🍁ഹരിയുടെ രണ്ടാം വിവാഹം🍁ഫുൾ പാർട്ട്🍁

🍁ഹരിയുടെ രണ്ടാം വിവാഹം🍁ഫുൾ പാർട്ട്🍁 

......................................................

"ന്റെ ബ്രോക്കറേ, ഈ കല്യാണക്കാര്യം ശരിയാവില്ല. രണ്ട് മാസം കൂടെക്കഴിഞ്ഞ ഭാര്യ ആ പയ്യനെ ഇട്ടിട്ട് വേറൊരുത്തന്റെ കൂടെ ഒളിച്ചോടിയിട്ടുണ്ടെങ്കിൽ ആ പയ്യന് എന്തോ കുഴപ്പം ഉണ്ട്‌ എന്നല്ലേ അർഥം. നല്ലൊരു ഭർത്താവായിരുന്നു അവനെങ്കിൽ ഒരിക്കലും ഒരു പെണ്ണ് മറ്റൊരുത്തന്റെ കൂടെ പോവില്ല. എന്തായാലും അവനെപ്പോലുള്ള ഒരുത്തന്റെ കൂടെ പറഞ്ഞയച്ച് ന്റെ മോളെ കഷ്ടപെടുത്താൻ ഞാനില്ല"

ഹരിക്ക് കല്യാണം നോക്കിയിരുന്ന ബ്രോക്കർ എല്ലാ വീട്ടിൽ നിന്നും കേട്ടിരുന്ന സ്ഥിരം പല്ലവി ആയിരുന്നു ഇത്. ഹരിയുടെ രണ്ടാമത്തെ വിവാഹമാണ്‌ട്ടോ നോക്കുന്നത്. ആദ്യത്തെ ഭാര്യ കല്യാണം കഴിഞ്ഞ് രണ്ട് മാസം ആയപ്പോഴേക്കും വേറൊരുത്തന്റെ കൂടെ ഒളിച്ചോടി പോയി. ആ ഒരു സംഭവത്തിന് ശേഷം ഹരി ആകെ തകർന്നു. പൊന്നുപോലെ ആയിരുന്നു അവൻ അവളെ നോക്കിയിരുന്നത്. അവൾ പോയതിൽ പിന്നെ ഇനിയൊരു വിവാഹമേ വേണ്ടാ എന്ന തീരുമാനത്തിലായിരുന്നു അവൻ നിന്നിരുന്നത്. പക്ഷേ വീട്ടുകാരുടെ നിർബന്ധം സഹിക്കാൻ പറ്റാതായപ്പോൾ അവൻ മറ്റൊരു വിവാഹത്തിന് സമ്മതിച്ചു. 

ഭാര്യ ഇട്ടേച്ച് പോയതിൽ പിന്നെ നാട്ടുകാരുടേയും വീട്ടുകാരുടേയും ഇടയിൽ ഒരു പരിഹാസ കഥാപാത്രമായി മാറി അവൻ.   പലരും രഹസ്യമായി പറഞ്ഞു അവന് ആണത്വമില്ലാഞ്ഞിട്ടാണ് അവൾ വെറൊരുത്തന്റെ കൂടെ പോയത് എന്ന്. ചിലർ പറഞ്ഞു അവനൊരു പകൽ മാന്യൻ ആണ് എന്നും അവന് മറ്റൊരു പെണ്ണുമായി അടുപ്പം ഉണ്ടെന്നും അത് ചോദ്യം ചെയ്ത ഭാര്യയെ നിരന്തരം മൃഗീയമായി തല്ലാറുണ്ടായിരുന്നു എന്ന്. മറ്റുചിലർ പറഞ്ഞു ഹരിയുടെ അമ്മയുടെ പീഡനം കൊണ്ടാണ് അവൾ പോയത് എന്ന്. അങ്ങനെ അവരവരുടെ വായിൽ വരുന്നത് ഓരോരുത്തർ പറഞ്ഞുകൊണ്ടിരുന്നു. 

ഇനി ഹരിയെ കുറിച്ച് പറയാം. അമ്മയുടേയും അച്ഛന്റെയും ഒരേയൊരു ആൺതരി. അവന് താഴെ ഒരു അനിയത്തിയാണ് ഉള്ളത്. അവൾ പത്താം ക്ലാസ്സിൽ പഠിക്കുന്നു. അച്ഛൻ ഒരു പലചരക്ക് കട നടത്തുന്നു. അമ്മ വീട്ടിലെ ഭരണം കയ്യാളുന്നു. ഹരി ഒരു പ്രൈവറ്റ് ബാങ്കിൽ അക്കൗണ്ടന്റ് ആയി ജോലി ചെയ്യുന്നു. അത്യാവശ്യം കുഴപ്പമില്ലാതെ സന്തോഷത്തോടെ ജീവിക്കുന്ന കുടുംബം. ഹരിയുടെ ഒഴിവ് സമയങ്ങൾ ചിലവഴിച്ചിരുന്നത് അവരുടെ ഗ്രാമത്തിലുള്ള ഒരു ക്ലബ്ബിൽ ആയിരുന്നു. 

ഹരിയും കൂട്ടുകാരും ചേർന്ന് ഉണ്ടാക്കിയ ഒരു ക്ലബ്‌ ആയിരുന്നു അത്. അത്യാവശ്യം ഉത്സവപരിപാടിക്കും കല്യാണത്തിനുമൊക്കെ അവരുടെ ക്ലബ്ബിന്റെ പ്രോഗ്രാം ഉണ്ടാവാറുണ്ട്.  മിമിക്രി, ഗാനമേള ആയിരുന്നു അവരുടെ പ്രധാന കലാപരിപാടി. ഹരി നല്ലൊരു കലാകാരൻ കൂടി ആയിരുന്നു. നന്നായി പാടും, മിമിക്രി ചെയ്യും, കോമഡി സ്കിറ്റിൽ തകർപ്പൻ പെർഫോമൻസ് കാഴ്ചവെക്കും. ഭാര്യ പോയതിന്റെ സങ്കടവും മറ്റുള്ളവരുടെ പരിഹാസവും അതുകൊണ്ടുണ്ടായ നാണക്കേടും എല്ലാം മറക്കാൻ അവൻ ആ ക്ലബ്ബിലായിരുന്നു സമയം ചെലവഴിച്ചിരുന്നത്. കൂട്ടുകാരായിരുന്നു അവന് ആശ്വാസം നൽകിയിരുന്നത്. കൂട്ടുകാരുടെ കൂടെ കുറേ സമയം കളിയും ചിരിയുമൊക്കെയായി അങ്ങനെ ഇരിക്കുമ്പോൾ ആ സങ്കടമൊക്കെ അവനങ്ങട് മറക്കും.

പല കല്യാണ ആലോചനകളും മുടങ്ങി തുടങ്ങിയപ്പോൾ അവൻ അമ്മയോട് തന്റെ തീരുമാനം അറിയിച്ചു

"ന്റെ പൊന്ന് അമ്മേ, എനിക്ക് ഇനീം നാണം കെടാൻ വയ്യ. എന്നെ ഇപ്പോ അങ്ങാടിയിലുള്ള പലരും ബേക്കറി തീനി എന്നാ വിളിക്കാറ്, അറിയോ...? പെണ്ണ് വീട്ടിലേക്ക് പോവാൻ തന്നെ ഇപ്പോ മടിയായി. അവരുടെ കുത്തികുത്തിയുള്ള ഓരോ ചോദ്യങ്ങൾ കേൾക്കുമ്പോൾ തരിച്ച് വെരും എനിക്ക്"

അപ്പോഴൊക്കെ അവനെ അമ്മയായിരുന്നു സമാധാനിപ്പിച്ചിരുന്നത് 

"ആഹാ, എന്നുകരുതി എന്റെ മോൻ പെണ്ണൊന്നും കെട്ടാതെ ജീവിക്കാൻ പോവണോ...? ഞങ്ങൾക്കേ ആണായിട്ട് നീ മാത്രമേ ഒള്ളൂ, നീ ഇങ്ങനെ നിരാശനായി നടക്കും എന്നറിഞ്ഞിരുന്നേൽ ഞങ്ങൾ അന്നേ ഒന്നൂടെ ട്രൈ ചെയ്തേനെ, ഇനിയിപ്പോ അതിന് പറ്റില്ലല്ലോ, വയസ്സായില്ലേ ഞങ്ങൾക്ക്. അതുകൊണ്ട് ന്റെ മോനെകൊണ്ട് തന്നെ ഞങ്ങൾ പെണ്ണ് കെട്ടിക്കും. ഏതോ ഒരുത്തി ഇട്ടേച്ച് പോയന്ന് കരുതി ഇങ്ങനെ നടക്കാനാണ് പ്ലാൻ എങ്കിൽ, അതിനുള്ള വെള്ളം അങ്ങ് മാറ്റി വെച്ചേക്ക്"

ഹരിയുടെ മുഖം ചുവന്നു 

"അമ്മക്ക് എന്ത് പറഞ്ഞാലും തമാശയാ, എന്റെ അവസ്ഥ എനിക്കേ അറിയൂ. എന്നെ ഇട്ടേച്ച് പോയ ഭാര്യയെ ആലോചിച്ച് ഒന്നുമല്ല ഞാൻ ഇപ്പോൾ കല്യാണം വേണ്ടാ എന്ന് പറഞ്ഞേ, അവൾ പോയപ്പോൾ നാട്ടുകാരും കുടുംബക്കാരും എന്നെകുറിച്ച് പറയുന്ന കഥകൾ കേട്ടിട്ടാ, അതൊന്നും അമ്മക്ക് പറഞ്ഞാൽ മനസ്സിലാവില്ല"

അമ്മ അവനെ വാത്സല്യത്തോടെ നോക്കി 

"ന്റെ മോന് നല്ല രാജകുമാരിയെ പോലെ ഒരു പെണ്ണിനെ കിട്ടും, അവളെ കിട്ടാനാ ഈ തടസ്സങ്ങൾ എല്ലാം. നീ നോക്കിക്കോ"

ഹരി അമ്മയെ നോക്കി പുഞ്ചിരിച്ചു. അമ്മ അവന്റെ മുടിയിൽ മെല്ലെ തലോടി. അപ്പോഴാണ് ഹരിയുടെ മൊബൈൽ ശബ്‌ദിച്ചത്. നോക്കിയപ്പോൾ കൂട്ടുകാരൻ ആയിരുന്നു, അവൻ ഫോണെടുത്തു 

"ടാ ഹരിയേ, അടുത്ത ഞാറാഴ്ച്ച ഒരു കല്യാണ പരിപാടി ബുക്ക് ആയിട്ടുണ്ട് ട്ടോ, ഇന്ന്‌ ക്ലബ്ബിൽ വന്ന് നിന്റെ മാസ്റ്റർപീസ് ആയ സംഗീതമേ അമരസല്ലാപമേ ഒന്ന് കീച്ചി തേച്ചു മിനുക്കി വെച്ചോ, നമുക്ക് കല്യാണത്തിന് പൊളിക്കണം"

"ഓക്കേടാ, ഞാൻ വൈകീട്ട് ക്ലബ്ബിൽ വരാം. നീ മുരളിയോടും ഗഫൂറിനോടും കോമഡി സ്കിറ്റിൽ എന്തേലും പുതുമ ഉണ്ടാക്കാൻ പറ. രണ്ടിനും വേറെ പണിയൊന്നും ഇല്ലല്ലോ, അവിടെ വെറുതേ ചൊറിയും കുത്തി ഇരിക്കല്ലേ"

അന്ന് വൈകുന്നേരം ക്ലബ്ബിൽ പൊരിഞ്ഞ പ്രാക്ടീസ് ആയിരുന്നു. പാട്ടും മിമിക്രിയും ഡാൻസുമൊക്കെയായി അവർ അവിടെ പൊളിച്ചോണ്ടിരിക്കുമ്പോഴാണ് മഹേഷേട്ടൻ അവരുടെ ക്ലബ്ബിലേക്ക് കയറിച്ചെല്ലുന്നത്. മഹേഷേട്ടൻ അവരുടെ നാട്ടിലെ അറിയപ്പെടുന്ന ഒരു സാമൂഹിക പ്രവർത്തകൻ ആണ്. ഹരിയും കൂട്ടുകാരുമെല്ലാം സ്വന്തം ചേട്ടനെ പോലെ കാണുന്ന ആളാണ് മഹേഷേട്ടൻ. അദ്ദേഹം കുറച്ചു സമയം അവരുടെ പാട്ടും മിമിക്രിയുമൊക്കെ നോക്കി അവിടിരുന്നു. കുറച്ച് സമയത്തിന് ശേഷം അദ്ദേഹം ഹരിയെ നോക്കി 

"ടാ ഹരി, ഇവിടെ വന്നേ"

ഹരി കയ്യിലുള്ള മൈക്ക് ടേബിളിൽ വെച്ചിട്ട്  അദ്ദേഹത്തിന്റെ അടുത്തേക്ക് ചെന്നു 

"ന്താ മഹേഷേട്ടാ"

മഹേഷേട്ടൻ ഹരിയെ ഒന്ന് നോക്കി 

"നീയൊന്ന് പുറത്തോട്ട് വന്നേ, നിന്നോട് ചില കാര്യങ്ങൾ സംസാരിക്കാനുണ്ട്"

ഹരി മഹേഷേട്ടന്റെ പിറകെ നടന്നു. ആളൊഴിഞ്ഞ ഒരു സ്ഥലത്ത് നിന്നിട്ട് മഹേഷേട്ടൻ പോക്കറ്റിൽ നിന്നും സിഗരറ്റ് എടുത്ത് ചുണ്ടിൽ വെച്ച് കത്തിച്ചു 

"അല്ല ഹരിയേ, ന്താ നിന്റെ പ്ലാൻ"

ഹരി മഹേഷേട്ടനെ ഒന്ന് നോക്കി 

"ന്ത്"

ഒരു പുക ആഞ്ഞ് വലിച്ച്, അത് പതുക്കെ പുറത്തേക്ക് ഊതി മഹേഷേട്ടൻ അവനെ നോക്കി 

"നിനക്ക് അറിയോ എന്തോണ്ടാണ് നിന്റെ കല്യാണക്കാര്യമൊക്കെ ഇങ്ങനെ മുടങ്ങുന്നത് എന്ന്"

ഹരി ഇല്ലാ എന്ന അർഥത്തിൽ കണ്ണിറുക്കി തലയാട്ടി

"ആ ബ്രോക്കർ പറഞ്ഞപ്പോഴാ ഞാൻ കാര്യം അറിയുന്നേ"

ഒന്ന് നിറുത്തിയിട്ട് മഹേഷേട്ടൻ ഹരിയെ നോക്കി കണ്ണുരുട്ടി 

"എടാ കൊണാപ്പാ, പെണ്ണ് വീട്ടുകാർ നിന്നോട് മുൻഭാര്യയെ കുറിച്ച് ചോദിക്കുമ്പോൾ നീയെന്തിനാ അവളെ വർണ്ണിച്ച് അവരോടൊക്കെ പറയുന്നത്. അങ്ങനെ പറയുമ്പോൾ നിനക്ക് എന്തോ കുഴപ്പം ഉണ്ടായിട്ടാണ് അവൾ പോയതെന്നല്ലേ വീട്ടുകാർ കരുതൂ. സത്യം പറ, നീ പൊട്ടനാണോ അതോ പൊട്ടനെ പോലെ അഭിനയിക്കാണോ"

ഹരി ചമ്മിയ ഒരു ചിരി ചിരിച്ചു 

"അതുപിന്നെ മഹേഷേട്ടാ, മുൻഭാര്യയെ പറ്റി മറ്റുള്ളവരോട് കുറ്റം പറയുന്നതൊക്കെ മോശല്ലേ"

മഹേഷേട്ടന് പെരുവിരലിൽ നിന്നും എന്തോ സാധനം തലയിലോട്ട് കയറിവരുന്ന പോലെ തോന്നി 

"പിന്നേ, അവള് നിന്നോട് ചെയ്തിരിക്കുന്നത് അത്രേം നല്ല കാര്യല്ലേ. നീയൊരു കാര്യം ചെയ്യ്, അവളെ കുറിച്ച് വർണ്ണിച്ച് ഒരു പുസ്തകം എഴുതി ഈ പഞ്ചായത്തിലുള്ള എല്ലാ വീട്ടിലും കൊണ്ടുപോയി കൊടുക്ക്"

ഒന്ന് നിറുത്തിയിട്ട് മഹേഷേട്ടൻ ഹരിയെ നോക്കി 

"ഈ ലോകത്ത് രണ്ടാംകെട്ട് കെട്ടാൻ പോവുന്ന ആദ്യത്തെ ആളൊന്നുമല്ല നീ. ഇവിടെ നാലും അഞ്ചും കെട്ടിയവർക്ക് പെണ്ണ് കിട്ടുന്നു. ന്റെ പൊന്നാര ഹരി, നിന്റെ ഈ ആറ്റിട്യൂട് മാറ്റാതെ നിനക്ക് ഈ ജന്മത്തിൽ പെണ്ണ് കിട്ടില്ല. പെണ്ണിന്റെ വീട്ടുകാർ ആദ്യ ഭാര്യയെ കുറിച്ച് ചോദിക്കുമ്പോൾ ഉള്ളതും ഇല്ലാത്തതുമായ കഥകൾ അങ്ങട് തട്ടി വിട്. നീ ഇനിയിപ്പോ എന്ത് ചെയ്താലും അവൾ നിന്നോട് ചെയ്ത അത്രേം വരില്ല"

ഹരി മഹേഷേട്ടനെ നോക്കി ഒന്ന് പുഞ്ചിരിച്ചു 

"അങ്ങനെ അവളെ കുറ്റം പറഞ്ഞോണ്ട് കിട്ടുന്ന ഒരു ജീവിതം എനിക്ക് വേണ്ട മഹേഷേട്ടാ"

പോത്തിന്റെ കാതിൽ വേദമോതിയിട്ട് കാര്യമില്ല എന്നും പറഞ്ഞ് മഹേഷേട്ടൻ ദേഷ്യത്തോടെ അവിടെ നിന്നും ഇറങ്ങിപ്പോയി.

ദിവസങ്ങളും മാസങ്ങളും കടന്നുപോയി. അങ്ങനെയിരിക്കെയാണ് ഹരിക്ക് ഒരു കല്യാണ ആലോചന വരുന്നത്. മഹേഷേട്ടനാണ് കാര്യം ഉണ്ടാക്കിയത്. പെണ്ണിന്റേത് രണ്ടാം കെട്ടൊന്നും ആയിരുന്നില്ല. ഹരിയുടേത് രണ്ടാം വിവാഹം ആയതുകൊണ്ട് തന്നെ അവർ നോക്കിയിരുന്നതും കെട്ട് കഴിഞ്ഞ പെണ്ണിനെ ആയിരുന്നു. പക്ഷേ എന്തോ ഒരു നിമിത്തം പോലെ നല്ലൊരു കാര്യം ഹരിക്ക് കിട്ടി. ഹരിയും അമ്മയും പോയി പെണ്ണിനെ കണ്ടു.

രണ്ടുപേർക്കും പെണ്ണിനെ നന്നായി ബോധിച്ചു. തിരിച്ച് പെണ്ണിനും വീട്ടുകാർക്കും ഹരിയേയും ഇഷ്ടായി. രണ്ടുവീട്ടുകാരും പരസ്പരം വീടൊക്കെ പോയി കണ്ടു. ഒടുവിൽ ആ കല്യാണം അങ്ങട് ഉറപ്പിച്ചു. ഹരിയുടെ ആദ്യ ഭാര്യയുടെ അമ്മയുടെ സ്വന്തം ആങ്ങളയുടെ മകളായിരുന്നു പെണ്ണ്. 

ഭാഗം 2👇👇👇

രണ്ടുപേർക്കും പെണ്ണിനെ നന്നായി ബോധിച്ചു. തിരിച്ച് പെണ്ണിനും വീട്ടുകാർക്കും ഹരിയേയും ഇഷ്ടായി. രണ്ടുവീട്ടുകാരും പരസ്പരം വീടൊക്കെ പോയി കണ്ടു. ഒടുവിൽ ആ കല്യാണം അങ്ങട് ഉറപ്പിച്ചു. ഹരിയുടെ ആദ്യ ഭാര്യയുടെ അമ്മയുടെ സ്വന്തം ആങ്ങളയുടെ മകളായിരുന്നു പെണ്ണ്. 

