കിസ്മത്ത്

❤കിസ്മത്ത്❤
ഫുൾ പാർട്ട്‌

"നിന്റെ റോള് തീർന്നു. ഇനി നിനക്ക് എന്റെ ലൈഫിൽ സ്ഥാനം ഇല്ല "

കോഴിക്കോട്ടേക് ഉള്ള യാത്രയിലും എന്റെ മനസ്സിൽ ആഷിക്ക പറഞ്ഞ വാക്കുകൾ ആയിരുന്നു. ഞാൻ എന്ത് തെറ്റ് ചെയ്തിട്ടാണ് ഇക്ക എന്നെ ഒഴിവാക്കിയത് എന്നറിയില്ല.

മൂന്ന് കൊല്ലം മുൻപ് ഞാൻ പഠിച്ചിരുന്ന കോളേജിൽ അക്ഷര കൂട്ടായ്മ എന്ന പ്രോഗ്രാം ഉത്ഘാടനം ചെയ്യാൻ വന്നതായിരുന്നു ആഷിക്ക് എന്ന എന്റെ ആഷിക്ക. എഴുത്തുകാരനും സാമൂഹിക പ്രേവർത്തകനും ആയ ഇക്കയോട് എനിക്കൊരു ആരാധന തോന്നി. അന്ന് പ്രോഗ്രാം ഹോസ്റ്റ് ചെയ്തത് ഞാൻ ആയതുകൊണ്ട് തന്നെ ഇക്കയോട് കൂടുതൽ അടുക്കാൻ എനിക്ക് പറ്റി. ആ അടുപ്പം ഞങ്ങൾ പോലും അറിയാതെ പ്രണയത്തിലേക്ക് വഴുതി വീഴുകയായിരുന്നു. അതുകൊണ്ട് തന്നെ "എന്റെ ബീവിയാകാൻ നിനക്ക് സമ്മതമാണോ" എന്ന് ഇക്ക ചോദിച്ചപ്പോൾ മറുത്തൊന്നും പറയാൻ എനിക്ക് കഴിഞ്ഞില്ല.

അങ്ങനെ ഞങ്ങളുടെ  പ്രണയം നന്നായി തന്നെ മുന്നോട്ടു പോയ്കൊണ്ടിരിക്കുമ്പോൾ ആണ് ഇക്കയ്ക് കുറച്ച് സാമ്പത്തിക പ്രതിസന്ധി വരുന്നത്. അത് കാരണം ഇക്കയ്ക്ക് എന്നോട് സംസാരിക്കുവാനോ എന്നെ കാണുവാനോ പറ്റാതെയായി. അതുമല്ല ഓടി വന്ന് കാണാൻ പറ്റുന്ന ദൂരത്തിൽ ആയിരുന്നില്ല നമ്മൾ. ഇക്ക അങ്ങ് കോഴിക്കോടും ഞാൻ ഇവിടെ ശ്രീ പദ്മനാഭന്റെ മണ്ണിലും.

എപ്പോഴൊക്കെയോ ഇക്കയുടെ സൗകര്യകുറവ് എന്നിൽ വളരെ അധികം വിഷമം ഉണ്ടാക്കി. ഇതേ ചൊല്ലി നമ്മൾ എന്നും കലഹിക്കാനും തുടങ്ങി. ഇക്കയുടെ അപ്പോഴത്തെ അവസ്ഥ മനസിലാക്കാതെ ഞാൻ ഇക്കയെ ഒരുപാട് കുറ്റപ്പെടുത്തി.

"നിങ്ങൾക്ക് എന്നെ വേണ്ടെങ്കിൽ അത് പറയ്. അല്ലാതെ ഇങ്ങനെ മിണ്ടാതെയും പറയാതെയും ഈ ബന്ധംഇങ്ങനെ  മുന്നോട്ടു കൊണ്ടുപോകുന്നതിനോട് എനിക്ക് താല്പര്യം ഇല്ല  "

വളരെ അധികം ചൂടായി തന്നെ ഞാൻ ഇക്കയോട് പറഞ്ഞു.

"എന്റെ അവസ്ഥ എന്താ നീ മനസിലാക്കാത്തെ. ജോലിയും നഷ്ടപ്പെട്ട് കടക്കാരനായി നിൽക്കുന്ന എനിക്ക് എപ്പോഴും നിന്നോട് വന്ന് കൊഞ്ചാൻ പറ്റുമോ "

"വാട്സ്ആപ്പിലും ഫേസ്ബുക്കിലും ഇടയ്കിടയ്ക് സ്റ്റാറ്റസ് മാറ്റാനും ബാക്കി ഉള്ളവരോട് സംസാരിക്കാനും ഇക്കയ്ക് പറ്റുമല്ലോ. എന്നോട് മാത്രം ആണല്ലോ മിണ്ടാൻ മടി "

"ഞാൻ എത്ര തവണ നിന്നോട് പറഞ്ഞു ബാക്കിയുള്ളവരോട് ഞാൻ മിണ്ടുന്നതു വെറും അഭിനയം ആണെന്ന്. എന്റെ വിഷമങ്ങൾ മറക്കാനാണ് ഞാൻ വാട്സ്ആപ്പും ഫേസ്ബുക്കും ഒക്കെ ഉപയോഗിക്കുന്നത്. നിന്റെയടുത്ത വന്നാൽ എനിക്ക് അഭിനയിക്കാൻ പറ്റില്ല അവിടെ ഞാൻ ഞാനായി മാറും. എന്റെ ദേഷ്യവും സങ്കടവും എല്ലാം ഞാൻ നിന്നോട് തീർക്കും. അത് നിനക്ക് താങ്ങാവുന്നതിലും അപ്പുറം ആയിരിക്കും. അതാണ് ഞാൻ നിന്നെ മാക്സിമം ഒഴിവാക്കുന്നത്. എന്റെ പ്രശ്നങ്ങൾ ഒരുവിധം ഒതുങ്ങിയിട്ട് ഞാൻ നിന്റെ അടുത്ത് തന്നെ വരും "

"മതി നിർത്ത്. ഇതൊക്കെ ഞാൻ കുറേ കേട്ടതാ ഇനിയുമെനിക് പറ്റില്ല. "

