🍁നീലകണ്ണുള്ള പെണ്കുട്ടി🍁ഫുൾ പാർട്ട്🍁

🍁നീലകണ്ണുള്ള പെണ്കുട്ടി🍁ഫുൾ പാർട്ട്🍁

" ഏതാടാ ആ പെണ്ണ് " വീട്ടിലേക്ക്‌ കേറിയ ഉടനെ അമ്മയുടെ ചോദ്യമെത്തി.

"ഏത്‌ പെണ്ണ്‌ " ഞാൻ അമ്പരന്നു..

" അമ്മ ഇതാര്ടെ കാര്യാ പറയുന്നേ..."

" ദേ, ചെക്കാ എന്നെ പൊട്ടൻ കളിപ്പിക്കരുത്.. ഇന്ന് നിന്നെ അന്വേഷിച്ചു വന്ന പെണ്ണേതാ?.."

" എന്നെ അന്വേഷിച്ചു പെണ്ണോ.."

തലക്കു വട്ടുപിടിക്കുന്നതുപോലെ തോന്നി..

"വിച്ചു, ഇതുവരെ നിന്റെ തല്ലുകൊള്ളിത്തരങ്ങളൊക്കെ ഞാൻ പോട്ടെന്നു വച്ചിട്ടുണ്ട്. ഒന്നല്ലെന്നു വച്ചു ഞാൻ കൊഞ്ചിച്ചിട്ടാണെന്നു എല്ലാർടേം വഴക്കും കേട്ടിട്ടുണ്ട്....ഇത് അതുപോലെയല്ല....." 'അമ്മ കരച്ചിലായി.. 

"ഒരു പെണ്ണ് വന്നു എന്നെ അന്വേഷിച്ചു എന്നതിന് 'അമ്മ എന്തിനാ കരയുന്നെ.." എനിക്ക് ദേഷ്യമാണ് വന്നത്.

"ഇതൊരു സാധാരണ വരവായി തോന്നിയില്ല..നീ ഇല്ലെന്നു പറഞ്ഞതും ഒന്നും പറയാതെ തിരിച്ചു പോവുക..ഞങ്ങളോട് പറയാൻ പറ്റാത്ത എന്ത് കാര്യാടാ ഉള്ളത്.." അമ്മയും വിട്ടില്ല..അതോടെ എന്റെ തലയിലെ കിളികളും വെടിയൊച്ച കേട്ടപോലെ പറന്നു..

ജീവിതത്തിൽ വന്നുപോയിട്ടുള്ള എല്ലാ പെണ് മുഖങ്ങളും ഓർത്തെടുക്കാൻ ശ്രമിച്ചു.. ഒരുപാടെണ്ണത്തിനെ വായിനോക്കിയിട്ടുണ്ട്.. ഫ്രണ്ട്സിൽ പേരിനു 3_4 എണ്ണമുണ്ട്. പെങ്ങന്മാർ ഇല്ലാത്തതു കൊണ്ടാണോ എന്തോ പെണ്കുട്ടികളോട്  സംസാരിക്കുമ്പോൾ തന്നെ ഉള്ളിലൊരു വിറയലാണ്.. അതുകൊണ്ട്തന്നെ കഷ്ടപ്പെട്ടു ഉണ്ടാക്കാൻ ശ്രമിച്ച പ്രണയങ്ങളെല്ലാം എട്ടുനിലയിൽ പൊട്ടി...ഞാൻ പഠിച്ച കോളേജിലെ ഇംഗ്ലീഷ് പ്രൊഫസ്സറാണമ്മയും..എനിക്കറിയാവുന്ന മിക്കവരെയും അമ്മക്കും അറിയാം..

തലങ്ങും വിലങ്ങും തല കുത്തിമറിഞ്ഞു ചിന്തിച്ചിട്ടും എന്നെ അന്വേഷിച്ചു വരാൻ മാത്രം ബന്ധമുള്ള ഒരു മുഖം പോലും ഓർമ്മയിൽ വന്നില്ല.. പിറ്റേന്ന് എണീറ്റു കിച്ചനിൽ ചെന്നപ്പോൾ, അമ്മ അതു വിട്ടില്ലെന്നു വീർത്ത ആ മുഖം കണ്ടപ്പോൾ മനസ്സിലായി..

