🥀 സൗപർണിക 🥀

🥀   സൗപർണിക  🥀

അവളുടെ കല്യാണത്തിന് നമ്രമുഖിയായി വിവാഹവേദിയിൽ ഇരിക്കുമ്പോളാണ് ആദ്യമായി ആ കടുംകാപ്പി മിഴികൾ  എന്റെ കണ്ണിലുടക്കിയത്.നാട്ടിലെ എസ് ഐ ആയ ഞാൻ ഒരു പ്രതിയെ തപ്പിയാണ് ആ സമൂഹ വിവാഹ വേദി വരെ എത്തിപ്പെട്ടത്.എന്റെ ഭാഗ്യമെന്നോ നിർഭാഗ്യമെന്നോ പറയേണ്ടതെന്നറിയില്ല ഞാൻ അന്വേഷിച്ചു കൊണ്ടിരുന്ന പ്രതി അവളുടെ പ്രതിശ്രുത വരൻ തന്നെയായിരുന്നു.വിവാഹ നടത്തിപ്പുകാരോട് കാര്യം അവതരിപ്പിച്ചപ്പോൾ അവർ ശക്തമായി എതിർത്തു.എന്റെ ഡ്യൂട്ടി നിർവഹണം തടസപ്പെടുന്നതിലുപരി ഒരു പെൺകുട്ടിയുടെ കല്യാണം മുടങ്ങുമെന്നതു തന്നെയായിരുന്നു അവരുടെ ആശങ്ക.അവസാനം പ്രതിക്കെതിരായ തെളിവുകൾ ഒന്നൊന്നായി എല്ലാവർക്കും മുൻപിൽ നിരത്തിയപ്പോൾ അവർക്ക് എതിർപ്പ് പറയാൻ വാക്കുകൾ കിട്ടാതായി.ഒരു വിവാഹത്തട്ടിപ്പ് വീരന് മുൻപിലായാണ് താൻ താലി കെട്ടാൻ കഴുത്ത് നീട്ടാനിരുന്നതെന്നു അറിഞ്ഞപ്പോൾ ആ കണ്ണുകളിലെ പിടപ്പ് ഞാൻ കണ്ടതാണ്.അവൾ തന്നെ വിവാഹത്തിൽ നിന്നും സ്വൊയം പിന്മാറുന്ന വണ്ണം ചാടിപ്പിടഞ്ഞെഴുന്നേറ്റു.എന്റെ നിർദേശപ്രകാരം കോൺസ്റ്റബിൾ അവനെ കൈവിലങ്ങണിയിക്കുമ്പോൾ പതിയെ അവനരികിൽ നടന്നടുത്തു മുഖമടച്ചൊരു അടിയായിരുന്നു പറഞ്ഞു പറ്റിച്ചു വിവാഹം വരെ കൊണ്ടെത്തിച്ചതിനുള്ള അവളുടെ മറുപടി.

ആശ്രയം എന്ന അനാഥാലയത്തിലെ അന്തേവാസികളായ പെൺകുട്ടികളുടെ വിവാഹമായിരുന്നു അന്ന്.കയ്യിൽ വിലങ്ങു വച്ച് പോകുന്ന അയാളെ നോക്കിനിൽക്കുമ്പോൾ ചതിക്കപ്പെട്ടില്ലല്ലോ എന്ന ആശ്വാസമാണ് ആ കണ്ണുകളിൽ കണ്ടത്.ആശ്രയം എന്ന സ്ഥാപനത്തിന്റെ എല്ലാമെല്ലാമായ ഫാദർ  ആശ്വസിപ്പിക്കാനെന്ന വണ്ണം അവളെ ചേർത്തു പിടിച്ചു.വിവാഹ വേദി വരെ കൊണ്ടെത്തിച്ചു അവളെ മാറ്റി  നിർത്തി  ബാക്കി എല്ലാ വിവാഹങ്ങളും നടത്തുന്നതെങ്ങനെയെന്ന സന്ദേഹത്തിലായിരുന്നു എല്ലാവരും.ഒരു വേള വിവാഹം മുടക്കിയെന്ന കുറ്റം എന്റെ തലയിൽ ചാർത്തപ്പെട്ടു.ഇത്രയും ദിവസം ഊർജിതമായി അന്വേഷിച്ചു പ്രതിയെ കണ്ടു പിടിക്കാതെയുള്ള  പോലീസിന്റെ തണുപ്പൻ മട്ടാണ് അവളുടെ കല്യാണം മുടങ്ങാൻ കാരണമെന്ന് പലരും വളച്ചൊടിച്ചു.പോലീസ് യൂണിഫോമിട്ട എല്ലാവരെയും കുറ്റം പറയാൻ തുടങ്ങിയപ്പോൾ എനിക്കതങ്ങു പിടിച്ചില്ല.അത്രയേറെ ആഗ്രഹിച്ചും കഷ്ടപ്പെട്ടും നേടിയെടുത്ത ഈ യൂണിഫോമിനോടുള്ള സ്നേഹത്തിന്റെ പുറത്ത്....പോലീസുകാരുടെ കഷ്ടപ്പാട് മനസ്സിലാക്കാതെ ചുറ്റും കൂടി നിന്ന് കുറ്റം പറയുന്നവരുടെ വായടപ്പിക്കാൻ അവസാനം അവളെ ഞാൻ തന്നെ വിവാഹം ചെയ്യാമെന്ന് ഉറക്കെ പ്രഖ്യപിച്ചു.എന്റെ തീരുമാനം ചുറ്റും കൂടിയവരുടെ വായടപ്പിച്ചു.പല മുഖങ്ങളിലും ആശ്വാസം കാണാമായിരുന്നു.പ്രതീക്ഷിച്ച പോലെ അവൾ എതിർപ്പ് പ്രകടിപ്പിച്ചെങ്കിലും മറ്റുള്ളവരുടെ നിർബന്ധത്തിനു വഴങ്ങി അവളെനിക്ക് മുൻപിൽ കഴുത്ത് നീട്ടി തന്നു.അപ്പോഴാണ് സത്യത്തിൽ ഞാനവളെ ശെരിക്കും കാണുന്നത് കഴുത്തിൽ ഒരു കുഞ്ഞു സ്വർണമാല വെളുത്തു നേർത്ത കൈകളിൽ ചുവന്ന കുപ്പിവള.കാതിൽ ഒരു കൊച്ചു സ്വൊർണ ജിമിക്കി.ഭംഗിയായി ഞൊറിഞ്ഞുടുത്ത ചുവന്ന പട്ടുസാരിയും മുട്ടറ്റോളം മെടഞ്ഞിട്ട മുടിയിൽ മുല്ലപ്പൂവും ഒഴിച്ചാൽ കല്യാണ പെണ്ണിന്റെതായ ആഡംബരങ്ങൾ ഒന്നുമില്ല.വിരിഞ്ഞ നെറ്റിത്തടത്തിൽ സ്ഥാനം പിടിച്ച കുഞ്ഞു പൊട്ടും നീണ്ടമൂക്കിൽ തിളങ്ങി നിൽക്കുന്ന വെള്ളക്കൽ മൂക്കൂത്തിയും പെണ്ണിന് വല്ലാത്തൊരു അഴക് തന്നെയായിരുന്നു.എന്റെ നോട്ടം കണ്ടിട്ടാണെന്നു തോന്നുന്നു അവൾക്ക് ആകെ അസ്വസ്ഥത പോലെ.കവിളുകൾ ചുവന്നു തുടുത്ത് ചുവന്ന ചുണ്ടുകൾ കൂർപ്പിച്ചു ഉണ്ടക്കണ്ണുകൾ ഒന്ന് കൂടി ഉരുട്ടി എന്നെ നോക്കിയപ്പോൾ ഞാൻ എന്റെ നോട്ടം പതിയെ പിൻവലിച്ചു.

