🍁അമാവാസി🍁ഫുൾ പാർട്ട്🍁

🍁അമാവാസി🍁ഫുൾ പാർട്ട്🍁

അമ്മേ... ജയേട്ടന് ടൗണിനടുത്ത് എവിടേക്കെങ്കിലും ഒരു വീടെടുത്ത് മാറണമെന്നുണ്ട്

മടിച്ച് മടിച്ചാണ് അമിദ, അമ്മയോട് അക്കാര്യം പറഞ്ഞത്.

ഇവിടെന്താ ഇപ്പോഴൊരു കുറവ്? അവനിവിടെ

ഉണ്ണാനുമുടുക്കാനുമില്ലേ? കിടക്കാൻ സൗകര്യമില്ലേ? നിങ്ങൾക്കുറങ്ങാൻ ഈ വീട്ടിലെ ഏറ്റവും വലിയ മുറിയല്ലേ തന്നിട്ടുള്ളത്, പിന്നെന്താ അവനിവിടെ പൊറുത്താൽ ,നിന്നെ കല്യാണമാലോചിച്ചപ്പോൾ ,

മരണം വരെ

ഈ തറവാട്ടിൽ തന്നെ താമസിച്ച് കൊള്ളാമെന്ന എഗ്രിമെൻ്റിലല്ലേ ?അവൻ നിന്നെ കല്യാണം കഴിച്ചത് ,അതിന് പ്രത്യുപകാരമായി കെട്ട് പ്രായം കഴിഞ്ഞ് നിന്നിരുന്ന അവൻ്റെ രണ്ട് പെങ്ങൻമാരെയാണ്, ഞാൻ പണവും പണ്ടവും കൊടുത്ത് കെട്ടിച്ചയച്ചത്,

എന്നിട്ട് അതൊക്കെ അവൻ മറന്നു പോയോ ?

ശാരദാമ്മ നീരസത്തോടെ ചോദിച്ചു.

അമ്മേ ഒന്ന് പതുക്കെ ,അത് മറ്റൊന്നുമല്ല ഇത്ര ദൂരം ,ജയേട്ടന്

ദിവസവും യാത്ര ചെയ്യാനുള്ള ബുദ്ധിമുട്ട് ഒഴിവാക്കാനാണ്

എങ്കിലവൻ, ടൗണിലുള്ള കടയിലേക്ക് 

പോകേണ്ടെന്ന് പറ,

അതും കൂടി ഞാൻ ആനന്ദനെ ഏല്പിക്കാം ,അവനിവിടുത്തെ കൃഷിയും മറ്റും നോക്കട്ടെ, അതാവുമ്പോൾ യാത്ര ചെയ്യണ്ടല്ലോ?

അതമ്മേ.., ഡിഗ്രിക്കാരനായ ജയേട്ടനോട് എങ്ങനാ, ചെളിയിലിറങ്ങി പണി ചെയ്യാൻ പറയുന്നത് ?

ഓഹ് പിന്നേ... അതിലും വലിയ പഠിപ്പും പത്രാസുമുള്ളോരൊക്കെ 

കൃഷി ചെയ്യുന്നു, പിന്നെയാ നിൻ്റെ ജയേട്ടൻ്റെയൊരു ഡിഗ്രി,,

ശാരദാമ്മ പുച്ഛത്തോടെ ചിറി കോട്ടി.

അത് മാത്രമല്ലമ്മേ.. കുട്ടികൾ വളർന്ന് വരുവല്ലേ? അവർക്ക് നല്ല വിദ്യാഭ്യാസം കൊടുക്കണമെന്നാണ് ഞങ്ങളുടെ ആഗ്രഹം ,അതിന് പറ്റിയ സ്കൂളുകൾ ടൗണിലല്ലേ ഉള്ളത്

മ്ഹും,,, നിങ്ങൾക്ക് താമസം മാറണമെന്ന് അത്ര നിർബന്ധമാണെങ്കിൽ ഞാൻ തടയുന്നില്ല, ഇഷ്ടം പോലെയാവട്ടെ

മകൾ തീരുമാനത്തിലുറച്ച് തന്നെയാണെന്ന് മനസ്സിലായപ്പോൾ, ഗൗരവം വിടാതെ ശാരദാമ്മ സമ്മതം മൂളി.

പക്ഷേ അതിന് നല്ലൊരു തുക വേണം ,എൻ്റെ ഷെയറ് കിട്ടിയിരുന്നെങ്കിൽ ...

അമ്മയുടെ പ്രതികരണം താൻ പ്രതീക്ഷിക്കുന്നതിനുമപ്പുറമായിരിക്കുമെന്ന കണക്ക് കൂട്ടലിൽ തന്നെയായിരുന്നു അമിദ, രണ്ടും കല്പിച്ച് അത് ചോദിച്ചത് .

ഓഹ് അപ്പോൾ അതാണ് കാര്യം ,ഈ കാണുന്നതൊക്കെ ഞാനും എൻ്റെ ഭർത്താവും കൂടി നല്ലത് പോലെ അദ്ധ്വാനിച്ചുണ്ടാക്കിയതാണ് ,

അത് വെട്ടിമുറിച്ചിട്ട് നീയൊന്നു മങ്ങനെ ടൗണിൽ പോയി സുഖിച്ച് ജീവിക്കണ്ടാ ,

സ്വന്തമായിട്ടെന്തെങ്കിലുമുണ്ടെങ്കിൽ, പോയി വാങ്ങുകയോ, താമസം മാറുകയോ ആവാം, ഇനി ഈ പേരും പറഞ്ഞ് എൻ്റെയടുത്തേക്ക് വന്ന് പോകരുത്

ശാരദാമ്മയുടെ ശബ്ദമുയരുന്നത് കണ്ട് അമിദ പതിയെ അവിടുന്ന് പിൻവാങ്ങി

തൻ്റെ മരുമകന് താൻ ശബ്ബളമായി ഒന്നും കൊടുക്കാത്തത് കൊണ്ട് അവരുടെ കൈയ്യിൽ നീക്കിയിരിപ്പൊന്നുമുണ്ടാവില്ലെന്ന് ശാരദാമ്മയ്ക്ക് നല്ല ഉറപ്പുണ്ടായിരുന്നു

ആ നാട്ടിലെ പഴക്കം ചെന്ന തറവാടുകളിൽ സാമ്പത്തികമായി മുന്നോക്കം നില്ക്കുന്ന വീടായിരുന്നു ശാരദാമ്മയുടെ പഞ്ചമം എന്ന മണി സൗധം

അൻപതിലധികം തൂണുകളിൽ താങ്ങി നിർത്തിരിക്കുന്ന പഴയ കൊട്ടാരം പോലെയുള്ള ആ ബംഗ്ളാവിൽ ധാരാളം കിടപ്പുമുറികളും വലിയ ഹാളും ഡൈനിങ്ങ് റൂമും വിസിറ്റിങ് റൂമുമൊക്കെയുണ്ടായിരുന്നു

ഇരുനിലയിൽ പണിത ആ വലിയ വീട്ടിൽ വിധവയായ ശാരദാമ്മയും മക്കളായ ആനന്ദനും കുടുംബവും ,അമിദയും കുടുംബവും, ഇളയ മകൻ ആദിത്യനുമാണുള്ളത്

എല്ലാ സ്വത്തുവകകളും ശാരദാമ്മയുടെ പേരിൽ എഴുതി വച്ചിട്ടാണ് അവരുടെ ഭർത്താവ് മരണത്തിന് കീഴടങ്ങിയത്.

മക്കൾക്കെല്ലാവർക്കും തങ്ങളുടെ ഷെയറ് വാങ്ങി കുറച്ച് കൂടി സ്വതന്ത്രമായതും സൗകര്യപ്രദമായതുമായ നഗരജീവിതം തുടങ്ങണമെന്ന് ആഗ്രഹമുണ്ടെങ്കിലും, ശാരദാമ്മ ഒരിക്കലും അവരുടെ ആഗ്രഹങൾക്കായി തൻ്റെ സ്വത്തുക്കൾ പകുത്ത് നല്കാൻ തയ്യാറല്ലായിരുന്നു

മക്കളുടെ

ആവശ്യങ്ങൾക്കെല്ലാം വേണ്ട പണം, കൃത്യമായ കണക്ക് വച്ചിട്ടാണ്, അവർ നല്കി പോന്നത്.

ടൗണിലെ സിനിമാ തീയറ്ററും ഓഡിറ്റോറിയവും നോക്കി നടത്തുന്നത് മൂത്ത മകൻ ആനന്ദനാണ് ,അമിദയുടെ ഭർത്താവ് ജയകാന്തന്, പെട്രോൾ പമ്പിൻ്റെയും സൂപ്പർ മാർക്കറ്റിൻ്റെയും ചുമതലയാണ് ,ഇളയവനായ ആദിത്യന് മാത്രം, അവർ ഒരു ചുമതലയും കൊടുത്തിട്ടില്ല, കാരണം അയാളെ ഏല്പിച്ച റ്റുവീലർ ഷോറൂമും , ടെക്സ്റ്റൈൽസ് ഷോപ്പും  ആദിത്യൻ്റെ കെടുകാര്യസ്ഥത കൊണ്ട് നഷ്ടപ്പെടുത്തിയതിന് ശേഷം, ശാരദാമ്മ അയാളോട് കൃഷിയിടത്തിൽ പോയി ട്രാക്ടറോടിക്കാൻ പറയുകയായിരുന്നു.

