ഷഹാന Last പാർട്ട്‌

❤ഷഹന❤
ഫുൾ പാർട്ട്‌
❤Previous part links ❤
👉1👈
https://sharechat.com/post/JM7z55/
👉2👈
https://sharechat.com/post/gBy16q/

Part 13
********
പക്ഷെ,,,,,

എന്റെ ഷഹന,,,, അവളുടെ ഉപ്പ മനസ്സറിഞ്ഞു എന്റെ കരങ്ങളിലേക്ക് ഏൽപ്പിക്കുമെന്ന് യാതൊരു ഉറപ്പുമില്ല... അല്ലാതെയവളെ എന്റെ ബീവിയാക്കാൻ ഞാൻ ആഗ്രഹിക്കുന്നുമില്ല...

"അപ്പൊ എന്തായി ആഷി,,, നിന്റെ തീരുമാനം ??അവളെ വിളിച്ചിറക്കി കൊണ്ടു വരുന്നോ ??അതോ വിശാല മനസ്കത കാട്ടി മറ്റൊരുത്തന് വിട്ടു കൊടുക്കുന്നോ ??"

ഒട്ടും പ്രതീക്ഷിക്കാതെയുള്ള എന്റെ ഉപ്പയുടെ ചോദ്യത്തിന് ഒരു മറുപടി പറയാനൊരുങ്ങും മുന്നേ ഉപ്പ എന്റരികിലേക്ക് നടന്നടുത്തു... എന്റെ കയ്യിൽ പിടിച്ചിട്ട് ഉപ്പ പറഞ്ഞു തുടങ്ങുകയായിരുന്നു..

"ചങ്കൂറ്റമുള്ളവനാണ് എന്റെ മോനെങ്കിൽ പോയി വിളിച്ചിറക്കി വാടാ അവളെ,,, എന്റെ ഈ കൈ കൊണ്ട് ഞാൻ നിക്കാഹ് ചെയ്യിപ്പിച്ചു തരും എന്റെ മരുമോളെ,, അതിനുള്ള എല്ലാ അവകാശവും എനിക്കുണ്ടെന്ന് കൂട്ടിക്കോളൂ...

അവളുടെ ഉപ്പ വന്ന് പറഞ്ഞിട്ട് പോയിരുന്നു,,, നിങ്ങളുടെ കാര്യം... ഞാനും അളിയനോടൊപ്പം ചേർന്ന് ഇതിനു എതിര് നിൽക്കുമെന്ന് കരുതിയാണ് മൂപ്പര് ഇവിടം വിട്ടത്... പക്ഷെ,,, എനിക്കെന്റെ മക്കളുടെ സന്തോഷത്തേക്കാൾ വലുതായിട്ട് മറ്റൊന്നും തന്നെയില്ല... "

ഉപ്പയുടെ വാക്കുകൾ കാതിനു കുളിർമയേകിയെങ്കിലും അത് അംഗീകരിക്കാൻ എനിക്ക് പറ്റില്ലായിരുന്നു...

"വേണ്ട ഉപ്പാ,,, അവളുടെ ഉപ്പ മനസ്സറിഞ്ഞു തരുമെന്നൊരു വിശ്വാസമുണ്ട് എനിക്ക്... അതിനുള്ള വഴിയും എന്റെ പക്കലുണ്ട്... ഇനി മനസ്സറിഞ്ഞു തന്നില്ലെങ്കിൽ നമുക്ക് ഇപ്പൊ ഉപ്പ പറഞ്ഞത് പോലെയങ് നടത്തി കളയാം.. "

"ബെസ്റ്റ് ഉപ്പ,,,, മോനോട് പറഞ്ഞു കൊടുക്കുന്ന ബുദ്ധി കണ്ടില്ലേ,,, ദേ ഉപ്പ നിങ്ങളിങ്ങനെ ലോലനാണെങ്കിൽ ഞാനും ഏതേലും ഒരുത്തനെ പ്രേമിച്ചിട്ട് അവനോടൊപ്പം പോകും ട്ടോ... "

ആലിയയുടെ വാക്ക് കേട്ട് ഞങ്ങളൊന്ന് ചിരിച്ചു...

"അങ്ങനെയെങ്കിലും നീ ഒരു ഉപകാരം ഞങ്ങൾക്ക് വേണ്ടി ചെയ്യടി കുഞ്ഞോളെ,,, "

അജ്മൽക്കാന്റെ വകയായിരുന്നു അവൾക്കുള്ള മറുപടി...

ആലിയ എന്റെ കയ്യും പിടിച്ചു മുകളിലേക്ക് കയറി പോയി....

"അതേയ്,,,, എനിക്കൊരു കാര്യം പറയാനുണ്ട്... "

അവളെന്നെ നോക്കി പറഞ്ഞു...

"എന്ത് കാര്യാമാടി നിനക്ക് പറയാനുള്ളത്.. ??"

"ഇക്കൂന്റെ കാര്യത്തിൽ ഇപ്പോ ഏകദേശം ഒരു തീരുമാനമായല്ലോ,,, അതൊക്കെ എന്റെ കട്ട സപ്പോർട്ടിങ് ഒന്ന് കൊണ്ട് മാത്രമാണ്... ഇനി എന്റെ കാര്യത്തിൽ ഒരു തീരുമാനം എടുക്കാനുണ്ട്... പക്ഷെ അതിനു ആശിക്കാന്റെ സഹായം കൂടിയേ തീരു... "

"നിന്റെ എന്ത് കാര്യം ??ഒന്ന് തെളിയിച്ചു പറയെടി... "

"എന്റെ കല്യാണ കാര്യം... "

"ഹാ ഹാ ഹാ.... എന്റെ കുഞ്ഞോളെ,,, നിനക്കിപ്പോ പതിനഞ്ചു വയസ്സല്ലേ ആയുള്ളൂ,, പതിനെട്ട് വയസ്സെങ്കിലും ആകാതെ മോളതിനെ കുറിച് ചിന്തിക്കേണ്ട ട്ടോ,,, ഇനി നീ ചിന്തിച്ചാലും ഞങ്ങളതിൽ ഒരു തീരുമാനം എടുക്കാൻ പോകുന്നില്ല... "

"ഉറപ്പാണോ,,, എങ്കിൽ ഷഹനയെ ഇങ്ങോട്ട് കയറ്റാൻ ഞാൻ വിടൂല... പിന്നേയ്,, വേറൊരു കാര്യം... എനിക്കൊരാളെ ഇഷ്ടമാണ്... അയാളെയല്ലാതെ ഞമ്മളെ ലെയ്‌ഫിൽ വേറൊരാളെ കൊണ്ടു വരാനും ഞമ്മള് സമ്മതിക്കില്ല... "

"അതാരാടി,,, ആ ഒരാൾ.... ??"

"അങ്ങനെ ചോദിക്ക്,,,  ആ ഒരാൾക്ക് വേണ്ടിയാണു ഞാൻ ഇങ്ങളെ കാല് പിടിക്കാൻ വന്നത്... ഇങ്ങള് വിചാരിച്ചാൽ എന്റെ കാര്യം ok ആക്കാൻ പറ്റും... ആഷിക്കാ ഇങ്ങള് എന്റെ ഒപ്പം നിൽകയാണെങ്കിൽ അവനു ഞമ്മളോട് പെരുത്തിഷ്ടം തോന്നാനും ചാൻസുണ്ട്... "

"ഡി കോപ്പേ,,, അവനാരാണെന്ന് പറയാതെ നിന്നോടാരെങ്കിലും ഇവിടെ നിന്ന് പ്രസംഗിക്കാൻ പറഞ്ഞിനോ ??"

"ആഹ്,, കലിപ്പ് തുടങ്ങിയല്ലോ.... വേറാരുമല്ല,,, ഇങ്ങളെ അളിയനാകാൻ പോകുന്നൊരാളില്ലെ,,, ഷാഹിക്ക,,, അവനെയെന്നെ ഞമ്മക്ക് പെരുത്തിഷ്ടം... "

"ഹാ ഹാ ഹാ,,,, നീയിന്ന് എന്നെ ചിരിപ്പിച്ചു കൊല്ലുമോടി,,, അവനൊഴികെ വേറെ ആരെ വേണേലും ഞാൻ നടത്തി തരും നിന്റെ നിക്കാഹ്... വേണേൽ ഇപ്പോ തന്നെ... പക്ഷെ അവനെ മാത്രം നിനക്ക് തരൂല... നിന്നെ കെട്ടി പണ്ടാരടങ്ങാനുള്ളതല്ല എന്റെ ഷാഹിയുടെ ജീവിതം... അവനു പറ്റിയ നല്ല പെൺകുട്ടിയോൾ വേറെ എവിടേലും കാണും.. "

"പോടാ ചൂടാ,,, ഇനി ഇങ്ങളെ സഹായം എനിക്ക് വേണ്ട,,, ഇനി ഞമ്മളെന്താ ചെയ്യാൻ പോകുന്നതെന്ന് കണ്ടോ,,, ഷഹനയെ നിങ്ങൾക്ക് കിട്ടാതിരിക്കാനുള്ള വഴിയൊക്കെ ഞമ്മക്കറിയാം... ഞാനിപ്പോ തന്നെ പോയി ഭണ്ഡാരത്തിൽ പൈസ ഇട്ടിട്ട് പ്രാർത്ഥിക്കും,,, ഷഹനയെ വേറെ ആരെങ്കിലും കെട്ടി കൊണ്ടു പോകണേ  എന്ന്,,, എന്നാലേ നിങ്ങളൊക്കെ ഒരു പാഠം പഠിക്കൂ.. "

"പടച്ചോനെ,,, നീ കരിനാക്ക് വളച്ചൊന്നും പ്രാർത്ഥിക്കല്ലേ,,, നോക്കട്ടെ അവനിക്ക് താല്പര്യമാണെങ്കിൽ നമുക്കിതൊന്ന് അന്വേഷിക്കാം... "

"അങ്ങനെ വഴിക്ക് വാ മോനെ,,, ഒരു പാലമിട്ടാൽ അങ്ങോട്ടും ഇങ്ങോട്ടും വേണമല്ലോ... ഇങ്ങള് കാലുമറിയാൽ ഞാനും കാലുമാറും... നോക്കിക്കോ... "

അവള് വല്ലാത്തൊരു ഭീഷണിയും മുഴക്കി എന്റെ റൂമിൽ നിന്നിറങ്ങി പോയി...

ഡോറടച്ചു ഞാൻ ജനാലയ്ക്കരികിൽ പോയി നിന്നു... നാളെ തന്നെ ഷഹനയുടെ ഉപ്പയെ കാണണം... ഒന്ന് സംസാരിക്കണം... ഉചിതമായൊരു തീരുമാനം എടുക്കാൻ ആ കൂടിക്കാഴ്ചയിലൂടെ സാധിപ്പിക്കണം...

ഡോർ തുറക്കുന്ന ശബ്ദം കേട്ടാണ്  ഞാൻ ചിന്തയിൽ നിന്നുണർന്നത്...
പിന്തിരിഞ്ഞു നോക്കിയ ഞാൻ കണ്ടത് എന്റെ ഷാഹിയെ ആയിരുന്നു... ഒരുപാട് നാളുകൾക്ക് ശേഷമാണു ഞങ്ങളുടെ ഈ കൂടിക്കാഴ്ച... അവനെ കണ്ട മാത്രയിൽ അവനിലേക്ക് ഞാനോടിയടുക്കും മുന്നേ അവനെന്റരികിലേക്ക് വന്നിരുന്നു... എന്റെ ഷർട്ടിന്റെ കോളറിൽ പിടിച്ചു വലിച്ചു കൊണ്ട് എന്നെ പിടിച്ചു കുലുക്കുകയായിരുന്നു...

"നിനക്ക് പ്രേമിക്കാൻ എന്റെ പെങ്ങളെ മാത്രേ കിട്ടിയുള്ളൂ ???പറയെടാ,,, "

ഓഹ്,, അപ്പോ അതാണ് കാര്യം... അവനും അറിഞ്ഞു...

"അങ്ങനെ ചോദിച്ചാൽ ഞാനെന്താ നിന്നോട് പറയാ,,, ഈ മണ്ണിലെനിക്കേറ്റവും അനുയോജ്യമായ പെണ്ണ് നിന്റെ പെങ്ങളാണെന്ന് തോന്നി... അപ്പൊ ഒന്ന് പ്രേമിച്ചു നോക്കിയതാ...  അവള് നിന്റെ പെങ്ങളായൊണ്ടോന്ന്  അറീല നല്ല രസമുണ്ടായിരുന്നു  ട്ടോ പ്രേമിക്കാൻ... "

അവന്റെ ചൂടൊന്ന് തണുപ്പിക്കാൻ വേണ്ടി ഞാൻ തമാശ രൂപത്തിൽ അവനോട് സംസാരിച്ചു തുടങ്ങി.. പക്ഷെ അവൻ തണുക്കാൻ ഉദ്ദേശിച്ചിട്ടില്ലായിരുന്നു...