മീനാക്ഷി എന്നായിരുന്നു പെണ്ണിന്റെ പേര്. സുന്ദരിയായിരുന്നു അവൾ. മീനാക്ഷിയുടെ വീട്ടുകാർ ഹരിയാണ് ചെറുക്കൻ എന്നറിഞ്ഞപ്പോൾ കൂടുതൽ ഒന്നും അന്വേഷിക്കാൻ നിന്നില്ല. കാരണം, അവർക്കറിയാമായിരുന്നു ഹരി തന്റെ ആദ്യഭാര്യ രേഷ്മയെ എത്രമാത്രം സ്നേഹിച്ചിരുന്നു എന്ന്. വിരുന്നിനൊക്കെ വന്നപ്പോൾ ഹരിയുടെ എളിമയും രേഷ്മയോടുള്ള പെരുമാറ്റവും എല്ലാം അവർ നേരിൽ കണ്ടതാണ്. അതുകൊണ്ട് തന്നെ മഹേഷ്‌ ഇങ്ങനൊരു കാര്യത്തെ കുറിച്ച് പറഞ്ഞപ്പോൾ മീനാക്ഷിയുടെ അച്ഛനും അമ്മക്കും പൂർണസമ്മതമായിരുന്നു. ഈ വിവാഹം നടന്നാൽ തന്റെ പെങ്ങളുടെ കുട്ടി ഹരിയോട് ചെയ്ത തെറ്റിന് ഒരു പ്രായശ്ചിത്തവും ആവും എന്ന് അവർ കരുതി.

അങ്ങനെ രണ്ട് വീട്ടിലും കല്യാണത്തിന്റെ ഒരുക്കങ്ങൾ ആരംഭിച്ചു. ഇതിനിടയിൽ ഹരിക്ക് ഒരു ആഗ്രഹം തോന്നി, ആ ആഗ്രഹം അപ്പോൾ തന്നെ അവൻ അമ്മയോട് പറയുകയും ചെയ്തു 

"അമ്മേ, അതുപിന്നെ..."

അമ്മ അവനെയൊന്ന് നോക്കി 

"ന്താടാ മുഖത്തൊരു നാണമൊക്കെ"

അവൻ അമ്മയുടെ സാരി തുമ്പിൽ പിടിച്ചു 

"അതുപിന്നെ... ഈ... കല്യാണത്തിന് മുന്നേ കെട്ടാൻ പോവുന്ന പെണ്ണിനോട് സംസാരിച്ച് ഒന്ന് നന്നായി കൂട്ടാവുന്നത് നല്ലതാ"

അമ്മ അവനെ അടിമുടിയൊന്നു നോക്കി 

"ആ... അതിന്"

ഹരിയുടെ മുഖത്തൂടെ നാണത്തിന്റെ പല വേർഷനും മിന്നിമറഞ്ഞു 

"അതല്ല... മീനാക്ഷിയുടെ ഫോൺ നമ്പർ കിട്ടിയിരുന്നെങ്കിൽ... അവളോട്‌ സംസാരിച്ച് നല്ല കൂട്ട് ആവാമായിരുന്നു"

പെട്ടന്ന് അമ്മ സാരിത്തുമ്പിൽ പിടിച്ച് നിന്നിരുന്ന അവന്റെ കയ്യിൽ ഒരു അടികൊടുത്തു. എന്നിട്ട് അവനെ നോക്കി കണ്ണുരുട്ടി 

"നിനക്ക് അവളുടെ മൊബൈൽ നമ്പർ വേണം അല്ലേ...? നിനക്ക് അവളോട്‌ സംസാരിച്ച് നല്ല കൂട്ട് ആവണം ല്ലേ...?"

ഒന്ന് നിറുത്തിയിട്ട് അമ്മ ഉണ്ടക്കണ്ണുരുട്ടി ഹരിയെ നോക്കി 

"എന്നിട്ട് വേണം നീ രേഷ്മയെ കുറിച്ച് വർണിച്ച് ഈ നിശ്ചയിച്ച് ഉറപ്പിച്ച കല്യാണം കൂടി മുടക്കാൻ. ദൈവത്തെ ഓർത്ത് നീ മീനാക്ഷിയോട് കല്യാണത്തിന് മുന്നേ ഒന്ന് മിണ്ടുക പോലും ചെയ്യരുത്. ഇനി ഈ കാര്യവും പറഞ്ഞ് എന്റെ മുന്നിൽ വന്നാൽ നിന്റെ മുട്ടുകാൽ ഞാൻ തല്ലിയൊടിക്കും"

ഇതും പറഞ്ഞ് അമ്മ അടുക്കളയിലേക്ക് നടന്നു. ഇതെല്ലാം കേട്ടോണ്ടിരുന്ന അനിയത്തി അമ്മു അവനെ നോക്കി പല്ലിളിച്ചു ചിരിച്ചു. അവൻ അമ്മുവിനെ കണ്ണുരുട്ടി നോക്കിയിട്ട് മുറിയിൽ കയറി വാതിലടച്ചു. പിറ്റേദിവസം ജോലിക്ക് പോവാൻ നേരം അച്ഛനും അവന്റെ ബുള്ളറ്റിന്റെ പിറകിൽ കയറി

"ടാ എന്നെയൊന്ന് കടയിൽ ഇറക്കീട്ട് നീ പൊക്കോ, എന്റെ ബൈക്ക് സർവീസിന് കൊടുത്തിരിക്കുകയാ"

അവൻ അച്ഛനെ നോക്കി ശരി എന്ന അർഥത്തിൽ തലയാട്ടി ബുള്ളറ്റ് മുന്നോട്ട് എടുത്തു. പഞ്ചായത്ത് റോഡിലൂടെ അവർ പോയികൊണ്ടിരിക്കുമ്പോൾ പാടത്തിന് അടുത്തെത്തിയപ്പോൾ അച്ഛൻ അവനോട് വണ്ടി നിർത്താൻ ആവശ്യപ്പെട്ടു. അച്ഛൻ ബുള്ളറ്റിൽ നിന്നും ഇറങ്ങി, അവൻ അച്ഛനെ നോക്കി 

"അതെന്താ അച്ഛാ ഇവിടെ നിർത്താൻ പറഞ്ഞേ, അച്ഛന് കടയിലേക്കല്ലേ പോവേണ്ടെ"

അച്ഛൻ അവനെ നോക്കി 

"നീ ആ വണ്ടിയൊന്ന് ഒതുക്കി നിറുത്തിയിട്ട് വാ, എനിക്ക് നിന്നോട് കുറച്ച് സംസാരിക്കാൻ ഉണ്ട്‌. വീട്ടിലോ കടയിലോ വെച്ച് സംസാരിച്ചാൽ ശരിയാവില്ല. അതോണ്ടാ ഇവിടെ നിർത്താൻ പറഞ്ഞേ"

ഹരി ബുള്ളറ്റ് ഒരു തെങ്ങിന്റെ ചുവട്ടിൽ സൈഡ് ആക്കി അച്ഛന്റെ പിറകെ നടന്നു. അച്ഛൻ പാടത്തിന് അരികിലുള്ള പഞ്ചായത്ത് കിണറിൽ പോയിരുന്നു. എന്നിട്ട് അവനെ നോക്കി അടുത്തേക്ക് വരാൻ കൈകൊണ്ട് ആഗ്യം കാണിച്ചു. അവൻ അച്ഛന്റെ അടുത്തുപോയി നിന്നു. അച്ഛനിത് എന്തുപറ്റി, തന്നോടൊന്ന് സംസാരിക്കാൻ ഇതുവരെ ഇല്ലാത്ത മുഖവുരയും മറ്റുമൊക്കെ എന്തിനാ എന്ന് അവൻ മനസ്സിൽ ആലോചിച്ചു. അച്ഛൻ അവനെ നോക്കി 

"ടാ ഹരി, ഞാൻ പലപ്പോഴും നിന്നോട് ചോദിക്കണം എന്ന് കരുതിയതാണ്. പക്ഷേ അന്നൊന്നും എന്റെ മനസ്സ് സമ്മതിച്ചില്ല"

ഒന്ന് നിറുത്തിയിട്ട് അച്ഛൻ തുടർന്നു 

"ഇനി കുറച്ച് ദിവസം കൂടെ കഴിഞ്ഞാൽ നിന്റെ വിവാഹമാണ്. ഇപ്പോ ചോദിച്ചില്ലെങ്കിൽ ഒരുപക്ഷേ ഇനി നിന്റെ ഭാര്യയായി വരുന്നവളും നിന്നെ ഇട്ടേച്ച് പോവുന്നത് ഞങ്ങൾ കാണേണ്ടി വരും"

ഹരി അച്ഛനെ നോക്കി 

"അച്ഛൻ എന്തൊക്കെയാ ഈ പറയുന്നേ...? എന്തായാലും അച്ഛൻ കാര്യം പറ, ഇങ്ങനെ സസ്പെൻസ് ഇട്ട് കളിക്കാതെ"

അച്ഛൻ ഒന്ന് നെടുവീർപ്പിട്ടു 

"ശരിക്കും നിന്റെ വല്ല പോരായ്മകളും കൊണ്ടാണോ രേഷ്മ നിന്നെ ഇട്ടിട്ട് പോയത്...? ഒരു അച്ഛൻ മകനോട് ഇങ്ങനെയൊക്കെ ചോദിക്കാൻ പാടുണ്ടോ എന്ന് അറിയില്ല. പക്ഷേ, കല്യാണത്തിന്റെ തിയ്യതി അടുക്കും തോറും എന്തോ വല്ലാത്ത ഒരു ഭയം"

ഒന്ന് നിറുത്തിയിട്ട് അച്ഛൻ ഹരിയുടെ കണ്ണിലേക്ക് നോക്കി 

"ഇനി നിന്റെ ഭാര്യയായി വരാൻ പോവുന്നവളും രേഷ്മയുടെ കുടുംബത്തിൽ നിന്നാണ്. അവളും കൂടെ നിന്നെ ഇട്ടേച്ച് പോയാൽ പിന്നെ ഈ നാട്ടിൽ തല ഉയർത്തി നടക്കാൻ പറ്റില്ല"

ഹരി അച്ഛനെ നോക്കി ഒന്ന് പുഞ്ചിരിച്ചു 

"ഓഹ്, അപ്പോ നാട്ടുകാർക്ക് മാത്രമല്ല, സ്വന്തം അച്ഛനും മകനെ സംശയം ആണല്ലേ"

"അതല്ല മോനേ, ഇന്നേവരെ നീയും അവളും വഴക്ക് കൂടുന്നതോ, തെറ്റി നടക്കുന്നതോ ഞങ്ങളാരും കണ്ടിട്ടില്ല. അവൾക്ക് നിന്നെയും നിനക്ക് അവളേയും ജീവനായിരുന്നു. നിങ്ങൾ ഒരുമിച്ചു ജീവിച്ച രണ്ട് മാസക്കാലം കണ്ടപ്പോൾ ഞങ്ങൾക്ക് അങ്ങനെയാണ് തോന്നിയത്. നീ ഇത്രയൊക്കെ സ്നേഹിച്ചിട്ടും അവൾ നിന്നെ വേണ്ടെന്ന് പറഞ്ഞ് മറ്റൊരുത്തന്റെ കൂടെ പോയിട്ടുണ്ടങ്കിൽ അത് അവളുടെ മാത്രം തെറ്റാണ്. പക്ഷേ അവള് പോയതിന് ശേഷം അവളെ കുറിച്ച് മോശമായി ഒരു വാക്ക് പോലും പറയാതെ, എല്ലാവരോടും അവളെ കുറിച്ച് നല്ലതുമാത്രം പറഞ്ഞ് നടക്കുന്ന നിന്റെ ഈ ഒരു സ്വഭാവം കാണുമ്പോഴാണ് ഞങ്ങൾക്ക് പല സംശയങ്ങളും തോന്നുന്നത്"

ഒന്ന് നിറുത്തിയിട്ട് അച്ഛൻ തുടർന്നു 

"ലോകത്ത് ഒരു ഭർത്താവും പൊറുക്കാത്ത തെറ്റാണ് രേഷ്മ നിന്നോട് ചെയ്തത്, എന്നിട്ടും നീ അവളെ ഒരു വാക്കുകൊണ്ട് പോലും നോവിക്കുന്നില്ല. അപ്പോ നിന്റെ കണ്ണിൽ അവൾ ചെയ്താണ് ശരി എന്നല്ലേ അർഥം...? അപ്പോ ഞങ്ങൾ നിന്റെ കുറവുകൊണ്ടാണ് അവൾ പോയത് എന്ന് പറയുന്നതിൽ എന്താണ് തെറ്റ്"

ഹരി കുറച്ച് സമയം ഒന്നും മിണ്ടിയില്ല. കുറച്ച് സമയത്തിന് ശേഷം അവൻ അച്ഛനെ നോക്കി പുഞ്ചിരിച്ചു 

"അവളെക്കുറിച്ച് ഇനി എനിക്കൊന്നും പറയാനില്ല അച്ഛാ, അവൾ അവൾക്കിഷ്ടപ്പെട്ട ആളുടെ കൂടെ സന്തോഷത്തോടെ ജീവിക്കട്ടെ"

ഒന്ന് നിറുത്തിയിട്ട് അവൻ അച്ഛന്റെ കയ്യിൽ പതുക്കെ പിടിച്ചു 

"എന്റെ അച്ഛനാണേ സത്യം, എന്റെ കുറ്റമോ കുറവുകളോ കൊണ്ടല്ല രേഷ്മ എന്നെ ഇട്ടേച്ച് പോയത്"

ഇത്രയും പറഞ്ഞ് ഹരി തന്റെ ബുള്ളറ്റിനെ ലക്ഷ്യമാക്കി നടന്നു, പിറകെ അച്ഛനും. ബുള്ളറ്റിൽ കയറി അവൻ അച്ഛനുവേണ്ടി കാത്തിരുന്നു. അച്ഛൻ വന്ന് പിറകിലിരുന്ന് രണ്ട് കൈകൾകൊണ്ടും അവന്റെ തോളിൽ മെല്ലെ അമർത്തി 

"ഈ അച്ഛനോട് ക്ഷമിക്കേടാ മോനേ, മനസ്സിൽ വല്ലാതെ വിഷമം വന്നോണ്ടാ ഞാൻ ഇങ്ങനൊക്കെ... "

ഹരി അച്ഛനെ നോക്കി പുഞ്ചിരിച്ചു. ബുള്ളറ്റ് വേഗത്തിൽ പായിച്ചു. 

ദിവങ്ങൾക്ക് ശേഷം ഹരിയുടെ രണ്ടാം വിവാഹത്തിന്റെ നാൾ വന്നെത്തി. പാട്ടും ഡാൻസുമൊക്കെയായി ആഘോഷത്തോടെ വിവാഹം നടന്നു. പന്തലുകാർക്കും, പാചകക്കാർക്കും കൊടുക്കാനുള്ള ബാക്കി തുകയൊക്കെ സെറ്റിൽ ചെയ്ത് ഹരി മണിയറയിലേക്ക് കയറി. കുറച്ച് സമയം കഴിഞ്ഞ് കുളിച്ചൊരുങ്ങി തലയിൽ മുല്ലപ്പൂവും ചൂടി സുന്ദരിയായി മീനാക്ഷി മുറിയിലേക്ക് കടന്നുവന്നു. ഹരി അവളോട് തന്റെ അടുത്ത് വന്നിരിക്കാൻ ആവശ്യപ്പെട്ടു. നാണത്തോടെ അവൾ അടുത്തിരുന്നു

"മീനാക്ഷി, ഞാൻ മീനു എന്ന് വിളിക്കട്ടെ"

അവൾ തലയാട്ടി സമ്മതം അറിയിച്ചു. 

"പിന്നേ, മീനൂന് അറിയാലോ എന്റെ ആദ്യ വിവാഹത്തെ കുടിച്ച്... "

ഹരി പറയാൻ തുടങ്ങിയതും അവൾ തടഞ്ഞു

"അതൊക്കെ എനിക്കറിയുന്ന കാര്യങ്ങൾ അല്ലേ, അതൊക്കെ ഇനീം പറഞ്ഞ് വെറുതെ... "

അവൾ ഹരിയുടെ കണ്ണിലേക്ക് നോക്കി

"എനിക്ക് ഹരിയേട്ടനും ഹരിയേട്ടന് ഞാനും മാത്രം മതി. രേഷ്മ ചേച്ചിയെ കുറിച്ച് ഇനി നമുക്കിടയിൽ ചർച്ച വേണ്ടാ"

ഹരി അവളെ നോക്കി പുഞ്ചിരിച്ചു, അവൻ അവളെ തന്നിലേക്ക് മെല്ലെ അടുപ്പിച്ചു. പെട്ടന്ന് അവൾ ഹരിയുടെ മുഖത്ത് ആഞ്ഞടിച്ചുകൊണ്ട് അവനെ നോക്കി കണ്ണുരുട്ടി 

"ദേ പിന്നേ, മേത്ത് തൊട്ടുള്ള കളിയൊന്നും വേണ്ടാ. സംസാരം മാത്രം മതി"

കണ്ണിലൂടെ പൊന്നീച്ച പാറിയ ഹരി ഒന്നും മനസ്സിലാവാതെ അവളെ നോക്കി

"മീനു, നീ എന്തിനാ എന്നെ തല്ലിയെ"

പെട്ടന്ന് അവളുടെ മുഖത്ത് സങ്കടം നിഴലിച്ചു 

"അച്ചോടാ ന്റെ ഹരിയേട്ടന് വേദനിച്ചോ, ന്നാ കിടക്ക് ഞാൻ മുഖത്ത് ഓപ്പറേഷൻ ചെയ്തു ശരിയാക്കി തരാം"

അവൾ ഹരിയെ ബലമായി പിടിച്ചു കിടത്തി. ഒന്നും മനസ്സിലാവാതെ ഹരി അവളെ നോക്കി. അവൾ തന്റെ സാരിയിൽ നിന്നും സേഫ്റ്റി പിൻ ഊരിയിട്ട് അവന്റെ കയ്യിൽ പതുക്കെ കുത്തി. വേദന കൊണ്ട് കൈ മാറ്റാൻ ശ്രമിച്ച അവനെ നോക്കി അവൾ ആശ്വസിപ്പിച്ചു 

"ഒരു ഇഞ്ചക്ഷൻ എടുത്തതാ, ഇനി മുഖത്തെ വേദനക്ക് കുറവുണ്ടാവും ട്ടോ. കുറച്ച് കഴിഞ്ഞിട്ട് നമുക്ക് ഓപ്പറേഷൻ ചെയ്യാട്ടോ. ഓപ്പറേഷൻ ചെയ്ത് കഴിഞ്ഞിട്ട് വേണം നമുക്ക് കള്ളനും പോലീസും കളിക്കാൻ"

കട്ടിലിൽ നിന്നും മെല്ലെ എഴുന്നേറ്റ് ദയനീയമായി ഹരി മീനാക്ഷിയെനോക്കി 

"വട്ടാണല്ലേ"

ഭാഗം 3👇👇👇

"ഒരു ഇഞ്ചക്ഷൻ എടുത്തതാ, ഇനി മുഖത്തെ വേദനക്ക് കുറവുണ്ടാവും ട്ടോ. കുറച്ച് കഴിഞ്ഞിട്ട് നമുക്ക് ഓപ്പറേഷൻ ചെയ്യാട്ടോ. ഓപ്പറേഷൻ ചെയ്ത് കഴിഞ്ഞിട്ട് വേണം നമുക്ക് കള്ളനും പോലീസും കളിക്കാൻ"

കട്ടിലിൽ നിന്നും മെല്ലെ എഴുന്നേറ്റ് ദയനീയമായി ഹരി മീനാക്ഷിയെനോക്കി 

"വട്ടാണല്ലേ"

അവൾ ഹരിയെ നോക്കി കണ്ണുരുട്ടി

"എന്റെ ശരീരത്തിൽ തൊട്ടൊണ്ടല്ലേ ഞാൻ ഹരിയേട്ടനെ തല്ലിയത്"

അവൾ ഹരിയുടെ കവിളിൽ മെല്ലെ തലോടി 

"ന്റെ ഹരിയേട്ടന് വേദനിച്ചോ, സാരല്ല ട്ടോ"

ഹരി അവളുടെ കണ്ണിലേക്ക് നോക്കി

"മീനാക്ഷി ഉറങ്ങിക്കോ"

അവൾ തലയാട്ടി ഉറങ്ങാൻ കിടന്നു. പക്ഷേ അന്ന് രാത്രി ഹരിക്ക് ഉറങ്ങാൻ സാധിച്ചില്ല. അവന്റെ മനസ്സ് മുഴുവൻ മീനാക്ഷിയെ കുറിച്ചായിരുന്നു. താൻ വീണ്ടും കുടുംബക്കാരുടെയും നാട്ടുകാരുടേയും മുന്നിൽ പരിഹാസ കഥാപാത്രം ആവുമോ എന്നോർത്ത് അവൻ തലപുകച്ചു. ന്നാലും മഹേഷേട്ടൻ അറിഞ്ഞോണ്ട് തന്നെ ഇങ്ങനെ പെടുത്തുമോ...? മീനാക്ഷിയെ കുറിച്ച് അച്ഛനും അമ്മയും അറിഞ്ഞാൽ അവർക്കത് താങ്ങാൻ പറ്റില്ല എന്ന് അവനറിയാം. അതുകൊണ്ട് തന്നെ വീട്ടിൽ ഒന്നും അറിയിക്കേണ്ട എന്നവൻ തീരുമാനിച്ചു. 