അമ്മയുടെ വാക്കിന് മറുവാക്ക് പറയാനുള്ള ധൈര്യം ചേട്ടനും ചേച്ചിക്കുമില്ലാത്തത് പോലെ തന്നെ, ആദിത്യനുമില്ലായിരുന്നു,

അത് കൊണ്ട് മാത്രമാണ് അയാൾ കടിച്ച് പിടിച്ച് പാടത്തും വരമ്പത്തും ഇഷ്ടമില്ലാത്ത തൊഴിലെടുക്കുന്നത്.

##################

അറിഞ്ഞോ?നിങ്ങളുടെ അനുജത്തി, രാവിലെ അമ്മയെ സോപ്പിടാൻ വേണ്ടി ചെന്നിരുന്നു

അത്താഴം കഴിഞ്ഞ്

ആനന്ദൻ മുറിയിലേക്ക് വന്നപ്പോൾ ഭാര്യ രാഗിണി,അയാളോട് ഏഷണി പറഞ്ഞു

അതെയോ ?എന്താ അവള് പറഞ്ഞത് ?

അവർക്ക് ടൗണിലേക്ക് താമസം മാറണമെന്ന്, അതിന്ഷെയറ് ചോദിക്കാനാണ് അവള് ചെന്നത്

എന്നിട്ട് അമ്മ എന്ത് പറഞ്ഞു ?

മ്ഹും ,പാലം കുലുങ്ങിയാലും കേളൻ കുലുങ്ങുമോ ?പണ്ട് നമ്മളോട് പറഞ്ഞത് തന്നെ അവരോട് പറഞ്ഞു, ഇനി മേലാൽ ഷെയറും ചോദിച്ച് ചെന്നേക്കരുതെന്ന്

ഹ ഹ ഹ,, അവൾക്കത് തന്നെ വേണം,നമ്മളോടൊന്നുമാലോചിക്കാതെ, സ്വന്തമായി വാങ്ങിച്ചെടുക്കാൻ പോയതല്ലെ?

ആനന്ദന് അത് കേട്ട് സന്തോഷമായി.

###################

ആദിച്ചേട്ടോ... നിങ്ങളിങ്ങനെ എത്ര നാളാണ് , ഒറ്റാംതടിയായിട്ട് നടക്കുന്നത്, ഒരു പെണ്ണൊക്കെ കെട്ടണ്ടെ ?

രണ്ടേക്കറ് കണ്ടത്തിൽ ട്രാക്ടറോടിച്ച് നിലമുഴുത് കഴിഞ്ഞ്, പോക്കറ്റിൽ നിന്ന് സിഗരറ്റടുത്ത് ചുണ്ടിൽ വച്ച് കത്തിക്കുന്ന, ആദിത്യനോട് പണിക്കാരൻ ഗോപു ചിരിച്ചു കൊണ്ട് ചോദിച്ചു.

ഓഹ് എന്ത് കാര്യത്തിനാ ,ഏതെങ്കിലുമൊരു പാവം പെണ്ണിനെ കൂടി കൊണ്ട് വന്നിട്ട്, പഞ്ചമത്തിലെ അടുക്കളയിലിട്ട് കരിയും പുകയും കൊള്ളിക്കാനല്ലേ? വല്ലപ്പോഴുമൊരു സിനിമയ്ക്ക് അവളേയും കൊണ്ട് പോകണമെങ്കിൽ പോലും, അമ്മേടെ മുന്നിൽ ചെന്ന് കൈ നീട്ടണം

ങ് ഹേ, അപ്പോൾ ആദിച്ചേട്ടൻ പെണ്ണ് കെട്ടുന്നില്ലെന്ന് തീരുമാനിച്ചോ?

ഹേയ് അങ്ങനെ സന്യസിക്കാനൊന്നും ഞാനില്ല, ഞാൻ നല്ലൊരു പെണ്ണിനെ കല്യാണം കഴിക്കും, പക്ഷേ അത് എൻ്റമ്മേടെ പതിനാറടിയന്തിരം കഴിഞ്ഞിട്ടാണെന്ന് മാത്രം

അത് പറയുമ്പോൾ ആദിത്യന് അമ്മയോടുള്ള പക എത്രത്തോളമുണ്ടെന്ന് അയാളുടെ മുഖഭാവത്തിൽ നിന്ന് ഗോപുവിന് മനസ്സിലായിരുന്നു.

ഭാഗം -2

അങ്ങോട്ട് കുനിഞ്ഞ് നിന്നിട്ട് നിലം നന്നായിട്ട് അമർത്തിത്തുടയ്ക്കെൻ്റെ രാഗിണീ... നീയിങ്ങനെ കാല് കൊണ്ട് നൃത്തം ചവിട്ടിയാലൊന്നും ചളി പോകില്ല

മൊസൈക്ക് തറ തുടച്ച് കൊണ്ടിരുന്ന മരുമകളെ കുറ്റപ്പെടുത്തികൊണ്ട് വരാന്തയിലേക്ക് വന്ന ശാരദാമ്മ, ടീപ്പോയിലിരുന്ന പത്രമെടുത്ത് കൊണ്ട് ചാര് കസേരയിലേക്കമർന്നിരുന്നു.

ഈ തള്ളയ്ക്ക് നിലം തുടയ്ക്കാനും മുറ്റമടിക്കാനുമെങ്കിലും ഒരു ജോലിക്കാരിയെ വച്ച് കൂടെ? ബാക്കിയുള്ളവരെയിട്ട് ഇങ്ങനെ കഷ്ടപ്പെടുത്തണോ?

ഉള്ളിലെ അമർഷം രാഗിണിയുടെ അണപ്പല്ലുകൾക്കിടയിൽ പിറുപിറുപ്പായി ഞെരിഞ്ഞമർന്നു.

ഇനിയും മൂന്നാല് തലമുറയ്ക്ക് വെറുതെയിരുന്ന് തിന്ന് മുടിക്കാനുള്ള സ്വത്തുണ്ട് ഈ തറവാട്ടില് ,എന്നാലും ഒരു വേലക്കാരിയെ വയ്ക്കാൻ പറഞ്ഞാൽ തള്ള പറയും

ഇവിടുത്തെ ജോലികൾ ചെയ്യാൻ നിങ്ങള് രണ്ട് പെണ്ണുങ്ങള് തന്നെ ധാരാളമാണ്, അപ്പോൾ പിന്നെ വെറുതെയെന്തിനാ കണ്ടവളുമാർക്ക് മാസശബ്ബളം കൊടുക്കുന്നത്, പണ്ട് ഇക്കണ്ട ജോലികളൊക്കെ ചെയ്തത് ഞാനൊരുത്തി തനിച്ചായിരുന്നു,

അന്ന് ഞാനെൻ്റെ കെട്ട്യോനോട് വേലക്കാരിയെ നിർത്തിത്തരാനൊന്നും പറഞ്ഞിട്ടില്ല ,ഇപ്പോഴും നിങ്ങള് രണ്ടാള് ചെയ്യുന്ന ജോലി ഞാനൊറ്റയ്ക്ക് ചെയ്യും കാണണോ?

ആ വെല്ലുവിളിയിൽ മറ്റുള്ളവരുടെ നാവടപ്പിക്കാൻ അവർക്ക് നല്ല മിടുക്കായിരുന്നു ,പത്തിരുപത് കൊല്ലമായി, ആനന്ദേട്ടൻ തന്നെ ഇങ്ങോട്ട് താലികെട്ടി കൊണ്ട് വന്നിട്ട് ,നാല് പെൺമക്കളുള്ള ദിവാകരൻ്റെ മൂത്ത മകളെ പഞ്ചമത്തിലെ ശാരദാമ്മ തൻ്റെ മകന് വേണ്ടി ആലോചിച്ചപ്പോൾ, അയൽക്കാർക്കൊക്കെ തന്നോട് അസൂയയായിരുന്നു.

പെണ്ണിൻ്റെയൊരു ഭാഗ്യം കണ്ടില്ലേ? ഇനി  മുതൽ നിനക്ക് പഞ്ചമത്തിലെ മഹാറാണിയായി  കഴിയാമല്ലോ പെണ്ണേ?

അത് മാത്രമാണോ ? ഇവള് പഞ്ചമത്തിലേക്ക് പോകുന്നതോട് കൂടി,ദിവാകരേട്ടന് ഒരു കൈത്താങ്ങായില്ലേ ?അയാളുടെ ബാക്കി പെൺമക്കളെകൂടി ഇനി രാഗിണി വിചാരിച്ചാൽ കെട്ടിച്ചയക്കാൻ യാതൊരു പ്രയാസവുമുണ്ടാവില്ല

നാട്ടുകാര് തൻ്റെയും തൻ്റെ വീട്ടുകാരുടെയുമൊക്കെ സൗഭാഗ്യത്തെക്കുറിച്ച് വാചാലരായി.