"പറ്റില്ലെങ്കിൽ കളഞ്ഞിട്ടു പോടീ. നിന്റെ റോള് തീർന്നു. ഇനി നിനക്ക് എന്റെ ലൈഫിൽ സ്ഥാനം ഇല്ല "

ഇത്രയും പറഞ്ഞു ഇക്ക കാൾ കട്ട്‌ ചെയ്തു. എപ്പോഴും പറയും പോലെ അപ്പോഴത്തെ വിഷമത്തിൽ പറഞ്ഞതാകും എന്ന് ഞാൻ കരുതി. എന്നാൽ കുറച്ച് കഴിഞ്ഞു വിളിച്ചു നോക്കിയപ്പോൾ കാൾ കണക്ട് ആകുന്നില്ല. വാട്സ്ആപ്പിലും ഫേസ്ബുക്കിലും എല്ലാം എന്നെ ബ്ലോക്കും ചെയ്തു.

ഈ സംഭവം കഴിഞ്ഞിട്ട് ഇന്നേയ്ക് രണ്ട് കൊല്ലം ആകുന്നു. ഇന്ന് ഞാൻ ഒരു അധ്യാപികയാണ്. കോഴിക്കോടാണ് പോസ്റ്റിങ്ങ്‌ കിട്ടിയത്. അങ്ങോട്ടേക്കുള്ള യാത്രയിലാണ്. എന്റെ ഇക്കയുടെ നാട്ടിൽ..... പെട്ടെന്ന് ഫോൺ റിങ് ചെയ്തു... ഞാൻ ഓർമകളിൽ നിന്നും ഞെട്ടി ഉണർന്നു നോക്കിയപ്പോൾ പരിചയം ഇല്ലാത്ത നമ്പർ.........

തുടരും.....

💛💛💛

കിസ്മത്ത്
ഭാഗം :2

പരിചയം ഇല്ലാത്ത നമ്പർ ആയതുകൊണ്ട് തന്നെ ആദ്യം എടുക്കാൻ മടിച്ചെങ്കിലും പിന്നെ ഞാൻ കാൾ എടുത്തു.

"ഹലോ "

"ഹലോ പാർവതി ഞാൻ അശോകൻ ആണ് സ്കൂളിലെ സ്റ്റാഫ്‌ "

"ആഹ് പറയ് അശോകേട്ടാ "

"മോൾക്ക് താമസിക്കാൻ ഒരു മുസ്ലിം കുടുംബത്തോടൊപ്പം പറ്റുമോ ?"

"അതിനെന്താ ചേട്ടാ ചേട്ടന് അറിയാവുന്നതാണേൽ എനിക്ക് പ്രശ്നമില്ല. "

"എനിക്കറിയാവുന്നതാ മോളെ അമ്മയും മകനും ഒരു മകളും ഉണ്ട്. മകൾ പത്താം ക്ലാസ്സിൽ പഠിക്കുന്നു. മകന് ജോലി ഉണ്ട് അതുകൊണ്ട് തന്നെ രാത്രി മാത്രമേ അവിടെ ഉണ്ടാകു. "

"ആഹ് ചേട്ടാ അത് മതി. ഞാൻ എത്തിയിട്ട് ചേട്ടനെ വിളിക്കാം "

മുസ്ലിം കുടുംബം ആണെന്ന് അറിഞ്ഞപ്പോൾ ഞാൻ സന്തോഷിച്ചു. ഇവർ വഴി എനിക്ക് എന്റെ ഇക്കയെ കുറിച്ച് അറിയാൻ കഴിഞ്ഞാലോ.
-------------------------------------------------------------------

കോഴിക്കോട് എത്തിയപ്പോഴേക്കും മൂന്ന് മണി ആയിരുന്നു. അവിടെ എന്നെ കാത്തു അശോകേട്ടൻ ഉണ്ടായിരുന്നു. ഞങ്ങൾ അങ്ങനെ ഞാൻ താമസിക്കാൻ പോകുന്ന വീട്ടിലേക്ക് പോയി.

നല്ല സ്നേഹം ഉള്ള ഉമ്മയും അനിയത്തികുട്ടിയും ആണ് അവിടെ എന്നെ കാത്തിരുന്നത്.

അശോകേട്ടൻ എന്നെ അവർക്കു പരിചയപ്പെടുത്തി കൊടുത്തിട്ടു അവിടെ നിന്നും പോയി.

"ചേച്ചി വരൂ ഞാൻ റൂം കാണിച്ചു തരാം "
ആസിയ എന്ന ആസികുട്ടി എന്നെ വിളിച്ചു മുകളിലേക്ക് പോയി.

കുറച്ച് നേരം റെസ്റ് എടുത്തിട്ട് ഞാൻ താഴേക്കു ചെന്നപ്പോൾ ആസി ടീവി കാണുവാർന്നു.

"ചേച്ചി ഉണർന്നോ. എന്റെ ഇക്ക വന്നിട്ട് ഇപ്പൊ പുറത്തേക് പോയതേ ഒള്ളു. ഉറക്കമായിരുന്നത് കൊണ്ടാണ് ചേച്ചിയെ വിളിക്കാതിരുന്നത്. "

"ഞാൻ ഇവിടെ തന്നെ ഉണ്ടല്ലോ നമുക്ക് കാണാം. " ഞാൻ ചിരിച്ചു.

"ആഹ് കൊള്ളാം അവനെ കാണണേൽ നമ്മൾ ഉറങ്ങാതെ ഇരിക്കണം. രാത്രി ഏതേലും നേരത്താവും വരവ്. രാവിലെ നേരത്തെ എഴുനേറ്റു പോവുകയും ചെയ്യും. ആകെ കാണാൻ പറ്റുന്നത് വെള്ളിയാഴ്ച ഉച്ചയ്ക്കാണ്. അന്ന് പള്ളിയിൽ പോയിട്ട് ഇവിടെ വന്ന് കഴിച്ചിട്ടേ തിരികെ ജോലിക്ക് പോകൂ. "

"നാളെ വെള്ളിയാഴ്ച അല്ലേ ചേച്ചിക്ക് നാളെ ഇക്കയെ കാണാൻ പറ്റും . "
-----------------------------------------------------------------

അടുത്ത ദിവസം ഞാൻ സ്കൂളിലേക്ക് ജോയിൻ ചെയ്യാൻ പോയി. തിങ്കളാഴ്ച മുതൽ പഠിപ്പിക്കാൻ കേറിയാൽ മതിയെന്നു പറഞ്ഞത് കൊണ്ട് ഞാൻ ഉച്ചയ്ക്ക് വീട്ടിലേക് പോയി.

