ഗർഭം

❤ഗർഭം❤
ഫുൾ പാർട്ട്‌

നാലു പേര് അറിഞ്ഞു ഉണ്ടായാൽ അഭിമാനവും അറിയാതെ ഉണ്ടായാൽ അപമാനവും സമ്മാനിക്കുന്ന ഗർഭം ..എനിക്കുമുണ്ട് ഒരു കഥ പറയാൻ ..ഒരു ഗര്ഭത്തിന്റെ കഥ...

മൂന്നാം ക്ലാസ്സിൽ പഠിക്കണ കാലം .ക്ലാസ്സിൽ ഇടക്കിടക്ക് ടീച്ചർ പറയും സംശയങ്ങൾ ചോദിക്കണ കുട്ടികളാണ് നന്നായി പഠിക്കുന്നതെന്നു.എന്തായാലും നമുക്ക് വലിയ സംശയങ്ങളൊന്നുമില്ല എന്ന മട്ടിൽ ഞാനും ടീമും ക്ലാസ്സിൽ ഇരിക്കും.കോഴിയാണോ അതോ കോഴിമുട്ടയാണോ ആദ്യം ഉണ്ടായേ എന്ന കുരുന്നുകളുടെ പതിവ് സംശയം പോലും മ്മടെ സ്കിന്നിന്റെ ഔട്ടർഫീൽഡിൽ പോലും ഒന്ന് തൊട്ടിട്ടില്ല ..

.അങ്ങിനെ സർവ്വവിജ്ഞാന കോശങ്ങളായി വിലസി വാണിരുന്ന സമയം .വാർഷിക പരീക്ഷയൊക്കെ കഴിഞ്ഞു സ്കൂൾ പൂട്ടി.അവധിക്കാലത്തു അണ്ണന് കുഞ്ഞമ്മേടെ വീട്ടിൽ ഒരു 10 , 15 ദിവസം നീണ്ടു നിക്കണ വിസിറ്റ പതിവാണ് .ഇത്തവണ അണ്ണനോടൊപ്പം ഞാനും പോയി .3,4 ദിവസം അണ്ണന്റെ ബലത്തിൽ പിടിച്ചു നിന്നു പക്ഷെ അമ്മയെന്ന സ്നേഹത്തിന്റെ ചൂടറിയാതെ അതിൽ കൂടുതൽ ദിവസം എനിക്കു പറ്റില്ലാർന്നു . ഒടുവിൽ പപ്പ വന്നു എന്നെ കൂട്ടികൊണ്ടുപോയി .

വീട്ടിലെത്തിയ ആ ദിവസം അന്നാണ് എന്റെ ജീവിതത്തിലെ സംശയങ്ങളുടെ വെടിക്കെട്ടിന് തിരികൊളുത്തിയത് .

രമ ചേച്ചി ...അയലത്തെ വീട്ടിലെയാ .കല്യാണം കഴിച്ചു വിട്ടതാ .കുറയെ നാളായി കണ്ടിട്ടു .എപ്പഴെങ്കിലും വന്നാൽ അമ്മയുടെകൂടെ ഉമ്മറത്തിരുന്നു സംസാരം പതിവുള്ളതാണ്.ഞാൻ വന്നതറിഞ്ഞ അമ്മ ,3,4 ദിവസത്തെ സ്നേഹം മോനോട് കാണിക്കാൻ ഓടി വന്നു.ഒപ്പം രമ ചേച്ചിയും എഴുന്നേറ്റു വന്നു ...ആ എഴുന്നേൽപ്പ് അതാണ് കോഴിയും,മുട്ടയും പോലും തോൽപ്പിയ്ക്കാത്ത എന്നെ തോൽപിച്ചു കളഞ്ഞ സംശയം...

ചേച്ചിടെ വയറിനു ഇതു എന്തുപറ്റി..? ഞാൻ ചോദിച്ചു .. അമ്മ ചിരിച്ചുകൊണ്ട് മറുപടി തന്നു ..ചേച്ചിടെ വയറ്റിൽ കുഞ്ഞുവാവയുണ്ട് മോനെ. അമ്മയുടെ വയറ്റിലാണ് ഞാൻ ഉണ്ടായത് എന്നു പറഞ്ഞു കേട്ടിട്ടുണ്ട് .. കുഞ്ഞുവാവ വയറ്റിലുള്ളവരുടെ വയറു വീർത്തിരിക്കുന്നതും കണ്ടിട്ടുണ്ട് .പക്ഷെ എന്തോ അന്നുമുതൽ എന്റെ മനസ്സിൽ ഒരു സംശയം . എന്താണ് ഈ ഗർഭം?എങ്ങിനെയാണ് ഗർഭം ഉണ്ടാകണേ?

ഒരുപാട് ചിന്തിച്ചു ...ഒന്നും പിടികിട്ടിയില്ല ആദ്യം അമ്മയോട് തന്നെ ചോദിച്ചു ..അമ്മച്ചി ഈ ഗർഭം എങ്ങിനെയാണ് ഉണ്ടാകുന്നെ? മോൻ കുഞ്ഞല്ലേ അതൊക്കെ അറിയേണ്ട പ്രായത്തിൽ അറിഞ്ഞാൽ മതി ..ഇപ്പോൾ പോയി കളിക്ക് .....പക്ഷെ അമ്മയുടെ ആ കൊച്ചാക്കൽ എനിക്കു അത്ര പിടിച്ചില്ല ...ഈ ഗർഭം എന്ന പ്രക്രിയയിലൂടെയല്ലേ ഞാൻ വന്നേ അപ്പോൾ പിന്നെ ഞാൻ എന്താ അറിഞ്ഞാല് ? (ഇന്ത്യൻ ഭരണഘടനാ അത് അനുവദിക്കുന്നുണ്ട്‌)

അച്ചാമ്മയാരുന്നു അടുത്ത ഇര. പാവം വെറ്റില അണ്ണാക്കിലേക്കു വച്ച ടൈംലാണ് എന്റെ ചോദ്യം .."അച്ചമ്മേ... ഈ ഗർഭം എങ്ങിനെയാ ഉണ്ടാകണേ ?" ഭാ .. കഴുവേർട മോനെ .. വച്ചതിലും സ്പീഡിൽ വെറ്റില പുറത്തേക്കു ....

ഇവരുടെയൊക്കെ പ്രതികരണം കണ്ടാൽ തോന്നും ഞാൻ എന്തോ വലിയ അപരാധം ചെയ്തെന്നു ... സ്കൂൾ അടച്ചതിനു അപ്പോഴാണ് സങ്കടം തോന്നിയത് ഇല്ലെങ്കിൽ ടീച്ചറോട് ഈ സംശയം ചോദിച്ചു ക്ലാസ്സിലെ പഠിക്കണ കുട്ടി ആകാമായിരുന്നു എന്നു ചിന്തിച്ചിരിക്കണ സമയത്താണ് പപ്പ വരുന്നത് .. ചോദിച്ചയിടത്തുന്നൊക്കെ കിട്ടിയ പ്രതികരണം തീരെ അനുകൂലമല്ല എന്നുള്ളത് കൊണ്ടു അല്പം ദൂരെ നിന്നാണ് പപ്പയോടു ചോദിച്ചത് ..

പപ്പാ .....ഈ ഗർഭം എങ്ങിനെയാ ഉണ്ടാകണേ ? പപ്പ ഒന്നു ഞെട്ടിയോ ന്നൊരു സംശയം ..എന്തായാലും ഞാൻ ധൈര്യം സംഭരിച്ചു .. പേടിച്ചതൊക്കെ വെറുതെയായി .പപ്പ എന്നെ അടുത്തു വിളിച്ചു ചോദിച്ചു മോനോട് ഇതാരാ പറഞ്ഞേ? എല്ലാരും പറയണല്ലോ അപ്പുറത്തെ രമ ചേച്ചിക്ക് ഗര്ഭമ ..വയറ്റിൽ കുഞ്ഞുവാവ ഉണ്ടെന്നു.. പപ്പ ഒന്നു മൂളി ..മ്മ് ..കുഞ്ഞുവാവ ഉണ്ടാകുമ്പോൾ ഗര്ഭമുണ്ടാകും എന്നൊരു ഒഴുക്കൻ ഉത്തരം തന്നിട്ട് പപ്പ പറഞ്ഞു .മോൻ ഇതൊന്നും ആരോടും ചോദിക്കരുത് ഇച്ചീച്ചി ആണെന്ന്.

