സുമതിയുടെ അത്യാഗ്രഹം, അതിനവർ ആദ്യം ലക്ഷ്യമിട്ടത്, ഗിരിയെ ആയിരുന്നെങ്കിലും, രണ്ടാം കെട്ടുകാരനായ അവനെ സുധാകരൻ അംഗീകരിക്കാൻ സാധ്യത കുറവാണെന്ന് തോന്നിയത് കൊണ്ടാണ്, മനുവിൻ്റെ ആഗ്രഹം തന്നെ നടക്കട്ടെയെന്ന്, അവർ ഉറപ്പിച്ചത് ,രണ്ടായാലും സ്വത്തുക്കൾ വന്ന് ചേരുന്നത് പൊന്നേഴത്ത് തറവാട്ടിലേക്ക് തന്നെയല്ലേ ?എന്നവർ കണക്ക് കൂട്ടി .

ഇനി അമ്മയോടൊന്നും പറഞ്ഞിട്ട് കാര്യമില്ലെന്ന് ഗിരിക്ക് മനസ്സിലായി, താനും പാറുവുമായി അരുതാത്തത് സംഭവിച്ചിട്ടുണ്ടെന്ന്, അമ്മയുടെ മുഖത്ത് നോക്കി പറയാൻ ,അയാൾക്ക് മടി തോന്നി, പക്ഷേ, ഈ വിവാഹം തടയേണ്ടത് തൻ്റെ കടമായാണെന്നും, അതിന് മനുവിനോട് കാര്യങ്ങൾ തുറന്ന് പറയാമെന്നും, അയാൾ കരുതി ,

ഇന്നലെ താൻ പാറുവിൻ്റെയടുത്ത് ചെന്നത് ,തൻ്റെ തെറ്റിന് മാപ്പ് ചോദിക്കാനും, താനവളെ വിവാഹം കഴിക്കാമെന്ന് പറയാനുമായിരുന്നു, പക്ഷേ ആ സമയത്താണ്, മനു ,ഓഫീസിൽ നിന്ന് വന്നതും, വിശേഷങ്ങൾ പറഞ്ഞ് കൊണ്ട് തൻ്റെയും ,പാറുവിൻ്റെയും ഇടയിലേക്ക് ഒരു കട്ടുറുമ്പിനെ പോലെ കയറി വന്നതും, 

അതോടെ ആ ഫ്ളോ അങ്ങ് പോയി, അങ്ങനെയാണിന്ന്, തനിക്ക് പാറുവിനെ കല്യാണം കഴിക്കാനുള്ള താല്പര്യം അറിയിക്കാമെന്ന് കരുതി, അമ്മയുടെയടുത്തേക്ക് വന്നത്, പാറുവിനോട് പിന്നീട് പറഞ്ഞാൽ മതിയെന്നോർത്തു ,പക്ഷേ മനു തന്നെ, ഓവർ ടേക്ക് ചെയ്യുമെന്ന് ഒരിക്കലും കരുതിയില്ല, 

വൈകുന്നേരം, മനു ഒാഫീസിൽ നിന്ന് വന്നപ്പോൾ, ഗിരി അയാളുടെ മുറിയിലേക്ക് ചെന്നു.

മനൂ ,എനിക്ക് നിന്നോട് സീരിയസ്സായിട്ടൊരു കാര്യം പറയാനുണ്ട്

ഉം .. അമ്മ എല്ലാം ചേട്ടനോട് പറഞ്ഞല്ലേ?

അതെ, അതിനെക്കുറിച്ച് പറയാൻ തന്നെയാണ് ഞാൻ വന്നത്

മദ്യലഹരിയിൽ, താനറിയാതെ പാർവ്വതിയോട് തെറ്റ് ചെയ്ത് പോയ കാര്യം, ഗിരി മനുവിനോട് പറഞ്ഞു. 

ഹ ഹ ഹ 

അത് കേട്ട് മനു ആദ്യം പൊട്ടിച്ചിരിച്ചു.

