ഷഹാന സെക്കന്റ്‌ part 6>

ഷഹന
@@@@

Part 6
******

മുന്നിൽ നിൽക്കുന്ന സാറിനെ കണ്ട് പകച്ചു പണ്ടാരടങ്ങി പോയി ഞാൻ...

ആഷിക്....

ഇവനിതെങ്ങനെ ഇവിടെ കയറിക്കൂടി..

"ഗസ്റ്റ് ലെക്ചർ ആയി ഇവിടെ നിങ്ങൾക്ക് മുന്നിൽ നിൽക്കുന്നത് മറ്റാരുമല്ല,, ഞങ്ങളുടെയൊക്കെ പ്രിയങ്കരനായ സ്റ്റുഡന്റ് ആണ്... റാങ്ക് ഹോൾഡർ കൂടിയാണ് ഈ നിൽക്കുന്ന കക്ഷി... അപ്പോ ഇനി കുറച്ചു മാസങ്ങൾ ആഷിക് സാറും  നിങ്ങളോടൊപ്പമുണ്ടാകും... നിങ്ങളിലൊരാളായി നിന്നു കൊണ്ട് നിങ്ങൾക്ക് വേണ്ട വിവരങ്ങൾ നൽകാൻ സാറിനെ കൊണ്ട് പറ്റുമെന്ന പ്രതീക്ഷ ഞങ്ങൾക്കുണ്ട്. "

അങ്ങനെയെന്തൊക്കെയോ കൂട്ടികുഴച്ചു പറഞ്ഞു കൊണ്ട് ഹെഡ് ക്ലാസ്സിൽ നിന്നും പോയി...

ഞാനെന്റെ അവസ്ഥയെ കുറിച്ചോർത്തു പരിതപിക്കുകയായിരുന്നു ആ സമയമത്രയും... എന്തൊരു കഷ്ടമാണ് പടച്ചോനെ,,, ഈ കുരിപ്പിനെ ഇനിയും സഹിക്കേണ്ടി വരുന്നതിലല്ല സങ്കടം... മറിച്ചു അവനെ ഞാൻ ഇനി ബഹുമാനിക്കേണ്ടി വരുമല്ലോ എന്നോർത്താണ്...

എടാ പോടാന്ന് വിളിച്ച എന്റെ നാവു കൊണ്ട് ഇനിയിപ്പോ ഇവനെ സാർ എന്ന് വിളിക്കണ്ടേ... എന്റെ കലാലയ ജീവിതം ഇങ്ങനെയൊക്കെ ആകാൻ മാത്രം ഞാനെന്ത് തെറ്റാണു റബ്ബേ ചെയ്തത്...

എല്ലാരും ഓന്റെ മൊഞ്ചിനെ പൊക്കി പറയുമ്പോഴും ഞാനെന്റെ ചിന്ത ലോകത്തായിരുന്നു...

ഞാനിരിക്കുന്ന ബെഞ്ചിനരികിൽ അവൻ വന്ന് നിൽക്കുന്നത് കണ്ടിട്ടും ഞാനെന്റെ തല ഉയർത്തി നോക്കിയില്ല.. അവന്റെ ഇരു കാരങ്ങളും എനിക്ക്  മുന്നിലുള്ള ഡെസ്കിനു താങ്ങായി കുത്തി പിടിച്ചു നിൽക്കുകയാണ് അവൻ...

"ഷഹന,,, എന്താടാ എന്നെയൊന്ന് മൈൻഡ് ആക്കാത്തത് ??..  നീ പേടിക്കണ്ട ട്ടോ,, ഒരു അഞ്ചാറു മാസം മാത്രേ ഉണ്ടാകുള്ളൂ,,, ഇവിടെ താൽകാലികമായിട്ട്,,, അത് കഴിഞ്ഞാൽ നെറ്റ് എക്സാം എഴുതിയെടുത്തു ഇവിടെ തന്നെ പെർമനന്റ് ആകാൻ നോക്കാം... എന്തേയ്.. "

"പോടാ,,, (അത് ഞാൻ മനസ്സിൽ വിളിച്ചതാണ് )... എന്തിനാ എന്നെയിങ്ങനെ ഇഞ്ചിഞ്ചായി കൊല്ലുന്നത്,,, ഒറ്റയടിക്ക് അങ്ങ് കൊന്നൂടായിരുന്നോ ??"

"ഹേയ് അത്രയ്ക്ക് നല്ല കാര്യം ഞാൻ ചെയ്യില്ല ഷഹന,,, ഭൂമിയുടെ ബാലൻസ് നിലനിർത്താൻ നിന്റെ ഭാരം അത്യാവശ്യമാണ് ട്ടോ... അപ്പോ നമുക്ക് ഇനിയെന്നും കാണാം... "

ഉഫ്,,, ഇവനെ കൊണ്ട് തോറ്റല്ലോ പടച്ചോനെ... എന്നും മനസ്സിൽ പറഞ് ഞാനെന്റെ കൈ ശക്തിയായി ഡെസ്കിനടിച്ചു...

ഷിറ്റ് എന്ന് പറയാൻ വിചാരിച്ചതാ,, പിന്നെ കരുതി വേണ്ട,, സുരേഷ് ഗോപിയാണെന്ന് കരുതി പുള്ളമ്മാരൊക്കെ ഞമ്മളടുത്തു ഓട്ടോഗ്രാഫ് വാങ്ങാൻ വരണ്ട...

"നിങ്ങൾക്കൊക്കെ ചെലപ്പോ എന്നെ കണ്ട് പരിചയമുണ്ടാകും... ഞാനിതേ കോളേജിൽ പഠിച്ചൊരാളാണ്,, പിന്നെ എനിക്കീ ക്ലാസ്സിൽ നല്ല പരിചയമുള്ള ഒരാളുണ്ട്,,, ഷഹന... അവളെന്റെ പെങ്ങളാണ് ട്ടോ... ബാക്കിയുള്ളവരെയൊക്കെ വഴിയേ നമുക്ക് വിശദമായി പരിചയപ്പെടാം... "

ആഷി,, ആദ്യം തന്നെ പറഞ്ഞത് ഞമ്മളെ പറ്റിയാണ്... ഇനിയിപ്പോ ഞമ്മള് കുറച്ചു ഡീസന്റ് ആയെ പറ്റൂ... അല്ലെങ്കിൽ ഈ തെണ്ടി ഞമ്മളെ അവസരം കിട്ടുമ്പോഴൊക്കെ നാണം കെടുത്തും...

"അതേയ് സാറെ,,, പെങ്ങളെ പോസ്റ്റ് മാത്രമേ ഫൈനലൈസ് ചെയ്തിട്ടുള്ളു,,, ഇപ്പോഴും ഒഴിഞ്ഞു കിടക്കുന്നൊരു പോസ്റ്റുണ്ട്,, സാറിന്റെ പെണ്ണാകാനുള്ള സന്മനസ്സുള്ള കുറെ പേര് ഇവിടെയുണ്ട്,,, അവരെയൊക്കെ പരിചയപ്പെട്ടിട്ടു പോരെ ക്ലാസ് തുടങ്ങലൊക്കെ,, "

പിറകിൽ നിന്ന് സനയാണ് വിളിച്ചു പറഞ്ഞത്... അവളങ്ങനെയാ... നാവിനു ലൈസെൻസ് ഇല്ലാത്ത ടീമാ... അവളത് പറഞ്ഞു തീർന്നതും എല്ലാരും ആഷിയുടെ പ്രതികരണത്തിനായി എല്ലാരും കാതോർത്തു... കൂടെ ഞാനും...

"പഠിക്കാനാണോ കോളേജിലേക്ക് വരുന്നത്,, അതോ സ്വയം ചെക്കനെ കണ്ടു പിടിച്ചു ഭാവി കാര്യങ്ങൾ തീരുമാനിക്കാനോ ?? ഇതിൽ ആദ്യത്തെ കാര്യമാണെങ്കിൽ നിനക്കീ ക്ലാസ്സിൽ ഇരിക്കാം... അല്ലെങ്കിൽ പുറത്തേക്ക് പോകാം... "

"പുറത്താക്കാൻ ഇതെന്താ സാറെ സ്കൂളാണോ ??"

വീണ്ടും അവൾ ആഷിക്ക് നേരെ തിരിഞ്ഞു..

ഇത്തവണ അവന്റെ ദേഷ്യം കൂടിയിട്ടുണ്ട്...

"കോളേജിൽ നിന്നും പുറത്താക്കാനും പറ്റും മാഡം,, ഒരു വാക്ക് തർക്കത്തിന് ഞാൻ മുതിരുന്നില്ല... കുട്ടിക്ക് പഠിക്കാൻ താല്പര്യമുണ്ടെങ്കിൽ ഇരിക്കാം... അല്ലെങ്കിൽ പുറത്തേക്കിറങ്ങാം... "

അത്രയും പറഞ് ആഷി ബോയ്സിനെ നോക്കി കണ്ണിറുക്കി കാണിച്ചു ഒരു ചിരിയും പാസ്സാക്കി... അതോടെ ബോയ്സ് അവന്റെ കൂടെയായി...

"സാർ,,, ക്ലാസ് തുടങ്ങിയാട്ടേ,,, ഞങ്ങള് ചിലർ പഠിക്കാനായിട്ട് വരുന്നതാണെ,, "

ബോയ്‌സിൽ നിന്നൊരുത്തൻ എഴുന്നേറ്റ് നിന്ന് പറഞ്ഞപ്പോൾ എല്ലാരും ക്ലാപ് കൊണ്ട് അത് അംഗീകരിച്ചു...

എന്നെ നോക്കി ആക്കിയൊരു ചിരിയും ചിരിച്,, അവനവന്റെ ഡ്യൂട്ടി തുടങ്ങി... നന്നായിട്ടു തന്നെ അവനോരോ പാഠഭാഗങ്ങളും ഞങളിക്കെത്തിക്കുമ്പോ അതിയായ സന്തോഷം തോന്നിയെനിക്ക്..

ക്ലാസ് കഴിഞ്ഞു പോകാൻ നേരം അവനെന്നോട് പുറത്തേക്കിറങ്ങാൻ പറഞ്ഞു..

"ഡി,, ഞാനിന്നലെ ചുമ്മാ ഇന്റർവ്യൂന് വന്നതായിരുന്നു... താൽകാലിക ഒഴിവിലേക്ക്... തന്റെ നിർഭാഗ്യം കൊണ്ടാകണം വീണ്ടും എനിക്കിവിടേക്ക് വരാൻ പറ്റിയത്.. "

അതും പറഞ് അവൻ ഒന്ന് ചിരിച്ചു..