" അല്ല, അമ്മേ...ആ കുട്ടിയെ കാണാൻ എങ്ങിനെ...? '  അമ്മ എന്നെ തറപ്പിച്ചൊന്നു നോക്കി..

"ഞാൻ കുളിചോണ്ടിരിക്കായിരുന്നു.. അച്ഛമ്മയാ വാതിൽ തുറന്നതു.. നീ ഇവിടെ ഇല്ലെന്നു പറഞ്ഞതും ആ കുട്ടി പോയി...ഞാനൊരു മിന്നായം  പോലെയാ കണ്ടത്...ഇവിടെങ്ങും കണ്ടിട്ടുള്ള കുട്ടിയല്ല..നല്ല കുട്ടിയാ"

അമ്മയൊന്നാമർത്തി മൂളി...

അതുകെട്ടൊരു കുളിരു വന്നെങ്കിലും  എന്തിനു ?? എന്ന ചോദ്യം എന്റെ  ഉള്ളിലെ ഉഷ്ണത്തെ ശമിപ്പിച്ചില്ല..

"നന്നായൊന്നാലോചിച്ചു നോക്ക് ചെക്കാ..നിന്റെ കൂടെയുള്ള അവന്മാരോടും കൂടൊന്നു ചോദിക്കു.."

അവന്മാരോട് ഇന്നലെ തന്നെ ചോദിച്ചതാ.. രണ്ടും ചിരിച്ചു ചത്തു.. നിന്നെ അന്വേഷിച്ചു ബോധം ഉള്ള പെണ്കുട്ടികളാരെങ്കിലും വരോഡാ എന്ന മറുപടിയാ കിട്ടിയേ..

"അമ്മേ ...അമ്മേടെ വല്ല ശിഷ്യഗണങ്ങളുമാവോ..?"

"ങ്ങും.. നിന്നെ അന്വേഷിച്ചു വരാൻ മാത്രം തലക്കു ഓളം  ഉള്ളവരൊന്നും അതിലില്ല."'

അമ്മ കിട്ടിയ ചാൻസിൽ എനിക്കിട്ടൊന്നു താങ്ങി..

" ഇനി അച്ഛനെങ്ങാനും..." ഞാൻ പാതിവച്ചു നിർത്തി..

" ദേ, ചെക്കാ എണീറ്റു പോണുണ്ടോ.. മരിച്ചവരെ പോലും വെറുതെ വിടരുത് ട്ടാ.." 'അമ്മ പോരാളിയായി ....യുദ്ധക്കളം അടുക്കള ആയതുകൊണ്ട് ഒരു റിസ്ക് എടുക്കാതിരിക്കുന്നതാണ് ബുദ്ധി...

" എനിക്ക് കുഴപ്പമിമൊന്നുമില്ല..എത്രനാൾ ഞാൻ കൊതിച്ചിരുന്നതാ.." എന്നു പിറുപിറുത്തുകൊണ്ട് അവിടം വിട്ടു..

കുറച്ചുനാൾ അതിനെപ്പറ്റി ചിന്തിച്ചു നടന്നെങ്കിലും കാര്യമായ തുമ്പൊന്നും ലഭിച്ചില്ല..

ഒരാഴ്ച കഴിഞ്ഞു കാണും ഒരു ഞായറാഴ്ച.. ഞാൻ ക്ലബ്ബിൽ ചെന്നപ്പോഴുണ്ട് ചങ്ക് ഫ്രണ്ട്‌സ് അർജ്ജുനും സുധിയും കണ്ണും മിഴിച്ചു ഗേറ്റ് നു മുൻപിൽ..

"ഡാ..അവള്....നീ കണ്ടോ..നിന്നെ അന്വേഷിച്ചിവിടെ വന്നു.. സെക്രട്ടറിയോടാ ചോദിച്ചത്...ഞങ്ങൾ ചെല്ലുമ്പോഴേക്കും പോയി..."

അവൾ പോയിട്ട് അധികം നേരമായില്ലെന്നു വിടർത്തിയ അങ്കവാൽ താഴ്ത്താതെ ഇപ്പോഴും നിൽക്കുന്ന മറ്റു കോഴികളെ കണ്ടപ്പോൾ മനസ്സിലായി..വേഗം തന്നെ ബൈക്കു തിരിച്ചു.. അവന്മാരെയും കൂട്ടി ...