"ഡാ,,, പന്ന പുന്നാര മോനെ,,, കൂടെ നിന്നിട്ട് ചതിക്കാൻ നിനക്കെങ്ങനെ കഴിഞ്ഞൂടാ ??"

"ഞാനാരെയും ചതിച്ചിട്ടില്ല,,, ഇനി നിനക്കെങ്ങനെ തോന്നിയെങ്കിൽ അതെന്റെ തെറ്റല്ല... "

"ചതിക്കാതെ പിന്നെ..  ഇത്രയൊക്കെ നിന്നെ സ്നേഹിച്ചിട്ട് നീ എന്നോട് കാട്ടിയത് എന്താ... എന്റെ പെങ്ങളെ സ്നേഹിച്ചത് ചതിയാണെന്ന് ഞാൻ പറയില്ല.. പക്ഷെ അതെന്നിൽ നിന്ന് മറച്ചു വെക്കാൻ തോന്നിയത് നീയും അവളും എന്നോട് ചെയ്ത ചതി തന്നെയാണ്.. എല്ലാ കാര്യവും നിന്നെ വിളിച്ചറിയിച്ചിരുന്ന എന്നോട് എന്തിനായിരുന്നെടാ ഈ ഒളിച്ചു കളി "

ദേഷ്യത്തിൽ പറഞ്ഞു തുടങ്ങിയ ഷാഹി പതിയെ പരിഭവങ്ങളിലേക്ക് വഴി മാറി പോകുന്നത് ഞാനറിഞ്ഞു... അവന്റെ പിടിത്തം അയഞ്ഞു... എന്നിൽ നിന്ന് അകലേക്ക് മാറി നിന്നു അവൻ...

"ഷാഹി,,, ഒന്നും മറച്ചു വെക്കാനൊന്നും ഞാൻ ഉദ്ദേശിച്ചിട്ടില്ലായിരുന്നു... നിന്നോട് അതിനെ കുറിച് സംസാരിക്കാൻ വിളിച്ചപ്പോഴൊക്കെ നിന്നെ കോൺടാക്ട് ചെയ്യാൻ പറ്റിയിട്ടില്ല... അതാണോ ഞാൻ നിന്നോട് ചെയ്ത ചതി... നിനക്കെങ്ങനെ തോന്നിയെങ്കിൽ ഞാൻ മാപ്പ് ചോദിക്കുന്നു..... ഇനി വെറും വാക്ക് കൊണ്ടുള്ള മാപ്പിൽ അത് ഒതുങ്ങുന്നില്ല എങ്കിൽ നീ പറയുന്നത് പോലെ ചെയ്യാൻ ഞാൻ ഒരുക്കമാണ്... അതിപ്പോ നിന്റെ പെങ്ങളെ മറക്കാനാണെങ്കിൽ പോലും ഞാനത് ചെയ്യും... എന്റെ ഷാഹിയുടെ സന്തോഷം ഏതാണോ,,, അതിനാണ് ആഷി മുൻ‌തൂക്കം കൊടുക്കുക.. "

അകന്നു പോയിരുന്ന അവൻ വീണ്ടും എന്റരികിലേക്ക് ഓടിയടുത്തു... വീണ്ടും ഷർട്ടിന്റെ കോളറിൽ പിടി മുറുക്കി...

"നീയെന്താ ഇപ്പോ പറഞ്ഞത് ??ഞാൻ പറഞ്ഞാൽ നീ എന്റെ ഷഹനയെ മറക്കുമെന്നോ,,, അപ്പോ അത്രേയുള്ളു നിനക്കവളോടുള്ള സ്നേഹം... "

"എന്റെ ഷാഹി,, നീ ഈ പിടിത്തം ഒന്ന് വിട്... ഞാനീ ഷർട്ടൊന്ന് മാറ്റി കോളോറില്ലാത്ത എന്തേലും എടുത്തിടാൻ നോക്കട്ടെ,,, അല്ലേൽ ഇന്ന് തന്നെ നീയെന്റെ മയ്യത്തെടുക്കും... എനിക്ക് കുറെ കാലം കൂടി ജീവിക്കണമെന്നുണ്ട്,,, എന്റെ ഷാഹിയുടെ കൂട്ടുകാരനായിട്ട്... "

അവനെന്നിൽ നിന്ന് കുറച്ചു മാറി നിന്നു...

"പറയെടാ,,, ഞാൻ ചോദിച്ചതിന് ഒരു സമാധാനം പറ.. "

അവന്റെ ചോദ്യത്തിനൊരുത്തരം,,, അതാണവന് ആവിശ്യം,,, പക്ഷെ ആ ഒരു ഉത്തരത്തിലാണ് ഇപ്പോ ആഷിയുടെ ജീവിതത്തിന്റെ വിധി നിർണയം...

"അവളോടുള്ള എന്റെ സ്നേഹത്തെ ഒരു അളവ് കോൽ വെച്ചു തിട്ടപ്പെടുത്തി വർണിക്കാൻ എനിക്കറിയില്ലടാ,, പക്ഷെ,, നീയുമായിട്ടുള്ള ആത്മബന്ധത്തിനു വിള്ളൽ വീഴാൻ ആ സ്നേഹമൊരു തടസ്സമാണെങ്കിൽ ആഷി അവളെ മറക്കാൻ തയ്യാറാണ്... എന്റെ കൂട്ടുകാരന് വേണ്ടി,,, "

അവനിൽ നിന്ന് മുഖം തിരിഞ്ഞാണ് ഞാനത്രയും പറഞ്ഞത്... ഞാൻ പറഞ്ഞ വാക്കുകൾ അവൻ വിശ്വസിക്കണമെങ്കിൽ എന്റെ സങ്കടം അവനിൽ നിന്ന് മറച്ചു വെച്ചേ പറ്റൂ...

"അതെന്താ നിനക്ക് എന്റെ മുഖത്തു നോക്കി പറഞ്ഞാൽ ??"

"എവിടെ നോക്കി പറഞ്ഞാലും നിനക്കൊരു ഉത്തരം കിട്ടിയാൽ പോരെ ഷാഹി... "

"എനിക്കൊരുത്തരമല്ല ആഷി വേണ്ടത്,,, മറിച്ചു എന്റെ ഷഹനയെ ജീവിത കാലം മുഴുവൻ നിന്റെ നിഴലായി കൂടെ നിർത്താമെന്ന വാക്കുറപ്പാണ് വേണ്ടത്... അങ്ങനെയൊരു ഉറപ്പ് നീ എനിക്ക് തന്നാൽ അവളെ നിന്റെ കരങ്ങളിലേൽപ്പിച്ചു ആ ബന്ധം ദൃഢമാക്കി മാറ്റാൻ ഞാൻ തയ്യാറാണ്.. "

അവന്റെ വാക്കുകൾ വിശ്വസിക്കാനാകാതെ ഞാനവനിലേക്ക് തിരിഞ്ഞു....
"ഡാ,,, നീ,,, "

എന്നും പറഞ് ഞാനവനെ വാരി പുണർന്നു..

"എന്താ ആഷി,,, എനിക്ക് നിന്നെ മനസ്സിലാകില്ലെന്ന് കരുതിയോ നീ,,, ഷഹനയ്ക്ക് ഒരു സർപ്രൈസ് കൊടുക്കാമെന്ന് കരുതിയാണ് ഞാൻ അവളറിയാതെ നാട്ടിലേക്ക് തിരിച്ചത്... പക്ഷെ അതിനേക്കാൾ വലിയൊരു സർപ്രൈസ് അവളും നീയും കൂടി എനിക്ക് തന്നു... അപ്പോ ഞാൻ കരുതി രണ്ടിനെയും കൂടി ഒന്ന് വട്ട് കളിപ്പിക്കാന്ന്,,, ഒരുത്തിയവിടെ കരഞ്ഞിരിപ്പുണ്ട്... ഇനി പോയിട്ട് വേണം അവളെയൊന്ന് സമാധാനിപ്പിക്കാൻ.. "

"ആഹാ,, എന്റെ പെണ്ണെ കരയിപ്പിച്ചിട്ടാണോ അളിയനിങ്ങോട്ട് പോന്നത് ?? "

"അയ്യടാ... അളിയനും പെണ്ണുമൊക്കെ നിക്കാഹ് കഴിഞ്ഞിട്ട് മതി... അതുവരെ എന്റെ മോനൊന്നു ക്ഷമിക്കു ട്ടോ.... എന്നാലും എന്റെ ആഷി,,, നീ എന്റെ ഷഹനയുടെ മുന്നിൽ മുട്ടു മടക്കിയില്ലേ... ഞങ്ങളിതൊന്ന് ആഘോഷിക്കും ട്ടോ... ഞാനും ഷഹനയും കൂടി... "
അതും പറഞ് അവൻ ചിരിക്കാൻ തുടങ്ങി..

"അധികം ആഘോഷിക്കാൻ നിൽക്കണ്ട ട്ടോ... അവിടെയൊരു വില്ലൻ കഥാപാത്രമുണ്ട്,, നിന്റെ ഉപ്പ,,, പിന്നെ അങ്ങേര് രണ്ടിനെയും പൊക്കിയെടുത്തു പുറത്തിട്ടിട്ടാകും ആഘോഷം നടത്തുക... പറഞ്ഞില്ലാന്ന് വേണ്ട... "

"നീ പറഞ്ഞത് ശരിയാണ്... ഉപ്പയെ എങ്ങനെയാ ഒന്ന് പറഞ് മനസിലാക്കുക... ഒരു വഴിയേ എന്റെ മുന്നിൽ കാണുന്നുള്ളൂ... നമ്മുടെ ഷംന വിചാരിച്ചാൽ നടക്കും... അവളുടെ പേരും പറഞ്ഞാണ് ഉപ്പ ഇത്രയും വാശി കാട്ടുന്നത് ... അപ്പോ അവളെ കൊണ്ട് തന്നെ പറയിപ്പിച്ചാലോന്ന് ഞാൻ ആലോചിക്കുകയാ... "

"അതൊന്നും വേണ്ട ഷാഹി,,, ഞാനൊന്ന് കണ്ട് സംസാരിക്കട്ടെ,,, ഉപ്പയോട്... എന്റെ ലാസ്റ്റ് അറ്റംപ്റ്റ് ആണ്... അത് സക്സസ് ആയില്ലെങ്കിൽ അപ്പോ തീരുമാനിക്കാം എന്ത് വേണമെന്ന്.. "

ഞാൻ പറഞ് തീരുമ്പോഴേക്കും എന്റെ റൂമിന്റെ ഡോർ തുരു തുരെ മുട്ടുന്ന ശബ്ദം കേട്ടത്.. ആരാണെന്ന് നോക്കിയപ്പോൾ ആലിയ... അവളെ കണ്ടതും ഷാഹി പോകാനൊരുങ്ങി...

"ഷാഹിക്ക,,, ഇങ്ങക്ക് കുടിക്കാൻ വെള്ളം എടുത്തു വെച്ചിട്ടുണ്ട്... വാ താഴേക്ക്... ഞാൻ എടുത്ത് തരാം... "

അവൻ ദേഷ്യത്തോടെ അവളെ നോക്കിയിട്ട് പറഞ്ഞു

"ഇതുവരെ വെള്ളം കുടിപ്പിച്ചത് പോരെ നിനക്ക്,,, ഒന്ന് പോടീ.. "

"ആഹാ അപ്പോ നിങ്ങള് തമ്മിൽ മുന്നേ വെള്ളം  കൊടുക്കലും കുടിപ്പിക്കലുമൊക്കെ കഴിഞ്ഞായിരുന്നോ ??ഞമ്മളൊന്നും അറിഞ്ഞില്ല,,, ആരും പറഞ്ഞുമില്ല.. "

ഞാൻ ഷാഹിയെ നോക്കി അത് പറഞ്ഞപ്പോൾ അവൻ കലി തുള്ളി നിൽക്കുകയായിരുന്നു...

"എങ്ങനെയാ വെള്ളം കുടിപ്പിച്ചതെന്ന് നിന്റെ പെങ്ങളോട് ചോദിച്ചു നോക്ക്,, അവള് പറഞ്ഞു തരും... "

ഷാഹിയെ ഇത്രയധികം ദേഷ്യത്തിൽ ഞാനാദ്യായിട്ട് കാണുകയാ...