അതൊക്കെ കേട്ടാണ് താനും സ്വപ്നങ്ങൾ നെയ്ത് തുടങ്ങിയത് ,പക്ഷേ ഇവിടെ വന്ന് കയറിയപ്പോഴല്ലേ മനസ്സിലായത്, അവർക്ക് വേണ്ടത് ഒരു മരുമകളെ മാത്രമായിരുന്നില്ല, അവരുടെ ആജ്ഞയ്ക്കനുസരിച്ച് ജീവിക്കുന്ന മിണ്ടാപ്രാണിയായ ജോലിക്കാരിയെ കൂടിയായിരുന്നെന്ന് ,അത് കൊണ്ട്  മനപ്പൂർവ്വമായിരുന്നു കഴിവില്ലാത്ത തൻ്റെ കുടുംബത്തിലേക്ക് തന്നെ, മകന് പെണ്ണന്വേഷിച്ച് അവർ വന്നത് ,എന്തൊക്കെ വിഷമങ്ങളുണ്ടായാലും വിവാഹപ്രായമെത്തി നില്ക്കുന്ന മൂന്ന് അനുജത്തിമാരുള്ള സ്വന്തം വീട്ടിലേക്ക്, താനൊരിക്കലും മടങ്ങിപ്പോകില്ലെന്ന ഉറപ്പും അവർക്കുണ്ടായിരുന്നു.

ആനന്ദേട്ടനോട് തൻ്റെ വിഷമങ്ങളെക്കുറിച്ച് പലപ്പോഴും പറഞ്ഞിട്ടുണ്ടെങ്കിലും അമ്മയെ എതിർക്കാനോ ചോദ്യം ചെയ്യാനോ ഉള്ള ത്രാണി, അങ്ങേർക്കില്ലായിരുന്നു.

എടീ... ഭാര്യേ ..ഇപ്പോൾ കുറച്ച് ബുദ്ധിമുട്ടുണ്ടെന്നേയുള്ളു,

അമ്മയെ അക്ഷരംപ്രതി അനുസരിച്ച് ഒന്നും മിണ്ടാതെ നിന്നാൽ ,ഭാവിയിൽ നമുക്ക് നമ്മുടെ ഷെയറും വാങ്ങി സ്ഥലം വിടാം ,പിന്നെ നമുക്ക് ആരെയും പേടിക്കാതെ ആഘോഷമായി ജീവിക്കാം,

അല്ലാതെ ഇപ്പോൾ എടുത്ത് ചാടി എന്തേലും മണ്ടത്തരം കാണിച്ചാൽ, അമ്മ നമ്മളെ ഇവിടുന്ന് വെറുംകൈയ്യോടെ പറഞ്ഞ് വിടും

തൻ്റെ ഭർത്താവ് തന്നോട് പറയുന്ന ന്യായം അതായിരുന്നു,

പക്ഷേ കുറച്ച് നാളായി അങ്ങേർക്കും മനസ്സിലായി തള്ളേടെ കാറ്റ് പോകാതെ ഒരു ചില്ലിക്കാശിൻ്റെ മുതല് അവർ ആർക്കും കൊടുക്കില്ലെന്ന് ,അത് കൊണ്ട് താനും കാത്തിരിക്കുന്നത് തള്ളയുടെ പുകയൊന്ന് കാണാൻ വേണ്ടി തന്നെയാണ്

എടീ കൊച്ചേ..ആ ഗേറ്റ് കടന്ന് വരുന്നത് ആരാന്ന് നോക്കിക്കേ?

മുൻവശത്തെ വലിയ ഗേറ്റ് തുറക്കുന്ന ശബ്ദം കേട്ട് വരാന്തയിലിരുന്ന ശാരദാമ്മ, രാഗിണിയോട് വിളിച്ച് പറഞ്ഞു

അത് അക്കരെപ്പാടത്തെ കേളുവിൻ്റെ ഭാര്യ ചീരുവും അവരുടെ മോളുമാണ്

പുറത്തേയ്ക്ക് തലയിട്ട് നോക്കിയിട്ട് രാഗിണി പറഞ്ഞു

എന്താടീ,, ചീരു..നേരം വെളുക്കുന്നേന് മുന്നേ ഇങ്ങോട്ട് വന്നത് ,വല്ല കാശും കടം ചോദിക്കാനായിരിക്കുമല്ലേ?

ശാരദാമ്മ മുൻ വിധിയോടെ ചോദിച്ചു .

അല്ല കൊച്ചമ്മേ.. എനിക്കൊരു സങ്കടം ബോധിപ്പിക്കാനുണ്ടായിരുന്നു

അവരുടെ മുഖത്തെ നിസ്സഹായതയും തൊട്ടടുത്ത് തല കുമ്പിട്ട് നില്ക്കുന്ന മകളെയും കണ്ടപ്പോൾ ശാരദാമ്മയ്ക്ക് എന്തോ പന്തികേട് തോന്നി

എന്താണെങ്കിലും നീ കാര്യം പറയ് ,എന്നെ കൊണ്ട് സാധിക്കുന്നതാണെങ്കിൽ ഞാൻ തീർപ്പാക്കാം

അത് പിന്നെ, ,,, കൊച്ചമ്മേ... എൻ്റെ മോള് ജാനകി ഗർഭിണിയാണ്..

ചീരു ,വിതുമ്പിക്കൊണ്ടാണത് പറഞ്ഞത്.

ങ് ഹേ ,ആണോടി കൊച്ചേ... നിൻ്റെ തള്ള പറയുന്നത് നേരാണോ ?ആരാടീ നിൻ്റെ വയറ്റിലുണ്ടാക്കിയത്?

ശാരദാമ്മ നിർദ്ദയം അവളോട് ചോദിച്ചു

അതിന് മറുപടി പറയാതെ അവള് പൊട്ടിക്കരഞ്ഞു.

എന്താ ചീരു, ഇവൾക്ക് സ്വപ്നത്തിൽ വല്ലതുമാണോ ഗർഭമുണ്ടായത് ,ഇവളൊന്നും പറയുന്നില്ലല്ലോ?

അത് കൊച്ചമ്മാ ... അവൾക്ക് പറയാൻ പേടിയായിട്ടാണ് ,ആളാരാണെന്ന് അവളെന്നോട് പറഞ്ഞു

ആങ്ഹാ, നിനക്കറിയാമോ ? എങ്കിൽ നീ പറ'

അത് പിന്നേ ...

ഒന്ന് പറഞ്ഞ് തൊലയ്ക്കടീ...

ശാരദാമ്മയുടെ ശബ്ദമുയർന്നു.

ഇവിടുത്തെ കൊച്ച് മുതലാളിയാണ് ,അതിനുത്തരവാദി

എന്താ നീ പറഞ്ഞത്?

ശാരദാമ്മ ഒരലർച്ചയോടെ ചാടിയെഴുന്നേറ്റു

അതെ കൊച്ചമ്മേ ..

ഞാനൊരുപാട് തല്ലിച്ചതച്ചതിന് ശേഷമാണ്, അവള് ആളെ പറഞ്ഞത് ,കഴിഞ്ഞ ആറാട്ടിന് ഞങ്ങളെല്ലാം അമ്പലത്തിൽ പോയ സമയത്ത്, ഇവള് വീട്ടിൽ തനിച്ചേ ഉണ്ടായിരുന്നുള്ളു ,

അന്നവിടെ വന്ന കൊച്ച് മുതലാളിയാണ് ഇവളെ ഉപദ്രവിച്ചത് ,പേടിച്ചിട്ട് അവള് ഞങ്ങളോടൊന്നും പറഞ്ഞിരുന്നില്ല ,ഇന്നലെ പതിവില്ലാതെ ഓക്കാനിച്ചപ്പോഴാണ്, കാര്യമറിയുന്നത് ,ഞാനിനി എന്ത് ചെയ്യും കൊച്ചമ്മേ..? നാട്ടുകാരറിഞ്ഞാൽ എൻ്റെ മോളുടെ ജീവിതം നശിച്ച് പോകില്ലേ?

അവർ പൊട്ടിക്കരഞ്ഞ് കൊണ്ട് ശാരദാമ്മയുടെ കാലിൽ കെട്ടിവീണു.

ഇല്ല, നാട്ടുകാരറിഞ്ഞാൽ ഇവളുടെ ജീവിതം മാത്രമല്ല ഈ തറവാടിൻ്റെ കൂടി അന്തസ്സാണ് ഇല്ലാതാവുന്നത് ,ഈ കുലദ്രോഹി എൻ്റെ തറവാട് നശിപ്പിക്കുമല്ലോ ദൈവമേ .. എടീ രാഗിണീ.. അവനെയിങ്ങോട്ട് വിളിക്ക്

അവനോട് ഞാനൊന്ന് ചോദിക്കട്ടെ

മുന്നിലെ സംസാരം കേട്ട് കൊണ്ട് നിന്ന രാഗിണിക്ക് സന്തോഷമായി, ശാരദാമ്മ കഷ്ടപ്പെട്ടുണ്ടാക്കിയ അന്തസ്സും ആഭിജാത്യവുമൊക്കെ ഒരു നിമിഷം കൊണ്ട് തകർന്ന് വീഴാൻ പോകുന്നു

അവൾ ഉത്സാഹത്തോടെ ആദിത്യൻ്റെ മുറിയിലേക്ക് പോയി

ഈ നില്ക്കുന്ന പെൺകൊച്ചിനെ നിനക്കറിയാമോടാ?

ഉറക്കച്ചടവോടെ മുന്നിൽ വന്ന് നില്ക്കുന്ന ആദിത്യനെ തീഷ്ണമായി നോക്കിക്കൊണ്ട് ശാരദാമ്മ ചോദിച്ചു.