ഓരോന്ന് ആലോചിച്ച് കിടന്നപ്പോൾ നേരം പുലർച്ചെ ആയിരുന്നു. പതിനൊന്ന് മണിക്ക് മീനാക്ഷി വന്ന് വിളിച്ചപ്പോഴാണ് ഹരി എഴുന്നേൽക്കുന്നത് 

"ഹരിയേട്ടാ, ന്ത് ഉറക്കാ ഇത്. എണീറ്റെ, ന്നിട്ട് പോയി പല്ലൊക്കെ തേച്ച് കുളിച്ച് സുന്ദരകുട്ടപ്പനായി വന്ന് ചായ കുടിച്ചേ"

ശബ്ദം കേട്ട് കണ്ണ് തുറന്ന് നോക്കിയപ്പോൾ തന്റെ മുന്നിൽ കുളിച്ചു മാറ്റി കുറിയൊക്കെ തൊട്ട് മഹാലക്ഷ്മിയെപ്പോലെ നിൽക്കുന്ന മീനാക്ഷിയെയാണ് അവൻ കണ്ടത്. അവൻ കണ്ണുകൾ തിരുമ്മി ഒന്നൂടെ നോക്കി, ഇന്നലെ രാത്രി തന്റെ ഉറക്കം കളഞ്ഞ മീനാക്ഷി തന്നെയാണോ തന്റെ മുന്നിൽ നിൽക്കുന്നത് എന്ന് അവൻ ചിന്തിച്ചു. അവൾ അവനെ നോക്കി പുഞ്ചിരിച്ചു 

"മതി ഇങ്ങനെ നോക്കീത്, എണീറ്റെ, ന്നിട്ട് പോയി ഫ്രഷ് ആയിട്ട് വന്നേ"

ആഹാ, അപ്പോൾ ഇന്നലെ അവൾ വട്ടത്തിയെ പോലെ അഭിനയിച്ചതായിരുന്നു അല്ലേ എന്നും മനസ്സിൽ കരുതി അവൻ ചാടി എഴുന്നേറ്റ് കുളിമുറിയിലേക്ക് ഓടി. കുറച്ചു സമയത്തിന് ശേഷം കുളിച്ചുമാറ്റി ഭക്ഷണം കഴിക്കാൻ റെഡി ആയി ടേബിളിൽ പോയിരുന്നു. അമ്മ അവന്റെ അടുത്തേക്ക് വന്നു 

"മോനേ, അവൾ ഉണ്ടാക്കിയ പാലപ്പവും എഗ്ഗ് റോസ്റ്റും ആണ് ഇന്നത്തെ സ്പെഷ്യൽ"

ഹരി അമ്മയെ നോക്കി 

"ആഹാ, ന്നാ പോരട്ടെ. നോക്കാലോ ഭാര്യയുടെ കൈപ്പുണ്യം എങ്ങനെ ഉണ്ടെന്ന്"

അമ്മയുടെ മുഖത്ത് വല്ലാത്ത ഒരു സന്തോഷം കണ്ടു അവൻ

"എന്താ അമ്മയുടെ മുഖം ഇത്രേം പ്രസാദിച്ചു നിക്കുന്നെ, അമ്മയുടെ മുഖത്ത് ഇത്രേം തെളിച്ചം കാണുന്നത് കുറേ കാലത്തിന് ശേഷമാണ്"

അമ്മ അവനെ നോക്കി പുഞ്ചിരിച്ചു 

"നല്ല കുട്ടിയാടാ മീനാക്ഷി, എല്ലാ ജോലികളും അറിയാം അവൾക്ക്. ഇന്നലെ വന്ന പെണ്ണിനെ പോലെയല്ല അവൾ പെരുമാറുന്നത്, ജോലി ചെയ്യാനൊന്നും ഒരു മടിയും ഇല്ല. കുറേ വർഷമായി നമ്മുടെ വീട്ടിലുള്ള പോലെയാ അവളുടെ പെരുമാറ്റമൊക്കെ"

ഒന്ന് നിറുത്തിയിട്ട് അമ്മ ഹരിയെ നോക്കി 

"ന്റെ മോന്റെ ഭാഗ്യാണ് മീനാക്ഷിയെപ്പോലെ ഒരു പെണ്ണിനെ കിട്ടിയതിൽ. ഇവളെ കിട്ടാനായിരിക്കാം നീ ഇത്രയും കഷ്ടപ്പെട്ടത്"

അമ്മയുടെ ഓരോ വാക്കുകളും ഹരിക്ക് ഒരുപാട് സന്തോഷം നൽകി. പാലപ്പവും എഗ്ഗ് റോസ്റ്റും കഴിച്ച് അവൻ മീനാക്ഷിയുടെ അടുത്ത് ചെന്നു 

"മീനൂ, ബ്രേക്ഫാസ്റ്റ് പൊളിച്ചു ട്ടോ"

മീനു അവനെ നോക്കി പുഞ്ചിരിച്ചു. സത്യം പറഞ്ഞാൽ വല്ലാത്ത ഒരു സന്തോഷമായിരുന്നു ഹരിക്ക് അപ്പോൾ തോന്നിയത്. ഇന്ന്‌ രാത്രി എന്തായാലും അവളുടെ അഭിനയം ഒന്നും തന്റെ അടുത്ത് ചിലവാവില്ല എന്ന് മനസ്സിൽ ഉറപ്പിച്ച് രാത്രി ആവാൻ വേണ്ടി അവൻ കാത്തിരുന്നു. അങ്ങനെ കാത്തിരുന്ന് കാത്തിരുന്ന് നേരം രാത്രിയായി. റൂമിൽ മീനാക്ഷിയേയും കാത്ത് അവൻ അക്ഷമനായി ഇരുന്നു. അവൾ അനിയത്തിയോടും അമ്മയോടും കുശലം പറഞ്ഞോണ്ടിരിക്കുകയായിരുന്നു. 

കുറച്ച് സമയത്തിന് ശേഷം അവൾ മുറിയിലേക്ക് വന്നു. അവളെ കണ്ടതും നിന്റെ അഭിനയമൊക്കെ ഞാൻ ഇപ്പോ ശരിയാക്കി തരാടീ എന്നും മനസ്സിൽ വിചാരിച്ച് കട്ടിലിൽ നിന്നും ചാടി എഴുന്നേറ്റ് അവൻ അവളെ പൊക്കിയെടുത്ത് കട്ടിലിൽ കിടത്താൻ ശ്രമിച്ചതും അവൾ കാൽ മടക്കി അവന്റെ മർമ്മത്ത് തൊഴിച്ചതും ഒരുമിച്ചായിരുന്നു. വേദനകൊണ്ട് പിടഞ്ഞ് കണ്ണൊക്കെ തള്ളി അവൻ മീനാക്ഷിയെ നോക്കി. അവളുടെ മുഖം ചുവന്ന് തുടിച്ചു

"ഞാൻ പറഞ്ഞിട്ടില്ലേ എന്റെ ശരീരത്തിൽ തൊടരുത് എന്ന്"

അപ്പോ അവൾ അഭിനയിച്ചതല്ലേ എന്ന ഭാവത്തിൽ ഹരി അവളെ നോക്കി. അവൾ ദേഷ്യത്തിൽ അലമാര തുറന്ന് കത്രിക കയ്യിൽ പിടിച്ചു, എന്നിട്ട് ഒരു പുതപ്പും തലയണയും നിലത്തേക്ക് ഇട്ട് കൊടുത്തിട്ട് തന്റെ കയ്യിലുള്ള കത്രിക അവന്റെ കണ്ണിന് നേരെ ചൂണ്ടിയിട്ട് അവനെ തുറിച്ചു നോക്കി 

"ഇനിയെങ്ങാനും എന്റെ ശരീരത്തിൽ തൊട്ടാൽ കണ്ണ് ഞാൻ കുത്തിപ്പൊട്ടിക്കും"

ഇവൾക്ക് ശരിക്കും വട്ടാണ് എന്ന് മനസ്സിൽ കരുതി വേഗം പുതപ്പ് വിരിച്ച് അവൻ അതിൽ കിടന്നുറങ്ങി. പിറ്റേദിവസം കുളിച്ച് കുറിയൊക്കെ തൊട്ട് മഹാലഷ്മിയെപ്പോലെ അവൾ അവനെ തട്ടിയുണർത്തി, കണ്ണ് തുറന്ന് നോക്കിയപ്പോൾ നേരെ മുന്നിൽ മീനാക്ഷി 

"അയ്യോ എന്നെ ഒന്നും ചെയ്യല്ലേ"

എന്ന് അലറിക്കൊണ്ട് അവൻ ചാടി എഴുന്നേറ്റു. ശബ്ദം കേട്ട് അമ്മയും അനിയത്തിയും റൂമിലേക്ക് ഓടിവന്നു. അമ്മ അവനെ നോക്കി 

"നീ എന്താടാ കിടന്ന് നിലവിളിക്കുന്നെ"

അവൻ അമ്മയെ നോക്കി ഒരു വളിഞ്ഞ ചിരി ചിരിച്ചു 

"അതുപിന്നെ... ഒരു സ്വപ്നം കണ്ടോണ്ട് കിടക്കുമ്പോഴാ മീനു എന്നെ വിളിച്ചുണർത്തിയെ... പെട്ടന്ന് എണീറ്റപ്പോൾ... ഞാൻ"

"ഓരോ ദുസ്വപ്നവും കണ്ട് പോത്തുപോലെ കിടന്നോളും, മനുഷ്യനെ പേടിപ്പിക്കാൻ"

പിറുപിറുത്ത് കൊണ്ട് അമ്മ അടുക്കളയിലേക്ക് പോയി. മീനാക്ഷി അവന് കുളിക്കാനുള്ള തോർത്തും മറ്റും എടുത്ത് കൊടുത്തു. കുറച്ച് സമയത്തിന് ശേഷം കുളിയൊക്കെ കഴിഞ്ഞ് അവൻ വന്നപ്പോൾ കോലായിൽ ആരുടെയോ ശബ്ദം കേൾക്കുന്നു. പോയി നോക്കിയപ്പോൾ ഗൾഫിൽ നിന്നും വന്ന അമ്മാവനാണ്. അച്ഛൻ കടയിലേക്ക് പോയിരുന്നു. അനിയത്തി സ്കൂളിലും. വീട്ടിൽ അമ്മയും മീനുവും ഹരിയും മാത്രമേ ഒള്ളൂ. 

ഹരി ഒരു ഷർട്ട്‌ എടുത്തിട്ട് അമ്മാവന്റെ അടുത്തേക്ക് പോയി. അവനെ കണ്ടതും അമ്മാവൻ ചേർത്തുപിടിച്ചു 

"ക്ഷമിക്കടാ മരുമകനെ, കല്യാണത്തിന് വരാൻ പറ്റിയില്ല. ലീവ് കിട്ടിയതായിരുന്നു, പക്ഷേ ആ സമയം വേറെ ഒന്ന് രണ്ട് കാര്യങ്ങൾ ചെയ്യാൻ ഉള്ളതോണ്ട് വരാൻ പറ്റിയില്ല"

ഹരി അമ്മാവനെ നോക്കി 

"അതൊന്നും സാരല്ല അമ്മാവാ, എന്തായാലും ഇപ്പോഴെങ്കിലും എത്തിയല്ലോ"

അമ്മാവൻ ഗൾഫിൽ നിന്നും കൊണ്ടുവന്ന പൊതി അമ്മയുടെ കയ്യിൽ കൊടുത്തു

"അല്ല പെങ്ങളേ, എവിടെ നമ്മുടെ മണവാട്ടി"

"ചേട്ടാ, അവൾ ഇവിടുണ്ടായിരുന്നല്ലോ"

അമ്മ അവളെ ഉച്ചത്തിൽ വിളിച്ചു. പുറത്ത് നിന്നും വിളിക്കേട്ട് അവൾ വീട്ടിലേക്ക് കയറി വന്നു. അമ്മ അവളെ നോക്കി 

"മോളെ അമ്മാവൻ നിന്നെ തിരക്കുന്നു. നിങ്ങൾ സംസാരിക്ക് ഞാൻ ചായ ഉണ്ടാക്കി വരാം"

അവൾ തലയാട്ടി സമ്മതിച്ചു. അവൾ അമ്മാവന്റെ അടുത്തേക്ക് ചെന്നു. അമ്മാവന്റെ തൊട്ടടുത്ത് ഹരി നിക്കുന്നുണ്ട്. അവളെ കണ്ടതും 

"ആഹാ, ഇതാണോ എന്റെ മരുമകന്റെ മണവാട്ടി"

എന്നും പറഞ്ഞ് അമ്മാവൻ അവളുടെ കയ്യിൽ പിടിച്ചു. പെട്ടന്ന് അവൾ കൈ തട്ടിമാറ്റി അമ്മാവനെ പിടിച്ചു തള്ളി 

"ശരീരത്തിൽ തൊട്ടാൽ കൊന്ന് കളയും ഞാൻ"

അവളുടെ പെരുമാറ്റം കണ്ട അമ്മാവൻ ആകെ തരിച്ച് നിന്നുപോയി. പെട്ടെന്നുള്ള ദേഷ്യത്തിൽ ഹരി മീനാക്ഷിയുടെ മുഖത്ത് ആഞ്ഞടിച്ചു. കരഞ്ഞുകൊണ്ട് അവൾ മുറിയിലേക്ക് ഓടി. ശബ്ദം കേട്ട് വന്ന അമ്മ കാര്യം തിരക്കി. അമ്മാവനോട് മീനു ചെയ്ത കാര്യം ഹരി അമ്മയോട് പറഞ്ഞു. അമ്മ ഹരിയെ ദേഷ്യത്തിൽ നോക്കി 

"അതിനാണോ നീ അവളെ തല്ലിയെ, ഇതുവരെ കണ്ടിട്ട് പോലും ഇല്ലാത്ത ഒരാൾ കയ്യിൽ പിടിച്ചപ്പോൾ അവൾ അങ്ങനെ പെരുമാറിയതിൽ എന്താണ് തെറ്റ്...? ഹരി, ഇത് പഴയ കാലമൊന്നും അല്ല"

ഒന്ന് നിറുത്തിയിട്ട് അമ്മ അവനെ നോക്കി 

"ആ പിന്നേ, കെട്ടിയ പെണ്ണിനെ തല്ലുന്നത് അത്ര വലിയ കാര്യം ഒന്നുമല്ല. പോയി ക്ഷമ ചോദിക്കടാ അവളോട്‌"

അമ്മാവനും അമ്മയെ പിന്തുണച്ചു. ഹരി മുറിയിലേക്ക് നടന്നു. മീനാക്ഷി കട്ടിലിൽ ഇരുന്ന് കരയുകയായിരുന്നു 

"മീനൂ, കരയേണ്ട. പെട്ടന്ന് ദേഷ്യം വന്നപ്പോൾ... ഞാൻ... എന്നോട് ക്ഷമിക്കടീ"

മീനാക്ഷി ഹരിയെ നോക്കി തന്റെ കണ്ണിൽ നിന്നും ഒലിച്ചിറങ്ങുന്ന കണ്ണീർ തുടച്ചുമാറ്റി 

"ന്റെ ഹരിയേട്ടന് നാണക്കേടായി ല്ലേ, ഞാൻ അങ്ങനെ പെരുമാറിയപ്പോൾ"

ഒന്ന് നിറുത്തിയിട്ട് അവൾ ഹരിയുടെ കണ്ണിലേക്ക് ദയനീയമായി ഒന്ന് നോക്കി 

"ആദ്യം കെട്ടിയ പെണ്ണ് ഇട്ടേച്ചും പോയി, രണ്ടാമത് കെട്ടിയത് ഒരു വട്ടത്തിയേയും അല്ലേ...? ന്റെ ഹരിയേട്ടൻ ശരിക്കും പെട്ടു അല്ലേ...? എന്നെ വീട്ടിൽ കൊണ്ടാക്കിയേക്ക് ഞാനായിട്ട് ഇനി ന്റെ ഹരിയേട്ടനെ വേദനിപ്പിക്കില്ല. അല്ലെങ്കിൽ എന്നെ ഹരിയേട്ടൻ എന്നല്ല, ഏതൊരു പുരുഷൻ തൊട്ടാലും ഞാൻ ഇങ്ങനെയേ പ്രതികരിക്കൂ"

ഹരി അവളുടെ കണ്ണിലേക്ക് നോക്കി 

"ന്റെ ഹരിയേട്ടാ എന്നുള്ള നിന്റെ ആ വിളിയുണ്ടല്ലോ, എനിക്ക് അതുമതി മീനൂ"

ഒന്ന് നിറുത്തിയിട്ട് അവൻ അവളുടെ കണ്ണിലേക്ക് നോക്കി 

"നിനക്ക് വട്ടാണെന്ന് നീ മാത്രം അങ്ങ് തീരുമാനിച്ചാൽ മതിയോ...? നിനക്ക് വട്ടൊന്നും ഇല്ല, പക്ഷേ എന്തോ ഒന്ന് നിന്റെ മനസ്സിനെ വല്ലാതെ അലട്ടുന്നുണ്ട്. നീ മറക്കാൻ ശ്രമിക്കുന്ന എന്നാൽ ആരെങ്കിലും നിന്നെ തൊട്ടാൽ മാത്രം നീ ഓർക്കുന്ന എന്തോ ഒരു ദുരന്തം നിന്റെ ജീവിതത്തിൽ ഉണ്ടായിട്ടുണ്ട്. നിന്റെ മനസ്സിനെ അത്രമേൽ മുറിവേല്പിച്ച എന്തോ ഒരു...."

ഹരി പറഞ്ഞ് അവസാനിപ്പിക്കും മുന്നേ അവൾ ഇടക്ക് കയറി സംസാരിച്ചു 

"മതി... നിർത്ത്, എനിക്കൊന്നും പറയാൻ ഇല്ല. എന്നോടൊന്നും ചോദിക്കരുത്... പ്ലീസ്"

ഹരി അവളെ സമാധാനിപ്പിച്ചു 

"ഹേയ് മീനൂ, ഞാൻ ഒന്നും ചോദിച്ചില്ലല്ലോ. വേണ്ടാ... നീ ഒന്നും പറയേണ്ട. നീ കുറച്ച് സമയം റസ്റ്റ്‌ എടുത്തോ, ഞാനൊന്ന് പുറത്ത് പോയിട്ട് വരാം"

അവൾ തലയാട്ടി. ഹരി റൂമിൽ നിന്നും പുറത്തിറങ്ങി അമ്മയെ നോക്കി 

"അമ്മ പറഞ്ഞത് പോലെ തന്നെയാ, അറിയാത്ത ഒരാൾ കയ്യിൽ പിടിച്ചപ്പോൾ അവൾ പെട്ടന്ന്...."

