🍁മകരക്കൊയ്ത്ത്🍁ഫുൾ പാർട്ട്🍁

🍁മകരക്കൊയ്ത്ത്🍁ഫുൾ പാർട്ട്🍁

എന്തിനാ അമ്മേ.. മേലേ തൊടിയിലെ ശാരദേച്ചി വന്നത്?

കൂട്ടുകാരിയെ കാണാൻ പോയിട്ട് തിരിച്ച് വന്ന നീലിമ, ഗെയ്റ്റിന് മുന്നിൽ നിന്ന് ഓട്ടോയിൽ കയറിപ്പോയ ശാരദയെ കണ്ട് ജിജ്ഞാസയോടെ ദേവകിയോട് ചോദിച്ചു.

അവര് നിന്നെക്കാണാൻ വന്നതാ

എന്നെ കാണാനോ, എന്തിന്?

നിന്നെ അവരുടെ മോൻ സുധാകരന് കല്യാണം കഴിച്ച് കൊടുക്കുമോന്ന് ചോദിക്കാൻ

ങ്ഹേ? എന്നിട്ട് അമ്മ എന്ത് പറഞ്ഞു?

അച്ഛൻ വരട്ടെ ചോദിച്ചിട്ട് പറയാമെന്ന് പറഞ്ഞു

അത് ശരി, അപ്പോൾ അമ്മയ്ക്കും അച്ഛനും മാത്രം ഇഷ്ടപ്പെട്ടാൽ മതിയോ? എൻ്റെ അഭിപ്രായമറിയണ്ടെ?

നീരസത്തോടെ നീലിമ ചോദിച്ചു.

അതിന് നിനക്ക് എതിരഭിപ്രായമൊന്നും ഉണ്ടാകില്ലെന്ന് അമ്മയ്ക്കറിയാം

സുധാകരൻ നല്ലൊരു ചെറുപ്പക്കാരനല്ലേ? ,ഇപ്പോഴത്തെ ആണുങ്ങളെ പോലെ ബീഡി വലിയും കള്ള് കുടിയുമൊന്നുമില്ല,

സ്വന്തമായി നാലഞ്ച് ഏക്കറ് പുഞ്ചപ്പാടമുള്ളത് കൊണ്ട്, കൃഷിയും മറ്റുമായി വീട്ടിൽ തന്നെ എപ്പോഴുമുണ്ടാവും, അല്ലാതെ കൂട്ടുകാരുമായി കറങ്ങി നടക്കാനോ, കവലയിൽ പോയിരുന്ന് വായിനോക്കാനോ ഒന്നിനും പോകാറില്ല

ദേവകിക്ക് സുധാകരനെക്കുറിച്ച് പറയുമ്പോൾ ,നൂറ് നാവായിരുന്നു.

എൻ്റമ്മേ ... അങ്ങേരൊരു പഴഞ്ചൻ മനുഷ്യനാ ,ഇത് വരെ പുള്ളിക്കാരൻ ഒരു പാൻ്റ്സിട്ട് പോകുന്നത് അമ്മ കണ്ടിട്ടുണ്ടോ?

അയാൾക്ക് ബൈക്ക് ഓടിക്കാനറിയാമോ ?എന്തിനധികം പറയുന്നു ,ഒരു സൈക്കിള് പോലും ചവിട്ടാൻ അറിയാത്തത് കൊണ്ട്, ഇവിടുന്ന് കാൽനടയായിട്ടാണ് ,

മങ്കൊമ്പിലുള്ള കൃഷിഭവനിൽ വരെ പോകുന്നത്

അയ്യോടാ ...

നീ എന്തോന്നാ കൊച്ചേ ഈ പറയുന്നത്? സൈക്കിള് ചവിട്ടുന്നതും പാൻ്റിടുന്നതും ബൈക്കോടിക്കുന്നതുമൊക്കെയാണോ ഒരു പുരുഷന് വേണ്ട യോഗ്യത ,കെട്ടിക്കൊണ്ട് പോകുന്ന പെണ്ണിനെ മാനം മര്യാദയ്ക്ക് നോക്കാനുള്ള കഴിവും തൻ്റേടവുമുണ്ടാകണം, സുധാകരനത് വേണ്ടുവോളമുണ്ട്, ഞാനത്രേ നോക്കിയുള്ളു

അയ്യേ... അമ്മേ ഇത് ഇരുപത്തിയൊന്നാം നൂറ്റാണ്ടാണ്, കല്യാണം കഴിഞ്ഞ് കൊയ്ത്തരിവാളുമെടുത്ത് പാടത്തേയ്ക്കിറങ്ങാനാണോ? നിങ്ങളെന്നെ ഇത്രയും പഠിപ്പിച്ചത്, സുധാകരേട്ടൻ്റെ പെങ്ങള് സുഷമയുടെ കാര്യമറിയാമല്ലോ? കല്യാണത്തിന് മുമ്പ്, അവൾക്ക് കിട്ടിയ ജോലിക്ക് പോകേണ്ടെന്ന് പറഞ്ഞ് തടസ്സം നിന്നത്, ഈ സുധാകരേട്ടൻ ഒറ്റൊരാളാ ,ആ സ്ഥിതിക്ക്, ഭാവിയിൽ എനിക്കൊരു ജോലി ശരിയായാൽ , അതിന്  പോകാൻ അങ്ങേര് അനുവദിക്കുമെന്ന് അമ്മയ്ക്ക് തോന്നുന്നുണ്ടോ?

മോളേ.. ഭർത്താവിന് നല്ല വരുമാനമുണ്ടെങ്കിൽ പിന്നെ, ഭാര്യയ്ക്കെന്തിനാ ഒരു ജോലി,

അവൻ്റെ കുട്ടികളെയും നോക്കി , നല്ലൊരു കുടുംബിനിയായി ,

സന്തോഷത്തോടെ കഴിഞ്ഞുടെ?

മേലെതൊടിയിൽ ,ശാരദേച്ചിയും സുധാകരനും മാത്രമല്ലേയുള്ളു, അത് കൊണ്ട് നിനക്കവിടെ രാജകുമാരിയെ പോലെ കഴിയാം

തൻ്റെ വാദങ്ങളൊന്നും, അമ്മയുടെ മനോഭാവത്തിന് മുന്നിൽ വിലപ്പോവില്ലെന്ന് മനസ്സിലാക്കിയ നീലിമ, നിരാശയോടെ അകത്തേയ്ക്ക് കയറിപ്പോയി.

പൂപ്പള്ളി കവലയിലെ പീടിക പൂട്ടിയിട്ട്, നീലിമയുടെ അച്ഛൻ വാസുദേവൻ വീട്ടിലെത്തിയപ്പോൾ എട്ട്  മണി കഴിഞ്ഞു.

നിങ്ങക്ക് കുറച്ചുടെ നേരത്തെ പീടിക അടച്ച് വന്നാലെന്താ ?വീട്ടിലിരിക്കുന്നവരുടെ ആധി നിങ്ങക്ക് പറഞ്ഞാൽ മനസ്സിലാവില്ല ,കൈയ്യിലൊരു ടോർച്ച് പോലുമില്ല ,വല്ല ഇഴജന്തുക്കളും കടിച്ചാലെന്ത് ചെയ്യും

ഭർത്താവിന് കഞ്ഞി വിളമ്പി കൊടുക്കുന്നതിനിടയിൽ, ദേവകി പരിഭവത്തോടെ ചോദിച്ചു.

ഓഹ് പിന്നേ... പത്ത് മുപ്പത് കൊല്ലമായി, ഞാനീ പോക്ക് വരവ് തുടങ്ങീട്ട്, എന്നെ കടിക്കാൻ ചൊണയുള്ള ജന്തുകളൊന്നും ഈ നാട്ടിലില്ല, നീയാ ചമ്മന്തി ഇത്തിരി കൂടി എടുക്ക്

നോക്കിയേ , മേലേ തൊടിയിലെ ശാരദ വന്നിരുന്നു

ഉം എന്നതാ കാര്യം?

നീലിമയെ സുധാകരന് കെട്ടിച്ച് കൊടുക്കുമോന്നറിയാനാ വന്നത്

ആഹാ, അത് നല്ല ആലോചനയാണല്ലോടീ.. നമുക്ക് നോക്കാം

ഉം ഞാൻ നീലിമയോട് പറഞ്ഞപ്പോൾ അവൾക്കത്ര പിടിച്ചിട്ടില്ല ,ഞാൻ പിന്നെ ഒരു വിധത്തിൽ പറഞ്ഞ് സമ്മതിപ്പിച്ചിട്ടുണ്ട്

ങ്ഹാ അത് മതി ,കല്യാണം കഴിഞ്ഞ് ഒരാഴ്ച കഴിയുമ്പോൾ അവള് പൊരുത്തപ്പെട്ടോളും, പണ്ട് നീയും ഇങ്ങനെ തന്നെ അല്ലായിരുന്നോ? ആദ്യത്തെ ഒന്ന് രണ്ടാഴ്ച നീയെൻ്റെ മുഖത്തേയ്ക്ക് പോലും നോക്കീട്ടില്ലല്ലോ? അങ്ങനെയുള്ള നിന്നെ ഞാൻ, പുഷ്പം പോലെ മെരുക്കിയെടുത്തില്ലേ?

ഓഹ് പിന്നേ... ഒരു ഫയൽവാൻ വന്നിരിക്കുന്നു ,ദേ അപ്പുറത്ത് കൊച്ചൊറങ്ങീട്ടില്ല ,എന്നെക്കൊണ്ടൊന്നും പറയിപ്പിക്കേണ്ട,

നീയൊന്നടങ്ങെൻ്റെ ദേവൂ.. ഞാനൊരു തമാശ പറഞ്ഞതല്ലേ?

മുഖം വീർപ്പിച്ചിരുന്ന ഭാര്യയെ നുള്ളിക്കൊണ്ട് വാസുദേവൻ പറഞ്ഞു

വാസുദേവൻ്റെ അനുകൂലമറുപടി കിട്ടിയപ്പോൾ, പിറ്റേ ആഴ്ച തന്നെ സുധാകരൻ അമ്മയും അമ്മാവനുമായി നീലിമയെ പെണ്ണ് കാണാൻ വന്നു.