"അതല്ലേലും അങ്ങനെയാണല്ലോ,, കണ്ടകശനി കൊണ്ടേ പോകൂ എന്നല്ലേ,, "

"ഹേയ്,, ഞാൻ നിന്നെയും കൊണ്ടൊന്നും പോകില്ല,, എന്നിട്ട് വേണം എന്റെ ജീവിതം കൂടി ഇല്ലാതാകാൻ.... ,,, ഇനിയിന്ന് മുതൽ ഷഹന വീണ്ടും ആഷിയുടെ സംരക്ഷണത്തിൽ,,, അപ്പൊ നമുക്ക് വീണ്ടും തുടങ്ങാമല്ലേ,, മറ്റൊരു അങ്കം... "

അവൻ അതും പറഞ് നടന്നു നീങ്ങുന്നത് കണ്ടപ്പോ ഒരു നെടുവീർപ്പോടെ ഞാൻ തിരിച്ചു ക്ലാസ്സിലേക്ക് തന്നെ നടന്നു...

************************************

ഒരു മാസത്തോളമായി ആഷി ക്ലാസ് എടുക്കാൻ തുടങ്ങിയിട്ട്... അവന്റെ മുന്നിൽ നല്ല പിള്ള ചമഞ്ഞു എനിക്ക് മടുത്തു പോയി..

അതിന്റെയൊക്കെ ദേഷ്യം ഞാൻ ബ്രേക്ക് ടൈമിൽ തീർക്കും... എന്തേലും കാരണമുണ്ടാക്കി അവനുമായി വഴക്കിടൽ എനിക്കൊരു ഹരമായിരുന്നു... അതിലെങ്കിലും കോളേജ് ലൈഫ് ബോറല്ല എന്ന് സ്വയം തെളിയിക്കുകയായിരുന്നു ഞാൻ..

അതിനിടെയാണ് രവി സാറിന്റെ ക്ലാസ്സിനിടക്ക് ആഷി വന്ന് എന്നെ വിളിക്കുന്നത്.. അവനോടൊപ്പം നടന്നു നീങ്ങുമ്പോഴും അവനൊന്നും പറഞ്ഞില്ല...

"ഡി കോപ്പേ,, നിന്റെ കയ്യിലെന്തിനാ മൊബൈൽ ഫോൺ,,, അതിലേക്ക് നിന്റെ ഉമ്മ എത്ര വട്ടം വിളിച്ചെന്നറിയുമോ നിനക്കു ??"

"ക്ലാസ്സിലിരിക്കുമ്പോ പിന്നെ മൊബൈൽ എടുക്കാൻ പറ്റുമോ സാറെ,, "

"താനെന്താ സാറെ എന്നൊക്കെ വിളിക്കുമ്പോ ഒരു ആക്കൽ ഫീലിങ്.. "

"ഹേയ് ഞാനാക്കിയിട്ടൊന്നുമില്ല സാറെ,,, അത് സാറിന് തോന്നുന്നതാ,,, അല്ലെങ്കിലും സാറിനെ ഞാനങ്ങനെ ആക്കുമോ സാറെ ??"

"നിർത്തടി നിന്റെയീ സാർ വിളി,, താനെന്നെ അങ്ങനെ വിളിക്കണ്ട.. "

കലിപ്പ് മോഡിൽ അതും പറഞ്ഞു നിർത്തി..

"ആഹ്,, എന്നാ വിളിക്കുന്നില്ല... അല്ല നീയിപ്പോ എന്തിനാ എന്നെ വിളിച്ചത്... കാര്യം പറയെടാ.. "

"ആഹ്,, അത്,,, നിന്റെ ഉമ്മാ വിളിച്ചിരുന്നു.. ഇന്നുച്ചയ്ക്ക് നീ വീട്ടിലേക്ക് ഒന്ന് ചെല്ലാൻ... ആരോ പെണ്ണ് കാണാൻ വരുന്നുണ്ടെന്ന് പറഞ്ഞു... പറ്റുമെങ്കിൽ നീ ഉമ്മനെയൊന്ന് വിളിച്ചു നോക്ക് "

അതും പറഞ് ആഷി അവന്റെ ഫോൺ എനിക്ക് നേരെ നീട്ടി... ഞാനത് വാങ്ങുമ്പോ അവന്റെ മുഖഭാവം ശ്രദ്ധിച്ചു...ഒരു മാറ്റവും ഇല്ല അവനിക്ക്... പക്ഷെ എനിക്കെന്തോ വല്ലാത്ത സങ്കടം തോന്നി...

കുറച്ചു മാറി നിന്ന് ഞാൻ അവന്റെ ഫോണിൽ നിന്ന് ഉമ്മയെ വിളിച്ചു സംസാരിച്ചു... ഫോൺ അവനിക്ക് തിരിച്ചു കൊടുക്കും മുന്നേ ഞാനതിൽ നിന്ന് അന്നെടുത്ത സെൽഫി തപ്പി പിടിച്ചു എന്റെ വാട്സാപ്പിലെക്ക് സെൻറ് ആക്കി...

ആ ഫോട്ടോയും പിടിച്ചു ഞാനവന്റെ മുന്നിലേക്ക് ചെന്നു...

"നീ ഈ ഫോട്ടോ എന്താ ഇതുവരെയായിട്ടും കളയാതിരുന്നത്,,, എന്നോടുള്ള സ്നേഹം കൊണ്ടാണോ.. ??"

ഉടനെ അവൻ എന്റെ കയ്യിൽ നിന്ന് ഫോൺ തട്ടി പറിച്ചു.. ദേഷ്യത്തോടെ എന്നെയൊന്ന് നോക്കി..

"ആഹ്,, അതേ,, എനിക്ക് നിന്നോട് ഭയങ്കര സ്നേഹമാ,, പക്ഷെ ഇന്നിപ്പോ നിന്നെ പെണ്ണ് കാണാൻ ഒരു കൂട്ടർ വരുന്നുണ്ടല്ലോ,,, അവർക്കിഷ്ടമായാൽ പിന്നെ ഞമ്മളെ ഇഷ്ടത്തിനൊന്നും യാതൊരു വിലയുമുണ്ടാകില്ലല്ലോ,, "

അവന്റെ ആ വാക്ക് കേട്ടപ്പോ എനിക്കെന്തെന്നില്ലാത്ത സന്തോഷം തോന്നി.. അപ്പോ എനിക്കവനോട് തോന്നിയ പോലെ അവനെന്നോടുമുണ്ടെങ്കിൽ ഇന്നത്തെ പെണ്ണ് കാണൽ എങ്ങനെയെങ്കിലും മുടക്കണം...

അവൻ പറഞ്ഞ വാക്കുകൾ കാതിൽ പതിഞ്ഞു കൊണ്ടേയിരുന്നു... തിരിച്ചവനോടൊന്നും പറയാൻ നിൽക്കാതെ ഞാൻ ക്ലാസ്സിലേക്ക് പോയി...

ഉച്ചയാകുമ്പോഴേക്കും വീട്ടിലെത്തി... ആഷിക്ക് വേണ്ടി,, ഞാൻ ഉടുത്തൊരുങ്ങാതെ തന്നെ വന്നവർക്ക് മുന്നിൽ നിന്നു കൊടുത്തു.. എന്റെ യഥാർത്ഥ മുഖം അവർക്ക് മുന്നിൽ ഒളിപ്പിച്ചു വെച്ചു..

കാണാൻ വന്ന ചെക്കനോട് ഞാൻ ആശിയോടുള്ള പ്രണയത്തെ കുറിച് സൂചിപ്പിച്ചു... അപ്പൊ തന്നെ അവന്റെ മുഖഭാവം മാറുന്നത് ഞാൻ കണ്ടു... വിവരം പറയാമെന്ന് പറഞ് കാണാൻ വന്നവർ സ്ഥലം കാലിയാക്കി...

ആ രാവ് എനിക്കുറങ്ങാനേ കഴിഞ്ഞില്ല... ആഷി മാത്രമായിരുന്നു മനസ്സ് മുഴുവൻ.. അവനോടൊപ്പം ചെലവഴിച്ച ഒരോ നിമിഷങ്ങളും ഞാൻ ഓർത്തെടുത്തു ആസ്വദിക്കുകയായിരുന്നു...

നേരമൊന്നു പുലരാൻ ഞാൻ കാത്തിരിക്കുകയായിരുന്നു... എന്റെ ആഷിക്കരികിലേക്ക് ഓടിയടുക്കാൻ... അവനോട് എന്റെ ഇഷ്ടം തുറന്ന് പറയാൻ....

ബ്രേക്ക് ടൈമാകുന്നത് വരെ ഞാൻ കാത്തിരുന്നു... ആഷിയോടൊന്ന് സംസാരിക്കാൻ... ഡിപ്പാർട്മെന്റിലേക്ക് പോയി ആഷിയോടൊന്ന് കൂടെ വരാൻ പറഞ്ഞപ്പോൾ ആദ്യം ഒഴിഞ്ഞു മാറിയെങ്കിലും പിന്നെയവൻ വന്നു...

"എന്താടി,, ഇങ്ങോട്ടേക്ക് വന്നത്... ??"

അവനെയും കൂട്ടി ഞാൻ ചെന്നത് കോളേജിന്റെ പിറകു വശത്തേക്കായിരുന്നു.. അധികമാരും ചെന്നെത്തിപ്പെടാത്ത സ്ഥലമായിരുന്നത്..

"ഹേയ് ഒന്നുല്ല ആഷി,, എനിക്കൊരു കാര്യം പറയാനുണ്ടായിരുന്നു,, അതാ ഞാൻ വിളിച്ചത് "

"എന്ത് കാര്യം... സാധാരണ എന്ത് പറയാനുണ്ടെങ്കിലും ഇങ്ങനെ വളച്ചു കെട്ടാറില്ലല്ലോ,, എന്താന്ന് വെച്ചാൽ വേഗം പറയെടി,, എനിക്ക് നെക്സ്റ്റ് പീരീഡ്‌ ക്ലാസ്സുള്ളതാ,, "

എന്താന്നറീല്ല,, എനിക്കൊന്നും പറയാൻ പറ്റാത്തൊരവസ്ഥ... ഇതുവരെ ഷഹന ഇങ്ങനെയല്ലായിരുന്നു... പക്ഷെ ഇപ്പോ എന്താ ഒന്നും പറ്റാത്തത്...