അങ്ങിനെ ആകെയുള്ള പ്രതീക്ഷയും പോയി .എങ്കിലും പപ്പയുടെ ഉപദേശം ഞാൻ ശിരസ്സാൽ വഹിച്ചു കൊണ്ടു അന്ന് കിടന്നുറങ്ങി.

അടുത്ത ദിവസം ഊണൊക്കെ കഴിഞ്ഞു അമ്മേടെ കൂടെ ഇരിക്കുമ്പോൾ അതാ വീണ്ടും എന്റെ സംശയത്തിന് തിരികൊളുത്തികൊണ്ട രമ ചേച്ചി ..ഇന്നലത്തെ എന്റെ പെർഫോമൻസ് ഓർത്തിട്ടാകും അപ്പുറത്തു പോയിരുന്നു കളിക്കാൻ അമ്മ പറഞ്ഞത്. അപ്പുറത്തേക്ക് പോയ എന്റെ മനസ്സിൽ സംശയത്തിന്റെ ഒരു വെടിക്കെട്ടു തന്നെ നടക്കുകയാണ്...

..എന്താ ഒരു വഴി ..ഞാൻ ചിന്തിച്ചു കൊണ്ടേ ഇരുന്നു ..അപ്പോഴാണ് കളിക്കൂട്ടുകാരി സുര്യവാവേടെ മുഖം ഓർമ്മ വന്നത് .അവളോടൊന്നു ചോദിച്ചു നോക്കാം .നേരെ അവളുടെ വീട്ടിലേക്കു ഓടി ..കളിക്കാൻ മുറ്റത്തു വിളിച്ചിറക്കി എന്നിട്ടു അല്പം രഹസ്യമായി പറഞ്ഞു "ടി എനിക്കു ഗർഭം വേണം " അവളൊന്നു ഞെട്ടി ഗർഭമോ അതെന്താ ?ടി വടക്കേലെ രമ ചേച്ചിക്ക് ഗര്ഭമുണ്ട് ..എനിക്കും വേണം .. ട പൊട്ട അതു കുഞ്ഞു വാവയല്ലേ വയറ്റിൽ .. അതേടി അതിനു ഗർഭമെന്ന പറയണേ ..ഓഹ്.. പുതിയ ഒരു സംഭവം കിട്ടിയ കൗതുകത്തിലാണ് അവൾ ..

എങ്കിലും അവളിൽ നിന്നും ഞെട്ടിക്കുന്ന ആ സത്യം ഞാൻ മനസ്സിലാക്കി ..ഗർഭം ..പെണ്ണുങ്ങൾക്ക് മാത്രേ ഉണ്ടാകുള്ളൂ...
ഞാൻ ആകെ വല്ലാണ്ടായി എങ്കിലും മനസ്സിൽ കുറയെ ലഡ്ഡു പൊട്ടി ..അല്പം സ്നേഹത്തോടെ സുര്യവാവേ വിളിച്ചു ...ടി വാവേ ..നി പെൺകുട്ട്യല്ലേ അപ്പോൾ സംഭവം നിനക്കു ഉണ്ടകുലോ ?നി ഉണ്ടാക്കി എനിക്കു തന്നാൽ മതി ... അവൾ അന്നത്തെ ഭാഷയിൽ എന്നെ എന്തൊക്കെ വിളിച്ചു എന്നുള്ളത് ഓർമ്മയില്ല ..പക്ഷെ പറ്റില്ല എന്നതായിരുന്നു മറുപടി ..

ഒരുപാട് കെഞ്ചിയെങ്കിലും അവൾ വഴങ്ങിയില്ല .. ..ഇതൊന്നും ആരോടും പറയണ്ട ..വീട്ടിൽ എനിക്കു അത്ര നല്ല പ്രോത്സാഹനം അല്ല കിട്ടിയത്..എന്നൊരു താക്കീതു നൽകി ഞാൻ മടങ്ങി .

ഇനിയിപ്പോൾ എന്താ ഒരു വഴി ഈ ഗർഭം ഒരു ഭയങ്കര സംഭവം തന്നെ ..പെങ്കുട്ട്യോൾക്ക് മാത്രം ഉണ്ടാക്കാൻ പറ്റണ സംഭവം ... പിറ്റേ ദിവസം രാവിലെ തന്നെ വാവ എന്നെ കാണാൻ ഓടി വന്നു അതും വളരെ വിലപ്പെട്ട ഒരു വിവരവുമായി .എന്നോടുള്ള ഇഷ്ടം കൊണ്ടാണോ അതോ ഇതിനെ കുറിച്ചറിയാനുള്ള അവളുടെ ആകാംഷയാണോ ആരിൽ നിന്നോ ചൂണ്ടിയ ഒരു വിവരം "ഗർഭം ഉണ്ടാകണേൽ കല്യാണം കഴിക്കണം" (ആ വിവരം തെറ്റായിരുന്നു എന്നു കാലം തെളിയിച്ചു എന്നത് സത്യം ) അതു കേട്ടതും ഞാൻ ആകെ നിരാശനായി . ..ഈ സംഭവം എങ്ങിനെങ്കിലും അങ്ങിനെ ഉണ്ടാക്കാൻ പറ്റില്ല .കുറച്ചു കഷ്ടപെടണം.... എന്റെ മോഹം ഞാൻ ഉപേക്ഷിച്ചു .

ആ സങ്കടത്തിൽ പോയി കിടന്നുറങ്ങിയ ഞാൻ എഴുന്നേൽക്കുമ്പോൾ നേരം സന്ധ്യ ആയിരുന്നു .എന്റെ അണ്ണൻ കുഞ്ഞമ്മേടെ വീട്ടിലെ സന്ദർശനം കഴിഞ്ഞു തിരിച്ചെത്തിയിട്ടുണ്ട് ...വീണ്ടും നാളുകൾ കഴിഞ്ഞു പോയി .

രമ ചേച്ചി പ്രസവിച്ചു കുഞ്ഞിനേംകൊണ്ടു തിരികെ പോയി .ഞാനും സുര്യവാവയും സ്കൂളിലേക്കും... സ്കൂളിൽ കളിച്ചും ചിരിച്ചും ദിവസങ്ങൾ പോയി ..അങ്ങിനെ ഇരിക്കുമ്പോഴാണ് സുര്യവാവേടെ വല്യ ചേച്ചിടെ കല്യാണം . ബന്ധുക്കളും , അയലോക്കരും ഒരു മേളമായിരുന്നു ..

താലികെട്ട് കണ്ടിരിക്കണ സമയത്താണ് എനിക്കു ആ പഴയ സംശയം വീണ്ടും പൊട്ടിയത്.അപ്പോൾ ഇനി വല്യേച്ചിയും ഗര്ഭിണിയാകും .. എന്റെ ഗർഭം അതെങ്ങുമെത്തിയില്ല ? അങ്ങിനെ വിട്ടാൽ പറ്റില്ലാലോ ...തിരക്കിനിടയിലും സുര്യവാവേ കണ്ടു പിടിച്ചു ..

ടി വാവേ... ഇന്ന് നമ്മുടേം കല്യാണം വാ എന്നു പറഞ്ഞു കൂട്ടി കൊണ്ടുപോയി അവിടെ കിടന്ന ഏതോ 2 മുല്ലപ്പൂമാല എടുത്തു അങ്ങോട്ടുമിങ്ങോട്ടും ഇട്ടു ..കണ്ടു നിന്നവർ ചിരിച്ചു ആ നാണത്തിൽ അവൾ ഓടിപോയി ...എന്നാലും സാരമില്ല കല്യാണം കഴിഞ്ഞല്ലോ ഇനി എന്റെ ഗർഭം ... ഞാൻ സന്തോഷം കൊണ്ടു തുള്ളിച്ചാടി ..