വീട്ടിൽ എത്തിയപ്പോൾ ഒരു കാർ അവിടെ നിന്നും പോകുന്നത് കണ്ടു.എന്നെ കണ്ടതും ആസി ഓടി വന്ന്.

"ശോ ചേച്ചിക്ക് ഇപ്പോഴും ഇക്കയെ കാണാൻ പറ്റിയില്ല. "

"അത് സാരമില്ല നമുക്ക് ഇന്ന് രാത്രി ഉറങ്ങാതെ ഇരുന്നു നിന്റെ ഇക്കയെ കാണാം പോരെ "

"ഇനി ഒരാഴ്ച കഴിഞ്ഞു ഉറങ്ങാതിരുന്നാൽ മതി. ഇക്ക ബാംഗ്ലൂർ പോയി. ഒരാഴ്ച കഴിഞ്ഞേ വരൂ "

ഇങ്ങനെ മുങ്ങി നടക്കുന്ന ഒരാളെ കാണാൻ എനിക്ക് ആകാംഷയായി.

അങ്ങനെ ഒരാഴ്ച കടന്നു പോയി. ഇപ്പൊ ഞാൻ ശെരിക്കും അവിടത്തെ ആളായി മാറി.
ഞാൻ മുകളിൽ എന്റെ റൂമിൽ ഇരുന്നു ആഷിക്കയുടെ ഫോട്ടോ നോക്കി ഇരുന്നപ്പോൾ താഴെ കാർ വരുന്നതിന്റെ സൗണ്ട് കേട്ടു.

"ഉമ്മാ ദേ ഇക്ക വന്നു "

ഇത് കേട്ട് ആളെ കാണാനുള്ള ആകാംക്ഷയിൽ ഞാൻ താഴേക്കു ഓടി ഇറങ്ങി........

തുടരും.........

💚💚💚
കിസ്മത്ത് 3

"റഷീദിക്കാ എന്റെ ഇക്ക എവിടാ "

"അവൻ നാളെ എത്തൂ "

ആസിയുടെ ഇക്കയെ കാണാൻ ഓടിയെത്തിയ ഞാൻ കണ്ടത് അയാളുടെ കൂട്ടുകാരൻ റഷീദിനെ ആയിരുന്നു.

"ഇതാല്ലേ ഇവിടത്തെ പുതിയ കക്ഷി "

റഷീദ് എന്നെ നോക്കി പറഞ്ഞു.

"ചേച്ചി ഇത് റഷീദ് ഇക്ക. എന്റെ ഇക്കയുടെ ഫ്രണ്ട് ആണ്. "

ഞാൻ റഷീദിനെ നോക്കി ചിരിച്ചൂന്നു വരുത്തി റൂമിലേക്ക്‌ പോയി.

-----------------------------------------------------------------

"അമ്മയോട് ഞാൻ പറഞ്ഞു എനിക്ക് ഇപ്പൊ കല്യാണം വേണ്ട എന്ന്. സമയം ആകുമ്പോൾ ഞാൻ പറയും. "

"നീ പറയാം എന്ന് പറഞ്ഞിട്ട് ഇപ്പൊ രണ്ട് വർഷം കഴിഞ്ഞു. വയസ് 24 ആയി ഇനി എപ്പോഴാ കിളവി ആയിട്ടാണോ ?"

"24 വയസ് കഴിഞ്ഞാൽ കിളവി ആകുവോ "

"നിനക്ക് അറിയാല്ലോ നിന്റെ ജാതകത്തിൽ 24 വയസു കഴിയുന്നതിനു മുന്നേ കല്യാണം നടത്തണം അല്ലേൽ പിന്നെ 37 ലേ നടക്കൂ എന്നാണ്. "

"ഓഹ് ഒരു ജാതകം. മുസ്ലിം  ക്രിസ്ത്യൻ ഒക്കെ ജാതകം നോക്കിയല്ലല്ലോ കെട്ടുന്നത്. പിന്നെ എന്തിനാ ഹിന്ദുക്കൾക്ക് മാത്രം ഇതൊക്കെ. "

"നിന്നോട് തർക്കിക്കാൻ ഞാൻ ഇല്ല. ഞങ്ങൾ എല്ലാം തീരുമാനിച്ചു കഴിഞ്ഞു. "

ഇതും പറഞ്ഞു അമ്മ കാൾ കട്ട്‌ ചെയ്തു.

എനിക്ക് നല്ല ദേഷ്യവും സങ്കടവും ഒരുമിച്ചു വന്നു. ഇക്ക എവിടാ എന്നെങ്കിലും അറിഞ്ഞാൽ മതിയാരുന്നു. കോഴിക്കോട് വന്നാൽ ഈസി ആയി കണ്ടെത്താം എന്ന് കരുതിയാ ഇങ്ങോട്ടേക്കു പോസ്റ്റിങ്ങ്‌ന് ശ്രമിച്ചത്. ഇതിപ്പോ ഇവിടെ വന്നിട്ട് ഒരു മാസം കഴിയാറായി. ഇതുവരെ ഇക്കയെ കുറിച്ച് ഒന്നും അറിയാൻ പറ്റിയില്ല.

രാത്രി തിരിഞ്ഞും  മറിഞ്ഞും കിടന്നിട്ടും ഉറക്കം വരുന്നില്ല. ഇക്ക പുതിയ ജീവിതം തുടങ്ങി കാണുമോ?? എന്നെ ഓർക്കുന്നുണ്ടാകുമോ ??? രണ്ടും കല്പിച്ചു ഞാൻ ഫോൺ എടുത്തു ഇക്കയുടെ നമ്പർ ഡയൽ ചെയ്തു.

ട്രിം...... ട്രിം.....