പോലീസ് യൂണിഫോമിൽ ആ കഴുത്തിലേക്ക് താലി ചാർത്തുമ്പോൾ ആ കണ്ണുകളിലെ ഭാവമെന്താണെന്നു എനിക്ക് മനസ്സിലാവുന്നുണ്ടായിരുന്നില്ല.നെറുകയിൽ സിന്ദൂരം ചാർത്തുമ്പോൾ ആ കണ്ണുകളിൽ നനവ് പടർന്നിരുന്നുവോ? അങ്ങനെ പേരോ ഊരോ ഒന്നുമറിയാത്തൊരു പെണ്ണ് ആ സമൂഹവിവാഹ വേദിയിലെ ശുഭമുഹൂർത്തത്തിൽ ഈ കാശിനാഥന്റെ ഭാര്യയായി.പരസ്പരം ഹാരമണിയിച്ച ശേഷം ഫാദർ ആ കൈകൾ എന്റെ ഉള്ളം കയ്യിലേക്ക് ചേർത്തു വയ്ക്കുമ്പോൾ പതുപതുത്ത കൈകളിലെ വിറയൽ ഞാൻ തിരിച്ചറിഞ്ഞിരുന്നു.അലങ്കാരങ്ങൾ ഒന്നുമില്ലാതെ പോലീസ് ജീപ്പിൽ അവളോടൊപ്പം വീട്ടിൽ വന്നു കയറുമ്പോൾ വീട്ടിൽ പറയാതെ വിവാഹം കഴിച്ച എന്നെക്കാളും ആശങ്ക അവളുടെ മുഖത്തുണ്ടായിരുന്നു.രാവിലെ ജോലിക്കു പോയ മകനോടൊപ്പം ഒരു പെണ്ണ് വിവാഹ വേഷത്തിൽ കയറി വരുന്നത് കണ്ടാണ് ചാരു കസേരയിൽ ചാഞ്ഞിരുന്നു പത്രം വായിച്ചു കൊണ്ടിരുന്ന അച്ഛൻ  അടുക്കളയിൽ എന്തോ തിരക്കിലായിരുന്ന അമ്മയെ തൊണ്ടകീറി ഉമ്മറത്തേക്ക് വിളിച്ചു വരുത്തിയത്.ഉടുത്തിരുന്ന നേര്യതിൽ കയ്യിലെ വെള്ളമൊപ്പിവന്ന അമ്മ ഒരു നിമിഷം ഈ കാഴ്ച കണ്ട് സ്തബ്ധയായി.അടുത്ത വീട്ടിൽ നിന്നും ഉയർന്നു വന്ന ചില തലകളും ഇടയ്ക്ക് കാണാമായിരുന്നു.എന്നെ കേൾക്കാനെന്ന വണ്ണം അച്ഛനും അമ്മയും നിശ്ശബ്ദരായപ്പോൾ മൗനത്തെ കീറി മുറിച്ച് ഞാൻ തന്നെ പറഞ്ഞു തുടങ്ങി. 

"അത്.... പിന്നെ  ഒരു പ്രത്യേക സാഹചര്യത്തിൽ എനിക്ക് ഇവളെ വിവാഹം കഴിക്കേണ്ടി വന്നു. "

കേൾക്കേണ്ട താമസം അവളെയൊന്നു ഇരുത്തി നോക്കിയിട്ട് അമ്മ ഒന്നും പറയാതെ ഉടനെ അകത്തേക്ക് പോയി.അമ്മയുടെ പെരുമാറ്റം കണ്ട് ഇനി ഞാൻ എന്ത് ചെയ്യാനാ എന്ന മട്ടിൽ അച്ഛൻ ദയനീയമായി  നോക്കുന്നുണ്ടായിരുന്നു.അവളാണെങ്കിൽ ആകെ ഒരെത്തും പിടിയുമില്ലാത്ത മട്ടിൽ നിൽപ്പാണ്.പിന്നെ രണ്ടും കല്പ്പിച്ചു വീട്ടിലേക്കു കയറിക്കോളാൻ ഞാൻ അവളോട്‌ പറഞ്ഞു.അവൾ ഒരു നിമിഷം ശങ്കിച്ചു വലതു കാൽ ഉയർത്തിയതും ഉള്ളിൽ നിന്നൊരു അശരീരി കേട്ടു. 

"നില്ക്കു... "

അകത്തു നിന്നും കത്തിച്ച നിലവിളക്കുമേന്തി വരുന്ന അമ്മയെ കണ്ടപ്പോൾ അവളുടെ മുഖവും പ്രകാശിച്ചു.വിളക്ക് അവളുടെ കയ്യിൽ കൊടുത്ത് അച്ഛനെ നോക്കി കണ്ണിറുക്കി ചിരിച്ച അമ്മയുടെ മുഖത്ത് ഞാൻ അപ്പോൾ കണ്ടത് സ്ത്രീവിരോധിയായ ഏക മകൻ വിവാഹം കഴിച്ചതിലുള്ള ആശ്വാസമായിരുന്നു.കഴിഞ്ഞ ഒന്നര വർഷമായി അച്ഛനും അമ്മയും പുറകെ നടന്നു പറഞ്ഞു കാൽ കഴച്ച കാര്യമാണ് ഇപ്പോൾ ഒറ്റയടിക്ക് നടന്നത്.

"വലത് കാൽ വച്ച് കയറി വാ മോളെ "

അമ്മയവളെ ആനയിച്ചു പൂജാമുറിയിലേക്കു കൊണ്ട് പോകുമ്പോൾ വീട്ടിലേക്കു കയറാതെ തിരിച്ചു ഡ്യൂട്ടിക്ക് പോവാൻ ജീപ്പിൽ കയറിയ എന്നെ രൂക്ഷമായി നോക്കി അച്ഛൻ നെടുവീർപ്പിടുന്നുണ്ടായിരുന്നു.