നിനക്കെന്തെങ്കിലും ചോദിക്കാനുണ്ടെങ്കിൽ ചോദിച്ചോ

ഞങ്ങള് അപ്പുറത്തോട്ട് മാറി തരാം

ചൂട് ചായ മൊത്തി കുടിക്കുന്നതിനിടയിൽ ശാരദ മകനോട് പറഞ്ഞു

വേണ്ട എനിക്ക് പ്രത്യേകിച്ച് ഒന്നും ചോദിക്കാനില്ല അമ്മയ്ക്ക് ഇഷ്ടമായ സ്ഥിതിക്ക് ഇതങ്ങ് ഉറപ്പിച്ചോളു

സുധാകരനത് പറഞ്ഞപ്പോൾ നീലിമയ്ക്ക് നിരാശ തോന്നി,

ഒറ്റയ്ക്ക് സംസാരിക്കാൻ അവസരം കിട്ടുമ്പോൾ, തൻ്റെ അനിഷ്ടം സുധാകരനോട് തുറന്ന് പറയണമെന്ന് കണക്ക് കൂട്ടിയിരിക്കുകയായിരുന്നു അവൾ

കല്യാണമുറപ്പിച്ച് കഴിഞ്ഞാൽ പിന്നെ അമ്മ തന്നെയിനി പുറത്തേയ്ക്കൊന്നും വിടാൻ സാധ്യതയില്ലെന്ന് അവൾക്കറിയാമായിരുന്നു

എന്ത് നല്ല ചെറുക്കനാ സുധാകരൻ ,എന്നിട്ട് നിൻ്റെ മുഖമെന്താടി, കടന്നല് കുത്തിയത് പോലെയിരിക്കുന്നത്?

പെണ്ണ് കാണാൻ വന്നവർ തിരിച്ച് പോയപ്പോൾ മുഖം വീർപ്പിച്ചിരിക്കുന്ന നീലിമയോട് അവളുടെ ചേച്ചി പൂർണ്ണിമ ചോദിച്ചു

അത്രയ്ക്ക് ഇഷ്ടമായെങ്കിൽ അങ്ങേരെ ചേച്ചിയങ്ങെടുത്തോ? ഹരിച്ചേട്ടൻ്റെ പിണക്കം മാറി, ഉടനെയൊന്നും ചേച്ചിയെ കൂട്ടികൊണ്ട് പോകാൻ വരുമെന്ന്എനിക്ക് തോന്നുന്നില്ല ,

ദേ കൊച്ചേ, ഞാനൊന്ന് വച്ച് 

തന്നാലുണ്ടല്ലോ ?ഹരിച്ചേട്ടനും ഞാനും ഇതാദ്യമായിട്ടൊന്നുമല്ലല്ലോ പിണങ്ങുന്നത്? നീ നോക്കിക്കോ, സമയമാകുമ്പോൾ അങ്ങേര് വരികയും ചെയ്യും എന്നെ കൂട്ടിക്കൊണ്ട് പോകുകയും ചെയ്യും

പൂർണ്ണിമ അനുജത്തിയെ വെല്ലുവിളിച്ചു.

ഓഹ് ഈ പിള്ളേരുടെ ഒരു കാര്യം നീലിമേ നീയൊന്ന് മിണ്ടാതിരിക്ക് ഇനി അത് മതി അവള് കരച്ചില് തൊടങ്ങാൻ

ദേവകി അവരെ ശാസിച്ചു.

ദിവസങ്ങൾ കടന്ന് പോയി ,

ചിങ്ങമാസത്തിലെ ഏറ്റവും നല്ല മുഹൂർത്തത്തിൽ തന്നെ സുധാകരൻ നീലിമയുടെ കഴുത്തിൽ താലിചാർത്തി.

മേലേ തൊടിയെന്ന ആ പഴയ തറവാട്ടിലേക്ക് ശാരദയുടെ കൈയ്യിൽ നിന്നും വാങ്ങിയ നിലവിളക്കുമായി കയറുമ്പോൾ മനപ്പൂർവ്വമാണവൾ ആദ്യം ഇടത് കാലെടുത്ത് പടിക്കെട്ടിൽ വച്ചത്

അയ്യാ മോളേ വലത് കാല് വച്ച് കയറു

പെട്ടെന്ന് തന്നെ അടുത്ത് നിന്ന മറ്റൊരു സ്ത്രീ, അവളെ തിരുത്തി.

അരനൂറ്റാണ്ടിലേറെ പഴക്കമുള്ള ഓടും തടിയും ചെങ്കല്ലും കൊണ്ട് പണിത കുമ്മായക്കെട്ട് വീടായിരുന്നത്

പൊക്കം കുറഞ്ഞ കട്ടളപ്പടികളായിരുന്നത് കൊണ്ട് ഓരോ വാതിലുകളിലുടെയും തല കുനിച്ച് നടന്ന് പോകേണ്ടി വന്നത്, നീലിമയിൽ ഈർഷ്യയുണ്ടാക്കി

ആളും ബഹളവുമൊക്കെ ഒഴിഞ്ഞപ്പോൾ മരുമകളുടെ കൈയ്യിൽ ഒരു ഗ്ളാസ്സ് പാലും കൊടുത്ത് ശാരദ അവളെ സുധാകരൻ്റെ മുറിയിലേക്ക് പറഞ്ഞയച്ചു.

അവിടെ ചെല്ലുമ്പോൾ കൈയ്യുള്ള ബനിയനും മുണ്ടും ധരിച്ച് കൊണ്ട് സുധാകരൻ കസരയിലിരുന്നിട്ട് മേശമേൽ വെച്ച ബുക്കിൽ എന്തൊക്കെയോ കുത്തിക്കുറിക്കുകയായിരുന്നു.

ദാ പാല്, അമ്മ തന്ന വിട്ടതാ

നീലിമയുടെ ശബ്ദം കേട്ട് സുധാകരൻ തല ഉയർത്തി നോക്കി

ങ്ഹാ വന്നോ?ഇത്രയും നേരം കാണാതിരുന്നപ്പോൾ ഞാനോർത്തു, കല്യാണത്തിന് ചിലവായതൊക്കെ ഒന്ന് കണക്കെഴുതി വയ്ക്കാമെന്ന്

എന്തിനാ എഴുതി വച്ചിട്ട് 

ചിലവായിപ്പോയതൊക്കെ ഇനി തിരിച്ച് കിട്ടില്ലല്ലോ?

ഹ ഹ ഹ അത് താൻ പറഞ്ഞത് നേരാ, എങ്കിലും എല്ലാത്തിനും ഒരു കണക്കുണ്ടാവുന്നത് നല്ലതാ, ദാ ഇനി താൻ കുടിച്ചോ

പാല് പാതി കുടിച്ചിട്ട്, ഗ്ളാസ്സ് നീലിമയുടെ നേർക്ക് നീട്ടിക്കൊണ്ട് സുധാകരൻ പറഞ്ഞു.

എനിക്ക് വേണ്ട അവിടെ വച്ചേക്കു

അനിഷ്ടത്തോടെയവൾ പറഞ്ഞു

അതെന്താ പാലിഷ്ടമല്ലേ?

അതല്ല ,ഞാൻ ആരും കുടിച്ചതിൻ്റെ ബാക്കി കുടിക്കാറില്ല

അത് കേട്ടപ്പോൾ സുധാകരൻ്റെ മുഖം വിളറിപ്പോയി.

ഇതെന്താ ഈ മുറിയിൽ ഫാനില്ലേ?

ഷാള് കൊണ്ട് വീശി ഊഷ്ണമകറ്റി കൊണ്ട് നീലിമ ചോദിച്ചു

ഇല്ല എനിക്ക് പൊടിഅലർജിയു ള്ളത് കൊണ്ട് ഞാൻ ഫാൻ ഉപയോഗിക്കാറില്ല

ഈശ്വരാ .. അപ്പോൾ ഇനി മുതൽ എനിക്ക് ഉറക്കമില്ലാത്ത രാത്രികളാണോ വരാൻ പോകുന്നത് ,ഇതിപ്പോൾ ഇടിവെട്ടിയവൻ്റെ തലയിൽ പാമ്പ് കടിച്ചെന്ന് പറഞ്ഞത് പോലെയായല്ലോ? എന്നെയീ നരകത്തിലേക്ക് തള്ളിവിട്ട തന്തയേയും തള്ളയേയും പറഞ്ഞാൽ മതിയല്ലോ?

അരിശത്തോടെ നീലിമ പറഞ്ഞു.

അതെന്താ നീലിമേ.. നീയങ്ങനെ പറഞ്ഞത്, നിനക്കീ കല്യാണത്തിന് താല്പര്യമില്ലായിരുന്നോ?

ഓഹ്, ഇനിയിപ്പോൾ അതൊക്കെ പറഞ്ഞിട്ടെന്താ കാര്യം, പശുവും ചത്തു ,മോരിലെ പുളിയും പോയി ഇനി അനുഭവിക്കുക തന്നെ

കടുത്ത നിരാശയോടെ നീലിമ പറഞ്ഞത് കേട്ട് സുധാകരൻ സ്തബ്ധനായിരുന്ന് പോയി.

ഭാഗം -2

നിങ്ങളൊന്ന് പുറത്തേയ്ക്കിറങ്ങുമോ? എനിക്ക് ഡ്രസ്സ് മാറണം

ആറ്റിലെ കടവിൽ പോയി മുങ്ങിക്കുളിച്ചിട്ട്, ഈറൻ മാറാൻ, ബെഡ് റൂമിലേക്ക് കയറി വന്ന നീലിമ, സുധാകരനോട് പറഞ്ഞു.

അതിന് ഞാനെന്തിനാ പുറത്തിറങ്ങുന്നത്, ഞാൻ നിൻ്റെ ഭർത്താവല്ലേ?