ഞാൻ വേഗം കാൾ കട്ട്‌ ചെയ്തു. കഴിഞ്ഞ ഒരു വർഷത്തിനിടയിൽ ഇപ്പോഴാണ് ഇക്കയെ വിളിച്ചിട്ട് കിട്ടുന്നത്. സന്തോഷം കൊണ്ട് എന്റെ കണ്ണ് നിറഞ്ഞു. നാളെ രാവിലെ എന്തായാലും വിളിക്കാം എന്ന് കരുതി ഞാൻ കിടന്നു.

-----------------------------------------------------------------------

ഞായറാഴ്ച ആയതുകൊണ്ടും ഇന്നലെ ഉറങ്ങാൻ വൈകിയത് കൊണ്ടും താമസിച്ചാണ് ഞാൻ ഉണർന്നത്. കുളി കഴിഞ്ഞു ഹാളിലേക്ക് പോയപ്പോൾ അവിടെ ആരെയും കണ്ടില്ല. അടുക്കളയിൽ നോക്കിയപ്പോൾ ഉമ്മ കാപ്പി ഉണ്ടാക്കുകയായിരുന്നു. സഹായിക്കാം എന്ന് കരുതി ഞാനും കൂടി. പെട്ടെന്നാണ് ഡോർ ബെൽ കേട്ടത്.

"മോളെ പാറു ആരാന്നു നോക്കിയേ "

ഡോർ തുറന്ന ഞാൻ ഞെട്ടി. മുന്നിൽ ആഷിക്ക. എന്റെ കണ്ണിൽ നിന്നും കണ്ണുനീർ വീഴാൻ തുടങ്ങി.

"ഇക്കാ.... "

എന്നെ കണ്ടിട്ടും ഇക്കയിൽ ഒരു ഭാവ വ്യത്യാസവും ഞാൻ കണ്ടില്ല.

"ആരാ മോളെ അത് "

"ഞാനാ ഉമ്മാ "

ഇക്ക ഉമ്മയെ നോക്കി അടുക്കളയിലേക്ക് പോയി.

ഇനി ഇത് എന്റെ ഇക്ക അല്ലായിരിക്കുമോ??  അതോ ഇക്ക എന്നെ മറന്നോ ?? അങ്ങനെ ഒരുപാട് ചോദ്യങ്ങൾ എന്റെ ഉള്ളിൽ കുമിഞ്ഞു കൂടാൻ തുടങ്ങി.

"ഇതാണോ ഉമ്മയുടെ പുതിയ മോൾ "

"ആഹ് ഡാ ഇതാണ് ഞങ്ങളുടെ പാറു. നീ ഇവളുടെ ഫോട്ടോ കണ്ടിട്ടുണ്ടല്ലോ "

ഞാൻ അന്തംവിട്ട് പോയി..

"മോൾ അറിയാതെ മോളുടെ ഫോട്ടോ ആസി ഇവന് ഫോണിൽ അയച്ചു കൊടുത്തായിരുന്നു. "

ഇപ്പൊ എനിക്ക് കാര്യങ്ങൾ പിടികിട്ടി. എന്നെ കുറിച്ച് ഇക്ക നേരത്തെ അറിഞ്ഞത് കൊണ്ടാണ് ഇക്ക പരിചയഭാവം കാണിക്കാത്തത്.

"ആഷി പോയി കുളിച്ചിട്ടു ഇവളെ ഒന്ന് ഇവിടത്തെ അമ്പലം വരെ കൊണ്ട് പോയിട്ട് വാ. വന്നപ്പോൾ മുതൽ പറയുന്നതാ അമ്പലത്തിൽ പോകണം എന്ന്. "

"വേണ്ട ഉമ്മാ എവിടാ എന്ന് പറഞ്ഞാൽ ഞാൻ ഒരു ഓട്ടോയിൽ പോയ്കോളാം. "

"അത് വേണ്ട മോളെ ഇവൻ അവിടെ ആക്കി തരും "

"ഡാ അവിടെ നിന്ന് മോളെയും വിളിച്ചിട്ട് തിരികെ വന്നാൽ മതി കേട്ടോ "

അങ്ങനെ ഞാനും ഇക്കയും അമ്പലത്തിലേക്ക് യാത്ര തുടങ്ങി.. അങ്ങോട്ട്‌ പോയപ്പോൾ ഞാനോ ഇക്കയോ പരസ്പരം ഒന്നും സംസാരിച്ചില്ല.. തിരികെ പോരാൻ നേരം മൗനം ഭേദിച്ചുകൊണ്ട് ഇക്ക തന്നെ സംസാരിച്ചു തുടങ്ങി............

💙💙💙💙
കിസ്മത്ത്
ഭാഗം : 4

"എന്താ നിന്റെ ഉദ്ദേശം "

"എന്ത് ഉദ്ദേശം എനിക്കൊരു ഉദ്ദേശവും ഇല്ല "

"നീ എന്തിനാ എന്റെ വീട്ടിലേക്ക് വന്നത്. എന്റെ ഉമ്മയോടും പെങ്ങളോടും എല്ലാം പറയാം എന്നാണോ "

"ഞാൻ അങ്ങനെ ഒന്നും ചിന്തിച്ചിട്ടില്ല "

"പിന്നെ എന്തിനു നീ എന്റെ വീട്ടിൽ തന്നെ താമസത്തിനു വന്നു. വേറെ എത്രയോ വീടുകൾ ഉണ്ടായിരുന്നു. "

"ഈ വീടാണ് അശോകേട്ടൻ പറഞ്ഞത്. എനിക്ക് ഇവിടെ വേറെ ആരെയും അറിയില്ലായിരുന്നു. "

"നിന്റെ ആഗ്രഹം എന്തായാലും നടക്കില്ല  നിന്നെ ഞാൻ എന്റെ മനസ്സിൽ നിന്നും കളഞ്ഞതാണ് "

ഞാൻ ഇക്കയെ ഒന്ന് നോക്കി... ഇക്ക നല്ല ദേഷ്യത്തിൽ ആയിരുന്നു.  പിന്നെയും എന്തൊക്കെയോ ഇക്ക പറയുന്നുണ്ടായിരുന്നു. ഞാൻ അതൊന്നും കേട്ടില്ല. ഇക്ക എന്തിനാ എന്നോട് ഇത്രയും വെറുപ്പ് കാണിക്കുന്നത് എന്നെനിക്കു മനസിലാകുന്നില്ല .