രഹസ്യങ്ങൾ ചൂണ്ടാൻ പെണ്ണുങ്ങളോളം കഴിവ് ആർക്കുമില്ലലോ ..എന്റെ ഹൃദയം തകർക്കുന്ന ഒരു രഹസ്യ വിവരമാണ് അടുത്തതായി അവൾ തന്നത് ..കല്യാണം കഴിഞ്ഞെങ്കിലും ഗർഭം ഉണ്ടാകണേൽ 10 മാസം എടുക്കുമത്രേ ... ദൈവമേ വീണ്ടും പരീക്ഷണമോ ? എന്തായാലും സഹിക്കുക തന്നെ കാത്തിരിക്കാം .. ആ സമയങ്ങളിൽ വാവേടെ വയറ്റിൽ ചെവി വച്ചു നോക്കണത് എന്റെ ഒരു ശീലമായിരുന്നു സാക്ഷാൽ ലാലേട്ടൻ വന്ദനം എന്ന സിനിമയിലൂടെ കൈമാറിയ വളരെ വിലപ്പെട്ട ഇൻഫർമേഷൻ ...ഞാൻ കാത്തിരുന്നു ..

ഒരു ദിവസം വീണ്ടും വാവ ഓടിപിടഞ്ഞു വന്നു എന്താടി എന്തുപറ്റി ..?
ഡാ .. വല്യേച്ചി ..വല്യേച്ചിക്ക് ഗർഭം ഉണ്ടെന്നു ...

"ഹേ ..നി എന്തടി ഈ പറയുന്നേ അതിനു 10 മാസം ആയില്ലലോ" ഞാൻ സങ്കടത്തോടെ ചോയിച്ചു ..
ഡാ ..ഡോട്ടർ മാമൻ പറഞ്ഞെന്നു വല്യേച്ചി ഗർഭിണിയാണെന്ന് .. പിന്നെ ചേച്ചി തലകറങ്ങി വീണു ..
നിനക്കു തലകറങ്ങുന്നില്ലേ ?
ഇല്ല ..

ഒന്നുടെ സൂക്ഷിച്ചു നോക്കിക്കേ ..
ഇല്ലടാ .. തലകറങ്ങിയാൽ ഞാൻ വീഴുമായിരുന്നില്ലേ ..?
എന്തായാലും ഡോട്ടർ മാമന്റെ അടുത്തു കൊണ്ടുപോയി നോക്കാൻ പറ്റില്ല ..

സാരമില്ല ഒരു വഴി ഒപ്പിക്കാം.. നി തല കറങ്ങുന്നുണ്ടോന്നു ശ്രദ്ദിച്ചോണം ...

(തുടരും)

ഗർഭം - 2

അങ്ങിനെ പുളിമുക്കിൽ അമ്പലത്തിലെ വഞ്ചിപെട്ടി 25, 50 പൈസകൾ കൊണ്ടു നിറയാൻ തുടങ്ങി "എങ്ങിനെങ്കിലും സുര്യവാവക്ക് തലകറങ്ങണെ ദേവീ"..ദിവസങ്ങൾ കഴിഞ്ഞിട്ടും ദേവീ കേൾക്കണില്ല..ഞാൻ ആകെ വിഷമിച്ചു ..വീട്ടിലാണെങ്കിൽ ചോദിക്കാനും പറ്റില്ല...എന്തു ചെയ്യും . ഒരു ദിവസം സ്കൂളിൽ ഇരിക്കുമ്പോൾ മ്മടെ സങ്കടം കണ്ടിട്ടായിരിക്കും മഹേഷ് ചോദിച്ചു " ഡാ മാക്രി എന്താടാ നി കളിക്കാൻ വരാത്തെ?"

ഒന്നുല്ലടാ ..നി പോയി കളിക്ക് ..

ഹേയ് ..പറയടാ ..നിന്നെ കളിപ്പിക്കത്തില്ലെന്നു പറഞ്ഞോ ആരെങ്കിലും..?

ഇല്ലടാ ഒന്നുല .നി പൊക്കോ ..

ഇയാള് വലിയ ആളാണേൽ പോയി പണി നോക്കടാ ..നിക്കറെ മുള്ളി..

( ആ സമയായി പോയി ഇല്ലേൽ ഇടിച്ചു അവനെ നിക്കറെ മുള്ളിച്ചേനെ ഞാൻ ..2 ആഴ്ച മുൻപ് ഒരു അബദ്ധം പറ്റിയെന്നു കരുതി അന്ന് മുതൽ തുടങ്ങീതാ ഈ വിളി )

പക്ഷെ എന്റെ മനസ്സിൽ ആരോ ടോർച് അടിച്ചു ..അവന്റെ അമ്മ അനിയത്തികുട്ട്യേ പ്രസവിച്ചതിനു കഴിഞ്ഞാഴ്ച അവൻ മുട്ടായി തന്നിരുന്നു .

... ദൈവമേ വന്നു കയറിയ വയറ്റാട്ടിയെ ഞാൻ പിറങ്കാല് കൊണ്ടു തട്ടിയല്ലോ ..എന്തായാലും അവന്റെ അടുത്തേക്ക് ഓടി...

... അവന്റെ സ്ഥായി ഭാവം ..എങ്കിലും ഞാൻ വിളിച്ചു "ഡാ മാഷേ" ആദ്യം അവൻ കേട്ട ഭാവം നടിച്ചില്ല ..ഞാൻ തളർന്നതുമില്ല ..സർവ്വ ശക്തിയോടെ വിളിച്ചു.. ഡാ മാഷേ ..

എന്താടാ നിക്കറെ മുള്ളി .. അവന്റെ കൂടെ കളിച്ചോണ്ടു നിന്ന പെങ്കുട്ട്യോളൊക്കെ ചിരിച്ചു .. എന്നാലും സാരമില്ല അവൻ വന്നു .

"ഡാ നിന്നോടൊരു കാര്യം ചോയിക്കണം .."

"ചോദിക്കു .."

"ഡാ ...പക്ഷെ നി ആരോടും പറയരുത് .."

"അപ്പോൾ എത്ര പുളിമുട്ടായി..?"

"ഓഹോ ..ബിസിനെസ്സ് .. 2 എണ്ണം .."

"പോരാ ..5 എണ്ണം വേണം .."

"ഡാ ... പൈസ ഇല്ല ..തത്കാലം 2 എണ്ണം തരാം.."
(അല്പം മനുഷ്യപ്പറ്റു ഉള്ളവനാ ..സമ്മതിച്ചു ..)

ശരി ചോദിക്കു ..

"ഡാ നിന്റെ അമ്മ കഴിഞ്ഞാഴ്ച പ്രസവിച്ചില്ലേ .."

"ഉം ..പ്രസവിച്ചു .. അതിന്റെ മുട്ടായി നി കേറ്റിയതല്ലേ..?"

"അതേ.. ഡാ ..അപ്പോൾ പ്രസവിക്കുന്നതിനു മുൻപ് നിന്റെ അമ്മക്കു ഗർഭം ഉണ്ടാരുന്നല്ലോ ?"

"ഉം..ഉണ്ടാരുന്നു .."

അതെങ്ങിനെ ഉണ്ടായേ..?

അന്നത്തെ ആ നിഷ്കളങ്കതയോടെ അവൻ ആലോചിച്ചു ...."ഡാ ..അതു അച്ഛൻ അമ്മയെ കല്യാണം കഴിച്ചപ്പോൾ ..."

"അതേ കല്യാണം കഴിച്ചാലെ ഗർഭം ഉണ്ടാകുള്ളൂ ..പക്ഷെ അവര് അതെങ്ങനെയാ ഉണ്ടാക്കിയെ ..?"

"അതിപ്പോ അവരോടു തന്നെ ചോദിക്കണം ..ഒരു കാര്യം ചെയ്യാം ..ഞാൻ ചോയിച്ചിട്ടു നാളെ പറയാം.."

"അയ്യോ ..നി വീട്ടിൽ ചോയിക്കണ്ട അതു ശരിയാകില്ല ..(എന്റെ വീട്ടിലെ അനുഭവം..)വേറെ എന്തെങ്കിലും വഴിയുണ്ടോ ..?"