"എന്താടി നീ അവനോട് കാട്ടിയത് ?? വല്ല കുരുത്തക്കേടും ഒപ്പിച്ചോ ??"

ഞാൻ ആലിയക്ക് നേരെ തിരിഞ്ഞു കുറച്ചു കടുപ്പത്തിൽ തന്നെ ചോദിച്ചു..

"ഒന്ന് പോ ആഷിക്ക,,, ഇങ്ങളെ മുന്നെ വെച്ചു അത് പറയാൻ എനിക്ക് നാണമാവുന്നു,,, "
അതും പറഞ്ഞവൾ എന്റെ മുന്നിൽ നിന്ന് മയങ്ങാൻ തുടങ്ങി...

" എനിക്ക് തരുമ്പോ നിനക്ക് ഈ പറഞ്ഞ നാണമൊന്നും ഉണ്ടായില്ലല്ലോടി കോപ്പേ,,, "

ഷാഹി വീണ്ടും അവൾക്ക് നേരെ തിരിഞ്ഞു..

"എന്താടാ നിങ്ങള് തമ്മിൽ പ്രശ്നം,,, എനിക്കൊന്നും മനസ്സിലാകുന്നില്ല "

"പ്രശ്നം വേറൊന്നുമല്ല,,, ഇത്തിരിയില്ലാത്ത നിന്റെയീ പെങ്ങൾക്ക് കുറച്ചിളക്കo കൂടുതലാ,,, അജ്‌വയുടെ ഫോണിൽ നിന്ന് ഏത് നേരവും എനിക്ക് മെസ്സേജ് അയക്കും...
  ഐ  ലവ് യു ഷാഹിക്ക,,, ഐ മിസ്സ് യു ഷാഹിക്ക... എന്നൊക്കെ പറഞ്... നല്ല നാല് തെറി പറഞ്ഞവളെ ആട്ടിയോടിക്കലാണ് എന്റെ പണി... എന്നിട്ട് അവസാനം ഈ കുരിപ്പ് എന്താ ചെയ്തെന്നറിയുമോ നിനക്ക് ??,,, അജ്‌വാന്റെ കല്യാണത്തിന്റെ അന്ന് ഷഹനയുടെ ഫോണിൽ നിന്ന് എന്നെ വിളിച്ചു... ഫോൺ എടുക്കും മുന്നേ പെണ്ണ് കട്ട ഒലിപ്പീരും കൊണ്ട് വന്ന് കുറെ ഉമ്മവും തന്ന് ഫോൺ വെച്ചിട്ട് പോയി... അന്ന് തൊട്ട് ഞാനിതിനെ പിടിച്ചിട്ട് ഫോണങ് ഓഫാക്കി വെച്ചു... "

അപ്പോ അന്ന് ഷഹനാന്റെ ഫോൺ എന്റെ കയ്യിൽ ഏൽപ്പിച്ചത് ഇവളുടെ കലാപരിപാടി കഴിഞ്ഞത് കൊണ്ടായിരിക്കുമെന്ന് ഞാനപ്പോഴാണ് ഓർത്തത്... എന്തായാലും അത് കൊണ്ട് എനിക്ക് ഉപകാരമാണ് ഉണ്ടായത്... അത് തല്ക്കാലം ഷാഹിയോട് പറയണ്ട...

"അല്ലടാ,,, നിന്റെ പെങ്ങളെ എന്റെ പെണ്ണായിട്ട് ഞാൻ സ്വീകരിക്കുന്നതോടൊപ്പം എന്റെ പെങ്ങളെ നിന്റെ പെണ്ണായിട്ട് ഞാൻ നൽകുകയും ചെയ്യാം... ഒരു ഗിവ് ആൻഡ് ടൈക് പോളിസി... എന്താ ഷാഹി സമ്മതമാണോ ??"

"ഒന്ന് പോടാ,,, ഇതിനു പതിനെട്ട് വയസ്സാകുമ്പോഴേക്കും ഞാനൊന്ന് കെട്ടി രണ്ട് മക്കളെ കൊണ്ട് ഉപ്പാന്ന് വിളിപ്പിക്കും.. അല്ല പിന്നെ.. "

"ഷാഹിക്ക,,, ഞാനൊരു കാര്യം പറഞ്ഞേക്കാം ഇങ്ങള് എന്നെയല്ലാതെ വേറെ ആരേലും കെട്ടിയാല് ഓളെയും കൊല്ലും നിങ്ങളെയും കൊല്ലും... എന്നിട്ട് ഞാൻ സുഖായിട്ട് ജയിലിൽ കിടക്കും... "

"നീ പോടീ... നീ കൊല്ലാൻ വരുമ്പഴേക്കും ഞാൻ നിന്ന് തരാ ട്ടോ... ആഷി,, അധിക നേരം ഞാനിവിടെ നിന്നാൽ നീ കൂടി എന്റെ വായീന്ന് കേൾക്കേണ്ടി വരും.. "എന്നും പറഞ് ഷാഹി വീട്ടിലേക്ക് പോയി..

*************************************

ഷാഹിക്ക റൂമിലേക്ക് വന്നപ്പോൾ ഞാൻ കിടക്കുകയായിരുന്നു... ഒട്ടും ഗൗരവം കുറയ്ക്കാതെ തന്നെ ഇക്ക എന്നെ വിളിച്ചിട്ട് പറഞ്ഞു..

"ഇതാ നിനക്ക് ഒരു കോളുണ്ട്,, "

ഇക്കയുടെ ഫോൺ  എന്റെ നേർക്ക് നീട്ടി..

"ആരാ ??" എന്ന് ഞാൻ ചോദിച്ചപ്പോൾ ഇക്കാ പറഞ്ഞു

"നിന്നെ കെട്ടാൻ പോകുന്നവൻ " എന്ന്...

ഞെട്ടലോടെ ഞാൻ ചോദിച്ചു....

"ആര് ??? ഫാസിലോ ??"

അത് പറയലും ഫോൺ കാതോട് ചേർത്ത് പിടിക്കലും ഒരുമിച്ചായിരുന്നു...

"ഫാസിലാണോടി കോപ്പേ നിന്നെ കെട്ടാൻ പോകുന്നത് ??"

ചൂടന്റെ ശബ്ദം മറുഭാഗത്തു നിന്ന് കേട്ടപ്പോൾ ഞാൻ ഷാഹിക്കയെ ഒന്ന് നോക്കി.. എന്നെ നോക്കി ഇക്ക ഒന്ന് കണ്ണിറുക്കി കാണിച്ചപ്പോൾ അതുവരെ ഞാനനുഭവിച്ച വേദനകൾക്കൊക്കെ ഒരു ശമനം കിട്ടിയിരുന്നു..

"ഡി,, നിന്റെ നാവിറങ്ങി പോയോ ?? "

വീണ്ടും ചൂടന്റെ ശബ്ദം കേട്ടപ്പോഴാണ് ഞാൻ ചിന്തയിൽ നിന്നുണർന്നത്..

"ഇല്ലടാ ചൂടാ,,, അങ്ങനെ നാവിറങ്ങി പോയാൽ പിന്നെ ഷഹന,, ഷഹനായല്ലാതായി പോവൂല്ലേ,, "

"അയ്യോടാ,,, എന്താ ഒരു ഡയലോഗ്... അതൊക്കെ പോട്ടെ നീ നാളെ കോളേജിലേക്ക് വരില്ലേ.. ??"

"ഇല്ല,,, ഉപ്പ സമ്മതിക്കില്ല... "

"ഡിഗ്രി കംപ്ലീറ്റ് ആക്കാതെ നിന്നെ ഞാൻ കെട്ടാൻ വരുമെന്ന് നീ മോഹിക്കണ്ട.. "

"ഓഹ്,, ആയിക്കോട്ടെ,, ഡിഗ്രിയില്ലാതെ തന്നെ എന്നെ കെട്ടാൻ ആരേലും വരുമൊന്ന് നോക്കട്ടെ,,, എന്ത് പറഞ്ഞാലും ഓന്റെയൊരു ഡിഗ്രി.. "

"എന്റെ ഷഹന,,, നീയിപ്പോ ഇതെത്ര ഡിഗ്രി സെൽഷ്യസ് ചൂടിലാ സംസാരിക്കുന്നത് ??"

"ഓഹ് തുടങ്ങി,, ഓന്റെ ഫിസിക്സ് ക്ലാസ്... എന്റെ പൊന്നു സാറെ,, ഒന്ന് നിർത്തുമോ ???അല്ലടാ,, എന്തായി നമ്മുടെ കാര്യം... വല്ല തീരുമാനവും ആയോ ??"

"ഇൻഷാ അല്ലാഹ്,,, നാളെ,,, നാളെയറിയാം നമ്മുടെ കാര്യത്തിന്റെ തീരുമാനം... നിന്റെ ഉപ്പയും ഞാനും തമ്മിലൊരു അങ്കം... അത് കഴിഞ്ഞാൽ ഫൈനൽ റിസൾട്ട്... "

അപ്പൊ ശരി,, നമുക്ക് നാളെ കാണാം...

ഷഹന
@@@@

Part 14
********

ഞാനും അവളുടെ ഉപ്പയും തമ്മിൽ ഒരു അങ്കം എന്നൊക്കെ കേട്ടപ്പോൾ നിങ്ങളൊന്ന് തെറ്റിദ്ധരിച്ചു കാണും... വല്ലാത്ത കോലാഹലമൊക്കെ സൃഷ്ടിക്കുമെന്ന്... എന്നാ അങ്ങനെയൊന്നുമില്ല ട്ടോ...

ആഷി,,, ഈ പുറമെ കാണുന്ന ചൂടൻ മാത്രമാണ്,,, യഥാർത്ഥത്തിൽ ഞമ്മള് ഒടുക്കത്തെ പാവമാണ് ട്ടോ... അത് നിങ്ങൾക്ക് വഴിയേ മനസ്സിലാകും...

പിറ്റേന്ന് അവളുടെ ഉപ്പയെ വിളിച്ചു ഞാൻ ഒരു കോഫി ഷോപ്പിലേക്ക് വരാൻ പറഞ്ഞു,,, സാധാരണ കമിതാക്കളാണ് അവിടെയൊക്കെ റിസേർവ്ഡ് ആക്കാർ... ഞമ്മളതിന് ചെറിയൊരു മാറ്റം വരുത്തി എന്ന് മാത്രം...

എനിക്കഭിമുഖമായി ഷഹനയുടെ ഉപ്പ ഇരുന്നു.. ഹൃദ്യമായൊരു പുഞ്ചിരി നൽകി കൊണ്ടാണ് ഞാൻ അദ്ദേഹത്തെ വരവേറ്റത്... പക്ഷെ തിരിച്ചു എനിക്കത് തന്നില്ലെന്ന് മാത്രം...

"ഉപ്പയ്ക്ക് കുടിക്കാൻ ഞാൻ കോഫിക്ക് ഓർഡർ ചെയ്തിട്ടുണ്ട്... "

"എനിക്ക് വേണ്ട,,, "

"അത് പറഞ്ഞാൽ പറ്റില്ല... ഉപ്പ ഇപ്പോൾ എന്റെ അഥിതിയാണ്... അപ്പോ ഞാൻ തരുന്നത് നിരസിക്കരുത്... "

"തനിക്കെന്താണ് പറയാനുള്ളതെന്ന് വെച്ചാല് വേഗം പറഞ് തൊലക്ക്... എനിക്ക് പോയിട്ട് അത്യാവിശ്യമുള്ളതാ.. "

ഉപ്പയുടെ ഒരോ വാക്കിലും എന്നോടുള്ള നീരസം ഞാൻ തിരിച്ചറിയുന്നുണ്ടായിരുന്നു... എങ്കിലും ഞാൻ വിനയത്തോടെ തന്നെയാണ് പെരുമാറിയത്..

"Ok,,, അധികം ബുദ്ധിമുട്ടിക്കുന്നില്ല... എങ്ങനെ പറഞ് തുടങ്ങണമെന്ന് എനിക്കറിയില്ല... പക്ഷെ എങ്ങനെ പറഞ്ഞാലും ഉപ്പയത് ഉൾക്കൊള്ളണമെന്ന് ഒരു അപേക്ഷയുണ്ട്..