എൻ്റെ ചേട്ടാ ... നിങ്ങൾക്ക് നാണമില്ലേ? ഇത്തരം തറ വേലകളും കൊണ്ട് ഇനിയും എൻ്റെയടുത്തേക്ക് വരാൻ, ഇതൊക്കെ കേട്ടയുടനെ വിശ്വസിക്കാൻ ഞാനിപ്പോൾ പഴയ ആ മനുവല്ല, പണ്ട് ഞാൻ നിങ്ങള് പറഞ്ഞത് മുഴുവൻ കണ്ണടച്ച് വിശ്വസിച്ചിട്ടുണ്ട് ,പക്ഷേ നിങ്ങളിലുള്ള എൻ്റെ വിശ്വാസത്തെ നിങ്ങൾ മാക്സിമം മുതലെടുക്കുകയായിരുന്നു എന്ന്, എനിക്ക് മനസ്സിലായത് ,സിതാരയെ നിങ്ങൾ എന്നിൽ നിന്ന് തട്ടിയെടുത്തപ്പോഴായിരുന്നു

മനൂ.. നീയെന്തൊക്കെയാ പറയുന്നത്, നീ എന്നെ വല്ലാതെ തെറ്റിദ്ധരിച്ചിരിക്കുവാണ്

ഇല്ല, എൻ്റെ ധാരണകളൊക്കെ സത്യമായിരുന്നു ,പഴയ കാര്യങ്ങളൊക്കെ നിങ്ങൾക്കോർമ്മയുണ്ടോ? 

അന്ന് എനിക്കൊരു പെൺകുട്ടിയെ ഇഷ്ടമായിരുന്നു, അവളോടത് തുറന്ന് പറയാൻ എനിക്ക് മടിയായത് കൊണ്ട് ,എൻ്റെ ദൂതനായാണ് ഞാൻ നിങ്ങളെ സിതാരയുടെ അരികിലേക്ക് വിട്ടത് ,പക്ഷേ അവളെ കാണാൻ പോയി തിരിച്ച് വന്ന നിങ്ങൾ, അന്നും ഇത് പോലൊരു കല്ല് വച്ച നുണ ,എന്നോട് പറഞ്ഞിരുന്നു, നിങ്ങളും സിതാരയും കോളേജ് മേറ്റായിരുന്നെന്നും ,അവളുമായി നിങ്ങൾക്ക് അരുതാത്ത ബന്ധങ്ങൾ ഉണ്ടായിട്ടുണ്ടെന്നും, അതുകൊണ്ട് നീയിതിൽ നിന്ന് പിന്മാറണമെന്നും പറഞ്ഞ്, എൻ്റെ മനസ്സ് മാറ്റിയിട്ട് ,കുറെ നാളുകൾ കഴിഞ്ഞപ്പോൾ, ആ സിതാരയെ നിങ്ങൾ തന്നെ വിവാഹം കഴിക്കുകയും ചെയ്തു ,നിങ്ങളുടെ ഉള്ളിലൊരു കൗശലക്കാരനുണ്ടെന്ന് ,

അന്നെനിക്ക് മനസ്സിലായതാണ്, അത് കൊണ്ട് ,ഞാൻ കാര്യമായിട്ട് പറയുവാ, പാർവതിയ എനിക്ക് വേണം, അവളെ സ്വന്തമാക്കാൻ ഞാനേതറ്റം വരെയും പോകും

അത് പറയുമ്പോഴുള്ള മനുവിൻ്റെ കണ്ണുകളിലെ തീക്ഷ്ണത ഗിരിയെ ഭയപ്പെടുത്തി

ഒരു വെല്ല് വിളി പോലെ മനുവത് പറഞ്ഞപ്പോൾ തന്നെയവൻ വല്ലാതെ തെറ്റിദ്ധരിച്ചിരിക്കുന്നു എന്ന് ഗിരിക്ക് മനസ്സിലായി.