മുറ്റത്ത് നില്ക്കുന്ന ഞാനകിയെ കണ്ട മകൻ്റെ മുഖത്തെ പരവേശം, ശാരദാമ്മ കണ്ടു.

എനിക്കറിയില്ലമ്മേ.. ആരാ ഇത്?

നിനക്കറിയില്ലല്ലേ ?എങ്കിൽ ഞാൻ പറയാം, നിന്നെക്കുറിച്ച് അപവാദം പറഞ്ഞ് പരത്തി, ഈ തറവാടിൻ്റെ യശസ്സിന് കളങ്കം വരുത്താൻ ഇറങ്ങിത്തിരിച്ച അമ്മയും മോളുമാണിത് ,

ഈ നില്ക്കുന്ന ജാനകി ഗർഭിണിയാണത്രെ, അതിനുത്തരവാദി,

നീയാണെന്നാണ് ഇവര് പറഞ്ഞത്,

ഇത്രയും വലിയ നുണ പറഞ്ഞ് ,നിന്നെ അപമാനിക്കാൻ ഇറങ്ങിപ്പുറപ്പെട്ട അവളുടെ അടിനാഭി നോക്കി, ചവിട്ടെടാ മോനേ... അവൾക്കുണ്ടായ ദിവ്യഗർഭം ഇവിടെ വച്ച് തന്നെ അലസിപോകട്ടെ

ശാരദാമ്മയുടെ അലർച്ചകേട്ട് ചീരുവും ജാനകിയും മാത്രമല്ല, ആദിത്യനും ഞെട്ടിപ്പോയി.

നിന്നോട് പറഞ്ഞത് കേട്ടില്ലെ? എടാ അവളെ ചവിട്ടിയെറിയാൻ,

നിനക്ക് വയ്യെങ്കിൽ അവളുടെ ഗർഭം ഞാനില്ലാതാക്കി തരാം

ശാരദാമ്മ ,ജാനകിയുടെ നേരെ തൻ്റെ വലത് കാലുയർത്തിയതും, ആദിത്യൻ പെട്ടെന്ന് ഇടയിൽ കയറി അമ്മയെ ,വട്ടം പിടിച്ചു.

വേണ്ടമ്മേ.. എനിക്കറിയാം ഇവളെ ,ഇവൾ ഗർഭിണിയാണെന്നത് സത്യമാണെങ്കിൽ, അതിനുത്തരവാദി ഞാൻ തന്നെയാണ് , എനിക്കൊരബദ്ധം പറ്റിയതാണ്,

സ്വന്തം പേരക്കുട്ടിയെ ചവിട്ടിക്കൊന്ന പാപം ഏറ്റ് വാങ്ങാൻ, ഞാനമ്മയെ അനുവദിക്കില്ല ,നമുക്കിത് ആരുമറിയാതെ ,ഏതെങ്കിലുംഹോസ്പിറ്റലിൽ കൊണ്ട് പോയിട്ട് നശിപ്പിച്ച് കളയാം

പ്ഫാ... നായേ...

ശാരദാമ്മ സർവ്വശക്തിയുമെടുത്ത് ആദിത്യനെ കുടഞ്ഞെറിഞ്ഞു.

മലർന്ന് വീണ മകൻ്റെ നെഞ്ചിൽ ശാരദാമ്മ വലത് കാലെടുത്ത് വച്ചു .

ഭാഗം-3

നീ പിഴപ്പിച്ച പെണ്ണിനെ നീ തന്നെ സംരക്ഷിക്കും ,നിനക്ക് തോന്നുമ്പോൾ പരാക്രമം കാണിക്കാനും, മടുക്കുമ്പോൾ ചവറ്റ് കുട്ടയിലേക്ക് വലിച്ചെറിയാനുമുള്ള കളിപ്പാവയല്ല, ഇന്നാട്ടിലെ ചെറുമിപ്പെണ്ണുങ്ങൾ ,ഈ ഭൂമിയിലെ ഓരോ പെണ്ണിനും, അന്തസ്സായി ജീവിക്കാനുള്ള അവകാശമുണ്ട്, അത് തല്ലിക്കെടുത്താൻ, എൻ്റെ മകനായാൽ പോലും ഞാനനുവദിക്കില്ല ,ഏറ്റവും അടുത്ത മുഹൂർത്തത്തിൽ തന്നെ, നീ ജാനകിയുടെ കഴുത്തിൽ താലി കെട്ടിയിരിക്കും ,ഇത് പഞ്ചമത്തിലെ ശാരദാമ്മയുടെ തീരുമാനമാണ് ,ചീരു... നീയിപ്പോൾ മകളെയും കൊണ്ട് തിരികെ പൊയ്ക്കോളു, മുഹൂർത്തം നിശ്ചയിച്ചിട്ട് ഞാനറിയിക്കാം

മകൻ്റെ നെഞ്ചിലമർത്തിയ വലത് കാല് തിരിച്ചെടുത്തിട്ട്, തൻ്റെ നേരെ നോക്കി വാക്കുറപ്പിച്ച ശാരദാമ്മയുടെ കണ്ണിലെ ദൃഡനിശ്ചയം ചീരുവിന് വായിച്ചെടുക്കാമായിരുന്നു,

ആ ഉറപ്പിലായിരുന്നു ചീരു ,മകളെയും കൊണ്ട് പഞ്ചമത്തിൻ്റെ പടിക്കെട്ടുകളിറങ്ങിയത്.

#############

അമ്മയ്ക്കെന്താ ഭ്രാന്തുണ്ടോ ?

ഈ തറവാടിൻ്റെ അടുക്കളപ്പുറത്ത് വന്ന് ഓശ്ചാനിച്ച് നില്ക്കുന്ന ആ ചീരുവിൻ്റെ മകളെയാണോ ആദിത്യൻ കല്യാണം കഴിക്കേണ്ടത് ,ഈ തറവാടിന് ഇതിൽപരം ഒരു നാണക്കേട് വരാനുണ്ടോ അമ്മേ?

വിവരമറിഞ്ഞെത്തിയ ആനന്ദൻ അമ്മയോട് കലഹിച്ചു.

മോനേ ആനന്ദാ ...തല മറന്നെണ്ണ തേക്കരുത് ,

നീ കല്യാണം കഴിച്ചത്, കൊച്ചീരാജാവിൻ്റെ മകളെയൊന്നുമല്ലല്ലോ?ദിവാകരൻ്റെ മകളെയല്ലേ? അയാളുടെ കുലത്തൊഴിലെന്തായിരുന്നെന്ന് ഞാനിവിടെ പറയേണ്ടല്ലോ? പഞ്ചമത്തിലെ ഇളയ സന്താനം ഒരു പാവം പെണ്ണിനെ നശിപ്പിച്ച് പെരുവഴിയിലാക്കി എന്ന് 

നാട്ട് കാര് പറയുമ്പോഴാണ്, 

ഈ തറവാടിന് കളങ്കമുണ്ടാകുന്നത്,

എല്ലാം കൊണ്ടും, തന്നെക്കാൾ താഴെയുള്ളൊരു പെണ്ണിനൊരു ജീവിതം കൊടുത്ത ആദിത്യനെക്കുറിച്ചും, അവൻ്റെ വീട്ടുകാരെ കുറിച്ചും മാലോകരെന്നും വാഴ്ത്തി 

പാടികൊണ്ടിരിക്കും ,

അത് മൂലം ഈ തറവാടിൻ്റെ യശസ്സ് വാനോളമുയരുകയാണ് ചെയ്യുന്നത്

അല്ലേലും , വാദിക്കുമ്പോൾ എതിരാളിയെ നിഷ്പ്രഭമാക്കുന്ന വാദമുഖങ്ങൾ നിരത്താൻ പണ്ടേ അമ്മ , മിടുക്കിയായിരുന്നല്ലോ?

മറുവാദത്തിന് യാതൊരു സാധ്യതയുമില്ലെന്ന് ബോധ്യമായ ആനന്ദൻ നിസ്സഹായനായി പിൻമാറി.

####$######$#######

കൊയ്ത്തുത്സവം കഴിഞ്ഞതിൻ്റെ പിറ്റേ തിങ്കളാഴ്ച, കുന്നിൻ മുകളിലെ ക്ഷേത്ര മുറ്റത്ത് വച്ച് ,ബന്ധുക്കളുടെയും

നാട്ടുകാരുടെയും നിറഞ്ഞ സാന്നിദ്ധ്യത്തിൽ, ആദിത്യൻ ജാനകിയുടെ കഴുത്തിൽ താലി കെട്ടി.

അമ്മയുടെ നിർബന്ധമൊന്ന് കൊണ്ട് മാത്രമാണ്, ഞാൻ നിന്നെ കെട്ടിയെടുത്തത്, അല്ലാതെ ഒട്ടും ഇഷ്ടമുണ്ടായിട്ടല്ല, അത് കൊണ്ട് ,ഇവിടുത്തെ 

രാജകുമാരിയായി വാഴാമെന്ന വ്യാമോഹമൊന്നും വേണ്ട,

നമ്മള് തമ്മിലുള്ള ബന്ധം, നിൻ്റെ കഴുത്തിലെ താലിച്ചരടിൽ മാത്രമൊതുങ്ങും,

എൻ്റെയുള്ളിൽ ,നീയെന്നും ശത്രുപക്ഷത്താണുള്ളത് ,

അത് കൊണ്ട് തന്നെ, ഒരിക്കലും നീയെന്നിൽ നിന്ന് സ്നേഹമോ, സഹതാപമോ  പ്രതീക്ഷിക്കേണ്ട, മനസ്സിലായോ?