ഹരി അമ്മാവനോട് മാപ്പ് ചോദിച്ചു. അമ്മാവൻ ചിരിച്ചോണ്ട് അവനെ ചേർത്ത് പിടിച്ചു. തന്റെ ബുള്ളറ്റിൽ കയറി അവൻ മഹേഷേട്ടന്റെ അടുത്തേക്ക് യാത്ര തിരിച്ചു. മഹേഷേട്ടനെ ഓഫീസിൽ നിന്നും വിളിച്ച് കുറച്ച് മാറി ആരും ഇല്ലാത്ത ഒരിടത്തേക്ക് മാറി നിന്ന് ഹരി നടന്നതൊക്കെ അയാളോട് പറഞ്ഞു. എല്ലാം കേട്ട് കഴിഞ്ഞപ്പോൾ മഹേഷേട്ടൻ ഹരിയെ നോക്കി 

"സത്യായിട്ടും മോനേ നിന്നെ ഞാൻ പെടുത്തിയത് അല്ല. എനിക്ക് നന്നായി അറിയാവുന്ന കുട്ടിയാണ് അവൾ. ഇതുവരെ എനിക്ക് അവൾക്ക് കുഴപ്പം ഉണ്ടെന്ന് തോന്നീട്ടില്ല. അവളുടെ വീട്ടുകാർക്ക് പോലും ഇതൊന്നും അറിയാൻ ഒരു സാധ്യതയും ഞാൻ കാണുന്നില്ല. സത്യം പറഞ്ഞാൽ നീ കളളം പറയാണോ എന്ന് എനിക്ക് സംശയം ഉണ്ട്‌"

ഹരി മഹേഷേട്ടനെ നോക്കി കണ്ണുരുട്ടി 

"ദേ, മഹേഷേട്ടാ എന്ന് വിളിച്ച നാവുകൊണ്ട് എന്നെകൊണ്ട് തെറി വിളിപ്പിക്കരുത്"

മഹേഷേട്ടൻ ഹരിയെ നോക്കി പല്ലിളിച്ചു

"മഹേഷേട്ടാ, മീനാക്ഷിയുടെ മനസ്സിനെ വല്ലാതെ അലട്ടുന്ന അല്ലെങ്കിൽ മറക്കാൻ ശ്രമിക്കുന്ന എന്തോ ഒരുകാര്യം അവളുടെ ജീവിതത്തിൽ നടന്നിട്ടുണ്ട്. അതെന്താണെന്ന് എനിക്ക് കണ്ടുപിടിക്കണം മഹേഷേട്ടാ"

ഒന്ന് നിറുത്തിയിട്ട് ഹരി തുടർന്നു 

"അവളെ എനിക്ക് എന്റെ ഭാര്യയായി വേണം മഹേഷേട്ടാ, അവളെ ഞാൻ ഇപ്പോൾ ഉപേക്ഷിച്ചാൽ നാട്ടുകാരുടെ പരിഹാസം ഞാൻ മാത്രം സഹിച്ചാൽ മതി. പക്ഷേ, അവൾ ആരുമില്ലാതെ ഒറ്റപ്പെട്ട് പോവും മഹേഷേട്ടാ, പാവാണ് അത്. അവൾ എന്റെ ഭാര്യയാണ്, അവളുടെ മനസ്സിനുള്ളിൽ കിടന്ന് പുകയുന്ന ആ രഹസ്യം ഞാൻ കണ്ടെത്തും, എന്നിട്ട് അതിനുള്ള മരുന്നും ഞാൻ തന്നെ ഉണ്ടാക്കും"

ഇത്രയും പറഞ്ഞ് ഹരി തന്റെ ബുള്ളറ്റിന്റെ അടുത്തേക്ക് നടന്നു. അവനെ നോക്കി മഹേഷേട്ടന്റെ മനസ്സ് മന്ത്രിച്ചു 

"ഈ ഹരിയെ ആണല്ലോ രേഷ്മേ നീ വലിച്ചെറിഞ്ഞ് പോയത്. നിനക്ക് ഇവനേപ്പോലൊരു ഭർത്താവിനെ കിട്ടാൻ യോഗം ഇല്ല, അതന്നെ കാരണം"

ഭാഗം 4👇👇👇

ഇത്രയും പറഞ്ഞ് ഹരി തന്റെ ബുള്ളറ്റിന്റെ അടുത്തേക്ക് നടന്നു. അവനെ നോക്കി മഹേഷേട്ടന്റെ മനസ്സ് മന്ത്രിച്ചു 

"ഈ ഹരിയെ ആണല്ലോ രേഷ്മേ നീ വലിച്ചെറിഞ്ഞ് പോയത്. നിനക്ക് ഇവനേപ്പോലൊരു ഭർത്താവിനെ കിട്ടാൻ യോഗം ഇല്ല, അതന്നെ കാരണം"

വീട്ടിലെത്തിയ ഹരി കണ്ടത്, മീനാക്ഷിയും അനിയത്തിയും കൂടി കളിച്ച് ചിരിച്ചങ്ങനെ സൊറയും പറഞ്ഞ് മുറ്റത്തിരിക്കുന്നതാണ്. ഹരി അവരെ നോക്കിയൊന്ന് പുഞ്ചിരിച്ചു, എന്നിട്ട് മുറിയിൽ കയറി ബെഡിൽ മെല്ലെ കിടന്നു. അവന്റെ മനസ്സ് മുഴുവൻ മീനാക്ഷിയെ കുറിച്ചായിരുന്നു. ഏതെങ്കിലും ഒരു പുരുഷൻ ശരീരത്തിൽ തൊട്ടാൽ മാത്രമേ അവൾ അബ്നോർമൽ ആയി പെരുമാറുന്നുള്ളൂ, അല്ലാത്ത മുഴുവൻ സമയവും അവൾ നോർമൽ ആണ്. എന്താണോ അവളെ അലട്ടുന്ന പ്രശ്നം അത് കണ്ടെത്തി അവൾക്ക് തൃപ്തി ആവുന്ന തരത്തിൽ അതിനുള്ള പരിഹാരം കണ്ടെത്തിയാൽ തീർച്ചയായും അവൾ പൂർണമായും നോർമൽ ആവും എന്ന് ഹരിയുടെ മനസ്സ് മന്ത്രിച്ചു. കുറച്ച് സമയത്തിന് ശേഷം മീനാക്ഷി മുറിയിലേക്ക് വന്നു 

"ഇതെന്ത് കിടപ്പാ ഹരിയേട്ടാ, എന്നോടുള്ള ദേഷ്യം ഇനീം പോയില്ലേ"

ഹരി അവളെ നോക്കി പുഞ്ചിരിച്ചു 

"എന്റെ മീനൂട്ടിയോട് എനിക്ക് ദേഷ്യം ഒന്നുല്ല, നീ പോയി റെഡിയായി വാ നമുക്കൊന്ന് കറങ്ങീട്ട് വരാം"

മീനാക്ഷിയുടെ മുഖത്ത് സന്തോഷം 

"എവിടേക്കാ ഹരിയേട്ടാ, ദാ ഞാൻ ഇപ്പോ റെഡിയാവാം"

"അങ്ങനെ പ്രത്യേകിച്ച് പ്ലാനിങ് ഒന്നുമില്ല, നമ്മൾ ഇതുവരെ പുറത്തൊന്നും പോയിട്ടില്ലല്ലോ"

സന്തോഷത്തോടെ അവൾ തലയാട്ടി. കുറച്ചു സമയത്തിന് ശേഷം രണ്ടുപേരും ഡ്രെസ്സൊക്കെ മാറ്റി ബുള്ളറ്റിൽ കയറി അമ്മയോട് യാത്ര പറഞ്ഞ് പുറപ്പെട്ടു. അന്നവർ ബീച്ചിൽ പോയി, ഒരു സിനിമക്ക് പോയി, ബുള്ളറ്റിൽ കുറേ ചുറ്റിയടിച്ചു, മീനാക്ഷി ശരിക്കും എൻജോയ് ചെയ്തു. അന്നത്തെ ആ ദിവസം മാക്സിമം ആസ്വദിച്ച് രണ്ടുപേരും വീട്ടിലേക്ക് തിരിച്ചു, നേരം ഒരുപാട് വൈകിയിരുന്നു. വീട്ടിലേക്ക് പോവുന്ന വഴി, റോഡിൽ വെച്ച് ഒരു അഞ്ചോ ആറോ വയസ്സ് പ്രായം തോന്നിക്കുന്ന പെൺകുട്ടിയെ മനുഷ്യന്റെ രൂപവും പേപിടിച്ച നായയുടെ സ്വഭാവവും ഉള്ള ഒരുത്തൻ വലിച്ചിഴച്ച് മുനിസിപ്പാലിറ്റിയുടെ കച്ചറകൾ തട്ടുന്ന വലിയൊരു ബോക്സിന്റെ പിറകിലേക്ക് കൊണ്ടുപോകുന്നത് മീനാക്ഷി ശ്രദ്ധിച്ചു. അതുവരെ ചിരിച്ച മുഖവുമായി ബുള്ളറ്റിന്റെ പിറകിൽ ഇരുന്നിരുന്ന അവളുടെ കൈകൾ വിറക്കാൻ തുടങ്ങി, ശബ്ദം ഇടറി 

"ഹരി... യേട്ടാ, വണ്ടി.... വേഗം ഓടിക്ക്"

അതുവരെ കളിയും ചിരിയുമായി ഇരുന്നിരുന്ന മീനാക്ഷിയുടെ ശബ്ദം പെട്ടന്ന് ഇടറിയപ്പോൾ അവൻ ബുള്ളറ്റ് നിർതിയിട്ട് കാര്യം തിരക്കി. ബുള്ളറ്റ് നിറുത്തിയതും ഒരു ഭ്രാന്തിയെ പോലെ അവൾ ഹരിയെ നോക്കി

"ഹരിയേട്ടാ, വാ... പോവാം, വേഗം വാ, അല്ലെങ്കിൽ സിഗരറ്റ് ശരീരത്തിൽ വെക്കും, സൂചികൊണ്ട് കുത്തും.... വാ ഹരിയേട്ടാ"

ഹരിക്ക് ഒന്നും മനസ്സിലായില്ല. അവൻ അവളെ സമാധാനിപ്പിക്കാൻ ശ്രമിച്ചു. അവൾ ഹരിയെ തട്ടിമാറ്റി എന്തൊക്കെയോ പിറുപിറുത്ത് കൊണ്ട് റോഡിലൂടെ ഓടാൻ തുടങ്ങി, അവൾ ഭയന്ന് വിറക്കുന്നുണ്ടായിരുന്നു. ഹരി മീനാക്ഷിക്ക് പിറകെ പോയി അവളെ പിടിക്കാൻ ഒരുങ്ങുമ്പോഴാണ് അവന്റെ കാതിൽ ഒരു കുട്ടിയുടെ കരച്ചിൽ മുഴങ്ങിയത്. തിരിഞ്ഞു നോക്കിയപ്പോൾ വേസ്റ്റ് ബോക്സിന്റെ പിറകിൽ രണ്ട് കുഞ്ഞികാലുകൾ പിടയുന്നത് കണ്ടു. ഹരി പിന്നെ ഒന്നും നോക്കിയില്ല, ആ കുട്ടിയുടെ അടുത്തേക്ക് അവൻ ഓടി. കുട്ടിയുടെ അടുത്തെത്തിയപ്പോഴാണ് ആ പിഞ്ചു പൈതലിന്റെ ഡ്രെസ്സൊക്കെ വലിച്ചു കീറി ഒരാൾ അവളുടെ മുകളിൽ കിടക്കാൻ ശ്രമിക്കുന്നത് കണ്ടത്. ഹരി കൂടുതൽ ആലോചിക്കാൻ ഒന്നും നിന്നില്ല, അവന്റെ കയ്യിൽ അപ്പോൾ കിട്ടിയത് നല്ല തുരുമ്പെടുത്ത ഒരു ഇരുമ്പ് ദണ്ഡ് ആയിരുന്നു. അതുകൊണ്ട് അയാളുടെ മുഖം നോക്കി അവൻ ആഞ്ഞടിച്ചു. 

പേടിച്ചു വിറച്ച് ഓടിക്കൊണ്ടിരുന്ന മീനാക്ഷിയുടെ കാതിലേക്ക് അയാളുടെ വേദനകൊണ്ട് പിടയുന്ന ശബ്ദം തുളച്ചു കയറി. ഓടിക്കൊണ്ടിരുന്ന അവളുടെ കാലുകൾ നിശ്ചലമായി. അവൾ പതുക്കെ തിരിഞ്ഞു നോക്കിയപ്പോൾ കാണുന്നത് പേപിടിച്ച നായയെ തല്ലുന്നത് പോലെ ഹരി അയാളെ തല്ലുന്നതാണ്. അതുവരെ ഉണ്ടായിരുന്ന ഭയം എന്ന വികാരം അവളെ വിട്ട് പോയി. അവൾ ഹരിയുടെ അടുത്തേക്ക് നടന്നു. ആ പെൺകുട്ടിയെ ചേർത്ത് പിടിച്ച് അവൾ പൊട്ടിക്കരഞ്ഞു. ഹരി പോലീസിനെ വിവരം അറിയിച്ചു. പോലീസ് വരുന്നതിന് മുന്നേ ഹരി അവസാനമായി അയാളുടെ കാമ കൊഴുപ്പ് അടിഞ്ഞു കിടക്കുന്ന ആ ഭാഗത്ത്‌ തുരുമ്പ് പിടിച്ച ആ ദണ്ഡ് കൊണ്ട് ആഞ്ഞടിച്ചു.

പോലീസ് വന്ന് അയാളെ അറസ്റ്റ് ചെയ്തു. ഭിക്ഷാടന മാഫിയയുടെ കണ്ണി ആയിരുന്നു അയാൾ. ഒന്നും പ്രതീക്ഷിക്കാതെ വലിയ വലിയ സ്വപ്നങ്ങള്‍ ഒന്നും കാണാന്‍ അറിയാത്ത ഇവനെപ്പോലുള്ള ഭിക്ഷാടന മാഫിയകളായ പേപ്പട്ടികൾക്ക് കൂത്തടിക്കാനും ജീവിതം ആഘോഷമാക്കാനും വേണ്ടി കളിച്ചു നടക്കേണ്ട പ്രായത്തില്‍ കയ്യില്‍ പിച്ചചട്ടിയുമായി റോഡിലൂടെയും റെയില്‍വേ സ്റ്റേഷനുകളിലും പിച്ച തെണ്ടി ജീവിക്കാൻ വിധിക്കപ്പെട്ട ഇതുപോലുള്ള  പതിനായിരക്കണക്കിന് പിഞ്ചുകുഞ്ഞുങ്ങൾ ജീവിക്കുന്നുണ്ട് ഈ നാട്ടിൽ, ആ പിഞ്ചു പൈതങ്ങൾക്ക് അറിയില്ലല്ലോ മാനം എന്നാൽ എന്താണ് എന്ന്. ആ കുട്ടികള്‍ ജീവിക്കുന്നത് തന്നെ എപ്പോഴെങ്കിലും അവരുടെ ജീവിതത്തില്‍ ദൈവം ഒരു അത്ഭുതം കാണിക്കും എന്ന പ്രതീക്ഷ കൊണ്ടാണ്. 

ഹരി മീനാക്ഷിയേയും പിറകിലിരുത്തി വീട്ടിലേക്ക് യാത്രതിരിച്ചു. അവൾ പതുക്കെ തന്റെ കൈകൾ പൊക്കി അവന്റെ തോളത്ത് വെച്ചു. ഹരി അത്ഭുതത്തോടെ അവളെ തിരിഞ്ഞു നോക്കി 

"ഇത് എന്റെ ഭാര്യ മീനൂട്ടി തന്നെയാണോ, ശരീരത്തിൽ തൊട്ടാൽ കൊല്ലും എന്ന് പറഞ്ഞവളാ ഇപ്പോൾ ഇങ്ങോട്ട് വന്ന് തൊടുന്നെ"

അവൾ ഹരിയെ പിറകിലൂടെ കെട്ടിപിടിച്ച് അവന്റെ കാതിൽ പതുക്കെ ഉമ്മവെച്ചു. പെട്ടെന്നുള്ള അവളുടെ ആ ചുംബനം കാരണം ഹരിയൊന്നു ഞെട്ടിത്തരിച്ചു പോയി. അവന്റെ കൈകൾ വിറച്ചു, ഹൃദയം പെട പെടാ എന്ന് വേഗത്തിൽ ഇടിക്കാൻ തുടങ്ങി. ബുള്ളറ്റിന്റെ നിയന്ത്രണം മാത്രമല്ല അവന്റേയും നിയന്ത്രണം കയ്യീന്ന് പോയി. ഒരുവിധത്തിൽ അവൻ വണ്ടി വീട്ടിൽ എത്തിച്ചു. 

വീട്ടിലെത്തിയ ഉടൻ രണ്ടുപേരും കുളിച്ചു മാറ്റി മുറിയിൽ കയറി. ഹരി എന്നത്തേയും പോലെ നിലത്ത് പുതപ്പ് വിരിച്ച് കിടക്കാൻ ഒരുങ്ങി. അവൾ ഹരിയുടെ കണ്ണിലേക്ക് വല്ലാത്ത രീതിയിൽ നോക്കുന്നത് അവൻ ശ്രദ്ധിച്ചു 

"ദേ മീനൂ, വെറുതെ ആളെ ഇങ്ങനൊന്നും നോക്കി കൊതിപ്പിക്കരുത് ട്ടോ"

അവൾ വീണ്ടും അവന്റെ കണ്ണിലേക്ക് നോക്കി 

"അതെന്താ ഹരിയേട്ടന് കൊതിയാവുന്നുണ്ടോ"

ഹരി അവളെ നോക്കി കൈകൾ കൂപ്പി 

"അയ്യോ വേണ്ടന്റെ പൊന്നേ, ന്നിട്ട് വേണം ഞാൻ നിന്നെ തൊട്ടാൽ കത്തിയെടുത്ത് എന്നെ കൊല്ലാൻ വരാൻ. ഞാൻ നിലത്ത് ഇങ്ങനെ ചുരുണ്ട് കൂടി കിടന്നോളാം"

അവൾ അവന്റെ കണ്ണിലേക്ക് തന്നെ നോക്കി 

"ഒന്ന് തൊട്ടേ, നോക്കാലോ ഞാൻ ന്റെ ഹരിയേട്ടനെ കത്തിയെടുത്ത് കുത്തോ ഇല്ലയോ എന്ന്"

അവളുടെ കണ്ണുകൾ കൊണ്ടുള്ള ആ മൂർച്ചയേറിയ നോട്ടം ശരിക്കും ഹരിയെ അസ്വസ്ഥനാക്കി. അവൻ പതുക്കെ അവളെ കയ്യിൽ പിടിച്ചു. പേടിച്ച് പേടിച്ചാണ് ഹരി അവളുടെ കയ്യിൽ പിടിച്ചത്, പക്ഷേ അവൻ പ്രതീക്ഷിച്ചത് പോലെ ഒന്നും സംഭവിച്ചില്ല. അവൾ അവനിലേക്ക് ചേർന്ന് നിന്നു. ഹരി പിന്നെ ഒന്നും നോക്കിയില്ല, അവളെ കെട്ടിപിടിച്ച് കട്ടിലിലേക്ക് വീണു. സത്യം പറഞ്ഞാൽ അന്നായിരുന്നു ശരിക്കും അവരുടെ ആദ്യരാത്രി. തന്റെ നെഞ്ചിൽ തളർന്ന് കിടക്കുന്ന അവളുടെ മുടിയിൽ പതുക്കെ തലോടി അവൻ അവളോട്‌ നേരം വെളുക്കുവോളം സംസാരിച്ചു.