നിരാശയോടെ ഗിരി തൻ്റെ മുറിയിലേക്ക് മടങ്ങിയെങ്കിലും ഉത്തരം കിട്ടാത്ത ഒരു ചോദ്യം ബാക്കിയാവുകയിയിരുന്നു

പാറു, ഇതിന് സമ്മതിക്കുമോ ?

അവളോട് തന്നെയത്, നേരിട്ട് ചോദിക്കാൻ ഗിരി തീരുമാനിച്ചു.

അവളെ തനിച്ചൊന്ന് മീറ്റ് ചെയ്യാൻ, അയാൾ കാത്തിരുന്നു.

ഒടുവിൽ പിറ്റെ ദിവസം, കല്യാണാലോചനയുമായി , സുമതി അമ്മാവൻ്റെ വീട്ടിലേക്ക് പോയ തക്കം നോക്കി ,ഗിരി പാർവ്വതിയെ സമീപിച്ചു.

നീയും കൂടി അറിഞ്ഞിട്ടാണോ? അമ്മയും മനുവും കൂടി നിൻ്റെ കല്യാണക്കാര്യം ആലോചിക്കുന്നത്?

മുഖവുരയില്ലാതെ ,ഗിരി അവളോട് ചോദിച്ചു.

അതെ..

ങ്ഹേ...

പാർവ്വതിയുടെ കൂസലില്ലാതെയുള്ള മറുപടി കേട്ട് ഗിരി അമ്പരന്നു.

അപ്പോൾ അവനുമായുള്ള വിവാഹത്തിന് നിനക്ക് സമ്മതമാണോ? 

അതെ.. ഞാൻ സമ്മതിച്ചിട്ടാണ്, മനുവേട്ടൻ അമ്മയോട് പറഞ്ഞത്

ഉറച്ച ശബ്ദത്തിൽ, പാർവ്വതി പറഞ്ഞത് കേട്ട് ,ഗിരി ഞെട്ടിത്തെറിച്ച് പോയി .

🍁ഭാഗം-8

പാറൂ.. അറിയാതെ പറ്റിപ്പോയൊരബദ്ധത്തിൻ്റെ പേരിൽ, നീയെന്നോട് പ്രതികാരം ചെയ്യുവാണോ ?

മനസ്താപത്തോടെ ഗിരി അവളോട് ചോദിച്ചു.

അല്ല ഗിരിയേട്ടാ ... അന്ന് ഗിരിയേട്ടൻ എന്നോട് അങ്ങനെയൊക്കെ പെരുമാറിയപ്പോൾ ,ആദ്യമൊക്കെ എനിക്ക് ഗിരിയേട്ടനോട് വെറുപ്പ് തോന്നിയിരുന്നുവെങ്കിലും, പിന്നീട് ഞാനാലോചിച്ചപ്പോൾ, ആ തെറ്റിന് ഞാനും കൂടി ഉത്തരവാദിയാന്നെന്ന് എനിക്ക് മനസ്സിലായി ,പിന്നെ ഗിരിയേട്ടനെ ഫെയ്സ് ചെയ്യാനുള്ള സങ്കോചം  കൊണ്ടായിരുന്നു, ഞാൻ ഗിരിയേട്ടനിൽ നിന്നും ഒഴിഞ്ഞ് മാറിയിരുന്നത്

പിന്നെന്തിനാണ് നീ എന്നെ ഒഴിവാക്കി, മനുവിൻ്റെ ഭാര്യയാകാൻ സമ്മതം കൊടുത്തത്, നമ്മൾ തമ്മിലുണ്ടായ ശാരീരിക ബന്ധത്തെക്കുറിച്ച് ,

നിനക്കവനോട് പറയാമായിരുന്നില്ലേ?