അതിനു മുന്നേ എനിക്കൊന്ന് ചോദിക്കാനുണ്ട്... എന്തായി ഷഹനയുടെ കാര്യത്തിൽ ഉപ്പയുടെ തീരുമാനം ??എന്റെ വീട്ടുകാർക്ക് യാതൊരു വിധ എതിർപ്പുമില്ലെന്ന് അവർ അറിയിച്ചിട്ടുണ്ട്... ഇനി ഉപ്പയ്ക്കും കൂടി സമ്മതമാണെങ്കിൽ നമുക്കിതങ്ങോട്ട്,,,,,,, "

"ഞാനെടുത്ത തീരുമാനത്തിൽ യാതൊരു മാറ്റവും നീ പ്രതീക്ഷിക്കണ്ട... എന്റെ മോളെ ആർക്ക് നിക്കാഹ് ചെയ്ത് കൊടുക്കണമെന്നുള്ളത് എന്റെ അവകാശമാണ്... അതിനെയാരും ചോദ്യം ചെയ്യുകയും വേണ്ട,,, ആരുടെ അഭിപ്രായവും എനിക്ക് കേൾക്കുകയും വേണ്ട... "

ദേഷ്യത്തോടെ തന്നെയാണ് ഉപ്പയുടെ സംസാരമൊക്കെയും...

"പിന്നെ ഈ കൂടിക്കാഴ്ച കൊണ്ട് എന്തർത്ഥമാണുള്ളത് ??എനിക്ക് പറയാനുള്ളത് നിങ്ങള് കേട്ടേ പറ്റൂ... അത് കേൾപ്പിച്ചിട്ടേ ആഷി നിങ്ങളെ വിടുന്നുള്ളു...

നിങ്ങളുടെ മകളെ ആർക്ക് നിക്കാഹ് ചെയ്ത് കൊടുക്കണം എന്നുള്ളത് നിങ്ങളുടെ അവകാശമാണ്... അത് ഞാൻ ശരി വെക്കുന്നു... അവിടെ നിങ്ങള് ഓർക്കേണ്ട മറ്റൊരു കാര്യം കൂടിയുണ്ട്,,, നിങ്ങൾക്കുള്ള അതേ അവകാശം അവളുടെ കൂടെപ്പിറപ്പായ ഷാഹിക്കുമുണ്ട്... ഇന്ന് വേണമെങ്കിൽ ഇന്ന്,,, അവനതിനു തയ്യാറാണ്... അവന്റെ പെങ്ങളെ എന്റെ പെണ്ണാക്കി മാറ്റാനുള്ള 'നിക്കാഹ് ' എന്ന കാർമികത്വത്തിനു കരം തരാൻ അവൻ ഒരുക്കമാണ്...

    പക്ഷെ,,,,,,

ആഷി,,, അത് ആഗ്രഹിക്കുന്നില്ല,,, ജന്മം നൽകി പത്തു പതിനെട്ട് വർഷം പോറ്റി വളർത്തിയ അവളുടെ ഉപ്പയുടെ കരം പിടിച്ചായിരിക്കണം എന്റെ നിക്കാഹ് നടത്തേണ്ടതെന്ന് ഞാനാഗ്രഹിച്ചത് നിങ്ങളോടുള്ള ബഹുമാനം ഒന്ന് കൊണ്ട് മാത്രമാണ്... എന്റെ ഷഹനയെ വളരെ നല്ല രീതിയിൽ വളർത്തിയെടുക്കാൻ ഒരുപ്പ എന്ന നിലയിൽ നിങ്ങള് നീതി പുലർത്തിയിരുന്നു..
അത് കൊണ്ടാണവൾ,,, അവളുടെ  സൗന്ദര്യം മറ്റൊരാൾക്ക് മുന്നിലും കാഴ്ച വെക്കാതെ മൂടി വെച്ചു നടക്കുന്നത്...

നിങ്ങളെന്ന നല്ല മനുഷ്യന്റെ രക്തമാണ് അവളുടെ  സിരകളിലും ഓടി കൊണ്ടിരിക്കുന്നത്.. അതിന്റെ ഗുണം അവൾക്ക് വേണ്ടുവോളം ഉണ്ട്... "

അത്രയും പറഞ് ഞാൻ കോഫി ഉപ്പയ്ക്ക് നേരെ നീട്ടി...

രൂക്ഷമായൊരു നോട്ടം കൊണ്ട് ഉപ്പ എന്നോട് പറഞ്ഞു..

"നീ ഇനി എന്നെ പുകഴ്ത്തി പാടിയത് കൊണ്ടോ ഇവിടെ നിന്ന് പ്രസംഗിച്ചത് കൊണ്ടോ ഞാൻ നിനക്ക് അവളെ തരാൻ ഉദ്ദേശിച്ചിട്ടില്ല... "

എന്തൊരു മനുഷ്യനാണിത്... വല്ലാത്ത സംഭവം തന്നെ... വെറുതേ എന്റെ ഊർജം പാഴാക്കിയത്...

"അറിയാം,,, നിങ്ങളെനിക്ക് അവളെ തരില്ലെന്നുറപ്പുള്ളത് കൊണ്ടാണ് അവളെന്നോട് പറഞ്ഞത്,,, നീ വിളിച്ചാൽ ഞാൻ ഇറങ്ങി വരും ആഷി,, എന്ന്..... വിളിച്ചിറക്കാൻ ആഷിക്ക് ചങ്കൂറ്റമില്ലാഞ്ഞിട്ടല്ല... മറിച്ചു അങ്ങനെ ഞാനവളെ വിളിച്ചിറക്കി കൊണ്ടു പോയാലുള്ള നിങ്ങളുടെ മാനസികാവസ്ഥയെ കുറിച്ചാലോചിച്ചു ഞാൻ സഹതപിച്ചത് കൊണ്ടാണ്... "

അത് കേട്ടപ്പോൾ അയാളിൽ ചെറിയൊരു ഞെട്ടലുളവാക്കി... ഞാൻ ചുമ്മാ പറഞ്ഞതാണ് ചെങ്ങായിമാരെ,,, അവളെന്നോട് അങ്ങനെയൊന്നും പറഞ്ഞില്ല.. അങ്ങേരെ എങ്ങനെയെങ്കിലും എന്റെ കൈപ്പിടിയിൽ ഒതുക്കാനുള്ള എന്റെ ശ്രമങ്ങളാണ് ഇതൊക്കെയും...

മൗനമായിരിക്കുന്ന ഉപ്പയിലേക്ക് ഞാൻ ഒന്ന് കൂടി നോക്കി .... വീണ്ടും ഞാൻ തുടർന്നു...

"നിങ്ങള് അന്ന് എന്നെ വിളിച്ചു സംസാരിച്ചത് ഞാൻ ഇന്നും മറന്നിട്ടില്ല... എന്നോടുള്ള അവളുടെ സ്നേഹം  നിങ്ങളും ഷഹനയും കൂടി കളിച്ച നാടകമാണെന്ന് പറഞ്ഞപ്പോൾ ഞാനത് വിശ്വസിക്കുമെന്ന് നിങ്ങൾ കരുതിക്കാണും... പക്ഷെ,,, അവൾക്കെന്നോടുള്ള സ്നേഹത്തിന്റെ ആഴം എനിക്കറിയാവുന്നത് കൊണ്ട് ഞാനെന്റെ പെണ്ണിനെ വിശ്വസിച്ചു.. ..

നിങ്ങൾക്കെന്നോട് ഇത്രയും ദേഷ്യം തോന്നാൻ കാരണം ഷംനയോടുള്ള എന്റെ ഇഷ്ടക്കേടാണെങ്കിൽ അതിനെനിക്ക് വ്യക്തമായ കരണങ്ങളുണ്ടായിരുന്നു,,, എന്റെ ഇരുപത്തൊന്നാമത്തെ വയസ്സിൽ നിങ്ങളെനിക്ക് വിവാഹാലോചന നടത്തുമ്പോൾ ചിന്തിക്കാതെ പോയൊരു കാര്യമുണ്ട്,, സ്വന്തമായിട്ടൊരു ജോലി പോലുമില്ലാതെ ഞാനെങ്ങനെ ഒരു പെണ്ണിന് ജീവിതം കൊടുക്കുമെന്ന്...

ഇപ്പോഴും ഞാൻ പെട്ടെന്നൊരു വിവാഹത്തിന് മുതിർന്നിട്ടില്ല... സ്ഥിരമായ ഒരു ജോലി,, അത് നേടിയെടുത്തിട്ടേ ഞാൻ വിവാഹത്തിന് തയ്യാറെടുക്കുകയുള്ളു... പിന്നെ ഈ കൂടിക്കാഴ്ച എന്തിനാണെന്ന് നിങ്ങൾ ചിന്തിക്കുന്നുണ്ടാകും,,,, മനസ്സ് കൊണ്ട് ഞാനാഗ്രഹിച്ച എന്റെ പെണ്ണിനെ മറ്റാർക്കും വിട്ടു കൊടുക്കരുതെന്ന് നിങ്ങളോടപേക്ഷിക്കാൻ,,, ഒപ്പം അവളുടെ പഠനം പാതിവഴിയില് വെച്ചു നിർത്തരുതെന്ന് പറയാൻ...

ഇനി നിങ്ങളേത് കൊമ്പത്തുള്ള പയ്യനെ കൊണ്ട് അവളെ കെട്ടിച്ചയക്കാൻ ഉദ്ദേശിച്ചാലും ഈ ആഷിയെ സംബന്ധിച്ചത് ഒരു പ്രശ്നമല്ല എന്ന് കൂടി നിങ്ങളോർക്കണം... കാരണം,,, ഒരു പെണ്ണിന് വിലപ്പെട്ടതായിട്ട് ഞാൻ കാണുന്നത് അവളുടെ മനസ്സാണ്,,, അല്ലാതെ ശരീരമല്ല,,,, എന്റെ ഷഹനയുടെ മനസ്സ്,,, അത് മരണം വരെ ആഷിയോടൊപ്പമായിരിക്കും... ആഷിയോടൊപ്പം മാത്രം... "

പറഞ്ഞു തീരുമ്പോഴേക്കും പല വാക്കുകളിലും ഇടർച്ച സംഭവിച്ചിരുന്നു... എന്നിട്ടും അവളുടെ ഉപ്പയിൽ യാതൊരു ഭാവ മാറ്റവും കാണാനായില്ല... അതെന്നെ വല്ലാതെ അസ്വസ്ഥനാക്കി... ഞാനിത്രയൊക്കെ പറഞ്ഞിട്ടും അയാൾക്കത് സ്വീകാര്യമായില്ലല്ലോ എന്നോർത്തു എന്റെ ഖൽബൊന്നു പിടഞ്ഞു...

"നീ എന്തൊക്കെ വീരവാദം മുഴക്കിയാലും എന്റെ തീരുമാനത്തിൽ മാറ്റമില്ല ആഷിഖ്,,,, എന്റെ മകളെ സംരക്ഷിക്കാൻ നിന്നെ ഏല്പിച്ചപ്പോൾ എനിക്കതിൽ വലിയ പ്രതീക്ഷയുണ്ടായിരുന്നു... പക്ഷെ സാഹചര്യം മുതലെടുത്തു നീയവളെ വശീകരിക്കാനാണ് ശ്രമിച്ചത്.. അങ്ങനെയുള്ള,,,...... "

"സ്റ്റോപ്പ് ഇറ്റ്.... "

അവളുടെ ഉപ്പയെ പറഞ്ഞു പൂർത്തിയാക്കാൻ സമ്മതിക്കാതെ എന്റെ ശബ്ദം ഉയർന്നു.... അതുവരെ സൗമ്യതയോടെ മാത്രമാണ് ഞാൻ അദ്ദേഹത്തിന് മുന്നിൽ ഇരുന്നത്... പക്ഷെ ഇനി ആഷിക്ക് അതിനു പറ്റില്ല... കാരണം അയാളുടെ വാക്കുകൾ,,, അതെനിക്ക് അംഗീകരിക്കാൻ പറ്റാത്തതായിരുന്നു...

"നിങ്ങളുടെ മകളെ സംരക്ഷിക്കാൻ ഏല്പിച്ചിട്ടുണ്ടെങ്കിൽ ആഷി,,, അവളെ സംരക്ഷിച്ചിട്ടുണ്ട്,,, അല്ലാതെ നിങ്ങള് പറഞ്ഞത് പോലെ വശീകരിക്കാൻ ശ്രമിച്ചിട്ടില്ല... ഒരുപ്പയോട് പറയണ്ട വാക്കുകളല്ല ഞാൻ ഇനി പറയാൻ പോകുന്നത് എന്ന് എനിക്കറിയാം... എങ്കിലും ഈ അവസരത്തിൽ അത് പറയുന്നതിൽ തെറ്റില്ല എന്നെനിക്ക് തോന്നുന്നത് കൊണ്ട് മാത്രം ഞാൻ പറയാം...