"എങ്ങാനാടാ അവൾ വന്നത്?" 

"ഓട്ടോയിലായിരുന്നെടാ ,ശരിക്കു കാണാൻ പറ്റിയില്ല". സുധിയാണ്... 

ബസ് സ്റ്റോപ്പിൽ ചെന്നെങ്കിലും നിരാശയായിരുന്നു ഫലം.

" ഇനി വീട്ടിലേക്കെങ്ങാനും പോയിട്ടുണ്ടാവോഡാ.." അർജുൻ സംശയം പ്രകടിപ്പിച്ചു...നേരെ വീട്ടിലോട്ടു വിട്ടു...

അമ്മതുണിവിരിച്ചിടുന്ന തിരക്കിലാണ്..മുഖത്തേക്കൊന്നുപാളിനോക്കി..

സംശയിക്കത്തക്കവിധത്തിൽ ഒന്നുമില്ല...ഇന്നിവിടേക്ക് എത്തിയില്ലെന്നു മനസ്സിലായി..മനസ്സാകെ പുകയുന്ന പോലെ..ഇതിനി ഇങ്ങനെ വിട്ടാൽ ശരിയാവില്ല....

ഇവൾ എവിടുന്നു വരുന്നു എങ്ങോട്ടു പോകുന്നു ഒരു സൂചനയുമില്ല... മുഖം പോലും ആരും ശരിക്കു കണ്ടിട്ടില്ല...

രണ്ടു പ്രാവശ്യംഅന്വേഷിച്ചു വന്ന സ്ഥിതിക്കു അവൾ വീണ്ടും വരുമെന്ന് ഉറപ്പായിരുന്നു..അടുത്ത തവണ ഒന്നുകൂടി കരുതിയിരിക്കണമെന്നു ഞങ്ങൾ തീരുമാനിച്ചു..

ആയിടക്കാണ് ഭഗവതി ക്ഷേത്രത്തിലെ ഉത്സവം കൊടിയേറിയത്. രണ്ടു ചേരി തിരിഞ്ഞായിരുന്നു ഉത്സവം നടത്തിപ്പ്.  ഇപ്രാവശ്യത്തെ ഉത്സവം നടത്തിപ്പ് എതിർ ചേരിക്കായിരുന്നു.. പോയ വർഷത്തെ പോരായ്മകൾ ചൂണ്ടിക്കാട്ടി എല്ലാ വർഷവും ഒരടി പതിവായിരുന്നു.

.

ഞങ്ങൾ ക്ലബ്ബിലേക്കു കേറുമ്പോഴുണ്ട് ഗേറ്റ് നു പുറത്തു എതിർ ചേരിയിലെ കുറച്ചുപേർ നിന്നു സംസാരിക്കുന്നു.  

ഞങ്ങൾ അടുത്തെത്തിയതും അതിലിരുവൻ ഞങ്ങൾക്കിട്ടൊന്നു ചൊറിഞ്ഞു.

പിന്നിലിരുന്ന സുധി  ബൈക്കിൽ ഇരുന്നു തന്നെ അവനിട്ട് ചവിട്ടി.  പിന്നെ കൂട്ട അടിയായി.. ചറപറാന്നു അങ്ങോട്ടും ഇങ്ങോട്ടും അടി വാങ്ങുന്നുണ്ട്.. ..