ഒക്കെ പറയണമെന്നുണ്ടായിരുന്നു എനിക്ക് ,പക്ഷേ എല്ലാം തീരുമാനിച്ചുറപ്പിച്ച് വന്ന, 

മനുവേട്ടനോട് മറുത്തൊന്നും പറയാനുള്ള, സാവകാശം എനിക്കുണ്ടായില്ല, ഞാൻ ശരിക്കും നിശബ്ദയായി പോയിരുന്നു

എന്തൊക്കെയാ പാറൂ.. നീ പറയുന്നത്, എനിക്കൊന്നും മനസ്സിലാകുന്നില്ല ,ജേഷ്ടനൊപ്പം പങ്ക് വച്ച ശരീരവുമായി, അനുജൻ്റെ ഭാര്യയായി ജീവിക്കാൻ, നിനക്കൊട്ടും കുറ്റബോധം തോന്നുന്നില്ലേ?

ഗിരിയേട്ടാ... പ്ളീസ്... നിർവ്വികാരമായ എൻ്റെ ശരീരം മാത്രമേ, മനുവേട്ടന് സ്വന്തമാക്കാൻ കഴിയു, മനസ്സ് കൊണ്ട് ഞാനെൻ്റെ ഗിരിയേട്ടൻ്റെ മാത്രമായിരിക്കും

എങ്കിൽ അവനോട് പോയി പണി നോക്കാൻ പറ ,അവൻ നിന്നോട് കാണിക്കുന്നത് സ്നേഹമല്ല, എന്നോടുള്ള പ്രതികാരമാണ്, സിതാരയും ഞാനുമായുണ്ടായിരുന്ന, പഴയ ബന്ധത്തെക്കുറിച്ച്, ഞാനാരോടും പറഞ്ഞിട്ടില്ല, പക്ഷേ അതറിയാതെ മനു, അവളെ സ്നേഹിക്കുന്നുണ്ടെന്നറിഞ്ഞപ്പോൾ ഞാനവനെ തിരുത്തുകയും സിതാരയെ ഞാൻ വിവാഹം കഴിക്കുകയും ചെയ്തപ്പോൾ അവൻ്റെ മുന്നിൽ ഞാൻ ചതിയനും നീചനുമായി ,

പക്ഷേ ,അവനിൽ നിന്നും, ഞാൻ മന:പ്പൂർവ്വം സിതാരയെ തട്ടിയെടുത്തതാണെന്ന് പറഞ്ഞ്, തെറ്റിദ്ധാരണയുടെ പേരിൽ ,നിന്നെ സ്വന്തമാക്കിയിട്ട് എന്നോട് പ്രതികാരം ചെയ്യാനൊരുങ്ങുകയാണവൻ ,

അത് കൊണ്ട് നീ വേണം, ഇനിയവനെ കാര്യങ്ങൾ പറഞ്ഞ് ബോധിപ്പിക്കാൻ, 

ഇല്ല ഗിരിയേട്ടാ ... നമ്മളൊരുപാട് വൈകിപ്പോയി ,ഇനിയൊന്നും പറഞ്ഞിട്ട് കാര്യമില്ല, ഗിരിയേട്ടൻ പൊയ്ക്കോളു ,

മനുവേട്ടനെങ്ങാനും നമ്മൾ സംസാരിക്കുന്നത് കണ്ടാൽ ...

കണ്ടാലെന്താ? അവൻ നമ്മളെ പിടിച്ച് വിഴുങ്ങുമോ?നീയെന്തിനാ അവനെ ഇത്രയും പേടിക്കുന്നത്?

പ്ളീസ് ഗിരിയേട്ടാ.. എന്നോടൊന്നും ചോദിക്കരുത്, പ്ളീസ് ലീവ് മീ എലോൺ..

പൊട്ടിക്കരഞ്ഞ് കൊണ്ട്, അവൾ അകത്തേയ്ക്കോടിപ്പോയപ്പോൾ, ഗിരിക്ക് പകച്ച് നില്ക്കാനേ കഴിഞ്ഞുള്ളു .