കല്യാണം കഴിഞ്ഞ് നിമിഷങ്ങൾക്കകം ഡ്യൂട്ടിയ്ക്ക് തിരിച്ചെത്തിയ എന്നെ സ്റ്റേഷനിലെ പലരും അത്ഭുതത്തോടെ നോക്കുന്നുണ്ടായിരുന്നു.ഇനിയൊരു പെണ്ണ് ജീവിതത്തിൽ വേണ്ടെന്ന് തീരുമാനിച്ച എന്നെക്കൊണ്ട് അങ്ങനൊരു സാഹസം ചെയ്യിപ്പിച്ചതിലുള്ള ദേഷ്യം മുഴുവൻ അവളെ കെട്ടാനിരുന്ന സുകേശനെ ഇടിച്ചു തീർത്തപ്പോൾ അല്പം ആശ്വാസം തോന്നി.

 

വൈകീട്ട് വീട്ടിലെത്തിയപ്പോളേക്കും അവളെന്റെ അച്ഛനെയും അമ്മയെയും കയ്യിലെടുത്തിരുന്നു.അമ്മയുടെ നേര്യതും ഉടുത്തു തുളസി തറയിൽ വിളക്ക് വയ്ക്കുന്ന അവളെ കണ്ടാണ് ഞാൻ വീട്ടിലേക്കു കയറിയത്.എന്തൊക്കെയോ ചോദിക്കണമെന്ന് മനസ്സിലുണ്ടെങ്കിലും ആത്മാഭിമാനം അനുവദിച്ചില്ല.എനിക്ക് കഴിക്കാൻ ഭക്ഷണം എടുക്കാൻ പറഞ്ഞു അമ്മ നീട്ടി വിളിച്ച "ചമ്പാ... "എന്നുള്ള പേരാണ് എനിക്ക് അവളെക്കുറിച്ചു ആദ്യമായി കിട്ടിയ അറിവ്.എന്നേക്കാൾ എളുപ്പത്തിൽ അച്ഛനോടും അമ്മയോടും അവൾ ഇടപെടുന്നത് കണ്ടപ്പോൾ സത്യം പറഞ്ഞാൽ കണ്ണ് തള്ളി പോയി.രാത്രി ചടങ്ങ് അനുസരിച്ചു പാൽ ഗ്ലാസ്സുമായി അവൾ മുറിയിൽ വന്നപ്പോളാണ് അവൾ ഇന്നു വന്ന് കയറിയതേയുള്ളെന്നും ഇന്ന് ഞങ്ങളുടെ ആദ്യരാത്രിയാണെന്നും ഓർത്തത്‌ തന്നെ.വിറയ്ക്കുന്ന കൈകളോടെ അവൾ പാൽ ഗ്ലാസ് നീട്ടിയപ്പോൾ "നിനക്ക് വേണമെങ്കിൽ കുടിച്ചോ.... എന്നെ കുടിപ്പിക്കാൻ നിൽക്കേണ്ട "എന്ന് ദേഷ്യത്തോടെ പറഞ്ഞു മുറിവിട്ടിറങ്ങി.അൽപ നേരം മുറ്റത്ത്‌ നടന്നു തിരിച്ചു ചെല്ലുമ്പോൾ കട്ടിലിന്റെ ഒരത്തായി ചുമരിനോട് ഒതുങ്ങി ചേർന്ന് അവളുറങ്ങുന്നുണ്ടായിരുന്നു.

എന്റെ വീട്ടിൽ എന്നേക്കാൾ അധികാരത്തോടെ അവൾ പെരുമാറുന്നത് സത്യത്തിൽ എന്നെ ദേഷ്യപിടിപ്പിക്കുന്നുണ്ടായിരുന്നു.എന്റെ അനിഷ്ടം ഞാൻ വാക്കുകളിലൂടെ പ്രകടമാക്കുമ്പോൾ ഒന്നും പറയാതെ മിഴികൾ താഴ്ത്തി കേട്ടു നിൽക്കുന്ന അവളെ കാൺകെ എന്റെ ദേഷ്യം ഒന്നുകൂടി വർധിച്ചു.അതിനിടയ്ക്ക് അമ്മ അവൾക്കു വേണ്ടതൊക്കെ എന്നെകൊണ്ട് നിർബന്ധിച്ചു ചെയ്യിപ്പിക്കുന്നുണ്ടായിരുന്നു.അച്ഛനെ കൃഷിയിൽ സഹായിച്ചും അമ്മയെ വീട്ടുജോലികളിൽ സഹായിച്ചും അടുത്ത വീട്ടുകാരോടൊക്കെ സൗഹൃദത്തിൽ പെരുമാറിയും അവൾ എല്ലാവർക്കും പ്രിയപ്പെട്ടവളായി.എന്തിനേറെ പറയുന്നു വീട്ടിലെ പശുക്കിടാവിനു വരെ ഇന്നലെ വന്നു കയറിയ അവളോട്‌ സ്നേഹമായിരുന്നു.ഇടയ്ക്കൊരു അവധി ദിവസം അവളുടെ ഫാദർ വീട്ടിൽ വന്ന് സുഖവിവരം അന്വേഷിച്ചു മടങ്ങി പോകാൻ നേരം അവളെ ഒരു ബാഗ് ഏൽപ്പിച്ചപ്പോൾ അവളതു നെഞ്ചോടടുക്കി പിടിച്ചു നിറ കണ്ണുകളോടെ ഉമ്മ വയ്ക്കുന്നത് കണ്ടിരുന്നു.

പിറ്റേന്ന് പുലർച്ചെ ടെറസിൽ നിന്നുള്ള തട്ടലും മുട്ടലും  കേട്ടാണ് ഞെട്ടിയുണർന്നതു.ഓടിപിടിച്ചു ചെന്നപ്പോൾ ടെറസിലെ കാഴ്ച കണ്ട് ഞാൻ അൽഭുതപ്പെട്ടു നിന്നു.ഫോണിലെ തമിഴ് പാട്ടിനൊത്തു ചിലങ്കയണിഞ്ഞു മനോഹരമായി നൃത്തം ചെയ്യുന്ന അവളെ എത്ര നേരം നോക്കി നിന്നുവെന്നു എനിക്ക് പോലും അറിയില്ല.അവളുടെ നൃത്തം കഴിഞ്ഞു വിയർപ്പൊപ്പുമ്പോൾ അവൾ കാണാതെ തിരികെ നടക്കാൻ തുനിഞ്ഞ ഞാൻ കാണുന്നത് അച്ഛനും അമ്മയും ചിരിയോടെ എന്നെ നോക്കി നിൽക്കുന്നതാണ്.ചമ്മൽ മറയ്ക്കാനായി മുഖത്തു ദേഷ്യഭാവം വരുത്തി അവരെ കടന്നു പോകുമ്പോൾ ഞാൻ ഉറക്കെ വിളിച്ചു പറയുന്നുണ്ടായിരുന്നു" ഇവൾ ഈ വീട് ചവിട്ടി പൊളിക്കുമെന്നാ തോന്നുന്നതെന്നു".രാവിലെ കണ്ടതിനേക്കാൾ ഞെട്ടിക്കുന്നതായിരുന്നു വൈകിട്ടു വീട്ടിൽ ചെല്ലുമ്പോൾ കണ്ട കാഴ്ച.അവൾ അമ്മയെ നൃത്തം ചെയ്യാൻ പഠിപ്പിക്കുന്നു...അച്ഛൻ അത് കണ്ട് ആസ്വദിക്കുന്നു.ഞാൻ വന്നത് കണ്ടപ്പോൾ അമ്മ ചമ്മലോടെ അച്ഛന് പിറകിൽ ഒളിക്കുന്നതു കണ്ടപ്പോൾ സത്യത്തിൽ ചിരി വന്നു.