പെട്ടെന്നാണ് എന്റെ മുന്നിലേക്ക് ഒരു പെണ്കുട്ടി കേറി നിന്നത്. അവളുടെ കരച്ചിൽ കേട്ടിട്ടാണോ അതോ ഇത്രയും ആണുങ്ങൾക്കിടയിൽ ഒരു പെണ്ണ് കേറിവന്നതുകൊണ്ടാണോ എന്തോ അടി നിന്നു. ആ കുട്ടി എനിക്ക് പുറംതിരിഞ്ഞാണ് നിന്നിരുന്നത്. എല്ലാവരുടെയും മുഖത്തെ അമ്പരപ്പ് കണ്ടിട്ടാവണം അവൾ എന്റെ നേർക്കു തിരിഞ്ഞു...വെളുത്തുമെലിഞ്ഞൊരു സുന്ദരി..നീല കൃഷ്ണമണികൾ..അവ നിറഞ്ഞു ഒരു സാഗരം പോലെ തോന്നിച്ചു.. എന്റെ തലയിലെ മുഴുവൻ കിളികളും കൂട്ടത്തോടെ തലങ്ങും വിലങ്ങും പറന്നു.. ബോധം വന്നപ്പോൾ എന്റെ മാത്രമല്ല അവിടെയുള്ളവന്മാർടെ കിളികളും നാട് വിട്ടു പോയെന്നു മനസ്സിലായി..  അവൾ പെട്ടെന്ന് തന്നെ അവിടെ നിർത്തിയിട്ടിരുന്ന ഓട്ടോയിലേക്ക്‌ ഓടിക്കേറി. ..അകന്നു പോകുന്ന ഓട്ടോയിരിലുന്നും അവൾ എന്നെ തിരിഞ്ഞുനോക്കുന്നുണ്ടായിരുന്നു. അപ്പോഴും ആ കണ്ണുകൾ നിറഞ്ഞൊഴുകുന്നുണ്ടായിരുന്നു...

പിറ്റേന്ന് സുധിയുടെ ഫോൺ കാൾ ആണ് എന്നെ ഉണർത്തിയത്..

"ഡാ,..അവളെപ്പറ്റി കുറച്ചു ഡീറ്റൈൽസ് കിട്ടിയിട്ടുണ്ട്..അവൾ കേറിപ്പോയത് സ്റ്റാൻഡിലെ ഓട്ടോയിലാ.. iഇന്നലെ നമ്പർ ഞാൻ നോട്ട് ചെയ്തിരുന്നു...അവനോടു ചോദിച്ചപ്പോൾ കേറിയ ബസ് കിട്ടി. മയൂര..മാവേലിക്കരയിലേക്കുള്ളതാ...അതിലെ കണ്ടക്ടർ നമ്മുടെ കൂടെ പഠിച്ച അലിടെ ആളിയനാ.. അവൻ അവളിറങ്ങിയ സ്റ്റോപ് പറഞ്ഞു തന്നിട്ടുണ്ട്.. "

ഒറ്റ ശ്വാസത്തിൽ സിബിഐ ഡയറിക്കുറിപ്പിലെ മമ്മൂട്ടീയെപോലെ അവൻ കാര്യങ്ങൾ വിശദമാക്കി....ഇത്രയും നേരം കൊണ്ട് അവൻ ഇതൊക്കെ കണ്ടെത്തിയല്ലോ.. അവനോടെനിക്കു ചെറിയ മതിപ്പൊക്കെ തോന്നിതുടങ്ങി..ഞാൻ എന്തെങ്കിലും പറയും മുൻപേ അവൻ തുടർന്നു..

" അതേ, നീ വേഗം റെഡി ആയി വാ..ഞാൻ ക്ലബിലുണ്ട്.. പിന്നെ വരുമ്പോ കാറും കൊണ്ടു വന്നാ മതി.." 

"ഡാ, ഇന്ന് തന്നെ പോണോ..? അവൾടെ പേരുപോലും അറിയില്ല.."എനിക്ക് നേരിയ ഭയം തോന്നി..

"അതൊക്കെ നമ്മുക്ക് കണ്ടെത്താം. . മുരളിസാറിനോട് വിവരം പറഞ്ഞിട്ടുണ്ട്.. പുള്ളി വരാമെന്നു സമ്മതിച്ചു.. നീ വേഗം വാടാ.." അവൻ ഫോൺ വച്ചു..

മുരളിസാർ കൂടെ ഉണ്ടെന്നു കേട്ടപ്പോൾ ഒരാശ്വാസം തോന്നി..സാർ ഇവിടുത്തെ അറിയപ്പെടുന്ന സാമൂഹിക പ്രവർത്തകനാണ് , അദ്ധ്യാപകനും..ഞങ്ങളുടെ മിക്ക അടിപിടി കേസിനും  ഇടനിലക്കാരനായി ഒപ്പം നിൽക്കാറുണ്ട്..