"ശരി ..ഞാനൊന്നു ..നോക്കട്ടെ..നാളെയെ പറയാൻ പറ്റു.."

"മതി നാളെ പറഞ്ഞാൽ മതി.."

ഹാ..മനസ്സിലൊരു കുളിരുമായി അന്നത്തെ ദിവസം ഞാൻ വീട്ടിലേക്കു പോയി ..ഈ സംഭവം എങ്ങിനെയാ ഉണ്ടാക്കാ എന്നു കണ്ടുപിടിച്ചിട്ട് വാവേ കാണുള്ളൂ എന്നൊരു വാശിയും..എങ്കിലും രാത്രി ഉറങ്ങാൻ കിടന്നപ്പോൾ ഒരു പേടിയും ..പരിഭ്രമവും ...ഈശ്വര ..ഇനി അവനെങ്ങാനം വീട്ടിൽ പോയി ചോദിച്ചു ..കുളമാക്കുവോ ..ഉറക്കവും വരുന്നില്ല ..

പപ്പേടേം അമ്മേടേം കൂടാണ് കിടക്കുന്നതു ...എന്തിനാണോ എന്തോ. ഞാൻ ഉറങ്ങിയോ എന്നു പപ്പ ഇടക്കിടക്ക് നോക്കുന്നുണ്ടാരുന്നു .. അന്നത്തെ എന്റെ ചിന്തയിൽ അതു പപ്പക്ക് എന്നോടുള്ള അതിരില്ലാത്ത സ്നേഹമായിരുന്നു ...(കാലം പക്ഷെ എന്റെ പല ചിന്തകളും തെറ്റായിരുന്നു ന്നു തെളിയിച്ചോണ്ടേയിരുന്നു ).

എന്തായാലും അടുത്ത ദിവസം രാവിലെ എഴുന്നേറ്റു സ്കൂളിൽ പോകാനുള്ള എന്റെ ആവേശം കണ്ടു പാവം അമ്മ സന്തോഷിച്ചു..അമ്മേടെ മോന് പഠിക്കണമെന്നുള്ള ചിന്ത വന്നെന്നു അമ്മ കരുതി..അമ്മക്ക് അറിയില്ലല്ലോ അമ്മയെ അമ്മൂമ്മ ആക്കാൻ മോന്‍ പെടുന്ന പാടുകൾ..

സ്കൂളിൽ എത്തിയ ഞാൻ പേടിച്ചാണ് പടികൾ കയറിയത് ..എങ്ങാണം മഹേഷിന്റെ അച്ഛൻ വന്നാലോ .. ക്ലാസ്സിൽ എത്തിയപ്പോൾ അല്പം ആശ്വാസം..പതിവുപോലെ ഏതോ ഒരുത്തന്റെ മണ്ടക്ക് കേറിക്കൊണ്ടിരുപ്പുണ്ട് അവൻ .. ഞാൻ അവന്റെ അടുത്തേക്ക് ചെന്നു ..

ആ നിമിഷം അവനെയൊരു അധോലോകനയകനെപ്പോലെ എനിക്ക് കാണപ്പെട്ടു .

" പെടുക്കാനുള്ള ബെല്ലടിക്കട്ടെ .. അപ്പോള്‍ പറയാം..നി ഇപ്പോൾ പോയി അവിടിരിക്ക്‌"

..അനുസരണയുള്ള കുട്ടിയായി ഞാൻ പോയി എന്റെ സീറ്റിൽ ഇരുന്നു ..സമയം പോകുന്നത് അറിയാനൊരു വഴിയുമില്ല .. ക്ലാസ്സിലേക്ക് വന്ന ടീച്ചറിനോട് ചോദിക്കാന്ന് വച്ചാൽ ശരിയാകില്ല ..പിന്നെ അതിന്റെ മേലെ ചോദ്യങ്ങളാകും ..അതു വേണ്ട .. അല്പംകൂടെ ക്ഷമിക്കാം ..

ഇടക്കിടക്ക് ഞാൻ മഹേഷിനെ നോക്കി ..അവനൊരു ഭാവ വ്യത്യാസവുമില്ല ..ഇനി ചോദിച്ചില്ലേ? ഏയ് അവനാണ് ക്ലാസ്സിലെ ധൈര്യശാലി അപ്പോൾ കാര്യം നടത്താണ്ടിരിക്കില്ല . ഇരുന്നിരുന്നു ഒരു വിധത്തിൽ ബെല്ലടിച്ചു .. ഞാൻ ചാടി അവന്റടുത്തെത്തി .."ഡാ മാഷേ പറയ് ..നി ചോയിച്ചോ..?"

"ഒന്നു പെടുക്കട്ടെടോ .."

"ഓഹ്.. അവൻ ഡിമാൻഡ് കൂട്ടാനുള്ള ശ്രമത്തിലാണ് ..എനിക്കു പെടുപ്പിലും ഇല്ലലോ ..തമ്പുരാനെ .."

"ഉം ..ബാ ..സംഭവം ..അല്പം പണിയുണ്ട് .."

"എന്താടാ ..നി ചോയിച്ചില്ലേ?"

"അതൊക്കെ ചോയിച്ചു ..നി പറഞ്ഞ സാധനമെടുക്കു .."

"പോക്കറ്റിൽ നിന്നു 2 പുളിമുട്ടായി എടുത്തു അവനു കൊടുത്തു .."

(പണ്ടെപ്പഴോ അണ്ണൻ വാങ്ങി തന്നത് പിണങ്ങി കഴിക്കാതെ അലമാരയിൽ ഇട്ടിരുന്നതാ..അതിനു ഇന്ന് ശാപമോക്ഷം ..)

എന്തായാലും അവൻ ഹാപ്പി ആയി..പക്ഷെ എന്റെ ചങ്കിടിപ്പ് കൂട്ടികൊണ്ടു അതാ അവന്റെ ചോദ്യം.."നിനക്കു ഇതു അറിഞ്ഞിട്ടെന്തിനാ ..?"

ഇവനോട് പറയാൻ പറ്റില്ല പറഞ്ഞാൽ സുര്യവാവ എന്റെ ഗർഭം വേണ്ടെന്നു വക്കും..ആരും അറിയില്ല എന്ന ഒരു ഒറ്റ ഉറപ്പില അവൾ സമ്മതിച്ചത്. "ഡാ മാഷേ ഒന്നുല്ലടാ വെറുതെ അറിഞ്ഞിരിക്കാൻ .."

"അല്ല..ഇതു അങ്ങിനെ കുട്ടികൾ അറിഞ്ഞിരിക്കേണ്ട കാര്യമല്ല ..പിന്നെ ഇതു ചോദിച്ചത് നി ആയതുകൊണ്ടും ..പറയ് നിനക്കെന്തിനാ ഇതു?"

പട്ടണപ്രവേശത്തിലെ ലാലേട്ടനെപോലെ അവൻ എന്നെ ചോദ്യം ചെയ്തു..

രക്ഷയില്ല അവനോടു പറഞ്ഞേ പറ്റു .."ഡാ ..ഞാൻ പറയാം പക്ഷെ നി ഇതും ആരോടും പറയരുത് ..ഞാനും നീയും മാത്രമേ അറിയാവൂ ..."

"ഓഹോ ... അതിനെത്ര പുളിമുട്ടായി കിട്ടും.."

"പൊന്നു മാഷേ നി എന്നെ കൊല്ലരുത് അതിനു പുളിമുട്ടായി ഇല്ല .."

മനുഷ്യപ്പറ്റുള്ളവൻ അധികം നിര്ബന്ധിക്കാതെ സമ്മതിച്ചു..

"ഡാ ..മാഷേ ..പിന്നെയെ ..ഡാ... ഞാനേ..പിന്നെ .."

"കാര്യം പറയടാ പൊട്ടാ.."

ഒറ്റ ശ്വാസത്തിൽ ഞാൻ അവനോടു കാര്യങ്ങൾ എല്ലാം പറഞ്ഞു ..
അവൻ എന്നെ നോക്കി അങ്ങിനെ നിന്നു..