പിറ്റേന്ന് രാവിലെ ഡ്യൂട്ടിക്ക് പോകാൻ വണ്ടിയിൽ കയറുമ്പോൾ അച്ഛൻ പറയുന്നുണ്ടായിരുന്നു.

"മോൾക്ക്‌ നൃത്തം പഠിപ്പിക്കാൻ ഒരിടം നോക്കാമോ എന്ന്. "

അങ്ങനെ അവളെ കുറിച്ചുള്ള രണ്ടാമത്തെ അറിവ് എനിക്ക് ലഭിച്ചു.ആളൊരു മോശമല്ലാത്ത  നർത്തകി ആണെന്ന്.പ്രതീക്ഷയോടെ ഉമ്മറ വാതിലിന്റെ പുറകിൽ നിന്നും നീണ്ടു വരുന്ന കാപ്പി കണ്ണുകളെ പുച്ഛിച്ചു കൊണ്ട് ഞാൻ വിളിച്ചു പറഞ്ഞു. 

"ആ തൊഴുത്തിലെ അമ്മിണി പശുവിനെ ഇത്തിരി നീക്കി കെട്ടി കൊടുക്ക്‌.അച്ഛനിന്നലെ പറഞ്ഞില്ലേ അവളെ ചവിട്ടിക്കാൻ ആളെ നോക്കണം എന്ന്.ഇത്രേം നന്നായി ചവിട്ടി പൊളിക്കുന്ന ആളിവിടെ ഉള്ളപ്പോൾ വേറെ ആളെ നോക്കണോ.അച്ഛന് കാശും ലാഭം. "

കണ്ണും നിറച്ചു അടുക്കളയിലേക്കു പോകുന്ന അവളുടെ പിറകെ അച്ഛനും പോകുന്നത് കണ്ടു.രാവിലെ ഞാൻ പറഞ്ഞതിനുള്ള മറുപടി അച്ഛനെനിക്ക് തന്നത് വൈകുന്നേരം വീടിനോടു ചേർന്നുള്ള വിശാലമായ സ്റ്റോർ മുറി ഒഴിച്ച് വൃത്തിയാക്കി  അവൾക്കു നൃത്തക്ലാസ്സ്‌ തുടങ്ങാൻ വിട്ടുകൊടുത്തു കൊണ്ടാണ്.എന്റെ കുഞ്ഞിലേ മുതലുള്ള പല സൂക്ഷിപ്പുകളും ഞാൻ വരുമ്പോളേക്കും വിറ്റ് കാലിയാക്കിയിരുന്നു.രണ്ടു ദിവസത്തിനകം പെയിന്റടിചു വൃത്തിയാക്കി അവൾ നൃത്താധ്യാപനം തുടങ്ങുമ്പോൾ വല്ലാത്തൊരു പക എനിക്കവളോടുണ്ടായിരുന്നു.

ഒരു ദിവസം പുലർച്ചെ എന്തോ വീണുടയുന്ന ശബ്ദം കേട്ട് എഴുന്നേൽക്കുമ്പോൾ ഞാൻ കണ്ടത് ഞാൻ വളരെ കാലമായി സൂക്ഷിച്ചു വച്ച ഒരു പളുങ്കു പ്രതിമ താഴെ വീണുടഞ്ഞു കിടക്കുന്നതാണ്.കുറ്റവാളിയെ പോലെ അവൾ നിന്ന് പരുങ്ങുന്നതു കണ്ടപ്പോൾ കൈ വീശി ഒന്നു പൊട്ടിച്ചു.കണ്ണ് നിറച്ചു കൊണ്ട് മുഖം പൊത്തി അവൾ നിൽക്കുന്നുണ്ടായിരുന്നു. 

"ഞാൻ.... ഞാൻ ചിലങ്ക എടുക്കുമ്പോൾ അറിയാതെ.... "

മുഴുവൻ പറയാൻ സമ്മതിക്കാതെ അവളുടെ കയ്യിൽ നിന്നും ചിലങ്ക തട്ടിപ്പറിച്ചു എറിയുമ്പോൾ പഴക്കം ചെന്ന അതിലെ മണികളും ചെറുശബ്ദത്തോടെ പലയിടങ്ങളിലായി ഓടിയൊളിച്ചു.അടിച്ചപ്പോൾ പുറത്തു വരാത്ത ഏങ്ങലടികൾ എന്റെ ആ പ്രവർത്തിയിലൂടെ പുറത്തു വന്നപ്പോൾ ഞാൻ മനസ്സിലാക്കി അവൾക്കു അതെത്രത്തോളം പ്രിയപ്പെട്ടതായിരുന്നു എന്ന്.ശബ്ദം കേട്ട് അച്ഛനും അമ്മയും ഓടിയെത്തുമ്പോളേക്കും പ്രതിമയുടെ ഭാഗങ്ങൾ പെറുക്കിയെടുത്തു ഞാൻ പുറത്തേക്കു നടന്നിരുന്നു.എന്നെ കേൾപ്പിച്ചു കൊണ്ട് അടുക്കളയിലെ പത്രങ്ങളോട് മല്ലിട്ടും എന്റെ ചോദ്യങ്ങൾക്കൊന്നും ഉത്തരം തരാതെ മുഖം തിരിച്ചും  അമ്മയും അച്ഛനും അവരുടെ പ്രതിഷേധം രേഖപ്പെടുത്തി.ഇടയ്ക്കെങ്കിലും എന്റെ കാര്യങ്ങൾ നോക്കിയിരുന്ന അവൾ അതോടെ പേടിച്ചു എന്റെ അടുത്തേക്ക് വരാതെയായി.രാത്രി കിടക്കാൻ മുറിയിൽ ചെല്ലുമ്പോൾ കൊച്ചു കുഞ്ഞിനെ പോലെ കിടന്നുറങ്ങുന്ന അവളുടെ കവിളിൽ എന്റെ അഞ്ചു വിരലുകളും തെളിഞ്ഞു കാൺകെ ആദ്യമായി തെറ്റു ചെയ്തതിലുള്ള കുറ്റബോധം മനസ്സിൽ നിറഞ്ഞു.പതിയെ അവളുടെ കവിളിൽ തലോടുമ്പോൾ ഞാൻ പോലും അറിയാതെ ഒരു പുഞ്ചിരി എന്റെ ചുണ്ടിൽ വിരിഞ്ഞു.പിന്നെ പിന്നെ അവൾ ഒഴിഞ്ഞു മാറുമ്പോളൊക്കെ എന്റെ കണ്ണുകൾ ആർത്തിയോടെ അവളെ തിരഞ്ഞു കൊണ്ടിരുന്നു.അവളോട് അടുക്കാൻ മനസ്സ് വെമ്പൽ കൊള്ളുമ്പോളും ജാള്യത തോന്നി മനസ്സിനെ അടക്കി നിർത്തി.അവളുടെ ഓരോ ചലനങ്ങളും ഒപ്പിയെടുക്കാൻ എന്റെ കണ്ണുകൾ അവൾക്കു പിറകെ സഞ്ചരിച്ചു കൊണ്ടിരുന്നു.