സന്തോഷം നിറഞ്ഞ പുഞ്ചിരിയുമായി മുറിയിലേക്ക് കടന്ന് വന്ന ജാനകി, ആദിത്യൻ്റെ വാക്ക് കേട്ട് സ്തബ്ധയായി പോയി.

എന്തിനാ എന്നോടിങ്ങനെ ? ഞാനൊരു തെറ്റും ചെയ്തില്ലല്ലോ? ആദിയേട്ടനല്ലേ എന്നെ നശിപ്പിച്ചത്?

ഞാൻ നശിപ്പിക്കാൻ വന്നതാണെന്നറിഞ്ഞിട്ട്, നീയെന്തിനാടീ എനിക്ക് വഴങ്ങി തന്നത്, അപ്പോൾ നിൻ്റെ മനസ്സിൽ ഇങ്ങനെയൊരു ഉദ്ദേശ്യം ഉണ്ടായിരുന്നത് കൊണ്ടല്ലേ?

ആദിയേട്ടാ.. എന്തിനാ  ഇങ്ങനെ ഇല്ലാ വചനം പറയുന്നത്?

അന്ന് സുഖമില്ലാതെ ,തീരെ അനങ്ങാൻ പോലും വയ്യാതെ കിടന്ന എന്നോട്, നിങ്ങളല്ലേ അതിക്രമം കാണിച്ചത്?

എടീ... സ്വന്തം മാനം പോകുമെന്നറിയുമ്പോൾ ,

എത്ര വയ്യെങ്കിലും അഭിമാനമുള്ള പെണ്ണുങ്ങൾ ചെറുത്ത് നില്ക്കും ,

നീയതിന് മുതിരാഞ്ഞത്, 

നിൻ്റെ മനസ്സിലും അടക്കാനാവാത്ത കുറെ മോഹങ്ങളുണ്ടായിരുന്നത് കൊണ്ടല്ലേ ?

എന്നിട്ട് എന്നോടൊപ്പം എല്ലാം ആസ്വദിച്ച് കഴിഞ്ഞപ്പോൾ, ഞാൻ വലിയ അപരാധിയും , നീ കെട്ടിലമ്മയുമായല്ലേ?

ഇങ്ങനൊന്നും എന്നോട് പറയരുത് ആദിയേട്ടാ...  ഗർഭിണിയാണെന്നറിഞ്ഞപ്പോൾ ,ആദ്യം ഞാൻ ആത്മഹത്യയ്ക്കൊരുങ്ങിയതാണ്, 

അമ്മയത് കണ്ട് പിടിച്ചത് കൊണ്ടാണ് ,

ഈ രീതിയിൽ എല്ലാം കലാശിച്ചത് ,എനിക്കറിയാം, സുന്ദരനും തറവാടിയുമായ ആദിയേട്ടന്, ചേറിൽ കിടന്ന എന്നെ ഉൾക്കൊള്ളാൻ ബുദ്ധിമുട്ടാണെന്ന്, പക്ഷേ എനിക്കിനി വേറെ നിവൃത്തിയില്ലേട്ടാ... കുറച്ച് നാളത്തേക്ക് ,എൻ്റെ വയറ്റിൽ വളരുന്ന കുഞ്ഞിനെ പ്രസവിക്കുന്നത് വരെയെങ്കിലും, എനിക്കിവിടെ പിടിച്ച്നിന്നേ പറ്റു ,അത് കഴിയുമ്പോൾ, ഞാനൊഴിഞ്ഞ് പൊയ്ക്കൊള്ളാം, അത് വരെ ആദിയേട്ടൻ, എന്നെ സഹിച്ചേ മതിയാവു

അല്ലാതെ വേറെ നിവൃത്തിയില്ലല്ലോ ?

ദേ ഇന്നാ പുതപ്പ്, താഴെയെങ്ങാനും വിരിച്ച് കിടന്നോ, പിന്നെ, ഉറക്കത്തിലെന്നെ 

വിളിച്ച് വെറുതെ ശല്യപ്പെടുത്തുകയൊന്നും ചെയ്യരുത് ,ഉറങ്ങി

മതിയാകുമ്പോൾ ,ഞാൻ തനിയെ എഴുന്നേൽക്കും, 

അതാണെൻ്റെ ശീലം

തൻ്റെ നേരെ വലിച്ചെറിഞ്ഞ ബെഡ്ഷീറ്റുമായി ജാനകി നിലത്തേക്ക് തളർന്നിരുന്നു.

##################

എടാ ആദിത്യാ.. നിങ്ങടെ കല്യാണം കഴിഞ്ഞിട്ട് രണ്ടാഴ്ച കഴിഞ്ഞില്ലേ? നീയാ പെങ്കൊച്ചിനെയും കൊണ്ട് പുറത്തേക്കെവിടെയെങ്കിലും ഒന്ന് പോയോ ?

ഉച്ചയ്ക്ക് ചോറ് കഴിച്ചോണ്ടിരിക്കുമ്പോൾ ശാരദാമ്മ മകനോട് ചോദിച്ചു.

അല്ലമ്മേ... അതിന് കുറെ കാശ് വേണ്ടേ? എൻ്റെ കയ്യിൽ കാശൊന്നുമില്ല

വലിയ ചിലവ് വരുമെന്നറിയുമ്പോൾ പിശുക്കിയായ അമ്മ പിന്നെ നിർബന്ധിക്കില്ലെന്നറിയാവുന്നത് കൊണ്ടാണ്, ആദിത്യൻ അങ്ങനെ പറഞ്ഞത്.

അതിന് നിങ്ങൾ ഹണിമൂണാഘോഷിക്കാൻ ഊട്ടിയിലും, കൊടൈക്കനാലിലുമൊന്നും പോകാനല്ല ഞാൻ പറഞ്ഞത്,

ഇവിടെയടുത്ത് വൈകുന്നേരങ്ങളിൽ പോയിരിക്കാനും ,

സല്ലപിക്കാനും പറ്റിയ ഒരു പാട് പിക്നിക്സ്പോട്ടുകളുണ്ടല്ലോ?

മാത്രമല്ല പരുന്തുംപാറയെന്ന് പറയുന്നത് ഇവിടെ അടുത്തു തന്നെയല്ലേ? നീ വൈകുന്നേരം, കാറുമെടുത്ത് അവളെയും കൊണ്ട് അത്രടം വരെയൊന്ന് പോയിട്ട് വാ, ഭർത്താവിനോടൊപ്പം ഒരു സവാരി പോകാനുള്ള ആഗ്രഹം അവൾക്കുമുണ്ടാവില്ലേ?

അമ്മ പരുന്തും പാറയിലേക്ക് പോകാൻ പറഞ്ഞപ്പോൾ ആദിത്യൻ്റെ തലച്ചോറിൽ കരിവണ്ടുകൾ മൂളി

അങ്ങോട്ടുള്ള യാത്രയിൽ റോഡിനിരുവശവുമുള്ള അഗാധഗർത്തങ്ങൾ അയാളുടെ മനസ്സിലേക്കോടി വന്നു.

എങ്കിൽ ശരിയമ്മേ... പോയേക്കാം ,ജാനകീ ... നീ ഒരുങ്ങി നിന്നോ, ഞാൻ കൃഷിഭവനിൽ പോയിട്ട് 

മൂന്ന് മണിയാകുമ്പോഴേക്കും തിരിച്ചെത്താം

അമ്മയുടെ മുന്നിൽ വച്ച് ആദിയേട്ടൻ, എത്ര മികവോടെയാണ് തന്നോട് സ്നേഹം അഭിനയിക്കുന്നതെന്ന് അവൾ ആശ്ചര്യത്തോടെ ഓർത്തു.

###############

പഴയ ഓപൽ ആസ്ട്രാ കാറിലേക്ക്, ജാനകി കയറിയ ഉടനെ തന്നെ ,ഫിലിമൊട്ടിച്ച നാല് ഗ്ളാസ്സുകളും, ഉയർത്തിവച്ചതിന് ശേഷമാണ്, ആദിത്യൻ പഞ്ചമത്തിൽ നിന്നും കാറ് നിരത്തിലേക്കിറക്കിയത് .

ആ കുഗ്രാമത്തിൽ നിന്നും ഒരിക്കൽ പോലും പുറത്തേയ്ക്ക് പോയിട്ടില്ലാത്ത ജാനകിക്ക്, കാർ യാത്രയും അതിലിരുന്ന് കൊണ്ടുള്ള പുറം കാഴ്ചകളും ഏറെ കൗതുകകരമായിരുന്നു.

നമ്മൾ പോകുന്ന വഴിയിൽ നല്ലൊരു വ്യൂ പോയിൻ്റുണ്ട്, അവിടെയിറങ്ങി നമുക്ക് കുറച്ച് നേരം നില്ക്കാം

പുറത്തെ കാഴ്ചകളിൽ മുഴുകിയിരിക്കുന്ന ജാനകിയെ നോക്കി ,ആദിത്യൻ പറഞ്ഞു.

കാറിൽ കയറിയപ്പോൾ 

മുതൽ, ആദിയേട്ടൻ തന്നോട് നല്ല മയത്തിലാണല്ലോ സംസാരിക്കുന്നതോർത്ത്, ജാനകിക്ക് തെല്ലാശ്വാസം തോന്നി.