അത് മറ്റുള്ളവരുടെ മുന്നിൽ, എൻ്റെയുള്ളിൽ നിങ്ങൾക്ക് ഞാൻ അങ്ങനെയൊരു സ്ഥാനം തന്നിട്ടില്ല

ഇത്രയും അയിത്തം കാണിക്കാൻ ഞാനത്രയ്ക്ക് കൊള്ളരുതാത്തവനാണോ?

നിങ്ങളെ കൊള്ളില്ലെന്ന് ഞാൻ പറഞ്ഞില്ലല്ലോ? പക്ഷേ എനിക്ക് നിങ്ങളെ അംഗീകരിക്കാൻ കഴിയുന്നില്ല ,അത്ര തന്നെ

അതെത്ര നാൾ ?എത്ര നാളിങ്ങനെ നമ്മൾ ഒരു മുറിയിൽ പരസ്പര ബന്ധമില്ലാതെ കഴിഞ്ഞ് കൂടും, നിനക്കെന്നെ ബോധിക്കാനായി ഞാനെന്താ നിനക്ക് ചെയ്ത് തരേണ്ടത് ,നിനക്ക് ഫാനില്ലാതെ ഉറങ്ങാൻ കഴിയില്ലെന്ന് പറഞ്ഞത് കൊണ്ടല്ലേ?എൻ്റെ അലർജിയെ വകവയ്ക്കാതെ, ഞാനീ മുറിയിൽ ഫാൻ ഫിറ്റ് ചെയ്ത് തന്നത് ,നിനക്ക് കുളിക്കാൻ ചന്ദനമണമുള്ള സോപ്പും, മുഖത്ത് പൂശാൻ ടാൽക്കം പൗഡറും, കണ്ണെഴുതാൻ കരിമഷിയുമൊമൊക്കെ ഞാൻ വാങ്ങിക്കോണ്ട് തന്നില്ലേ? കവലയിലെ കൊട്ടകയിൽ ,പുതിയ പടമോടുന്നുണ്ടെന്നും, അവിടെ കൊണ്ട് പോകാമെന്നും ഞാൻ പറഞ്ഞില്ലേ?ഇനിയെന്താ നിനക്ക് ഞാൻ ചെയ്ത് തരേണ്ടത്, പറയു,എന്നോടല്പം സ്നേഹത്തോടെ പെരുമാറാൻ, നീ പറയുന്നതെന്തും ഞാൻ ചെയ്ത് തരാം

എങ്കിൽ ,നിങ്ങളെന്നെ എൻ്റെ വീട്ടിൽ കൊണ്ട് വിടൂ, ഇവിടെ നില്ക്കുന്നതിനെക്കാൾ

എനിക്കതാണ് സന്തോഷം

അതിന് മറുപടിയൊന്നും പറയാതെ സുധാകരൻ വേദനയോടെ പുറത്തേയ്ക്കിറങ്ങി പോയി.

ദിവസങ്ങൾ കഴിഞ്ഞു

ഒരു ദിവസം കടവിലെ വഞ്ചിയിൽ നിന്നും വൈക്കോൽ കെട്ടുകൾ ചുമന്ന്, കാലിത്തൊഴുത്തിന് അടുത്തുള്ള ഷെഡ്ഡിലേക്ക് കൊണ്ട് വന്ന് നിറയ്ക്കുമ്പോൾ നീലിമ സുധാകരനടുത്തേയ്ക്ക് കഞ്ഞിവെള്ളവുമായി വന്നു

ദാ വെള്ളം കുടിക്ക് ,കുറെ നേരമായി വെയില് കൊള്ളുവല്ലേ?

പതിവില്ലാതെ തനിക്ക് ദാഹം തീർക്കാൻ വെള്ളവുമായി ഭാര്യ വന്നപ്പോൾ, സുധാകരന് സന്തോഷത്തെക്കാൾ അത്ഭുതമാണ് തോന്നിയത്

നാളെയാണ്, പൂർണ്ണിമേച്ചീടെ നാത്തൂൻ്റെ കല്യാണം ,കല്യാണ പെണ്ണിന് എന്തേലും വാങ്ങി കൊടുക്കണ്ടെ?

ഗിഫ്റ്റ് വാങ്ങാനുള്ള പൈസ തന്നാൽ കൊള്ളാമായിരുന്നു

ങ്ഹാ ഞാനതങ്ങ് മറന്നിരിക്കുകയായിരുന്നു, സാരമില്ല, നാളെ നമുക്ക് പോകുന്ന വഴി കവലേന്ന് എന്തേലും വാങ്ങാം

അല്ലാ.. അതിന് നിങ്ങള് വരണമെന്നില്ല, കല്യാണത്തിന് ഞാൻ അമ്മയുമായി പൊയ്ക്കൊള്ളാം, ആരെങ്കിലും ചോദിക്കുവാണെങ്കിൽ നിങ്ങൾക്ക് കണ്ടത്തിൽ പണിക്കാര് നില്ക്കുന്നത് കൊണ്ട് വരാൻ പറ്റിയില്ലെന്ന് പറയാം

നീലിമ തന്നെ മന:പ്പൂർവ്വം ഒഴിവാക്കുകയാണെന്ന് അയാൾക്ക് മനസ്സിലായി.

തൻ്റെ മുഖത്ത് തെളിഞ്ഞ 

മ്ളാനത, നീലിമ കാണാതിരിക്കാനായി ,തോളിൽ കിടന്ന തുവർത്ത് കൊണ്ട്, സുധാകരൻ മുഖത്തെ വിയർപ്പ് കണങ്ങൾ അമർത്തിത്തുടച്ചു.

മടിക്കുത്തിൽ നിന്നും അയാൾ എടുത്ത് കൊടുത്ത നോട്ടുകളുമായി, യാതൊരു മന:സ്ഥാപവുമില്ലാതെ, നീലിമ തിരിഞ്ഞ് അകത്തേയ്ക്ക് പോയി.

പിറ്റേന്ന് പശുവിനെ കുളിപ്പിച്ച് കൊണ്ട് നില്ക്കുമ്പോൾ, അമ്മയും നീലിമയും കല്യാണത്തിന് പോകാനായി, വീട്ടിൽ നിന്നിറങ്ങുന്നത് സുധാകരൻ കണ്ടു.

ഇളം നീല നിറത്തിലുള്ള പട്ട് സാരിയുടുത്ത്, സ്വർണ്ണാഭരണങ്ങളണിഞ്ഞ്, മുല്ലപ്പൂ ചൂടി നടന്ന് വരുന്ന നീലിമയെ, സുധാകരൻ കൊതിയോടെ നോക്കി നിന്നു.

ഡാ ഞങ്ങളിറങ്ങുവാ, മേശപ്പുറത്ത് പഴങ്കഞ്ഞിയെടുത്ത് വച്ചിട്ടുണ്ട് ,നീ അകത്തേയ്ക്ക് കയറുമ്പോൾ, തൊടീന്ന് രണ്ട് പച്ചമുളക് കൂടി പറിച്ചെടുത്തോ

അമ്മയത് പറഞ്ഞെങ്കിലും, പിന്നാലെ വരുന്ന നീലിമ ,തന്നോട് യാത്ര ചോദിക്കുമെന്ന് പ്രതീക്ഷിച്ചിരുന്ന സുധാകരന്, നിരാശയായിരുന്നു ഫലം

തൻ്റെ മുഖത്തേയ്ക്കൊന്ന് നോക്കുക പോലും ചെയ്യാതെ, അമ്മയെ അനുഗമിച്ചവൾ നടന്ന് പോയപ്പോൾ,  ഇടനെഞ്ചിലൊരു സങ്കട പ്രാവ് കുറുകുന്നതയാളറിഞ്ഞു.

ആറിനക്കരെയുള്ള ദേവീക്ഷേത്രത്തിലെ കല്യാണ മണ്ഡപത്തിൽ വച്ചായിരുന്നു വിവാഹം.

നമുക്കിന്ന് സദ്യ കിട്ടുമോ? എന്തൊരു തിരക്കാണവിടെ?

കടത്തിറങ്ങി ചെളിയുണങ്ങിയ ഇടവഴിയിലൂടെ നടന്ന് ചെല്ലുമ്പോൾ, ദൂരെ നിന്നേ, തിങ്ങിക്കൂടിയ ജനക്കൂട്ടത്തെ കണ്ട്, ശാരദ സംശയത്തോടെ മരുമകളോട് ചോദിച്ചു.

അമ്മ വേഗം നടന്ന് വാ ,താലികെട്ട് കഴിഞ്ഞാൽ ഫസ്റ്റ് പന്തിക്ക് തന്നെ നമുക്ക് കയറി ഇരിക്കാം

ധൃതിയിൽ അമ്മയുടെ കൈ പിടിച്ച് ഓഡിറ്റോറിയത്തിൻ്റെ മുറ്റത്തേക്ക് കടക്കുമ്പോൾ, മുന്നിലേക്ക് ഒരു രാജ് ദൂത് ബൈക്ക് വന്ന് നിന്നതും ,അതിൻ്റെ പിന്നിൽ നിന്ന് തൻ്റെ കോളേജ് മേറ്റായിരുന്ന സന്ധ്യ ,ഗമയോടെ ഇറങ്ങി വരുന്നതും കണ്ടപ്പോൾ, നീലിമയുടെയുള്ളിൽ നേരിയ കുശുമ്പ് തോന്നി.

ഡീ നീലിമേ.. നീ നടന്നാണോ വന്നത്, ഞാനും സുധിയോട് പറഞ്ഞതാണ് , പാടവരമ്പിലൂടെ കാറ്റും കൊണ്ട് നടന്ന് വന്നാൽ മതിയെന്ന്,

അപ്പോൾ എന്നോട് ചോദിക്കുവാ, നിന്നെ വെയിലത്ത് നടത്തിക്കാനാണോ ഞാൻ സ്വന്തമായി ബൈക്ക് വാങ്ങി വീട്ടിൽ വച്ചിരിക്കുന്നതെന്ന് ,വല്ലാത്തൊരു കെയറിങ്ങാടീ ഈ മനുഷ്യൻ,

ഓഹ് സോറി, ഞാൻ നിന്നെ സുധിക്ക് പരിചയപ്പെടുത്തിയില്ലല്ലോ?