പിറ്റേദിവസം ഹരി എഴുന്നേറ്റപ്പോൾ ഉച്ച കഴിഞ്ഞിരുന്നു. അന്ന് ഞാറാഴ്ച്ച ആയിരുന്നു. മീനാക്ഷി ഹരിയെ വിളിച്ചുണർത്തി 

"ഹരിയേട്ടാ, ഇങ്ങനെ പോത്ത് പോലെ ഉറങ്ങാതെ ഒന്ന് എണീറ്റെ"

ഹരി പതുക്കെ കണ്ണ് തുറന്ന് അവളെ നോക്കി, എന്നിട്ട് അവളെ പിടിച്ചു വലിച്ച് തന്റെയൊപ്പം കിടത്തി. അവൻ കുറച്ച് സമയം അവളേയും കെട്ടിപിടിച്ച് കിടന്നു. അവൾ ഹരിയുടെ കയ്യിൽ മെല്ലെ തലോടി 

"ഹരിയേട്ടന്റെ മുഴുവൻ ജീവചരിത്രവും അനിയത്തി പറഞ്ഞു തന്നു. ഞാൻ ഇന്നലെ നടന്നതൊക്കെ അവളോട്‌ പറഞ്ഞു. അപ്പോഴാ അവള് പറഞ്ഞത് ഹരിയേട്ടൻ എന്ന താന്തോന്നിയുടെ കഥ"

ഹരി അവളെ ഒന്നൂടെ ശക്തിയായി കെട്ടിപിടിച്ചു 

"ആഹാ, വേറെ എന്തൊക്കെ പറഞ്ഞു അവൾ"

"സത്യായിട്ടും ഞാൻ കരുതീത് ഹരിയേട്ടൻ ഒരു പാവം ആണെന്നാണ്. പക്ഷേ ഇന്നലെ അയാളെ തല്ലുന്നത് കണ്ടപ്പോൾ എനിക്ക് ബോധ്യായി നല്ല അസ്സല് താന്തോന്നി ആണെന്ന്" 

ഒന്ന് നിറുത്തിയിട്ട് അവൾ തുടർന്നു 

"രേഷ്മേച്ചിയാണ് ഹരിയേട്ടനെ മാറ്റിയെടുത്തത് അല്ലേ, അച്ഛനും അമ്മയും വർഷങ്ങളായി ശ്രമിച്ചിട്ടും നടക്കാത്ത കാര്യം രേഷ്മേച്ചി വെറും രണ്ടേരണ്ടു മാസം കൊണ്ട് നടത്തിയെടുത്തു, രേഷ്മേച്ചി ആള് കൊള്ളാം ലെ"

ഹരിയൊന്ന് പുഞ്ചിരിച്ചു, അവൾ ഹരിക്ക് മുഖാമുഖം കിടന്നു 

"സത്യത്തിൽ എന്തിനാണ് രേഷ്മേച്ചി ഹരിയേട്ടനെ ഇട്ടിട്ട് പോയത്. ഇത്രയും നല്ലൊരു താന്തോന്നിയെ ആരേലും ഇട്ടിട്ട് പോവുമോ"

ഹരി അവളുടെ മൂക്കിൽ പതുക്കെ കടിച്ചിട്ട് കട്ടിലിൽ നിന്നും എഴുന്നേറ്റു

"അവള് പോയോണ്ടല്ലേ എനിക്ക് ഈ മീനൂനെ കിട്ടിയത്"

മീനാക്ഷി ഒന്ന് പുഞ്ചിരിച്ചു. ഹരി കുളിക്കാൻ കുളിമുറിയിലേക്ക് പോയി. മീനാക്ഷി കട്ടിലിൽ തന്നെ കിടന്നു. കുറച്ച് സമയം കഴിഞ്ഞപ്പോൾ ഹരിയുടെ ഫോണിലേക്ക് ഒരു മെസ്സേജ് വന്ന ശബ്ദം അവൾ കേട്ടു. അവൾ അത് കാര്യമാക്കിയില്ല. വീണ്ടും രണ്ടുമൂന്ന് മെസ്സേജ് ട്യൂൺ കേട്ടപ്പോൾ വെറുതേ ബെഡിൽ കിടക്കുന്ന ആ ഫോണെടുത്ത് അവൾ തുറന്ന് നോക്കി. വാട്സാപ്പിൽ ആയിരുന്നു മെസ്സേജ് വന്നിട്ടുള്ളത്. മെസ്സേജ് അയച്ചിരിക്കുന്ന ആളുടെ പേര് കണ്ടപ്പോൾ അത് അവള് തന്നെയാണോ എന്ന് ഉറപ്പിക്കാൻ വേണ്ടി മെസ്സേജ് വന്ന അക്കൗണ്ടിലെ പ്രൊഫൈൽ പിക് മീനാക്ഷി എടുത്ത് നോക്കി. അതെ, ഇത് രേഷ്മ തന്നെയാണ്, ഹരിയേട്ടന്റെ ആദ്യ ഭാര്യ രേഷ്മ. വിറക്കുന്ന കൈകളോടെ മീനാക്ഷി ആ വോയ്‌സ് മെസ്സേജ് ഓപ്പൺ ചെയ്തു 

"ഹരിയേട്ടാ, സുഖല്ലേ...? ഇന്നലെ എന്താ വിളിക്കാഞ്ഞേ...? മീനാക്ഷിയെ കുറിച്ച് ആലോചിച്ച് വിഷമിക്കേണ്ട, അവളുടെ അസുഖം വേഗം മാറി നിങ്ങൾ സന്തോഷത്തോടെ ജീവിക്കുന്നത് എനിക്ക് കാണണം. എനിക്ക് ഹരിയേട്ടന്റെ സന്തോഷം മാത്രം കണ്ടാൽ മതി. ഹരിയേട്ടനെ ഞാൻ മരിക്കുന്ന വരെ മറക്കില്ല. ആ പിന്നേ, പഴയ താന്തോന്നിത്തരം ഒന്നും ഇപ്പോ ഇല്ലല്ലോ ല്ലേ, പഴയ പോലത്തെ വല്ല താന്തോന്നിത്തരവും കാണിച്ചു എന്ന് ഞാനെങ്ങാനും അറിഞ്ഞാൽ, ഞാൻ ഒരു വരവങ്ങട് വരും, ഈ താന്തോന്നിയെ ഒരു പാഠം പഠിപ്പിക്കാൻ. ഹ ഹ ഹ ... ഫ്രീ ആയാൽ വിളിക്കണം"

മീനാക്ഷിയുടെ കയ്യിൽ നിന്നും ഫോൺ ബെഡിലേക്ക് വീണു. ഹരിയേട്ടൻ എല്ലാവരോടും കള്ളം പറയുകയായിരുന്നോ...? അവൾ മനസ്സിൽ മന്ത്രിച്ചു.

ഭാഗം 5👇👇👇

"ഹരിയേട്ടാ, സുഖല്ലേ...? ഇന്നലെ എന്താ വിളിക്കാഞ്ഞേ...? മീനാക്ഷിയെ കുറിച്ച് ആലോചിച്ച് വിഷമിക്കേണ്ട, അവളുടെ അസുഖം വേഗം മാറി നിങ്ങൾ സന്തോഷത്തോടെ ജീവിക്കുന്നത് എനിക്ക് കാണണം. എനിക്ക് ഹരിയേട്ടന്റെ സന്തോഷം മാത്രം കണ്ടാൽ മതി. ഹരിയേട്ടനെ ഞാൻ മരിക്കുന്ന വരെ മറക്കില്ല. ആ പിന്നേ, പഴയ താന്തോന്നിത്തരം ഒന്നും ഇപ്പോ ഇല്ലല്ലോ ല്ലേ, പഴയ പോലത്തെ വല്ല താന്തോന്നിത്തരവും കാണിച്ചു എന്ന് ഞാനെങ്ങാനും അറിഞ്ഞാൽ, ഞാൻ ഒരു വരവങ്ങട് വരും, ഈ താന്തോന്നിയെ ഒരു പാഠം പഠിപ്പിക്കാൻ. ഹ ഹ ഹ ... ഫ്രീ ആയാൽ വിളിക്കണം"

മീനാക്ഷിയുടെ കയ്യിൽ നിന്നും ഫോൺ ബെഡിലേക്ക് വീണു. ഹരിയേട്ടൻ എല്ലാവരോടും കള്ളം പറയുകയായിരുന്നോ...? അവൾ മനസ്സിൽ മന്ത്രിച്ചു.

കുറച്ചു സമയത്തിന് ശേഷം ഹരി കുളികഴിഞ്ഞെത്തി. മുടിയൊക്കെ ചീകിയൊതുക്കി ഡ്രസ്സ്‌ മാറുമ്പോഴാണ് മുഖം വീർപ്പിച്ചിരിക്കുന്ന മീനാക്ഷിയെ അവൻ ശ്രദ്ധിച്ചത്

"ന്താ മുഖത്തൊരു ഗൗരവം...?"

അവൾ ബെഡിൽ നിന്നും എഴുന്നേറ്റ് ഫോൺ കയ്യിലെടുത്ത് രേഷ്മ അയച്ച വോയ്‌സ് നോട്ട് ഹരിയെ പ്ലേ ചെയ്ത് കേൾപ്പിച്ചു. അത് കേട്ടപ്പോൾ ഹരിയുടെ മുഖം മാറുന്നത് അവൾ ശ്രദ്ധിച്ചു. അവൾ അവനെ നോക്കി 

"എന്താ ഹരിയേട്ടാ ഇതൊക്കെ...? ഹരിയേട്ടൻ ഇത്രെയും കാലം സ്വന്തം വീട്ടുകാരേയും നാട്ടുകാരേയും പറ്റിക്കുക ആയിരുന്നു ല്ലേ...? സത്യം പറ, ഇപ്പോഴും നിങ്ങൾക്ക് രേഷ്മേച്ചിയുമായി ബന്ധമില്ലേ...? നാട്ടുകാരും കുടുംബക്കാരും എല്ലാം ഭാര്യ ഇട്ടേച്ച് പോയതിന്റെ പേരിൽ പരിഹസിച്ചപ്പോൾ ആരോടും ഒന്നും പറയാതെ എല്ലാം കേട്ട് സഹിച്ചുനിന്നത് എന്തിനാണ്" 

ഹരി ഒന്നും മിണ്ടിയില്ല. അവൾ ഹരിയുടെ കണ്ണിലേക്ക് ദേഷ്യത്തോടെ നോക്കി 

"എല്ലാവരേയും മണ്ടന്മാരാക്കിയത് പോലെ എന്നെ മണ്ടനാക്കാൻ നോക്കേണ്ട. എനിക്ക് അറിഞ്ഞേ പറ്റു, ഹരിയേട്ടനും രേഷ്മയും തമ്മിൽ എന്താ ബന്ധം എന്ന്...?"

ഹരി കുറച്ച് സമയം ഒന്നും മിണ്ടിയില്ല, എന്നിട്ട് അവളെ നോക്കി 

"ഞാൻ പറയാം, എല്ലാം പറയാം. നീയെങ്കിലും എല്ലാം അറിയണം. ഇനീം ഒറ്റക്ക് ഇങ്ങനെ തലയിൽ ചുമന്നുകൊണ്ട് നടക്കാൻ വയ്യനിക്ക്"

ഹരി തന്റെ മനസ്സിൽ ഒളിപ്പിച്ച് വെച്ച ആ രഹസ്യം മീനാക്ഷിയോട് പറഞ്ഞു തുടങ്ങി.

.............................................................................                    

സുകുമാരൻ ബ്രോക്കർ വഴിയാണ് രേഷ്മയുമായുള്ള കല്യാണ ആലോചന വരുന്നത്. രേഷ്മയുടെ വീട്ടുകാരായിരുന്നു കല്യാണം വേഗം നടത്താൻ തിടുക്കപ്പെട്ടിരുന്നത്. ഒടുവിൽ ഏറ്റവും അടുത്ത മുഹൂർത്തത്തിൽ അവരുടെ കല്യാണം നടന്നു. പാട്ടും ഡാൻസും ഒക്കെയായി ആഘോഷത്തോടെ ആയിരുന്നു കല്യാണം നടന്നത്. ആദ്യരാത്രി മണിയറയിൽ വെച്ചാണ് അവൾ ഹരിയോട് ആ ഞെട്ടിക്കുന്ന സത്യം പറഞ്ഞത്

"ഹരിയേട്ടാ, എനിക്ക് ഒരിക്കലും നിങ്ങളുടെ നല്ല ഒരു ഭാര്യയായി ജീവിക്കാൻ സാധിക്കില്ല. എന്നോട് പൊറുക്കണം. ഞാൻ മറ്റൊരാളുമായി ഇഷ്ടത്തിലാണ്"

ആദ്യരാത്രി ഭാര്യയുടെ കുമ്പസാരം കേട്ടപ്പോൾ തലയിൽ ഇടിത്തീ വീണപോലത്തെ ഒരു അവസ്ഥയായിരുന്നു ഹരിക്ക് അനുഭവപ്പെട്ടത്.

"നീയെന്തൊക്കെയാണ് രേഷ്മാ ഈ പറയുന്നത്. കളിപ്പിക്കാണോ എന്നെ"

അവൾ ഹരിയുടെ കാൽക്കൽ വീണ് പൊട്ടിക്കരഞ്ഞു

"മാപ്പർഹിക്കാത്ത തെറ്റാ ഞാൻ ചെയ്തത്. എന്നെ ശപിക്കരുത്"

അവൻ മെല്ലെ അവളെ പിടിച്ച് എഴുന്നേൽപ്പിച്ചു, എന്നിട്ട് അവളുടെ കണ്ണിൽ നിന്നും നിറഞ്ഞൊഴുകിക്കൊണ്ടിന്ന കണ്ണീർ തുള്ളികൾ മെല്ലെ തുടച്ചുനീക്കി

"രേഷ്മാ, ഞാൻ നിന്റെ കഴുത്തിൽ താലികെട്ടുന്നതിന് തൊട്ടുമുന്നേ എങ്കിലും നിനക്ക് ഈ കാര്യം എന്നോട് പറയാമായിരുന്നു"

സംസാരത്തിൽ ഇടർച്ച വന്നപ്പോൾ ഹരിയൊന്ന് നിറുത്തി, എന്നിട്ട് അവൻ പോലും അറിയാതെ നിറഞ്ഞ കണ്ണിലെ തുള്ളികൾ കൈകൊണ്ട് മാറ്റി 

"ഇതിപ്പോൾ ഞാനും എന്റെ വീട്ടുകാരും... നാട്ടുകാരുടെയും, കുടുംബക്കാരുടെയും മുന്നിൽ വെറും പരിഹാസ കഥാപാത്രങ്ങൾ ആവില്ലേ. കല്യാണം നിശ്ചയിച്ചതിന് ശേഷം നമ്മൾ പല തവണ നേരിൽ കണ്ടിട്ടില്ലേ, പല തവണ ഫോണിൽ സംസാരിച്ചിട്ടില്ലേ, അന്ന് ഈ കാര്യം ഒന്ന് സൂചിപ്പിച്ചിരുന്നേൽ ഇങ്ങനെ ഒരു വിഡ്ഢി വേഷം കെട്ടാൻ ഞാൻ തയ്യാറാവില്ലായിരുന്നു"

"ഒരുപാട് തവണ പറയാൻ ശ്രമിച്ചതാണ്. പക്ഷേ ഈ കാര്യം ഹരിയേട്ടനോട് പറഞ്ഞാൽ എന്റെ അച്ഛനും അമ്മയും ആത്മഹത്യ ചെയ്യും എന്ന്‌ നിരന്തരം എന്നെ ഭീഷണിപ്പെടുത്തിയിരുന്നു. ഹരിയേട്ടൻ ഫോൺ ചെയ്യുമ്പോൾ വരെ അവർ എന്റെ കൂടെ വന്ന് നിൽക്കാറുണ്ടായിരുന്നു"

ഒന്ന് നിറുത്തിയിട്ട് അവൾ തുടർന്നു 

"ഉണ്ണിയേട്ടൻ എന്റെ കൂടെ ഉള്ളിടത്തോളം കാലം ആത്മഹത്യ ചെയ്യാൻ എനിക്ക് സാധിക്കില്ല. മരിക്കാനല്ല ഒന്നിച്ച് ജീവിക്കാനാണ് ഞങ്ങൾ ആഗ്രഹിച്ചത്. ഒരുപാട് ഇഷ്ടാണ് എന്റെ ഉണ്ണിയേട്ടന് എന്നെ. ഞങ്ങൾ ഒന്നിച്ച് ജീവിക്കുന്നത് കുട്ടികാലം മുതൽ സ്വപ്നം കണ്ട് തുടങ്ങിയതാ. പക്ഷേ എന്റെ ഉണ്ണിയേട്ടനെ എനിക്ക് നഷ്ടയാൽ ഞാൻ ഈ ജീവിതം അവസാനിപ്പിക്കും"

തലയിൽ ഇടിത്തീയും വീണതും കാലിൽ പാമ്പ് കടിയേറ്റതുമായ അവസ്ഥയിൽ ഹരി രേഷ്മയെ നോക്കി. വളരെ ദയനീയമായിരുന്നു ആ നോട്ടം 

"നിന്റെ ഉണ്ണിയേട്ടൻ ഇപ്പൊ എവിടുണ്ട്...?നിന്നെ അവൻ ആത്മാർത്ഥമായി സ്നേഹിച്ചിരുന്നേൽ നമ്മുടെ വിവാഹം എങ്ങനേലും മുടക്കി നിന്നെയും സ്വന്തമാക്കി നല്ല അന്തസ്സായി  ജീവിച്ചേനെ"

"ഉണ്ണിയേട്ടൻ പറഞ്ഞിട്ടാ താലികെട്ടാൻ ഞാൻ സമ്മതിച്ചേ"

ഹരിയുടെ മുഖത്ത് അത്ഭുതം 

"എന്ത്, ഉണ്ണി പറഞ്ഞിട്ടാണോ നീ ഈ കല്യാണത്തിന് സമ്മതിച്ചേ"

അതെ എന്ന അർഥത്തിൽ അവൾ തലയാട്ടി 

"ഉണ്ണിയേട്ടന് ദുബൈയിൽ ആണ് ജോലി. ലീവിന് കൊടുത്തിട്ടുണ്ട്, പക്ഷേ നമ്മുടെ കല്യാണത്തിന് മുന്നേ ഒരിക്കലും എത്താൻ സാധിക്കില്ലായിരുന്നു.  കല്യാണം നടക്കും എന്ന്‌ ഉറപ്പായപ്പോൾ ഞാൻ വീട് വിട്ടിറങ്ങാൻ ഒരുങ്ങി. ഉണ്ണിയേട്ടൻ ഒരു അനാഥനാണ്. സ്വന്തമെന്ന് പറയാൻ ആരുമില്ല. അതുതന്നെയായിരുന്നു എന്റെ വീട്ടുകാർ ഞങ്ങളുടെ ബന്ധം എതിർക്കാനുള്ള പ്രധാന കാരണവും. ഏതേലും ഫ്രണ്ട്സിന്റെ വീട്ടിൽ ഉണ്ണിയേട്ടൻ വരുന്നത് വരെ താമസിക്കാൻ തീരുമാനിച്ചു. പക്ഷേ അതൊന്നും വേണ്ടാ ആദ്യരാത്രി ഇതുപോലെ ഹരിയേട്ടനോട് എല്ലാം തുറന്ന് സംസാരിക്കാൻ പറഞ്ഞു. ഒന്നെങ്കിൽ ഹരിയേട്ടൻ നിന്നെ തല്ലും, എന്നിട്ട് ഒച്ചവെച്ച് വല്യ പ്രശ്നമാക്കും ഇല്ലേൽ നമ്മളെ അദ്ദേഹം സഹായിക്കും ഇതിൽ രണ്ടിൽ ഏത് നടന്നാലും നിന്നെ എനിക്ക് നഷ്ടമാവില്ല എന്ന് ഉണ്ണിയേട്ടൻ പറഞ്ഞത് കൊണ്ടാ ഇങ്ങനൊക്കെ നടന്നേ. ഞങ്ങളെ സഹായിക്കാൻ ഇനി ഹരിയേട്ടന് മാത്രേ സാധിക്കൂ"

അവൾ ഹരിക്കു നേരെ കൈകൾ കൂപ്പി അപേക്ഷിച്ചു. ഉണ്ണിയുടെ നമ്പർ മേടിച്ച് ഹരി അവനുമായി സംസാരിച്ചു. ഉണ്ണിയുമായി സംസാരിച്ചപ്പോൾ ഹരിക്ക് ഒരുകാര്യം ബോധ്യമായി, ഒരുപെണ്ണ് ആഗ്രഹിക്കുന്ന സ്നേഹവും കരുതലും ആവോളം ഉണ്ണിയിൽ നിന്നും രേഷ്മക്ക് കിട്ടും എന്നുള്ളത്. അവരുടെ പ്രണയത്തിന് അത്രേം തീവ്രത അനുഭവപ്പെട്ടു ഹരിക്ക്. കൂടാതെ ഉണ്ണിയെക്കുറിച്ച് കൂടുതൽ അറിയാനും സാധിച്ചു. 