"അത് പിന്നെ,,, ആഷി,,,,,,  എനിക്ക്,,,,, ഞാൻ,,, "

അങ്ങനെയെന്തൊക്കെയോ പറഞ്ഞൊപ്പിച്ചതല്ലാതെ കാര്യം പറയാൻ പറ്റുന്നില്ലായിരുന്നു...

രണ്ടു കയ്യും കെട്ടി കോളേജ് കെട്ടിടത്തിന്റെ മതിലിനോട് ചാരി നിന്ന് അവനെന്റെ മുഖത്തേക്ക് ഉറ്റു നോക്കുകയാണ്...
ആ നോട്ടം പോലും എന്നെ വല്ലാതെ തളർത്തുന്നു..

"ആഷി,,, എനിക്ക് ഇഷ്ടമാണ്,, നിന്നെ... ഒരുപാട്... അതെന്തു കൊണ്ടാണ് എന്നെനിക്കറിയില്ല... നീ ഇന്നലെ പറഞ്ഞപ്പോ തൊട്ട് ഞാൻ മറ്റൊരു ലോകത്തായിരുന്നു... ഇന്നീ നിമിഷം വരെ നിന്നെയോർത്തിരിക്കുകയായിരുന്നു... "

ഞാനത് പറഞ്ഞു തീരലും അവനെനിക്കരികിലേക്ക് നടന്നടുത്തിരുന്നു..

"നീ പറഞ്ഞു വരുന്നത്,, എന്നോട് പ്രണയമാണെന്നാണോ ??"

"ഉം,, "

മൂളലിലൊതുക്കിയ എന്റെ ഉത്തരത്തെ അവൻ വരവേറ്റത് ഒരു തരം പൊട്ടിച്ചിരിയോടെയായിരുന്നു...

എന്താ സംഭവിക്കുന്നതെന്നറിയാതെ ഞാനാകെ തരിച്ചു നിൽക്കുകയാണ്... അവനവന്റെ ചിരി ഇതുവരെയും നിർത്തിയിട്ടില്ല...

"അപ്പൊ അതാണ് കാര്യം.. ഞാനിന്നലെ അങ്ങനെ പറഞ്ഞത് വെറും തമാശയ്ക്കാണ്.. പക്ഷെ അതുകൊണ്ട് തന്റെ ഉള്ളിലിരുപ്പ് മനസ്സിലാക്കാൻ പറ്റിയല്ലോ... താനെന്താ അന്നെന്നോട് പറഞ്ഞത് നിനക്ക് പ്രേമിക്കാൻ വേറെ ആളെ കിട്ടുമെന്ന്,, എന്നിട്ടെന്തെടി ഇപ്പോ ആരെയും കിട്ടതോണ്ടാണോ ആഷിയെ പ്രേമിക്കുന്നത്... ഞാനിന്നുവരെ തന്നെയങ്ങനെ കണ്ടിട്ടില്ല... ഷാഹി വിളിച്ചു പറഞ്ഞത് കൊണ്ട് മാത്രം നിന്റെ പിന്നാലെ നടന്നു എന്നേയുള്ളു

പിന്നെ വേറൊരു കാര്യം,,, ആഷി ഒന്ന് മനസ്സ് വെച്ചാൽ അടക്കവും ഒതുക്കവുമുള്ള നല്ല മൊഞ്ചത്തി കുട്ടിയോളെ കിട്ടും... അന്ന് നീ പറഞ്ഞ അതേ നാണയത്തിൽ നിനക്കൊരു തിരിച്ചടി,,, എനിക്കെന്താ വേറെ നല്ല പെണ്കുട്ടിയോളെ കിട്ടാഞ്ഞിട്ടാണോ ??? ഹി ഹി... "

അവന്റെ വാക്കുകളോരോന്നും എന്റെ ഹൃദയത്തെ കീറി മുറിക്കാൻ പാകത്തിലുള്ള കാരി മുള്ളായിരുന്നുവെന്ന് ഞാനറിഞ്ഞത് എന്റെ കണ്ണുനീരിലൂടെ ആയിരുന്നു.. അവന്റെ പരിഹാസചിരിയിൽ ഞാനുരുകി ഇല്ലാതാകുന്നത് പോലെ തോന്നിയെനിക്ക്...

എന്റെ മൗനം കണ്ടിട്ടാകണം അവൻ വീണ്ടും സംസാരിച്ചു തുടങ്ങിയത്..

"ആദ്യായിട്ടാണ് ഞാൻ ഉത്തരം മുട്ടി നിൽക്കുന്ന ഷഹനയെ കാണുന്നത്... അല്ലെങ്കിൽ ഞാനൊന്ന് പറയുമ്പോ അതിനിരട്ടി പറഞ്ഞു കൊണ്ട് എന്നെ തോൽപ്പിക്കുന്ന ഷഹന ഇന്നെന്റെ മുന്നിൽ ഒന്നും പറയാതെ നിൽകുമ്പോൾ ഞാനനുഭവിക്കുന്ന സന്തോഷമുണ്ടല്ലോ,,, അതെനിക്ക് പറഞ്ഞറിയിക്കാൻ വയ്യെടി വായാടി പെണ്ണെ.. "

മാനസികമായി തളർന്നിരിക്കുന്ന എന്നെ നോക്കി അവൻ പലതും പറഞ് ചിരിക്കുന്നുണ്ട്... മറുത്തൊന്നും പറയാനാകാതെ തികച്ചും നിസ്സഹായയായി ഷഹന മാറിയിരിക്കുന്നു...

അവനോട് തോന്നിയ പ്രണയത്തിന്റെ പേരിൽ ഇത്രയും നേരം ഞാനുഭവിച്ച വേദനകൾ വീണ്ടും വീണ്ടും എന്നെ ഞാനല്ലാതാക്കി മാറ്റുന്നു...

"അപ്പൊ ശരി ഷഹന,,, കാണാം... ആഹ് പിന്നേയ്,, ഓർമയുണ്ടല്ലോ നെക്സ്റ്റ് വീക്ക് ആണ് എന്റെ പെങ്ങളുടെ കല്യാണം..എന്തായാലും വരണം... നേരത്തെ തന്നെ.. . നീ അറിഞ്ഞു കാണുമെന്നെനിക്കറിയാം.. എന്നാലും എന്റെ ക്ഷണo,,, അതെന്റെ മര്യാദയാണല്ലോ... നാളെ മുതൽ നീ അടിച്ചു പൊളിച്ചോളു കോളേജ് ലൈഫൊക്കെ... ഞാനിനി കുറച്ചു ദിവസത്തേക്ക് ലീവാണ് ട്ടോ."

അതും പറഞ്ഞവൻ എന്നെയൊന്ന് തിരിഞ്ഞു നോക്കുക കൂടി ചെയ്യാതെ അവിടെ നിന്നും നടന്നകന്നു...

എന്റെ അനുവാദമില്ലാതെ മിഴിനീർ കണങ്ങൾ കവിളിലൂടെ നിറഞ്ഞൊഴുകുന്നത് കാണാൻ അവനില്ലാത്തതു നന്നായി... ആ പരിഹാസം കൂടി ഏറ്റുവാങ്ങാൻ ഇനിയിപ്പോ ഷഹനക്ക്  സാധിച്ചില്ലെങ്കിലോ...

തിരിച്ചു നടക്കുന്നതിനിടയിൽ അൻവറിനെ കണ്ടെങ്കിലും ഒന്നും മിണ്ടാൻ നിൽക്കാതെ ഞാൻ ക്ലാസ് റൂം ലക്ഷ്യമാക്കി നടന്നു... ബാഗുമെടുത്തു നേരെ വീട്ടിലേക്ക് വെച്ചു പിടിച്ചു...

തലവേദനയാണെന്ന് ഉമ്മയോട് കള്ളം പറഞ് ഞാൻ ബെഡിൽ കമിഴ്ന്ന് കിടന്ന് കരഞ്ഞു തീർത്തു... എന്നിട്ടും ഒട്ടും കുറഞ്ഞു പോയില്ല എന്നുള്ളിലെ സങ്കടങ്ങളും ആശിയോടുള്ള എന്റെ മുഹബ്ബത്തും...

ഷഹന
@@@@

Part 7
******

ഇന്ന് ക്ലാസ് കഴിഞ്ഞു ഷഹനയെ നോക്കിയപ്പോ എവിടെയും കണ്ടില്ല... സാധാരണ വൈകീട്ട് വീട്ടിലേക്ക് പോകുമ്പോ ഓളുടെ തൊള്ളയിലുള്ളതൊക്കെ കേട്ട് വയറു നിറഞ്ഞാലെ വീട്ടിലേക്ക് തിരിക്കാറുള്ളു...

ഇന്നവളെ കാണാഞ്ഞപ്പോ എനിക്ക് തോന്നി,, നേരത്തെ എനിക്ക് മുന്നിൽ തോറ്റത് കൊണ്ടാകും ഒന്നും പറയാതെ പോയി കളഞ്ഞത്.. എത്ര തോല്പിച്ചാലും തോറ്റു തരാത്ത പെണ്ണാ... ഇപ്പോ പിന്നെ ഇതെന്ത് പറ്റി...

ആലോചനകൾക്ക് വിരാമമിട്ട് വീട് ലക്ഷ്യമാക്കി കുതിച്ചു കൊണ്ടിരിക്കുമ്പോഴാണ് ഷാഹിയോട് ഈ കാര്യം പറയണമെന്ന് തോന്നിയത്... നിന്റെ പെങ്ങള് ഇന്നെന്റെ മുന്നിൽ മുട്ടു കുത്തിയതോർക്കുമ്പോ ചിരി വരുന്നുണ്ടെന്ന് പറയണം...

ഇനിയേതായാലും വീടെത്തിയിട്ട് അവനെ വിളിക്കാമെന്ന് കരുതി വീട്ടിലേക്ക് കയറി ചെല്ലുമ്പോ ഉപ്പ മുറ്റത്തു തന്നെ ഉണ്ടായിരുന്നു..

"ആഷി,,, നീയൊന്ന് വേഗം റെഡിയായി വാ... നമുക്ക് ഒന്ന് രണ്ട് സ്ഥലത്തു പോകാനുണ്ട്... "

പുഞ്ചിരി കൊണ്ട് ഉപ്പയുടെ വാക്കിന് മറുപടി നൽകി ഞാൻ പോയി ഫ്രഷ് ആയി തിരിച്ചു വന്നു.. ഉപ്പയും ഏട്ടനും ഇന്നലെ ലാൻഡ് ചെയ്തതാണ്... പെങ്ങളൂട്ടിയുടെ കല്യാണം പ്രാമാണിച്‌,,, അജ്‌വയെ കൂടാതെ വേറൊരു കുഞ്ഞനിയത്തി കൂടിയുണ്ട്.. ആലിയ,, അവളും വളർന്നു,, പത്താം ക്ലാസ്സിൽ പഠിക്കുന്ന കുഞ്ഞു മൊഞ്ചത്തി... ഏകദേശം ഷഹനയുടെ അതേ സ്വഭാവമാണ് അവൾക്കും...