സുധീ ..ഇതാണെൻ്റെ കൂടെ കോളേജിലുണ്ടായിരുന്ന നീലിമ,

അക്കരയിലാ ഇവളെ കെട്ടിച്ചിരിക്കുന്നത്

ഹലോ... ഐ ആം സുധി ,നൈസ് റ്റു മീറ്റ് യു

ജയൻ്റെ സ്റ്റൈലിൽ, കറുത്ത കൂളിങ് ഗ്ളാസ് വച്ച്, ബൈക്കിൽ നിന്നും വലത് കാൽ ഉയർത്തി നിലത്ത് ചവിട്ടി, മസില് പിടിച്ച് തൻ്റെ മുന്നിലേക്ക് വന്ന് ഷെയ്ക്ക് ഹാൻറ് തരാൻ ഒരുങ്ങിയ സുധിയുടെ നേരെ, നീലിമ കൈകൂപ്പി.

ഓഹ് നീയിപ്പോഴും തനി നാട്ടിൻ പുറത്ത്കാരി തന്നെ ,സുധിയ്ക്ക് ജോലി ടൗണിലായത് കൊണ്ട് ആളിത്തിരി മോഡേണാണ്

അല്ലാ .... സുധീന്ദ്രനാഥനെന്നല്ലായിരുന്നോ പുള്ളീടെ പേര്, കല്യാണം ക്ഷണിക്കാൻ വന്നപ്പോൾ നീയെന്നോട് അങ്ങനെയല്ലേ പറഞ്ഞിരുന്നത്?

നീലിമ ,കൂട്ടുകാരിയോട് അടക്കത്തിൽ ചോദിച്ചു.

ങ്ഹാ സർട്ടിഫിക്കറ്റിലൊക്കെ അങ്ങനാ, പക്ഷേ അടുപ്പമുള്ളവരൊക്കെ സുധീന്നാ വിളിക്കുന്നത് ,

എനിക്കുമതാണിഷ്ടം,

മറ്റേ പേരൊക്കെ പഴഞ്ചനല്ലേടി?

ഉം അത് ശരിയാ ,നിൻ്റെ ഭർത്താവിൻ്റെ പേര് മാത്രമല്ലേ പഴഞ്ചനായിട്ടുള്ളു, എനിക്കാണെങ്കിൽ പേരും ആളും പഴഞ്ചനാണ് ,എന്നവൾ മനസ്സിൽ പറഞ്ഞു.

മോളേ ... താലികെട്ട് കഴിഞ്ഞെന്ന് തോന്നുന്നു, ബാ നമുക്ക് പന്തിയിലോട്ട് കയറിയിരിക്കാം

ശാരദ ധൃതിവച്ചു.

നിങ്ങള്കയറുന്നില്ലേ സന്ധ്യേ?

ഹേയ്, ഞങ്ങള് സദ്യ കഴിക്കാനൊന്നും നില്ക്കില്ല, ഗിഫ്റ്റ് കൊടുത്തിട്ട് ഞങ്ങളുടനെ തിരിച്ച് പോകും , ടൗണിലെ തീയറ്ററിൽ മാറ്റിനി കാണാൻ പോകണം ,പോകുന്ന വഴി, ബിസ്മി ഹോട്ടലീന്ന് ,സുധി, ബിരിയാണി വാങ്ങിത്തരാമെന്ന് പറഞ്ഞിരിക്കുവാ

കൂട്ടുകാരി പറഞ്ഞത് കേട്ട് നീലിമയ്ക്കവളോട്, അസൂയ മൂത്തു.

സന്ധ്യ എത്ര ഭാഗ്യവതിയാ, പാൻ്റ്സിനുള്ളിൽ ഷർട്ട് ഇൻസേർട്ട് ചെയ്യുന്ന, ഷൂ ധരിക്കുന്ന ,കൂളിംഗ് ഗ്ളാസ്സ് വയ്ക്കുന്ന, ഇംഗ്ളീഷ് സംസാരിക്കുന്ന നല്ല പരിഷ്കാരിയായ ചെറുപ്പക്കാരനെയാണ്, അവൾക്ക് ഭർത്താവായി കിട്ടിയത്, അത് മാത്രമോ? സ്വന്തമായി ബൈക്കുള്ളത് കൊണ്ട്, എവിടെ വേണമെങ്കിലും അവൾക്ക് ഭർത്താവിൻ്റെയൊപ്പം ചുറ്റിക്കറങ്ങാം, ഇങ്ങനെയൊരു ജീവിതമാണ് ,താനും സ്വപ്നം കണ്ട് നടന്നത്, എന്നിട്ട് തൻ്റെ മാതാപിതാക്കൾ ,പുറം ലോകം കണ്ടിട്ടില്ലാത്ത ഒരുത്തനെയാണല്ലോ, തൻ്റെ തലയിൽ കെട്ടിവച്ച് തന്നതെന്ന് ഓർത്തപ്പോൾ, നീലിമയ്ക്ക് തൻ്റെ അച്ഛനോടും അമ്മയോടും വൈരാഗ്യം തോന്നി.

ഉന്തും തള്ളും സഹിച്ച് ആദ്യ പന്തിയിൽ തന്നെ ശാരദയും മരുമകളും സ്ഥാനം പിടിച്ചു.

അല്ലാ .. ശാരദേ.. ഇത് സുധാകരൻ്റെ കെട്ട്യോളല്ലേ? ഇവൾക്ക് വിശേഷമൊന്നുമായില്ലേ?

തൂശനിലയിൽ ആവി പറക്കുന്ന പുഞ്ചയരി ചോറ്, സാമ്പാറ് കൂട്ടി കുഴച്ച് വായിലേക്ക് വയ്ക്കുമ്പോഴാണ്, അമ്മായിയമ്മയോട് ആരോ തൻ്റെ വിശേഷം ചോദിക്കുന്നത് കേട്ട്, നീലിമ മുഖമുയർത്തി നോക്കിയത്.

ഓഹ് ഇല്ലെടീ മേരിക്കുട്ടീ ... ,ഇപ്പോഴത്തെ പിള്ളേർക്ക് കല്യാണം കഴിഞ്ഞാലുടനെ പെറുന്നത് വലിയ കുറച്ചിലല്യോ ,എന്നാലും ഞാനിവളോട് പറയാനിരിക്കുവായിരുന്നു, ഇനിയും വെച്ച് താമസിപ്പിക്കേണ്ടെന്ന്, കുട്ടികളുണ്ടെങ്കിലേ, പൊരേലൊരു അനക്കമുണ്ടാവു ,സുഷമേടെ പിള്ളേര് വല്ലപ്പോഴും വരുമ്പോഴാ, അവിടെയൊരു ഒച്ചയനക്കമുണ്ടാകുന്നത്,

അവൾക്കെപ്പോഴും തറവാട്ടിൽ വന്ന് നിക്കാൻ പറ്റുമോ ?

അത് നേരാ ശാരദ പറഞ്ഞത്, കേട്ടോടീ കൊച്ചേ.. ഞങ്ങടെയൊക്കെ മംഗലം കഴിഞ്ഞതിന് ശേഷം, പെറാനേ നേരമുണ്ടായിരുന്നുള്ളു ,ഈ നാട്ടിൽ ശാരദ മാത്രമേ രണ്ട് പെറ്റിട്ടുള്ളു, അതവളുടെ കെട്ട്യോൻ നേരത്തെ ചത്ത് പോയത് കൊണ്ടാ ,നിൻ്റെയീ പ്രായത്തിൽ, ഞാൻ മൂന്നെണ്ണത്തിനെ പെറ്റ് കഴിഞ്ഞ്, നാലാമത്തെ വയറ്റിലൊണ്ടായിരുന്നു,

നിനക്ക് വേറെ കൊഴപ്പമൊന്നുമില്ലല്ലോ അല്ലേ?

അവരൊരു നാക്കിനെല്ലില്ലാത്ത സത്രീയാണെന്ന് നീലിമയ്ക്ക് തോന്നി, എങ്കിലും അവരുടെ ചോദ്യത്തിന് ഉത്തരം നല്കാതിരിക്കാൻ ,അവൾക്ക് കഴിഞ്ഞില്ല

എനിക്ക് കുഴപ്പമൊന്നുമില്ല ,

അമ്മ പറഞ്ഞത് പോലെ, ഞങ്ങള് തല്ക്കാലം വേണ്ടെന്ന് വച്ചിരിക്കുവാ

അവരുടെ സംശയത്തിന് തല്ക്കാലം അയവ് വന്നെങ്കിലും, നാളുകൾ കഴിയുന്തോറും, വിശേഷം ചോദിക്കുന്നവരുടെ എണ്ണം കൂടി വന്നപ്പോൾ, ഗത്യന്തരമില്ലാതെ സുധാകരന് മുന്നിൽ, നീലിമയ്ക്ക് വിധേയത്വം പുലർത്തേണ്ടി വന്നു.

ഭാഗം-3

നീയിതെങ്ങോട്ടാ രാവിലെ?

കാപ്പി കുടി കഴിഞ്ഞ് ,സാരിയുടുത്ത് പുറത്തേയ്ക്കിറങ്ങുന്ന നീലിമയോട് സുധാകരൻ ചോദിച്ചു.