ഹരിക്ക് ചെറിയൊരു സംശയം ഉണ്ടായിരുന്നു. ഉണ്ണി എന്ന രേഷ്മയുടെ കാമുകനെ കുറിച്ച്. സുരക്ഷിതമായ കൈകളിലേക്ക് തന്നെയാണോ അവൾ പോവുന്നത് എന്ന ആശങ്ക ഹരിക്ക് ഉണ്ടായിരുന്നു. പക്ഷേ ഉണ്ണിയെ കുറിച്ച് കൂടുതൽ അറിഞ്ഞപ്പോൾ രേഷ്മക്ക് അവനെക്കാൾ നല്ലൊരു പയ്യനെ കിട്ടില്ല എന്ന് ഹരി ഉറപ്പിച്ചു.

അച്ഛനും അമ്മയും വളരെ ചെറുതിലെ നഷ്‌ടമായ ഉണ്ണി പിന്നീട് ജീവിച്ചത് ബന്ധുക്കളുടെ വീട്ടിലായിരുന്നു. ഓരോ ബന്ധുക്കളും മടുക്കുമ്പോൾ മറ്റൊരു വീട്ടിൽ കൊണ്ടാക്കും. അങ്ങനെ മാറി മാറി കുറേ വീടുകളിൽ പരിഹാസങ്ങളും, ഉപദ്രവങ്ങളും, കുത്തുവാക്കുകളും കേട്ട് ജീവിച്ചു. പന്ത്രണ്ടാമത്തെ വയസ്സിൽ കൂലിപണിക്ക് പോയി തുടങ്ങി. പിന്നീട് ഒരു ലോറിയിൽ കിളിയായി ജോലി ആരംഭിച്ചു. അങ്ങനെ അവിടെ നിന്നും ഡ്രൈവിങ് പഠിച്ചു. അങ്ങനെ ഒരു കൂട്ടുകാരൻ വഴിയാണ് ദുബൈയിൽ ഡ്രൈവറായി ജോലി ശരിയായത്.

അവൻ ദുബൈയിലേക്ക് പോകാൻ കാരണം തന്നെ രേഷ്മ ആയിരുന്നു. അവരുടെ ബന്ധം അവളുടെ വീട്ടിൽ അറിഞ്ഞപ്പോൾ ഉണ്ണിയെ ഒരുപാട് പരിഹസിച്ചതാണ് അവർ, അനാഥൻ, നാലുകാശിനു വകയില്ലാത്തവൻ എന്നൊക്കെ പറഞ്ഞ്. ഗൾഫിൽ പോയി കാശൊക്ക ഉണ്ടാക്കി സ്വന്തമായി ഒരു വീടൊക്കെ വെച്ച് അന്തസ്സായി രേഷ്മയെ പെണ്ണ് ചോദിക്കാൻ ആയിരുന്നു തീരുമാനം. പക്ഷേ അവൻ ഗൾഫിൽ പോയ ഉടനെ അവളുടെ വിവാഹം നിശ്ചയിച്ചു. വിസയുടെ കാശ് കൊടുക്കാതെ നാട്ടിലേക്ക് പോവാനും പറ്റില്ല. അതുകൊണ്ടാണ് ഇങ്ങനെയൊക്കെ സംഭവിച്ചത്. എന്തായാലും രണ്ടു മാസത്തിനുള്ളിൽ ലീവ് റെഡി ആവും, അതുവരെ രേഷ്മയെ നോക്കാൻ അവൻ ഹരിയോട് അപേക്ഷിച്ചു.

ഉണ്ണി നാട്ടിൽ വരുന്നത് വരെ രേഷ്മക്ക് ഒരു പോറൽ പോലും ഏൽക്കാതെ നല്ല ഒരു സുഹൃത്തിനെപോലെ സംരക്ഷിക്കാം എന്ന്‌ ഹരി വാക്ക് കൊടുത്തു. രേഷ്മ അവന്റെ കാൽക്കൽ വീണ് പൊട്ടിക്കരഞ്ഞ് കൈകൾ കൂപ്പി നന്ദി പറഞ്ഞു. ഹരി അവളെ നോക്കി വിഷമങ്ങൾ എല്ലാം ഉള്ളിലൊതുക്കി കണ്ണിറുക്കി പുഞ്ചിരിച്ചു. പക്ഷെ അപ്പോഴത്തെ ഹരിയുടെ മനസ്സ് അവൾക്ക് വായിക്കാൻ സാധിക്കുന്നുണ്ടായിരുന്നു. 

നിലത്ത് ഒരു പായ വിരിച്ച് ശുഭരാത്രി നേർന്നുകൊണ്ട് അവൻ ഉറങ്ങാൻ കിടന്നു. ഉറങ്ങുന്നതിന് മുന്നേ രേഷ്മയോട് അവൻ ഒരു കാര്യം ആവശ്യപ്പെട്ടു 

"നിന്നെ ഉണ്ണിയുടെ കയ്യിൽ ഭദ്രമായി ഞാൻ ഏല്പിക്കും. പക്ഷേ, ഉണ്ണി നാട്ടിൽ വരുന്നത് വരെ എന്റെ വീട്ടിൽ ആരും ഈ കാര്യം അറിയരുത്. പെട്ടെന്ന് ഇതൊക്കെ കേട്ടാൽ അച്ഛനും അമ്മക്കും അത് താങ്ങാൻ പറ്റി എന്ന് വരില്ല. അതുകൊണ്ട് ഉണ്ണി വന്ന് എല്ലാവരെയും കാര്യങ്ങൾ പറഞ്ഞ് മനസ്സിലാക്കുന്നത് വരെ നീ എന്റെ നല്ലൊരു ഭാര്യയായി, എന്റെ അമ്മക്കും അച്ഛനും നല്ലൊരു മരുമകളായി, എന്റെ അനിയത്തിക്ക് നല്ലൊരു ഏടത്തിയമ്മയായി അഭിനയിക്കണം, സാധിക്കോ നിനക്ക്"

രേഷ്മ തലയാട്ടി സമ്മതിച്ചു 

"ഞങ്ങൾക്ക് വേണ്ടി ഇത്രയൊക്കെ ചെയ്യുന്ന ഹരിയേട്ടന് തിരിച്ച് എന്ത് ചെയ്ത് തന്നാലും മതിയാവില്ല"

പിന്നീട് അങ്ങോട്ട് നടന്നതൊക്കെ വെറും നാടകം മാത്രമായിരുന്നു. ഹരിയുടെ വീട്ടുകാർക്ക് മുന്നിൽ അവർ നല്ല സ്നേഹമുള്ള ഭാര്യാ ഭർത്താക്കന്മാർ ആയി അഭിനയിച്ചു. ആർക്കും ഒരു സംശയവും തോന്നിയില്ല. ദിവസങ്ങൾ വേഗത്തിൽ കടന്നുപോയി. ഇതിനോടകം അവൾ വീട്ടിൽ എല്ലാവർക്കും പ്രിയപ്പെട്ടവൾ ആയി മാറിയിരുന്നു. അമ്മക്കും അച്ഛനും അനിയത്തിക്കും രേഷ്മയെ ഒരുപാട് ഇഷ്ടമായിരുന്നു. രേഷ്മ വീട്ടുകാരോട് കൂടുതൽ അടുക്കുമ്പോൾ ഹരിയുടെ നെഞ്ച് പിടയാറുണ്ട്, കാരണം അവൾ ഉണ്ണിയോടൊപ്പം അവന്റെ ഭാര്യയായി ജീവിക്കാനുള്ള പെണ്ണാണ്. ഇപ്പോ നടക്കുന്നതൊന്നും ശാശ്വതമല്ല എന്ന് വീട്ടുകാർ അറിയുമ്പോഴുള്ള അവസ്ഥ അവന് ഓർക്കാൻ കൂടി സാധിച്ചില്ല.

പിന്നീടുള്ള ഓരോ ദിവസവും ഹരിയുടെ ഹൃദയമിടിപ്പ് കൂട്ടി. ആറ് ദിവസം കഴിഞ്ഞാൽ ഉണ്ണി നാട്ടിൽ വരും. തന്റെ വീട്ടുകാർ ജീവനുതുല്യം സ്നേഹിക്കുന്ന രേഷ്മയെ അവൻ കൊണ്ടുപോവും. ആദ്യമൊക്കെ പേരിന് ഒരു ടെൻഷനോ സങ്കടോ വന്നാൽ സിഗരറ്റ് ആഞ്ഞു വലിച്ച് അതിന്റെ പുക പതുക്കെ പുറത്തേക്ക് വിടുമ്പോൾ ആ പുകയോടൊപ്പം സങ്കടോം ടെൻഷനും എല്ലാം പുറത്തേക്ക് പോയിരുന്നു. പക്ഷേ, രേഷ്മക്ക് കൊടുത്ത ഒറ്റ വാക്കുകൊണ്ട് ഹരി പിന്നെ സിഗരറ്റ് വലിച്ചിട്ടില്ല. 

ദിവസങ്ങൾ റോക്കറ്റിന്റെ വേഗത്തിൽ കടന്നുപോയി. ഉണ്ണി വരാൻ രണ്ട് ദിവസം മാത്രം. ഹരിയുടെ വീട്ടിലുള്ളവർക്കാണേൽ രേഷ്മ എന്ന്‌ വെച്ചാൽ ജീവനും ആണ്. അവളെ എല്ലാവർക്കും ഇഷ്ടമായിരുന്നു. രേഷ്മയും ഉണ്ണിയും തമ്മിലുള്ള ബന്ധം എങ്ങനെ വീട്ടിൽ പറഞ്ഞ് മനസ്സിലാക്കും, രണ്ട് ദിവസം കഴിഞ്ഞാൽ എല്ലാവരും ഇഷ്ടപ്പെടുന്ന രേഷ്മ ഉണ്ണിയോടൊപ്പം പോവും എന്ന്‌ എങ്ങനെയാ അമ്മയെയും അച്ഛനെയും പറഞ്ഞ് മനസിലാക്കുക എന്ന ചിന്ത അവനെ വല്ലാതെ അലട്ടി. തകർന്ന് പോവില്ലേ എല്ലാവരും...

ഉണ്ണി ദിവസവും അവൾക്ക് വിളിക്കാറുണ്ടായിരുന്നു. ഉണ്ണി വരുന്ന ദിവസം അടുക്കുന്തോറും അവളുടെ മുഖത്തെ സന്തോഷം കൂടിക്കൊണ്ടിരുന്നു. അന്ന് രാത്രി ഉണ്ണിയുമായി സംസാരിച്ച ശേഷം അവൾ ഹരിയെ നോക്കി 

"ഹരിയേട്ടാ, മറ്റെന്നാൾ രാവിലെ ഉണ്ണിയേട്ടൻ എയർപോർട്ടിൽ എത്തും. നമ്മൾ വീട്ടിൽ എന്താ പറയാ. ഹരിയേട്ടന്റെ അമ്മയെയും അച്ഛനെയും എങ്ങനാ പറഞ്ഞു സമാധാനിപ്പിക്കാ"

ഹരിയൊന്ന് പുഞ്ചിരിച്ചു 

"എന്റെയല്ലേ അച്ഛനും അമ്മയും അവർക്ക് മനസ്സിലാക്കാൻ പറ്റും. അവരുടെ മോൻ നല്ലതിന് വേണ്ടി മാത്രമേ എന്തും ചെയ്യൂ എന്ന് അവർക്ക് നന്നായി അറിയാം"

അവൾ ഒന്നും മിണ്ടിയില്ല. അവൻ അവളെ ആശ്വസിപ്പിച്ചു 

"ടീ ഉണ്ടക്കണ്ണീ, ഇപ്പൊ നിന്ന് സെന്റി അടിക്കാതെ ഉണ്ണിയേട്ടനെ കുറിച്ച് മാത്രം ചിന്തിക്ക്. അവനുമായി സന്തോഷത്തോടെ ജീവിക്കുന്നത് സ്വപ്നം കാണ്. അല്ലാതെ കുട്ടികളെ പോലെ സെന്റിയും അടിച്ച്"

ഒന്ന് നിറുത്തിയിട്ട് അവൻ തുടർന്നു 

"എന്തായാലും ഈ ഉണ്ടക്കണ്ണിയുടെ റോൾ ഈ താന്തോന്നിയുടെ ജീവിതത്തിൽ നിന്നും മറ്റന്നാൾ ഉണ്ണി വരുന്നതോടെ തീരും. പിന്നെ നിങ്ങളായി നിങ്ങളുടെ ജീവിതമായി. സന്തോഷായി ജീവിക്കണം"

ഹരിയുടെ കണ്ണ് നിറയുന്നത് രേഷ്മ ശ്രദ്ധിച്ചു 

"ഹരിയേട്ടാ, ഉറങ്ങിക്കോ. സമയം ഒരുപാടായി"

അവനൊന്നു മൂളി. പിറ്റേ ദിവസം ഒരുപാട് വൈകിയാണ് ഹരി എണീറ്റത്. ഓരോന്ന് ആലോചിച്ച് ഉറങ്ങാൻ ഒരുപാട് വൈകിയിരുന്നു അവൻ. രേഷ്മ വന്ന് അവനോട് ഒരു കാര്യം ആവശ്യപ്പെട്ടു 

"ഹരിയേട്ടാ, ഒന്ന് വേഗം കുളിച്ച് മാറ്റിവാ. നമുക്ക് ഒരിടം വരെ പോവാം"

"എങ്ങട്"

"അതൊക്കെ പറയാം... വാ"

അവൻ കുളിച്ചുമാറ്റി റെഡിയായി വന്നു. അവൾ വിളമ്പിക്കൊടുത്ത ഭക്ഷണം കഴിക്കാൻ തുടങ്ങി. അവൾ അവന്റെ അടുത്തുവന്നു നിന്നു. ഹരി അവളെ നോക്കി ഒന്ന് പുഞ്ചിരിച്ചു 

"ഇത് നിന്റെ കൈകൊണ്ടുള്ള അവസാനത്തെ വിളമ്പലാ അല്ലേ, നാളെ മുതൽ വീണ്ടും അമ്മയുടെ കൈകൾ തന്നെ ശരണം"

അവൾ ഒന്നും മിണ്ടിയില്ല. ഭക്ഷണം കഴിച്ചു കഴിഞ്ഞ് രണ്ടുപേരും ബുള്ളറ്റിൽ കയറി. ഹരി അവളെയൊന്നു നോക്കി 

"പറ എവിടെക്കാ പോവേണ്ടെ"

അവൾ ഒന്നും മിണ്ടിയില്ല. അവൻ ചോദ്യം വീണ്ടും ആവർത്തിച്ചു. അവൾ പതുക്കെ അവന്റെ തോളിൽ കൈവെച്ചു 

"ഇന്ന് ഇരുട്ടുന്നവരെ എനിക്ക് ഹരിയേട്ടന്റെ കൂടെ ഇങ്ങനെ യാത്ര ചെയ്യണം"

അവൻ ശരി എന്ന്‌ തലയാട്ടി. സന്തോഷമായിരുന്നു ആ പാവത്തിന്റെ മനസ്സ് നിറയെ. ഒരിക്കലും കിട്ടില്ല എന്നറിഞ്ഞിട്ടും... പിന്നെയൊരു പോക്കായിരുന്നു അവൻ. അന്നവർ ബീച്ചിൽ പോയി, പാർക്കിൽ പോയി, സിനിമക്ക് പോയി, റെസ്റ്റോറന്റിൽ നിന്നും ഭക്ഷണം കഴിച്ചു. അന്നത്തെ ദിവസം ഹരിയൊരു കാര്യം ശ്രദ്ധിച്ചിരുന്നു, ഇതുവരെ ഇത്രേം സന്തോഷം അവൻ അവളുടെ മുഖത്ത് കണ്ടിട്ടില്ല. അത്രെയും സന്തോഷത്തിലായിരുന്നു അവൾ. അന്ന് ഒരുപാട് വൈകിയാണ് അവർ വീട്ടിലെത്തിയത്.

മുറിയിൽ കയറിയതും അവളുടെ മുഖത്തെ സന്തോഷം മാറിവരുന്നത് അവൻ ശ്രദ്ധിച്ചു

"എന്തുപറ്റി ഉണ്ടക്കണ്ണീ"

അവൾ ഒന്നും മിണ്ടിയില്ല. ഹരി അവളെയൊന്നു നോക്കി 

"അപ്പോ നാളെ മുതൽ ഞാൻ ഈ റൂമിൽ തനിച്ച്, എന്റെ ഉണ്ടക്കണ്ണി നാളെ ഉണ്ണിയോടൊപ്പം ബൈ ബൈ പറഞ്ഞു പോവും അല്ലേ"

രേഷ്മ ഹരിയുടെ കണ്ണിലേക്ക് നോക്കി. ഒലിച്ചിറങ്ങുന്ന കണ്ണീരിനെ തുടച്ചുമാറ്റാൻ പാടുപെടുകയായിരുന്നു ആ പാവം

"ഹരിയേട്ടാ, എന്തിനാ എന്നെ ഇങ്ങനെ സ്നേഹിക്കണേ"

ഹരി ഒന്നും മിണ്ടിയില്ല. അവന്റെ ചങ്ക് പിടക്കായിരുന്നു അപ്പോൾ. അവൾ അവന്റെ അടുത്ത് ചെന്നു 

"ഒരു പെണ്ണിന് ഒരു പുരുഷൻ കൊടുക്കാൻ പറ്റുന്നതിന്റെ ആയിരം മടങ്ങ് സ്നേഹം ആ മനസ്സിൽ എനിക്കു വേണ്ടി ഒളിപ്പിച്ചു വെച്ചിരിക്കുന്നത് എനിക്ക് കാണാൻ പറ്റും. സത്യായിട്ടും ഉണ്ണിയേട്ടൻ എന്റെ ജീവിതത്തിൽ വന്നില്ലായിരുന്നു എങ്കിൽ ഈ താന്തോന്നിക്ക് അതിന്റെ ആയിരം മടങ്ങ് സ്നേഹം ഞാൻ തിരിച്ചു നൽകിയേനെ"

അവൻ രേഷ്മയുടെ കണ്ണിലേക്ക് നോക്കി 

"രേഷ്മ, ഞാനൊരു സിഗരറ്റ് വലിക്കട്ടെ"

അവൾ തലയാട്ടി സമ്മതം അറിയിച്ചു. അവന്റെ കൈകൾ വിറക്കുന്നുണ്ടായിരുന്നു. വിറക്കുന്ന കൈകൾ കൊണ്ട് ചുണ്ടിലെ സിഗരറ്റ് കത്തിച്ചു, എന്നിട്ട് അവളെ നോക്കി 

"നീ ഉണ്ണിയെ കുറിച്ച് പറഞ്ഞപ്പോൾ തന്നെ ആയിരം വട്ടം ഞാൻ മനസ്സിൽ ഉറപ്പിച്ചതാണ്, ഒരിക്കലും നിന്നെ സ്വന്തമാക്കാൻ തോന്നരുത് എന്ന്. പക്ഷേ പറ്റാഞ്ഞിട്ടാ, മനസ്സീന്ന് എടുത്ത് കളയാൻ അങ്ങട് പറ്റണില്ല"

ഒന്ന് നിറുത്തിയിട്ട് ഒന്ന് ചിരിക്കാൻ ശ്രമിച്ചു അവൻ 

"അതൊന്നും സാരല്ല, നീ പോയി കുറച്ചു കഴിയുമ്പോൾ ഞാൻ ഓക്കേ ആവും, ഉറപ്പാ. നീ ഉണ്ണിയോടൊപ്പം അടിച്ചു പൊളിച്ച് ജീവിക്കുമ്പോൾ എപ്പോഴെങ്കിലും എന്നെ ഓർക്കോ"

അതുവരെ അടക്കി പിടിച്ചിരുന്ന രേഷ്മക്ക് നിയന്ത്രിക്കാൻ സാധിച്ചില്ല. അവൾ പൊട്ടിക്കരഞ്ഞു. ഹരി അവളെ ആശ്വസിപ്പിച്ചു. നാളെ രാവിലെ അഞ്ചുമണിക്കുള്ള ഫ്ലൈറ്റിൽ ഉണ്ണി പറന്നെത്തും.