പല സാഹചര്യങ്ങളും എനിക്ക് മുന്നിൽ അനുകൂലമായിട്ടുണ്ടായിരുന്നു,,, നിങ്ങളുടെ മകളുമായി അടുത്തിടപഴകാൻ,,,, ഒരാണും പെണ്ണും മാത്രമുള്ളൊരു സിറ്റുവേഷൻ വന്നാൽ പ്രേത്യേകിച്ചു പരസ്പരം ഇഷ്ടപെടുന്നവരാണെങ്കിൽ,,, അവർ തമ്മിൽ പങ്കു വെക്കാൻ പറ്റുന്നതൊക്കെ കൈമാറാൻ സന്നദ്ധരാകും.... പക്ഷെ,,, ഞാനത് ചെയ്തില്ല... കാരണം മനസ്സ് കൊണ്ട് അവളെന്റെ പെണ്ണാണെന്ന് നൂറു വട്ടം പറഞ്ഞാലും അത് യാഥാർഥ്യമാകണമെങ്കിൽ  നിയമ പരമായി അവളെന്റെ ഭാര്യയാകണമെന്ന നിർബന്ധ ബുദ്ധി എനിക്കുണ്ടായിരുന്നു...

പറഞ്ഞതിന്റെ അർത്ഥം മനസ്സിലായിട്ടില്ലെങ്കിൽ ഞാൻ ഒന്ന് കൂടി തെളിയിച്ചു പറയാം... അവളുടെ മനസ്സിനെ തൊട്ടറിയാൻ ശ്രമിച്ചതല്ലാതെ ഞാനൊരിക്കലും അവളുടെ ദേഹത്തു മോശമായ രീതിയിൽ സ്പർശിച്ചിട്ടില്ല എന്ന്... "

"നീയൊരു പുണ്യാളനാണെന്ന് സ്വയം പറഞ് തെളിയിക്കുകയാണോ ??"

പരിഹാസത്തോടെയാണ് ഉപ്പയതെന്നോട് ചോദിച്ചത്... മറുത്തൊരു മറുപടി ഞാൻ കൊടുത്തില്ല... ഇത്രയും പറഞ്ഞിട്ട് എന്നെ മനസ്സിലാക്കാൻ ഉപ്പയ്ക്ക് പറ്റുന്നില്ലെങ്കിൽ പിന്നെ വീണ്ടും ഞാൻ നിർബന്ധിക്കുന്നതെന്തിനാണ് ??

"ഉപ്പയ്ക്ക് പോകാം... ഒരുപാട് അത്യാവിശ്യമുള്ളതല്ലേ,,, "

അത്ര മാത്രം പറഞ് ഞാൻ എഴുന്നേറ്റു...

"എന്തായി ആഷി,,, ഇപ്പോ ജയം എനിക്ക് തന്നെ കിട്ടിയില്ലേ... ??"

"ഹും,,, ജയം,,, ഇതൊരു ജയമാണെന്ന് എനിക്ക് തോന്നിയിട്ടില്ല... സ്വന്തം മകളുടെ നല്ല ഭാവി കളഞ്ഞിട്ട് നിങ്ങളുടെ തീരുമാനത്തിന് മുൻ‌തൂക്കം കൊടുക്കുമ്പോൾ നിങ്ങൾക്കത് ജയമായി തോന്നിയേക്കാം... പക്ഷെ ജന്മം നൽകിയ മകൾക്ക് ജീവിതത്തിലെ ഏറ്റവും വലിയ പരാജയവും കൂടിയാണ് അതെന്ന് നിങ്ങള് ഓർക്കണം...

പിന്നെ എനിക്ക് നിങ്ങളോട് തോന്നിയൊരു സഹതാപം എന്തെന്ന് വെച്ചാൽ,,,നിങ്ങളുടെ  മൂത്ത മകൾ ഷംനയ്ക്ക് തോന്നിയ അതേ ഇഷ്ടമാണ് എന്റെ ഷഹനയ്ക്കും എന്നോട് തോന്നിയത്... ഷംനയുടെ ഇഷ്ടത്തിന് കൂട്ട് നിന്ന നിങ്ങള് എന്ത് കൊണ്ട് ഷഹനയുടെ ഇഷ്ടത്തിന് നിന്നില്ല ???രണ്ട് പേരും നിങ്ങളുടെ മക്കളാണ്... എന്നിട്ടും അവർക്കിടയിൽ പോലും നിങ്ങള് രണ്ടന്തരം കാണിക്കുന്നൂന്ന് അറിഞ്ഞപ്പോൾ നിങ്ങളെ കുറിച്ചോർത്തു എനിക്ക് സഹതാപമാണ് തോന്നുന്നത്...

ഷഹന നിങ്ങള് കൈ പിടിച്ചു കൊടുക്കുന്ന ആരുടെ കൂടെ വേണമെങ്കിലും ജീവിക്കും,,, ഒരു ജീവച്ഛമായിട്ട്...... അതോർമിക്കുന്നത് നല്ലതായിരിക്കും... "

അത്രയും പറഞ് അവളുടെ ഉപ്പയെ ഒന്ന് തിരിഞ്ഞു പോലും നോക്കാതെ ഞാൻ കോളേജിലേക്ക് വിട്ടു...

***************************************
അവൻ പറഞ്ഞ ഒരോ വാക്കും എന്നിലേക്ക് ആഴ്ന്നിറങ്ങി കൊണ്ടിരുന്നു... എന്നിട്ടും
എന്തോ അവനെ അംഗീകരിക്കാൻ മാത്രം ഞാൻ തയ്യാറായില്ല... അവൻ അവസാനം പറഞ്ഞത് ശരിയായിരുന്നു... രണ്ട് പേരും എന്റെ മക്കളാണ്... എന്നിട്ടും ഞാൻ ഷംനയ്ക്ക് കൂട്ട് നിന്നത് പോലെയെന്തേ എന്റെ ഷഹനയ്ക്ക് കൂട്ടു നിന്നില്ല... ഉത്തരം കിട്ടാത്ത ഒരു ചോദ്യവുമായാണ് ഞാൻ വീട്ടിലേക്ക് കയറി ചെന്നത്...

അവിടെ എന്റെ വരവും പ്രതീക്ഷിച്ച ഷാഹിയും ഷംനയും ഇരിപ്പുണ്ട്... പക്ഷെ ഷഹന,,, അവള് മാത്രം അവിടെയില്ല...

"എന്തായി ഉപ്പ,,, കാര്യങ്ങൾ ??"

ഷംനയുടേതായിരുന്നു ചോദ്യം...

"എന്താവാൻ,,, ഞാൻ ഇപ്പോഴും എന്റെ തീരുമാനത്തിൽ ഉറച്ചു നിൽക്കുന്നു... അഥവാ ഞാൻ കൊടുത്ത വാക്ക് തെറ്റിക്കില്ല എന്ന്.. "

"അത് കൊണ്ട് ഉപ്പയ്ക്ക് എന്ത് നേട്ടമാണ് കിട്ടാൻ പോകുന്നത് ???"

വീണ്ടും അവളെനിക്ക് നേരെ തിരിഞ്ഞു...

"ഓഹോ,,, ഇപ്പൊ നീയും ഉപ്പയെ ചോദ്യം ചെയ്യാൻ തുടങ്ങിയോ ??"

"എന്തിനാണുപ്പാ ഈ വാശി,,, എന്നോടുള്ള സ്നേഹക്കൂടുതൽ കൊണ്ടാണെങ്കിൽ ഞാനത് ആഗ്രഹിക്കുന്നില്ല... ഷഹന ആഗ്രഹിച്ചത് ആഷിയെ ആണെങ്കിൽ ഉപ്പയ്ക്കത് അംഗീകരിക്കാൻ എന്താ ഇത്ര ബുദ്ധിമുട്ട്.. "

"നീ പറഞ്ഞത് പോലെ തന്നെ,,, നിന്നോടുള്ള സ്നേഹക്കൂടുതലാണ് ഞാൻ ഇന്നീ തീരുമാനത്തിലെത്തിയത്... ആ നീ തന്നെ ഉപ്പയെ ചോദ്യം ചെയ്ത് തോല്പിക്കണം.. "

"ആരെയും തോൽപ്പിക്കാൻ അല്ല ഉപ്പ ഞങ്ങളെ പഠിപ്പിച്ചത്,,, സ്വയം തോൽക്കാതിരിക്കാനാ.. എന്നിട്ട് അതേ ഉപ്പ ഇപ്പോ ഇവിടെ സ്വയം തോറ്റ് പോകുന്നതോർക്കുമ്പോൾ സങ്കടമുണ്ട് ഞങ്ങൾക്ക്...

ഉപ്പ പറയാറില്ലേ,,, ഒരു പുൽനാമ്പിനെ പോലും നോവിക്കാതെ പെണ്ണാണ് ഞാൻ എന്ന്,,, ആ ഞാൻ കാരണം എന്റെ കൂടെപ്പിറപ്പ് വേദനിക്കുന്നത് കാണാൻ ഞാൻ ആഗ്രഹിക്കുന്നില്ല ഉപ്പ,,,,, ഉപ്പയ്ക്കെന്നോടുള്ള സ്നേഹം അതെനിക്ക് മനസ്സിലാകും,,, ആ സ്നേഹം മുൻ നിർത്തി ഉപ്പയുടെ മോള് പറയുകയാ,,, എന്റെ ഷാനയ്‌ക്കെങ്കിലും അവളാഗ്രഹിച്ച ജീവിതം കിട്ടട്ടെ... എന്റെ ഉപ്പ അതിന് തടസ്സം നിൽക്കരുത്... "

അത്രയും പറഞ്ഞവൾ എന്റെ നെഞ്ചിലേക്ക് വീണ് പൊട്ടിക്കരയാൻ തുടങ്ങി...

ആ കമനുനീർ എന്റെ നെഞ്ചിൽ പതിഞ്ഞപ്പോൾ എന്റെ ദേഹമാകെ ചുട്ടു പൊള്ളുന്നത് പോലെ തോന്നി...

"മോളെ,,, അപ്പോ ഉപ്പ കൊടുത്ത വാക്ക്,,, അതിനൊരു വിലയുമില്ലാതാകില്ലേ... ??ഞാനെങ്ങനെയാ അത് മാറ്റി പറയുക.. "

"ഫാസിലിനെ കൊണ്ടൊരു വിഡ്ഢി വേഷം കെട്ടിക്കുന്നതിനു മുമ്പ് ഉപ്പയായിട്ട് തുടങ്ങി വെച്ച ബന്ധം അതങ്ങ് വാക്കിലൂടെ തന്നെ അവസാനിപ്പിച്ചേക്ക്.. "

ഇത്തവണ ഷാഹിയാണ് മറുപടി പറഞ്ഞത്.. അപ്പോ എല്ലാവരും കൂടിയുള്ള കളിയാണിത്..

"അതിനെന്താ ഉപ്പാ,,, അവരെ വിളിച്ചു ഉപ്പ പറഞ്ഞേക്ക്,,, അവളുടെ പഠനം കഴിഞ്ഞേ ഉള്ളൂ കല്യാണം എന്ന്... അതുവരെ ഞങ്ങളതിനെ കുറിച് ചിന്തിക്കുന്നില്ല എന്ന് "

വളരെ ശാന്തമായി എന്റെ മോള് എനിക്കൊരു പോംവഴി പറഞ്ഞു തന്നു... അപ്പോഴും അതങ്ങ് പൂർണമായി അംഗീകരിക്കാൻ കഴിയാതെ ഞാൻ അസ്വസ്ഥനാവുകയായിരുന്നു...

"എന്താ,,, ഉപ്പാ,,, ഒരാലോചന,,,, ഉപ്പയ്ക്ക് ഇനി സമ്മതക്കുറവ് വല്ലതുമുണ്ടോ ?? ഉപ്പയുടെ മോള് സന്തോഷായിട്ട് ജീവിക്കുന്നത് കാണണമെങ്കിൽ ഉപ്പ കൊടുത്ത വാക്ക് അതൊന്ന് മാറ്റി പറഞ്ഞേ തീരു... ഇപ്പോ അവള് പഠിക്കട്ടെ... അത് കഴിഞ്ഞു മതി ബാക്കി കാര്യങ്ങളൊക്കെ... "

ഷംനയുടെ വാക്കിനോട് ഷാഹിയും യോജിച്ചപ്പോൾ ഞാൻ അറിയാതെ തന്നെ എന്റെ മനസ്സ് അവരോടൊപ്പം സഞ്ചരിക്കാൻ തുടങ്ങിയിരുന്നു...