********************************************

രാത്രി 12 മണി ആയപ്പോൾ ഫോണിൽ ഇക്കയുടെ മെസ്സേജ്.

സിറ്റ്ഔട്ടിലേക്ക് വരൂ. കുറച്ചു സംസാരിക്കാനുണ്ട്.

ഞാൻ അങ്ങോട്ടേക് പോയി.

"എന്താ വരാൻ പറഞ്ഞേ "

"രാവിലേ ദേഷ്യപ്പെട്ടതിനു സോറി. അറിഞ്ഞുകൊണ്ടല്ല നീ ഇങ്ങോട്ടേക്കു വന്നതെന്ന് മനസിലായി. ഞാൻ അശോകേട്ടനെ വിളിച്ചിരുന്നു. "

"മ്മ് "

"നിനക്ക് കല്യാണം ഒന്നും ആയില്ലേ "

"ഇല്ല "

"അതെന്താ വീട്ടുകാർ മോളെ കെട്ടിക്കുന്നില്ലേ "

"ഇക്ക ഇക്കയ്ക്ക് എന്നോട് ഇപ്പൊ ഇഷ്ടമില്ലേ "

"ഞാൻ പറഞ്ഞല്ലോ കുട്ടി. നിന്നെ ഞാൻ എന്റെ മനസ്സിൽ നിന്നും കളഞ്ഞു. നീ നല്ലൊരു നായർ ചെക്കനേയും കെട്ടി സുഖമായി ജീവിക്കൂ "

"ഇക്കയോട് പണ്ടേ ഞാൻ പറഞ്ഞിട്ടുണ്ടായിരുന്നു "

"എന്ത് "

"ഇക്ക വേറൊരു പെണ്ണിനെ കല്യാണം കഴിക്കുന്നത് കാണാതെ ഞാൻ കല്യാണം കഴിക്കില്ലെന്ന് "
"ആദ്യം ഇക്ക കല്യാണം കഴിക്കൂ എന്നിട്ട് ഞാൻ എന്റെ കാര്യം നോക്കാം "

ഇക്ക ഒന്നും മിണ്ടാതെ റൂമിലേക്ക്‌ പോയി.  എനിക്കറിയാം ഇക്കയ്ക്ക് ഞാൻ ഇല്ലാതെ പറ്റില്ല എന്ന്. ആ ഉള്ളിൽ ഞാൻ മാത്രം ആയിരിക്കും എന്നും.

********************************************

ഞായറാഴ്ച ആയതുകൊണ്ട് ഞാനും ഉമ്മയും ഇക്കയും ആസിയും പുറത്തിരുന്നു ഓരോരോ കാര്യങ്ങൾ പറഞ്ഞുകൊണ്ട് ഇരിക്കുകയായിരുന്നു. കൂട്ടത്തിൽ ഉമ്മാ ഇക്കയുടെ കല്യാണകാര്യം പറഞ്ഞു.

"നിനക്ക് എത്ര വയസായി എന്നാ ആഷി നിന്റെ വിചാരം. ഇനിയെങ്കിലും ഒരു പെണ്ണ് കെട്ടിക്കൂടെ. "

"ആഹ് സമയം ഉണ്ടല്ലോ " ഇക്ക ഒരു ഒഴുക്കൻ മട്ടിൽ പറഞ്ഞു.

"ഉമ്മാ നമുക്ക് പാറു ചേച്ചിയെ ഇക്കയ്ക്ക് വേണ്ടി ആലോചിച്ചാലോ "

പെട്ടെന്നുള്ള ആസിയുടെ ചോദ്യം ഞങ്ങൾ മൂന്ന് പേരിലും ഒരുപോലെ ഞെട്ടൽ ഉണ്ടാക്കി.

"നീ ഒന്ന് മിണ്ടാതിരുന്നേ കൊച്ചു വായിൽ വലിയ വർത്തമാനം പറയണ്ട "

എന്ന് പറഞ്ഞ് ഇക്ക പുറത്തേയ്ക്ക് ഇറങ്ങി പോയി.

********************************************

വൈകിട്ട് അടുക്കളയിൽ നിൽകുമ്പോൾ ഉമ്മാ എന്നോട് ചോദിച്ചു.

"മോളെ ആസി പറഞ്ഞത് കേട്ടിട്ട് മോൾക്ക് വിഷമം ആയോ "

"ഏയ് ഇല്ല ഉമ്മാ അവൾ കുഞ്ഞല്ലേ "

"സത്യം പറഞ്ഞാൽ മോള് മുസ്ലിം ആയിരുന്നേൽ ഉറപ്പായും എന്റെ ആഷിക്ക് വേണ്ടി മോളെ ഞാൻ ആലോചിച്ചേനെ "

ഉമ്മാ അത് പറയുമ്പോൾ എന്റെ കണ്ണുകൾ നിറയുന്നുണ്ടായിരുന്നു.

********************************************

"ആസി പാറു ഇതുവരെ എഴുനേറ്റില്ലല്ലോ. നീ ഒന്ന് പോയി നോക്കിയേ "

റൂമിൽ വന്നു നോക്കിയ ആസി കണ്ടത് പനിച്ചു കിടക്കുന്ന എന്നെ ആയിരുന്നു.

"ഉമ്മാ ദേ ചേച്ചിക്ക് നല്ല പനിയുണ്ട്. ഉമ്മാ ഒന്ന് ഇക്കയെ വിളിക്ക് നമുക്ക് ഹോസ്പിറ്റലിൽ പോകാം "

അങ്ങനെ ഹോസ്പിറ്റലിൽ പോയി ഇൻജെക്ഷൻ ഒക്കെ എടുത്തു തിരികെ വീട്ടിൽ വന്ന് ഞാൻ റെസ്റ് എടുക്കാൻ തുടങ്ങി.