അടുത്തുള്ള ഒരമ്പലത്തിൽ നൃത്തം ചെയ്യാനായി അവളെ ക്ഷണിച്ചപ്പോൾ എന്റെ സമ്മതത്തിനായി ആശങ്കയോടെ കാത്തു നിന്ന അവളെ കണ്ടപ്പോൾ സത്യത്തിൽ ചിരിപൊട്ടി.എന്റെ സമ്മതം ലഭിച്ചപ്പോൾ തുള്ളിച്ചാടി കൊണ്ട് അച്ഛനോടും അമ്മയോടും പറയുന്ന അവളെ വാത്സല്യത്തോടെ നോക്കി നിന്നുപോയി.അവളെ കുറിച്ചുള്ള അടുത്ത അറിവ് എനിക്ക് ലഭിച്ചത് പ്രോഗ്രാമിന്റെ നോട്ടിസിൽ നിന്നാണ്.അതിൽ വലുതായി തന്നെ അച്ചടിച്ചിരുന്നു. 9 മണിക്ക് സൗപർണിക കാശിനാഥൻ നടത്തുന്ന നിർത്താർച്ചന എന്ന്... 

 സൗപർണിക.... ആ പേര് അന്ന് എത്ര തവണ മനസ്സിൽ ഉരുവിട്ടുവെന്നു അറിയില്ല.പ്രോഗ്രാമിന്റെ തലേ ദിവസം രാവിലെ ഞാൻ പൊട്ടിച്ച ചിലങ്കയിലെ മണികൾ തുന്നിക്കൂട്ടുന്ന അവളെ കണ്ടുകൊണ്ടാണ് ഡ്യൂട്ടിക്ക് പോയത്.തിരിച്ചു വരുമ്പോൾ അവൾക്കു കൊടുക്കാനായി ആരുടേയും പ്രേരണയില്ലാതെ അന്നാദ്യമായി  ഒരു സമ്മാനം ഞാൻ വാങ്ങിയിരുന്നു.രാത്രിയിൽ അവൾ ഉറക്കം പിടിച്ചപ്പോൾ അലമാറിയിലിരുന്ന അവളുടെ ചിലങ്കയ്‌ക്കരികെ സൗപർണിക കാശിനാഥൻ എന്ന് എഴുതിയ ആ ബോക്സ്‌ കൊണ്ടു വച്ചു.

രാവിലെ ഉറക്കമുണർന്നപ്പോൾ അമ്പലത്തിൽ നിന്നും തിരിച്ചു വരുന്ന അമ്മയെയും അവളെയും മുറിയിലെ ജനാലയിലൂടെ കണ്ടിരുന്നു.മുറിയിൽ അവൾ കൊണ്ട് വച്ച വലിയ പൊതി വെറുതെ തുറന്നപ്പോൾ അതിൽ താൻ സമ്മാനിച്ച ചിലങ്ക അമ്പലത്തിൽ നിന്നും പൂജിച്ചു കൊണ്ട് വച്ചിട്ടുണ്ടായിരുന്നു. വൈകീട്ടത്തെ പരുപാടി കാണാൻ വരാവോ എന്ന് മടിച്ചു മടിച്ചവൾ ചോദിച്ചപ്പോൾ നോക്കാം എന്ന് പറഞ്ഞെങ്കിലും പോകുമെന്ന് മനസ്സിൽ ഞാൻ ഉറപ്പിച്ചിരുന്നു.വൈകിട്ട് ക്ഷേത്രത്തിലെ വേദിയിൽ ഞാൻ സമ്മാനിച്ച ചിലങ്കയണിഞ്ഞു  മതിമറന്നാടുന്ന അവളെ കണ്ണെടുക്കാതെയാണ് നോക്കി നിന്നത്.മുഴുവൻ മനസ്സിലായില്ലെങ്കിലും ശ്രീരാമ കഥകൾ ആണവൾ നൃത്തത്തിലൂടെ പറയുന്നതെന്ന് മനസ്സിലായി.ചുറ്റും കണ്ണോടിച്ചപ്പോൾ എല്ലാവരും അവളുടെ നൃത്തത്തിൽ മതിമറന്നു ഇരിക്കുന്നത് കണ്ടപ്പോൾ എന്റെ പെണ്ണാണെന്ന് അഭിമാനത്തോടെ മനസ് വിളിച്ചു പറയുന്നുണ്ടായിരുന്നു.നൃത്തത്തിനിടയിൽ അപ്രതീക്ഷിതമായി കണ്ടപ്പോൾ എന്റെ പെണ്ണിന്റെ കടുംകാപ്പി കണ്ണുകളിലും ഞാൻ കണ്ടു പ്രിയപ്പെട്ടതെന്തോ തേടി പിടിച്ച തിരയിളക്കം.ശ്രീ രാമനായിക്കൊണ്ട്  അവൾ തൊടുത്തു വിട്ട അമ്പുകളെല്ലാം പ്രണയ ബാണങ്ങൾ ആയി ഈ കാശിനാഥന്റെ നെഞ്ചിലേക്കാണ് വന്ന് തറച്ചത്. നൃത്തം അവസാനിച്ചു കരഘോഷങ്ങൾ ഉയർന്നപ്പോൾ രോമാഞ്ചം ഉണ്ടായത് എനിക്കാണ്.എത്രയും പെട്ടന്ന് അവളെ കണ്ട് അഭിനന്ദിക്കാൻ മനസ്സ് തുടികൊട്ടിക്കൊണ്ടിരുന്നു.ഗ്രീൻ റൂമിനടുത്തേക്കു ഓടിച്ചെല്ലുമ്പോൾ അവിടെ കേട്ട സംഭാഷണം ശ്രദ്ധിച്ചെന്റെ സന്തോഷം കെട്ടടങ്ങി രക്തം തിളച്ചു.