*************************************

ഷാഹി വിളിച്ചു ഉപ്പയുടെ സമ്മതം അറിയിച്ചപ്പോൾ എനിക്കെന്തെന്നില്ലാത്ത സന്തോഷം തോന്നി... ഉടനെ ഞാൻ ഷാഹിയോട് ഷഹനയ്ക്ക്  ഫോൺ കൊടുക്കാൻ ആവശ്യപ്പെട്ടു...

ഷഹന ഈ കാര്യം അറിയില്ലെന്ന് അവൻ എന്നോട് പറഞ്ഞിരുന്നു...

"ഹാലോ ഷഹന... "

"എന്തായി,,, ആഷി,,, നമ്മുടെ കാര്യം ??"

"എന്താവാൻ,,, ഞമ്മള് രക്ഷപ്പെട്ടേ..... "

"ഹോ,,, സമാധാനായി,, അപ്പോ ഉപ്പ സമ്മതിച്ചല്ലേ,,, "

"ഇല്ലടി,,, ഉപ്പ സമ്മതിച്ചാൽ ഞാൻ രക്ഷപെടുകയാണോ ചെയ്യുക,,, നിന്നെ പോലൊരെണ്ണത്തിനെയും കൊണ്ട് ജീവിത കാലം മുഴുവൻ കഷ്ടപ്പെടേണ്ടി വന്നേനെ... "

"പോടാ തെണ്ടി... "

"അതേടി,,, നിന്നെ കിട്ടിയിരുന്നെങ്കിൽ ഞാനിപ്പോ തെണ്ടി പോയേനെ.. "

"ആഷി,,, വെറുതേ എന്നെ ദേഷ്യം പിടിപ്പിക്കല്ലേ,,, ഉപ്പ എന്താ നിന്നോട് പറഞ്ഞത് അത് പറ... "

"അത് നീ ഉപ്പയോട് തന്നെ ചോദിച്ചു നോക്ക്.. "

"ഹെ,, ഞാൻ ചോദിക്കില്ല,,,എനിക്ക് പേടിയാ... "

"പേടിയോ ??,,, നിനക്കോ,,, ഒന്ന് പോടീ... "

അപ്പഴേക്കും ഷാഹി വന്ന് അവളുടെ കയ്യിൽ നിന്ന് ഫോൺ തട്ടിപ്പറിച്ചു വാങ്ങി എന്നോട് സംസാരിക്കാൻ തുടങ്ങി...

"മതിയെടാ,,, കത്തിയടി... ഇനി ഇങ്ങനെ വിളിക്കാനുള്ള ചാൻസ് തരില്ല ട്ടോ,,, ഫോൺ വിളിയും സംസാരവുമൊക്കെ നിക്കാഹ് കഴിഞ്ഞിട്ട് മതി... "

"ഓഹ് ആയിക്കോട്ടെ ബോസ്,,, ഞങ്ങള് കോളേജിൽ വെച്ചു കണ്ടോളാം... അപ്പൊ സംസാരിച്ചോളാം... അപ്പോ നിക്കാഹ് കഴിയാൻ കാക്കണ്ടല്ലോ.. "

"ഡാ,,, ചൂടൻ കാമുകാ,,, നീ ആള് കൊള്ളാല്ലോ... "

"ആഹ്,,, അതോണ്ടല്ലേ നിന്റെ പെങ്ങളെ തന്നെ കെട്ടാന്ന്  വെച്ചത്... "

***********************************

അങ്ങനെ അതോട് കൂടി ഷഹനയുടെയും ആഷിയുടെയും കാര്യത്തിൽ ഒരു തീരുമാനം ആയി പക്ഷെ,,,, പിന്നീട് എന്താണ് സംഭവിച്ചതെന്ന് അറിയാൻ നമുക്ക് കാത്തിരിക്കാം...

അടുത്ത ഭാഗത്തോട് കൂടി കഥ അവസാനിക്കുകയാണ്...

ഷഹന
@@@@

Part 15 (Last part )
********************

"സൂക്ഷിച്ചു നോക്കേണ്ടെടാ ഉണ്ണീ,,, ഇത് ഞാനല്ല... സത്യം... ഞാൻ ആഷിയല്ല... "

ലേബർ റൂമിനു വെളിയിലിരിക്കുന്ന എന്നെ കണ്ടിട്ടാണല്ലേ നിങ്ങളെല്ലാരും എന്നെയിങ്ങനെ ഉറ്റു നോക്കുന്നത്..  അതിനുള്ള മറുപടിയാ ഞാനാദ്യം തന്നത്...

ഒന്നും മനസ്സിലായില്ല അല്ലേ,,, പേടിക്കേണ്ട,,, മനസ്സിലാക്കി തരാം...

ഞാനിവിടെ ഇരിക്കപ്പൊറുതിയില്ലാതെ അങ്ങോട്ടുമിങ്ങോട്ടും നടക്കുന്നത് എന്തിനാന്ന്  ആദ്യം പറയാം... ഷഹനയെ ഡെലിവെറിക്കായി ലേബർ റൂമിലേക്ക് കയറ്റിയിട്ട് രണ്ട് മണിക്കൂറാകാറായി.... ഇതുവരെ ഒരു വിവരവുമില്ല...

എനിക്കാകെ ഭ്രാന്ത് പിടിക്കുന്നത് പോലെയായി... ഇവൾക്കിതെന്താ ഒന്ന് വേഗം പ്രസവിച്ചാല്,,,, മനുഷ്യനിവിടെ തീയിൽ ചവിട്ടി നിൽക്കയ,,, അവളിങ് വരട്ടെ,,, അപ്പൊ തീർക്കാം ഈ കലിപ്പൊക്കെ...

അങ്ങോട്ടുമിങ്ങോട്ടും നടക്കാൻ തുടങ്ങിയിട്ട് കുറെ നേരായി... കുറച്ചു നേരം ഇരിക്കാന്ന് കരുതി ഞാനെന്റെ ഉമ്മയുടെ അരികിൽ ചെന്നിരുന്നു... നേരെ ഓപ്പോസിറ്റായിട്ട് ഷാഹിയും കെട്ടിയോളുമുണ്ട് അവിടെയിരുന്ന് റൊമാൻസ് കളിക്കുന്നു... അത് കണ്ടപ്പോ എനിക്ക് വീണ്ടും കലിയിളകി... ഒരാൾക്കിവിടെ പ്രാണ വേദന,,, അപ്പോഴാണവന് വീണ വായന എന്ന് പറഞ്ഞ പോലെയാണ് എന്റെ അവസ്ഥ... അല്ല അവനെ പറഞ്ഞിട്ടും കാര്യമില്ല... ഞമ്മളീ പ്രാണ വേദന അനുഭവിക്കും മുന്നേ കളിച്ച റോമൻസിന്റെ ഫലമാണല്ലോ ഇപ്പോ നടന്ന് കൊണ്ടിരിക്കുന്നത്... ഒരിക്കൽ നീയും അനുഭവിക്കുമെടാ ഷാഹി,,, ഇതേ പോലെ... അന്ന് ഞാൻ എന്റെ ഷഹനയെയും കൂട്ടി വന്ന് റൊമാൻസ് കളിക്കാം ട്ടോ..

അല്ല,,, അവന്റെ പെണ്ണ് ആരാന്ന് പറഞ്ഞില്ലാലോ നിങ്ങളോട്,,, വേറാരുമല്ല,,, അതെന്റെ കുഞ്ഞോളാണ്... ആലിയ... ഈ പെണ്ണെന്ന് പറഞ്ഞാൽ ഭയങ്കര അത്ഭുതമാണ്... അവള് പതിനെട്ടടവും പയറ്റിയത് കൊണ്ട് ഇന്ന് ഷാഹിയെ തന്നെ കിട്ടി... അത് പോലെ തന്നെയാണ് ഞമ്മളെ പെണ്ണും... പെങ്ങളെ എന്ന് വിളിച്ചു നടന്ന എന്നെ കൊണ്ടവൾ എന്റെ പെണ്ണെന്ന് പറയിപ്പിച്ചില്ലേ...

ബോറടിച്ചല്ലേ,,, നിങ്ങൾക്ക്... കഥ ഇതെങ്ങോട്ടേക്കാണ് പോകുന്നതെന്നറിയാതെ... അപ്പോ ശരി നമുക്ക് തിരിച്ചു വരാം... പറഞ്ഞു നിർത്തിയിടത്തു നിന്ന് തന്നെ...
****************************************

അങ്ങനെ ഞങ്ങളുടെ കാര്യത്തിൽ ഒരു തീരുമാനമായി... അവളുടെ ഉപ്പയും സമ്മതിച്ചു,,, പാതി മനസ്സോടെയാണെന്ന് മാത്രം... അന്ന് അവളുടെ ഉപ്പ തിരിച്ചു പോകും മുന്നേ ഞങ്ങളുടെ എൻഗേജ്മെന്റ് നടത്തി... പക്ഷെ കല്യാണം അത് രണ്ട് വർഷം കഴിഞ്ഞിട്ടാണ് നടത്തിയത്...

നെറ്റ് എക്സാം എഴുതിയെടുത്തു ഞാൻ മറ്റൊരു ഗവൺമെന്റ് കോളേജിൽ ലെക്ച്ചർ ആയി കയറി... ഷഹനയെ കൊണ്ട് ഡിഗ്രി കംപ്ലീറ്റ് ചെയ്യിപ്പിച്ചു.. പിജി പഠിക്കാൻ അവളെ പറഞ്ഞു വിടുകയും ചെയ്തു... വല്ലപ്പോഴും കുടുംബ വീടുകളിലുള്ള ഫങ്ങ്ഷന് മാത്രമേ ഞങ്ങള് തമ്മിൽ കാണാറുള്ളു... കണ്ടിട്ടും വലിയ കാര്യമൊന്നുമില്ല ... എപ്പോ കണ്ടാലും ഞങ്ങള് തമ്മിൽ അടിയാണ്...

ആയിടക്കാണ് ഷാഹിയെ ഞമ്മളെ കുഞ്ഞനിയത്തി വളച്ചെടുത്തത്..  പക്ഷെ കല്യാണം കഴിഞ്ഞത് ഇപ്പോഴാണെന്ന് മാത്രം... അവൾക് പതിനെട്ട് വയസ്സാകാൻ കാത്തു നിന്നത് കൊണ്ടാണ്...

ഇപ്പോ ഞാൻ ഇവിടെ കാത്തിരിക്കുന്നത്,,, എന്റെ കുഞ്ഞു ഷഹനായ്ക്ക് വേണ്ടിയാണ്.. എന്താന്നറീല്ല ഞാനൊരു ഉപ്പയാകാൻ പോകുന്നൂന്ന് അറിഞ്ഞപ്പോൾ തൊട്ട് മനസ്സിലുള്ള ആഗ്രഹമാണ് ആദ്യം ജനിക്കുന്ന കുഞ്ഞു എന്റെ ഷഹനയെ പോലെ ഒരു വായാടി പെൺകുട്ടിയാകണമെന്ന്... 

വീണ്ടും ബോറടിച്ചു അല്ലേ,,, ആ ബോറടി ഞാനിപ്പോ മാറ്റി തരാം... നിങ്ങൾക്ക് ഞങ്ങളുടെ കല്യാണത്തെ കുറിച് കേൾക്കണ്ടേ,,, അതും കൂടി പറഞ് തരാം...
**************************************

ഇന്നായിരുന്നു ഞങ്ങളുടെ കല്യാണം... കല്യാണത്തിന് മുന്നേ ഷഹന എന്നോടൊരു കാര്യം ആവശ്യപ്പെട്ടിരുന്നു,, ആദ്യ രാത്രി അവളുടെ വീട്ടിലായിരിക്കണമെന്ന്... പക്ഷെ ഞാനാ ആവിശ്യം പാടെ തള്ളി കളഞ്ഞിരുന്നു... എന്റെ വീട്ടിൽ തന്നെയായിരിക്കുമെന്ന് പറഞ് അവളെ അന്ന് ചൊടിപ്പിച്ചു വിട്ടു... പറഞ്ഞാ പറഞ്ഞത് ചെയ്യുന്നവനാണല്ലോ ആഷി,,, അത് കൊണ്ട് ഇന്നിപ്പോ ഞാൻ എന്റെ വീട്ടിലെ ഞങ്ങളുടെ മണിയറയിൽ അവളെയും കാത്തിരിക്കുന്നുണ്ട്...

കാത്തിരിപ്പിനു വിരാമമിട്ട് കൊണ്ട് അവള് വെറും കയ്യോടെ റൂമിലേക്ക് കയറി വന്നു..