"നി ആള് കൊള്ളാം ..എന്നിട്ടാണല്ലേ ഒന്നും അറിയാത്ത പോലെ ആ സൂര്യ അവിടിരിക്കണേ ?അവളോട്‌ ഇന്ന് ചോയിച്ചിട്ടു തന്നെ കാര്യം .."

"മാഷേ ..നി ചതിക്കല്ല്..നി പറയുലെന്നു സത്യമിട്ടതാ.."

"അതു കള്ള സത്യം ആരുന്നു നി സൂക്ഷിച്ചു കേട്ടില്ല ..അസത്യം ..എന്ന ഞാൻ പറഞ്ഞേ ..."

"ചതിയ .. ഞാൻ എത്ര പുളിമുട്ടായി വേണേലും വാങ്ങിച്ചു തരാം നി അവളോട്‌ ചോദിക്കല്ല്..."

"എനിക്കു പുളിമുട്ടായി ഒന്നും വേണ്ട .."

മനുഷ്യപ്പറ്റുള്ളവനാ "പിന്നെന്താ വേണ്ടത്.."

"അതേ ..വേറൊരു കാര്യം മതി.."

"എന്താ ..പറഞ്ഞു തൊലക്കു.."

"നിന്റെ ഗർഭം ഉണ്ടാക്കുമ്പോൾ..എന്റെംകുടെ ഉണ്ടാക്കുവോ ?"

"ഭ ..വൃത്തികെട്ടവൻ ഇവിടെ ഒരു ഗർഭം ഉണ്ടാക്കാൻ പെടുന്ന പാട് ബാക്കിയുള്ളോന് അറിയാം അപ്പഴാ അവന്റെ ഗർഭം ..."

"എന്നാൽ ഞാൻ പോയി ചോദിക്കട്ടെ സുര്യോട് ?
അയ്യൂ വേണ്ട .."

അപ്പോഴേക്കും ക്ലാസ്സിൽ കയറാനുള്ള ബെല്ലടിച്ചു..
"സാരമില്ല ..നി ആലോചിക്കൂ ..അടുത്ത പെടുക്കാൻ മണി അടിക്കുമ്പോൾ പറഞ്ഞാൽ മതി .."

ക്ലാസ്സിലിരിക്കുന്ന ഓരോ സമയവും എനിക്കു പേടിയും ചിന്തയും കൂടിക്കൊണ്ടേയിരുന്നു .. ..

സമ്മതിച്ചാൽ ചിലപ്പോൾ എന്റെ ഗർഭം പൊളിയും.. .സമ്മതിച്ചില്ലേൽ അതു മുന്നോട്ടു പോകില്ല ..എന്തായാലും ഞാൻ ചിന്തിച്ചു ..അവസാനം സമ്മതിക്കാമെന്നു കരുതി ..കാരണം സുര്യവാവ ഗർഭിണി ആയി പ്രസവിച്ചു വരുമ്പോഴേക്കും നാള് കുറയെ കഴിയും .. അപ്പോഴേക്കും ആ മണ്ടൻ ഇതു മറക്കും .അതായിരുന്നു എന്റെ ചിന്ത .ബെല്ലടിച്ചു ... അവൻ വീണ്ടും പെടുക്കാനോടി ..ഇതിനും വേണ്ടി എവിടിരിക്കുന്നു ?

"എന്തായി സമ്മതിച്ചോ ?"

"ഓഹ് സമ്മതിച്ചു പക്ഷെ എന്റെ ഗർഭം കഴിഞ്ഞിട്ടേ നിന്റെ ഗർഭം പറ്റുള്ളൂ .."

അവൻ ഒന്നു ആലോചിച്ചു .."ശരി അതുമതി.."

"അപ്പോൾ വാക്കാണല്ലോ നി ഇതൊന്നും ആരോടും പറയില്ലലോ .."

"ഇല്ലടാ ..നീയും വാക്കു മാറേണ്ട .."

"ശരി ..ഇനി നി കാര്യം പറയ് .. എങ്ങിനെ ഗർഭം ഉണ്ടാക്കുന്നെ?"

"ഡാ മണ്ട..നി കല്യാണം കഴിഞ്ഞിട്ടു ഇതുവരെ അവളുടെ കൂടെ കിടന്നോ?"

"ഇല്ല .."

"ആഹ്ഹ ..കല്യാണം കഴിഞ്ഞു ..കുറയെ നാൾ നിങ്ങളൊരുമിച്ചു കിടക്കണം എന്നാലേ ഗർഭം ഉണ്ടാകു.."

"ശ്ശെ...ചുമ്മാതല്ല ...ഞാൻ എന്തൊരു മണ്ടനാ .. അല്ല മാഷേ നി ആരോടാ ഇതു ചോയിച്ചേ ?"

"അതൊന്നും പറയില്ല നിനക്കു കാര്യം മനസ്സിലായല്ലോ പോയി എത്രയും പെട്ടെന്ന് ഗർഭം ഉണ്ടാക്കാൻ നോക്കു ..എന്നിട്ടു വേണം എനിക്കു .."

സന്തോഷത്തോടെ തുള്ളിച്ചാടി അന്നത്തെ ദിവസം ഞാൻ വീട്ടിലെത്തി..നേരെ സുര്യവാവേടെ വീട്ടിലെത്തി .."ഡി ബാ ..ഇങ്ങോട്ടു ബാ .."

"എന്താടാ ?"

"ഡി ..കല്യാണം കഴിഞ്ഞോണ്ടു മാത്രം ഗർഭം ഉണ്ടാകുല ... നമ്മള് ഒരുമിച്ചു കിടക്കണം ..എന്നാലേ സംഭവം ഉണ്ടാകുള്ളൂ .."

അവളുടെ മുഖത്തൊരു നാണം ..പോ ചെക്കാ ..എന്നു പറഞ്ഞുഎനിക്കിട്ടൊരു അടിയും..

"ഡാ ..പക്ഷെ അതിനു വീട്ടുകാര് സമ്മതിക്കുവോ ?"

"നി നിന്റെ അമ്മയോട് ചോദിക്കു കുറച്ചു ദിവസം എന്റെ വീട്ടിൽ വന്നു നിക്കട്ടെയെന്നു .."

"മ്മ് ചോദിക്കാം ..സമ്മതിച്ചില്ലേലോ?"

"അതപ്പോഴല്ലേ നി ചോദിക്കു .."

അവൾ ഓടി അമ്മയുടെ അടുത്തു പോയി ..പോയ ഉത്സാഹം വന്നപ്പോൾ കണ്ടില്ല അതിൽനിന്നും എനിക്കു കാര്യം പിടികിട്ടി ..എന്റെ വീട്ടിൽ ഒട്ടും സമ്മതിക്കില്ല ..

"സാരമില്ല വഴിയുണ്ട് ..നി വാ .."

അവളേം വിളിച്ചോണ്ട് നേരെ പോയത് അയ്യത്തേക്കാണ് (വീടിന്റെ പിറകിൽ ) അവിടെ കളിക്കാൻ വേണ്ടി തട്ടി കൂടിയ കളിവീട്ടിൽ പഴയ തുണികൾ വിരിച്ചു ഞാനൊരു ശയ്യ തീർത്തു ..അവളെ അതിലേക്കു ആനയിച്ചു..

"കിടക്കടി ..ഇതാണ് വഴി..ഇതേയുള്ളു വഴി..നിനക്കു ഗർഭം ഉണ്ടാകുന്ന വരെ ...കളിയും പഠിത്തവും നമ്മൾ ഉപേക്ഷിക്കുന്നു .. "

ഞങ്ങടെ ആദ്യരാത്രി അല്ല ആദ്യ സന്ധ്യ ..
അവളെ പിടിച്ചു അടുത്തു കിടത്തി ഒരു മേമ്പൊടിക്ക് കെട്ടിയും പിടിച്ചു ...മാഷിന്റെ നിർദ്ദേശത്തിൽ അതു ഇല്ലെങ്കിലും ..ഇനി ഇപ്പോൾ അതിന്റെ ഒരു കുറവ് വേണ്ട ..അങ്ങിനെ കെട്ടി പിടിച്ചു കിടന്നു അറിയാതെ ഉറങ്ങിപ്പോയി..ഞങ്ങളെ കാണാതെ വാവേടെ അമ്മ തിരക്കി വന്നു ..ഞങ്ങള് ഭാര്യേം ഭർത്താവും ആത്മാർത്ഥമായി കെട്ടി പിടിച്ചുറങ്ങുന്നതു കണ്ടു അമ്മ വിളിച്ചുണർത്തി

" ഇങ്ങട്ടു ബാ പിള്ളേരെ നിനക്കൊന്നും പഠിക്കണ്ടേ?"