അമ്മാവൻ്റെ വീട്ടിൽ പോയിരുന്ന സുമതി സന്തോഷത്തോടെയാണ് വൈകിട്ട് തിരിച്ച് വന്നത്

മോനേ ഗിരീ...അമ്മാവൻ സമ്മതിച്ചെടാ.. ഇനിയിപ്പോൾ പാറൂനെ ഇവിടെ നിർത്തിയാൽ ശരിയാവില്ല ,നാളെ തന്നെ നീയവളെ വീട്ടിൽ കൊണ്ട് ചെന്നാക്കണം, ഇനി മനുവിൻ്റെ പെണ്ണായിട്ട് വലത് കാല് വച്ച് വേണം അവളെ ഇവിടെ കൊണ്ട് വരാൻ 

ലോകം പിടിച്ചടക്കിയ സന്തോഷത്തിലായിരുന്നു സുമതി

പക്ഷേ , അമ്മയുടെ വാക്കുകൾ  ഗിരിയുടെ നെഞ്ചിൽ തീമഴയായി പെയ്തിറങ്ങി.

വൈകുന്നേരം, ബാറിൽ പോയി കുടിച്ചിട്ടാണ് അയാൾ വന്നത്.

മറ്റുള്ളവരൊക്കെ ഉറക്കമായപ്പോൾ,സിതാരയുടെ കാലൊച്ചയ്ക്കായി ഗിരി അക്ഷമയോടെ കാത്തിരുന്നു.

അന്നും മുത്ത് ലക്ഷ്മി തന്നെയാണ് വന്നതെന്ന് കണ്ടപ്പോൾ, ഗിരിക്ക് നേരിയ നിരാശ തോന്നി.

എന്താ ഗിരീ ...മുഖം വാടിയത് ,പാറുവിനെ പ്രതീക്ഷിച്ചിട്ട് മുത്ത് ലക്ഷ്മി വന്നത് കൊണ്ടാണോ ?

ഉം നീ പറഞ്ഞത് സത്യമാണ്,

പക്ഷേ നമ്മുടെ പ്ളാനുകളൊന്നും നടക്കില്ല സിത്തൂ ...

എല്ലാം ഞാനറിഞ്ഞു ഗിരീ ... ഇന്നലെ രാത്രിയിൽ മുത്ത് ലക്ഷ്മിയുടെ ദേഹത്ത് കയറി ഞാൻ ഗിരിയുടെ അടുത്തേയ്ക്ക് വരുമ്പോൾ, കോണിച്ചുവട്ടിൽ വച്ച് മനുവും, പാർവ്വതിയും തമ്മിൽ സംസാരിക്കുന്നത് ഞാൻ കണ്ടു,

അസമയത്ത് അവരെന്താണ് 

ഇത്ര ഗൗരവമായി സംസാരിക്കുന്നതെന്നറിയാൻ, ഞാൻ വാതിലിൻ്റെ മറവിൽ ഒളിച്ച് നിന്ന് കാതോർത്തു.

നിനക്കറിയാമോ ഗിരീ..പാർവ്വതിയെ, മനു ഭീഷണിപ്പെടുത്തിയാണ്, ഈ വിവാഹത്തിന് സമ്മതിപ്പിച്ചത് 

ങ്ഹേ ,സിത്തൂ, നീ പറയുന്നത് സത്യമാണോ?

അതെ ഗിരീ ... അവൻ പറഞ്ഞതെന്താണെന്ന് 

ഗിരിക്കറിയണോ?

വേഗം പറയൂ സിത്തു.. എന്നെ ടെൻഷനടിപ്പിക്കാതെ

നമ്മൾ തേടി നടന്ന, എൻ്റെ കൊലയാളി അവനായിരുന്നു, മനു...

ങ്ഹേ മനുവോ?