ഉപ്പയെയും കൂട്ടി ആദ്യം ചെന്നത് ഉപ്പാന്റെ മൂത്ത പെങ്ങളുടെ വീട്ടിലാണ്... ഉപ്പയ്ക്ക് മൂന്നു പെങ്ങന്മാരാണ്... അതിൽ ഇളയ പെങ്ങളാണ് ഷഹനയുടെ ഉമ്മ.. അത് കൊണ്ടാകണം ഉപ്പ ഏറ്റവും അവസാനം അവളുടെ വീട്ടിലേക്ക് പോകാമെന്ന് പറഞ്ഞത്..

എല്ലാരേയും കല്യാണം ക്ഷണിച്ചു ഞങ്ങള് മടങ്ങി... ഇനി ഷഹനയുടെ വീട്ടിലേക്ക് ആണ് പോകേണ്ടത്... പള്ളിയിൽ നിന്ന് നിസ്കാരവും കഴിഞ് ഞാനും ഉപ്പയും അവളുടെ വീട്ടിലേക്ക് കയറി ചെന്നു.. ഷഹനയായിരിക്കും ഞങ്ങളെ വരവേൽക്കാനുണ്ടാവുക എന്നാണ് ഞാൻ കരുതിയത്... പക്ഷെ അവളുടെ പൊടി പോലും കണ്ടില്ല...

"എവിടെ എന്റെ ഷാന മോള്,,, അവളുടെ ഒച്ചയും ബഹളമൊന്നും കേൾക്കുന്നില്ലല്ലോ,,, സാധാരണ കാക്കു വന്നൂന്ന് അറിഞ്ഞാൽ ഓടി വരുന്ന പെണ്ണാ,, "

ഉപ്പ അവളുടെ ഉമ്മയോട് അവളെ കുറിച് ചോദിക്കുന്നത് കേട്ട് കൊണ്ട് ഞാനവിടെമാകെ കണ്ണോടിച്ചു.. ഈ വായാടി ഇതെവിടെ പോയി... ഉപ്പ പറഞ്ഞത് പോലെ ഉപ്പയെ ഭയങ്കര കാര്യമാണ് ഓൾക്ക്...

"ഓൾക് നല്ല തലവേദനയാണ് ഇക്കാ,,, ഇന്ന് നേരത്തെ ക്ലാസ് കഴിഞ്ഞു വന്നിരുന്നു... ഞാനിപ്പോ വിളിക്കാം.. "

അവളുടെ ഉമ്മയുടെ വാക്ക് കേട്ടപ്പോൾ എനിക്കെന്തോ പന്തികേട് തോന്നി..

മുറിയിൽ നിന്ന് പുറത്തേക്കിറങ്ങിയ ഷഹനയുടെ മുഖം കണ്ട് ഞാൻ ഞെട്ടി.. എങ്ങനെയാണോ അവളെ ഞാൻ കോളേജിൽ വെച് കാണാറുള്ളത്,, അത് പോലെ... തട്ടമൊക്കെ ചുറ്റി വെച് ആ മുഖം മാത്രം കാണുന്നു... പക്ഷെ ഇന്നാ മുഖത്തു പതിവ് തെളിച്ചം കാണാനുമില്ല...

"എന്താ മോളെയിത്,,, ഈ തട്ടമൊക്കെ ഒന്നഴിച്ചു മാറ്റി തലയെ ഒന്ന് ഫ്രീ ആക്കി വിട്,, എന്നാലല്ലേ ഇന്റെ കുട്ടിയുടെ തലവേദന മാറി കിട്ടുക,,"

അവളെ കണ്ടയുടൻ ഉപ്പ ചേർത്ത് പിടിച്ചിരുന്നു... ഉപ്പയ്ക്കിഷ്ടമാണ് ആ വായാടിയെ

ഞാൻ പറയാനിരുന്ന വാക്കുകൾ ഉപ്പ അവളോട് പറഞ്ഞപ്പോൾ അതിനൊരു മറുപടി നൽകിയത് അവളുടെ ഉമ്മയായിരുന്നു..

"ഓളെപ്പോഴും ഇങ്ങനെയാ കാക്കൂ,, വീട്ടിനുള്ളിൽ തന്നെ ഞങ്ങള് മാത്രമുണ്ടെങ്കിലേ ആ സാധനം തലയിൽ നിന്ന് മാറ്റു,, എന്തിനു,, ഒരു മുറ്റമടിച്ചു തൂകുന്നുണ്ടെങ്കിൽ തന്നെ   ആദ്യം തട്ടം കൊണ്ട് തല മൊത്തം പൊതിയണം,, എന്നാലേ ഓൾക്ക് സമാധാനം കിട്ടൂ.. " പരിഹാസത്തോടെയാണ് അവളുടെ ഉമ്മ പറഞ് നിർത്തിയത്..

അവളുടെ ആ ഒരു കാര്യത്തെ കുറിച്ചോർത്തു എനിക്കത്ഭുതം തോന്നി.. ഇന്നത്തെ കാലത്തു ഇങ്ങനെയും പെൺകുട്ടിയോളുണ്ടോ,,, എന്തൊക്കെയോ ഷഹനയിൽ ഒളിഞ്ഞു കിടക്കുന്നുണ്ട്... ഒരുപക്ഷെ ഷാഹി ഏറ്റവും കൂടുതൽ അവളെ കുറിച് ആധി കൊണ്ടത് അവളുടെയാ തട്ടത്തിൻ മറയത്തെ മൊഞ്ചിനെ കുറിച്ചോർത്തായിരിക്കണം... അപ്പോഴൊക്കെ ഞാനവനെ കളിയാക്കാറുണ്ട്... അതിനു മാത്രം എന്ത് തേങ്ങാക്കൊലയാ നിന്റെ പെങ്ങൾക്കുള്ളത് എന്ന് പറഞ്...

അന്നവൻ എനിക്ക് തന്ന മറുപടി " ആഷി,, ആരുമറിയാത്ത ഷഹനയാണ് വീട്ടിലുള്ളത്,, അവൾ ശരിക്കുമൊരു പാവമാ,,, ഈ മണ്ണിൽ എനിക്കെന്റെ പെങ്ങളെ അറിയുന്നിടത്തോളം മറ്റൊരാൾക്കും അറിയാൻ വഴിയില്ല...ഷഹനയോളം വരില്ല മറ്റൊരു പെണ്ണും "

അതെന്താ നീ അങ്ങനെ പറഞ്ഞത് എന്ന് ചോദിച്ചപ്പോൾ അവൻ ഒഴിഞ്ഞു മാറിയിരുന്നു..

ഇന്നിപ്പോ അവൾ കുടുംബക്കാരായ ഞങ്ങൾക്ക് മുന്നിൽ പോലും ഒരു മറ തീർക്കുന്നുണ്ടെങ്കിൽ ഒരു കാര്യം ഉറപ്പാണ്,, മറ്റാർക്കുമില്ലാത്ത എന്തോ ഒരു സ്പെഷ്യലിറ്റി അവൾക്കുണ്ടെന്നുള്ളത്...

"കാക്കു,, ഞാൻ കുടിക്കാൻ ചായ എടുക്കാം,, നിങ്ങളിവിടെ ഇരിക്ക്.. "

അതും പറഞ്ഞവൾ എന്നെയൊന്ന് നോക്കുക കൂടി ചെയ്യാതെ അടുക്കളയിലേക്ക് നടന്നു..
********************************-**
എന്തോ എനിക്കിപ്പോ ആഷിയുടെ മുന്നിൽ നില്ക്കാൻ തോന്നുന്നില്ല.. അവനോടുള്ള ഇഷ്ടം കൂടുന്നതല്ലാതെ കുറയുന്നില്ലല്ലോ..

ഇനിയും എന്റെ ഇഷ്ടം മനസ്സിൽ കൊണ്ടു നടന്നിട്ടെന്താ കാര്യം... വീണ്ടും വീണ്ടുമവന്റെ
മുന്നിൽ നാണം കെടാനാണോ... വേണ്ട,, എനിക്ക് തോന്നിയ ഇഷ്ടം അതവിടെ തന്നെ കിടക്കട്ടെ...

ഇനിയും ഷഹന ആഷിയുടെ മുന്നിൽ തല കുനിക്കില്ല... എനിക്കാ പഴയ ഷഹനയാകണം... ആകുമൊന്നറിയില്ല... എങ്കിലും ആയെ പറ്റൂ..

പരമാവധി അവനിൽ നിന്നകലം പാലിക്കണം..

*******************************

ഷഹനയെ കാണാതായപ്പോ ഞാൻ നേരെ അവളെയും തിരഞ്ഞു നടന്നു കിച്ചണിലേക്ക്..

മുഖം തിരിഞ്ഞു നിന്ന് ചായ ഉണ്ടാക്കുന്ന തിരക്കിലാണവൾ... എന്റെ ആഗമനം അവളറിഞ്ഞില്ലെന്ന് തോന്നുന്നു..

"എന്താ ഷഹന നിനക്ക് പറ്റിയത് ?? ക്ലാസ് കഴിഞ്ഞു പോകുമ്പോ നിനക്കൊന്ന് പറഞ്ഞൂടായിരുന്നോ ??"

പരിഭവത്തോടെയാണ് ചോദിച്ചതെങ്കിലും അവളെനിക്കൊരു മറുപടി തന്നില്ല... എന്തിനു അവളൊന്നു തിരിഞ്ഞു നോക്കുക കൂടി ചെയ്തില്ല...

"വീട്ടിൽ വരുന്ന അതിഥിയെ ഇങ്ങനെയാണോ സ്വീകരിക്കുക ?? വന്നപ്പോ തൊട്ട് ഞാൻ നിന്നെ ശ്രദ്ധിക്കുന്നുണ്ട്,, നീയൊന്ന് എന്നെ നോക്കുന്നു കൂടിയില്ലല്ലോ... "

അതിനും അവൾ മറുപടി നൽകാതായപ്പോ എനിക്കെന്റെ ദേഷ്യം നിയന്ത്രിക്കാൻ കഴിഞ്ഞില്ല..