വൈകുന്നേരം ആയപ്പോൾ ഇക്ക ചുക്ക് കാപ്പിയുമായി എന്റെ അടുത്തേക് വന്നു.
"പാറു..... "

ഇക്ക എന്നെ അങ്ങനെ വിളിച്ചിട്ട് ഇപ്പൊ രണ്ട് വർഷം കഴിയുന്നു.

"നീ എന്താ ആലോചിക്കുന്നേ ഇതാ കാപ്പി കുടിക്ക് "

"ആസി എവിടെ "

സാധാരണ ഞാൻ സുഖമില്ലാതെ കിടക്കുമ്പോൾ അവളാണ് എനിക്ക് കാപ്പി കൊണ്ട് തരാറുള്ളത്.

"അവളും ഉമ്മയും ഒരു ബന്ധുവീട്ടിൽ പോയി "

"മ്മ് "

രാത്രി ഉമ്മയും ആസിയും വരാൻ താമസിച്ചു. അപ്പോഴേക്കും ഇക്ക എനിക്ക് കഞ്ഞിയും മരുന്നും ഒക്കെ എടുത്തു തന്നിരുന്നു.........

💜💜💜
കിസ്മത്ത്:-  5

"ഇക്കാ ഒരു കാര്യം പറയാനുണ്ട് "

"ഉം എന്താ "

"ഇക്കയ്ക്ക് ഇപ്പോഴും എന്നോട് ഇഷ്ടമില്ലേ??'

"ഇതിനുള്ള ഉത്തരം നിനക്ക് ഞാൻ പലതവണ തന്നതാണ്. നിന്നെ ഇനി ഒരിക്കലും എനിക്ക് പഴയ പോലെ കാണാൻ കഴിയില്ല "

"പിന്നെ എന്തിനാണ് ഇക്കാ എനിക്ക് പനി വന്നപ്പോൾ ഭക്ഷണവും മരുന്നും ഒക്കെ എടുത്തു തന്നത് "

"ശത്രു ആയാൽ പോലും വീട്ടിൽ വന്ന് നിക്കുന്ന ആളെ നന്നായി നോക്കണം എന്ന് ഉമ്മ പറഞ്ഞിട്ടുണ്ട് "

ഞാൻ പിന്നെ ഒന്നും പറയാൻ നിന്നില്ല.
********************************************

അടുത്ത ദിവസം കേട്ട ന്യൂസ്‌ എന്നെ വല്ലാതെ തളർത്തി. പ്രണയിച്ചത്തിന്റെ പേരിലും പ്രണയിച്ച പെണ്ണിനെ ചതിക്കാതെ ഒപ്പം കൂട്ടിയത്തിന്റെ പേരിലും കെവിൻ എന്ന യുവാവിനെ പെൺകുട്ടിയുടെ വീട്ടുകാർ തട്ടിക്കൊണ്ടു പോയി കൊല ചെയ്തു.

ഇതാണ് പ്രണയത്തിനു ഇന്ന് നാട്ടുകാരും വീട്ടുകാരും നൽകുന്ന വില....

ഇക്ക പണ്ട് പറഞ്ഞൊരു കാര്യം എനിക്കപ്പോൾ ഓർമയിൽ വന്നു..

"ജാതി വെറി പൂണ്ട നാറികളുടെ നാടാണിത്. നമുക്കിവിടെ ജീവിക്കാൻ പറ്റില്ല. നമുക്ക് ഗൾഫിൽ പോയി സെറ്റിൽ ആകാം അവിടെ ഈ പ്രശ്നങ്ങൾ ഇല്ല. അവിടെ നിന്നെയോ എന്നെയോ ചോദ്യം ചെയ്യാൻ ആരും വരില്ല "

ശരിയായിരിക്കാം അവിടെ ഈ പ്രശ്നങ്ങൾ ഇല്ല എങ്കിൽ പിന്നെ എന്തുകൊണ്ട് ഇവിടെ മാത്രം ഇങ്ങനെ ???

********************************************

"മോളെ നാളെ നമുക്ക് ഒരിടം വരെ പോകാനുണ്ട് നീയും കൂടെ വരണം "

"അതിനെന്താ ഉമ്മാ ഞാൻ വരാല്ലോ. എവിടെയാ പോണേ "

"ആഷിക്ക് ഒരു കുട്ടിയെ ഞാൻ കണ്ടു വച്ചിട്ടുണ്ട് അവളെ ഒന്ന് പോയി കാണാനാ "

പെട്ടെന്ന് അത് കേട്ട ഷോക്കിൽ എനിക്ക് തലചുറ്റും പോലെ തോന്നി. നിറഞ്ഞു വരുന്ന കണ്ണുകൾ ഉമ്മയിൽ നിന്നും ഇക്കയിൽ നിന്നും മറയ്ക്കാൻ ഞാൻ നന്നേ പാട് പെട്ടു.

ഞാൻ ഇക്കയുടെ മുഖത്തേക്ക് നോക്കി. അവിടെ ഒരു ഭാവവ്യത്യാസവും ഞാൻ കണ്ടില്ല.

ഞാൻ നേരെ റൂമിൽ പോയി ഇക്കയുടെ ഫോണിലേക്ക് മെസ്സേജ് ചെയ്തു.

"ഇക്കയ്ക് ഇതിനു സമ്മതമാണോ ?"

"എന്റെ സമ്മതം ഉള്ളത് കൊണ്ടാണല്ലോ നാളെ പോകാന്നു തീരുമാനിച്ചത് "

ഒരു കാര്യം ഉറപ്പായി എനിക്ക് ഇക്കയെ ഇനി ഒരിക്കലും തിരികെ കിട്ടില്ല അതിന്റെ തെളിവാണല്ലോ ഈ പെണ്ണുകാണൽ ചടങ്ങ്.
********************************************

തലവേദനയാന്നു ഉമ്മയോട് കള്ളം പറഞ്ഞു പോകാതെ ഇരിക്കാൻ നോക്കി എങ്കിലും എന്റെ ഇക്കയുടെ ഭാവി വധുവിനെ കാണണം എന്ന് എനിക്ക് തോന്നി അതുകൊണ്ട് തന്നെ കൂടെ പോകാൻ ഞാൻ തീരുമാനിച്ചു.