അവിശ്വസനീയതയോടെ ഗിരി സിതാരയുടെ തോളിൽ പിടിച്ച് കുലുക്കി കൊണ്ട് ചോദിച്ചു.

അതേ ഗിരീ ... അന്ന് കുളക്കടവിലെ പടിയിൽ നിന്ന എന്നെ, കുളത്തിലേക്ക് തൊഴിച്ചെറിഞ്ഞത് അവനാണെന്നും ,ഈ വിവാഹത്തിന് സമ്മതിച്ചില്ലെങ്കിൽ, നിന്നെയും ഞാൻ അത് പോലെ കൊന്ന് കളയുമെന്നും പറഞ്ഞ്, 

ഒരു ഭ്രാന്തനെ പോലെയാണവൻ അവളോട് സംസാരിച്ചത്, എന്നെ ഗിരി സ്വന്തമാക്കിയത്, ഒരു വൈരാഗ്യമായി അവൻ്റെ മനസ്സിൽ കിടപ്പുണ്ടായിരുന്നു, അതാണവൻ അവസരം കിട്ടിയപ്പോൾ എന്നെ ഇല്ലാതാക്കി നിന്നെ വേദനിപ്പിച്ചത് ഗിരി, ഇനിയും അവൻ്റെ പക തീർന്നിട്ടില്ല, പാറുവിനെക്കൂടി നിന്നിൽ നിന്ന് തട്ടിയെടുത്ത്, നിന്നെ മാനസികമായി പീഡിപ്പിച്ച്, അതിലൂടെ ആനന്ദം കണ്ടെത്താൻ ശ്രമിക്കുന്ന ഒരു സാഡിസ്റ്റാണവൻ

നീ പറഞ്ഞതൊക്കെ സത്യമാണെങ്കിൽ, ഇനി ഒരു നിമിഷം പോലും അവൻ ജീവിച്ചിരിക്കാൻ പാടില്ല, കൊല്ലും ഞാനവനെ

കലിതുള്ളി പുറത്തേയ്ക്ക് പോകാനൊരുങ്ങിയ ഗിരിയെ, സിതാര തടഞ്ഞു.

വേണ്ട ഗിരീ ... നീയല്ല ,ഞാനാണത് ചെയ്യേണ്ടത്, അവനെ എനിക്ക് വിട്ടേക്ക്, നാളെ പുലരുമ്പോൾ, കുളത്തിലവൻ്റെ ജഡം പൊങ്ങിയിരിക്കും ,എന്നെ ഇല്ലാതാക്കിയതിന് വേണ്ടി ,മാത്രമല്ല ഞാനവനെ കൊല്ലുന്നത്, നീയും, പാർവ്വതിയും ഒന്നിക്കാൻ കൂടി വേണ്ടിയാണ് ,അത് കണ്ട്  കൊണ്ട്, എൻ്റെ ആത്മാവിന് ശാന്തി കിട്ടണം ,ഇത്രയും നാളും നീയെന്നെയോർത്ത് നിൻ്റെ ജീവിതം മദ്യപിച്ച് തീർത്തില്ലേ?

ഇനി അങ്ങനെയുണ്ടാവാൻ പാടില്ല,

തല്ക്കാലം ഇപ്പോൾ ഞാൻ പോകുന്നു ,നിനക്കും പാർവ്വതിക്കുമൊരു കുഞ്ഞുണ്ടാകുമ്പോൾ, 

ആ കൺമണിയെക്കാണാൻ ഞാനിനി ആരുടെയെങ്കിലും ദേഹത്ത് കയറി നേരിട്ട് വരാം

ങ്ഹേ, അപ്പോൾ പാർവ്വതിയുടെ ശരീരത്തിൽ നീയിനി പ്രവേശിക്കില്ലേ?