"എടാ ഏതാടാ ആ ഉരുപ്പടി.... എന്താ ഫിഗർ.ഇവിടെ ഒന്നും ഇതുവരെ കണ്ടിട്ടില്ലല്ലോ.ഒന്ന് പരിചയപ്പെടാൻ കിട്ടുവോ "

പറഞ്ഞവനെ കുനിച്ചു നിർത്തി കൂമ്പിനിട്ടു ഇടിച്ചു ഒരു അലർച്ചയായിരുന്നു. 

"ഈ കാശിനാഥന്റെ പെണ്ണിനെ തന്നെ വേണം അല്ലേടാ നിനക്ക് പരിചയപ്പെടാൻ. "

അവൻ നിലത്തു കിടന്ന് പുളയുമ്പോളേക്കും ബാക്കിയുള്ളവന്മാർ നാല് ദിക്കിലേക്കും ചിതറിയോടിയിരുന്നു.പുറകിൽ ആളനക്കം കേട്ട് തിരിഞ്ഞു നോക്കിയപ്പോൾ എന്റെ ആക്രോശം കേട്ട് സന്തോഷത്തോടെ കണ്ണു നിറച്ചു നിൽക്കുന്ന ചമ്പയെ കണ്ടു.ആദ്യം ഒന്നു പതറിയെങ്കിലും ചമ്മൽ മറയ്ക്കാൻ ദേഷ്യത്തിന്റെ മുഖം മൂടിയണിഞ്ഞു അധികാരത്തോടെ കൈ പിടിച്ചു അവിടെ നിന്നും മടങ്ങി.രാത്രി കിടക്കാനായി ചെല്ലുമ്പോൾ എന്നെ പ്രതീക്ഷിച്ചെന്നോണം ഉറങ്ങാതെ കാത്തു നിൽക്കുന്നുണ്ടായിരുന്നു.കയറി ചെന്ന ഉടനെ എന്നോടെന്തോ പറയാൻ നിന്ന് പരുങ്ങുന്നതു കണ്ടു.പുരികം പൊക്കി എന്താണെന്ന അർത്ഥത്തിൽ ചോദിച്ചതും ഒരു ചെറുചിരി മുഖത്തു വിരിഞ്ഞു. 

"നന്ദി "

"എന്തിന്? "

"ചിലങ്ക വാങ്ങി തന്നതിന്. പിന്നെ.... ഇന്ന്... ക്ഷേത്രത്തിൽ വച്ച് അവന്മാരോട്.... "

"പഴയ ചിലങ്ക താൻ തുന്നിക്കൂട്ടുന്നതു കണ്ടപ്പോൾ വാങ്ങി തന്നെന്നെ ഉള്ളൂ.ഞാൻ ആണല്ലോ അത് നശിപ്പിച്ചത്.പിന്നെ അവന്മാരോട് അപ്പോഴത്തെ ദേഷ്യത്തിന്റെ പുറത്ത് പറഞ്ഞതാ....അതത്ര കാര്യമാക്കണ്ട. "

അത്രയും പറഞ്ഞപ്പോളേക്കും ആ മുഖത്തുണ്ടായിരുന്നു പ്രകാശം മങ്ങുന്നത് കണ്ടു.

"അതെന്റെ അമ്മേടെ ചിലങ്കയാ.നർത്തകി ആയിരുന്നു.അമ്മേടെ അടുത്തുന്ന ഞാൻ നൃത്തം പഠിച്ചത്.അമ്മ തമിഴത്തിയായിരുന്നു അപ്പ  മലയാളി.പ്രണയവിവാഹം ആയിരുന്നു.അമ്മ അപ്പെടെ  നാട്ടിൽ ഒരു പ്രോഗ്രാമിന് വന്നപ്പോൾ കണ്ടിഷ്ടപ്പെട്ടു. തേടി കണ്ടു പിടിച്ചു ഇഷ്ടം പറഞ്ഞപ്പോൾ ആദ്യം എതിർത്തെങ്കിലും അപ്പെടെ സ്നേഹത്തിനു മുൻപിൽ അമ്മയ്ക്കും അധികം പിടിച്ചു നിൽക്കാൻ ആയില്ല.രഹസ്യമായി കല്യാണം കഴിച്ചത് കണ്ടു പിടിച്ചതോടെ രണ്ടു പേരുടെ നാട്ടിലും നിൽക്കാൻ പറ്റാത്ത അവസ്ഥയായി.അങ്ങനെ ഒളിച്ചോടി പല നാടുകളിലായി പല ജോലികൾ ചെയ്തു ജീവിച്ചു.എനിക്ക് ഓര്മവെച്ചതു മുതൽ മൂകാംബിക സന്നിധിയിൽ പൂ കച്ചവടം ആയിരുന്നു.എന്റെ പത്താമത്തെ വയസ്സിൽ അപ്പാ പോയി.ഹൃദയസ്തംഭനം ആയിരുന്നു.പിന്നീട് അങ്ങോട്ട് അമ്മയും ഞാനും ഒറ്റയ്ക്കായി.ആൺ തുണയില്ലാത്തതിന്റെ കുറവുകൾ പതിയെ ഞങ്ങളും അനുഭവിച്ചു തുടങ്ങി.സഹിക്കാൻ വയ്യാതായപ്പോഴാണ് ഇങ്ങോട്ട് വന്നത്. ഫാദർ അപ്പെടെ കൂടെ പഠിച്ചതാ.അപ്പായുള്ളപ്പോൾ ഇടയ്ക്ക് വീട്ടിൽ വരുമായിരുന്നു.അപ്പാ പറഞ്ഞ അറിവ് വച്ച് തേടി കണ്ടുപിടിച്ചു ഇവിടെയെത്തി.അവിടുന്ന് ഒരു വർഷം കഴിഞ്ഞപ്പോൾ ഒരു പനി വന്ന് അമ്മയും പോയി.ഞാൻ ശെരിക്കും അനാഥയായി.ഇത്തിരി വലുതായപ്പോൾ ഓർഫനേജിന്റെ അടുത്തുള്ള കുട്ടികളെയൊക്കെ നൃത്തം പഠിപ്പിക്കാൻ തുടങ്ങി.അടുത്തുള്ള സ്കൂളിലെ കുട്ടികൾക്ക്  യൂത്ത് ഫെസ്റ്റിവലിന് നൃത്തം പഠിപ്പിക്കാൻ പോയപ്പോളാണ് സുകേശനെ കാണുന്നത്.അടുത്ത് ഒരു മൊബൈൽ ഷോപ്പ് നടത്തുകയായിരുന്നു അയാൾ.ഇഷ്ടം പറഞ്ഞ് കുറെ പിറകെ വന്നപ്പോൾ അവസാനം ഫാദറിനെ കാണാൻ പറഞ്ഞു.എല്ലാവർക്കു മുന്നിലും അയാൾ മാന്യനായിരുന്നത് കൊണ്ട് വിവാഹാലോചന മുൻപോട്ടു പോയി അവസാനം ആ വിവാഹവേദി വരെ എത്തി.അപ്പായും അമ്മയും പോയതിനു ശേഷം എന്നെ സ്വൊന്തമെന്നു ഒരാൾ ഉറപ്പോടെ വിളിച്ചു പറയുന്നത് ഇന്നാണ് കേട്ടത് അതാ ഞാൻ....പെട്ടന്ന്.. എന്തൊക്കെയോ. "