"ഡി കോപ്പേ,,, തന്റെ നാവിറങ്ങി പോയോ ??"

അതേറ്റു... അവളൊന്ന് തിരിഞ്ഞു നോക്കി..

"ആഷിക്ക് ഇപ്പോ എന്താ വേണ്ടത്,, ഞാനൊരു പണി ചെയ്യുന്നത് കാണുന്നില്ലേ,,, അതിനിടയിലാണോ സംസാരിക്കേണ്ടത് ??"

എന്തോ അവളുടെ ആ വാക്കുകളിൽ എനിക്ക് തൃപ്തി തോന്നിയില്ല... ഇനിയൊരുപക്ഷേ രാവിലെ ഞാനങ്ങനെയൊക്കെ പറഞ്ഞതിനുള്ള പ്രതികാരം തീർക്കുന്നതാകുമോ..

"ഡി,, നീ നേരത്തെയുള്ള കാര്യം ആലോചിച്ചു കൂട്ടിയിട്ടാണോ തലവേദന വന്നത്... തന്റെ മുഖമൊക്കെ ആകെ വല്ലാണ്ടിരിക്കുന്നുണ്ടല്ലോ,, നിന്നെ പോലൊരു പെണ്ണ് അതൊന്നും ആലോജിക്കില്ലാന്ന് എനിക്കറിയാം.. എന്നാലും എന്തോ ഉണ്ട്.. "

"ഞാനൊന്നും ആലോചിച്ചിട്ടില്ല... തലവേദന എനിക്കിടയ്‌ക്കിടെ വരാറുള്ളതാ."

ആ വാക്കുകളിൽ ഞാൻ കണ്ടു ദുഃഖത്തിന്റെ നേരിയൊരു മുറിപ്പാട്...

നടന്നു ഞാൻ ഷഹനയ്ക്കരികിൽ ചെന്നു...

"ആ ടോപ്പിക്ക് ഇനി സംസാരിക്കേണ്ട,, നിനക്കത് ഇഷ്ടമാകുന്നില്ലെന്ന് എനിക്ക് മനസ്സിലായി... അല്ലെങ്കിലും ഇത് ഭയങ്കര ബോറിങ്ങായി പോയി അല്ലെടി.. "

ചായ ഗ്ലാസ്സുകളിലാക്കി ഒന്ന് എനിക്ക് നേരെ നീട്ടിക്കൊണ്ടവൾ മറുപടി തന്നു..

"അതെ,, ഇനിയീ ടോപ്പിക്ക് സംസാരിക്കണ്ട,, നിനക്കത് ബോറിങ്ങും എനിക്കത് വേദനയുമാണ് നൽകുന്നത്... അത് കൊണ്ട് ഇവിടെ വെച് നിർത്താം... "

അവളുടെ വാക്കുകൾ ഇടറുന്നത് ഞാനറിഞ്ഞു.. മിഴികൾ നിറഞ്ഞു കവിഞ്ഞപ്പോൾ എനിക്കെന്തോ വല്ലായ്മ തോന്നി..

"അതേയ് ആഷി,, എനിക്കൊരു റിക്വസ്റ്റ് കൂടിയുണ്ട്,,, ദയവു ചെയ്ത് ഞാൻ പറഞ്ഞ കാര്യം നീ ഷാഹിക്കയോട് പറയരുത്.. ,, ഇതിന്റെ പേരും പറഞ് ഷാഹിക്ക എന്നെ വല്ലതും പറഞ്ഞാൽ ഒരുപക്ഷെ എനിക്കത് താങ്ങാൻ പറ്റിയെന്ന് വരില്ല.. അത് കൊണ്ടാണ്... പ്ലീസ്.. "

അവളുടെ വാക്കുകൾ പലപ്പോഴും മുറിഞ്ഞു പോകുന്നത് ഞാനറിഞ്ഞു... ഇവളിതിത്രയും കാര്യമായിട്ടാണോ എടുത്തിരിക്കുന്നത്.... ഞാനൊരു തമാശയായിട്ടേ കണ്ടുള്ളൂ... എന്താ ഷഹനക്ക്  പെട്ടെന്നിങ്ങനെയൊരു മാറ്റം...

അവൾ ചായ ഉപ്പാക്ക് കൊടുക്കാൻ പോയപ്പോഴും ഞാൻ കിച്ചണിൽ തന്നെയായിരുന്നു.. ഷാഹിയോട് പറയാനിരുന്ന കാര്യമാണ്.. പക്ഷെ അവളുടെ ദയനീയതക്ക് മുന്നിൽ അത് മറച്ചു വെക്കേണ്ടി വരുമല്ലോ... ഇന്നും ഞാനവനോട് ഒന്നും പറയാതിരുന്നിട്ടില്ല... ആദ്യമായിട്ടാണ് ഇങ്ങനെയൊന്ന് മൂടി വെക്കാനൊരുങ്ങുന്നത്. ..

"ഹാലോ,,, ആഷി,, നീയിതേത് ലോകത്താ ?? കാക്കു,, നിന്നെയും കാത്തു മുറ്റത്തു നിൽകുവാ.. " 

ചിന്തയിൽ നിന്നുണർത്തിയത് ഷഹനയായിരുന്നു...

"ഷഹന,,, ഞാൻ,,, ഇതൊക്കെ തമാശയായിട്ടേ കണ്ടുള്ളൂ...... നീ... " പറഞ്ഞു പൂർത്തിയാക്കാൻ അവൾ വിട്ടില്ല

"ആഷി പ്ലീസ്,, ആ വിഷയം നമ്മള് വിട്ടതാണ്... അല്ലെങ്കിലും ആശിക്കെന്താ നല്ല അടക്കവും ഒതുക്കവുമുള്ള മൊഞ്ചത്തി കുട്ടിയോളെ കിട്ടാഞ്ഞിട്ടാണോ,,, ഞാനും ആഷിയും തമ്മിൽ ചേരില്ല.. അല്ലേടാ,,, നീ പറഞ്ഞത് പോലെ അതൊരു ബോറിങ്ങായിരിക്കും.. "

അത് പറഞ്ഞു തീരുമ്പോഴേക്കും അവളുടെ കണ്ണുകൾ നിറഞ്ഞൊഴുകിയിരുന്നു... അവളുടെ കണ്ണ് നിറഞ്ഞപ്പോളെന്താണ് എന്റെ ഖൽബൊന്നു പിടഞ്ഞത്...

"ഷഹന,,, "..  പെട്ടെന്നവൾ അങ്ങനെയൊക്കെ പറഞ്ഞത് കേട്ടപ്പോൾ എന്റെ  വിളി ഒരൽപം ഉറക്കെയായി പോയി...

പക്ഷെ,, അവളത് കേൾക്കാൻ നിൽക്കാതെ നടന്നകന്നപ്പോൾ എന്റെ മനസ്സ് എന്തിനെന്നറിയാതെ വേദനിച്ചിരുന്നു എന്നുള്ളത് ഞാൻ മാത്രം അറിഞ്ഞൊരു സത്യമാണ്...

***********************************
ആഷിയോടെനിക്ക് ദേഷ്യമൊന്നുമില്ല... കാരണം അവനൊരിക്കലും  എന്നെ ആകർഷിപ്പിക്കാൻ വേണ്ടി ഒന്നും തന്നെ ചെയ്തില്ല.... പെങ്ങളെന്ന് വിളിച്ചു സംരക്ഷണം തരാൻ മാത്രമല്ലെ അവൻ മുതിർന്നുള്ളു... പക്ഷെ തെറ്റിദ്ധരിച്ചത് ഞാനാണ്... ആ തെറ്റ് തിരുത്തി എനിക്കിനി പഴയ ഷഹനയാകണം...

പറ്റുമോ എനിക്കിനി അങ്ങനെയാകാൻ ??,,  മനസ്സിൽ ആദ്യമായി മൊട്ടിട്ട പ്രണയം,,, അത് വേരോടെ പിഴുതെറിയാൻ ഷഹനയ്ക്ക്  പറ്റണമെങ്കിൽ ഇനി ആഷിയുമായിട്ടുള്ള കൂടിക്കാഴ്ചകൾ പരമാവധി കുറക്കണം... അവനോടുള്ള സംസാരവും...

ഇനിയുമവന്റെ മുന്നിൽ ചെന്ന് തോൽക്കാൻ ഷഹന ആഗ്രഹിക്കുന്നില്ല... നാളെ മുതൽ ഷഹന മാറുന്നു,,, അല്ല മാറാൻ ശ്രമിക്കുന്നു... ആ പഴയ ഷഹനയിലേക്ക്..

*********************************

വീട്ടിലെത്തിയതും ബെഡിലേക്ക് വീണ് ആലോചനകൾക്ക് വഴി തുറന്ന് വിട്ടതും ഒന്നും ഞാനറിഞ്ഞിരുന്നില്ല... എല്ലാം യന്ത്രികമായിട്ടായിരുന്നു... എന്താണ് എനിക്ക് സംഭവിച്ചത് ??അവളെ ഞാനൊരിക്കലും ആ രീതിയിൽ കണ്ടിട്ടില്ല,,, പെങ്ങളുടെ സ്ഥാനം നൽകിയതല്ലാതെ എന്റെ പെണ്ണായിട്ട് ഞാൻ മനസ്സിൽ പ്രതിഷ്ഠിച്ചിട്ടില്ല... എന്നിട്ടുമെന്തേ അവളുടെ കണ്ണ് നിറഞ്ഞപ്പോൾ എന്റെ ഖൽബൊന്നു പിടഞ്ഞത് ??..

ഇനിയെനിക്കുമവളോട് എന്തെങ്കിലും,,,,,,

ഹേയ്,,, അങ്ങനെയൊന്നുമില്ല... പിന്നെന്താണ് എനിക്ക് സംഭവിച്ചത് ?? ആ ചോദ്യത്തിന് മാത്രം എനിക്കുത്തരം കിട്ടുന്നില്ലല്ലോ... എനിക്ക് എന്നെ തന്നെ മനസ്സിലാക്കാൻ പറ്റുന്നില്ലെങ്കിൽ പിന്നെ എന്താ ചെയ്യാ ???

ആലോചനകൾക്ക് വിരാമമിട്ട് ഞാൻ ഷഹനയെ ഒന്ന് വിളിച്ചു നോക്കിയെങ്കിലും അവൾ കോൾ അറ്റൻഡ് ചെയ്തില്ല... അതെനിക്ക് വല്ലാത്തൊരു ഫീലിങ്ങായി മാറിയോ ??