""ശ്ശെ കളഞ്ഞു..ഒരു ഗര്ഭമുണ്ടാക്കാൻ ഇവര് സമ്മതിക്കില്ല...സാരമില്ല ഇന്ന് ഇത്രയും മതി..ബാക്കി നാളെ..നി പൊക്കോ ""എന്നു അവളെ ആശ്വസിപ്പിച്ചു പറഞ്ഞു വിട്ടു..

തുടരും ...

ഗർഭം 3

എന്തോ എങ്ങിനെയോ ..രണ്ടാഴ്ച കഴിഞ്ഞപ്പോൾ ഞാനൊരു വാർത്തയറിഞ്ഞു, സുര്യവാവക്ക് വയറു വേദന ...ദൈവമേ കെട്ടിപിടി ഏറ്റെന്നു തോന്നണു ..അന്നവൾ സ്കൂളിൽ വന്നില്ല .2 ദിവസം മുൻപ് ഒരു വയറു വേദന വന്നതുകൊണ്ട് ഇനി എന്റെ വയറു വേദന വീട്ടിലെടുക്കൂല അതോണ്ട് മനസ്സില്ലാ മനസ്സോടെ ഞാൻ സ്കൂളിലും പോയി .

എങ്ങിനെങ്കിലും വീട്ടിലെത്താൻ വെമ്പലായി..ഒഒരുവിധം നേരം കഴിച്ചു വൈകുന്നേരമായപ്പോൾ വീട്ടിലെത്തി.നേരെ എന്റെ പ്രിയതമയെ കാണാൻ ഓടി .അവൾ കിടക്കുകയാണ്.കിടക്കട്ടെ പാവം ക്ഷീണം കാണും .""ടി വാവേ എന്തായി ഗർഭം ഉണ്ടായോ?""

ഒരു കള്ള ചിരിയോടെ അവൾ മൂളി
" ഉം.."

"ആഹാ നി ഡോട്ടർ മാമനോട് ചോയിച്ചോ? ""

""ഉം ചോയിച്ചു .. മാമൻ പറഞ്ഞു കുഞ്ഞുവാവയുണ്ടെന്നു ...""

ഈശ്വര നിന്നോട് ഞാൻ എങ്ങിനെ നന്ദി പറയും ..എന്റെദേവി ഇന്ന് 50 പൈസ അല്ല 1 രൂപ ഞാൻ വഞ്ചിയിലിട്ടേക്കാമെ ..തെല്ലു അഭിമാനത്തോടെ ഞാൻ ഒന്നു നിവർന്നിരുന്നു ..സംഭവം ഒളിച്ചും..പാത്തും ആണെങ്കിലും എനിക്കിപ്പോൾ സ്വന്തമായി ഒരു ഗര്ഭമുണ്ട് .. ന്നേക്കാൾ 5 വയസ്സു മൂത്ത എന്റെ അണ്ണന് ഇതുവരെ സാധിച്ചിട്ടില്ല....

സ്വന്തമായി ഗർഭം ഉണ്ടാക്കിയ അഭിമാനത്തിലാണ് ഞാൻ.""ഡി വാവേ അമ്മയൊക്കെ അറിഞ്ഞോ ?""

""പിന്നിലാണ്ടു ... എല്ലാരുടേം മുമ്പിൽ വച്ചാ ഡോട്ടർ മാമൻ പറഞ്ഞത് അവര് എന്നെ ഒരുപാട് കളിയാക്കി""

"ശ്ശെ..നി പറഞ്ഞോ ഇതു എന്റെ ഗർഭം ആണെന്ന് ?""

""ഇല്ല ..പക്ഷെ അവർക്കൊക്കെ അറിയാം ..നി എന്നെ കെട്ടിപിടിച്ചു കിടക്കണത് അമ്മ കണ്ടതല്ലേ ".
"അയ്യോ ..ശരിയാ ..ഇനി ഇപ്പൊ എന്താ ചെയ്യാ?"

''ഓഹോ ..ഓരോന്നു കാണിച്ചു വച്ചിട്ടു എന്നോട് ചോദിക്കുന്നോ..?''

പെട്ടെന്നാണ് വാവേടെ അമ്മേടെ കടന്നുവരവ്..''''രണ്ടെണ്ണം കൂടി എന്താ പരിപാടി ?''എന്തോ വാവക്ക് കഴിക്കാൻ കൊണ്ടു വന്നതാണ് അമ്മ.. നോക്കി വെള്ളമിറക്കുന്നതു കണ്ടിട്ടു എന്നോട് പറഞ്ഞു... ''നി നോക്കണ്ട ഇതു നിനക്കു തരില്ല ..''
..''വേണ്ട .. വാവ തിന്നട്ടു..''ഞാൻ മനസ്സിൽ ഓർത്തു ''തിന്നട്ടു .. തിന്നട്ടു എന്നിട്ടു വയറൊക്കെ നന്നായി വീർത്തു വരട്ടെ...''

അമ്മയോടും വാവയോടും പറഞ്ഞിട്ടു ഞാൻ തിരികെ എന്റെ വീട്ടിലേക്കു പോരുന്നു..

അല്പം പേടിയോടെയാണ് വീട്ടിലെത്തിയത് ..വാവക്ക് ഗർഭം ഉണ്ടായ കാര്യം വീട്ടിൽ അറിഞ്ഞിട്ടുണ്ടോ എന്ന പേടി. ഞാൻ പെതുക്കെ അടുക്കളയിലേക്കു പോയി ..ഒന്നും നടന്നിട്ടില്ല എന്ന മട്ടിൽ അമ്മയോട് കഴിക്കാൻ ചോദിച്ചു ..പ്രത്യേകിച്ചു അമ്മ ഒന്നും പറയുന്നില്ല..ഞാൻ ആഹാരം കഴിച്ചു ..പഠിക്കാൻ പോയി.കുറച്ചു കഴിഞ്ഞാണ് പപ്പ വന്നത് പതിവുപോലെ പോയി കുളിച്ചിട്ടു വന്ന പപ്പ കഴിക്കാനിരുന്നു രണ്ടുപേരും കാര്യമായി എന്തോ സംസാരിക്കുന്നതു ഞാൻ കേട്ടു. പക്ഷെ വ്യക്തമല്ല ...

എന്താണ് അവർ സംസാരിക്കുന്നതെന്ന് അറിയാൻ ..ഞാൻ വീണ്ടും അടുക്കളയിലേക്കു പോയി ...അതു കണ്ട അമ്മ ചോദിച്ചു :"'നി ഇപ്പഴല്ലേടാ കഴിച്ചിട്ടു പോയേ..?''

''വെള്ളം കുടിക്കാൻ മറന്നു അമ്മച്ചി ..''

''ഉവ്വ ...പഠിക്കാൻ പറയുമ്പോൾ നിന്റെ ചേട്ടന് സ്ഥിരം ഉള്ള പരിപാടിയ..ഇനി അനിയനും തുടങ്ങിക്കോ..''

പക്ഷെ ഞാൻ നിക്കുന്നതുകൊണ്ടാണോ എന്തോ അവർ സംസാരം നിർത്തിയിരുന്നു.അല്പം വെള്ളമെടുത്തു കുടിക്കുന്നതായി കാണിച്ചു ഞാൻ രംഗം വിട്ടു.അപ്പോൾ അവർ വീണ്ടും സംസാരം തുടങ്ങി..ഞാൻ ഒന്നു ഒളിഞ്ഞു കേൾക്കാൻ നോക്കി..അതേ അവർ സുര്യവാവേടെ കാര്യം തന്നെയാണ് പറയുന്നത് ..എന്റെ ചങ്കു അല്പം വേഗത്തിൽ മിടിക്കാൻ തുടങ്ങി...