പറഞ്ഞു നിർത്തിയതും നിറഞ്ഞ മിഴികളോടെ അവൾ നോക്കിയപ്പോൾ വല്ലാത്ത അലിവ് തോന്നി. 

"താൻ കിടന്നോ ക്ഷീണം കാണും. "

"എനിക്ക് ചിലങ്ക വാങ്ങി തന്ന സ്ഥിതിക്ക് അന്ന് പൊട്ടിച്ച പാവയെ പോലെ ഒരെണ്ണം പകരം ഞാനും വാങ്ങി തരുന്നുണ്ട്.അത്രയേറെ ഇഷ്ട്ടായിരിക്കും... ല്ലെ .... അതല്ലേ  എന്നെ തല്ലിയെ? "

അവളുടെ ചോദ്യങ്ങൾ കേട്ടപ്പോൾ പതിയെ പഴയ ഓർമകളുടെ കുത്തൊഴുക്കിൽ പെട്ടുപോയി. 

"എനിക്ക് ജീവിതത്തിൽ അത്രയേറെ വെറുപ്പുള്ള ഒന്നായിരുന്നു അത്. "

"വെറുപ്പോ?? എന്നിട്ടാണോ അതിങ്ങനെ സൂക്ഷിച്ചു വച്ചേ? "

"അത് ഞാനൊരാൾക്കു പിറന്നാൾ ഗിഫ്റ്റ് കൊടുത്തതായിരുന്നു.പല്ലവി അതായിരുന്നു പേര്.കൂടെ പഠിച്ചതായിരുന്നു. ജീവിതാവസാനം വരെ കൂടെ കൂട്ടണമെന്ന് ആഗ്രഹിച്ചിരുന്നു.ഡിഗ്രി കഴിഞ്ഞു നിൽക്കുന്ന സമയം ആഗ്രഹിച്ചപോലെ ജോലിയൊന്നും കിട്ടാതെ വന്നപ്പോൾ അച്ഛനോടൊപ്പം തൽക്കാലത്തേക്ക് തൂമ്പാപിടിക്കാൻ തീരുമാനിച്ചു.ഇത്തിരി കാത്തിരിക്കാൻ മാത്രമേ അവളോട്‌ പറഞ്ഞുള്ളൂ പക്ഷെ ആറു മാസം കഴിഞ്ഞപ്പോളേക്കും ആ കാത്തിരിപ്പു അവൾക്കു മടുത്തു.ഒരു ഗൾഫ് കാരന്റെ ആലോചന വന്നപ്പോൾ പോലിസ് കോൺസ്റ്റബിൾ ആയ അവളുടെ അച്ഛന്റെ കണ്ണിൽ സ്ഥിര വരുമാനം ഇല്ലാത്ത കർഷകനായ എന്റെ വില ഇടിഞ്ഞു.അവസാനം ഞാൻ കൊടുത്ത സമ്മാനങ്ങൾ ഒക്കെ തിരിച്ചു തന്ന് അവളാ ബന്ധം അവസാനിപ്പിച്ചു.ബാക്കി എല്ലാം കത്തിച്ചു കളഞ്ഞെങ്കിലും അത് കത്തിക്കാൻ തോന്നിയില്ല.ഏക സമ്പാദ്യമായ കുടുക്ക പൊട്ടിച്ചു അത്രയേറെ ആഗ്രഹിച്ചു വാങ്ങിയതായിരുന്നു.അതും അവളുടെ സന്തോഷത്തിനു വേണ്ടി.കൈപ്പറ്റുമ്പോൾ ജീവിതാവസാനം വരെ സൂക്ഷിക്കും എന്നൊക്കെ പറയുന്നുണ്ടായിരുന്നു.അവൾ പോയതോടെ ഞാൻ ആകെ മാറി. ഇടയ്ക്ക് കള്ളുകുടിയൊക്കെ തുടങ്ങിയെങ്കിലും അമ്മയുടെ കണ്ണീരിനു മുൻപിൽ തോറ്റു കൊടുത്തു.പിന്നീട് അങ്ങോട്ട്‌ വാശിയായിരുന്നു.കഷ്ടപ്പെട്ട് പഠിച്ചു.ഇടയ്ക്ക് ഊർജം കുറഞ്ഞു പോവുന്നു എന്ന് തോന്നുമ്പോൾ ആ പാവയെടുത്തു മുൻപിൽ വച്ച് പഠിക്കും. അത് കാണുമ്പോൾ ഒരു ആവേശമാണ്.എന്നെ വേണ്ടെന്നു വച്ചു പോയവൾക്കു മുന്നിൽ ജയിക്കാനുള്ള വാശി.അതിനിടയിൽ സ്ത്രീ വിരോധിയായി.പ്രണയം കല്യാണം കുട്ടികൾ എന്നിവയോടൊക്കെ പുച്ഛമായി.അവസാനം എന്റെ കഠിന പരിശ്രമം വിജയം കണ്ടു.എസ്  ഐ സെലെക്ഷൻ കിട്ടി.ദൈവാനുഗ്രഹം കൊണ്ട് നാട്ടിൽ തന്നെ പോസ്റ്റിങ്ങ്‌ കിട്ടി.എന്നെ തേച്ചിട്ടു പോയവളുടെ അച്ഛനെ കൊണ്ട് ദിവസവും സലൂട്ടടിപ്പിക്കുകയും സാറെന്നു വിളിപ്പിക്കുകയും ചെയ്യുന്നു. 

ഞാൻ പറഞ്ഞു കഴിഞ്ഞിട്ടും അവള് എന്നെ നോക്കി നിൽപ്പുണ്ടായിരുന്നു.