എനിക്ക് എംപ്ലോയ്മെൻ്റ് എക്സ്ചേഞ്ച് വരെയൊന്ന് പോകണം , ഡി ഇ ഓ ഓഫീസിൽ താല്കാലിക പ്യൂണായിട്ട് കയറാൻ വേണ്ടി ,ഒരു ഇൻ്റർവ്യു നടക്കുന്നുണ്ട് ,

ഒരു സ്ഥിര ജോലി കിട്ടുമെന്നോ, അതിന് പോകാൻ നിങ്ങളനുവദിക്കുമെന്നോ, 

ഒന്നും എനിക്ക് പ്രതീക്ഷയില്ല, പക്ഷേ ഞാൻ പഠിക്കുമ്പോൾ മുതലുള്ള, എൻ്റെ ആഗ്രഹം ഒരു ടീച്ചറാകുക എന്നതായിരുന്നു ,അല്ലെങ്കിൽ 

സ്ഥിരവരുമാനമുള്ള, എന്തെങ്കിലുമൊരു സർക്കാർ ജോലി നേടുക, 

ആ ആഗ്രഹം ഇപ്പോഴൊരു വാശിയായി മാറി, അത് കൊണ്ടാണ്, താല്കാലികമായിട്ടെങ്കിലും, ഏതെങ്കിലുമൊരു സർക്കാരോഫീസിൽ, ഒരു ദിവസമെങ്കിൽ ഒരു ദിവസം,

പ്യൂണായിട്ടെങ്കിലും ജോലി കിട്ടാനായി, ഒരു ശ്രമം നടത്തുന്നത്, അതിനെങ്കിലും നിങ്ങളെന്നെ അനുവദിക്കണം

എല്ലാം തീരുമാനിച്ചുറപ്പിച്ചത് പോലെ അവൾ ധൃതിയിൽ ഇറങ്ങിപ്പോയപ്പോൾ സുധാകരന് നോക്കി നില്ക്കാനേ കഴിഞ്ഞുള്ളു.

ഉച്ചകഴിത്ത് കണ്ടത്തിലെ ചെളിക്കുണ്ടിൽ നുകം 

പേറിയ കാളകളെ തെളിക്കുമ്പോൾ റോഡിലൂടെ കുടയും പിടിച്ച് നടന്ന് പോകുന്ന നീലിമയെ സുധാകരൻ കണ്ടു.

നീലിമേ.. അവിടെ നില്ക്ക്

അയാൾ വിളിച്ച് പറഞ്ഞിട്ട് ,അവളുടെയടുത്തേക്ക് വേഗം നടന്ന് ചെന്നു.

നീ പോയ കാര്യമെന്തായി ഇൻറർവ്യൂ പാസ്സായോ?

ഹേയ് എവിടുന്ന്? അതിനുള്ള യോഗം പോലും എനിക്കില്ലന്നാണ് തോന്നുന്നത് ,എന്തായാലും നിങ്ങൾക്ക് സന്തോഷമായില്ലേ?

ഞാൻ രാവിലെ പോയപ്പോൾ, നിങ്ങൾ മനസ്സിലാഗ്രഹിച്ചതും, എനിക്കീ ജോലി കിട്ടരുതെന്ന് തന്നെയല്ലേ? അല്ലെങ്കിലും, പണ്ട് മുതലേ ഞാനൊരു ഭാഗ്യദോഷിയാ, കൊതിച്ചതൊന്നും എനിക്ക് കിട്ടിയിട്ടില്ല, എന്തിന് നല്ലൊരു ജീവിതം പോലും

കടുത്ത നിരാശയിൽ അവളത് പറഞ്ഞിട്ട് പോയപ്പോൾ സുധാകരൻ കുറ്റബോധത്തോടെ നിന്നു.

ദിവസങ്ങൾ കഴിഞ്ഞു 

ഒരു ദിവസം സുഷമയുടെ വീട്ടിലേക്കുള്ള അരിയും തേങ്ങയും പച്ചക്കറികളുമൊക്കെയായി ,

രാവിലെ ടൗണിലേക്ക് പോയ  സുധാകരൻ, വൈകുന്നേരമാണ് തിരിച്ചെത്തിയത്.

നീയെവിടായിരുന്നു സുധാകരാ.. ഇത്രയും നേരം, സമയം വൈകുന്തോറും ബാക്കിയുള്ളവര് ആധിപിടിച്ച് ഒരു പരുവമായി

ശാരദ ഉത്ക്കണ്ഠയോടെ മകനോട് ചോദിച്ചു.

ഞാൻ ഇടയ്ക്ക് ഒരാളെ കാണാൻ കയറിയമ്മേ.. അവിടെ അദ്ദേഹമില്ലാതിരുന്നത് കൊണ്ട് വരുന്നത് വരെ കാത്തിരുന്നതാ അതാണ് നേരം വൈകിയത്

എല്ലാം കേട്ട് കൊണ്ട് നീലിമ അരമതിലിൽ ഇരുന്ന് വാരിക വായിക്കുന്നുണ്ടായിരുന്നെങ്കിലും സുധാകരൻ വന്നതും വിശേഷം പറയുന്നതും അവൾ ഗൗനിച്ചതേയില്ല

എനിക്ക് നിന്നോടൊരു കാര്യം പറയാനുണ്ടായിരുന്നു, ഒന്നകത്തേയ്ക്ക് വരു

അയാൾ നീലിമയുടെ അടുത്തെത്തി അവളോട് പറഞ്ഞിട്ട് മുറിയിലേക്ക് കയറിപ്പോയി.

ഡാ നീ വല്ലതും കഴിച്ചായിരുന്നോ

ങ്ഹാ ഞാൻ സുഷമേടെ വീട്ടിൽ നിന്ന് കഴിച്ചമ്മേ..

സുധാകരൻ മുറിയിൽ നിന്ന് കൊണ്ട് മറുപടി പറഞ്ഞു.

എന്താ പറയാനുണ്ടെന്ന് പറഞ്ഞത് ?

നീലിമ പുറകെ വന്ന് അക്ഷമയോടെ ചോദിച്ചു.

ഞാനിന്ന് നമ്മുടെ ദേവീവിലാസം സ്കൂളിൻ്റെ മാനേജരുടെ വീട്ടിൽ പോയിരുന്നത് കൊണ്ടാ വരാൻ താമസിച്ചത്

അതിന് ഞാനൊന്നും ചോദിച്ചില്ലല്ലോ? നിങ്ങളിഷ്ടമുള്ളപ്പോൾ പോകുകയോ വരികയോ ചെയ്യ് അതിന് ഞാനെന്ത് വേണം

നീലിമ നീരസത്തോടെ പറഞ്ഞു.

ഞാൻ പറഞ്ഞ് വരുന്നത് അതല്ല,

നീ പറഞ്ഞല്ലോ? നീയൊരു ടീച്ചറാകാൻ ഒത്തിരി ആഗ്രഹിച്ചിരുന്നെന്ന്, അതൊരിക്കലും നടക്കില്ലെന്ന് പറഞ്ഞാണ്, ഒരു പ്യൂണിൻ്റെ ജോലിയെങ്കിലും കിട്ടിയാൽ മതിയെന്നും പറഞ്ഞ്, നീയന്ന് ഇൻ്റർവ്യൂവിന് പോയതും, ഇൻ്റർവ്യൂ പാസ്സാകാതെ നിരാശയോടെ തിരിച്ച് വന്നതും

അതെ ,അതെന്തിനാ ഇപ്പോൾ പറയുന്നത് ,നിങ്ങളെക്കൊണ്ട് എനിക്ക് പ്യൂണിൻ്റെ പണി വാങ്ങിത്തരാൻ പറ്റുമോ

നീലിമ പരിഹാസത്തോടെ ചോദിച്ചു.

പ്യൂണിൻ്റെ പണിയല്ല, 

നീയാഗ്രഹിച്ചത് പോലെ ടീച്ചറായിട്ട് തന്നെ നിനക്ക് ഉടനെ ജോലിക്ക് കയറാൻ പറ്റും ,

ങ് ഹേ, നിങ്ങൾക്കെന്താ തലയ്ക്ക് വെളിവില്ലേ? എനിക്കൊന്നും മനസ്സിലാവുന്നില്ല

അതേ നീലിമേ.. ഞാൻ പറഞ്ഞത് സത്യമാണ് ,നമ്മൾ പഠിച്ച സ്കൂളിൽ ഇപ്പോൾ ഒരു ടീച്ചറുടെ ഒഴിവുണ്ട് ,മാനേജ്മെൻ്റ് അഞ്ചും ആറും ലക്ഷമൊക്കെയാണ് ചോദിക്കുന്നത് ,ഇപ്പോഴത്തെ മാനേജര് നമ്പൂതിരി മാഷും എൻ്റെ അച്ഛനുമായിട്ട് നല്ല സുഹൃത്തുക്കളായിരുന്നു ,അച്ഛൻ പണ്ട് പി ടി എ പ്രസിഡൻ്റാക്കെയായിരുന്നല്ലോ ആ പരിചയമൊക്കെ വച്ച് ഞാൻ മാഷുമായി സംസാരിച്ച് ഒരു നാല് ലക്ഷം രൂപ കൊടുത്താൽ 

നിനക്കവിടെ ടീച്ചറായി ജോലി തരാമെന്ന് മാഷ് ഉറപ്പ് തന്നു

ങ്ഹേ, സത്യമാണോ നിങ്ങളീ പറയുന്നത്

അതെ നീലിമേ.. സത്യമാണ്

അല്ലാ ഈ നാല് ലക്ഷം രൂപയെന്ന് പറയുന്നത് ചെറിയ തുകയൊന്നുമല്ല നിങ്ങളെന്ത് കണ്ടിട്ടാണ് വാക്ക് പറഞ്ഞിട്ട് വന്നത് എനിക്ക് വീട്ടിൽ നിന്ന് തന്ന സ്വർണ്ണം മുഴുവൻ വിറ്റാൽ പോലും ഒരു ലക്ഷം രൂപയേ കിട്ടുകയുള്ളു

നിൻ്റെ സ്വർണ്ണമൊന്നും വില്ക്കേണ്ട നീലിമേ.. അതൊക്കെ ഞാൻ സംഘടിപ്പിച്ചിട്ടുണ്ട്

അതെങ്ങനാ, ലോണെടുക്കാനോ അപ്പോൾ പിന്നെ എനിക്ക് കിട്ടുന്ന ശബ്ബളം ലോണടയ്ക്കാനേ തികയു

ഇല്ല നീലിമേ..നീയതൊന്നുമോർത്ത് വിഷമിക്കേണ്ട ഞാൻ കുറെ വർഷങ്ങളായി സമ്പാദിച്ച് വച്ചിരിക്കുന്ന ഒരു നാല് ലക്ഷം രൂപയുണ്ട്