ൻ്റെ ഭഗവതീ.. ആദിയേട്ടന് എന്നോടുള്ള വെറുപ്പൊക്കെ മാറ്റിത്തരണേ ...

അവൾ ഉള്ളുരുകി പ്രാർത്ഥിച്ചു.

ഒരു വളവ് തിരിഞ്ഞപ്പോൾ കണ്ട ,കോടമഞ്ഞ് മൂടിയ റോഡിൻ്റെ വീതിയുള്ള ഭാഗത്തേയ്ക്ക്, ആദിത്യൻ കാറൊതുക്കി നിർത്തി.

കണ്ണെത്താ ദൂരത്തോളം അപ്പൂപ്പൻ താടി പോലെ പരന്നൊഴുകുന്ന ,

കോടമഞ്ഞ് കണ്ട് ,ജാനകി ആവേശത്തോടെ കാറിൽ നിന്ന് ചാടിയിറങ്ങി.

സൂയിസൈഡ് പോയിൻ്റ് എന്നെഴുതിയ ,കറുത്ത ബോർഡ് കണ്ടപ്പോൾ, ആദിത്യൻ്റെ കണ്ണുകൾ കുറുകി.

ഇങ്ങോട്ട് കുറച്ച് കൂടി നീങ്ങി നില്ക്കു ജാനകി ,ഇവിടെ നിന്നാൽ താഴെയുള്ള വീടുകളൊക്കെ ഒരു പൊട്ട് പോലെ കാണാം

കൈവരികളില്ലാത്ത ആഴക്കയത്തിൻ്റെ അരികിലേക്ക്, ആദിത്യൻ സ്നേഹത്തോടെ ജാനകിയെ വിളിച്ച് നിർത്തി.

ദേ അങ്ങോട്ട് നോക്കിക്കേ, പുഴു ഇഴയുന്നത് പോലെ കാറുകൾ നീങ്ങുന്നത് കണ്ടോ?

തൻ്റെ പിൻകഴുത്തിൽ പതിഞ്ഞ ആദിത്യൻ്റെ ചുട് നിശ്വാസം, അവളെ തരളിതയാക്കി.

അവളുടെ പിന്നിൽ നിന്ന് കൊണ്ട് ,ആദിത്യൻ ചുറ്റിനും നോക്കി, കുറച്ച് ദൂരെ നില്ക്കുന്നവരുടെ ശ്രദ്ധ മുഴുവനും, അഗാധതയിൽ കുമിഞ്ഞ് കൂടുന്ന മഞ്ഞ് പാളികളിലേക്കാണെന്ന് ഉറപ്പിച്ചിട്ട് ,തൻ്റെ രണ്ട് കൈപ്പത്തികളും, അയാൾ ജാനകിയുടെ പുറത്തിന് നേരെ ഉയർത്തി.

ഭാഗം - 4

പൊടുന്നനെ നീട്ടിയൊരു ഹോണടി കേട്ട് ആദിത്യൻ ഞെട്ടി തിരിഞ്ഞ് നോക്കി

കൂപ്പിൽ നിന്ന് തടി കയറ്റിവന്ന നീളൻ, പാണ്ടിലോറിക്ക് വളവ് തിരിയാൻ കഴിയാതെ, ആദിത്യൻ പാർക്ക് ചെയ്ത കാറ് തടസ്സമായി കിടന്നത് കൊണ്ടാണ്, ഡ്രൈവർ ഹോണടിച്ചത്

അയാൾ വേഗം ജാനകിയെ വിളിച്ച് കൊണ്ട്, കാറിലേക്ക് കയറി.

തനിക്ക് കൈവന്ന ഒരവസരം തട്ടിത്തെറിപ്പിച്ച ലോറിക്കാരനെ മനസ്സിൽ ശപിച്ച് കൊണ്ടാണ്, ആദിത്യൻ കാറ് മുന്നോട്ടെടുത്തത്.

അവസരങ്ങൾ ഇനിയും വരുമെന്നും, എങ്ങനെയെങ്കിലും ജാനകിയെ തൻ്റെ ജീവിതത്തിൽ നിന്നൊഴിവാക്കി, ഒരു പണക്കാരിയായ സുന്ദരിയെ തന്നെ വിവാഹം കഴിക്കണമെന്നും, അയാൾ ശപഥം ചെയ്തു.

തിരിച്ച് മലയിറങ്ങുമ്പോൾ നേരം ഇരുട്ടി തുടങ്ങിയിരുന്നു.

പഞ്ചമത്തിലെത്തുമ്പോൾ പൂമുഖത്ത് ചാര് കസേരയിൽ ശാരദാമ്മ ഇരിപ്പുണ്ടായിരുന്നു

കാറിൽ നിന്നിറങ്ങിയ ജാനകി അകത്തേയ്ക്ക് കയറിയപ്പോൾ ആദിത്യൻ കാറ് പാർക്ക് ചെയ്യാനായി ,ബംഗ്ളാവിൻ്റെ വലത് വശത്ത് സ്ഥിതി ചെയ്യുന്ന  പോർച്ചിലേക്കോടിച്ച് പോയി.

ഔട്ടിങ്ങ് എങ്ങനെയുണ്ടായിരുന്നു മോളെ ? അവൻ നിന്നോട് സ്നേഹത്തോടെയാണോ പെരുമാറിയത്‌?

ശാരദാമ്മയുടെ വാത്സല്യപൂർവ്വമായ പെരുമാറ്റത്തിൽ ജാനകിയുടെ മനസ്സ് നിറഞ്ഞു .

അതെ അമ്മേ.. എന്നോട് വെറുപ്പൊന്നും കാണിച്ചില്ല

അവൻ ആള് പാവമാണ് മോളെ ,ഇത്രയും വലുതായിട്ടും കാര്യ പ്രാപ്തിയായിട്ടില്ല 

എന്ന് മാത്രം,

അത് കൊണ്ടാണല്ലോ ?

ഏല്പിച്ച രണ്ട് ബിസ്നസ്സുകളും നശിപ്പിച്ച് കളഞ്ഞത്, 

ഇനി മോള് വേണം അവനെയൊന്ന് നേരെയാക്കാൻ, നിനക്കവനെക്കാളും നല്ല വിദ്യാഭ്യാസമുണ്ടല്ലോ ,

കഴിവില്ലെങ്കിലെന്താ? 

നിൻ്റെ അച്ഛനും അമ്മയും നിന്നെ നന്നായി പഠിപ്പിച്ചില്ലെ ,അത് തന്നെയാണ് നിനക്ക് കിട്ടിയ ഏറ്റവും നല്ല അനുഗ്രഹം, അവൻ വരുന്നുണ്ട് ,മോള് അകത്തേയ്ക്ക് പോയിക്കോളു

പുറമെ കാണുന്നത് പോലെയല്ല, ശാരദാമ്മയുടെ ഉള്ള് പൊള്ളയാണെന്ന് ജാനകിക്ക് തോന്നി .

പിറ്റേന്ന് രാവിലെ, സമയം കഴിഞ്ഞിട്ടും, പതിവ് പോലെ പത്രം വായിക്കാൻ ശാരദാമ്മയെ പൂമുഖത്തേയ്ക്ക് കാണാതിരുന്നപ്പോൾ, രാഗിണിയുടെ ഉള്ളിൽ ഉദ്വോഗം നിറഞ്ഞു

തള്ളേടെ കാറ്റ് പോയിക്കാണുമോ?

വെറുതെയൊന്ന് മനസ്സിൽ വിചാരിച്ച് കൊണ്ടാണ് മുകൾനിലയിലെ അവരുടെ മുറിയിലേക്ക് രാഗിണി ചെന്നത്

അടഞ്ഞ് കിടന്നിരുന്ന വാതിൽ മെല്ലെ  തള്ളി നോക്കിയപ്പോൾ അത് മലർക്കെ തുറന്നു, ശാരദാമ്മ കസേരയിൽ നിന്ന് ഊർന്ന് വീണത് പോലെ താഴെ കിടക്കുന്നു.

ഉത്ക്കണ്ഠയോടെ ഓടിച്ചെന്ന രാഗിണി, ശാരദാമ്മയെ പിടിച്ചുയർത്തുമ്പോൾ ,

അവർക്ക്

അനക്കമില്ലായിരുന്നു, 

മൂക്കിൽ നിന്നും 

ഒലിച്ചിറങ്ങിയ ചോര,

കട്ട പിടിച്ച് ചുണ്ടുകളിൽ ഉണങ്ങിപ്പിടിച്ചിരുന്നു.

ഹോസ്പിറ്റലിൽ എത്തിയപ്പോഴേക്കും അവർ മരിച്ചിട്ട് മണിക്കൂറുകളായെന്ന് പരിശോധിച്ച ഡോക്ടർ പറഞ്ഞു.

അസ്വാഭാവിക മരണത്തിന് മെഡിക്കൽ കോളേജ് 

പോലീസ് കേസ് ചാർജ്ജ് ചെയ്യുകയും ബോഡി പോസ്റ്റ്മോർട്ടത്തിനയക്കുകയും ചെയ്തു.

ശാരദാമ്മയുടെ ശവസംസ്കാരം കഴിഞ്ഞ് പിറ്റേ ദിവസം ഒരു പോലീസ് ജീപ്പ് പഞ്ചമത്തിൻ്റെ ,വിശാലമായ

മുറ്റത്ത് വന്ന് നിന്നു.