"എന്നിട്ട്....ഇപ്പഴും പ്രണയത്തിലും വിവാഹത്തിലും ഒന്നും വിശ്വാസമില്ലെന്നാണോ? "

ആകാംഷയോടെ കണ്ണുകൾ കുറുക്കി ചോദിക്കുന്ന ആ പെണ്ണിനെ കണ്ടപ്പോൾ ചിരിപൊട്ടിയെങ്കിലും ഗൗരവത്തോടെ തന്നെ പറഞ്ഞു 

"അതെ.... "

ആ ഒരു വാക്ക് മതിയായിരുന്നു  അവൾക്കു മുഖം വീർപ്പിക്കാൻ.നിറഞ്ഞ കണ്ണുകൾ ഞാൻ കാണാതിരിക്കാനായി വേഗം കയറി തിരിഞ്ഞു കിടന്നു.ഇടയ്ക്ക് പതിയെ മൂക്ക് ചീറ്റുന്നതു കേൾക്കാമായിരുന്നെങ്കിലും ആ പെണ്ണ് ഈ കാശിനാഥന്റെ സ്നേഹത്തിനായി കൊതിക്കുന്നുണ്ടെന്ന തിരിച്ചറിവിൽ ഞാൻ സമാദാനമായി കണ്ണടച്ചു.ഇടയ്ക്ക് കണ്ണുതുറന്നപ്പോൾ ടെറസിലേക്കുള്ള ഇടനാഴിയിൽ വെളിച്ചം കണ്ടു.ഇരുട്ടത്ത് അരികിൽ ചമ്പയെ തപ്പി നോക്കിയെങ്കിലും ബെഡ് ശൂന്യമായിരുന്നു.പതിയെ എണീറ്റ് ടെറസിൽ ചെന്ന് നോക്കിയപ്പോൾ അവളവിടെ തകർത്തു നൃത്തം ചെയ്യുന്നു.ഇടയ്ക്ക് കണ്ണ് തുടയ്ക്കുന്നതു കണ്ടപ്പോൾ ഞാൻ ഇന്നലെ പറഞ്ഞത് അവൾക്കൊത്തിരി നൊന്തു എന്ന് മനസ്സിലായി.ഈ പെണ്ണിന് സന്തോഷം വന്നാലും സങ്കടം വന്നാലും ഇങ്ങനെ തകർത്താടണം.

മെല്ലെ വാതിൽ തുറന്നു അരികിലേക്ക് പോകാൻ നിൽക്കുമ്പോളേക്കും കറങ്ങി കറങ്ങി ബാലൻസ് കിട്ടാതെ ഭിത്തിയിൽ കാലിടിച്ചു അവൾ വീണു പോയിരുന്നു.വേദന കൊണ്ട് പുളയുന്നതു കണ്ട് ഓടി ചെന്ന് അടുത്തെത്തി കാലു പരിശോധിക്കുമ്പോൾ "എന്നെ തൊടേണ്ട" എന്ന് പറഞ്ഞു കൈ തട്ടി മാറ്റുന്നുണ്ടായിരുന്നു.ഒന്ന് രണ്ട് തവണ ആവർത്തിച്ചപ്പോൾ... "നിനക്കെന്താടി ഭ്രാന്താണോ? "എന്ന് അത്യാവശ്യം ഒച്ചയിൽ ചൂടായിക്കൊണ്ട് ചോദിച്ചു. അതോടെ പെണ്ണ് ഏങ്ങലടിച്ചു കരയാൻ തുടങ്ങി.ചെറുതായി നീലിച്ച കാലിൽ എന്റെ ചുണ്ട് ചേർത്തപ്പോൾ പതിയെ ഉണ്ടകണ്ണ് മിഴിച്ചു നോക്കുന്നുണ്ടായിരുന്നു.

"എന്തിനാ.... എന്തിനാ ഇപ്പൊ വന്നേ.. ഞാൻ അനാഥയാ.... ആരും ഇല്ലാത്തവൾ. എപ്പോഴോ അറിയാതെ സ്നേഹിച്ചു പോയി.... അതാ ഇങ്ങനെ കടിച്ചു തൂങ്ങി കിടക്കുന്നതു.ഇനി...ഇനി വൈകില്ല....ഒഴിഞ്ഞു തന്നേക്കാം. 

ഏങ്ങലടിച്ചു കരയുന്ന അവളുടെ മുഖം പതിയെ കൈകുമ്പിളിൽ കോരിയെടുത്തു അവളുടെ കണ്ണുനീർ എന്റെ ചുണ്ടുകളാൽ ഒപ്പിയെടുത്തു.ആ മുഖം മുഴുവൻ ചുംബനങ്ങൾ കൊണ്ട് നിറയ്ക്കുമ്പോൾ കൂമ്പിയടഞ്ഞ മിഴികളോടെ എനിക്ക് വിധേയപ്പെട്ടു നിൽക്കുകയായിരുന്നു അവൾ. 

"ഞാൻ... ഞാൻ.... വെറുതെ പറഞ്ഞതാടി ഉണ്ടക്കണ്ണി.നിന്നെ ഞാൻ അങ്ങനങ്ങു വിടുവോ?ജീവനാ.... എന്റെ ജീവനാണ് ചമ്പാ നീ... "

എന്നിട്ടും വിശ്വാസം വരാത്ത പോലെ കണ്ണ് മിഴിച്ചു നോക്കുന്നത് കണ്ടപ്പോൾ പതിയെ കൈകളിൽ കോരിയെടുത്തു മുറിയിലേക്ക് നടന്നു.

"വിട്.... കാശിയേട്ടാ അപ്പാടെ വിയർപ്പാ.... "

അത് പറഞ്ഞപ്പോൾ കിടക്കയിൽ കിടത്തി  ഒന്നുകൂടി എന്റെ നെഞ്ചിലേക്ക് ചേർത്തു പിടിച്ചു.

"നിന്റെ വിയർപ്പിനും ചന്ദനത്തിന്റെ ഗന്ധമാണ് പെണ്ണെ.  നിന്റെയീ പിടയ്ക്കുന്ന കണ്ണുകളിൽ ഞാൻ കണ്ടതാണ്  ഈ കാശിനാഥനോടുള്ള അടങ്ങാത്ത പ്രണയത്തിന്റെ തിരയിളക്കം.ഈ സൗപര്ണികയുടെ സ്നേഹവായ്പ്പിൽ നീന്തി നിവരുവാൻ എന്റെ മനസും തുടിക്കുന്നുണ്ട്.വെറും കല്ലായിരുന്ന കാശിനാഥന്റെ മനസ്സിനെ തണുപ്പിച്ചത് എന്റെയീ സൗപര്ണികയിലെ ഓളങ്ങളാണ്.വറ്റിവരണ്ടു പോയ എന്നിലെ പ്രണയദാഹം ശമിപ്പിക്കുവാൻ നിനക്കെ കഴിയൂ.... ചമ്പാ........ ❤️❤️❤️"

അവസാനിച്ചു.

ശ്രുതി