അത് മറ്റൊന്നിനുമല്ല ,കാളകളെ കൊണ്ട് കണ്ടം ഉഴുത് മറിക്കുക എന്ന് പറയുന്നത് കുറച്ച് കഷ്ടപ്പാടുള്ള പണിയാ, അത് കൊണ്ട് ഒരു ട്രാക്ടർ വാങ്ങാമെന്ന് കരുതി സ്വരുക്കൂട്ടി വച്ചിരുന്ന പൈസയാ ,സാരമില്ല ഞാൻ കുറച്ച് നാള് കൂടി കഷ്ടപ്പെടണമെന്നല്ലേയുള്ളു, എനിക്കിപ്പോൾ നിൻ്റെ സന്തോഷമാണ് പ്രധാനം, നാളെ തന്നെ ഞാൻ പൈസ കൊണ്ട് മാഷിനെ ഏല്പിക്കും ,പിന്നെ പേരിനൊരു ഇൻ്റർവ്യൂ കൂടി കഴിഞ്ഞാൽ അടുത്തയാഴ്ച മുതൽ നിനക്ക് ജോലിക്ക് കയറാം

നീലിമയ്ക്കത് വിശ്വസിക്കാൻ കഴിഞ്ഞില്ല താൻ സ്വപ്നം കാണുകയാണോ എന്ന സംശയത്തിൽ അവൾ കൈത്തണ്ടയിൽ സ്വയം നുള്ളി നോക്കി

പിറ്റേ ആഴ്ച മുതൽ തൻ്റെ ജീവിതത്തിലെ ഏറ്റവും വലിയ ആഗ്രഹമായിരുന്ന ജോലിക്ക് നീലിമ പോയി തുടങ്ങി.

രണ്ട് മാസം കഴിഞ്ഞ് ഒരു ദിവസം ഉച്ചകഴിഞ്ഞ് സ്റ്റാഫ് റൂമിൽ മറ്റ് ടീച്ചേഴ്സുമായി കുശലം പറഞ്ഞ് കൊണ്ടിരിക്കുമ്പോഴാണ് ,

സുധാകരൻ സ്കൂളിൻ്റെ ഗേറ്റ് കടന്ന് വരുന്നത് നീലിമ കണ്ടത്

അയാളുടെ മുഷിഞ്ഞ വേഷം കണ്ടപ്പോൾ നീലിമയ്ക്ക് നാണക്കേട് തോന്നി

അവൾ വേഗം സ്റ്റാഫ് റൂമിൽ നിന്നിറങ്ങി അയാളുടെ അടുത്തേയ്ക്ക് നടന്ന് ചെന്നു.

നിങ്ങളെന്തിനാ ഇപ്പോഴിങ്ങോട്ട് എഴുന്നള്ളിയത് മനുഷ്യനെ നാണം കെടുത്താനായിട്ട്

അയ്യോ നീലിമേ.. ഞാൻ നിന്നെക്കാണാൻ വന്നതല്ല

ഇവിടുത്തേയ്ക്കുള്ള അരിയുമായി വന്നതാ ,പണ്ട് മുതലേ ഉച്ചകഞ്ഞി വയ്ക്കാനുള്ള അരി നമ്മുടെ പാടത്തൂന്നാ കൊടുക്കുന്നത്, വഞ്ചിയിൽ അരിയും ചാക്കുമിരിപ്പുണ്ട്, അതൊന്ന് നമ്പൂതിരിമാഷോട് പറയാൻ, അദ്ദേഹത്തിൻ്റെ റൂമിലേക്ക് പോകുവാ ഞാൻ

ഉം ശരി ശരി ,വേഗം പറഞ്ഞിട്ട് പൊയ്ക്കോ, ആരോടും എൻ്റെ ഭർത്താവാണെന്ന് പറഞ്ഞ് , പരിചയപ്പെടുത്താനൊന്നും നില്ക്കണ്ട ,കേട്ടല്ലോ?

ഹേയ് ഇല്ല, അല്ലേലും ഈ വേഷത്തിൽ എന്നെ കണ്ടാൽ ഞാൻ നിൻ്റെ ഭർത്താവാണെന്ന് ആർക്കും തോന്നില്ല ,വീട്ടിൽ നിന്നിറങ്ങിയപ്പോൾ നല്ല വേഷമായിരുന്നു, പിന്നെ വഞ്ചിയിലേക്ക് അരിയും ചാക്കുമൊക്കെ പിടിച്ച് കയറ്റിയപ്പോൾ മുഷിഞ്ഞതാ, എന്നാൽ നീ പൊയ്ക്കോ, ദേ ആരോ ഇങ്ങോട്ട് വരുന്നുണ്ട്

ചിരിച്ച് കൊണ്ട് മറുപടി പറഞ്ഞെങ്കിലും, അയാളുടെ ഉള്ളിലൊരു സങ്കടം അണപൊട്ടാൻ വീർപ്പ് മുട്ടുന്നുണ്ടായിരുന്നു. 

ഒരു ദിവസം സ്കൂള് കഴിഞ്ഞ് വീട്ടിലെത്തിയ നീലിമ മുറ്റത്തൊരു സ്കൂട്ടർ ഇരിക്കുന്നത് കണ്ട് അമ്പരന്നു

ഇതാരുടെയാ അമ്മേ.. ഈ സ്‌കൂട്ടറ്?

മുറ്റത്ത് ഉണക്കാനിട്ടിരുന്ന പാണ്ടിമുളക് തഴപ്പായിൽ ചുരുട്ടി എടുത്ത് കൊണ്ടിരുന്ന ശാരദയോടവൾ ജിജ്ഞാസയോടെ ചോദിച്ചു.

ങ്ഹാ അത് സുധാകരൻ വാങ്ങിയതാ അവൻ്റെ കൂട്ടുകാരനാ ഇവിടെ കൊണ്ട് വച്ചത്

ങ്ഹേ, പുള്ളിക്കാരൻ സ്കൂട്ടറ് ഓടിച്ച്പഠിക്കാൻ തീരുമാനിച്ചോ?

ഉത്ക്കണ്ഠയോടെയവൾ അകത്തേയ്ക്ക് കയറിച്ചെന്നു

നിങ്ങളെന്തിനാണ് സ്കൂട്ടറൊക്കെ വാങ്ങി വെറുതെ കാശ് കളഞ്ഞത്? നിങ്ങളതൊന്ന് പഠിച്ചെടുത്തിട്ട് എന്നെങ്കിലുമെനിക്ക് സ്കൂട്ടറിൽ യാത്ര ചെയ്യാൻ പറ്റുമോ?

അവൾ പരിഹാസത്തോടെ ചോദിച്ചു.

ഇല്ലെന്ന് നിന്നെപ്പോലെ തന്നെ എനിക്കുമറിയാം, അതിന് ഞാൻ ശ്രമിക്കുമ്പോഴൊക്കെ ,പണ്ട് സൈക്കിള് ചവിട്ട്പഠിപ്പിക്കാൻ അച്ഛൻ കൂടെ ഓടിയതും, അന്ന് ഞാനും സൈക്കിളും അച്ഛൻ്റെ കൈവിട്ട് മുന്നോട്ട് നിയന്ത്രണമില്ലാതെ പോകുന്നത് കണ്ട് ,എതിരെ പാഞ്ഞ് വരുന്ന കാറ് എന്നെ ഇടിച്ചിടുമെന്ന് ഭയന്ന്, എൻ്റെ ജീവൻ രക്ഷിക്കാൻ ഓടി വന്ന അച്ഛൻ്റെ ദേഹത്ത് കൂടി, കാറ് കയറിയിറങ്ങി പോകുന്നതും ഇപ്പോഴും എൻ്റെ മനസ്സിൽ നിന്ന് മാഞ്ഞിട്ടില്ല ,അത് കൊണ്ടാണ് ഞാനിത് വരെ സൈക്കിള് പോലും ചവിട്ടാൻ പഠിക്കാതിരുന്നത്, ഇപ്പോൾ സ്കൂട്ടറ് വാങ്ങിയത് എനിക്കല്ല നിനക്കാണ്,

എനിക്കോ, അതിന് എനിക്ക് ഓടിക്കാൻ അറിയില്ലല്ലോ?

അതിനെന്താ പഠിക്കാമല്ലോ?

ഇപ്പോൾ ഒരു പാട് സ്ത്രീകൾ സ്കൂട്ടറും കാറുമൊക്കെ പഠിക്കുന്നുമുണ്ട്, ഓടിക്കുന്നുമുണ്ട്

നാളെ മുതൽ നീയും ഡ്രൈവിംഗ് സ്കൂളിൽ പോകണം അതിന് വേണ്ട ഏർപ്പാടൊക്കെ ഞാൻ ചെയ്തിട്ടുണ്ട് ,നിന്നെ എൻ്റെ പുറകിലിരുത്തുന്നതിനെക്കാൾ നല്ലതല്ലേ? നീ സ്വയം സ്കൂട്ടറോടിച്ച് സ്കൂളിലും മറ്റുമൊക്കെ പോകുന്നത്, ഇനി മുതൽ നിനക്ക് നടന്ന് വെയില് കൊള്ളാതെ പോകാമല്ലോ?

ഇപ്പോൾ തന്നെ നിൻ്റെ മുഖമാകെ കറുത്ത് കരുവാളിച്ചു, സുന്ദരിയും പ്രസന്നവതിയുമായ നീലിമ ടീച്ചറെ കാണാൻ, എന്നെ പോലെ കുട്ടികൾക്കും ആഗ്രഹം കാണില്ലേ?

ഉം ...ആള് ഞാൻ കരുതിയ പോലൊന്നുമല്ലല്ലോ? ദീർഘവീക്ഷണമൊക്കെയുണ്ടല്ലേ?

എങ്കിൽ ഞാൻ പോയെൻ്റെ സ്കൂട്ടറൊന്ന് കണ്ണ് നിറച്ച് കാണട്ടെ

അവളുടെ സ്നേഹപ്രകടനത്തിനായി പ്രതീക്ഷയോടെ കാത്തിരുന്ന സുധാകരന് നിരാശയായിരുന്നു ഫലം.