ഇനിയതിന് കഴിയില്ലല്ലോ ഗിരീ ... തന്നിൽ നിന്ന് ഒഴിഞ്ഞ് പോകാനായി പാർവ്വതി, ആ സത്യവും ഇന്നലെ മനുവിനോട് തുറന്ന് പറഞ്ഞിരുന്നു, നീയും പാർവ്വതിയും തമ്മിലുണ്ടായ ശാരീരിക ബന്ധത്തെക്കുറിച്ച്, അത് കേട്ടപ്പോൾ ഞാൻ തകർന്ന് പോയെന്നുള്ളത് സത്യമാണ്, പക്ഷേ, ഇന്നല്ലെങ്കിൽ നാളെ ഒന്നാകേണ്ടവരാണ് നിങ്ങൾ, അതിന് മുൻകൈ എടുക്കുന്നതും, ഞാൻ തന്നെയാണ്, അപ്പോൾ പിന്നെ, എൻ്റെ നിരാശയ്ക്ക് അർത്ഥമില്ലല്ലോ ,ഞാനാദ്യമേ പറഞ്ഞില്ലേ ഗിരീ... ഒരു കന്യകയുടെ ദേഹത്ത് മാത്രമേ, എനിക്ക് പ്രവേശിക്കാൻ കഴിയൂ എന്ന്, അന്ന് പിന്നെ, ഞാനങ്ങനെ പറഞ്ഞത് ,പാർവ്വതിയെ കല്യാണം കഴിക്കാൻ ,ഗിരി എതിരൊന്നും പറയാതിരിക്കാൻ വേണ്ടിയായിരുന്നു ,

പാറു ഇപ്പോൾ കന്യകയല്ലല്ലോ? അത് കൊണ്ട്, ഇന്ന് രാത്രി മനുവിനോടുള്ള എൻ്റെ പ്രതികാരം നടപ്പിലാക്കിയിട്ട്, ഞാൻ തിരിച്ച് പോകും,

സിത്തൂ ... നീയെന്നെ വിട്ട് പോകുവാണോ ?

ഇല്ല ഗിരീ... ഞാനീ പൊന്നേഴത്ത് തറവാടിൻ്റെ പരിസരത്ത്, മറ്റാർക്കും കാണാൻ പറ്റാതെ, എന്നുമുണ്ടാവും, നിന്നെ പിരിഞ്ഞ് പോകാൻ എനിക്ക് കഴിയില്ല ഗിരീ ... ഞാനത്രയ്ക്ക് നിന്നെ സ്നേഹിക്കുന്നു ,കൈയ്യെത്തും ദൂരത്ത് നീയുണ്ടായിട്ടും, നിൻ്റെ നെഞ്ചിലൊന്നമരാൻ കഴിയാതെ, നിന്നോട് പരിഭവം പറയാൻ കഴിയാതെ ,നീയുമായി ഒന്നും രണ്ടും പറഞ്ഞ് പിണങ്ങാൻ കഴിയാതെ, നിൻ്റെ ചുണ്ടുകൾക്ക് നുകരാൻ പാകത്തിന്,എൻ്റെ തുടുത്ത കപോലങ്ങൾ നീട്ടാൻ കഴിയാതെ, നിൻ്റെ കുഞ്ഞുങ്ങളെ പ്രസവിക്കാൻ കഴിയാതെ നിശബ്ദമായി തേങ്ങുന്നൊരാത്മാവായി നിൻ്റെയരികിൽ തന്നെ, ഞാനെന്നുമുണ്ടാവും 

അവളുടെ കണ്ണുകൾ നിറയുന്നതും, അധരം വിതുമ്പുന്നതും നിസ്സഹായതയോടെ നോക്കി നില്ക്കാനേ, ഗിരിക്ക് കഴിഞ്ഞുള്ളു

പിറ്റേന്ന് നാടിനെ നടുക്കിയ വാർത്തയോടെയാണ്, ആ ഗ്രാമം പുലർന്നത്.

പൊന്നേഴത്ത് വീണ്ടുമൊരു ദുർമരണം സംഭവിച്ചിരിക്കുന്നു.