"എന്താടി ഷഹന,,, നിനക്ക് കുറച്ചു നാണത്തോടെയൊക്കെ വന്നൂടെ ??അല്ല,, നിന്റെ കയ്യിൽ പാലും കാണുന്നില്ലല്ലോ,,, അതെവിടെ ??"

"അയ്യടാ,,, നാണിച്ചിട്ട് വരാൻ ഞാൻ തന്നെ ആദ്യായിട്ട് കാണുന്നതൊന്നുമല്ലല്ലോ,,, പിന്നെ പാൽ,,, ഞാൻ വാഷ്‌ബേസിൽ മറിച്ചു... എനിക്കിഷ്ടമല്ല പാലൊന്നും... എനിക്കിഷ്ടമില്ലാത്തതു ആഷിയും കുടിക്കണ്ടാന്ന് വെച്ചു... "

ബെസ്റ്റ്... എന്തൊരു സ്നേഹം...

"അതൊക്കെ പോട്ടെ,, നിനക്കു റൂമിലേക്ക് കയറിയാൽ,, ആ ഡോറൊന്ന് ക്ലോസാക്കിക്കൂടെ ??"

ഞമ്മളെ കലിപ്പ് മോഡ് ആക്ടിവായി തുടങ്ങി...

"അത് ഞാൻ ഇങ്ങോട്ട് പോരുമ്പോ അജ്മൽക്ക പറഞ്ഞു ഡോർ ലോക്ക് ചെയ്യണ്ട,, അവിടെ യുദ്ധം നടന്നാൽ ആർക്കെങ്കിലും എന്തെങ്കിലും പറ്റിയാൽ ഫാ ബോക്സും കൊണ്ട് ഞങ്ങൾക്ക് ഓടി വരേണ്ടതാണെന്ന്... "

അവള് പറയുന്നത് കേട്ട് എനിക്ക് ചിരിയാണ് വന്നത്

"അതിനു നിന്നോട് ലോക്ക് ചെയ്യണ്ടന്നല്ലേ പറഞ്ഞുള്ളു,,,, ക്ലോസക്കണ്ട എന്ന് പറഞ്ഞില്ലല്ലോ "

എന്നും പറഞ് ഞാൻ പോയി ഡോർ ക്ലോസാക്കി,,, ലോക്കാക്കുകയും ചെയ്തു... അല്ല പിന്നെ... ഞമ്മളോടാ കളി...

ഞാൻ തിരിഞ്ഞു നടക്കുന്നതിനിടയിലാണ് ഷഹന പോയി കട്ടിലിനടിയിൽ ഒളിപ്പിച്ചു വെച്ച അവളുടെ ഹൈ ഹീൽ ചെരുപ്പ് എടുത്തിട്ട് ഇടുന്നത് കണ്ടത്...

പടച്ചോനെ,,, ചെരിപ്പെടുത്തിട്ട് ഞമ്മളെ മോന്തക്കിട്ട് എറിയാനായിരിക്കുമോ ??അങ്ങനെയൊരു സംശയം ഇല്ലാതില്ലാതില്ല....

"നീയെന്തിനാടി റൂമിനകത്തു നിന്ന് ചെരിപ്പ് ധരിക്കുന്നത്,, "

ഒന്നുമറിയാത്ത പോലെ ഞാനവളോട് ചോദിച്ചു...

"ആവിശ്യം വരും.. "

എന്ന് മാത്രം പറഞ് എനിക്കരികിലേക്ക് അവള് നടന്നടുത്തു... എനിക്കഭിമുഖമായി നിന്ന് എന്റെ കണ്ണുകളിലേക്ക് നോക്കി,,, ജസ്റ്റ് ഒന്ന് കണ്ണിറുക്കി... അവളുടെ ആ നോട്ടമെന്നിൽ വല്ലാത്ത കുളിർമയേകി...

എന്റെ കൈകളിൽ അവളുടെ കൈകളെ ചേർത്ത് പിടിച്ചു...

"ആഷി,,, ശരിക്കും നിന്നെ കാണാൻ നല്ല മൊഞ്ചുണ്ട് ട്ടോ,,, ലവ് യു ആഷി,,, "

അതും പറഞ്ഞവൾ അവളുടെ കൈകൾക്കുള്ളിലെ എന്റെ കൈകളെ കൂടുതൽ ശക്തിയായി പിടിച്ചു...

അവളുടെ കവിളിലെ  കാക്ക പുള്ളി ലക്ഷ്യമാക്കി എന്റെ അധരങ്ങൾ ചലിച്ചു തുടങ്ങാനൊരുമ്പോഴേക്കും അവളെന്റെ കാലിൽ കയറി ചവിട്ടി...  അതും ആ ഹീൽ ചെരിപ്പുമിട്ട്,,,,

"ഡി,,, നീയെന്താ ഈ കാണിക്കുന്നത്,,, എനിക്ക് വേദനിക്കുന്നുണ്ട് ട്ടോ... "

"അച്ചോടാ,,, എന്റെ ആഷിക്ക് വേദനിക്കുന്നുണ്ടോ,,,, സാരമില്ല ട്ടോ,, അന്ന് നീ അജ്‌വാന്റെ കല്യാണത്തിന് നിന്റെ ബൂട്ടിട്ട കാല് കൊണ്ട് എന്നെ ചവിട്ടി മെതിച്ചത് ഓർക്കുന്നുണ്ടോ,,, അതിനുള്ള പ്രതികാരമാണ് ഈ സ്നേഹപ്രകടനം.. "

അള്ളോഹ്,,, അതായിരുന്നോ,,, എന്റെ ചെങ്ങായിമാരെ നിങ്ങൾക്കോർമ്മയില്ലേ ആ സംഭവം,,, എന്റെ മനസ്സിലുള്ളത് ഈ കുരിപ്പിനോട്  പറയാൻ ചെന്നപ്പോൾ എന്നെ പറയാൻ സമ്മതിക്കാതെ അവള് മറ്റ് പലതും പറയാനൊരുങ്ങിയപ്പോ ഞാനെന്റെ കലി മുഴുവൻ തീർത്തത് അവളെ കാലിൽ കയറി ചവിട്ടിയിട്ടാണ്... ഉഫ്,,, ഇന്നത് ഞമ്മക്കിട്ട് കിട്ടി..

വേദന കൊണ്ട് ഞാൻ പിടയുന്നുണ്ടെങ്കിലും അവൾക്ക് യാതൊരു കുലുക്കവുമില്ല... ഒരച്ഛന്റെ രോദനം എന്നൊക്കെ ഇങ്ങള് കേട്ടിട്ടില്ലേ,,, ഇതിപ്പോ അതിനേക്കാൾ വലുതാ,, ഒരു കെട്ടിയോന്റെ രോദനം...അതും ആദ്യ രാത്രിയിൽ,,,  ആര് കേൾക്കാൻ,,,  എന്റെ അജ്മൽക്കാ,,, ഇങ്ങള് പറഞ്ഞത് കേട്ടിരുന്നെങ്കിൽ എനിക്കീ ഗതി വരില്ലായിരുന്നു..

അവളന്ന്  എന്നെ തള്ളി മാറ്റിയത് അവളുടെ കൈ കൊണ്ടായിരുന്നു... പക്ഷെ ഇവിടെ ഇപ്പോ എന്റെ കൈ അവളുടെ കസ്റ്റഡിയിലാ,,,

അവള് പഠിച്ച മോളാ,,,, നിനക്ക് ഞാൻ വെച്ചിട്ടുണ്ടെടി കോപ്പേ,,, ഇത് ഞാൻ മനസ്സിൽ പറഞ്ഞതാണ്... അവളോട് പറഞ്ഞാൽ പിന്നെ അതിനുള്ള എട്ടിന്റെ പണി വേറെ കിട്ടും..

എങ്ങനെയൊക്കെയോ അവളെ ഞാൻ തള്ളിയിട്ടു... ബെഡിലിരുന്ന് ഞാൻ എന്റെ കാലുകൾ തടവി കൊണ്ടിരുന്നു... ഹോ എന്തൊരു നീറ്റലാ...

അവളെന്നെ നോക്കി ചിരിക്കുന്നുണ്ട്.. പണ്ടാരം.. എന്നാലും ഇമ്മാതിരി ചതി ഞാൻ പ്രതീക്ഷിച്ചില്ല..

"എന്താ ആഷി വേദനിച്ചോ ??"

"ഇല്ലടി,, നല്ല സുഖമുണ്ട്... "

കലിപ്പിൽ തന്നെ ഞാനവളോട് മറുപടി പറഞ്ഞു..

അവളെന്റെ അടുത്ത് വന്നിരുന്നു... ഇനി അടുത്ത കലാപരിപാടി എന്താന്ന് നോക്കാം...

എന്റെ ഒരു കൈ എടുത്ത് അവള് പതിയെ തലോടി,,, എന്നിട്ട് എന്നെ നോക്കിയൊന്ന് പുഞ്ചിരിച്ചു... തിരിച്ചു ഞമ്മളും.. പെട്ടെന്നവൾ എന്റെ കൈ പിടിച്ചു വലിച്ചു പിറകിലേക്ക് ആക്കി,,,

വീണ്ടും കിട്ടി ഞമ്മക്കിട്ട്... അത് എന്തിനുള്ള പ്രതികരമാണാവോ എന്ന് ചിന്തിച്ചപ്പോഴാണ് അന്ന് കോളേജിലെ ഗ്രൗണ്ടിൽ വെച്ചു അവളുടെ ഫോണിൽ നിന്ന് ഒരു പിക് ഡിലീറ്റ് ആക്കാൻ വിസമ്മതിച്ചപ്പോൾ ഞാൻ അവളെ ചെയ്തതാണ്,,, ഈ കൈ തിരിക്കൽ പ്രയോഗം.. അല്ലാഹ്... ഇന്നത്തെ രാത്രി പൊളിയന്നെ...

പക്ഷെ അങ്ങനെ വിട്ടു കൊടുക്കാൻ ആഷി തയ്യാറല്ലായിരുന്നു... മറ്റേ കൈ കൊണ്ട് അവളെ പിടിച്ചു വലിച്ചു എന്നിലേക്കടുപ്പിച്ചു.. അവള് കുതറി മാറി പോകാനൊരുങ്ങി... പിറകിലൂടെ പോയി അവളുടെ ആ നീളൻ മുടിയിൽ പിടിച്ചു വലിച്ചു... ദാ,,, പെണ്ണവിടെ നിന്നു...

എന്നിൽ നിന്ന് രക്ഷ നേടാതിരിക്കാൻ മറു കൈ കൊണ്ട് ഞാൻ അവളെ ലോക്ക് ചെയ്തിരുന്നു... മുടിക്കുത്തിൽ പിടിച്ചത് കൊണ്ട് അവളുടെ മുഖഭാവം എനിക്ക് കാണാൻ പറ്റുന്നില്ല ട്ടോ..

"ആഷി,, പ്ലീസ്,,, മുടിയിൽ പിടിച്ചു വലിക്കല്ലേ,, എനിക്ക് വേദനിക്കുന്നുണ്ട്... "

"അയ്യോടാ,, എന്റെ വായാടിക്ക് വേദനിക്കുന്നുണ്ടോ,,, സാരമില്ല ട്ടോ... നീയെന്താടി കോപ്പേ കരുതിയത് ??എന്നോട് പ്രതികാരം ചെയ്താൽ ഞാൻ നിന്നെ വെറുതേ വിടുമെന്നോ,,, മോളുടെ പ്രയോഗങ്ങളൊക്കെ സൂപ്പർ ആയിരുന്നു... തിരിച്ചു ആഷി എന്തെങ്കിലും ചെയ്യണ്ടേ,,, അല്ലേൽ അത് എന്റെ തോൽവിയായി നീ കാണില്ലേ,,, "

"നീ മുടിയിൽ നിന്ന് വിടുന്നുണ്ടോ ഇല്ലയോ ??,,, ഞാൻ കൂക്കി വിളിച്ചു ഒച്ചയുണ്ടാക്കണ്ടേങ്കിൽ പിടി വിടെടാ,,, "

"ആഹാ,,, അങ്ങനെയൊരു ഐറ്റം കൂടിയുണ്ടോ,,, എന്നാ അതൊന്ന് കേൾക്കട്ടെ,,, നീ കൂകിയാൽ എനിക്കൊന്നുമില്ല.....ആര് കേട്ടാലും പ്രശ്നമില്ല,,, ഇവിടെയുള്ളവരൊക്കെ എന്റെ വീട്ടുകാരല്ലേ,,, അവരതൊന്നും കാര്യമാക്കില്ല... "

ഞാനതും പറഞ് അവളെ ഒന്ന് കൂടി എന്നിലേക്കടുപ്പിച്ചു...