അതിൽ നിന്നിറങ്ങിയ Si ഉം ഒരു പോലീസുകാരനും കൂടി അകത്തേയ്ക്ക് വന്നപ്പോൾ ആനന്ദൻ ബഹുമാനത്തോടെ അവരോടിരിക്കാൻ പറഞ്ഞു

പോസ്റ്റ്മോർട്ടം റിപ്പോർട്ട് വന്നിരുന്നു ,ശ്വാസതടസ്സമുണ്ടായത് കൊണ്ടാണ് മരണം സംഭവിച്ചത് ,അമ്മയ്ക്ക് എന്തെങ്കിലും അസുഖമുണ്ടായിരുന്നോ?

si ചോദിച്ചു.

ഉവ്വ് ഡോക്ടർ ,അമ്മ ഒരു ആസ്തമ രോഗിയായിരുന്നു, പക്ഷേ, ശ്വാസം മുട്ടുമ്പോൾ അമ്മ സ്ഥിരമായി കൈയ്യിൽ കരുതുന്ന സ്പ്രേ ഉപയോഗിക്കുകയും റിലാക്സാവുകയും ചെയ്യുമായിരുന്നു 

ഇന്നലെ പിന്നെന്താ? അമ്മ സ്പ്രേ ഉപയോഗിച്ചിരുന്നില്ലേ?

അതറിയില്ല സാർ അമ്മ തനിച്ചാണ് മുകളിലെ മുറിയിൽ കഴിയുന്നത്

മരിച്ചത് ആസ്തമ മൂർഛിച്ചിട്ടാണെങ്കിലും

ഇതൊരു അസ്വാഭാവിക മരണമായിട്ട് രജിസ്റ്റർ ചെയ്ത് പോയത് കൊണ്ട്, ഒരു പ്രാഥമിക അന്വേഷണം നടത്താതെ ഞങ്ങൾക്കീ

ഫയല് ക്ലോസ്സ് ചെയ്യാൻ കഴിയില്ല ,എന്തായാലും ഇവിടെ വരെ വന്ന സ്ഥിതിക്ക് അമ്മയുടെ മുറിയിൽ കൂടി ഒരു പരിശോധന നടത്തിയിട്ട് ഞങ്ങൾ പോകാം

ഓകെ സർ ,വരു.. ഞാൻ മുറി കാണിച്ച് തരാം

മുറിയിലെത്തിയ പോലീസുകാർക്ക് അസ്വാഭാവികമായി അവിടെ ഒന്നും കണ്ടെത്താൻ കഴിഞ്ഞില്ലെങ്കിലും ആ മുറിയിലൊരിടത്തും സ്പ്രേ കുപ്പി കാണാതിരുന്നതിൽ ഒരു വല്ലായ്ക തോന്നി.

അമ്മയത് സ്ഥിരമായി മടിയിൽവച്ച് കൊണ്ടാണ് നടക്കാറുള്ളതെന്നല്ലേ പറഞ്ഞത് ,ഒരു പക്ഷേ പകൽ സമയത്ത് പാടത്തും പറമ്പത്തുമൊക്കെയായി നടന്ന സമയത്ത്, അത് നഷ്ടപ്പെട്ട് പോയതായിരിക്കാം

si ,ആനന്ദനോട് പറഞ്ഞു.

സംശയിക്കത്തക്കതായി ഒന്നുമവിടെ കാണാതിരുന്നത് കൊണ്ട്, കൂടുതൽ അന്വേഷണങ്ങളിലേക്ക് പോകാതെ, പോലീസ് ഫയല് മടക്കി.

ശാരദാമ്മയുടെ മരണത്തിൽ ജാനകിക്ക് മാത്രമേ ആ വീട്ടിൽ കുറച്ചെങ്കിലും വിഷമം തോന്നിയിരുന്നുള്ളു

ഒരാഴ്ച കഴിഞ്ഞപ്പോൾ ,പഞ്ചമത്തിലേക്ക് അഡ്വക്കേറ്റ് രവിശങ്കർ വന്നു .

ഞാൻ കുറച്ച് ദിവസമായി മുംബയിലായിരുന്നു ,ഇന്നലെ തിരിച്ചെത്തിയപ്പോൾ ഭാര്യ പറഞ്ഞാണ്  ശാരദാമ്മയുടെ മരണവിവരമറിയുന്നത് ,അത് കൊണ്ടാണ് ഞാൻ രാവിലെ തന്നെ ഇങ്ങോട്ട് വന്നത്, കഴിഞ്ഞ വർഷം ഏതാണ്ട് ഇതേ സമയത്ത് നിങ്ങളുടെ അമ്മ എന്നെ കാണാൻ വന്നിരുന്നു

ങ്ഹേ അതെന്തിനാണ് സാർ?

ആദിത്യനാണത് ചോദിച്ചതെങ്കിലും, മറ്റുള്ളവരുടെ മുഖത്തും ജിജ്ഞാസ നിറഞ്ഞ് നില്ക്കുന്നത് രവിശങ്കർ തിരിച്ചറിഞ്ഞു.

വില് പത്രം തയ്യാറാക്കാനായിരുന്നു ആ വരവ് ,മരണം മുന്നിൽ കണ്ടത് പോലെയായിരുന്നു അന്നവർ സംസാരിച്ചത് ,പെട്ടെന്നൊരു ദിവസം താൻ മരണപ്പെട്ടാൽ തൻ്റെ സ്വത്തിന് വേണ്ടി മക്കൾ പരസ്പരം അടി കൂടരുതെന്ന് അവർക്ക് നിർബന്ധമുണ്ടായിരുന്നു ,

അത് കൊണ്ട് സ്വത്തുക്കളെല്ലാം 

മൂന്ന് പേരുടെ പേരിലും പ്രത്യേകം എഴുതി വച്ചിട്ടുണ്ട്

ആർക്കൊക്കെ എങ്ങനെയൊക്കെയാ എഴുതി വച്ചിരിക്കുന്നത് ?

മക്കൾ മൂവരും അക്ഷമയോടെ ഒരേ സ്വരത്തിൽ ചോദിച്ചു.

ആനന്ദന് സിനിമാ തീയറ്ററും ഓഡിറ്റോറിയവും ,അമിദയ്ക്ക് പെട്രോൾ പമ്പും ,സൂപ്പർ മാർക്കറ്റും ,ആദിത്യനാണ് ഈ വീടും ടൗണിലെ ഷോപ്പിംഗ് കോംപ്ളക്സും എഴുതി വച്ചിരിക്കുന്നത്

എല്ലാവരുടെ മുഖത്തും സന്തോഷം നിറഞ്ഞു .

പിന്നെ , ഒരു കത്ത് കൂടി ശാരദാമ്മ എന്നെ രഹസ്യമായി ഏല്പിച്ചിട്ടുണ്ട് ,അത് ഒരിക്കലും തുറന്ന് വായിക്കരുതെന്നും അവരുടെ മരണശേഷം മക്കളുടെ കൈയ്യിൽ മാത്രമേ കൊടുക്കാവു എന്നും ,പുറത്ത് നിന്ന് മറ്റാരും ആ ലെറ്ററിലുള്ള വിവരങ്ങൾ അറിയരുതെന്നും പ്രത്യേകം പറഞ്ഞിരുന്നു, അത് കൊണ്ട് ഇതിലെ ഉള്ളടക്കം നിങ്ങൾ മക്കളെല്ലാവരും കൂടി ഇരുന്ന് വായിച്ചറിഞ്ഞോളു, ഞാൻ പോകുവാണ്

വക്കീൽ തിരിച്ച് പോയപ്പോൾ

ആനന്ദൻ കത്ത് തുറന്ന് അമിദയുടെ നേർക്ക് നീട്ടി

ഇത് നീ വായിക്കെടീ എനിക്ക് കണ്ണടയെടുക്കണം

അമിദ, എല്ലാവരും കേൾക്കെ കത്ത് വായിച്ചു.