മനുവിൻ്റെ ശവസംസ്ക്കാരം കഴിഞ്ഞ് ,കാർന്നോന്മാരുടെ

നിർദ്ദേശപ്രകാരം, ജ്യോത്സ്യനെ കൊണ്ട് പ്രശ്നം വപ്പിച്ചു.

ആദ്യം ദുർമരണപ്പെട്ടു പോയ സിതാരയുടെ ആത്മാവ്, ഗതി കിട്ടാതെ അലയുന്നുണ്ടെന്നും, അവളെ ആവാഹിച്ച്, ഈ ഗ്രാമത്തിന് പുറത്തെ കൊടുംവനത്തിലെവിടെയെങ്കിലുമുള്ള ,ഒറ്റപ്പെട്ട് നില്ക്കുന്ന യക്ഷിപ്പനയിൽ കൊണ്ട് തളയ്ക്കണമെന്നും, ജ്യോത്സ്യൻ കർശനമായി പറഞ്ഞു.

പക്ഷേ, അതൊക്കെ അന്ധവിശ്വാസവും ദുരാചാരവുമാണെന്ന് പറഞ്ഞ്, ഗിരി അതിനെ നഖശിഖാന്തമെതിർത്തെങ്കിലും ,സുമതിയുടെ മനസ്സിൽ ,ജ്യോത്സ്യൻ്റെ വാക്കുകൾ ഒരു താക്കീത് പോലെ തറഞ്ഞിരുന്നു.

മനുവിൻ്റെ ഒന്നാം ചരമവാർഷികം കഴിഞ്ഞ് , ഇരു വീട്ടുകാരും ആലോചിച്ച് ഗിരിയുടെയും, പാർവതിയുടെയും വിവാഹം മംഗളമായി നടത്തി.

ഒന്നാം വിവാഹ വാർഷികത്തിന് ഒരു മാസം ബാക്കിയുള്ളപ്പോൾ പാർവ്വതി ,തങ്കക്കുടം പോലൊരു കുഞ്ഞിനെ പ്രസവിച്ചു.

ഗിരി കുഞ്ഞിനെയുമെടുത്ത് പുറത്ത് വന്ന് ആകാശത്തേയ്ക്ക് നോക്കി

ആകാശം നിറയെ നക്ഷത്രങ്ങൾ തെളിഞ്ഞിരുന്നെങ്കിലും, അങ്ങ് ദൂരെ മാറി ഒറ്റപ്പെട്ട് നില്ക്കുന്ന, നക്ഷത്രത്തിന് നേരെ കുഞ്ഞിനെ നീട്ടി അയാൾ പറഞ്ഞു ,സിത്തൂ... നീയാഗ്രഹിച്ചത് പോലെ, എനിക്കും പാർവ്വതിക്കും ഒരു മകള് പിറന്നിരിക്കുന്നു ,അവൾക്ക് ഞാനിടാൻ പോകുന്ന പേരെന്താണെന്നോ? സിതാരഗിരി,

അതേ.. ഇനി മുതൽ ഇവൾ സിതാരാഗിരിയാണ്

നീയെന്നാ സിത്തൂ.. കുഞ്ഞിനെ കാണാൻ വരുന്നത്?

അതിന് മറുപടി പറയാൻ കഴിയാതെ , തലയിൽ തറച്ച ആണിയിലൂടെ ചോര വാർന്നൊഴുകി, ഒന്നനങ്ങാൻ പോലുമാവാതെ ,ദൂരെയുള്ള ഘോരവനത്തിലെ ഒറ്റപ്പനയിൽ, ബന്ധിക്കപ്പെട്ട ,സിതാരയുടെ നിലവിളി ,വലിയപറക്കെട്ടുകളിൽ തട്ടി പ്രതിദ്ധ്വനിച്ചു.

അവസാനിച്ചു.

DOWNLOAD FOR PDF STORY CLICK HERE

 📝സജി തൈപ്പറമ്പ്.