അവളുടെ നീല കണ്ണുകൾ തന്നെയായിരുന്നു ഇതുവരെ മനസ്സിൽ...അവളെ കണ്ടപ്പോൾ തൊട്ടു തുടങ്ങിയതാ നെഞ്ചിനകത്തൊരു  പുകച്ചിൽ... സിനിമയിലും ഫോട്ടോയിരലുമൊക്കെ നീല കണ്ണുകൾ കണ്ടിട്ടുണ്ടെങ്കിലും നേരിട്ടു ഇതാദ്യമായാണ്.. അതുകൊണ്ടുതന്നെ അവളെ ജീവിതത്തിലുന്നുവരെ കണ്ടിട്ടില്ലെന്ന് ഉറപ്പായിരുന്നു..

വേഗം റെഡിയായി താഴേക്കു പോയി.. ബ്രേക്ഫാസ്റ്റ് കഴിച്ചു കൊണ്ടിരിക്കേ അമ്മയോട് കാർ എടുക്കുന്നുണ്ടെന്ന കാര്യം സൂചിപ്പിച്ചു.. ദൂരേക്ക്‌ പോകുമ്പോഴാല്ലാതെ ഞാൻ കാർ കൊണ്ടുപോകാറില്ല..'അമ്മ സംശയരൂപേണ എന്നെ നോക്കി...

"ഒരു കല്യാണമുണ്ട് " മുഖത്തു നോക്കാതെ പറഞ്ഞു..

മുരളീസാർ കൂടെ ഉണ്ടെന്നു പറഞ്ഞപ്പോൾ 'അമ്മക്കു വിശ്വാസമായി .. പോയി വന്നിട്ടു എല്ലാം അമ്മയോട് പറയാമെന്നു തീരുമാനിച്ചു. ഇല്ലെങ്കിൽ തിരിച്ചെത്തുന്നതുവരെ അമ്മ ഇവിടെ ഉരുകിയിരിപ്പാവും..

പുകയുന്ന മനസ്സോടെ അവളെ അന്വേഷിച്ചിറങ്ങുമ്പോൾ എനിക്കറിയില്ലായിരുന്നു ഇതെന്റെ ജീവിതം തന്നെ മാറ്റിമറിക്കുമെന്നു....

നീലകണ്ണുള്ള പെണ്കുട്ടി ( last part )

ക്ലബിലെത്തിയപ്പോൾ അവരെല്ലാം റെഡിയായി ഇരിപ്പുണ്ട്.. ഒന്നരമണിക്കൂർ നേരത്തെ യാത്രക്ക് ശേഷം പറഞ്ഞ സ്റ്റോപ്പിലെത്തി...ഇനിയെങ്ങോട്ട് ? എന്നതൊരു ചോദ്യചിഹ്നമായി തുടർന്നു.. സ്റ്റോപ്പിൽ നിന്നും കുറച്ചു മാറി ഓരോട്ടോ സ്റ്റാൻഡ് കണ്ടു..വണ്ടി പാർക്ക് ചെയ്തു ഞാനും സുധിയും അങ്ങോട്ടു നടന്നു..

" ഡാ, പെണ്ണ് കേസ് ആണ്.. സൂക്ഷിച്ചു കൈകാര്യം ചെയ്യണം.."  മുരളീസാർ വണ്ടിയിരുന്നു മുന്നറിയിപ്പ് തന്നു..

മുന്നിലെ ഓട്ടോയിലൊരു ചേട്ടൻ ഇരുന്നു പേപ്പർ വായിക്കുന്നുണ്ട്...അങ്ങോട്ടു നീങ്ങിയതും സുധി എന്റെ കൈ പിടിച്ചു വലിച്ചു...നോക്കുമ്പോൾ ഒരു പയ്യൻ മൊബൈലിലെന്തോ തോണ്ടിക്കൊണ്ടു മറ്റൊരോട്ടോയിലിരിപ്പുണ്ട്..

"ഹലോ" ശബ്‌ദം കേട്ടു പയ്യൻസ് മുഖം ഉയർത്തി..