ഭാഗം-4

വൈകുന്നേരം സ്കൂളിൽ നിന്നും വീട്ടിലെത്തിയപ്പോൾ, വരാന്തയുടെ പടിക്കെട്ടിലിരുന്ന്, അപരിചിതയായ ഒരു യുവതി, ശാരദയുടെ തലയിലെ പേൻ നോക്കി കൊടുക്കുന്നത് കണ്ട്, സ്കൂട്ടർ സ്റ്റാൻ്റിൽ വച്ചിട്ട് നീലിമ ,ആകാംക്ഷയോടെയാണ് അവരുടെയടുത്തേക്ക് വന്നത്.

ആങ്ഹാ, ഇതാണോ അമ്മായീ സുധിയേട്ടൻ്റെ ഭാര്യ?

അത് കേട്ട് ശാരദ തല ഉയർത്തി നോക്കി

ങ്ഹാ, ഇതാണ് മോളേ നീലിമ

ഹലോ നമ്മളാദ്യം കാണുകയാണല്ലേ? ഞാൻ നിങ്ങളുടെ കല്യാണത്തിന് സ്ഥലത്തില്ലായിരുന്നു ,ഭർത്താവുമായി പഞ്ചാബിലായിരുന്നു അദ്ദേഹം അവിടെ പട്ടാളത്തിലാണ് കല്യാണം കഴിഞ്ഞ് പോയി അവിടെ രണ്ട് വർഷം നിന്നു ,രണ്ട് ദിവസം മുമ്പ് , ഞാനിങ്ങ് തിരിച്ച് പോന്നു

മോളേ നീലിമേ.. ഇതാണ് ശാലിനി ,എൻ്റെ ആങ്ങളയുടെ മോളാ ,രണ്ട് വർഷം മുമ്പായിരുന്നു ഇവളുടെ കല്യാണം, സുധാകരനെ കൊണ്ട് ഇവളെ കല്യാണം കഴിപ്പിക്കണമെന്നായിരുന്നു എൻ്റെ ആഗ്രഹം ,അവനും ഇവൾക്കും പരസ്പരം ഇഷ്ടവുമായിരുന്നു, പക്ഷേ ഇവളുടെ അച്ഛന്, ജോലിക്കാരെ തന്നെ വേണമെന്ന ഒറ്റ വാശിയായിരുന്നു ,അങ്ങനെയാ ഇവളെ പട്ടാളക്കാരന് തന്നെ കെട്ടിച്ച് കൊടുത്തത്

ഉം ശരിയാ നീലിമേ.. അച്ഛനും അമ്മയും മക്കളുടെ നന്മയ്ക്ക് വേണ്ടിയാണ് ഓരോന്ന് ചെയ്ത് വയ്ക്കുന്നത്, പക്ഷേ എൻ്റെ കാര്യത്തിൽ അത് പാളിപ്പോയി, എൻ്റെ ഭർത്താവ് ഒരു സംശയ രോഗിയായിരുന്നു ,കല്യാണം കഴിഞ്ഞ് ആദ്യമായി ഞങ്ങളിവിടെയാണ് വിരുന്ന് വന്നത് ,അന്ന് അമ്മായി ഇത് പോലെ എന്നെ സുധിയേട്ടനെ കൊണ്ട് കെട്ടിക്കാനിരിക്കുകയായിരുന്നു എന്ന് പറഞ്ഞതിന് ശേഷം, അങ്ങേർക്ക് എപ്പോഴും സംശയമായിരുന്നു, ഞങ്ങള് തമ്മിൽ കല്യാണത്തിന് മുമ്പ് അവിഹിത ബന്ധമുണ്ടായിരുന്നോ എന്ന സംശയം ,അതിൻ്റെ പേരിൽ എന്നും വഴക്ക്, ഒടുവിൽ എനിക്ക് മടുത്തിട്ടാണ്, ഞാനിങ്ങോട്ട് തിരിച്ച് വന്നത്

അല്ലാ അപ്പോൾ ,ശാലിനിക്ക് കുട്ടികളൊന്നുമില്ലേ?

നീലിമ ജിജ്ഞാസയോടെ ചോദിച്ചു.

ഓഹ് ഭാഗ്യത്തിന് ഇത് വരെ ഞാൻ ഗർഭിണിയായിട്ടില്ല, അല്ലെങ്കിൽ ഞങ്ങളുടെ വഴക്കിനിടയിൽ അതൊരു വലിയ ബാധ്യത ആയേനെ? അല്ലാ നീലിമയ്ക്ക് വിശേഷമൊന്നുമായില്ലേ?

ഹേയ് ഇല്ല

ഒഴുക്കൻ മട്ടിൽ മറുപടി പറഞ്ഞിട്ട് നീലിമ വേഗം അകത്തേയ്ക്ക് കയറി പോയി.

സുധിയേട്ടൻ എപ്പോഴാ വരുന്നത് ഞാൻ വന്നിട്ട് കണ്ടതേയില്ല?

നീലിമ സാരി അഴിച്ചിടുമ്പോൾ, ശാലിനി മുറിയിലേക്ക് കയറി വന്നു.

ആഹ് അറിയില്ല,അമ്മ ഒന്നും പറഞ്ഞില്ലേ?

ഇല്ല അമ്മായിയോട് ഒന്നും പറയാതെയാണ് പോയതെന്ന് പറഞ്ഞു

ഞാൻ രാവിലെ ഇവിടുന്ന് പോയതല്ലേ ശാലിനി ,

അത് കൊണ്ട് എനിക്കും വലിയ നിശ്ചയമില്ല

സുധിയേട്ടൻ വന്നിട്ട് എനിക്ക് ടൗണ് വരെയൊന്ന് പോകണമായിരുന്നു കുറച്ച് സാധനങ്ങൾ വാങ്ങാനുണ്ട് ഇവിടെയിപ്പോൾ സ്കൂട്ടറുള്ളത് കൊണ്ട് വേഗം പോയി വരാമല്ലോ?

അതിന് പുള്ളിക്കാരന് സ്കൂട്ടർ ഓടിക്കാനൊന്നുമറിയില്ല

നീലിമ പരിഹാസച്ചിരിയോടെ പറഞ്ഞു

അതെനിക്കുമറിയാം പക്ഷേ ഞാനോടിക്കുമല്ലോ സുധിയേട്ടനെ പുറകിലിരുത്താനാ, എൻ്റെയൊരു ധൈര്യത്തിന്

എങ്കിൽ ഞാൻ വന്നാൽ പോരെ?

ഹേയ് നീലിമയെ ബുദ്ധിമുട്ടിക്കുന്നത് ശരിയല്ലല്ലോ മാത്രമല്ല നമ്മുടെ ഇടയിൽ ഒരകൽച്ചയുണ്ട് സുധിയേട്ടനാകുമ്പോൾ ഞങ്ങൾക്കിടയിൽ ഫോർമാലിറ്റികളൊന്നുമില്ലല്ലോ?

ഇവളാള് കൊള്ളാമല്ലോ ?അവൾക്ക് സർക്കീട്ടിന് പോകാൻ തൻ്റെ ഭർത്താവിനെ തന്നെ വേണമല്ലേ? അവളുടെ വേഷവും സംസാരവുമൊക്കെ കണ്ടിട്ട് 

ആളത്ര വെടിപ്പല്ലെന്ന് തോന്നുന്നു.

നീലിമ മനസ്സിൽ പറഞ്ഞു

അവൾക്ക് ശാലിനിയുടെ സംസാരരീതിയും വേഷവുമൊന്നും തീരെ ദഹിച്ചില്ല

സൂക്ഷിച്ച് നോക്കിയാൽ ആകാര വടിവ് വ്യക്തമാക്കുന്ന സിൽക്കിൻ്റെ ഒരു സ്ളീവ് ലെസ്സ് ടോപ്പും ബോട്ടവുമായിരുന്നു അവൾ ധരിച്ചിരുന്നത് 

ശാലിനിക്ക് എൻ്റെ ഒരു നൈറ്റിയെടുത്ത് തരാം ഈ വേഷം ഒട്ടും കംഫർട്ടല്ല

എന്നാര് പറഞ്ഞു, എനിക്കും നോർത്തിൽ ചെല്ലുമ്പോൾ ആദ്യമൊക്കെ അങ്ങനെ തോന്നിയിരുന്നു പക്ഷേ ഇപ്പോൾ എനിക്കുമിത് ശീലമായി

പക്ഷേ സുധാകരേട്ടൻ വരുമ്പോൾ ശാലിനിയെ ഈ വേഷത്തിൽ കണ്ടാൽ?

കണ്ടാലെന്താ? സുധിയേട്ടന് ഒന്നും തോന്നില്ല, ഞാൻ ജനിച്ചപ്പോൾ മുതൽ കാണാൻ തുടങ്ങിയതാ

സുധിയേട്ടനെ, എൻ്റെ ജീവിതത്തിൽ ഇത്രയും മാന്യനായൊരു വ്യക്തിയെ ഞാൻ കണ്ടിട്ടില്ല ,നീലിമ ഭാഗ്യവതിയാ എനിക്ക് തന്നോട് ഇപ്പോൾ അസൂയ തോന്നുവാ

ശാലിനിയത് പറഞ്ഞപ്പോൾ നീലിമയ്ക്ക് വല്ലായ്ക തോന്നി.

നേരം ഇരുട്ടി തുടങ്ങി രാത്രി ഏറെ വൈകിയിട്ടും സുധാകരനെ കാണാതിരുന്നപ്പോൾ ആദ്യമായി നീലിമയുടെ ഉള്ളിൽ എന്തോ ഒരു അസ്വസ്ഥത തുടങ്ങി.

സുധാകരൻ വന്നിട്ട് ടൗണിൽ പോകാൻ വേണ്ടി കാത്തിരുന്ന,ശാലിനിയും നിരാശയോടെ ,ഒടുവിൽ ഉറങ്ങാനായി അമ്മായിയോടൊപ്പം മുറിയിൽ കയറി കതകടച്ചു.