........................................................................... 

ഹരി പറയുന്നത് കേട്ടോണ്ടിരുന്ന മീനാക്ഷി അവന്റെ കണ്ണിലേക്ക് നോക്കി 

"എന്നിട്ട്"

ഹരി അവളെ നോക്കി പുഞ്ചിരിച്ചു 

ഭാഗം 6👇👇👇

ഹരി പറയുന്നത് കേട്ടോണ്ടിരുന്ന മീനാക്ഷി അവന്റെ കണ്ണിലേക്ക് നോക്കി 

"എന്നിട്ട്"

ഹരി മീനാക്ഷിയെ നോക്കി പുഞ്ചിരിച്ചു, എന്നിട്ട് തുടർന്നു

...........................................................................

അതുവരെ അടക്കി പിടിച്ചിരുന്ന രേഷ്മക്ക് നിയന്ത്രിക്കാൻ സാധിച്ചില്ല. അവൾ പൊട്ടിക്കരഞ്ഞു. ഹരി അവളെ ആശ്വസിപ്പിച്ചു. നാളെ രാവിലെ അഞ്ചുമണിക്കുള്ള ഫ്ലൈറ്റിൽ ഉണ്ണി പറന്നെത്തും.

രണ്ടുപേരും കിടന്നു. പക്ഷേ അവർക്ക് ഉറങ്ങാൻ സാധിച്ചില്ല. ഹരിയുടെ നെഞ്ച് പൊട്ടി പൊളിഞ്ഞു പോവുന്നത് പോലെ തോന്നി. രേഷ്മക്ക് കരച്ചിൽ നിർത്താൻ സാധിച്ചില്ല, അവൾ തേങ്ങി തേങ്ങി കരഞ്ഞു. കുറച്ച് സമയം കഴിഞ്ഞപ്പോൾ അലാറത്തിന്റെ ശബ്ദം രണ്ടുപേരുടെയും കാതിൽ മുഴങ്ങി. സമയം രാവിലെ നാല് മണി. ഹരിയുടെ ഹൃദയം പെടപെടാന്ന് ഇടിക്കാൻ തുടങ്ങി. രണ്ടുപേരും എണീറ്റ് പരസ്പ്പരം നോക്കി

"രേഷ്മാ, പെട്ടെന്ന് കുളിച്ച് റെഡിയാവ്,  സമയമായി"

നിറഞ്ഞ കണ്ണുകളോടെ ഹരിയെ നോക്കി അവൾ. ഹരി അവളെ നോക്കി പുഞ്ചിരിച്ചു. എന്നിട്ട് തോർത്തും എടുത്തോണ്ട് കുളിക്കാൻ പോയി.

കുറച്ചു സമയത്തിന് ശേഷം രണ്ടുപേരും കുളിച്ചു മാറ്റി റെഡിയായി, പുറത്തിറങ്ങി. വീട്ടിൽ അമ്പലത്തിലേക്കാണ് എന്ന്‌ പറഞ്ഞാണ് പോവുന്നത്. ഹരി കാറിൽ കയറി, സ്റ്റാർട്ട്‌ ചെയ്തു. കാറിൽ കയറാൻ നേരം വീടും മുറ്റവും എല്ലാം അവൾ കുറച്ചു സമയം നോക്കി നിന്നു. അവളോട്‌ വേഗം കാറിൽ കയറാൻ ഹരി ആവശ്യപ്പെടുന്നുണ്ടായിരുന്നു. പക്ഷേ, ആ സമയത്ത് അവൾ അതൊന്നും ശ്രദ്ധിക്കുന്നുണ്ടായിരുന്നില്ല. അവളുടെ മനസ്സ് മുഴുവൻ അമ്മയും, അച്ഛനും, അനിയത്തിയും പിന്നെ ഹരിയുടെ കുസൃതികളും, താന്തോന്നിത്തരങ്ങളും നിറഞ്ഞിരുന്ന ആ വീട് മാത്രമായിരുന്നു. ഇനി ഒരിക്കലും ഒരു തിരിച്ചുവരവില്ലാത്ത ഹരിയുടെ വീടിന്റെ കുറേ നല്ല ഓർമകൾ മാത്രം മനസ്സിലിട്ട് അവൾ പതിയെ കാറിൽ കയറിയിരുന്നു. നിറഞ്ഞൊഴുകുന്നുണ്ടായിരുന്നു അവളുടെ കണ്ണുകൾ.

എയർപോർട്ടിലേക്കുള്ള ദൂരം അടുക്കുന്തോറും ഹരിയുടെ ഹൃദയമിടിപ്പ് കൂടാൻ തുടങ്ങി. എയർപോർട്ട് എത്തുന്നത് വരെ രണ്ടുപേരും പരസ്പ്പരം ഒന്നും മിണ്ടിയില്ല. ഇടയ്ക്കിടെ മുഖത്തോട് മുഖം നോക്കുക മാത്രം ചെയ്തു. കാർ പാർക്ക് ചെയ്ത് രണ്ടുപേരും ഉണ്ണിയുടെ വരവും കാത്ത് നിന്നു. ഉണ്ണി വരുന്നതിന്റെ സന്തോഷവും അതോടൊപ്പം ഹരിയേയും വീട്ടുകാരെയും എന്നന്നേക്കുമായി നഷ്ടപെടുന്നതോർത്തുള്ള സങ്കടവും അവളുടെ മുഖത്ത് മാറി മറിഞ്ഞു. കുറച്ചു സമയത്തിന് ശേഷം എസ്‌കുലേറ്റർ വഴി ഇറങ്ങി വരുന്ന ഉണ്ണിയെ അവൾ ഹരിക്ക് കാണിച്ചു കൊടുത്തു. സുന്ദരൻ, ട്രിം ചെയ്ത താടിയും മീശയും. 

എയർപോർട്ടിന് പുറത്തിറങ്ങിയ ഉണ്ണി രേഷ്മയെ ആലിംഗനം ചെയ്ത് നെറ്റിയിൽ ഉമ്മവെച്ചു. ആ സമയം ഇടങ്കണ്ണിട്ട് അവൾ ഹരിയെ നോക്കി, അവൻ ഒന്ന് പുഞ്ചിരിച്ചു. ഉണ്ണി ഹരിയെ കെട്ടിപ്പിച്ച് തങ്ങൾക്ക് ചെയ്തുതന്നെ ഉപകാരത്തിന് നന്ദി പറഞ്ഞു. ഉണ്ണിയുടെ കണ്ണീർ തുള്ളികൾ ഹരിയുടെ ഷർട്ടിൽ പതിഞ്ഞു. ഹരി അവനെ ചേർത്ത് പിടിച്ചു

"ഉണ്ണി, ഒന്നുകൊണ്ടും പേടിക്കേണ്ട. എല്ലാം ശരിയാവും. ഞാനുണ്ട് കൂടെ"

രേഷ്മ ഹരിയെ ദയനീയമായി ഒന്ന് നോക്കി, അവളുടെ കണ്ണുകൾ നിറഞ്ഞൊഴുകുന്നുണ്ടായിരുന്നു. ഹരി രണ്ടുപേരെയും നോക്കി

"ബാംഗ്ലൂരിൽ നിങ്ങൾക്ക് താമസിക്കാനുള്ള എല്ലാ സൗകര്യങ്ങളും ഞാൻ ശരിയാക്കിയിട്ടുണ്ട്. അവിടെ എന്റെ ഒരു കൂട്ടുകാരൻ ഉണ്ട്‌. അവനെ വിളിച്ച് ഞാൻ എല്ലാം പറഞ്ഞിട്ടുണ്ട്. ഉണ്ണിക്ക് ഒരു ജോലിയും അവിടെ ശരിയാക്കിയിട്ടുണ്ട്"

ഒന്ന് നിറുത്തിയിട്ട് ഹരി തുടർന്നു 

"ഈ ഒരു അവസ്ഥയിൽ രേഷ്മയുടെ വീട്ടുകാരെ കാര്യങ്ങൾ പറഞ്ഞു മനസിലാക്കുക ബുദ്ധിമുട്ടുള്ള കാര്യമാണ്. വീട്ടുകാർ മാത്രമല്ല ഈ സമൂഹം തന്നെ നിങ്ങളെ എതിർക്കും. എല്ലാവരുടേയും കണ്ണിൽ ഈ താന്തോന്നിയുടെ മോശം സ്വഭാവം കൊണ്ട് ഭാര്യ വേറൊരുത്തന്റെ കൂടെ പോയി എന്നായിരിക്കട്ടെ വാർത്ത. നമ്മൾ വാർത്തകളിൽ ഒക്കെ കാണാറില്ലേ, അങ്ങനെയൊരു വാർത്തയായി സമൂഹം ഇതിനെ കാണട്ടെ. വേറൊരു വാർത്ത കിട്ടിയാൽ അവർ ഇത് മറക്കും. നിങ്ങൾക്ക് ഒരു കുട്ടിയൊക്കെയായാൽ രേഷ്മയുടെ വീട്ടുകാരുടെ വാശിയൊക്കെ അങ്ങ് പോവും. പിന്നെ, ഈ നാട്ടിൽ തന്നെ ജീവിക്കുന്നത് കൊണ്ട് എനിക്ക് ചില പരിഹാസങ്ങൾ ഒക്കെ നേരിടേണ്ടി വരും. അത് നിങ്ങൾക്ക് വേണ്ടി ഞാനങ്ങട് സഹിച്ചു"

ഹരി അവരെ കാറിലിരുത്തി റെയിൽവേ സ്റ്റേഷനിലേക്ക് യാത്ര തിരിച്ചു. ബാംഗ്ലൂരിലേക്കുള്ള ടിക്കറ്റ് നേരത്തെ ബുക്ക്‌ ചെയ്തിരുന്നു. ട്രെയിൻ വരാൻ ഇനിയും നാല്പത് മിനിറ്റ് ബാക്കിയുണ്ട്. അവർ മൂന്നുപേരും കൂടെ റെയിൽവേ സ്റ്റേഷന് അടുത്തുള്ള ഹോട്ടലിൽ ഭക്ഷണം കഴിക്കാൻ കയറി. ഹരിയുടെ തൊണ്ടയിൽ നിന്നും ഭക്ഷണം ഇറങ്ങിയില്ല. ഉള്ളിൽ പൊട്ടിക്കരയുകയായിരുന്നെങ്കിലും പുറത്ത് അവൻ അതൊന്നും കാണിച്ചില്ല. ചിരിച്ച മുഖത്തോടെ അവൻ അവരെ യാത്രയാക്കി. ഒടുവിലായി ഹരി ഉണ്ണിയെ നോക്കി അവന്റെ തോളിൽ കൈവെച്ചു

"വീട്ടുകാരെ എതിർത്ത് നിന്നോടുള്ള സ്നേഹം കൊണ്ട് മാത്രം അവൾ കൂടെ വരാണ്. ഒരിക്കലും ആ കണ്ണ് നിറയാൻ അനുവദിക്കരുത്. എപ്പോഴും നെഞ്ചോട് ചേർത്ത് പിടിക്കണം, പാവാണ്"

ഹരി രേഷ്മയെ നോക്കി 

"രേഷ്മാ, ന്നാ ഞാൻ പോട്ടെ ട്ടോ, സമയം കിട്ടുമ്പോഴൊക്കെ വിളിക്കണം. ഒരിക്കലും മറക്കില്ല"

ഇത്രേം പറഞ്ഞ് ഹരി നടന്നുനീങ്ങി. ഹരി പോവുന്നത് അവൾ നോക്കി നിന്നു. പെട്ടന്നാണ് ഹരിയുടെ കൂട്ടുകാരൻ പിറകീന്ന് വിളിക്കുന്നത് 

"ടാ ഹരി"

ഹരി തിരിഞ്ഞുനോക്കി, കൂട്ടുകാരനെ നോക്കി പുഞ്ചിരിച്ചു. കൂട്ടുകാരൻഒരു സിഗരറ്റ് ചുണ്ടിൽ വെച്ച് കത്തിച്ചു. എന്നിട്ട് ഒരു സിഗരറ്റ് ഹരിക്കും നീട്ടി 

"വയറു നിറച്ച് ഫുഡ് അടിച്ച് ഇത് വലിക്കുമ്പോൾ ഉള്ള സുഖം ഒന്ന് വേറെ തന്നെയാ. കത്തിച്ച് വലിക്കെടാ"

ഹരി കൂട്ടുകാരനെ നോക്കി ഒന്ന് പുഞ്ചിരിച്ചു, എന്നിട്ട് സിഗരറ്റ് അവന് തിരിച്ചുകൊടുത്തു, എന്നിട്ട് അവൻ മനസ്സിൽ മന്ത്രിച്ചു

"ജീവിതത്തിൽ ഒരിക്കലും അനുഭവിച്ചിട്ടില്ലാത്ത ലഹരി തന്നാണ് അവൾ എന്നെ വിട്ട് പോയത്, ആ ലഹരിയോളം വരില്ല വേറെ ഒരു ലഹരിയും. ഇനിയുള്ള കാലം ഞാൻ ആ ലഹരിയിൽ മുഴുകി ജീവിക്കട്ടെ"

...........................................................................

മീനാക്ഷി ഹരിയെ നോക്കി 

"രേഷ്മേച്ചിക്ക് ഇപ്പോ സുഖല്ലേ"

"സുഖാണ്, ഇപ്പോൾ അവൾ ഗർഭിണിയാണ്. എനിക്ക് ഇടക്കിടെ വിളിക്കാറുണ്ട്. ഉണ്ണി അവളെ പൊന്നുപോലെ നോക്കുന്നുണ്ട്"

ഒന്ന് നിർത്തിയിട്ട് അവൻ തുടർന്നു 

"നിന്നെ കുറിച്ച് ഞാൻ പറഞ്ഞിട്ടുണ്ടായിരുന്നു. അവളും പറഞ്ഞു നിനക്ക് ഒരു കുഴപ്പവും ഉള്ളതായി അറിയില്ല എന്ന്"

മീനാക്ഷി ഹരിയുടെ കണ്ണിലേക്ക് നോക്കി. അവൻ അവളെ ചേർത്ത് പിടിച്ചു 

"നിന്റെ ജീവിതത്തിൽ നിനക്ക് മാത്രം അറിയാവുന്ന എന്തോ ഒരു ഇൻസിഡന്റ് നടന്നിട്ടുണ്ട്. നീ എന്റെ ഭാര്യ ആവുന്നത് വരെ അത് നിന്റെ മാത്രം പ്രശ്നം ആയിരുന്നു. ഇപ്പോൾ അത് എന്റേയും കൂടെ പ്രശ്നമാണ്"

ഒന്ന് നിറുത്തിയിട്ട് ഹരി അവളുടെ കണ്ണിലേക്ക് നോക്കി 

"പറ, നിനക്ക് ആരോടെങ്കിലും പ്രതികാരം ചെയ്യാൻ തോന്നുന്നുണ്ടോ, എന്തിനും ഞാൻ ഉണ്ടാവും കൂടെ. എനിക്ക് നിന്നെ വേണം ഇതുപോലെ ജീവിതകാലം മുഴുവൻ. പറ നിന്റെ മനസ്സിൽ ഉള്ളത് മുഴുവൻ എന്നോട് പറ, അവനെ നിന്റെ കാൽകീഴിൽ കൊണ്ട് ഇട്ടുതരാം ഞാൻ"

മീനാക്ഷിയുടെ മുഖം ചുവന്ന് വിറച്ചു 

"ഉണ്ട് ഹരിയേട്ടാ, എന്നോട് ചെയ്തത് പോലെ അവൻ ഇനി ആരോടും ചെയ്യാൻ പാടില്ല. അവനെ ഈ സമൂഹം ഒറ്റപ്പെടുത്തണം, കല്ലെറിഞ്ഞ് ഓടിക്കണം"

"ആരാണവൻ...? എന്താണ് അവൻ നിന്നോട് ചെയ്തത്...? 

മീനാക്ഷിയുടെ ഹൃദയം പെടപെടാന്ന് ഇടിച്ചു. അവൾ ഹരിയെ നോക്കി 

"ഹരിയേട്ടനെ കൊണ്ട് എന്നെ കല്യാണം കഴിപ്പിച്ച് എന്നെന്നേക്കുമായി അവന്റെ കാൽകീഴിൽ എന്നെ തളച്ചിടാൻ നോക്കിയ മഹേഷേട്ടൻ എന്ന ചെറ്റ"

അവളുടെ വാക്കുകൾ കേട്ടപ്പോൾ ഷോക്കേറ്റത് പോലെ തോന്നി ഹരിക്ക് 

"നമ്മുടെ മഹേഷേട്ടനോ"

അടുത്തത് താന്തോന്നിയുടെ അടിയുടെ ഇടിയുടെ വെടിയുടെ ക്ലൈമാക്സ്‌ 

അവസാന ഭാഗം👇👇👇

"ആരാണവൻ...? എന്താണ് അവൻ നിന്നോട് ചെയ്തത്...? 

മീനാക്ഷിയുടെ ഹൃദയം പെടപെടാന്ന് ഇടിച്ചു. അവൾ ഹരിയെ നോക്കി 

"ഹരിയേട്ടനെ കൊണ്ട് എന്നെ കല്യാണം കഴിപ്പിച്ച് എന്നെന്നേക്കുമായി അവന്റെ കാൽകീഴിൽ എന്നെ തളച്ചിടാൻ നോക്കിയ മഹേഷേട്ടൻ എന്ന ചെറ്റ"

അവളുടെ വാക്കുകൾ കേട്ടപ്പോൾ ഷോക്കേറ്റത് പോലെ തോന്നി ഹരിക്ക് 

"നമ്മുടെ മഹേഷേട്ടനോ...?"

മീനാക്ഷി ഹരിയുടെ കണ്ണിലേക്ക് നോക്കി 

"അതെ, അവൻ തന്നെ, എല്ലാ നാട്ടിലും കാണും മറ്റുള്ളവരുടെ വീട്ടിലെ അടുക്കളയിൽ വരെ കയറി വരാൻ ഒരു മടിയും കാണിക്കാതെ എല്ലാവരോടും മുഖത്ത് പുഞ്ചിരി വിടർത്തി സംസാരിക്കുന്ന ഒരുത്തൻ"

മീനാക്ഷി ഹരിയെ നോക്കി സംസാരിച്ചു തുടങ്ങി 

...........................................................................

മഹേഷിന്റെ അച്ഛന്റെ തറവാട്ടിലാണ് അവൻ ജനിച്ചതും വളർന്നതും എല്ലാം. മീനാക്ഷിയുടെ വീടിന്റെ തൊട്ടടുത്താണ് അവന്റെ അച്ഛന്റെ തറവാട്. പിന്നീട് മഹേഷിന്റെ അച്ഛൻ വേറെ വീടെടുത്ത് ഹരിയുടെ നാട്ടിലേക്ക് മാറിയെങ്കിലും, മഹേഷ്‌ ഇടക്കിടെ തറവാട്ടിൽ വരാറുണ്ടായിരുന്നു. തറവാട്ടിൽ പ്രായമായ ഹരിയുടെ മുത്തശ്ശനും മുത്തശ്ശിയും മാത്രമേ ഒള്ളൂ. മീനാക്ഷിയും കൂട്ടുകാരും ടീവി കാണാൻ പോയിരുന്നത് മഹേഷിന്റെ തറവാട്ടിലേക്കായിരുന്നു. അന്നത്തെ കാലത്ത് ഇന്നത്തെ പോലെ എല്ലാ വീട്ടിലും ടീവിയൊന്നും ഉണ്ടായിരുന്നില്ല.