അമ്മയുടെ സംസാരം ഞാൻ കേട്ടു..

''''പക്ഷെ കൊച്ചിന്റെ വയറൊന്നും വീർത്തിട്ടില്ല..''''

പപ്പ മറുപടിയും കൊടുക്കുന്നുണ്ട് ''അതു പെതുക്കെ വീർത്തു തുടങ്ങും ..''

''ഇപ്പോൾ എന്താ ചെയ്ക .. ''

''അടുത്താഴ്ച വീണ്ടും ഡോക്ടറിനെ കാണിക്കണം..ക്യാഷ് ഒരുപാട് ചിലവാകും ...''

പിന്നെ മകന്റെ ഗര്ഭത്തിന് കാശു ചിലവാക്കേണ്ടത് അച്ഛനമ്മമാരുടെ കടമയല്ലേ എന്നു ഞാൻ പിറുപിറുത്തു ..അപ്പോഴേക്കും പപ്പ കഴിച്ചു കഴിഞ്ഞു ..കൂടുതലൊന്നും അറിയാൻ പറ്റിയില്ല.എന്തായാലും ഭാഗ്യം ഗർഭം എന്റേതാണെന്നു അവർ അറിഞ്ഞിട്ടില്ല..

ദിവസങ്ങൾ വീണ്ടും കടന്നുപോയി .. ഒരു ശനിയാഴ്ച ദിവസം അന്നാണ് സുര്യവാവേ ആശുപത്രിയിൽ കൊണ്ടുപോകേണ്ടത് .ചോദിച്ചൊക്കെ നോക്കിയെങ്കിലും അവർ എന്നെ കൂട്ടിയില്ല.അവൾ തിരിച്ചു വരുന്നതും കാത്തു ഞാൻ ഇരുന്നു .ഒരു ഉച്ച കഴിഞ്ഞിട്ടുണ്ടാകും അവർ തിരികെ വന്നപ്പോൾ .അവർ എത്തിയെന്നറിഞ്ഞപ്പഴേ ഞാൻ ഓടി അവളുടെ അടുത്തെത്തി .

''ഡി വാവേ എന്തു പറഞ്ഞടി ഡോട്ടർ മാമൻ..?''

''നി പോടാ കുരുത്തംകെട്ടവനെ നിന്റെയൊരു ഗർഭം കാരണം എനിക്കു ഇപ്പോൾ കളിക്കാൻ പറ്റില്ല , ഐസ്‌ ക്രീമ് തിന്നാൻ പറ്റില്ല ..''

''അതിനു ഗര്ഭവും ഐസ്‌ക്രീമും തമ്മിൽ എന്തു പ്രശനം ?''

''ആ ഡോട്ടർ മാമൻ പറഞ്ഞു കഴിക്കരുതെന്ന് ..''

''മ്മ്..എന്നാൽ കഴിക്കണ്ട വാവേ .. നമ്മുടെ ഗര്ഭത്തിന് വേണ്ടിയല്ലേ ..''

അപ്പോഴാണ് വാവേടെ അമ്മ അങ്ങിട്ടു വന്നത് ..
''ഡാ ..കൊച്ചുമോനെ ..ഇവളെ ഇനി കളിക്കാനൊന്നും വിടൂല കേട്ടോ.സ്കൂളിൽ പോയാലും ഇവള് കളിക്കാണ്ട് നി നോക്കിക്കോണം''..

''തീർച്ചയായും ..''(അതൊരു ഭർത്താവിന്റെ കടമയല്ലേ..)

''എന്നാൽ നി പൊക്കോ ..അവള് കിടന്നോട്ടെ ..''

''ഒരു കാര്യം പറഞ്ഞിട്ടു ഇപ്പം പൊക്കോളാം..''

''ഡി ..വാവേ നിന്റെ വയറെന്താ വീർക്കാത്തെ ...?

അവൾക്കു എവിടുന്നു കിട്ടിയ അറിവാണെന്നു അറിയില്ല പക്ഷെ അവൾ പറഞ്ഞു ''ഡാ മണ്ട അതു പെതുക്കയേ വീർക്കുള്ളു ..''

''ഉം..മതി പെതുക്കെ വീർത്താൽ മതി..നമ്മള് ഒന്നുടെ കെട്ടിപിടിച്ചു കിടന്നാൽ വീർക്കുവോ ..?''

''പോടാ എഴുന്നേറ്റു ..എന്നു പറഞ്ഞു അവൾ തിരിഞ്ഞു കിടന്നു ..''

ഞാനും എഴുന്നേറ്റു പോരുന്നു .

ദിവസങ്ങൾ പിന്നെയും പോയി ക്രിസ്റ്മസ് പരീക്ഷ അടുക്കാറായി.ഓരോത്തരും ടെന്ഷന് അടിച്ചും പേടിച്ചും പഠിക്കുകയാണ് .ഉള്ളത് പറയാലോ പണ്ടേ പരീക്ഷയോടു മ്മക്ക് (സോമൻ ചേട്ടന്റെ മറ്റേ സാധനം) ബഹുമാനക്കുറവ് അതാ ..അങ്ങനിരിക്കുമ്പോൾ ഒരു ഞാറാഴ്ച സന്ധ്യയായപ്പോൾ സുര്യവാവ എന്നെ കാണാൻ വന്നു .എന്നെ അല്പം മാറ്റി നിർത്തി അവൾ വയറിൽ തൊട്ടു കാണിച്ചു..

''ഡാ കണ്ടോ വയറു വീർത്തു തുടങ്ങി ..''

ഹോ എനിക്കുണ്ടായ സന്തോഷം പറഞ്ഞറിയിക്കാൻ വാക്കുകളില്ല .പക്ഷെ അതിനോടൊപ്പം അവൾ ഒരു കാര്യം കൂടെ പറഞ്ഞു .അവൾക്കു പച്ചമാങ്ങ തിന്നണംന്നു .ശെടാ ഇതെന്താ ഇപ്പോൾ ഇങ്ങനൊരു പൂതി ?ദൂരദർശനിൽ അന്നത്തെ 4 മണി സിനിമ ലാലേട്ടന്റെ "പവിത്രം" ആയിരുന്നത്രേ.അതിൽ ലാലേട്ടന്റെ അമ്മ ഗർഭിണി ആകുമ്പോൾ പുള്ളി മാവിലൊക്കെ കയറി മാങ്ങാ പറിച്ചു കൊണ്ടു കൊടുത്തെന്നു ..എന്റെ ലാലേട്ടാ നിങ്ങള് ബല്ലാത്ത ഒരു പണിയ തന്നത് ...

..മുറ്റത്തെ മാവിലേക്കു ഞാനൊന്നു നോക്കി .മാവ് എന്നേം നോക്കിയിട്ടു പറഞ്ഞു "ഒരു രക്ഷയില്ല മോനെ .. സീസണല്ലാ ".എന്താ ഇപ്പോൾ ചെയ്ക അവള് ആഗ്രഹം കൊണ്ടു ചോദിച്ചതല്ലേ ഒന്നുമില്ലേലും മ്മടെ ഗർഭം അല്ലെ അവളുടെ വയറ്റിൽ .ഞാൻ നേരെ അടുക്കളയിലേക്കു വച്ചു പിടിച്ചു .അമ്മ മീന്കറിയിൽ ഇടാൻ വച്ചിരുന്ന 2 മാങ്ങ ഞാൻ ചൂണ്ടി.അതവൾക്കു കൊണ്ടു കൊടുത്തു .അതു വാങ്ങി ഒരു കടി കടിച്ചിട്ടു പുളി കാരണം അവൾ കണ്ണുകൾ ഇറുക്കി അടച്ചു .അപ്പോൾ അവൾക്കു ഞാനൊരു ഉമ്മ കൊടുത്തു...

''എന്താടാ ചെക്കാ ഈ കാണിച്ചേ..?''അവൾ ദേഷ്യത്തോടെ ചോദിച്ചു.