എന്നെ മനസ്സിലാക്കാൻ നിനക്ക് പറ്റില്ലെടാ ഷാഹി ?? അതെ അവനു പറ്റും,,, എന്റെ പ്രിയ കൂട്ടുകാരന്,,,.. പക്ഷെ,,, അവനോട് ഈ കാര്യം മറച്ചു വെക്കണമെന്ന ഷഹനയുടെ വാക്കിന് മുന്നിൽ ഞാൻ സമ്മതം നൽകിയിട്ടുണ്ടെങ്കിൽ അതിനർത്ഥം എന്താ,,, എന്റെ ഷാഹിയേക്കാൾ ഞാനിപ്പോ ഷഹനയ്ക്ക് സ്ഥാനം കൊടുക്കുണ്ടെന്നല്ലേ...

ഒന്നും മനസ്സിലാകാതെ ഭ്രാന്തമായൊരവസ്ഥയിലായിരുന്നു ഞാൻ... മറുത്തൊന്നും ചിന്തിക്കാതെ ഞാൻ ഷാഹിയെ വിളിച്ചു...

തിരിച്ചിങ്ങോട്ടൊന്നും അവനെ പറയാൻ സമ്മതിക്കാതെ ഞാൻ പറഞ്ഞു തുടങ്ങുകയായിരുന്നു..

"ഡാ  ഷാഹി,,, നിനക്കൊന്ന് നാട്ടിലേക്ക് വരാൻ പറ്റുമോടാ ?? ഒരു പത്തു ദിവസത്തെ ലീവിനെങ്കിലും,,, ഒന്നുമില്ലെങ്കിലും എന്റെ പെങ്ങളുടെ കല്യാണം കൂടാനെങ്കിലും... "

"ഇല്ലടാ,,, ആഷി,,, ഇപ്പോ എനിക്ക് വരാൻ പറ്റില്ലടാ,, എന്താന്ന് വെച്ചാൽ ഉപ്പ നാളെ നാട്ടിലേക്ക് തിരിക്കയാ,,, അപ്പോ ഇവിടെ ആളുണ്ടാകില്ലടാ,,, ഉപ്പയ്ക്ക് പകരം വരാൻ വിചാരിച്ചാൽ അതും നടക്കില്ല,,, കാരണം  ഉപ്പയ്ക്കാണെങ്കിൽ നാട്ടിൽ വന്നിട്ട് രണ്ട് കാര്യങ്ങൾ ചെയ്യാനുണ്ട്.. "

"അതെന്താടാ ഉപ്പയ്ക്ക് നാട്ടിൽ വന്നിട്ട് ഇത്ര അത്യാവശ്യം ??"

"ഒന്ന് നിന്റെ പെങ്ങളുടെ കല്യാണത്തിന് കൂടുക എന്നുള്ളത് തന്നെ... കുറേയായല്ലോ ഉപ്പ കുടുംബത്തിലുള്ള കല്യാണമൊക്കെ ഒന്ന് കൂടിയിട്ട്... പിന്നെ മറ്റൊന്ന്,,,,

   എന്റെ ഷാനയുടെ കല്യാണം... ഒരു ആലോചന ഏകദേശം ശരിയായിട്ടുണ്ട്... ഉപ്പ നാട്ടിൽ വന്നിട്ട് വേണം ഒരു ശരിയായ തീരുമാനത്തിലെത്താൻ... "

അവസാനം പറഞ്ഞ ആ വാക്കുകൾ എന്റെ കാതുകളിൽ വന്ന് പതിഞ്ഞപ്പോൾ എന്റെ കയ്യിലുണ്ടായിരുന്ന ഫോൺ ഊർന്നു വീണു നിലം പതിഞ്ഞത് ഞാനറിഞ്ഞിരുന്നില്ല...

(തുടരും )

ഷഹന
@@@@

Part 8
********

ഏറെ നേരം കഴിഞ്ഞാണ് ഞാൻ സ്വബോധത്തിലേക്ക് തിരിച്ചു വന്നത്... വീണു കിടക്കുന്ന ഫോണെടുത്തു ഞാൻ സെറ്റ് ചെയ്തു വെച്ചു... ഉടനെ ഷാഹിക്ക് ഒരു മെസ്സേജും വിട്ടു..

ഞാൻ നിന്നെ പിന്നെ വിളിക്കാം... അത് മാത്രം ടൈപ്പ് ചെയ്യാനേ എനിക്ക് സാധിച്ചുള്ളൂ... അത്ര മാത്രം ഞാൻ തളർന്നിട്ടുണ്ടെങ്കിൽ അതിന്റെയൊക്കെ അർത്ഥം ഉള്ളിലെവിടെയോ എനിക്കവളോടും സ്നേഹമുണ്ടെന്നല്ലേ,,, പക്ഷെ,, അതവളോടുള്ള പ്രണയമാണെന്ന് തീർത്തു പറയാനും വയ്യ...

അതെ,, എനിക്ക് തന്നെ എന്നെ കുറച്ചൊക്കെ മനസ്സിലായി തുടങ്ങിയിരിക്കുന്നു.. മുഴുവനായും മനസ്സിലാകണമെങ്കിൽ ഷഹനയോടൊന്നു നേരിൽ സംസാരിക്കണം... അതിനുള്ള വഴിയാണ് ഇനി ആലോചിക്കേണ്ടത്...

രാവേറെ ചെന്നിട്ടും നിദ്രയെന്നെ പുൽകാൻ വിമുഖത കാട്ടിയപ്പോൾ  മുന്നിൽ തെളിഞ്ഞു നിന്നത് അവളുടെ മുഖമാണ്,,, കരഞ്ഞു കൊണ്ടവൾ പറഞ്ഞു നിർത്തിയ വാക്കുകളിലാണ് എന്റെ കാതുകൾ ശ്രദ്ധ പതിപ്പിക്കുന്നത്...

നേരം പുലരുമ്പോൾ അവളെന്റെ കണ്മുന്നിൽ കാണാമെന്ന പ്രതീക്ഷയോടെ ഞാൻ ഉറക്കെന്ന അനുഗ്രഹത്തെ കൂട്ടു പിടിച്ചു

*****************************************

പിറ്റേന്ന് പതിവ് പോലെ ഞാൻ കോളേജും ലക്ഷ്യമാക്കി പോകാനൊരുങ്ങുമ്പോഴാണ് ഉപ്പയുടെ പിൻവിളി കേട്ടത്...

"ഡാ ആഷി,,, നീ ഇതെങ്ങോട്ടാ ?? നമുക്ക് ഇന്ന് അത്യാവിശ്യമായിട്ട് ഒരിടം വരെ പോകാനുണ്ട്... നീ ബൈക്ക് അവിടെ വെച് കാർ എടുക്ക്... ഒരുപാട് ദൂരം ഓടാനുള്ളതാ... "

"ഉപ്പാ,, ഞാനൊന്നു കോളേജ് വരെ പോയിട്ട് പെട്ടെന്ന് വരാം... എനിക്കത്യാവശ്യമായിട്ട് ഒരാളെ കാണാനുണ്ട്.. "

"നീയല്ലേ ഒരാഴ്ചത്തേക്ക് ലീവെടുത്തത്,, എന്നിട്ടിപ്പോ ഇന്നെന്താ ഇത്ര വലിയ അത്യാവശ്യം നിനക്ക്.. ഇവിടെ കല്യാണം അടുക്കാറായി,,, അപ്പോഴാ അവന്റെ ഒരു കോളേജ് സർക്കീട്ട്.. "

"ഉപ്പാ,,, പ്ലീസ്,,, ഞാൻ പെട്ടെന്ന് വരാം... അതുകഴിഞ്ഞു നമുക്കെവിടെ വേണേലും പോകാം... "

ഉപ്പയുടെ എതിർപ്പിനെ വക വെക്കാതെ ഞാൻ ബൈക്കുമെടുത്തു വിട്ടു... ഷഹനയെ ഒന്ന് കണ്ടു സംസാരിക്കണമെന്ന ഒരൊറ്റ ലക്ഷ്യം മാത്രമായിരുന്നു മനസ്സിൽ..

ഏറെ നേരം കാത്തിരുന്നിട്ടും അവളെ മാത്രം കണ്ടില്ല... ക്ലാസ് തുടങ്ങാനാവുകയും ചെയ്തു.. ലീവ് പറഞ്ഞത് കൊണ്ട് കോളേജിലേക്ക് കയറി ചെല്ലാനും മടി തോന്നി.. അപ്പോഴാണ് സഹല നടന്നു വരുന്നത് കണ്ടത്... അവളെന്നെ ലക്ഷ്യമാക്കി നടന്നു വരുന്നത് കണ്ടപ്പോ എനിക്കൊരല്പം ആശ്വാസം തോന്നി..

"സാർ ഇനി ഒരാഴ്ചത്തേക്ക് ലീവാണെന്നും പറഞ് ഞങ്ങളെയൊക്കെ കൊതിപ്പിച്ചിട്ട് ഇന്ന് തന്നെ വന്നല്ലോ.. ഇത് വല്ലാത്ത ചതിയായിപോയി സാർ,, "

ഷഹനയുടെയല്ലേ ഫ്രണ്ട്,, ഇതും പറയും ഇതിനപ്പുറവും പറയും..

"ഞാൻ ലീവ് തന്നെയാടോ,,, എനിക്കൊന്നു ഷഹനയെ കാണണമെന്നുണ്ട്,, അതിനാണിന്നു വന്നത്,,, പക്ഷെ അവളെ ഇതുവരെയായിട്ടും കണ്ടില്ല... "

"അവൾ ഇന്ന് ലീവാണല്ലോ... "

"അതെന്തിനാ അവൾക്കിന്ന് ലീവ് ??"

ദേഷ്യത്തോടെയായിരുന്നു ഞാൻ അത് ചോദിച്ചത്..