" അതേ ...ഇവിടെ നിന്നും ഒരു പെണ്കുട്ടി കഴിഞ്ഞ ദിവസം നമ്മുടെ നാട്ടിൽ വന്നിരുന്നു..അതിന്റെ കൈയ്യിൽ നിന്നും കുറച്ചു പൈസ വീണുപോയി...അന്വേഷിച്ചപ്പോൾ ഇവിടുത്തെ സ്റ്റോപ്പിലാണ്  ഇറങ്ങിയതെന്നറിഞ്ഞു. ..അതു കൊടുക്കാൻ വന്നതാ.."  സുധി ഭംഗിയായി കാര്യം അവതരിപ്പിച്ചു...

പയ്യൻസ് ഞങ്ങളെയൊന്നു ചൂഴ്ന്നു നോക്കി..

"  ഒരു നീല കണ്ണുള്ള പെണ്കുട്ടി. " സുധിയാണ്.

"  എന്താടാ ഫിറോസെ.."

അപ്പോഴേക്കും ചുറ്റുമുള്ള ഓട്ടോയിൽ നിന്നും കുറച്ചു ചേട്ടന്മാർ കൂടി അടുത്തെത്തി.. 

പയ്യൻസ് കാര്യം അവരോടുകൂടി വിശദീകരിച്ചു..

" നല്ല സാമൂഹികപ്രിതിബദ്ധതയുള്ള ചെറുപ്പക്കാരണല്ലോ.."  നേതാവെന്ന് തോന്നിച്ച ഒരു ചേട്ടൻ അടുത്തു വന്നു.

" അതേ ...കഴിഞ്ഞ പ്രളയത്തിന് അതു ഞങ്ങൾ തെളിയിയിച്ചതാണ്..'  സുധിയും വിട്ടില്ല..

അപ്പോഴേക്കും ഡോർ തുറന്നു മുരളിസാറും അർജ്ജുനും ഇറങ്ങി വന്നു.. .പിന്നെ ചോദ്യവലിയായി..

അതിലൊരാൾ മുരളീസാറിനെ അറിയുന്നവനായിരുന്നു.. അവൻ നേതാവെന്ന് തോന്നിക്കുന്ന ആളെ മാറ്റി നിർത്തി എന്തോ പറയുന്നുണ്ടായിരുന്നു.. അവസാനം അയാൾ വന്നു വഴി പറഞ്ഞു തന്നു.. അയാളും ഞങ്ങൾക്കൊപ്പം വന്നു...

" ആ കുട്ടി എപ്പോഴും അവിടുണ്ടാവാറില്ല..ഹോസ്റ്റലിലാണെന്നു തോന്നുന്നു..ഇടക്ക് വന്നു പോകുന്നത് കാണാം.." വണ്ടിയിലിരുന്നു ഓട്ടോക്കാരൻ പറഞ്ഞു..

അവിടന്നു രണ്ടുകിലോമീറ്റർ പോയിക്കാണും റോഡ് സൈഡിൽ തന്നെ നീല പെയിന്റ് അടിച്ച ഒതുങ്ങിയ ഒരു ഇരുനിലവീട്.. വണ്ടി പുറത്തു പാർക്ക് ചെയ്ത് ഗേറ്റ് കടന്നു

എന്റെ നെഞ്ചിടിപ്പ് കൂടിക്കൊണ്ടിരുന്നു.. നെറ്റിയിൽ ചെറുതായി വിയർപ്പു പൊടിഞ്ഞു.. ഇതുവരെ ഉണ്ടായിരുന്ന ധൈര്യം ചോർന്നുപോകുംപോലെ..

ബെല്ലടിച്ചു..അല്പം കഴിഞ്ഞപ്പോൾ ഡോർ തുറന്നു.. ഇന്നലെ കണ്ട നീലകണ്ണുള്ള സുന്ദരി.. എല്ലാവരെയും ഒരുമിച്ചു കണ്ടപ്പോൾ അവൾക്കാകെ ഒരു പരിഭ്രമം.. പിന്നീടാണ് ആ കണ്ണുകൾ എന്റെ നേർക്കു വന്നത്....പതിയെ ചുണ്ടിലൊരു പുഞ്ചിരി വിടർന്നു..

മുഖത്തൊരാശ്വാസവും..പെട്ടെന്ന് തന്നെ ആ കണ്ണുകൾ ഈറനായി..

വാതിലിനടുത്തു നിന്നും അല്പം നീങ്ങിനിന്നു അവൾ ഞങ്ങളെ അകത്തേക്ക് ക്ഷണിച്ചു..