അപ്രതീക്ഷിതമായാണ് അവളുടെ കൈ മുട്ട് കൊണ്ട് എന്നെ തള്ളിയിട്ടത്... പടച്ചോനെ ഇവൾക്ക് കരാട്ടെയും ഗുസ്തിയുമൊക്കെ അറിയാമെന്ന് തോന്നുന്നു... ഞമ്മളെ തോൽപ്പിച്ചത് കണ്ടാ,,,

തോറ്റത് എങ്ങനെയെന്നറിയുമോ നിങ്ങൾക്ക്,,, അവളെ ഒന്ന് കൂടെ എന്നിലേക്കടുപ്പിച്ചപ്പോൾ എന്നിലെ കാമുകൻ ഉണർന്നൂന്ന് വേണം പറയാൻ... ഞാനറിയാതെ മുടിക്കുത്തിൽ പിടിച്ച എന്റെ കൈ ഒന്നയഞ്ഞു.. ആ കറക്റ്റ് ടൈമിങ്ങിൽ അവളെന്നെ തള്ളി... തോൽവികൾ ഏറ്റുവാങ്ങാൻ ആഷിയുടെ ജീവിതം ബാക്കി...

ബെഡിലേക്ക് വീണ ഞമ്മളെ നോക്കി ഓള് പൊട്ടി ചിരിക്കാൻ തുടങ്ങി...

"പോടീ,,, "

ദേഷ്യം കൊണ്ട് ഞാൻ മുഖം കൊടുക്കാതെ ചെരിഞ്ഞു കിടന്നു.. അവളത് മുതലെടുക്കുകയും ചെയ്തു... അവളും മുഖം തിരിഞ്ഞു കിടന്നു..

ഞാനവളുടെ അരികിലേക്ക് നീങ്ങി കിടന്നിട്ട് പതിയെ കാതിൽ പറഞ്ഞു..

"ഷഹന,,, മതി പ്രതികാരം ചെയ്തതൊക്കെ.. ഇനി നമുക്ക് പുതിയൊരു ജീവിതം തുടങ്ങാം... ഇന്ന് നമ്മുടെ ആദ്യ രാത്രിയല്ലേ,,, പ്രതികാരം വീട്ടലും വായാടിത്തരം പറയലുമൊക്കെ മാറ്റി വെച്ചു നമുക്കിനി നമ്മുടേതായ ലോകത്തേക്ക് പോകാം... "

"അയ്യടാ,,, ആ പൂതി മോനങ് മനസ്സിൽ വെച്ചാ മതി... ഇന്നത്തെ ദിവസം മോൻ പട്ടിണിയാ... ഇതും ഒരു പ്രതികരമാ,,, അന്നെന്നെ കോളേജ് ഡേയ്ക്ക് ഒരു സ്വാതന്ത്യവും തരാതെ നിന്റെ ഒപ്പം പിടിച്ചിരുത്തിയില്ലേ,,, അതിനുള്ള പ്രതികാരം... "

അതും കൂടി കേട്ടതോടെ എന്റെ കലിയങ് ഇളകി...

"നീയും നിന്റെയൊരു പ്രതികാരവും "..

എന്നും പറഞ് ഞാനവളെ ചവിട്ടി താഴെയിട്ടു...

അവളെഴുന്നേറ്റ് പോയി സോഫയിൽ കിടന്നു..

"നീ നോക്കികോടി,,, ഈ രാത്രി എന്നെ പട്ടിണിക്കിട്ടതിനു ഇനിയെല്ലാ രാത്രിയും നിനക്ക് ഞാൻ എട്ടിന്റെ പണി തന്ന് പ്രതികാരം വീട്ടുന്നത്.. "

"നീ പോടാ ചൂടാ "

പറഞ്ഞത് പോലെ തന്നെ,, പിറ്റേന്ന് മുതല് ഞമ്മള് പ്രതികാരം വീട്ടാൻ തുടങ്ങി... ഓളോട്... മധുര പ്രതികരമാണെന്ന് മാത്രം...

അവളോടുള്ള പ്രതികാരം അവള് ഒരുമ്മയാകാൻ പോകുന്നൂന്ന് അറിഞ്ഞതോടെ കുറയുമെന്നാണ് ഞാൻ വിചാരിച്ചത്... പക്ഷെ നേരെ എതിരാണ് സംഭവിച്ചത്...

അവൾക്കെന്റെ സാമീപ്യം പോലും പിടിക്കാറില്ല... ഞാനൊന്ന് അടുത്ത് പോയി നിന്നാൽ അവൾക്ക് ഓക്കാനം വരും.. എന്നെ ആട്ടി പായിക്കും... ഞമ്മള് വിടുമോ,,, അവളുടെ ഓക്കാനം കണ്ട് രസിക്കാൻ ഞാനെപ്പോഴും ഓൾടെ പിറകെ നടന്ന് ശല്യപെടുത്തും...

പക്ഷെ,,, ഇന്നിപ്പോ അവളനുഭവിക്കുന്ന ശാരീരിക വേദനയേക്കാൾ മാനസിക വേദന ഞാനനുഭവിക്കുന്നുണ്ട്,,,.. എന്താണിങ്ങനെ...

"ഷഹന പ്രസവിച്ചു,,, ആൺകുട്ടിയാണ് "

ഒരു മാലാഖ വന്ന് പറഞ്ഞിട്ട് പോയപ്പോൾ ഞമ്മളെ അവള് പ്രതികാരം ചെയ്ത് വീണ്ടും തോല്പിച്ചതിനെ കുറിച്ചോർത്തു സന്തോഷിക്കുകയാണ് ഞാൻ ചെയ്തത്...

കുഞ്ഞു ഷഹനയ്ക്ക് വേണ്ടി വാശി പിടിച്ചിരുന്ന എനിക്ക് ഒരു കുഞ്ഞു ചൂഡനെ തന്നെ വീണ്ടുമവൾ എന്നോട് പ്രതികാരം ചെയ്തു...

**************************************

"ഡി,, ഷഹന,,, നീ മോനെയൊന്ന് നോക്കേ,,, എനിക്ക് കോളേജിൽ പോകാൻ ടൈമായി.. "

ഞാനത് വിളിച്ചു പറഞ്ഞിട്ടും അവൾക്ക് യാതൊരു കുലുക്കവുമില്ല... അവളവിടെ കണ്ണാടിക്ക് മുന്നിൽ നിന്ന് മുടിയെ നോക്കി സ്വയം പരിതപിക്കുന്നുണ്ട്...

വീണ്ടും വിളിച്ചു പറഞ്ഞിട്ട് കേൾക്കാത്തപ്പോ ഞാൻ മോനെ എടുത്ത് കൊണ്ട് പോയി എന്റെ ഉമ്മയെ ഏൽപ്പിച്ചു... ബൈക്ക് എടുക്കാൻ നോക്കുമ്പോഴാണ് ചാവി ബെഡ്‌റൂമിലാണല്ലോ എന്നോർമ്മ വന്നത്..

ഓടിക്കയറി വാതിൽ തുറന്നതും ഷഹന വന്ന് എന്റെ മേലേക്ക് വീണതും ഒരുമിച്ചായിരുന്നു..

"എന്താടി കോപ്പേ നിനക്ക് കണ്ണ് കണ്ടൂടെ ??"

"ആഹാ,, കണ്ണ് കാണുന്നുണ്ട്,, പക്ഷെ ഇന്നെന്താ ഇത്ര മൊഞ്ചു എന്ന് ആലോചിച്ചു കണ്ണ് തള്ളി പോയതാ... "

അതും പറഞ്ഞവൾ പോകാനൊരുങ്ങിയപ്പോ അവളെ പിടിച്ചു എന്നിലേക്ക് അടുപ്പിച്ചു...

"ഇന്ന് അത്രയ്ക്ക് മൊഞ്ചുണ്ടോടി,,, എന്നാ ഞാനിന്ന് ലീവാക്കാം... "

അതും പറഞ് ഞാനൊന്ന് കണ്ണിറുക്കി..

"അയ്യടാ,,, എന്താ ഒരു പൂതി... ലീവൊന്നും ആക്കാൻ നിൽക്കണ്ട.. അല്ലെങ്കിലേ നിങ്ങളിപ്പോ എപ്പഴും ലീവാണല്ലോ... "

"ഹും,,, എന്നാ ശരി ഞാൻ പോണു... "

അതും പറഞ് ഞാൻ ചാവിയെടുത്തു പോകാനൊരുങ്ങുമ്പോഴാണ് അവള് വന്ന് പറഞ്ഞത്...

"ആഷി,,, കോടമഞ്ഞു താഴ്വരയിലേക്ക് ഇനിയെന്നാ കൊണ്ടു പോവുക ??"

അവളത് എന്നെയൊന്ന് ആകിയതാണ്...

അവൾക്കരികിലേക്ക് പോയി,,, എന്റെ മാറോട് ചേർത്ത് പിടിച്ചു ഞാൻ വീണ്ടും പറഞ്ഞു...

"കോടമഞ്ഞു താഴ്വരയിലെ ഒരു തണുത്ത പ്രഭാതം,,, അവിടെ ഞാനും എന്റെ പെണ്ണും മാത്രമുള്ളൊരു ലോകം,,,, അന്ന് ഞാൻ നൽകും എന്റെ പെണ്ണിന് ഒരു ചൂടൻ പ്രണയ ചുംബനം... "

അത് കേട്ട് കഴിഞ്ഞപ്പോൾ അവളെന്നെ നോക്കി പറഞ്ഞു...

"ശരിയാണ് ആഷി,,, നീ ഇതുവരെ തന്നതൊക്കെ തണുത്ത ചുംബനങ്ങളായിരുന്നു... ഇനിയിപ്പോ ചൂടുള്ളത് കിട്ടാൻ എന്താ ചെയ്യാ ??"

"അതൊരു ചൂടൻ തന്നാൽ തീരുന്ന പ്രശ്നമേയുള്ളു,,, കോടമഞ്ഞു താഴ്വരയെ സാക്ഷിയാക്കണമെന്നൊന്നും ഇല്ലടി.. "

"എന്നാ തന്നോളൂ മാഷേ,,, "

"അതിനു മുമ്പ് നീയെനിക്കൊരു വാക്ക് താ,,, ഒരു കുഞ്ഞു ഷഹനയെ എത്രയും പെട്ടെന്ന് തന്നെ എന്റെ കരങ്ങളിലേൽപ്പിക്കുമെന്ന്.... "

നാണം കൊണ്ടവൾ എന്നിലേക്ക് ഊണ്ട് ചേർന്ന് നിന്നപ്പോൾ അതവൾ എനിക്ക് തന്ന വാക്കായി കണ്ട് കൊണ്ട് ഞങ്ങള് ഞങ്ങളുടെ സ്വകാര്യതയിലേക്ക്....

നിങ്ങൾ നെഞ്ചിലേറ്റിയ ഷഹന,,, ഇന്നെന്റെ നെഞ്ചിൽ ചേർന്ന് നിൽക്കുമ്പോൾ ഞങ്ങള് തുടങ്ങുന്നു വീണ്ടുമൊരു പുതിയ ജീവിതം... കഥ അതിന്റെ പരിസമാപ്തിയിലേക്കും....

അവസാനിച്ചു.....

(വെറുമൊരു ചെറുകഥയായി എഴുതാൻ ഉദ്ദേശിച്ചതായിരുന്നു ഷഹന എന്ന സ്റ്റോറി... പക്ഷെ എന്റെ പ്രിയപ്പെട്ട വായനക്കാരുടെ അഭ്യർത്ഥന മാനിച്ചു ഞാനത് തുടർക്കഥയിലേക്ക് എത്തിച്ചു... പെട്ടെന്ന് തീർക്കല്ലേ എന്ന് പറഞ് നിങ്ങൾ പരിഭവം നടിക്കുമ്പോൾ എനിക്കൊന്നേ പറയാനുള്ളു,, നീട്ടി വലിച്ചു എഴുതി കൊണ്ടു പോകാൻ മാത്രമുള്ള കഥ തന്തുവൊന്നും  ഈ കഥയ്ക്കില്ല... അത് കൊണ്ട് മാത്രമാണ് ഇത് പെട്ടെന്ന് അവസാനിപ്പിക്കുന്നത്...

തുടക്കം മുതൽ  അവസാനം വരെ കൂടെ നിന്ന് പ്രോത്സാഹിപ്പിക്കാൻ നിങ്ങൾ വായനക്കാർ കാണിച്ച സന്മനസ്സിനു എന്റെ ഹൃദ്യമായ നന്ദി രേഖപെടുത്തുന്നു....

Ramsifaiz