അവിടെ എത്തും തോറും എന്റെ നെഞ്ചിടിപ്പു കൂടി വന്നു.. എല്ലാരേയും മുന്നിൽ സന്തോഷം അഭിനയിക്കാൻ ഞാൻ ശ്രദ്ധിച്ചു.

അങ്ങനെ ഞങ്ങൾ കുട്ടിയുടെ വീട്ടിൽ എത്തി.. നല്ല മൊഞ്ചത്തി... ഇക്കയ്ക് ചേരും.... ഡോക്ടർ ആണ്.. എന്തുകൊണ്ടും എന്നെക്കാളും യോജിച്ച പെണ്ണ്....

തിരികെ പോകും വഴി ഉമ്മ എന്നോട് ചോദിച്ചു.

"മോൾക്ക് ഇഷ്ടായോ കുട്ടിയെ ?"

ഞാൻ മുഖത്തൊരു ചിരി വരുത്തി പറഞ്ഞു.

"ഇഷ്ടായി അഷിക്കയ്ക്ക് ചേരും "

"എനിക്ക് അത്ര ഇഷ്ടായില്ല. എനിക്ക് പാറു ചേച്ചിയെ പോലെ ഉള്ള ഒരാളെ മതി "

ആസി ഇടയിൽ കയറി പറഞ്ഞു..

"നിനക്ക് കുറച്ച് കൂടുന്നു. നിന്റെ അഭിപ്രായം ആരെങ്കിലും ചോദിച്ചോ.. കൊച്ചല്ലേ എന്ന് വിചാരിച്ചു കൊഞ്ചിക്കുമ്പോൾ അവൾ തലയിൽ കേറുന്നു. "

എന്ന് പറഞ്ഞു ഇക്ക അവളെ വഴക്ക് പറയാൻ തുടങ്ങി.
********************************************

ഫോണിൽ മെസ്സേജ് വരുന്ന സൗണ്ട് കേട്ടാണ് ഞാൻ ഉണർന്നത്. നോക്കിയപ്പോൾ മണി ഒന്ന്.  ആരാ ഈ നേരത്ത് മെസ്സേജ് ചെയ്യാൻ എന്ന് നോക്കിയപ്പോൾ ഇക്കയുടെ മെസ്സേജ്.

"സിറ്റ് ഔട്ടിൽ വരൂ കുറച്ച് സംസാരിക്കാനുണ്ട് "

ഞാൻ വേഗം താഴേക്ക് പോയി...

"എന്താ വരാൻ പറഞ്ഞേ "

"എന്താ ഇനി  നിന്റെ പ്ലാൻ "

"എന്ത് പ്ലാൻ "

"ഇവിടെ തന്നെ തുടരാൻ ആണോ "

ഞാൻ ഒന്നും മിണ്ടിയില്ല.

"നീ ഇവിടെ ഉള്ളപ്പോൾ എനിക്ക് സമീറയുടെ കൂടെ സന്തോഷത്തോടെ ജീവിക്കാൻ പറ്റില്ല. "

ഞാൻ മൗനം തുടർന്നു..

"നീ എന്താ ഒന്നും മിണ്ടാത്തെ "

"ഞാൻ പോകാം ഇവിടന്നു.  പക്ഷേ അത് ഇക്ക സമീറയുടെ കൈയിൽ മഹർ കൊടുക്കുന്ന കണ്ടിട്ട് മാത്രം ആയിരിക്കും."

ഇത്രയും പറഞ്ഞു തിരിഞ്ഞു നടന്ന എന്നെ കൈയിൽ പിടിച്ചു ഇക്ക ഇക്കയുടെ നേരെ നിർത്തി........

ഞാൻ ഒന്ന് ഞെട്ടി എങ്കിലും പുറത്തു കാണിച്ചില്ല.....

💗💗💗
കിസ്മത്ത് : 6

അവസാന ഭാഗം

"എന്നോട് ക്ഷമിക്ക് പാറു"

എന്ന് പറഞ്ഞു ഇക്ക എന്നെ കെട്ടിപിടിച്ചു കരയാൻ തുടങ്ങി.  എന്ത് പറയണം എന്നറിയാതെ ഞാൻ വിഷമിച്ചു.

"നിന്നെ ഇഷ്ടമില്ലാത്തത് കൊണ്ടോ നിന്നോട് ദേഷ്യമോ വെറുപ്പോ ഉള്ളത് കൊണ്ടോ അല്ല ഞാൻ നിന്നെ ഒഴിവാക്കുന്നത്. എന്റെ ഇപ്പോഴത്തെ സാഹചര്യം അതാണ് "

"എന്താ ഇക്കാ കാര്യം. ഇക്കയുടെ ഏത് അവസ്ഥയിലും ഞാൻ ഇക്കയ്ക്ക് ഒപ്പം നില്കുമല്ലോ പിന്നെ എന്തിനാ ഇക്കാ ഇപ്പൊ ഈ അവഗണന "

"നിനക്ക് അറിയാമല്ലോ എനിക്ക് കുറച്ച് കടങ്ങളും ബാധ്യതകളും ഉണ്ടായിരുന്നു. പലിശക്കാർ വീട്ടിൽ കേറി വരും എന്ന സ്ഥിതി ആയി. മരിക്കേണ്ടി വരും എന്നൊരു അവസ്ഥ ആയപ്പോൾ ദൈവദൂതനെ പോലെ എന്റെ അടുത്തേക്  വന്നൊരു ആളുണ്ട് മുഹമ്മദ്‌ ഇക്ക... അദ്ദേഹം എന്നെ സഹായിച്ചു. എന്റെ ബാധ്യതകൾ ഒക്കെ തീർത്തു തന്നു. പ്രതിഫലം ആയി ഒന്നേ ആവശ്യപെട്ടോളു എന്നെ ജീവനെ പോലെ സ്നേഹിക്കുന്ന അദ്ദേഹത്തിന്റെ ഒരേയൊരു മകളായ സമീറയെ വിവാഹം കഴിക്കണം എന്നതാണ്. മുഹമ്മദ്‌ ഇക്കയോട് എനിക്ക് തീർത്താൽ തീരാത്ത കടപ്പാടുണ്ട്. അതുകൊണ്ട് തന്നെ അദ്ദേഹത്തിന് കൊടുത്ത വാക്ക് എനിക്ക് പാലിച്ചേ പറ്റു."