ഒപ്പമുണ്ടായിരുന്ന ഓട്ടോക്കാരൻ അമ്പരപ്പോടെ ഞങ്ങളെ നോക്കി.. സുധി അയാളുടെ അടുത്തു ചെന്നുപറഞ്ഞു

"പൈസ കൊടുക്കാനല്ല, കുറച്ചു കാര്യങ്ങൾ അറിയാനാണ് ഞങ്ങൾ വന്നത്.. അതുവരെ ചേട്ടൻ ഒന്നു ക്ഷമിക്കൂ.."  അയാളുടെ മുഖം മാറുന്നത് കണ്ടു..ഭാഗ്യത്തിന് കൂടുതൽ ചോദ്യങ്ങളൊന്നുമുണ്ടായില്ല.. 

ഞങ്ങളോടിരിക്കാൻ പറഞ്ഞവൾ അകത്തേക്ക് പോയി.. തിരിച്ചു വന്നത് ഒരാൽബവും കൊണ്ടാണ്..പിന്നാല ജൂസുമായി പ്രായം ചെന്നൊരു സ്ത്രീയും..

"അച്ഛനുമമ്മയും ഉള്ളപ്പോൾ സഹായത്തിനു ഉണ്ടായിരുന്ന ആന്റിയാണ്.. തങ്കം.. ഇപ്പോൾ ഇവിടെ വരുമ്പോൾ എനിക്ക് കൂട്ടു ഇവരാണ്.."

ആ സ്‌ത്രീ ഞങ്ങളെ നോക്കിയൊന്നു പുഞ്ചിരിച്ചു ജ്യൂസ് ടേബിളിൽ വച്ച് അകത്തേക്കു പോയി..

അവൾ ടേബിളിനടുത്തുള്ള ചെയറിലേക്കിരുന്നു.. ആൽബം എന്റെ കൈയ്യിലേക്കു തന്നു..ഒന്നും മനസ്സിലാവാതെ ഞങ്ങളിരുന്നു.. 

എന്റെ കൈ വിറക്കുന്നത് കണ്ടാവണം സുധി ആൽബം വാങ്ങി തുറന്നു നോക്കി.. ഒരു ഫാമിലി ഫോട്ടോ ആയിരുന്നു ആദ്യ പേജിൽ. ഈ പെണ്കുട്ടിയും ഒരു പയ്യനും അച്ഛനുമമ്മയും..പയ്യന്റെയും  നീലകണ്ണുകൾ..പക്ഷെ പെണ്കുട്ടീടെ അത്രയും  കളർ അതിനുണ്ടായിരുന്നില്ല..

"എന്റെ പേര് മാളവിക" ഫോട്ടോയിലേക്കു നോക്കി അവൾ  തുടർന്നു..

"  ,ഇവരുടെ മാളു....അച്ഛനുമമ്മയും ഇന്റർകാസ്റ്  മാര്യേജ് ആയിരുന്നു.. അച്ഛൻ ഹിന്ദു 'അമ്മ ക്രിസ്ത്യൻ.. രണ്ടു വീട്ടുകാരും എതിർത്ത കല്യാണമായിരുന്നു.. അതോണ്ട് പറയത്തക്ക ബന്ധുക്കൾ ആരുമില്ല.." അവളുടെ കണ്ണുകൾ ചെറുതായി നനഞ്ഞു തുടങ്ങി..

"അച്ഛൻ എഞ്ചിനീയർ ആയിരുന്നു...4 വർഷം മുൻപ്... " അവൾ ഇടക്ക് വച്ച് നിർത്തി ശബ്ദം ഇടറിതുടങ്ങിയിരുന്നു..

"അറ്റാക്ക് ആയിരുന്നു..വല്ലാത്ത ഷോക്ക് ആയിരുന്നു ഞങ്ങൾക്കത്.. ചേട്ടൻ മിഥുൻ അന്ന് എഞ്ചിനീയറിങ്ങിന് പഠിക്കായിരുന്നു...ആറുമാസം കഴിഞ്ഞു കാണും ....ഒരാക്സിഡന്റിൽ ചേട്ടനും..'"