മീനാക്ഷി ഒന്നാം ക്ലാസ്സിൽ പഠിക്കുമ്പോൾ മഹേഷിന് പ്രായം ഇരുപത്തഞ്ച് കഴിഞ്ഞിരുന്നു. മീനാക്ഷിയും കൂട്ടുകാരും ടീവി കാണാൻ ചെല്ലുമ്പോൾ ചില ദിവസങ്ങളിൽ മഹേഷ്‌ അവിടെ ഉണ്ടാവാറുണ്ട്. അവളുടെ കവിളിൽ പിടിച്ച് നുള്ളുക, കെട്ടിപ്പിച്ച് കവിളിൽ കടിക്കുക, ബലമായി പിടിച്ച് മടിയിൽ ഇരുത്തുക ഇതൊക്കെയായിരുന്നു മീനാക്ഷി ടീവി കാണാൻ ചെല്ലുമ്പോൾ മഹേഷിൽ നിന്നും നേരിടേണ്ടി വന്നിരുന്നത്. പക്ഷേ അന്ന് മീനാക്ഷിക്ക് അതിന്റെയൊന്നും അർഥം തിരിച്ചറിയാനുള്ള പ്രായം ആയിരുന്നില്ല.

മീനാക്ഷിയുടെ വീട്ടിൽ മഹേഷ്‌ ഇടക്കിടെ ചെല്ലാറുണ്ട്. അമ്മയുടേയും അച്ഛന്റേയും മുന്നിൽ വെച്ച് അയാൾ അവളെ കെട്ടിപ്പിടിക്കുകയും ഉമ്മ വെക്കുകയും ഒക്കെ ചെയ്യാറുണ്ട്. പക്ഷേ വീട്ടുകാർ കരുതിയിരുന്നത് മഹേഷ്‌ തന്റെ വാത്സല്യം മോളോട് കാണിക്കുകയാണ് എന്നാണ്. അവർ ഇടക്കിടെ പറയാറുണ്ടായിരുന്നു 

"മീനൂട്ടിന്ന് വെച്ചാ മഹേഷിന് ജീവനാ, സ്വന്തം കൂടപ്പിറപ്പിനെ പോലെയാ അവൻ അവളെ സ്നേഹിക്കുന്നെ"

പക്ഷേ അവന് വാത്സല്യമായിരുന്നില്ല അവളോട്‌ തോന്നിയിരുന്നത്. കാമമായിരിന്നു, ഒരു പേപിടിച്ച നായയുടെ മനസ്സായിരുന്നു അവന്റേത്. പത്തിരുപത്തഞ്ച് വയസ്സുള്ള മഹേഷ്‌ അഞ്ച് വയസുള്ള മീനാക്ഷിയെ കെട്ടിപിടിക്കുന്നതും ഉമ്മ വെക്കുന്നതും പിടിച്ച് മടിയിൽ ഇരുത്തുന്നതും ഒന്നും ആരും തെറ്റിദ്ധരിച്ചില്ല, മറിച്ച് അത് അവളോടുള്ള മഹേഷിന്റെ വാത്സല്യമായി എല്ലാവരും കണ്ടു. അത്യാവശ്യം രാഷ്ട്രീയവും സാമൂഹിക പ്രവർത്തനവും ഒക്കെ ഉള്ളതിനാൽ അവന് നാട്ടിൽ നല്ല പേരായിരുന്നു. എല്ലാവരുടേയും കണ്ണിൽ മഹേഷ്‌ ഒരു നന്മ മരമായിരുന്നു.

ഒരുദിവസം മീനാക്ഷി ടീവി കാണാൻ തനിച്ചാണ് പോയത്. അപ്പോൾ അവിടെ മഹേഷ്‌ മാത്രമേ ഉണ്ടായിരുന്നുള്ളൂ. മുത്തശ്ശിയും മുത്തശ്ശനും ഹോസ്പിറ്റലിൽ പോയതായിരുന്നു. മഹേഷ്‌ തനിച്ചാണെന്ന് മനസ്സിലാക്കിയ അവൾ തിരിച്ച് പോവാനൊരുങ്ങിയപ്പോൾ അവൻ പിറകിൽ നിന്നും വിളിച്ചു

"മീനൂട്ടി പോവാണോ...? നല്ല കാർട്ടൂൺ ഉണ്ട് ടീവിയിൽ. വാ കാണിച്ചു തരാം"

അവൾ മഹേഷിനെ നോക്കി നുണക്കുഴി കാണിച്ച് പുഞ്ചിരിച്ചു. മീനാക്ഷിക്ക് ഒരുപാട് സന്തോഷമായി, കാരണം കാർട്ടൂൺ എന്ന് വെച്ചാൽ അവൾക്ക് ജീവനാണ്. അവൾ വേഗം വീടിനകത്ത് കയറി ടീവിക്ക് മുന്നിൽ തറയിൽ ഇരുന്നു. നല്ല കാർട്ടൂൺ ഇട്ടുകൊടുത്ത് ആ പിഞ്ചു പൈതലിനെ അവൻ ആകർഷിപ്പിച്ചു. അവൾ കാർട്ടൂൺ കണ്ട് കൈകൾ കൊട്ടി പൊട്ടിച്ചിരിച്ചു. പെട്ടന്ന് അവൻ ആ പൈതലിനെ പിടിച്ച് മടിയിൽ ഇരുത്തി

"മോള് നിലത്തിരിക്കേണ്ട ട്ടോ, മഹേഷേട്ടന്റെ മടിയിൽ ഇരുന്ന് ടീവി കണ്ടോ"

അവൾ തലയാട്ടി സമ്മതിച്ചു. അവനിലെ പേനായ ഉണർന്ന സമയമായിരുന്നു അത്. അവൾ കാർട്ടൂൺ കണ്ട് പൊട്ടിച്ചിരിക്കുന്ന സമയത്ത് മഹേഷ്‌ എന്ന പേനായ ആ പിഞ്ചു പൈതലിന്റെ ശരീരത്തിൽ അവന്റെ നശിച്ച കാമത്തിനുള്ള ശമനം തേടുകയായിരുന്നു. പെട്ടന്ന് അവൻ അവളെ പൊക്കിയെടുത്ത് തന്റെ മുറിയിലേക്ക് കൊണ്ടുപോയി. അവൾ തടയാൻ ശ്രമിച്ചെങ്കിലും ആ പിഞ്ചു പൈതലിനെ അവൻ വരുതിയിലാക്കി. പിന്നീട് നടന്നത് അവന്റെ ഉള്ളിലെ പേനയായുടെ കാമകൂത്ത് ആയിരുന്നു. അവളുടെ ശരീരത്തിൽ സിഗരറ്റ് വെച്ച് വേദനിപ്പിച്ച് കരയിപ്പിച്ച് ആ പിഞ്ചു പൈതലിന്റെ കരച്ചിലിൽ അവൻ ആനന്ദം കണ്ടെത്തി.

കുറച്ച് സമയത്തിന് ശേഷം മീനാക്ഷിയുടെ നിലത്ത് കിടക്കുന്ന ഉടുപ്പ് എടുത്ത് നീട്ടി അവൻ അവളുടെ കണ്ണിലേക്ക് നോക്കി

"ന്നാ, ഈ ഉടുപ്പ് ഇട്ടിട്ട് അവിടെ പോയിരുന്ന് ടീവി കണ്ടോ, ഇപ്പൊത്തന്നെ വീട്ടിൽ പോവേണ്ട"

അവൾ തന്റെ വിറക്കുന്ന കൈകൾ കൊണ്ട് ആ ഉടുപ്പ് മേടിച്ചു. എന്നിട്ട് വേഗം അത് ഉടുത്ത് അവൻ പറഞ്ഞതുപോലെ ടീവിക്ക് മുന്നിൽ പോയിരുന്നു. കുറച്ചു സമയത്തിന് ശേഷം അവൻ അവളുടെ അടുത്ത് വന്നു 

"വീട്ടിൽ പൊക്കോ"

വേഗം എണീറ്റ് വീട്ടിൽ പോവാനൊരുങ്ങിയ അവളുടെ കണ്ണിലേക്ക് തന്റെ ചോരക്കണ്ണു കൊണ്ട് തുറിച്ചു നോക്കി അവൻ പറഞ്ഞു 

"ഇവിടെ നടന്നത് എങ്ങാനും നീ ആരോടെങ്കിലും പറഞ്ഞാൽ, കയ്യും കാലും വെട്ടി പിച്ചക്കാർക്ക് കൊടുക്കും ഞാൻ"

ആരോടും പറയില്ല എന്ന അർഥത്തിൽ തലയാട്ടി ആ പിഞ്ചു പൈതൽ വേഗം വീട്ടിലേക്ക് പോയി. പിറ്റേദിവസം അവൾക്ക് നന്നായി പനിച്ചു. ഡോക്ടർ പറഞ്ഞു പേടിപ്പനി ആണെന്ന്. ആര് എന്ത് ചോദിച്ചിട്ടും അവൾ ഒന്നും മിണ്ടിയില്ല. അതിന് ശേഷം സ്വന്തം അച്ഛൻ വരെ ശരീരത്തിൽ തൊടുന്നത് അവൾക്ക് പേടിയായി. മഹേഷ്‌ വീട്ടിലേക്ക് വരുമ്പോൾ അവൾ ഓടി ഒളിക്കാൻ തുടങ്ങി. അവൾ ഡിഗ്രിക്ക് പഠിക്കുന്ന സമയത്ത് ഒരിക്കൽ മഹേഷ്‌ അവളെ വഴിയിൽ വെച്ച് കണ്ടു. അവൻ അവളെ അടിമുടിയൊന്ന് നോക്കി 

"നീയങ്ങു കൊഴുത്തുപോയല്ലോ പെണ്ണേ"

അതും പറഞ്ഞ് അവൻ ഒരു കള്ളച്ചിരി ചിരിച്ചു 

"പഴയതൊക്കെ ഓർമ ഉണ്ടല്ലോ അല്ലേ, ഹോ!!! എനിക്കത് മറക്കാനേ വയ്യ. വല്ലപ്പോഴും എന്റെ ഓഫീസിൽ ഒക്കെ ഒന്ന് വന്നിട്ട് പോ, അവിടെ ഞാൻ മാത്രേ ഉണ്ടാവൂ"

അവൾ ഒന്നും മിണ്ടാതെ തലയും താഴ്ത്തി നടന്നുനീങ്ങി. അത് കഴിഞ്ഞ് രണ്ട് മൂന്ന് വർഷം കഴിഞ്ഞാണ് ഹരിയുമായുള്ള കല്യാണം മഹേഷ്‌ ഉണ്ടാക്കുന്നത്. പക്ഷേ കല്യാണത്തിന്റെ അന്ന് വരെ മഹേഷ്‌ ഉണ്ടാക്കിയ കാര്യമാണ് ഇതെന്ന് അവൾക്ക് അറിയില്ലായിരുന്നു. മഹേഷ്‌ വീട്ടുകാരോട് പല കള്ളങ്ങളും പറഞ്ഞ് താനാണ് കല്യാണകാര്യം ഉണ്ടാക്കിയത് എന്ന് അവൾ അറിയേണ്ട എന്ന് പറഞ്ഞു വെച്ചിരുന്നു. കല്യാണത്തിന് ശേഷം ഹരിക്ക് ഗൾഫിൽ ഒരു വിസ ശരിയാക്കി പറഞ്ഞയച്ച് മീനാക്ഷിക്ക് തന്റെ ഓഫീസിൽ ജോലി കൊടുത്ത് അവളെ എന്നെന്നേക്കുമായി തന്റെ വരുതിയിൽ ആക്കാനായിരുന്നു മഹേഷിന്റെ പ്ലാൻ. 

.........................................................................

മീനാക്ഷി പറഞ്ഞ് അവസാനിപ്പിച്ചതും ഹരി തന്റെ മുണ്ട് മടക്കിക്കുത്തി മഹേഷിനെ ഫോണിൽ വിളിച്ചതും ഒരുമിച്ചായിരുന്നു 

"മഹേഷേട്ടാ, മീനാക്ഷിക്ക് ഒരേ നിർബന്ധം ഹരിയേട്ടനെ വീട്ടിൽ വിളിച്ച് ഒന്ന് സൽക്കരിക്കാൻ"

അപ്പുറത്ത് ഫോണിൽ മഹേഷിന്റെ സംസാരത്തിൽ തേൻ ഒഴുകുന്നത് ഹരി അറിഞ്ഞു 

"ആണോ ഹരിയേ, നിങ്ങൾ വിളിച്ചാൽ പോരേ, ഞാൻ അങ്ങ് ഓടിയെത്തില്ലെ. നിങ്ങൾ എന്റെ മക്കളല്ലേ"

ഫോൺ വെക്കാൻ നേരം മഹേഷേട്ടൻ ഒരുകാര്യം ഹരിയെ ഓർമിപ്പിച്ചു 

"ആ പിന്നെ ഹരീ, നിനക്ക് ഗൾഫിൽ നല്ലൊരു ജോലി ഞാൻ ശരിയാക്കിയിട്ടുണ്ട്. ഇനി ഇങ്ങനെയൊന്നും നടന്നാൽ പോരല്ലോ, കുടുംബം ഒക്കെ ആയില്ലേ. സത്യം പറഞ്ഞാൽ നീ എനിക്ക് പിറക്കാതെ പോയ അനിയനാണ് ഹരി"

മഹേഷേട്ടനോടുള്ള തന്റെ സ്നേഹവും കടപ്പാടും മൊത്തമായി ഇന്ന്‌ രാത്രി താൻ പ്രകടിപ്പിക്കാം എന്ന് ഹരി മഹേഷിനോട് സ്നേഹത്തോടെ പറഞ്ഞു. അന്ന് രാത്രി ഡിന്നറിന് മഹേഷിനേയും ഭാര്യയേയും രണ്ട് പെൺകുട്ടികളേയും ക്ഷണിച്ച് ഹരി ഫോൺ കട്ട് ചെയ്തു. ടിന്നറിന് മീനാക്ഷിയുടെ വീട്ടുകാരേയും വിളിച്ചു. ഹരി എന്താണ് ചെയ്യാൻ പോവുന്നത് എന്ന് മീനാക്ഷിക്ക് മനസ്സിലായില്ല. 

അന്ന് രാത്രി പറഞ്ഞതിലും നേരത്തെ മഹേഷേട്ടനും ഭാര്യയും കുട്ടികളും എത്തി. മീനാക്ഷിയുടെ വീട്ടുകാർ വൈകീട്ടേ എത്തിയിരുന്നു. ഡൈനിങ് ടേബിളിൽ ഒരുപാട് വിഭവങ്ങൾ നിരന്നു. ഫുഡ്‌ കഴിക്കാൻ ഹരി എല്ലാവരേയും ക്ഷണിച്ചു. എല്ലാവരും കൈ കഴുകി ടേബിളിനു ചുറ്റും ഇരുന്നു. മഹേഷ്‌ ഭക്ഷണം കഴിക്കാൻ തുടങ്ങിയതും ഹരി എല്ലാവരും കാൺകെ അവന്റെ ചെകിടത്ത് ആഞ്ഞ് അടിച്ചതും ഒരുമിച്ചായിരുന്നു. ചെയറിൽ നിന്നും തെറിച്ചു വീണ മഹേഷ്‌ ഒന്നും മനസ്സിലാകാതെ ഹരിയെ നോക്കി. എല്ലാവരും എണീറ്റ് നിന്ന് ഒന്നും മനസ്സിലാവാതെ പരസ്പരം നോക്കി. 

പിന്നെ അവിടെ നടന്നത് നല്ല ഒന്നാന്തരം ഫൈറ്റ് ആയിരുന്നു. സ്വന്തം ഭാര്യയുടേയും മക്കളുടേയും മുന്നിൽ വെച്ച് മഹേഷിനെ പേപ്പട്ടിയെപ്പോലെ ഹരി തല്ലിച്ചതച്ചു. പിടിച്ചുമാറ്റാൻ ചെന്നവരെയൊക്കെ അവൻ തള്ളിമാറ്റി. മഹേഷിനെ അടിച്ച് അവശനാക്കി മീനാക്ഷിയുടെ കാൽ കീഴിൽ ഇട്ട് കൊടുത്തിട്ട് ഹരി അവളെ നോക്കി 

"അടിക്കടി അവന്റെ ചെകിട് നോക്കി"

മഹേഷ്‌ പറഞ്ഞു തീർന്നതും പുറത്തേക്ക് ഓടി തന്റെ ചെരിപ്പെടുത്ത് വന്ന് മീനാക്ഷി മഹേഷിന്റെ കവിളിൽ ആഞ്ഞടിച്ചതും ഒരുമിച്ചായിരുന്നു. മഹേഷിനെ പൊക്കിയെടുത്ത് എല്ലാവരേയും നോക്കി മഹേഷ്‌ മീനാക്ഷിയോട് ചെയ്തത് എല്ലാം ഹരി ഉറക്കെ വിളിച്ചു പറഞ്ഞു. സ്വന്തം ഭാര്യയുടേയും മക്കളുടേയും മുന്നിൽ മഹേഷ്‌ തലതാഴ്ത്തി നിന്നു. ഹരി പോലീസിനെ വിളിക്കാൻ ഒരുങ്ങിയപ്പോൾ മീനാക്ഷിയുടെ അച്ഛൻ തടഞ്ഞു 

"വേണ്ട മോനേ, ഇത് ഇനി കേസ് ആക്കി നാട്ടുകാരെ മൊത്തം അറിയിക്കേണ്ട. ഒരു പെൺകുട്ടിയുടെ കാര്യല്ലേ. അവനുള്ളത്‌ നീ കൊടുത്തില്ലേ, അതുമതി"

ഹരി മീനാക്ഷിയുടെ അവളുടെ അച്ഛനെ നോക്കി 

"ഇങ്ങനെ നാട്ടുകാർ അറിയും കുടുംബത്തിന്റെ മാനം പോവും എന്നൊക്കെ കരുതിയിട്ട് ആരും അറിയാതെ ഒതുക്കി തീർക്കുന്നത് കൊണ്ടാണ് പല പിഞ്ചു പൈതങ്ങളേയും പീഡിപ്പിച്ച ഈ മഹേഷിനെ പോലുള്ള വേട്ടപ്പട്ടികൾ വീണ്ടും ധൈര്യത്തോടെ വേട്ടക്ക് ഇറങ്ങുന്നത്. ഇവന്റെയൊക്കെ തനിക്കൊണം ഈ സമൂഹം അറിയണം, ഇവനെപ്പോലുള്ളവരെ ആളുകൾ അകറ്റി നിർത്തണം, ചെയ്ത ക്രൂരതക്കുള്ള ശിക്ഷ ഇവൻ അനുഭവിച്ചേ മതിയാവൂ"

ഹരി പോലീസിനെ വിളിച്ച് വിവരം അറിയിച്ചു, എന്നിട്ട് മീനാക്ഷിയെ ചേർത്ത് പിടിച്ചു 

"എനിക്ക് ഇവളെ വേണം, ഇവൾ എന്റെ ഭാര്യയാണ്. എന്റെ ഭാര്യയുടെ ഒരു പ്രശ്നം എന്റേം കൂടിയാണ്. എന്റെ ഭാര്യ ആഗ്രഹിച്ചത് മാത്രമേ ഞാൻ ഇവിടെ ചെയ്‌തുള്ളൂ. നാല് കാലുള്ള കട്ടിലിൽ കിടന്ന് കെട്ടിപിടിച്ച് മറിയുന്നതിന് വേണ്ടി മാത്രമല്ല ഭാര്യ, അവളുടെ മനസ്സ് അറിയണം, അവളുടെ സ്വപ്‌നങ്ങൾ കേൾക്കണം, അവളുടെ എല്ലാ ആഗ്രഹങ്ങളും സാധിച്ചു കൊടുക്കാൻ പറ്റിയില്ലെങ്കിലും നമ്മൾ താങ്ങായി എപ്പോഴും കൂടെ ഉണ്ടാവും എന്ന തോന്നലെങ്കിലും അവളിൽ വരുത്താൻ നമുക്ക് സാധിക്കണം. ചേർന്ന് നടക്കാൻ മാത്രമല്ല ഭർത്താവ്, അവളൊന്നു വീണുകഴിഞ്ഞാൽ കൈ കൊടുക്കാനും കൂടിയാണ് ഭർത്താവ്"

(അവസാനിച്ചു)

DOWNLOAD PDF STORY CLICK HERE

📝 ഷാൻ കബീർ