"ഇന്നവളുടെ ഉപ്പ നാട്ടിലേക്ക് വരുന്നുണ്ടെന്ന് പറഞ്ഞു... അത് കൊണ്ടാണെന്ന് തോന്നുന്നു.. "

"അവളുടെ ഉപ്പ വരുന്നതിനു അവൾക്ക് ലീവെടുക്കേണ്ട കാര്യമൊന്നുമില്ലല്ലോ.. "

"അതിനു സാർ എന്തിനാ എന്നോടിങ്ങനെ ചൂടാകുന്നത്... വെറുതെയല്ല ഷഹന ഇങ്ങളെ ചൂടൻ എന്ന് വിളിക്കുന്നത്.. "

"നീ പോടീ,,, ഇതിന്റെയൊക്കെ കണക്ക് ഞാൻ ക്ലാസ്സിൽ വന്നാൽ തീർത്തോളം.. "

ഷഹനയെ കാണാൻ പറ്റാത്ത ദേഷ്യം മുഴുവൻ സഹലയോട് തീർത്തൂന്ന് പറഞ്ഞാൽ മതിയല്ലോ... അവൾ പറയുന്നതൊന്നും കേൾക്കാൻ നിൽക്കാതെ വേഗം വീട്ടിലേക്ക് തിരിച്ചു...

**********************************
സന്ധ്യയോടടുത്തപ്പോഴായിരുന്നു ഞാനും ഉപ്പയും വീട്ടിലേക്ക് മടങ്ങിയെത്തിയത്... കുറച്ചകലെയുള്ള ഉപ്പയുടെ സുഹൃത്തിന്റെ വീട്ടിൽ കല്യാണം ക്ഷണിക്കാൻ പോയതായിരുന്നു ഞങ്ങളിരുവരും...

ഉപ്പ അവരോട് സംസാരിക്കുമ്പോഴൊക്കെ ഞാൻ ഷഹനയെ വിളിക്കുന്നുണ്ട്... ഒന്ന് രണ്ട് വട്ടം അവൾ ബിസി ആക്കി കളഞ്ഞു... പിന്നെ വിളിച്ചപ്പോൾ സ്വിച് ഓഫും...

കുളിച്ചു മാറ്റി ഒന്ന് ഫ്രഷായി ഞാൻ കിടന്നതേയുള്ളു... ഫുഡൊന്നും കഴിക്കാനുള്ള ടൈമായില്ല... യാത്രയുടെ ക്ഷീണം കൊണ്ടാകണം കണ്ണുകൾ താനെ അടഞ്ഞത്...

"ഹാലോ,, ചൂടൻ മാഷേ,,, നിങ്ങൾക്ക് രണ്ടു മൂന്നു വിസിറ്റേഴ്സ് ഉണ്ട്... "

കണ്ണ് തുറന്നു നോക്കിയപ്പോൾ അനിയത്തിയാണ്,,, ആലിയ..

"വിസിറ്റേഴ്‌സോ,, എനിക്കോ ?? "

"അല്ല എനിക്ക്,,, ഒന്ന് പോയി നോക്കെന്റെ ഇക്കൂസേ,,, ഏതോ സ്റ്റുഡന്റിന്റെ പേരന്റ്സ് ആണെന്ന് തോന്നുന്നു.. "

"നീ ഇതെന്തൊക്കെയാ മോളെ പറയുന്നത്,,, വീട്ടിലേക്ക് വരാൻ മാത്രമുള്ള പേരെന്റ്സ് ആരാ ?? "

"ചെലപ്പോ ഇങ്ങളെ മൊഞ്ചു കണ്ടിട്ട് പെണ്ണ് കെട്ടിക്കാൻ  അന്വേഷിച്ചു വന്നതായിരിക്കും... ഹി ഹി "....

അവളെന്നെ നോക്കി ഒന്ന് ചിരിച്ചിട്ട് പോയി...

ആരാണെന്നറിയാനുള്ള ആകാംക്ഷയിൽ ഞാൻ താഴേക്കിറങ്ങി...
അപ്രതീക്ഷിതമായി ഉപ്പയോട് സംസാരിക്കുന്ന ഷഹനയുടെ ഉപ്പയെ കണ്ടപ്പോൾ എന്തെന്നില്ലാത്ത സന്തോഷം തോന്നിയെനിക്ക്... കല്യാണ വീടായത് കൊണ്ട് അവരെല്ലാരും ഇങ്ങോട്ട് വന്നിട്ടുണ്ടെന്ന് ഉപ്പയുടെ സംസാരത്തിൽ നിന്നെനിക്ക് മനസ്സിലായി... ഇനിയേതായാലൂം ഷഹനോയോട് ഇവിടെ വെച് സംസാരിക്കലോ...

അവളുടെ ഉപ്പ എനിക്ക് മുന്നിൽ വന്ന് പലതും പറയുന്നുണ്ട്... അവളെ സംരക്ഷിക്കാൻ നീ ഉണ്ടായതായിരുന്നു എന്റെ ആകെയുള്ള സമാധാനം എന്നൊക്കെ... പക്ഷെ ആ വാക്കുകൾ കേട്ട് എനിക്കെന്തോ വല്ലായ്മ തോന്നി...

സംരക്ഷിക്കാൻ ഏല്പിച്ചിട്ട് ഒടുവിൽ ആ ഞാൻ തന്നെ അവളെ ചതിച്ചൂന്നെങ്ങാനും തോന്നുമോ അവളുടെ ഉപ്പയ്ക്ക്... അറിയില്ല,, മനസ്സിനെന്തോ ഇപ്പോ അവളോടൊരു ഇഷ്ടമൊക്കെ തോന്നി തുടങ്ങിയിട്ടുണ്ട്... അവളെ കാണാനുള്ള വ്യഗ്രതയിൽ ഞാൻ ചുറ്റുമൊന്ന് കണ്ണോടിച്ചു...

താഴത്തെ മുറിയിൽ ഇരുന്ന് ഒരു പെൺപടയുടെ സംസാരം കേൾക്കുന്നുണ്ട്... പതിയെ അത് വഴി ഒന്ന് പോകുന്നത് പോലെ അഭിനയിച്ചു... അത് ഞമ്മളെ അജ്‌വ കണ്ടുപിടിച്ചു...

"ഡി,, ഷഹന,,, അതാ നിന്റെ ചൂടൻ സാർ പോകുന്നു.... "

അജ്‌വയുടെ സംസാരം കേട്ടപ്പോ ഞാനതിനുള്ളിലേക്ക് കയറി... എന്റെ രണ്ട് പെങ്ങന്മാരും ഷഹനയും ഷംനയുമാണവിടെയുള്ളത്... സാധാരണ എന്നെ കണ്ടാൽ വഴക്കിടാൻ വരുന്ന ഷഹന ഇന്നൊന്നും മിണ്ടാതിരിക്കുന്നത് കണ്ടപ്പോൾ എന്റെ നെഞ്ചോന്നു പിടഞ്ഞു...

അവളിലേക്കുള്ള എന്റെ നോട്ടം ഞാൻ പിൻവലിച്ചു പോകാനൊരുങ്ങുമ്പോഴാണ് ഷംനയുടെ ചോദ്യം കേട്ടത്..

"എന്താ ആഷിക്കാ,,, ഒന്നും മിണ്ടാതെ പോകുന്നത് ?? സാധാരണ ഇങ്ങള് രണ്ടാളും കണ്ണിനു നേരെ കണ്ടാല് ഒരു യുദ്ധത്തിനുള്ള പ്രതീതി ഉണ്ടാകുമല്ലോ... എന്നിട്ടിപ്പോ എന്തെ രണ്ടാളും ഒന്നും മിണ്ടാത്തത്... രണ്ടും വഴക്കിട്ട് പിരിഞ്ഞോ. ???"

"ഹേയ്,, ഞാനാരോടും വഴക്കിട്ടില്ലടി,,, ഒരു കണക്കിന് അവളൊന്നും മിണ്ടാത്തതാ നല്ലത്... അത്ര ശല്യം സഹിക്കണ്ടല്ലോ... "

അവളുടെ പ്രതികരണമെന്തന്നറിയാനായിരുന്നു  ഞാനങ്ങനെ പറഞ്ഞത്... പക്ഷെ അവളത് കേട്ട ഭാവം പോലും കാണിക്കാതെ ആലിയയോട് കത്തിയടിക്കുകയാണ്... കോപ്പ്..

"എന്റെ ഷഹന,,, ഈ ഷംനായിത്തക്ക് ആഷിക്കയോട് തോന്നിയ പ്രണയം നിനക്കാണ് തോന്നിയതെങ്കിൽ ഞങ്ങളുടെ വീട് അടിപൊളിയായേനെ... ഇങ്ങളെ വഴക്ക് കേട്ട് ഞങ്ങള് ത്രില്ലടിച്ചു ജീവിക്കട്ടായിരുന്നു.. "

അജ്‌വ അത് പറഞ്ഞു കഴിഞ്ഞതും ഷഹനയൊന്ന് ഞെട്ടി... പക്ഷെ ഞമ്മള് ഞെട്ടിയില്ല... കാരണം ഞമ്മക്കിത് പുത്തരിയല്ലല്ലോ... ഓൾക്കെന്നോടുള്ള മുഹബ്ബത്ത് എനിക്ക് മാത്രല്ലേ അറിയൂ...

ഇത്തവണ ഷഹന ഒന്ന് പെട്ടു... ദയനീയമായിട്ട് എന്നെയൊന്ന് നോക്കുന്നത് കണ്ടപ്പോ എനിക്ക് ചിരിയാണ് വന്നത്... പറയല്ലേ എന്നവൾ കണ്ണ് കൊണ്ട് ഗോഷ്ടി കാണിച്ചപ്പോൾ ഞാൻ കാണാത്ത പോലെ കളിച്ചു..

"അല്ലെടി അജൂസേ,,, ഞാനെന്ത് തെറ്റാ നിന്നോട് ചെയ്തത്,, ?? ഇവളെ എന്റെ തലയിൽ കെട്ടി വെക്കാൻ നിനക്കെന്താടി ഇത്ര പൂതി,,, ഞമ്മള് സ്വസ്ഥായിട്ട് ജീവിക്കുന്നത് നിനക്ക് സഹിക്കുന്നില്ല അല്ലേ,, "

ഉള്ളിലുള്ള എന്റെ ഇഷ്ടം മറച്ചു വെച് ഞാൻ ഷഹനയുടെ മുഖത്തു നിന്ന് കണ്ണെടുക്കാതെ അത് ചോദിച്ചപ്പോൾ അവളെന്നെയൊന്നു രൂക്ഷമായി നോക്കിയതല്ലാതെ ആ പഴയ ഷഹനയായി മറുത്തൊരു ഡയലോഗ് അവൾ പറഞ്ഞില്ല...

"എന്റെ ഷാന മോള് ആരുടേയും സ്വസ്ഥതയും ഇനി കളയില്ല ട്ടോ,, അവൾക്ക് പറ്റിയൊരു മൊഞ്ചനെ ഞങ്ങള് കണ്ടു പിടിച്ചിട്ടുണ്ട്... "..  ഷംന അവളെ ചേർത്ത് പിടിച്ചു അത് പറയുമ്പോൾ എന്റെ ഷഹനയുടെ മുഖം മങ്ങുന്നത് ഞാൻ കണ്ടു....