അവൾ ശ്വാസമെടുക്കാൻ വല്ലാതെ ബുദ്ധിമുട്ടി..

"എന്റെ ..ചേട്ടന്റെ...ഹാ..ർട്ട് ..ആണ് ...നിങ്ങൾക്കു..ള്ളിൽ.."   വിതുമ്പലിനിടയിൽ വാക്കുകൾ പലയിടത്തും മുറിഞ്ഞു പോയിരുന്നു.. ..ഞാൻ ഞെട്ടി പുറകിലേക്ക് വീണു....മുഖം പൊത്തി അവൾ ഉറക്കെ  കരഞ്ഞു...

കുറച്ച് നേരത്തേക്ക്  എവിടെയാണെന്ന ബോധം പോലും എനിക്കുണ്ടായിരുന്നില്ല..മറന്നു തുടങ്ങിയ എന്റെ  ഹാർട്ടിന്റെ  കംപ്ലയിന്റും സർജറിയും ഞൊടിയിടയിൽ തലയിലൂടെ മിന്നിമറഞ്ഞു...സുധി എന്റെ കൈ മുറുകെ പിടിച്ചിരിക്കുന്നു.. അവന്റെ മുഖത്തും പരിഭ്രമം...അടുത്ത് അര്ജുനുമുണ്ട് .. ജ്യൂസ് എടുത്ത് കൈയ്യിൽ തന്നു..

പെണ്കുട്ടിയുടെ അടുത്ത് നേരത്തെ കണ്ട സ്‌ത്രീ നിന്നു ആശ്വസിപ്പിക്കുന്നു..കുറച്ചു നേരം കഴിഞ്ഞപ്പോൾ അവൾ ധൈര്യം വീണ്ടെടുത്ത പോലെ നിവർന്നിരുന്നു... മുഖം അമർത്തി തുടച്ചു..

" അടുപ്പിച്ചുള്ള രണ്ടു ഷോക്കുകൾ അമ്മയെ വല്ലാതെ തളർത്തി....പിന്നെയൊരു തിരിച്ചുവരവ് ഉണ്ടായില്ല.. കഴിഞ്ഞ വർഷം അമ്മയും.."

വല്ലാതെ ഒറ്റപ്പെട്ടതുപോലെ തോന്നി....ഒരു ഡിപ്രെഷനിലേക്കു വീണുപോകുന്നത് പോലെ..അപ്പോഴാണ് എന്റെ ചേട്ടൻ പൂര്ണ്ണമായും ഇവിടുന്ന് പോയിട്ടില്ലല്ലോ എന്നോർമ്മ വന്നത്.. ഫ്രണ്ട്‌സിന്റെ സഹായത്തോടെ അഡ്രസ്സ് കണ്ടുപിടിച്ച് നിങ്ങളെ തേടി വന്നത്..നിങ്ങൾക്കൊരു ശല്യമാവാതെ കണ്ട്പോകാമെന്നായിരുന്നു കരുതിയത്...എനിക്കീ ഭൂമിയിൽ ഇപ്പോഴുള്ള ആകെകൂടിയുള്ള ബന്ധം.."  അവൾ ചെറുതായൊന്നു തേങ്ങി..കണ്ണുകൾ നിറഞ്ഞൊഴുകിക്കൊണ്ടിരുന്നു....

                        ******************

മാളൂന്റെ  കൈയ്യും പിടിച്ചു വീടിന്റെ പടികൾ ഓടികയറുമ്പോൾ ലോകം പിടിച്ചടക്കിയ സന്തോഷമായിരുന്നു എനിക്ക്.. അമ്മയുടെ മുന്നിലേക്കവളെ നീക്കി നിർത്തിയിട്ടു പറഞ്ഞു..

" അമ്മേ , എനിക്കും കിട്ടി ഒരനിയത്തിയെ.. എന്റെ അനിയത്തി.."       

ഒന്നും മനസ്സിലാവാതെ 'അമ്മ  അമ്പരപ്പോടെ ഞങ്ങളെ നോക്കി..എന്റെ ഹൃദയമപ്പോൾ ശാന്തമായിരുന്നു ...പെയ്തൊഴിഞ്ഞ ആകാശം പോലെ..

DOWNLOAD PDF STORY CLICK👇

📝നിത്യ ദിൽഷേ