"എനിക്ക് മനസിലാകും ഇക്കാ.. "

"നീ ഇവിടെ നിന്നും പോണം. നീ ഉള്ളപ്പോൾ എനിക്ക് സമീറയെ കല്യാണം കഴിക്കാൻ പറ്റില്ല "

"ഞാൻ പോകാം ഇക്കാ. പക്ഷേ ഇക്ക സമീറയ്ക്ക് മഹർ കൊടുക്കുന്ന കണ്ടിട്ടേ ഞാൻ പോകൂ. എങ്കിൽ മാത്രമേ എനിക്ക് ഇക്കയെ മറക്കാൻ കഴിയൂ "

-----------------------------------------------------------------------

കല്യാണത്തിന് ഒരാഴ്ച ബാക്കി നിൽക്കേ സമീറ ഇക്കയെ കാണണം എന്ന് പറഞ്ഞു ബീച്ചിലേക്ക് വിളിപ്പിച്ചു.

"ആഷിക്കാ ഇക്ക പൂർണ സമ്മതത്തോടെ തന്നെയാണോ ഈ കല്യാണത്തിന് സമ്മതിച്ചത്. അതോ എന്റെ ഉപ്പയുടെ നിർബന്ധം കൊണ്ടാണോ "

"ഏയ്യ് അല്ല എന്റെ ഇഷ്ടത്തിന് തന്നെയാ. എന്താ ഇപ്പൊ ഇങ്ങനെ ചോദിക്കാൻ "

"ഇക്കയ്ക്ക് എന്നോടുള്ള പെരുമാറ്റം കണ്ടു ചോദിച്ചതാണ്. കല്യാണം ഉറപ്പിച്ചിട്ട് ഇതുവരെ ഇക്ക എന്നെ ഒന്ന് വിളിക്കുകയോ കാണാൻ വരുകയോ ഒന്നും ചെയ്തില്ലല്ലോ "

"ആഹ് അത് പോട്ടെ ഞാൻ ഒരു കാര്യം പറയാനാ വിളിപ്പിച്ചത് "

"എന്താ... "

"പാർവതി ഇക്കയുടെ ആരാ "

"സമീറ.. അത്.... "

"ഞാൻ എല്ലാം അറിഞ്ഞു ഇക്ക.. നിങ്ങൾ തമ്മിൽ ഉള്ള ബന്ധവും എന്റെ ഉപ്പയോട് ഉള്ള കടപ്പാടിന്റെ പേരിൽ ഇക്ക അവളെ മറന്ന് എന്നെ കല്യാണം കഴിക്കാൻ സമ്മതിച്ചത് ആണെന്നും "

"അത് പിന്നെ.... സമീറ.... "

"ഇക്കയ്ക്ക് എപ്പോഴെങ്കിലും എന്നോട് ഇതിനെ കുറിച്ച് ഒന്ന് പറയാമായിരുന്നു. ഒരു പെണ്ണിന്റെ കണ്ണുനീര് വീഴ്ത്തി കൊണ്ട് എനിക്കൊരു ജീവിതം വേണ്ട ഇക്ക... ഇക്ക ഇത് എന്നോട് പറഞ്ഞിരുന്നേൽ ഞാൻ എന്റെ ഉപ്പയോട് പറയുമായിരുന്നല്ലോ "

"സമീറ എന്നോട് ക്ഷമിക്ക് "

"സാരമില്ല ഇക്ക. പ്രണയിക്കുന്നവരുടെ മനസ് എനിക്ക് മനസിലാകും. ഇക്കയുടെ മനസ് പാർവതിക്ക് ഒപ്പമാണ്. അത് ഒരിക്കലും എനിക്ക് കിട്ടില്ല. എന്നെ കുറിച്ച് ഇക്ക ഓർക്കണ്ട. പിന്നെ ഉപ്പയോട് ഞാൻ കാര്യങ്ങൾ ഒക്കെ പറഞ്ഞു മനസിലാക്കിയിട്ടുണ്ട് അത് ഓർത്ത് ഇക്ക ടെൻഷൻ ആകണ്ട. "

"നിന്നോട് ഞാൻ എന്താ പറയേണ്ടത് സമീറ "

"ഇക്ക വേഗം വീട്ടിലേക്ക് പോകൂ അവിടെ ഇക്കയെ കാത്തു പാർവതി ഉണ്ടാകും "

വീട്ടിലേക്ക് വന്ന ഇക്ക എന്നോട് കാര്യങ്ങൾ എല്ലാം പറഞ്ഞു.

"നീയാണോ അവളെ വിളിച്ചു കാര്യങ്ങൾ പറഞ്ഞത് "

"അല്ല ഇക്ക.. അന്ന് നമ്മൾ സംസാരിച്ചതിന് ശേഷം എന്നെ കാണാൻ ഉമ്മ വന്നിരുന്നു. നമ്മൾ സംസാരിച്ചത് ഉമ്മ കേട്ടിരുന്നു.  എന്റെ മോന്റെ ഇഷ്ടം ആണ് എനിക്ക് വലുത് എന്ന് പറഞ്ഞ് അപ്പോൾ തന്നെ സമീറയെ വിളിച്ചു കാര്യങ്ങൾ പറഞ്ഞു. ഇന്നലെ സമീറയുടെ ഉപ്പയെ കണ്ടു സംസാരിക്കുകയും ചെയ്തു "

"എന്നിട്ട് നീ എന്താ ഇത് എന്നോട് പറയാത്തത് "

"സമീറ പറഞ്ഞു അവൾ ഇക്കയോട് സംസാരിച്ചതിന് ശേഷം മാത്രം എല്ലാം പറഞ്ഞാൽ മതി എന്ന് "

അങ്ങനെ പുതിയൊരു ജീവിതത്തിലേക്ക് ഞങ്ങൾ യാത്ര തുടങ്ങി... പുതിയ സ്വപ്‌നങ്ങൾ കണ്ടു കൊണ്ട്....

പ്രവീണകൃഷ്ണ