കുറച്ച് നേരം കൂടി സുധാകരനെ നോക്കിയിരുന്നിട്ട് കണ്ണിലുറക്കം പിടിച്ച നീലിമയും കതക് ചാരിയിട്ട് കട്ടിലിൽ പോയി കിടന്നു .

രാത്രിയുടെ ഏതോ യാമത്തിൽ പട്ടികൾ ഓലിയിടുന്ന ശബ്ദം കേട്ട് നീലിമ ഞെട്ടിയുണർന്നു

തൻ്റെയരികിൽ സുധാകരൻ ഇല്ലെന്ന് മനസ്സിലാക്കിയ അവൾ ആശങ്കയോടെ ചാടിയെഴുന്നേറ്റ് ചാരിയിട്ടിരുന്ന വാതിൽ മെല്ലെത്തുറന്ന്, മുറിയിൽ നിന്ന് പുറത്തേയ്ക്കിറങ്ങി .

ഹാളിലെത്തിയ നീലിമ വരാന്തയിൽ ഇരുട്ടത്ത് രണ്ട് ആൾരൂപങ്ങൾ നില്ക്കുന്നത് കണ്ട് ലെറ്റ് ഓൺ ചെയ്യാതെ കുറച്ച് കൂടെ അടുത്തേയ്ക്ക് ചെന്നു

അത് സുധാകരനും ശാലിനിയുമാണെന്ന് തിരിച്ചറിഞ്ഞപ്പോൾ നീലിമയുടെ ഉള്ളിലൂടെ ഒരു മിന്നൽപ്പിണർ കടന്ന് പോയി.

അവരെന്താ സംസാരിക്കുന്നതെന്ന് അറിയാനായി ശബ്ദമുണ്ടാക്കാതെ നീലിമ മുൻവാതിലിൻ്റെ പുറകിൽ ഒതുങ്ങി നിന്ന് ചെവിയോർത്തു.

സുധിയേട്ടനറിയുമോ? നിങ്ങള് കാരണമാ, ഞാനയാളുമായി വഴക്കിട്ട് വന്നത് ,ഞാനിപ്പോഴും നിങ്ങളെ സ്നേഹിക്കുന്നുണ്ടെന്ന് അങ്ങേർക്കറിയാം , എന്നിട്ടും നിങ്ങൾക്കത് മനസ്സിലാകുന്നില്ലല്ലോ?

ശാലിനീ... നീയൊരു കാര്യം മനസ്സിലാക്കണം ,മുമ്പ് നമ്മൾ തമ്മിൽ ഇഷ്ടമായിരുന്നു എന്നും കല്യാണം കഴിക്കണമെന്ന് ആഗ്രഹിച്ചിരുന്നു എന്നുള്ളതും സത്യമാണ് ,പക്ഷെ നിൻ്റെ കല്യാണം കഴിഞ്ഞതോട് കൂടി എൻ്റെ മനസ്സിൽ പിന്നെ നീയുണ്ടായിട്ടില്ല.എനിക്കിന്നൊരു ഭാര്യയുണ്ട് ,പണ്ട് ഞാൻ നിന്നെ സ്നേഹിച്ചിരുന്നതിനെക്കാൾ എത്രയോ ഇരട്ടിയാണ് ഞാനിപ്പോൾ എൻ്റെ ഭാര്യയെ സ്നേഹിക്കുന്നതെന്ന് നിനക്കറിയാമോ? അവളാണിപ്പോൾ എൻ്റെ സുഖവും സന്തോഷവുമെല്ലാം അവളെ വഞ്ചിച്ച് കൊണ്ട് നിന്നയെനിക്ക് സ്നേഹിക്കാൻ കഴിയില്ല

മ്ഹും ഭാര്യ ,നിങ്ങള് താലികെട്ടിയെന്നൊരു ബന്ധമല്ലാതെ ഭർത്താവാണെന്ന പരിഗണന നീലിമ നിങ്ങൾക്കെപ്പോഴെങ്കിലും തന്നിട്ടുണ്ടോ? എന്നെങ്കിലും അവള് നിങ്ങളെ സ്നേഹിച്ചിട്ടുണ്ടോ? നിങ്ങള് പാടത്ത് പൊരിവെയിലിൽ കിടന്ന് കഷ്ടപ്പെട്ട് വരുമ്പോൾ നിങ്ങൾക്ക് കുളിക്കാൻ ഇത്തിരി വെള്ളം ചൂടാക്കി തന്നിട്ടുണ്ടോ നിങ്ങളുടെ മുഷിഞ്ഞ തുണികൾ നിങ്ങൾ സ്വന്തമായല്ലേ ഇപ്പോഴും അലക്കുന്നത്, സ്നേഹമുള്ള ഭാര്യയായിരുന്നെങ്കിൽ നിങ്ങളെയവൾ കൈവെള്ളയിൽ കൊണ്ട് നടക്കുമായിരുന്നു ,ഞാനിതൊക്കെ എങ്ങനെ അറിഞ്ഞെനായിരിക്കും അമ്മായിയാണ് എല്ലാം എന്നോട് പറഞ്ഞത് ,തെറ്റ് പറ്റിപ്പോയെന്ന കുറ്റബോധം ഇപ്പോഴവർക്കുണ്ട്

ഭർത്താവിന് കുളിക്കാൻ വെള്ളം ചൂടാക്കി കൊടുക്കുന്നതും ,അയാളുടെ മുഷിഞ്ഞ വസ്ത്രങ്ങൾ അലക്കി കൊടുക്കുന്നതുമാണ് ഭാര്യയുടെ സ്നേഹമെന്ന് കരുതിയിരിക്കുന്ന നിനക്ക് തെറ്റി ശാലിനീ ... ഒരു ഉത്തമയായ ഭാര്യ,സ്നേഹം പ്രകടിപ്പിക്കുന്നത് മറ്റുള്ളവരുടെ മുന്നിൽ വച്ചല്ല, അവളുടെ യഥാർത്ഥ സ്നേഹം പുറത്ത് വരുന്നത് കിടപ്പറയിൽ ഭാര്യയും ഭർത്താവും മാത്രമുള്ള സ്വകാര്യ നിമിഷങ്ങളിലാ, അതെന്തായാലും അമ്മ കണ്ടിരിക്കാൻ വഴിയില്ല അത് കൊണ്ടാണ് അമ്മ നിന്നോട് അങ്ങനെ പറഞ്ഞത്

മ്ഹും നിങ്ങള് നോക്കിക്കോ സുധിയേട്ടാ ... ഭാര്യയെ ഇങ്ങനെ അന്ധമായി സ്നേഹിക്കുന്ന എല്ലാ ഭർത്താക്കന്മാർക്കും പണി കിട്ടിയിട്ടുണ്ട് ,നിങ്ങളും ഇന്നല്ലെങ്കിൽ നാളെ വഞ്ചിക്കപ്പെടും ,ലക്ഷങ്ങൾ മുടക്കി നിങ്ങളവളെ വലിയ ടീച്ചറാക്കിയില്ലെ ? 

ഇപ്പോൾ അവളും നിങ്ങളും 

തമ്മിൽ 

ഒരു പാട്അന്തരമുണ്ട് ,

നാളെയൊരിക്കൽ, ടീച്ചറായ നീലിമയ്ക്ക് വെറുമൊരു കർഷകനായ ഭർത്താവിനോട് പുശ്ചം തോന്നും, അന്ന് യോഗ്യനായ മറ്റൊരുത്തൻ്റെ കൂടി അവൾ പോയിരിക്കും ,ഇത് ശാലിനിയാണ് പറയുന്നത്

പടേ ...

അവൾ പറഞ്ഞ് തീരുന്നതിന് മുമ്പ് സുധാകരൻ കൈവലിച്ച് ശാലിനിയുടെ ചെകിട്ടത്തടിച്ചു.

കണ്ട് നിന്ന നീലിമ അറിയാതെ കവിളത്ത് കൈവെച്ച് പോയി.

എന്നെ നീ എന്ത് പറഞ്ഞാലും ഞാൻ സഹിക്കും പക്ഷേ എൻ്റെ ഭാര്യയെക്കുറിച്ച് അപവാദം പറഞ്ഞാലുണ്ടല്ലോ ആ നാവ് ഞാൻ പിഴുതെടുക്കും,മര്യാദയ്ക്ക് പോയി കിടന്നുറങ്ങിക്കോ എന്നിട്ട് നാളെ രാവിലെ ഇവിടുന്ന് സ്ഥലം വിട്ടോണം

അതും പറഞ്ഞ് സുധാകരൻ തിരിഞ്ഞപ്പോൾ നീലിമ വേഗം ബെഡ് റൂമിലേക്ക് ഓടിച്ചെന്ന് ഒന്നും സംഭവിക്കാത്തത് പോലെ കട്ടിലിൽ കയറി കിടന്നു.

പുറകെ സുധാകരൻ വന്ന് മുറിയുടെ വാതിലടച്ച് ഷർട്ടഴിച്ചിട്ട് കട്ടിലിൽ കയറി മലർന്ന് കിടന്നു

കുറച്ച് കഴിഞ്ഞപ്പോൾ നീലിമ തിരിഞ്ഞ് ,വലത് കൈ കൊണ്ട് അയാളെ ചുറ്റിപ്പിടിച്ചിട്ട് തൻ്റെ മുഖം അയാളുടെ നെഞ്ചിലേക്ക് ചേർത്ത് വച്ചപ്പോൾ സുധാകരൻ അമ്പരന്നു.

അയാളുടെ നെഞ്ചിലേക്ക് നീലിമയുടെ ചുട്കണ്ണീര് വീണപ്പോഴാണ് അവൾ കരയുകയാണെന്ന് സുധാകരന് മനസ്സിലായത്

അതെന്തിനാണെന്ന് അയാൾ ചോദിച്ചില്ല ,കാരണം അയാൾക്കറിയാമായിരുന്നു.

DOWNLOAD PDF STORY CLICK HERE

📝സജി തൈപ്പറമ്പ്