എൻ്റെ മൂന്ന് മക്കളും അറിയാൻ

നിങ്ങളുടെയെല്ലാം മനസ്സിൽ ഞാനൊരു ശത്രുവിനെ പോലെയാണെന്നെനിക്കറിയാം

നിങ്ങൾ വളർന്ന് സ്വന്തം കാലിൽ നില്ക്കാൻ പ്രാപ്തരായിട്ടും, നിങ്ങൾക്കൊക്കെ ഒരു കുടുംബമുണ്ടായിട്ടും, സ്വതന്ത്രമായി നിങ്ങളെ ജീവിക്കാൻ വിടാതെ, ഇപ്പോഴും ഞാനെൻ്റെ കാൽച്ചുവട്ടിൽ തന്നെ തളച്ചിട്ടിരിക്കുകയാണെന്ന ചിന്തയാണ് ,എന്നെ നിങ്ങളുടെ ശത്രുവാക്കിയതെന്നും എനിക്കറിയാം, പക്ഷേ ,നിങ്ങൾ കരുതുന്നത് പോലെ, നിങ്ങളെ ഞാൻ എൻ്റെ വരുതിക്ക് നിർത്തുകയായിരുന്നില്ല, മറിച്ച് ഏതൊരമ്മയെയും പോലെ, സ്വന്തം മക്കൾ എപ്പോഴും കൂടെയുണ്ടാവണമെന്ന ആഗ്രഹം കൊണ്ട് ,ഞാനെൻ്റെ ചിറകിനടിയിൽ നിങ്ങളെ ചേർത്ത് വയ്ക്കുകയായിരുന്നു, 

മരണം വരെ നിങ്ങളെൻ്റെ കൂടെ ഉണ്ടാവണമെന്ന സ്വാർത്ഥ താത്പര്യം ഒന്ന് കൊണ്ട് മാത്രമായിരുന്നു, നിങ്ങൾക്ക് ഞാൻ ശബ്ബളം തരാതിരുന്നതും, നിങ്ങളുടെ പേരിൽ സ്വത്തുക്കളൊന്നും എഴുതി തരാതിരുന്നതും, പക്ഷേ എൻ്റെ പെരുമാറ്റങ്ങൾ നിങ്ങളെ അസ്വസ്ഥരാക്കുന്നുണ്ടെന്നും, ഞാനൊന്ന് മരിച്ച് കാണാൻ നിങ്ങളെല്ലാവരും ആഗ്രഹിക്കുന്നുണ്ടെന്നും, എനിക്ക് മനസ്സിലായി തുടങ്ങിയപ്പോഴാണ്, എനിക്ക് മരണഭയം ഉണ്ടായത്, പക്ഷേ ഞാൻ തകർന്ന് പോയത് അപ്പോഴല്ല, ഞാൻ നൊന്ത് പ്രസവിച്ച എൻ്റെ മൂന്ന് മക്കളിൽ ഒരാൾ, എന്നെ കൊല്ലാൻ ശ്രമിച്ചപ്പോഴായിരുന്നു ,അത് മുൻ കൂട്ടി അറിഞ്ഞത് കൊണ്ട് മരണത്തിൽ നിന്നും തലനാരിഴയ്ക്ക് ഞാൻ രക്ഷ പെട്ടെങ്കിലും, മരണം എൻ്റെ പിന്നാലെ തന്നെയുണ്ടെന്ന് എനിക്കറിയാമായിരുന്നു,

അത് കൊണ്ടാണ്, ഇനിയുമൊരു കൊലപാതകശ്രമം ഉണ്ടാകു ന്നതിന് മുൻപ്, ഈ വില് പത്രം തയ്യാറാക്കാൻ ഞാൻ വക്കീലിനെ സമീപിച്ചത്, ഇപ്പോൾ എന്നെ കൊല്ലാൻ ശ്രമിച്ചതാരാണെന്ന്, നിങ്ങളിൽ രണ്ട് പേർ ചിന്തിക്കുന്നുണ്ടാവും,

അത് ഞാനാരോടും പറയില്ല ,കാരണം അയാളെയായിരുന്നു, ഞാനേറ്റവും അധികം സ്നേഹിച്ചിരുന്നത് ,

നാളെ നിങ്ങളെൻ്റെ സ്ഥാനത്ത് വരുമ്പോഴെ, ഞാനെന്ത് കൊണ്ടാണ് ഇങ്ങനെ ആയിപോയതെന്ന് നിങ്ങൾക്ക് മനസ്സിലാകും ,

എനിക്കൊരപേക്ഷ മാത്രമേയുള്ളു, നിങ്ങൾ സഹോദരങ്ങൾ ഒരിക്കലും വഴക്കിടരുത്, എന്നും സ്നേഹത്തോടെ വേണം കഴിയാൻ, എല്ലാവർക്കും നന്മ മാത്രം ആശംസിച്ച് കൊണ്ട് നിർത്തട്ടെ ,

             എന്ന്

             മക്കളെ ഭ്രാന്തമായി          സ്നേഹിച്ച  ഒരമ്മ..

ഇടർച്ചയോടെയാണ് അമിദ കത്ത് വായിച്ച് നിർത്തിയത്, ആനന്ദൻ്റെ കണ്ണുകൾ നിറഞ്ഞിരുന്നു, ഒന്നും മിണ്ടാതെ തല കുനിച്ചിരുന്ന ആദിത്യൻ, പെട്ടെന്നെഴുന്നേറ്റ് പുറത്തേയ്ക്ക് പോയി.

ഉമ്മറത്തെ പടർന്നു പന്തലിച്ച് നില്ക്കുന്ന ബുഷ് ചെടികൾക്കിടയിൽ, അയാൾ എന്തോ പരതി

കുറച്ച് കഴിഞ്ഞപ്പോൾ, അയാളത് തപ്പിയെടുത്തു.

കഴിഞ്ഞയാഴ്ച ശാരദാമ്മ മരിക്കുന്ന ദിവസം രാത്രിയിൽ തൻ്റെ മുറിയുടെ മുന്നിൽ കൂടി, നടന്ന് പോകുകയായിരുന്ന ആദിത്യനെ, അവർ മരണവെപ്രാളത്തോടെ വിളിച്ചു.

ആദീ... എനിക്ക് ശ്വാസം മുട്ടല് കൊണ്ട് ഇരിക്കുന്നിടത്തു നിന്ന് അനങ്ങാൻ പോലും വയ്യ, ഞാനെൻ്റെ സ്പ്രേ ആ ഡ്രോയറിനുള്ളിലേക്ക് വച്ചു, അതൊന്ന് എടുത്ത് താടാ

നെഞ്ച് തടവിക്കൊണ്ട് ശ്വാസം കിട്ടാതെ പിടയുന്ന അമ്മയെ നോക്കി, ഒരു നിമിഷം ആലോചിച്ച് നിന്നിട്ട്, അയാൾ അകത്ത് കയറി ഡ്രോയറിനുള്ളിൽ നിന്നും സ്പ്രേ കൈയ്യിലെടുത്ത് കൊണ്ട് ,അവരുടെ അരികിലേക്ക് വന്നു.

ഈ സ്പ്രേ ഞാൻ നിങ്ങൾക്ക് തന്നാൽ നിങ്ങൾ ഇനിയും ജീവിച്ചിരിക്കും, പക്ഷേ നിങ്ങൾ എത്രയും വേഗം മരിക്കണമെന്നാണ് ഞാനും, മറ്റുള്ളവരും ആഗ്രഹിക്കുന്നത്, ഒരു പണക്കാരിയായ പെൺകുട്ടിയെ വിവാഹം കഴിച്ച് അന്തസ്സായി ജീവിക്കേണ്ട എൻ്റെ തലയിലേക്ക്, നിങ്ങൾ ഞാനകിയെന്ന ഭാണ്ഡമെടുത്ത് വച്ച് തന്നു, എനിക്കവളെ എങ്ങനെയെങ്കിലും ഒഴിവാക്കണം, നിങ്ങൾ ജീവിച്ചിരുന്നാൽ അത് നടക്കില്ല,

നിങ്ങൾ മരിക്കേണ്ടത്, ഇപ്പോൾ എൻ്റെയൊരാവശ്യമാണ്, അത് കൊണ്ട്, ഈ സ്പ്രേ ഞാൻ കൊണ്ട് പോകുവാണ്

അന്ന് രാത്രി സ്പ്രേയുമായി പുറത്തിറങ്ങിയ ആദിത്യൻ, കതക് വലിച്ച് അടച്ചിട്ട് , ബാൽക്കണിയിൽ നിന്ന് കൊണ്ട് സ്പ്രേ പുറത്തേയ്ക്ക് വലിച്ചെറിയുകയായിരുന്നു.

താനന്ന് വലിച്ചെറിഞ്ഞ സ്പ്രേ കുപ്പി, അയാളുടെ കൈയ്യിലിരുന്നു വിറച്ചു.

സ്വന്തം അമ്മയെ കൊന്ന തനിക്കിനി, അവർ തന്ന ഈ വീട്ടിൽ കഴിയാൻ അർഹതയില്ലെന്നും, തൻ്റെ സ്ഥാനം ജയിലറയാണെന്നും മനസ്സിലാക്കിയ ആദിത്യൻ, അടുത്തുള്ള പോലീസ് സ്റ്റേഷനിലേക്ക് വേഗം നടന്നു.

വർഷങ്ങൾ കടന്ന് പോയി,

ഇന്ന് ആദിത്യൻ ശിക്ഷ കഴിഞ്ഞ് ജയിൽ മോചിതനാവുകയാണ് ,നീണ്ട നാളത്തെ ജയിൽവാസം അയാളെ പുതിയൊരു മനുഷ്യനാക്കിയിരുന്നു

ശിക്ഷ കഴിഞ്ഞ്, സെൻട്രൽ ജയിലിന് പുറത്തേയ്ക്കിറങ്ങി വന്ന ആദിത്യനെ സ്വീകരിക്കാൻ ജാനകിയും അവരുടെ മകനും കാറുമായി കാത്ത് നില്പുണ്ടായിരുന്നു

താനവളെ സ്നേഹിക്കാതിരുന്നിട്ടും

താനൊരു കൊലപാതകിയായിട്ടും തനിക്ക് വേണ്ടി ഞാനകി ഇപ്പോഴും കാത്തിരിക്കുന്നു എന്ന തിരിച്ചറിവായിരുന്നു പിന്നീട് ജാനകിയെയും മോനെയും ജീവന് തുല്യം സ്നേഹിക്കാൻ അയാളെ പ്രേരിപ്പിച്ചത് .

അവസാനിച്ചു.

DOWNLOAD PDF STORY CLICK 👇

📝സജി തൈപ്പറമ്പ്