ഞാനെന്ന മൊഞ്ചൻ പിന്നെയവിടെ പോസ്റ്റായിട്ട് നിൽക്കണോ എന്ന ചോദ്യം ഷംനയോട് ചോദിക്കാൻ തോന്നിയെങ്കിലും ഷഹനയുടെ ദയനീയത ഓർത്തു തൽക്കാലം അത് വിഴുങ്ങി.. .
*************************************

ഭക്ഷണമൊക്കെ കഴിഞ് ഞാൻ മുകളിലേക്ക് കയറി ചെല്ലുമ്പോ ഷഹന മാത്രം ബാൽക്കണിയിൽ നിൽക്കുന്നത് കണ്ട്‌ ഞാൻ  അങ്ങോട്ട് വെച്ചു പിടിച്ചു... അവൾ മൊബൈലിൽ കുത്തികളിക്കുന്നത് കണ്ടപ്പോ എന്റെ ദേഷ്യമങ് ഇരട്ടിച്ചു...

"ഞാൻ വിളിക്കുമ്പോ മാത്രമേ ഈ സാധനം സ്വിച്ച് ഓഫാവുകയുള്ളു,,, "

മറുപടിയൊന്നും നൽകാതെ എന്നെ രൂക്ഷമായിട്ടൊന്ന് നോക്കി...

"ഡി കോപ്പേ,, നിന്നോടാ ചോദിക്കുന്നത്,, നിനക്കെന്താ ഞാൻ വിളിച്ചാൽ ഫോൺ എടുത്താൽ ?? "

"എനിക്കൊന്നും സംസാരിക്കാനില്ല... അത് കൊണ്ട് എടുക്കാൻ തോന്നിയില്ല... അത്ര തന്നെ.. "

"ഓഹോ,,, അങ്ങനെയാണോ... എന്നാ നീ സംസാരിക്കണ്ട... എനിക്ക് സംസാരിക്കാനുള്ളത് കേട്ടാൽ മതി.. "

"എനിക്ക് കേൾക്കാനും താല്പര്യമില്ല "

പടച്ചോനെ ഇതൊരു വഴിക്ക് പോകൂല്ല,,, കരണകുറ്റി നോക്കി ഒന്ന് പൊട്ടിച്ചാലോന്ന് തോന്നിപോയി എനിക്ക്... അത്രയ്ക്ക് ജാടയുണ്ട് പെണ്ണിന്...

"ഡി,, നീ അധികം വിളയാടല്ലേ,,, എനിക്ക് കുറച്ചു സംസാരിക്കാനുണ്ട്,, അത് കഴിഞ്ഞിട്ട് ആവാം നമ്മുടെ വഴക്കും വക്കാണവുമൊക്കെ.. "

"നമ്മള് തമ്മിൽ കണ്ടാൽ വഴക്കിടണമെന്ന കോൺട്രാക്ടോന്നും ഞാനേറ്റെടുത്തിട്ടില്ല... തനിക്ക് പറയാനുള്ളത് എന്താന്ന് വെച്ചാൽ വേഗം പറഞ് തൊലക്ക്... എനിക്ക് പോകാനുള്ള സമയമായി.. "

അവളുടെ ഒരോ സംസാരത്തിനും ഒരോ അടി വീതം കൊടുത്താലോ,,, എന്നാലേ ഇതൊക്കെ നന്നാവൂ...

"അല്ല,,, ഇങ്ങള് രണ്ടാളും വീണ്ടും തുടങ്ങിയോ വഴക്ക്.. "

അതും പറഞ് കൊണ്ട് അവളുടെ ഉപ്പ ഞങ്ങൾക്കരികിലേക്ക് നടന്നടുത്തു...

"ഹേയ്,, വഴക്കൊന്നുമില്ല ഉപ്പ,,, ഞാനവളെ ഇന്ന് ക്ലാസ് കട്ടാക്കിയതിനു ചുമ്മാ ഒന്ന് വിരട്ടിയതാ.. "

മെല്ലെ അവിടെന്ന് സ്കൂട്ടാവാനാണ് ഞാനത് പറഞ്ഞത്... അത്ഭുതത്തോടെ അവളെന്നെ നോക്കുന്നത് ഞാൻ കണ്ട്‌... ഇവനിതൊന്നുമല്ലല്ലോ പറഞ്ഞത് എന്നായിരിക്കും അവൾ ചിന്തിച്ചിട്ടുണ്ടാവുക..

"ആഷി ഒരുപാട് സഹിച്ചല്ലേ,, എന്റെ വായാടിയെ കൊണ്ട്,,, എല്ലാത്തിനും നന്ദിയുണ്ട് ട്ടോ... "

അവളുടെ ഉപ്പയുടെ ആ വാക്കിന് മുന്നിൽ ഒരു പുഞ്ചിരി മാത്രം നൽകി...

ജീവിത കാലം മുഴുവൻ സഹിക്കാനുള്ള പെർമിഷൻ ഉപ്പ തരികയാണെങ്കിൽ ഈ പറഞ്ഞ നന്ദി ഞാനങ്ങോട്ട് തിരിച്ചു തരുമായിരുന്നു... ഇതിപ്പോ ഉപ്പയോട് പറയണമെങ്കിൽ ആദ്യം ആ കുരിപ്പിനോട്  പറയണ്ടേ,,, അവളാണെങ്കിൽ അതിനു നിന്ന് തരുന്നുമില്ല...

മനസ്സ് വഴി വിട്ട ചിന്തകളെ തേടിയലഞ്ഞപ്പോൾ മുന്നിലുണ്ടായിരുന്ന ഷഹനയും ഉപ്പയും അപ്രത്യക്ഷമായത് ഞാനറിഞ്ഞില്ല...

***********************************

പിന്നീടുള്ള ദിവസങ്ങളിലൊക്കെ എനിക്കവളെ ഒന്ന് വിളിക്കാനോ സംസാരിക്കാനോ നേരം കിട്ടിയതുമില്ല... വീടും വീട്ടുകാരുമൊക്കെ കല്യാണത്തിനുള്ള ഓട്ടപാച്ചിലിലായിരുന്നൂന്ന് വേണം പറയാൻ..

ഇനിയേതായാലും അവൾ കല്യാണത്തിന് വരുമെന്ന പ്രതീക്ഷയിൽ ഞാൻ നിന്നു... അപ്പോഴാണ് അജ്‌വ പറഞ്ഞത് കേട്ടത്... മെഹന്ദി ഇട്ടു തരാൻ ഷഹന വരുമെന്ന്...

വെള്ളിയാഴ്ചയുടെ അന്ന് ക്ലാസ് കഴിഞ് അവൾ നേരെ എന്റെ വീട്ടിലേക്കാണ് വന്നത്.. എന്നോട് മിണ്ടാൻ മാത്രം ഓൾക്ക് വയ്യ... ബാക്കിയുള്ളോരോടൊക്കെ അവൾ പഴയ ഷഹനയായിട്ട് തന്നെ പെരുമാറുന്നുണ്ട്...

അജ്‌വയുടെ കൈകളൊക്കെ മെഹന്ദി ഇട്ടു നിറഞ്ഞപ്പോൾ അവളുടെ ഡ്യൂട്ടി തീർന്നു... പോകാനൊരുങ്ങുമ്പോഴാണ് ആലിയ പിടിച്ചു കെട്ടിയത്...

"ഇത്താ,,, രാത്രിയിൽ ആരേലും ഇങ്ങളെ കൊണ്ടു വിടും,, അതുവരെ എനിക്ക് വെച്ചു തരണം.. "

അവളുടെ വാക്കിന് മുന്നിൽ ഷഹന സമ്മതം മൂളി... ഇനിയിപ്പോ അവളെ കൊണ്ടു വിടാനുള്ള ഡ്യൂട്ടി മിക്കവാറും എന്റെ തലയിലാകും... പക്ഷെ എനിക്കതിൽ സന്തോഷമേയുള്ളൂ... അവളെ അവിടെ വരെ ഒറ്റയ്ക്ക് കിട്ടുമല്ലോ സംസാരിക്കാൻ...

പ്രതീക്ഷിച്ചത് പോലെ ഉപ്പയെന്നെ വിളിച്ചു അവളെ കൊണ്ടു വിടാൻ പറഞ്ഞു...

ഇന്നത്തോടെ എന്റെ മനസ്സിലുള്ളത് അവൾക്ക് മുന്നിൽ സമർപ്പിക്കാമെന്ന എന്റെ പ്രതീക്ഷകളുമായി ഞാൻ വീടിനു വെളിയിലേക്കിറങ്ങി... ഉപ്പയും ഉമ്മയും അനിയത്തിമാരും ഇക്കയുമൊക്കെ അവളെ യാത്രയാക്കാൻ വീടിന്റെ മുൻവശത്തു നിൽക്കുന്നതും ഞാൻ കണ്ടു...

കാറിലേക്ക് കയറാൻ പോയ എന്നെ നോക്കി അവൾ പറഞ്ഞു..

"ആഷിയുടെ കൂടെയാണെങ്കിൽ ഞാൻ പോകില്ല കാക്കു,,, എന്നെ അജ്മൽക്ക കൊണ്ടു ചെന്നാക്കിയാൽ മതി... അല്ലെങ്കിൽ ഞാൻ ഉപ്പയെ വിളിച്ചോളാം... "

എന്റെ ഉപ്പയോടാണവൾ പറഞ്ഞു നിർത്തിയത്

എന്റെ പ്രതീക്ഷകളെ തകിടം മറിക്കുന്ന വാക്കുകൾ കൊണ്ട് അവളെന്നെ വരവേറ്റപ്പോൾ എനിക്കെന്റെ ദേഷ്യം നിയന്ത്രിക്കാൻ കഴിഞ്ഞില്ല... കാറിന്റെ ഡോർ ഞാൻ ശക്തിയായി വലിച്ചടച്ചു... അവിടെ നിന്ന് നടന്നു നീങ്ങി കയ്യിലുണ്ടായിരുന്ന കാറിന്റെ കീ അവളുടെ മുഖത്തേക്ക് വലിച്ചെറിഞ് ഞാൻ മറ്റുള്ളവർ പറയുന്നത് കേൾക്കാൻ നിൽക്കാതെ അകത്തേക്ക് കയറി പോയി....

തുടരും