ഇരട്ടക്കുട്ടികളുടെ അച്ഛൻ സിനിമയിൽ ഇങ്ങിനുണ്ട് എന്നു ഞാനും പറഞ്ഞു ..അതു കേട്ടപ്പോൾ അവളൊന്നു ചിരിച്ചു..

അങ്ങിനെ ക്രിസ്റ്മസ് പരീക്ഷ എത്തി .എല്ലാരും പരീക്ഷ കഴിഞ്ഞുള്ള 10 ദിവസത്തെ അവധി ഓർത്തു സന്തോഷിച്ചിരിക്കയാണ് .പരീക്ഷയുടെ അവസാന ദിവസം സ്കൂൾ ബസ് കയറാൻ നിന്ന എന്നെ ഒരാൾ വിളിച്ചു

"'ശു ..ശു..'' നോക്കിയപ്പോൾ മ്മടെ മഹേഷ് .. ''എന്താടാ മാഷേ ..?''

''അങ്ങനങ്ങു പോയാലോ (സുകുമാരൻ ചേട്ടൻ സ്റ്റൈൽ ) ..അവധി കഴിഞ്ഞു വരുമ്പോൾ എന്റെ ഗർഭം തീരുമാനമാക്കണം .''

കർത്താവേ ഇവനിത്‌ മറന്നില്ല എന്നു ഞാനോർത്തു ..''ഡാ അതിനു അവൾ ആദ്യം ഒന്നു പ്രസവിക്കട്ടെ ..''

''പ്രസവിക്കും ..അവളുടെ വയറു കണ്ടാലറിയാം ഉടനെ കാണുമെന്നു ..''മാഷ് അവളെ നോക്കിപ്പറഞ്ഞു ..

എന്നാൽ അവധി കഴിഞ്ഞിട്ടു കാണാം എന്നു പറഞ്ഞു മനസിൽ അവനെ ചീത്തയും പറഞ്ഞു ഞാൻ സ്കൂൾ ബസ് കയറി.അവധിയാണ് വീട്ടുകാർക്ക് ഒരു സ്വസ്ഥതയും കൊടുക്കാത്ത 10 ദിവസങ്ങൾ..പക്ഷെ അവധി ആഘോഷിക്കാൻ പോയ എന്നേം സുര്യവാവേം കാത്തിരുന്ന വീട്ടുകാർക്ക് പറയാനുള്ളത് മറ്റൊന്നായിരുന്നു .സൂര്യവവനെ ആശുപത്രിയിൽ കൊണ്ടുപോകുന്നു.ഞാൻ വാവേ ഒന്നു നോക്കി അവളുടെ വയറിലേക്കും .പ്രസവിക്കാൻ സമയമായോ ഞാൻ ചോദിച്ചത് എല്ലാരും കേട്ടു.

അതുകേട്ട്‌ എന്റെ അമ്മ ചോദിച്ചു ''പ്രസവിക്കാനോ ?''

''അതേ ..സുര്യവാക്കു ഗർഭം ഉണ്ടല്ലോ അതല്ലേ വയറു വീർത്തു ഇരിക്കണേ..?''

''കയറി പോടാ ..''അമ്മ ദേഷ്യപ്പെട്ടു ..

അങ്ങനങ്ങു പോകാൻ പറ്റുമോ എല്ലാരുംകൂടെ എന്റെ ഗർഭം എന്തു ചെയ്യാൻ പോവാ എന്നറിയണ്ടേ .ഞാൻ ധൈര്യപൂർവം ചോദിച്ചു

''അമ്മേ ഇതു എന്റെ ഗര്ഭമാണ് ഞാൻ അവളെ കെട്ടിപിടിച്ചു കിടന്നുണ്ടാക്കിയ ഗർഭം .അതുകൊണ്ടാണ് അവളുടെ വയറു വീർത്തു ഇരിക്കണത് .''

2 ഗർഭം ഉണ്ടാക്കിയിട്ടും നിങ്ങള്ക്ക് ഇതൊന്നും അറീലെ എന്ന മട്ടിൽ ഞാൻ നിന്നു.

അപ്പോൾ പപ്പ എന്നെ അടുത്തു വിളിച്ചു ...''ഡാ മോൻ ഇങ്ങു വന്നേ പപ്പ ഒരു കാര്യം പറയട്ടെ ..അതു ഗര്ഭമൊന്നുമല്ല ..വാവക്ക് ഒരു ഉവ്വാവിയാണ്.''

അതു കേട്ടു എന്റെ ജീവൻ പോയി മറ്റൊന്നുമല്ല കഷ്ടപ്പെട്ടു ഞാനുണ്ടാക്കിയ ഗർഭം എന്തു നിസ്സാരമായിട്ട അവര് ഉവ്വാവി ആണെന്ന് പറഞ്ഞത് . ഞാൻ കരയാൻ തുടങ്ങി .അപ്പോഴേക്കും വാവയും കൂട്ടരും തയാറായി വന്നു .എന്റെ പപ്പയും കൂടെ പോകുന്നുണ്ട്.

എന്റെ ഗർഭം എടുത്തോണ്ട് ഓട്ടോറിക്ഷയിൽ പോകുന്ന അവരെ ഞാൻ കണ്ണുനീരിന്റെ മറവിൽ കണ്ടുനിന്നു . ഏങ്ങലടിച്ചു കരയുന്ന എന്നെ നോക്കി ചിരിച്ചുകൊണ്ട് എന്റെ അണ്ണൻ പറഞ്ഞു . "ഡാ മണ്ട 18 വയസ്സു കഴിഞ്ഞാലേ ഗർഭം ഉണ്ടാകുള്ളൂ ".

പക്ഷെ ഞാൻ കാട്ടിക്കൂട്ടിയ പരാക്രമങ്ങളുടെ പരിണിത ഫലം അനുഭവിച്ചത്‌ അന്ന് രാത്രിയാണ് .ഉറങ്ങാൻ പപ്പയുടെ മുറിയിലേക്ക് പോയ എന്നെ 'അമ്മ അടിച്ചിറക്കി....ഇനിമുതൽ അണ്ണന്റെ കൂടെ കിടന്നാൽ മതിയത്രെ..........പാവം ഞാൻ ...

( ആരും സങ്കടപ്പെടേണ്ട എന്റെ ഗർഭം തൊലച്ചിട്ടു ആശുപത്രിയിൽ സുഖവാസം നടത്തുന്ന അവളെ ഞാൻ പോയി കണ്ടിരുന്നു.3, 4 കിലോ ആപ്പിളും ഓറഞ്ചും ഒക്കെ ആയിട്ടു.ആ ഒഴിഞ്ഞ വയറു കണ്ടപ്പോൾ നഷ്ട ഗര്ഭത്തിന്റെ വേദന എന്നെ വല്ലാണ്ട് അലട്ടി.പിന്നെയും കാലങ്ങൾ കഴിഞ്ഞു സൂര്യ ഇന്ന് വാവയല്ല കേരളത്തിൽ അറിയപ്പെടുന്ന ഒരു കോളേജിലെ അദ്ധ്യാപികയാണ് ,ഒന്നര പ്രായമുള്ള ഒരു പെൺകുഞ്ഞിന്റെ അമ്മയാണ് .കാലത്തിന്റെ കരുതലെന്നോണം ,എന്തോ കുഴപ്പം കാരണം എട്ടാം മാസത്തിൽ പേറ്റു നോവ് വന്ന അവളെ ആശുപത്രിയിൽ കൊണ്ടുപോയതും , ഓപ്പറേഷൻ തീയേറ്ററിനു മുന്നിൽ കാവലിരുന്നതും,എല്ലാം ഞാനായിരുന്നു.ഒടുവിൽ രണ്ടു പേരെയും 2 പാത്രത്തിലാക്കി തന്ന ദൈവം കരുണ കാണിച്ചു കർമ്മം കൊണ്ടു ഞാനും ആ കുഞ്ഞിന് അച്ഛനാകുന്നു .........)

NB: ഹാരം,,, പൊന്നാട ആദിയായവ തന്നു എന്നെ വീർപ്പുമുട്ടിക്കരുതേ എന്നപേക്ഷ........... .
നന്ദി ...

കിരൺ കൃഷ്ണൻ